Elnur Cəlilov. Bu şəxs sanki hansısa “fenomenal” xüsusiyyətinə görə bütün dövrlər üçün Ekologiya və Təbii Sərvətlər Nazirliyinin “favoriti” hesab olunub. Vaxtilə 9 saylı Regional Ekologiya və Təbii Sərvətlər idarəsinin rəisi işləyəndə nəzarətində olmuş Bərdə, Tərtər, Ağdam, Ağcabədi, Beyləqan, Füzuli rayonlarında ekologiyanın korlanması işinə “əhəmiyyətli” töhfələr verib. Sonradan 3 saylı Şirvan Regional Ekologiya və Təbii Sərvətlər İdarəsinə rəhbərlik edəndə Şirvan, Neftçala, Salyan, Hacıqabul, Sabirabad, Saatlı, İmişli, Biləsuvar rayonlarında vəzifəsinin öhdəsindən gələ bilmədiyi barədə informasiyalar yayılıb. Lakin hər dəfə Nazirliyin onun barəsində gördüyü ən “sərt” tədbir bir regional idarədən digərinə rəhbər vəzifəyə transfer edilməsi olub.

Hazırda 5 saylı Regional Ekologiya və Təbii Sərvətlər İdarəsinin rəisi postunda da eyni siyasəti həyata keçirməkdədir. Bu siyasət isə ölkənin Şimal bölgəsi rayonlarında ekoloji sərvətlərin talan edilməsinə nəyinsə müqabilində göz yummaqdan başqa bir şey deyildir.

Hələ keçən il mediada Elnur Cəlilov barədə tənqidi məlumatlar dolaşırdı ki, o, "Azvirt" və "Falkon" MMC-lərin Vəlvələ çayında qanunsuz istismar işlərinə rəvac verir. Məlumatlarda qeyd olunurdu ki, idarə rəisinin fəaliyyəti (oxu: fəaliyyətsizliyi – müəllif.) xüsusən Xaçmaz və Qusar rayonlarında təbiətə ağır zərbə vurur, bölgədə ekoloji balans pozulur, çayların məcrası dəyişdirilir, Vəlvələ çayında aparılan qeyri-qanuni işlər nəticəsində ətraf mühitə ciddi ziyan dəyir. Amma “həyəcan təbili” çalınmasına baxmayaraq, aidiyyəti qurumlar susur, məsul şəxslər isə sanki görməzdən gəlir. Bu susqunluqdan arxayınlaşan Elnur Cəlilov isə Vəlvələ çayına yuxarıda adları qanunsuz qum-çınqıl hasilatçılarından başqa himayə etdiyi istismarçıların da cəlb olunmasına göz yumub. Nəticədə Vəlvələ çayı ekoloji fəlakətlə üz-üzə qalıb.

İnternet resurslarında yerləşdirilmiş informasiyalarda bildirilir ki, Qusar rayonunun ən vacib təbii su mənbələrindən biri sayılan, ətraf kəndlərin su təminatında əsas rol oynayan, yerli ekosistem üçün də böyük əhəmiyyət kəsb edən Vəlvələ çayı son illərdə yatağının talan edilməsi və qeyri-qanuni istismarı səbəbindən bir təbii resurs olaraq ciddi təhlükə ilə üzləşib. Bu proses çayın ekosisteminə böyük zərər vurmaqla yanaşı, su ehtiyatlarının azalmasına, çirklənməyə və bölgənin biomüxtəlifliyinin məhvinə səbəb olur. Çayın təbii axını pozulduğu üçün bölgədə su çatışmazlığı probleminin yarana biləcəyi istisna edilmir.

Çay yatağının qeyri-qanuni istismarının torpağın deqradasiyasına, yeratı su axınlarının dəyişməsinə səbəb olması və torpaq sürüşmələri riskini artması fonunda bu vəziyyətdən əziyyət çəkən, təmiz suya çıxış imkanları məhdudlaşan, sosial-iqtisadi vəziyyətləri pisləşən yerli əhali 2021-ci ilin avqust ayından etibarən "Azvirt" MMC-nin baş direktoru Kamil Əliyevin maraqları naminə çayın qazılması və dağıdılmasından narazılıqlarının ifadəsi kimi yuxarı instansiyalara ünvanladıqları, mətbuatda ictimailəşdirdikləri şikayətlərində Qusar rayonunda Vəlvələ çayının ekoloji talanının ciddi araşdırılmasını və bu prosesə göz yuman şəxslərin məsuliyyətə cəlb olunmasını tələb edirlər. Təklif edirlər ki, ETSN və digər aidiyyəti qurumlar təcili tədbirlər görməli, qanunsuz fəaliyyətlərə son qoymalıdır. Birmənalı şəkildə təkid edirlər ki, Elnur Cəlilovun fəaliyyəti obyektiv şəkildə araşdırılmalı və onun ekoloji cinayətlərdə rolu təsdiqlənərsə, hüquqi məsuliyyət daşımalıdır.
Nyus.Az

