Bu gün ölkədə fəaliyyət göstərən mağazalar şəbəkələri arasında müştəriyə barmaqarası baxmaq, onun halal zəhmətlə qazandığı pulunu mənimsəmək və istehlakçı hüquqlarını açıq-aşkar tapdalamaq mövzusunda Baku Electronics ilə yarışa biləcək ikinci bir qurum tapmaq çətindir. İllərdir divarlardan, ekranlardan asılan “pərəstişkarı olacaqsınız” bəzəkli reklam şüarlarının arxasında əslində vahid bir hiylə mexanizmi – vətəndaşı aldatmaq və soymaq sistemi dayanır.
Bu sistemin canlı qurbanlarından biri də şəxsən mənəm! İnanıb, güvənib az qala bir var-dövlət qiymətinə — tam 4 min manata aldığım telefonun ili tamam olmamış sıradan çıxdı. Həm ekranı alt-üst oldu, həm də cihaz əldə saxlanılmayacaq dərəcədə qızmağa başladı.
Problem yarandıqda nə etməli idim? Əlbəttə ki, rəsmi zəmanəti olan mağazaya üz tutmalı idim.
Amma Baku Electronics-ə gedəndə mənə göstərilən "xidmət" nə oldu? 4 min manatlıq texniki zibilin arxasında durub problemi həll etmək əvəzinə, üstümə psixoloji təzyiq göstərdilər, kobudluq edib məni günahkar çıxarmağa çalışdılar! İnsanlardan 4 min manatı almağı bilirlər, amma verdikləri xarab malın arxasında durmağa gələndə utanmaz utanmaz müştərinin üstünə yeriyirlər.
Gəlin bu bəzəkli vitrinlərin, yalançı təbəssümlərin arxasındakı acı həqiqətləri olduğu kimi, kəskin və açıq şəkildə ortaya qoyaq:
Qüsurlu mal satışı və “İstifadəçi xətası” fırıldağı
Baku Electronics-in mağazasına qədəm qoyanda qarşında baş əyən satıcılar, pulu kassa daxil edən kimi tamamilə başqa adama çevrilirlər.
Şirkətin ən böyük özbaşınalığı xarab, defektli, hətta bəzən əvvəllər təmir olunub yenidən vitrinə qoyulmuş texnikanı yeni adı ilə insanlara sırımaqdır.
Məhsul ilk günlərdən sıradan çıxanda və vətəndaş qanuni hüququ olan 14 gün ərzində malın dəyişdirilməsini və ya pulun qaytarılmasını tələb edəndə oyun başlayır.
Məhsul onların cib servisi olan "Baku Service Company"yə yönləndirilir. Orada isə mühəndis adı altında əyləşənlərin tək işi var: nə olur-olsun, günahı müştərinin üstünə atmaq! "Su düşüb", "gərginlik oynayıb", "yerə vurmusunuz" kimi gülünc bəhanələrlə insanları şərləyir, öz məsuliyyətsizliklərinin bədəlini vətəndaşa ödətdirirlər.
Bu, sadəcə xidmət qüsuru deyil, birbaşa müştərinin cibinə girməkdir!
“Endirim” adı altında həyata keçirilən qiymət saxtakarlığı
"Möhtəşəm Cümə", "0% ilkin ödəniş", "Böyük Endirim" şüarları bu şirkətin insanları toruna salmaq üçün istifadə etdiyi növbəti tələdir. Kampaniyadan bir neçə gün öncə məhsulun qiymətini süni şəkildə astronomik həddə qaldırırlar, sonra isə üstündən qırmızı xətt çəkib "böyük endirim" elan edirlər.
Nəticədə savadsızlaşdırılmış reklam manipulyasiyası ilə vətəndaşa köhnə qiymətdən də baha mal satırlar. Hədiyyəli satış dedikləri isə tam bir biabırçılıqdır – kassaya çatanda "hədiyyələr qurtardı" deyib insanları açıq-aşkar ələ salırlar.
Servis işgəncəsi və qanunsuzluq
Zəmanətli məhsulun təmiri Baku Electronics-də müştəriyə verilən işgəncəyə çevrilir. "Xaricdən detal gəlir" yalanı ilə insanları aylarla gözlədirlər.
Azərbaycan Respublikasının "İstehlakçıların hüquqlarının müdafiəsi haqqında" Qanununun tələbləri bu şirkət üçün heç bir əhəmiyyət kəsb etmir. Qanuna görə təmir müddətində müştəriyə müvəqqəti əvəzedici cihaz verilməlidir, amma Baku Electronics bu normanı açıq-aşkar ayaqlar altına alır.
İnsanları soyuducusuz, paltaryuyansız, mobil telefonsuz saxlayaraq cəhənnəmi yaşadırlar.
Kredit terroru və psixoloji təzyiq
İnsanların ehtiyacından istifadə edib hissə-hissə ödənişlə mal satan bu şəbəkə, bir günlük gecikmə olan kimi əsl üzünü göstərir.
Özlərinin ödəniş sistemlərindəki texniki xətalara görə belə günahı vətəndaşın üstünə yıxır, dərhal qanunsuz cərimələr tətbiq edirlər.
Zəng mərkəzinin əməkdaşları müştərilərlə, onların ailə üzvləri və zaminləri ilə elə kobud, reket sayağı tonda danışırlar ki, sanki qarşılarındakı insan deyil.
Baku Electronics müştərisinə insan kimi deyil, sadəcə sağılan inək və birdəfəlik gəlir mənbəyi kimi baxır. İnsanların halallıqla qazandığı pulu bu dərəcədə rahatlıqla mənimsəmək, qanunları və vətəndaşı saymamaq hədsizlikdir.
Şirkət rəhbərliyi anlamalıdır ki, xalqın haqqına girməklə, insanları aldatmaqla imperiya qurmaq olmaz. Bu gün insanları susdurmaq, aldatmaq olar, amma tezliklə bu dərəbəyliyin cavabını nəinki məhkəmə zalında, bazarın özündən kütləvi şəkildə silinməklə verəcəksiniz.
Bu özbaşınalığa və istehlakçı terroruna dur deməyin vaxtı çoxdan çatıb!
Sima Babayeva

