Müasir dövrün ən böyük paradokslarından biri də budur ki, həkim, cərrah olmaq üçün 10-12 il təhsilə gərək yoxdur. Sadəcə bir smartfon, parlaq halqa işıq və istifadəçi adının önünə "Dr." abbreviaturası əlavə etmək kifayət edir.

Heç olmasa göstərdiyi "Xidmətlərin" adını düz yazaydı barı: Blefaroplastika əvəzinə Blofraplastika; Temporal əvəzinə Tempral; Bullhorn əvəzinə Bluhorn(yəqin "mavi buynuz" yazmaq istəyirmiş). Aydın məsələdir ki, bu "peşəkar həkim" əməliyyatların adlarını kitabdan oxumayıb, sadəcə eşitdiyi kimi də yazıb. İbtidai sinif səviyyəsində yazı qaydalarından bixəbər olan birinin insan anatomiyası kimi mürəkkəb və xətaları bağışlamayan bir elmə iddia etməsi sadəcə cəhalət deyil, həm də açıq-aşkar ictimai təhlükədir.

Hələ bir şəxsi "Akademiyası" da var: ödənişli şərtlərlə tələbələr yetişdirir və "Sertifikat" verir.

Bu cür "virtual qəssabxanaların" heç bir maneəyə rast gəlmədən çiçəklənməsinin əsas səbəbi mövcud məsuliyyətsizlik mühitidir. Hər kəsin lisenziya, diplom təsdiqi olmadan istədiyi işi görməsi ən az narkotik satışı kimi təhlükəli vəziyyətdir.

Bunun qarşısını almağın və sağlam ictimai nəzarəti təmin etməyin vaxtıdır.