Yəqin ki, dünya botanika elmi Sabunçu rayonunda baş verən növbəti "təbiət möcüzəsindən" hələ də xəbərsizdir. Adil Vəliyevin rəhbərlik etdiyi Sabunçu rayonu, Bakıxanov qəsəbəsi, Yavər Əliyev küçəsindən redaksiyamıza daxil olan mənzərə, rayon rəhbərliyinin "yaşıllaşdırma" siyasətinin növbəti şedevridir.
Yavər Əliyev küçəsində qəfildən, elə-belə, heç bir səbəb olmadan (?) daş hasarın arxasında qalan onlarla şam ağacı eyni anda "infarkt" keçirib və quruyub.
Təbiətin bu qəribə işinə baxın ki, hasarın xaricindəki ağaclar hələ birtəhər nəfəs alır, amma hasarın daxilinə — yəni kimlərinsə gələcək obyekt layihəsinin ərazisinə — düşən ağaclar kütləvi şəkildə kül rənginə boyanıb. Biz əlbəttə ki, kimisə ağacları qəsdən yandırmaqda və ya məhv etməkdə birbaşa ittiham edə bilmərik. Amma Bakıdakı tikinti mafiyasının illərdir sınaqdan keçirdiyi və hamıya bəlli olan "ənənəvi" qurutma metodlarını ehtimal etmək redaksiyamızın və sakinlərin ən təbii haqqıdır.
Ola bilsin ki, ağacların kökünə kimyəvi "vitamin" tökülməsi və ya suyunun kəsilib, dibinin betonlanması nəticəsində onlar eyni anda bu hala düşüb. Sonra isə "baxın, bu ağaclar onsuz da quruyub, sakinlərin təhlükəsizliyi üçün kəsirik" deyib yerində növbəti şadlıq sarayı, market və ya hündürmərtəbəli bina ucaltmaq ssenarisi artıq Sabunçuda adiləşib.
Hasarın tən ortasından çəkilməsi, ərazidə aktiv tikinti qalıqlarının, taxta qəliblərin olması və bütün bunların birbaşa strateji qaz borularının mühafizə zolağında baş verməsi isə aidiyyəti qurumların bu mənzərəyə necə göz yumduğunu göstərir. Maraqlıdır, Yavər Əliyev küçəsində bu boyda daş hasar ucalanda, tonlarla tikinti tullantısı əraziyə töküləndə Sabunçu Rayon İcra Hakimiyyətinin müvafiq şöbələri, bələdiyyə hara baxırdı? Yoxsa bu hasarlar gecə feyaların sehirli çubuğu ilə bir saniyədə tikilib?
Ortada açıq-aşkar ekoloji cinayət və özbaşınalıq var, amma görünən odur ki, Sabunçu rayonundakı məmurlar üçün yaşıl zonalar sadəcə qazanc mənbəyindən ibarətdir.
Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətini və Sabunçu Rayon İcra Hakimiyyətini bu "möcüzəvi qəsdə" aydınlıq gətirməyə çağırırıq. O daş hasarın sənədi varmı? O ağacların eyni anda qurumasının "elmi" izahı nədir? Mövzu diqqətimizdədir və tərəfimizdən davam etdiriləcək.(Mediatvaz.com)

Sözügedən məsələ ilə bağlı aidiyyəti qurumların da cavab haqqını tanıyırıq.

https://www.bizimesr.com/az/post/bakixanovda-mocuzevi-epidemiya---eyni-anda-quruyan-agaclar-ve-das-hasarlar--video-22593

Dərman firması və apteklər şəbəkəsi olan “Buta Farm” MMC dərmanların saxlama qaydalarını pozduğuna görə inzibati məsuliyyətə cəlb olunub.

Bu barədə Xitab24 məlumat yayıb.

Məlumata görə, Səhiyyə Nazirliyinin Analitik Ekspertiza Mərkəzi tərəfindən şirkətə məxsus aptekdə aparılan yoxlama zamanı bir sıra ciddi nöqsanlar aşkarlanıb. Yoxlama zamanı divar və döşəmənin rütubət səbəbindən yararsız vəziyyətə düşdüyü, həmçinin dərman vasitələrinin normativ tələblərə uyğun olmayan şəraitdə saxlanıldığı müəyyən edilib.

İş materiallarında yer alan fotoşəkillərə əsasən, 8-15 dərəcə temperaturda saxlanılması tələb olunan dərman preparatlarının yerləşdirildiyi otaqda temperaturun 23,2 dərəcə olduğu qeydə alınıb.

Qeyd olunan faktlara görə “Buta Farm” MMC-nin İnzibati Xətalar Məcəlləsinin 452.3-cü maddəsinin tələblərini pozduğu müəyyən edilib. Xətai Rayon Məhkəməsinin qərarı ilə şirkət inzibati qaydada cərimələnib. /Xitab24/

Azərbaycan Hava Yolları (AZAL) "Sonsuz üfüqlərə doğru" adlı yeni imic çarxını təqdim edib. Videoçarxda təhlükəsizlik, peşəkarlıq, məsuliyyət, komanda işi və davamlı inkişaf kimi dəyərlər ön plana çəkilib. Şübhəsiz ki, belə reklam çarxlarının hazırlanması kifayət qədər vəsait tələb edir. Lakin burada əsas sual başqa məqamdan doğur - AZAL bu reklamı kimə və nə üçün hazırlayıb?
Çünki reklam, adətən, rəqabətin olduğu bazarlarda müştəri uğrunda mübarizənin əsas alətlərindən biridir. Azərbaycanda isə daxili və beynəlxalq hava daşımalarında bazarın əsas hissəsi uzun illərdir AZAL-ın nəzarətindədir. Vətəndaşların əksəriyyətinin fikrincə, seçim imkanları məhduddur və real rəqabət mühiti yoxdur.
Bizimesr.com bildirir ki, son günlər Naxçıvan-Bakı reysi ətrafında yaranan narazılıqlar ictimai müzakirələrin əsas mövzularından birinə çevrilib. Sosial şəbəkələrdə və mediada bilet tapılmaması, satış prosesi ilə bağlı narazılıqlar və biletlərin başqa şəxslərə satıldığına dair iddialar geniş yayılır.
Ən maraqlı məqam isə baş verənlərə AZAL tərəfindən ətralı izahın verilməməsidir. AZAL ancaq susur və, saymır.
Belə bir vaxtda bahalı imic çarxının təqdim olunması istər-istəməz suallar yaratmaya bilməz... Əgər vətəndaş bilet tapa bilmədiyini deyirsə, uçuş qiymətlərinin yüksəkliyindən şikayət edirsə, xidmətə çıxışın çətin olduğunu bildirirsə, bu zaman reklamın əsas mesajı nə olmalıdır? Gözəl görüntülər, yoxsa real problemlərin həlli?