Keçən günlərdə “Neftqaztikinti” trestinin işçiləri adından "DİA-AZ"a daxil olan müraciəti təqdim etdik. Müraciətdə narazı fəhlələr sosial durumlarının ağır olmasından gileylənərək SOCAR Prezidenti Rövşən Nəcəfdəın konkret tələblərinin olduğunu da ifadə etmişdilər. Onlar “Neftqaztikinti” trestinin rəhbəri Qağaməli Seyfullayevin yarıtmaz fəaliyyətini irəli sürərək onun yerinə daha səriştəli və bacarıqlı kadrın gətirilməsini istəmişdilər.

Qeyd edək ki, bu məlumatı paylaşdıqdan sonra iddia olunanlarla bağlı cavab vermək əvəzinə Qağaməli Seyfullayev fərqli davranmağa üstünlük verdi və bizə aid sosial şəbəkələrdə "Qağaməli Seyfullayev layiqli kadrdır" kimi fikirləri deyən trollarının rəy hücumlarını təşkil etdi. Bununla sanki reallıqdakı eybəcərliklər ört-basdır olunmuş oldu. Hər halda, SOCAR rəhbərliyi bütün baş verənlər barədə gerçək bilgilərə malikdir. Biz isə işçilərin hazırki durumlarını əks etdirən daha bir neçə giley dolu müraciəti təqdim edirik.

“Neftqaztikinti” trestinin işçisi olan Mehman Mehmanlı özünün sosial şəbəkə hesabında yazır: "25 illik stajım var. Amma buna qarşılıq olaraq qəpik-quruş alırıq. Həç neə... Tək ümidimiz Allahdır. Allah böyükdür... Allah kərimdir..."

“Neftqaztikinti” trestinin işçisi olan Teymur Məmmədli özünün sosial şəbəkə hesabında belə yazır:

"18 ildir ki, dənizdə çalışıram. 4-cü dərəcə ilə... Atam da orda faciəvi şəkildə dünyasını dəyişdi... Olduqları gəmi körpüyə dəydikdən sonra baş verən qəzada öldü.