Digər mühüm məsələ bilet qiymətləridir.
İllərdir Azərbaycan vətəndaşları AZAL-ın tariflərinin region ölkələrinin bir çox aviaşirkətləri ilə müqayisədə yüksək olduğunu bildirirlər. Bir çox ailələr üçün xaricə səyahət artıq əlçatmaz xərclər sırasına daxildir. İnsanların əksəriyyəti yalnız məcburi zərurət yarandıqda AZAL-ın xidmətindən istifadə etdiklərini deyirlər.
Əgər bazarda həqiqi rəqabət olsaydı, yüksək qiymətlər, xidmət keyfiyyəti və müştəri məmnuniyyəti şirkətlər arasında əsas mübarizə predmetinə çevrilərdi. Rəqabət olmayan yerdə isə reklamın məqsədi müəmmalıdır.
Bəs AZAL kimlə yarışır?
Əgər alternativ aviaşirkətlərin bazara daxil olması məhduddursa, sərnişinlərin böyük hissəsi onsuz da seçim edə bilmirsə, reklam çarxının əsas auditoriyası kimdir? Onsuz da uçmaq məcburiyyətində qalan insanlara bu reklam lazımdırmı?

Reklamın əsas məqsədi müsbət imic formalaşdırmaqdır. Amma müasir dövrdə imic vided çarxlar ilə deyil, göstərilən xidmətin keyfiyyəti ilə yaranır. Sərnişin üçün ən yaxşı reklam münasib qiymət, rahat bilet əldə etmək imkanı, vaxtında həyata keçirilən uçuşlar və operativ müştəri xidmətidir. Bu gün AZAL-ın qarşısında duran əsas vəzifə yeni reklam çarxı təqdim etməkdən daha çox, ictimaiyyəti narahat edən suallara aydın cavab verməkdir. Heç kimə lazım olmayan reklam çarxına o qədər pul xərcləmək isə israfçılıqdır və bəlkə də qazanmaqdır...

Bizimesr.com

Milli Məclisin deputatı Razi Nurullayev və qardaşı Hasil Nurullayevin adının hallandığı şok maliyyə qalmaqalı. Laçındakı milyonluq layihələr və Gəncədəki bərpa işləri necə sabotaj edilib? "Qırmızı Kitab"a düşən 1000-dən çox ağacı kimlər məhv edib? Aylardır maaş ala bilməyən fəhlələr və kəndlilərin tapdanan hüquqları...(1xeber.media)

Ətraflı sujetdə:

Azərbaycan uzun illərdir qeyri-neft sektorunun inkişafı üçün pambıqçılığı strateji sahələrdən biri elan edib. Dövlət bu sahəyə böyük subsidiyalar ayırır, fermerləri pambıq əkməyə həvəsləndirir və emal müəssisələrinin fəaliyyətini dəstəkləyir. Məqsəd kənd yerlərində məşğulluğu artırmaq, ixracı genişləndirmək və ölkəyə əlavə valyuta qazandırmaqdır.

Ancaq Beyləqan rayonunda fəaliyyət göstərən pambıq istehsalı və emalı müəssisəsi ilə bağlı fermerlərin səsləndirdiyi iddialar göstərir ki, sahədə ciddi problemlər mövcuddur. Əgər bu iddialar doğrudursa, pambıqçılığın inkişafına ən böyük zərbəni bazar deyil, məhz sistemin içində yaranmış qeyri-şəffaf münasibətlər vurur.

Pambıq sahədən yığıldıqdan sonra zavoda təhvil verilənədək müəyyən qədər təbii itki yaranır. Yarpaqların ayrılması, xırda zibillərin təmizlənməsi, nəmliyin dəyişməsi və daşınma zamanı baş verən itkilər səbəbindən dünya təcrübəsində bu göstərici adətən 2–4 faiz arasında qəbul edilir. Hətta, 5 faizdən artıq itki artıq araşdırılması vacib hesab olunur. Lakin Beyləqan fermerləri iddia edirlər ki, onlardan təhvil alınan pambıqdan 21–24 faiz itki çıxılır. Belə bir rəqəm normal texnoloji proseslə izah edilə bilməz və ciddi suallar yaradır.

Fermerlərin ən ağır ittihamı isə bununla bitmir. Onların sözlərinə görə, "itki" adı ilə çıxılan pambıq sonradan yenidən onların öz adına sənədləşdirilir. Pul fermerin bank kartına köçürülür, daha sonra həmin vəsait onlardan nağd şəkildə geri tələb olunur. Fermerlər bildirirlər ki, bu pulu qaytarmasalar, növbəti dəfə məhsulları qəbul edilməyə, hesablaşmaları gecikdirilməyə və ya müxtəlif problemlərlə üzləşməyə məcbur ediləcəklərindən ehtiyat edirlər. Bu iddialar müstəqil şəkildə təsdiqlənməyib və aidiyyəti qurumlar tərəfindən araşdırılmalıdır. Ancaq belə iddiaların çoxsaylı fermerlər tərəfindən səsləndirilməsi özü-özlüyündə narahatlıq doğurur.