Mənə dərəcə verilmir. Amma vakansiya olanda əgər 3 nəfər çağrılırsa, onlardan biri keçməlidir, 2-si qalmalıdır... Təbii ki, müsahibədən keçən də rəhbərliyin adamı olur. Adamın yoxdursa, dərəcə belə almaq imkansızdır..."

“Neftqaztikinti” trestinin işçisi olan Yunis Camalov yazır: "Qağaməlinin yaltaqları haqq etmədikləri məvacibin müqabilində ARDNŞ-ni Seyfullayevləşdirən bu zatı tərifləməylə məşğuldular. Bu yaltaqlar da yaxşı bilirlər ki, Qağaları nə kimi hoqqalardan çıxıb və çıxmaqda davam edir. İnşallah, Respublikanın mötəbər təşkilatları hərəkətə keçərək Qağaməli haqqında Azərbaycan Respublikası Qanunları çərçivəsində tədbir görərlər və Rövşən Nəcəf nəhjayətdə yuxudan ayılar... ARDNŞ-i heç kimin arxa baxçası deyil..."

“Neftqaztikinti” trestinin işçisi olan İzzət Əhmədov yazır: Mənim kimilərinin - Əhmədov İzzətin adamı yoxdur deyə yalandan adama quru vəd verirlər... Bunu əvəzində isə öz adamları 6-cı dərəcə ilə fırlanırlar..."

“Neftqaztikinti” trestinin işçisi olan Teymur Məmmədli isə belə yazır: Dərəcə problemi çox çətindir. 18 ildir ki, dənizçiyəm... 4-cü dərəcədə qalmışam. Elə işçi də var ki, 40 ildir 4-cü dərəcədə qalıb..."

DAVAMI OLACAQ...

DİA-AZ

Redaksiyamıza etibarlı mənbənin verdiyi məlumata görə, ötən gün Kəpəz Hospitalda ölüm hadisəsi baş verib. Həyatını itirən Tunil adlı qadın Almaniya vətəndaşı olub.Məlumata görə, qadının keçirdiyi estetik əməliyyatda adı əvvəllər Səhiyyə Nazirliyi tərəfindən estetik cərrahiyyə fəaliyyəti üzrə sertifikatının ləğv edildiyi bildirilən həkim Seymur Məmmədov həyata keçirib.
Yenixeberorg.com: Belə uğursuz əməliyyatlardan biri də ötən ilin avqust ayının 15 də “Etalon" hospitalda baş verib. Mediatvaz.com xəbər verir ki,tanınmış psixoloq Nilufər Abdulla Səhiyyə Nazirliyi tərəfindən sertifikatı ləvğ olunmuş Seymur Məmmədov tərəfindən plastik əməliyyat olunub,əməliyyatdan sonra onun vəziyyəti ağırlaşıb və vəfat edib.Rəhmətə getmiş 1989-cu il təvəllüdlü Nilufər Abdullanın 3 azyaşlı uşağı qalıb. Bu ölüm hadisəsi Seymur Məmmədov tərəfindən həyata keçrilmiş estetik əməliyyatdan sonra ikincidir.1991-ci il təvəllüdlü Pərvanə Mirzəyeva da Seymur Məmmədov tərəfindən plastik əməliyyat olunub,əməliyyatdan bir neçə gün sonra yaşadığı evdə meyidi aşkarlanıb.Rəhmətə getmiş Pərvanə Mirzəyeva bir azyaşlı uşağı qalıb.Tunil adlı qadının ölümü isə üçüncü ölüm hadisəsi sayılır.Qeyd edək ki, redaksiyamıza daxil olan məlumata görə, Kəpəz Hospitala son altı ayda Ariz Cəbrayılov rəhbərlik edir.Redaksiya olaraq Kəpəz Hospitalın rəhbərliyinin və digər aidiyyəti qurumların mövqeyini dərc etməyə hazırıq. Yeni faktlar və rəsmi açıqlamalar olduqca material yenilənəcək.(metiatvaz.com)