Fermerlərin dediyinə görə, problemlər yalnız məhsulun qəbulunda yaşanmır. Onlar bildirirlər ki, toxum, gübrə, pestisid və digər kənd təsərrüfatı vasitələri bazar qiymətindən iki dəfə baha satılır. Aqrotexniki xidmətlər, traktor və digər texnikaların xidmət haqları da alternativ bazarla müqayisədə daha yüksək olur. Nəticədə fermer həm istehsal zamanı artıq xərc çəkir, həm məhsulu təhvil verəndə itki ilə üzləşir, həm də ilin sonunda qazanc əldə edə bilmir.

Əslində pambıqçılığın əsas məqsədi fermeri varlandırmaq, kənd yerlərində gəlirləri artırmaq və ölkəyə ixrac gəliri qazandırmaq olmalıdır. Fermer qazanc əldə etmirsə, növbəti il pambıq əkmək istəmir. Bu isə əkin sahələrinin azalmasına, zavodların xammal çatışmazlığına və bütövlükdə pambıqçılığın geriləməsinə səbəb olur. Beləliklə, zərər təkcə fermerə deyil, dövlətin qeyri-neft sektoruna yönəltdiyi siyasətə də dəyir.

Dünyanın inkişaf etmiş pambıq istehsalçısı olan ölkələrdə məhsulun çəkilməsi və keyfiyyətinin müəyyən edilməsi şəffaf qaydada həyata keçirilir. Elektron tərəzilərdən istifadə olunur, fermer nəticələrlə razılaşmadıqda müstəqil ekspertiza tələb edə bilir və bazarda alternativ alıcılar fəaliyyət göstərir. Şəffaflıq həm fermeri, həm də emal müəssisəsini qoruyur.

Azərbaycan pambıqçılığının gələcəyi yalnız dövlət subsidiyalarından asılı deyil. Ən vacib məsələ fermerlə emal müəssisəsi arasında etimadın qorunmasıdır. Əgər məhsulun qəbulu, hesablanması, qiymətləndirilməsi və ödəniş sistemi şəffaf olmazsa, fermer pambıqçılıqdan uzaqlaşacaq. Bu isə ölkənin qeyri-neft sektorunun inkişafına ciddi zərbə vuracaq.

Beyləqan fermerlərinin səsləndirdiyi iddialar aidiyyəti dövlət qurumları tərəfindən hərtərəfli araşdırılmalı, məhsulun qəbul prosesi tam şəffaflaşdırılmalı, təbii itki normaları açıq elan edilməli və fermerlərin hüquqlarının qorunmasına real təminat yaradılmalıdır. Çünki pambıqçılığı məhv edən amil nə iqlimdir, nə də dünya bazarındakı qiymətlər. Ən böyük təhlükə fermerin sistemə olan inamını itirməsidir.
Akif NƏSİRLİ
Baki Xeber

Vətəndaş Bəhram Axundov redaksiyamıza müraciət edərək "Caspian Global Auto" şirkətindən ciddi narazılığını ifadə edib. Onun sözlərinə görə, Çindən sifariş etdiyi avtomobil müqavilədə göstərilən müddətdə Azərbaycana gətirilməyib, daha sonra isə razılığı olmadan başqa VIN kodlu avtomobil alındığı bildirilib.

Şikayətçinin sözlərinə görə, o, 11 may tarixində "Caspian Global Auto" vasitəsilə Çindən avtomobil sifariş edib. Şirkət nümayəndələri avtomobilin 40-45 gün ərzində Azərbaycana çatdırılacağını vəd ediblər.

Bəhram Axundov bildirir ki, ilkin olaraq 3 min manatı özünü şirkət rəhbəri kimi təqdim edən Ramil adlı şəxsə kartdan-karta köçürüb. Ertəsi gün isə qalan məbləği təqdim olunan PDF sənədi əsasında "Kapital Bank" vasitəsilə ödəyib.

Onun sözlərinə görə, sifarişdən təxminən 20 gün sonra avtomobilin daşınma prosesi ilə maraqlanmağa başlayıb. Şirkətdən avtomobilin Çinin Horgos şəhərinə çatdığı bildirilsə də, bunu təsdiq edən video və ya foto material təqdim edilməyib. "Video görüntü tələb etdim. Məhz bundan sonra müxtəlif bəhanələrlə məni günlərlə, həftələrlə gözlətməyə başladılar", – deyə şikayətçi bildirir.

"Razılığım olmadan başqa avtomobil alınıb"

Bəhram Axundov iddia edir ki, sonradan ona sifariş etdiyi avtomobilin ümumiyyətlə mövcud olmadığı bildirilib. Onun sözlərinə görə, şirkət heç bir razılıq almadan eyni model və eyni rəngdə, lakin başqa *VIN kodlu* avtomobil aldığını etiraf edib.

Şikayətçi bildirir ki, sifariş zamanı avtomobilin son istehsal aylarına aid olmasını xüsusi tələb edib və ona mart-aprel istehsalı olan avtomobil vəd edilib. Lakin sonradan onun razılığı olmadan yanvar istehsalı olan başqa avtomobil alındığı deyilib.

"Mən yalnız ödədiyim VIN kodlu avtomobili qəbul edəcəyimi bildirdim. Başqa VIN kodlu avtomobili qəbul etmədim və müqavilənin ləğv edilərək pulumun qaytarılmasını tələb etdim", – deyə o qeyd edir.

"Avtomobil yoldadır dedilər, sonradan məlum oldu ki, heç avtovoza yüklənməyib"

Şikayətçi bildirir ki, şirkət ona dəfələrlə müxtəlif tarixlər verərək avtomobilin artıq yolda olduğunu deyib. Onun sözlərinə görə, əvvəlcə iyunun sonu, daha sonra iyulun 12-si, 15-i və 20-si tarixləri göstərilib.

Lakin iddiasına əsasən, iyulun əvvəlində şirkətin ofisinə gedərkən ona avtomobilin ümumiyyətlə avtovoza yüklənmədiyi bildirilib. Bəhram Axundovun sözlərinə görə, şirkətin əməkdaşları bunun səbəbini qarşı tərəfin səhlənkarlığı ilə izah ediblər. "Mənə iki həftə ərzində avtomobilin yolda olduğu deyildi. Sonradan məlum oldu ki, ümumiyyətlə daşınmağa belə başlamayıb", – deyə şikayətçi bildirir.

"Bilet tarixini dəyişdim, əlavə xərc çəkdim"

Şikayətçi bildirir ki, şirkətin verdiyi vədlərə inanaraq xarici səfərinin tarixini dəyişmək məcburiyyətində qalıb. Onun sözlərinə görə, təyyarə biletlərinin tarixini dəyişdiyinə görə əlavə cərimə ödəyib və bu zərərin də şirkətin gecikməsindən qaynaqlandığını iddia edir.

Bundan başqa, Kapital Bank filialına müraciət etdiyini bildirən vətəndaş deyir ki, avtomobilin VIN kodunun dəyişdirilməsi səbəbindən əlavə 60 ABŞ dolları məbləğində komissiya və ya cərimə ödənilə biləcəyi ona bildirilib.

"Bütün yazışmalar və səs yazıları məndədir"

Bəhram Axundov qeyd edir ki, şirkətin əməkdaşları ilə apardığı bütün WhatsApp yazışmaları, səsli danışıqlar və digər sübutları saxlayıb.

O bildirir ki, müqavilədə göstərilən çatdırılma müddəti artıq keçib, lakin avtomobil hələ də təhvil verilməyib. Şikayətçi internetdə apardığı araşdırmalar zamanı da şirkətlə bağlı gecikmələr və digər problemlərlə bağlı müxtəlif məlumatlarla rastlaşdığını iddia edir.

Dövlət qurumlarına və məhkəməyə müraciət edəcək

Bəhram Axundov bildirib ki, yaxın günlərdə məsələ ilə bağlı *Antiinhisar və İstehlak Bazarına Nəzarət Dövlət Xidmətinə, **Daxili İşlər Nazirliyinə* və aidiyyəti digər dövlət qurumlarına rəsmi müraciət edəcək.

Onun sözlərinə görə, vəkillə məsləhətləşərək məhkəməyə müraciət etməyi, ödədiyi məbləğin tam şəkildə geri qaytarılmasını, həmçinin gecikmə və vurulduğunu iddia etdiyi maddi zərərə görə kompensasiya tələb etməyi planlaşdırır. Redaksiya səsləndirilən iddialarla bağlı "Caspian Global Auto" şirkətinin də mövqeyini dərc etməyə hazırdır.(Bizimesr.com)

Sumqayıtda yerləşən “Levent 2” yaşayış kompleksinin sakinləri binanın aşağı hissəsində mərasim evinin açılmasından narazıdır.

Bu barədə “Baku TV”yə danışan şikayətçi Könül Əhmədova düşünür ki, yaşayış binasında yas mərasimlərinin keçirilməsi onun övladlarının psixologiyasına mənfi təsir edəcək: “Burada obyektin ərazisi 500 kvadrat metrdən çoxdur. Hər gün yüzlərlə insan gələcək, minimum 300-400 adam olacaq. Bir ana olaraq bundan narahatam. Sahibkar artıq parkinq yerindən şəxsi lift də istifadəyə verib”.

Digər sakin Şirinbəyim Əhmədova isə mərasim evi açıldıqdan sonra heç bir halda sakitliyə riayət edilməyəcəyini deyir: “Bütün günü arvadlar ağlayacaq, molla başlayacaq. Bizə burada sakitlik yoxdur. Bir tərəfdə stadiona futbola gələcəklər, bir tərəfdə bulvara turistlər gəlir, ortada isə mərasim evi...”

Obyekt sahibi Namiq Dövlətov sakinlərin narazılığına cavab olaraq bildirib ki, məclis baş tutan zaman heç bir ağlaşma olmayacaq: “Problem yoxdur, ağlaşma olmayacaq, izolyasiya olunub. Bura məclis evidir, elə bir şey yoxdur ki, kimsə gəlib ağlasın, qışqırsın. Mən icazə vermirəm ki, kimsə ağlasın. Biri öləndə hüznlü olmaq lazımdır. Lift isə binanın parklanma hissəsində deyil, birinci mərtəbədən ikiyə çıxmaq üçündür. Bütün qurumlardan icazə almışıq”.