Azərbaycan Respublikasının birinci Yitse Prezidenti
Hörmətli Mehriban xanım Əliyevaya
Ağayev Zabit Xanverdi oğlunun
Müraciəti.
Hörmətli Mehriban xanım!
Mən, Masallı rayonu, Əminli kənd sakini Ağayev Zabit Xanverdi oğlu, 27 yanvar 1992-ci il tarixdən etibarən Azərbaycan Respublikası Dövlət Neft Şirkətinin (SOCAR) Qazma İşləri Trestində 6-cı dərəcəli maşinist vəzifəsində çalışmışam. 34 il ərzində neft sənayesində vicdanla və qüsursuz çalışmış, əmək fəaliyyətim dövründə hər hansı ciddi intizam pozuntusuna yol verməmişəm.
Lakin 31 mart 2026-cı il tarixində heç bir qanuni əsas göstərilmədən mənə bildirildi ki, çalışdığım ştat vahidinə başqa bir şəxs təyin olunub və özümə başqa iş yeri tapmalıyam. Mənə açıq şəkildə bildirildi ki, öz ərizəmlə işdən çıxmasam, qısa müddət ərzində müxtəlif bəhanələrlə işdən azad ediləcəyəm.
Bu təzyiqlər və psixoloji təsirlər nəticəsində 3 aprel 2026-cı il tarixində məcburiyyət qarşısında qalaraq öz ərizəmlə işdən çıxmaq barədə ərizə yazmağa vadar oldum. Həmin ərizə mənim sərbəst iradəmin ifadəsi deyil, mənə qarşı göstərilən inzibati təzyiq və hədələrin nəticəsində yazılmışdır.Məni xüsusilə narahat edən məqamlardan biri də odur ki, bu qanunsuzluğu əsaslandırmaq üçün bəzi vəzifəli şəxslər ölkə rəhbərliyinin adından sui-istifadə edərək, yerimə gətirilən şəxsin guya "yuxarıların adamı" olduğunu bildirirdilər. Hesab edirəm ki, dövlət rəhbərliyinin adından bu cür istifadə edilməsi yolverilməzdir və araşdırılmalıdır.
Bu məsələ ilə bağlı Prezident Administrasiyasına, SOCAR rəhbərliyinə və digər aidiyyəti dövlət qurumlarına dəfələrlə müraciət etmişəm. Təəssüf ki, müraciətlərim obyektiv araşdırılmamış, yalnız işdən çıxma ərizəmi özümün yazdığım əsas gətirilmişdir. Halbuki həmin ərizə mənim sərbəst iradəmin deyil, göstərilən təzyiqin nəticəsi olmuşdur.Hazırda 58 yaşım var. Uzun illər ağır və zərərli əmək şəraitində çalışdığım üçün güzəştli şərtlərlə pensiyaya çıxmağıma cəmi 3 il qalmışdır. Ömrünün 34 ilini dövlətin neft sənayesinə həsr etmiş bir işçinin pensiya ərəfəsində bu cür vəziyyətə salınması mənə və ailəmə ağır maddi və mənəvi zərbə vurmuşdur.
Fərdi pensiya hesabımda uzun illərin əməyi nəticəsində təxminən 120 000 manat pensiya kapitalı formalaşmışdır. Lakin işsiz qalmağım səbəbindən ailəmin maddi vəziyyəti kəskin pisləşmiş, bank qarşısında öhdəliklərimi yerinə yetirməkdə çətinlik çəkirəm.
Bundan əlavə, ailəmdə ruhi-əsəb xəstəliyindən əziyyət çəkən ailə üzvü vardır. Onun müalicəsi və daimi qayğısı ailəmiz üçün böyük maliyyə yükü yaradır. İşsiz qalmağım həmin şəxsin müalicəsinin davam etdirilməsini də ciddi təhlükə altına qoymuşdur.
Hörmətli Mehriban xanım!
Sizin ölkəmizdə sosial müdafiəyə, humanizmə və vətəndaşların problemlərinin həllinə göstərdiyiniz xüsusi diqqəti nəzərə alaraq, son ümid yeri kimi Sizə müraciət edirəm.
Sizdən xahiş edirəm:
-Müraciətimin obyektiv, hərtərəfli və qərəzsiz araşdırılmasına köməklik göstərəsiniz;
-İşdən çıxarılmağımın qanuniliyinin yoxlanılmasını təmin edəsiniz;
-Mənə qarşı göstərilmiş təzyiq və qanunsuz hərəkətlərə hüquqi qiymət verilməsi üçün aidiyyəti dövlət qurumlarına müvafiq tapşırıqlar verilməsinə dəstək göstərəsiniz;
-Dövlət rəhbərliyinin adından sui-istifadə etmiş şəxslərin müəyyən edilərək məsuliyyətə cəlb olunmasına köməklik göstərəsiniz;
-Pozulmuş əmək hüquqlarımın bərpa olunmasına və əvvəlki iş yerimə qaytarılmağımın təmin edilməsinə dəstək olasınız.
İnanıram ki, müraciətimə həssaslıqla yanaşılacaq, qanunun aliliyi və sosial ədalət prinsipləri rəhbər tutulmaqla pozulmuş hüquqlarımın bərpası üçün lazımi tədbirlər görüləcəkdir.
Əvvəlcədən göstərəcəyiniz diqqətə və dəstəyə görə Sizə dərin minnətdarlığımı bildirirəm.
İmza: _______
Ad, soyad: Ağayev Zabit Xanverdi oğlu
Ünvan: Masallı rayonu, Əminli kəndi
Telefon: 050 369 72 61
Qeyd: Yuxarıda qeyd olunan problemlə əlaqədar Ağayev Zabit Xanverdi oğlu, həm də başqa dövlət qurumlarına da müraciət etmişdir.
Mirvari Gahramanli