Sumqayıt Şəhər İcra Hakimiyyətindən isə qeyd edilib ki, yaşayış kompleksi Dövlət Mənzil Fonduna aid deyil: “Bu, özəl tikinti çərçivəsində inşa olunmuş çoxmənzilli yaşayış binasıdır. Belə yaşayış komplekslərində ümumi əmlakın idarə olunması və istifadəsi ilə bağlı məsələlər qanunvericiliyin tələblərinə uyğun olaraq mənzil mülkiyyətçilərinin ümumi yığıncağının, habelə idarəedici qurumların qərarı vasitəsilə tənzimlənir”. (Bizimesr.com)

Daha ətraflı videomaterialda:

https://www.bizimesr.com/az/post/sakinler-merasim-evinden-narazidir--sahibkar-men-aglamaga-icaze-vermirem-deyir-22574

Yevlax Su Meliorasiya Sistemlərinin İstismarı İdarəsi 09.07.2026-cı ildə dövlət satınalmalarının portalında keçirilmədən 3 satınalma müqaviləsi bağlayıb.

İnşaat materiallarının satınalması üzrə 102.578,58 manat dəyərində müqavilə “TEXNOPARK AS” MMC ilə bağlanılıb. (tərəflər arasında İnşaat materiallarının satınalınması ilə əlaqədar 05.09.2025-ci il tarixdə dərc edilmiş açıq tender prosedurunda qalib olmuş “Texnopark AS” MMC (VÖEN 1306544151) ilə 01.12.2025-ci il tarixdə 102.578,58 manat məbləğində satınalma müqaviləsi imzalanmışdır. Burada qiymətlərin qəpiyinə qədər eyni olması suallar yaradır)

Qaraməmədli-1 nasos stansiyasında nasos stansiya binasının əsaslı təmiri üzrə 158.488,18 manat dəyərində müqavilə “AZMEK-LTK” MMC ilə bağlanılıb. (tərəflər arasında “Qaraməmmədli-1 nasos stansiyasında nasos stansiya və gözətçi binasının, təzyiqli plastik boru xəttinin (D=250 mm; L= 1200 p/m) əsaslı təmiri işləri”nin satın alınması üzrə 158.488,18 manat dəyərində bir müqavilə də 24.06.2024-cü ildə bağlanılıb. Burada 2024-cü ildə bağlanan müqavilə ilə 2026-cı ildə bağlanan müqavilənin qiymətinin qəpiyinə qədər eyni olması şübhə doğurmaya bilmir)

Nurallar kəndi №1,Rüstəmli kəndi№236,Qaramanlı kəndi №223,qaramanlı kəndi №117,Xaldan kəndi №186,Xaldan kəndi №150,Xaldan kəndi №506,reper nömrəli quyularının iş rejiminin bərpası üzrə 243.879,26 manat dəyərində müqavilə “İQBAL-R” MMC ilə bağlanılıb.

Qeyd edək ki, mediada “İQBAL-R” MMC-nin müxtəlif rayonlarda subartrzian quyularının qazılması üzrə şişirdilmiş qiymətlərlə onlarla tenderin qalibi olması barədə təkzib edilməmiş məlumatlar var.

Rəsmi məlumatlarda “İQBAL-R” Məhdud Məsuliyyətli Cəmiyyətinin 25.02.2010-cu il tarixdə 11 saylı Ərazi Vergilər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 20 manat olan MMC-nin hüquqi ünvanının BƏRDƏ RAYONU, BƏRDƏ ŞƏHƏRİ, M.HÜSEYNZADƏ, ev 66, qanuni təmsilçisi kimi isə Zeynalov Rahim Zahid oğlu qeyd olunub. Amma qeyri rəsmi məlumatlara görə MMC-nin arxasında Bərdə Su Meliorasiya Sistemlərinin İstismarı İdarəsinin keçmiş rəisi Atamoğlan Babayev dayanır.

Göründüyü kimi Yevlax Su Meliorasiya Sistemlərinin İstismarı İdarəsi 3 satınalma müqaviləsini dövlət satınalmalarının vahid internet portalında keçirilmədən bağlayıb. Bununla bağlı Qanun nəyi tələb edir.

“Dövlət Satınalmaları Haqqında” Qanununun15.1.-ci maddəsində göstərilir: Bu Qanunuun 3.12-ci və 15.3-cü maddələrinin (Məxfi məlumatlarla əlaqəli satınalmalar və bu satınalmalarla bağlı prosedurlar kağız daşıyıcılarında həyata keçirilir) tələbləri nəzərə alınmaqla, satınalma yalnız portal vasitəsilə həyata keçirilir.

Onda Yevlax Su Meliorasiya Sistemlərinin İstismarı İdarəsi bu satınalmaları nə üçün dövlət satınalmalarının vahid internet portalında keçirməyib?

Çünki, qurumun müqavilə bağladığı MMC-lər birbaşa Azərbaycan Dövlət Su Ehtiyatları Agentliyindən və Regional Su Meliorasiya Xidmətindən idarə olunur. Adı çəkilən dövlət qurumları sözügedən şirkətlərlə hər il dəyəri milyonlarla manata çatan onlarla satınalma müqavilələri bağlayırlar.

Qeyd edək ki, Yevlax Su Meliorasiya Sistemlərinin İstismarı İdarəsinin rəisi Tural Mahmudovdu. O, bu vəzifəyə Azərbaycan Dövlət Su Ehtiyatları Agentliyinin sədri Zaur Mikayılovun əmri ilə 2025-ci ilin aprelində təyin edilib. Medianın yaydığı məlumata görə əvvəllər Agentliyin strukturlarında məsul vəzifələrdə çalışıb.