Teref

Ana Azərbaycan Respublikasının Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevaya humanist məzmunlu müraciət ünvanlayıb.
Müraciətdə bildirilir ki, ananın qızı hazırda Azərbaycan Dövlət İqtisad Universitetində (UNEC) təhsil alır. Lakin o, gənc yaşlarında ağır onkoloji xəstəlik – qan xərçəngi diaqnozu aldığı üçün uzun müddətdir müalicə və reabilitasiya prosesindən keçir.
Səhhətində yaranan ciddi problemlər səbəbindən tələbə əvvəlki tədris ilində akademik məzuniyyət götürmək məcburiyyətində qalıb. Hazırda da müalicəsi davam etdiyindən həkimlərin rəyinə əsasən əyani formada təhsilini davam etdirməsi mümkün deyil. Həkimlər onun sağlamlığının qorunması və ali təhsilini yarımçıq qoymaması üçün təhsilini qiyabi formada davam etdirməsini daha məqsədəuyğun hesab edirlər.
Lakin ailənin qarşılaşdığı əsas problem müraciət müddəti ilə bağlı olub. Müalicə prosesinin intensivliyi və zəruri tibbi sənədlərin hazırlanması səbəbindən təhsil formasının dəyişdirilməsi üçün transfer.edu.az elektron sistemi üzərindən ayrılmış müddətdə müraciəti tamamlamaq mümkün olmayıb.
Valideyn hesab edir ki, yaranmış vəziyyət sıradan bir texniki gecikmə deyil, ağır xəstəliklə mübarizə aparan bir gəncin həyat şəraitindən irəli gələn istisna haldır. O, məhz buna görə aidiyyəti qurumların məsələyə humanist yanaşmasının vacibliyini vurğulayır.
Ana müraciətində qeyd edir ki, Leyla Əliyevanın illərdir həyata keçirdiyi sosial layihələr, xəstə uşaqlara, tələbələrə və xüsusi qayğıya ehtiyacı olan insanlara göstərdiyi dəstək minlərlə ailənin ümid yerinə çevrilib. Məhz bu inamla o, qızının təhsil hüququnun qorunmasına kömək göstərilməsi üçün dəstək istəyir.
Ana ümid edir ki, mövcud vəziyyət istisna hal kimi qiymətləndiriləcək və gənc tələbənin 2026–2027-ci tədris ili üçün əyani təhsil formasından qiyabi təhsil formasına keçirilməsi və ya bunun üçün fərdi müraciət imkanının yaradılması istiqamətində aidiyyəti dövlət qurumlarına müvafiq dəstək göstəriləcək.
Bu müraciət təkcə bir ailənin problemi deyil. Bu, ağır xəstəliklə mübarizə aparan gənclərin təhsil hüququnun qorunması, onların cəmiyyətə qazandırılması və gələcəyə olan ümidlərinin yaşadılması məsələsidir.
Bu gün ölkəmizdə insan amili, sosial həssaslıq və təhsil hüququ dövlət siyasətinin əsas istiqamətlərindən biri hesab olunur. İctimaiyyət də inanır ki, sağlamlıq səbəbindən çətin vəziyyətdə qalan gənclərin təhsil imkanlarının qorunması həm humanizm prinsiplərinə, həm də dövlətimizin həyata keçirdiyi sosial siyasətə tam uyğundur.
Ümid edirik ki, bu səs cavabsız qalmayacaq və ağır xəstəliklə mübarizə aparan UNEC tələbəsinin təhsilini davam etdirməsi üçün zəruri dəstək göstəriləcək. Bəzən bir qərar yalnız bir sənədin deyil, bir insanın gələcəyinin, həyata bağlılığının və sabaha olan inamının qorunması deməkdir.


Əlaqə nömrəsi: 0503427955 / 0777112922

Əmək və Əhalinin Sosial Müdafiəsi Nazirliyinin tabeliyində Dövlət Tibbi Sığorta və Ekspertiza Agentliyində yeni təyinat olub.

Gülnar Hacalıyeva Agentliyin İctimaiyyətlə əlaqələr şöbəsinin müdiri təyin olunub.

O, daha əvvəl nazirliyin tabeliyində Dövlət Tibbi-Sosial Ekspertiza və Reabilitasiya Agentliyində mütəxəssis vəzifəsində çalışıb.

Xatırladaq ki, Dövlət Tibbi Sığorta və Ekspertiza Agentliyi bu il İcbari Tibbi Sığorta üzrə Dövlət Agentliyi ilə Dövlət Tibbi-Sosial Ekspertiza və Reabilitasiya Agentliyinin birləşdirilməsi əsasında yaradılıb. Bir neçə gün əvvəl isə Dəniz Kərimzadə müvafiq əmrlə Agentliyin Kommunikasiya şöbəsinin rəhbəri təyin olunmuşdu.

AZAL-IN NAXÇIVAN REYSLƏRİNDƏ NARAZILIQ: "İSTİ ÇAY LƏĞV EDİLDİ, SƏRNİŞİNLƏRƏ 20 QƏPİKLİK SU PAYLANILIR"

Milli aviadaşıyıcımız AZAL-ın Bakı-Naxçıvan marşrutu üzrə sərnişin xidməti kəskin tənqid olunur! Böyük əziyyətlə və bilet qıtlığı ilə reysə düşən vətəndaşlar təyyarə daxilində xidmət standartlarının acınacaqlı vəziyyətə salınmasından şikayətçidirlər. Əvvəllər təklif olunan isti çay və qəhvə tamamilə yığışdırılıb, əvəzində isə keyfiyyəti şübhə doğuran ucuz sular paylanılır.(1xeber.media)

Ətrafli süjetdə!

“LION CENTRE” MMC direktoru Ramil Aslanovun Dövlət Gömrük Komitəsinin fəaliyyəti ilə bağlı iddialarını əks etdirən geniş mətbuat açıqlaması yayıb. Şirkətin direktoru Ramil Aslanovun imzası ilə yayılan açıqlamada 2025-ci ildə həyata keçirilmiş idxal əməliyyatlarının gömrük rəsmiləşdirilməsi zamanı qanunvericiliyin tələblərinin pozulduğu iddia olunur.
Ramil Aslanov bildirir ki, məsələ ilə bağlı Dövlət Gömrük Komitəsinə və digər aidiyyəti dövlət qurumlarına dəfələrlə müraciət olunmasına baxmayaraq, təqdim olunan hüquqi arqumentlər mahiyyəti üzrə araşdırılmayıb, müraciətlərə əsaslandırılmış hüquqi münasibət bildirilməyib.
“LİON CENTRE” MMC-nin direktoru hesab edir ki, sahibkarın qaldırdığı məsələyə formal yanaşma deyil, hüquqi baxımdan əsaslandırılmış qiymət verilməlidir. Sahibkarın mövqeyinə görə, mübahisəli məsələlər həmin dövrdə qüvvədə olan qanunvericilik əsasında araşdırılmalıdır.
Rakil Aslanovun iddiasına görə, 16 avqust 2025-ci il tarixli gömrük bəyannaməsi üzrə aparılan proses zamanı qanunvericiliyin tələblərinə uyğun olmayan yanaşma tətbiq olunub və təqdim edilən hüquqi arqumentlər tam şəkildə araşdırılmayıb.
Bundan əlavə, şirkət Dövlət Gömrük Komitəsinin 22 iyul 2026-cı il tarixli cavab məktubunda 2025-ci ildə baş vermiş hadisələrə sonradan qüvvəyə minmiş hüquqi dəyişikliklər əsasında yanaşma sərgiləndiyini iddia edir.
“LİON CENTRE” MMC hesab edir ki, belə yanaşma hüquqi müəyyənlik prinsipinə və qanunların geriyə qüvvəsinin olmaması prinsipinə ziddir.