Qeyd edək ki, məqalədə göstərilənlərə aydınlıq gətirilməsi məqsədi ilə Yevlax Su Meliorasiya Sistemlərinin İstismarı İdarəsinə ünvanladığımız sorğuya cavab olaraq baş mühasib Elçin Yusifov bildirdi ki, göstərilən satınalmalarda heç bir qanun pozuntusuna yol verilməyib. Həmin müqavilələr bağlandığda Tural Mahmudov bu idarədə işləməyib. İnşaat materiallarının satınalması və Qaraməmədli-1 nasos stansiyasında əsaslı təmiri üzrə 2024-2025-ci ilərdə bağlanmış müqavilələr yarımçıq qaldığından biz həmin işin davamı olaraq yenidən müqavilə bağlamışıq. Burada heç bir qanunsuzluğa yol verməmişik.

Xatırladaq ki, “Dövlət Satınalmaları Haqqında” Azərbaycan Respublikası Qanununa görə həmin Qanunun 22-ci maddəsinin tələbləri nəzərə alınmaqla, satınalma predmetinin adı, miqdarı, həcmi, ətraflı təsviri, zəruri texniki və keyfiyyət xüsusiyyətləri (o cümlədən planlar, çertyojlar və eskizlər), göndərilməsi (görülməsi və ya göstərilməsi) yeri, proqnozlaşdırılan icra qrafiki və son tarixi şərtlər toplusunda öz əksini tapmalıdır.

Yəni tərəflər arasında bağlanmış müqavilənin icrası şərtlər toplusunda göstərilən müddətdə başa çatmalıdır. Mövcud qanunvericiliyə görə, satınalma müqaviləsi qüvvəyə mindikdən sonra müqavilənin şərtlərinin dəyişdirilməsinə yol verilmir. Satınalma müqaviləsinin şərtlərinin dəyişdirilməsi barədə tərəflərin bir-birinə etdiyi yazılı müraciətlərə 10 iş günü müddətində baxılır.

Bəs necə olur ki, Yevlax Su Meliorasiya Sistemlərinin İstismarı İdarəsinin Satınalma Komissiyası 2024 və 2025-ci ildə bağladığı və yarımçıq qalmış iş üzrə yenidən tender keçirir?

Digər tərəfdən sözügedən Qanuna görə satınalmanın maliyyələşdirilməsi dayandırıldıqda(36.1.6.) satınalma ləğv edilməlidir. Amma Yevlax Su Meliorasiya Sistemlərinin İstismarı İdarəsinin Satınalma Komissiyası tərfindən satınalmanın hansı səbəbdən dayandırılması barədə satınalmaların portalında heç bir məlumat verilməyib.

Bağlanmış müqavilə üzrə öhtəlikləri təchiçatçı pozarsa satınalan təşkilat dərhal nəzarət orqanı olan Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyin ə məlumat verməldir. Nəzarət orqanı isə öhdəlikləri yerinə yetirə bilməyən təzhizatçı barədə qqanunla müəyyən edilmiş qaydada tədbirlər görməlidir.

Əgər müqavilə üzrə öhtəliklər satınalan təşkilat tərəfindən pozularsa, satınalma müqaviləsi üzrə ödəmələr (o cümlədən avans ödənişi) satınalma müqaviləsində müəyyən olunmuş müddətdə ödənilmədikdə, gecikdirilmiş hər gün üçün satınalma müqaviləsində müəyyən olunmuş məbləğdə dəbbə pulu hesablanır.

Buradan da ortaya bir çox suallar çıxır.Yevlax Su Meliorasiya Sistemlərinin İstismarı İdarəsi tərəfindən “TEXNOPARK AS” və “AZMEK-LTK” MMC arasında 2024-2025-ci illərdə bağlanmış müqavilələr niyə vaxtında icra olunmayıb. Müqavilədən gələn öhdəlikləri kim pozub. Yevlax Su Meliorasiya Sistemlərinin İstismarı İdarəsinin rəisi Tural Mahmudov köhnə rəislərin qaranlıq işlərini ört basdır edir, yoxsa…


Aktualinfo.net

Qazax rayon İcra Hakimiyyəti tərəfindən Qazax rayonunda yolların əsaslı təmiri işləri üzrə 21.05.2026-cı ildə başladılmış açıq tenderə yekun vurulub. Müsabiqənin qalibi “AZƏRTRANSS” Məhdud Məsuliyyətli Cəmiyyəti seçilib və tərəflər arasında 639.044,08 manat dəyərində satınalma müqaviləsinin bağlanılması planlaşdırılır. Məlumat satınalmaların portalında 09.07.2026-cı ildə dərc edilib.

Şərtlər toplusuna görə “AZƏRTRANSS” MMC Qazax şəhərinin Fərrux Qayıbov, Babək, Ş.İ.Xətai, Amid Məmmədov, Həzi Aslanov, Mircəlal Paşayev, Süleyman Rüstəm,Ələddin Qədirov küçələrində yolların əsaslı təmiri işlərini aparmalıdır.

Qeyd edək ki, Qazax rayon İcra Hakimiyyəti 18.12.2025-ci ildə də Qazax şəhəri Heydər Əliyev parkında, Əliağa Şıxlinski küçəsində və N.Nərimanov yaşayış massivində abadlıq işləri üzrə “AZƏRTRANSS” MMC ilə 848.380,34 manat dəyərində satınalma müqaviləsi bağlamışdır.

Göründüyü kimi Qazax rayon İcra Hakimiyyəti son 7 ayda “AZƏRTRANSS” MMC ilə yolların əsaslı təmiri və abadlıq işləri üzrə ümumi dəyəri 1 487 424 manat dəyərində iki müqavilə bağlayıb.