Ramil Aslanov: “Məsələnin mahiyyəti kənarda saxlanılıb”

Ramil Aslanov bildirir ki, müraciətə cavab zamanı Kənan Əsədov tərəfindən bildirişdə göstərilən məsələlərə istinad edilib. Lakin şirkət rəhbərinin mövqeyinə görə, mübahisənin əsas predmeti bildirişdə əks olunan dəyərlə bağlı deyil.
Onun sözlərinə görə, əsas məsələ XİFMN-də (Xarici İqtisadi Fəaliyyətin Mal Nomenklaturası) və gömrük bəyannaməsinin 33-cü bölməsində göstərilən mal kodunun düzgün müəyyənləşdirilməsi ilə bağlıdır.
Ramil Aslanov hesab edir ki, sahibkarın müraciətində qaldırılan əsas hüquqi məsələ kənarda saxlanılıb, diqqət isə məsələnin mahiyyətinə aid olmayan istiqamətlərə yönəldilib.
Şirkət rəhbəri bildirir ki, burada məqsəd hər hansı güzəşt əldə etmək deyil, yalnız qanunun düzgün və vahid tətbiq olunmasına nail olmaqdır.
Onun fikrincə, sahibkar konkret hüquqi arqumentlər təqdim etdiyi halda həmin arqumentlərə mahiyyəti üzrə cavab verilməməsi biznes mühitində inamsızlıq yaradır.

“İslahatlardan danışılır, amma sahibkarın gördüyü mənzərə fərqlidir”

Ramil Aslanov hesab edir ki, gömrük sahəsində aparılan islahatlar, sahibkarlara göstərilən dəstək və xidmətlərin inkişafı ilə bağlı səsləndirilən fikirlər praktikada sahibkarların qarşılaşdığı problemlərlə tam üst-üstə düşmür.
Onun sözlərinə görə, gömrük sistemində sürət, şəffaflıq və sahibkar məmnuniyyəti barədə çıxışlar səslənsə də, əsas göstərici sahibkarın real fəaliyyəti zamanı qarşılaşdığı münasibətdir.
Şirkət rəhbəri vurğulayır ki, beynəlxalq təşkilatların nümayəndələrinin iştirakı ilə gömrük sahəsində inkişaf istiqamətləri təqdim olunsa da, sahibkarların gündəlik üzləşdiyi hüquqi problemlərin həlli istiqamətində daha konkret addımlar atılmalıdır.
Ramil Aslanovun fikrincə, gömrük sisteminin inkişafı yalnız hesabatlarda və rəsmi çıxışlarda deyil, sahibkarın müraciətinə verilən cavabın keyfiyyətində, qərarların əsaslandırılmasında və qanunun hamıya eyni tətbiq edilməsində özünü göstərməlidir.

Sahibkar: “Vahid hüquqi yanaşma təmin olunmalıdır”

Açıqlamada qeyd olunur ki, eyni xarakterli gömrük bəyannamələri üzrə fərqli yanaşmaların tətbiqi, hüquqi arqumentlərin cavabsız qalması və qərarların kifayət qədər əsaslandırılmaması sahibkarlarda narahatlıq yaradır.
MMC rəhbəri hesab edir ki, bu məsələ yalnız bir müəssisənin problemi kimi qiymətləndirilməməlidir.
Çünki gömrük münasibətlərində şəffaflıq, sahibkar hüquqlarının qorunması və qanunun aliliyinin təmin olunması bütövlükdə biznes mühitinə təsir edən amillərdir.
Sahibkarın mövqeyinə görə, dövlət qurumlarından gözlənti xüsusi münasibət deyil, qanunvericiliyin hamıya eyni tətbiq olunması və müraciətlərə obyektiv hüquqi qiymət verilməsidir.