Bundan əlavə Qazax rayon İcra Hakimiyyəti başçısının Qazax şəhər İnzibati Ərazi Dairəsi üzrə Nümayəndəliyi də “AZƏRTRANSS” MMC ilə Qazax şəhərində aparılacaq “Abadlıq” işləri üzrə 246.157,18 manat məbləğində satınalma müqaviləsini 17.12.2025-ci ildə bağlayıb.

Satınalmaların portalı üzərindən apardığımız araşdırmada məlum oldu ki, Qazax rayon İcra Hakimiyyəti 11.08.2025-ci ildə Qazax şəhərində yolların əsaslı təmiri işləri üzrə “AZƏRTRANSS” MMC ilə 674.949,05 manat məbləğində satınalma müqaviləsi bağlayıb.

Göründüyü kimi Qazax rayon İcra Hakimiyyəti və Qazax şəhər İcra nümayəndəliyi Qazax şəhərində yolların əsaslı təmiri və abadlıq işləri üzrə son bir il ərzində “AZƏRTRANSS” MMC ilə ümumi dəyəri 2 408 510 manat olan 4 satınalma müqaviləsi bağlayıb. 28.12.2024-cü ildə tərəflər arasında təmir işlərinin satın alınması üzrə 511.913,77 manat dəyərində bağlanmış müqaviləni də üstünə gəlsək bu 3 milyon manata yaxın dövlət vəsaiti edir.

İndi gəlin görək Qazax rayon İcra Hakimiyyətinin son illər işbirliyində olduğu “AZƏRTRANSS” MMC barəsində açıq mənbələrdə nə kimi məlumatlar var.

Apardığımız araşdırma zamanı məlum oldu ki, “Lisenziyalar və İcazələr haqqında” Azərbaycan Respublikası Qanununun 8.1 maddəsinə uygun olaraq İqtisadiyyat Nazirliyi tərəfindən aparılan lisenziyaların və icazələrin vahid reyestrində MMC -nin 03.06.2016-cı ildə tikintisinə icazə tələb olunan bina və qurğuların tikinti-quraşdırma işləri üzrə və dağ-mədən işləri, dağ və buruq qazmalarının aparılması işləri üzrə lisenziya aldığı göstərilir.

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “AZƏRTRANSS” (VÖEN: 4200338081) Məhdud Məsuliyyətli Cəmiyyətinin 14 saylı Ərazi Vergilər İdarəsində 17.02.2010-cu il tarixdə dövlət qeydiyyatına alındığı göstərilib. Reyestr məlumatlarında nizamnamə kapitalı 20 manat olan MMC-nin hüquqi ünvanı QAZAX RAYONU, QAZAX ŞƏHƏRİ, HEYDƏR ƏLİYEV, ev.58/5, qanuni təmsilçisinin isə Qasımov Adil Məmməd oğlu olduğu qeyd edilib.

Qeyd edək ki, “AZƏRTRANSS” MMC respublikamızın qərb bölgəsində xüsusilə tanınır. Şirkətin NK-nin 30.12.2023-cü il tarixli, 494 saylı Qərarına əsasən peşəkarlıq və təcrübəyə aid sənədləri olsa da əmək müqaviləsi ilə çalışan işçi qüvvəsi meyarı üzrə tələblərə cavab vermir. Çünki, şirkət daha çox yerlərədə günəmuzd fəhlələrdən, icarəyə götürülən texnikalardan istifadə edir ki, bu da ayrılan vəsaitin böyük hissəsinin mənimsənilməsinə yol açır.

Əldə etdiyimiz məlumatlara görə şirkətin qanuni təmsilçisi Adil Qasımov “Aqrarkredit” Qapalı Səhmdar Cəmiyyəti Bank olmayan Kredit Təşkilatının İdarə Heyətinin Sədri Məmməd Musayevin yaxın dostudur. Elə Məmməd Musayevin rəhbərlik etdiyi təşkilatın Ucar, Şəki, fililalarının təmirini də məhz “AZƏRTRANSS” MMC aparıb.

Bundan əlavə “AZƏRTRANSS” MMC Azərbaycan Dövlət Su Ehtiyatları Agentliyinin tabeliyində “Tikilməkdə Olan Obyektlərin Müdiriyyəti” və bir neçə rayon Su Meliorasiya Sistemlərinin İstismarı idarələri ilə iri məbləğli müqavilələr bağlamışdır. Təbii ki, bu da Sahibkarlar Təşkilatları Milli Konfederasiyasının prezidenti Məmməd Musayevin sayəsində.

Qeyd edək ki, Qazax rayon İcra Hakimiyyətinin başçısı Rəcəb Babaşovdur. O, Prezidentin 19 may 2016-cı il tarixli Sərəncamı ilə təyin edilib. Məlumatlara görə elə Rəcəb Babaşovun da himayədarı Məmməd Musayevdi. Yoxsa, barəsində hər cür neqatib məlumatlar yayılmasına baxmayaraq 10 idir ki, Qazax kimi rayonun İcra Hakimiyyətinin başçısı vəzifəsində otura bilməzdi.

Xatırladaq ki, Rəcəb Babaşov oğlu Elşən Babaşzadənin avtomoobil kolleksiyası ilə tez-tez medianın gündəminə gəlir. Belə ki, Qazax rayon İcra başçısı Rəcəb Babaşov Elşən Babaşzadə 275 min dollar (450 manat) dəyərində olan “Mercedes Benz G-63 AMG” markalı avtomobili, həm də özünün 99 FF 099 dövlət nömrə nişanlı 250 min manatlıq “Rang Rover”i ilə medianın gündəminə düşmüşdü.

Aktualinfo.net