Dövlət başçısına müraciət edilib

“LİON CENTRE” MMC-nin direktoru dövlət başçısına ünvanladığı müraciətdə 2025-ci ildə baş vermiş gömrük rəsmiləşdirilməsi prosesinə həmin dövrdə qüvvədə olmuş qanunvericilik əsasında yenidən hüquqi qiymət verilməsini istəyib.
Ramil Aslanovun müraciətində bildiriş müddətləri, gömrük qərarlarının hüquqi əsaslandırılması, fərqli yanaşmaların səbəbləri və təqdim olunan hüquqi arqumentlərin araşdırılması ilə bağlı məsələlərə aydınlıq gətirilməsini xahiş etdiyini açıqlayıb.
Ramil Aslanov hesab edir ki, sahibkarın əsas tələbi yalnız bir məsələnin həlli deyil, gömrük münasibətlərində şəffaf və vahid hüquqi yanaşmanın təmin olunmasıdır.
Qeyd edək ki, yazıda yer alan fikirlər “LION CENTRE” MMC-nin direktoru Ramil Aslanovun mövqeyini əks etdirir. Məsələ ilə bağlı Dövlət Gömrük Komitəsinin rəsmi mövqeyi təqdim olunacağı təqdirdə, BNTV.az qarşı tərəfin açıqlamasını da olduğu kimi dərc etməyə hazırdır.

BNTV.az

Şəmkir rayonunun Qaracəmirli kənd sakini Şəkərova Xatirə Firail qızının Şəmkir Rayon Mərkəzi Xəstəxanasında keçirilmiş cərrahi əməliyyatdan iki gün sonra vəfat etməsi ilə bağlı araşdırma aparılır.

Məlumata görə, Xatirə Şəkərova 22 iyul 2026-cı il tarixdə uşaqlıq mioması ilə əlaqədar cərrahi əməliyyat olunub. Yaxınlarının bildirdiyinə görə, əməliyyatın həkim Rəsulov Ceyhun Fərrux oğlu və onun həyat yoldaşı Arzu Əskərova tərəfindən icra edildiyi bildirilir. Yaxınları iddia edirlər ki, ginekoloji xarakterli əməliyyat olmasına baxmayaraq, əməliyyatda müvafiq ixtisaslı ginekoloqun iştirakı olmamış və uğursuz əməliyyat icra edilmişdir.

Əməliyyatdan sonra Xatirə Şəkərovanın reanimasiya şöbəsinə deyil, palataya yerləşdirilərək, 22–24 iyul tarixlərində vəziyyətinin getdikcə ağırlaşdığı bildirilir. Yaxınlarının sözlərinə görə, bu müddətdə xəstədə davamlı və kəskin qusma, qarın nahiyəsinin nəzərə çarpacaq dərəcədə şişməsi və ümumi vəziyyətinin pisləşməsi müşahidə olunub.

İddiaya əsasən, 24 iyul 2026-cı ildə xəstənin vəziyyəti kritik həddə çatdıqdan sonra, ölümündən bir neçə dəqiqə əvvəl həkim Ceyhun Rəsulov tərəfindən reanimasiya tədbirləri görülüb. Lakin göstərilən tibbi yardıma baxmayaraq, Xatirə Şəkərova həmin gün vəfat edib.

Hadisədən sonra meyit Şəmkir Rayon Prokurorluğunun araşdırması çərçivəsində müayinə olunaraq məhkəmə-tibbi ekspertiza məqsədilə yarılıb. Yaxınlarının bildirdiyinə görə, meyit ailəyə təhvil verildikdən sonra qarın nahiyəsindəki tikiş yerindən çirkli və nəcisəbənzər mayenin xaric olması müşahidə edilib.

İlkin məlumatlarda ölümün əməliyyat zamanı bağırsağın zədələnməsi və bundan sonra yarana biləcək ağırlaşmalarla əlaqəli ola biləcəyi göstərilir.

Reportyor.tv