Azərbaycan Dövlət Su Ehtiyatları Agentliyinin tabeliyindəki qurumlardan birinin keçirdiyi satınalma müsabiqəsində diqqətçəkən şübhəli məqam ortaya çıxıb.

Əldə etdiyimiz məlumata görə, Tərtər Su Meliorasiya Sistemlərinin İstismarı İdarəsi nəqliyyat vasitələri üçün ehtiyat hissələrinin satın alınması ilə bağlı fiziki şəxs Kamil Qurbanov Əlişiraz oğlu (VÖEN: 3500139492) ilə müqavilə bağlayıb.
Satınalmanın ümumi məbləği 15.951,24 AZN təşkil edir.

Müqavilə müddəti bitdi, sonra ictimaiyyətə açıqlandı

Dövlət satınalmaları portalının rəsmi məlumatlarında diqqət çəkən əsas qalmaqallı pərdəarxası məqam prosedur tarixləri ilə bağlıdır:

Satınalma metodu: Kotirovka

İşlərin başlama tarixi: 14.09.2026

İşlərin bitmə tarixi: 14.10.2026

Məlumatın dərc edilmə tarixi: 15.10.2026

Sənədlərdən göründüyü kimi, kotirovka sorğusu üzrə işlərin başlama və bitmə müddəti tam yekunlaşdıqdan — yəni oktyabrın 14-ü başa çatdıqdan bir gün sonra (15 oktyabr 2026-cı il) müqavilə portala yerləşdirilərək rəsmən elan olunub. Tender nəticələrinin icra müddəti bitdikdən sonra ictimaiyyətə açıqlanması şffaflıq və satınalma qanunvericiliyinin tələbləri baxımından ciddi suallar doğurur.
Xatırladaq ki, Tərtər Su Meliorasiya Sistemlərinin İstismarı İdarəsinin rəisi Murad Zeynalovdur. O, bu vəzifəyə 3 sentyabr 2024-cü il tarixində Azərbaycan Respublikasının Dövlət Su Ehtiyatları Agentliyinin sədri Zaur Mikayılovun əmri ilə təyin edilib.(32gun.az)

Bakıda "Atəşgah" məbədini ziyarət edən bir qrup turist məbədin ərazisindəki "Atəşgah" restoranında onlara sifariş etdikləri yeməklərin dəyərindən xeyli artıq hesab təqdim edildiyini iddia edib.

"Bakupost" xəbər verir ki, bu barədə rusiyalı turist sosial şəbəkə hesabında paylaşım edib.

O bildirib ki, Çindən olan dostları ilə birlikdə məbədə ekskursiyaya gəliblər. Daha sonra yemək yemək üçün ərazidə yerləşən "Atəşgah" restoranına üz tutublar.

Turistin sözlərinə görə, sevgilisi Azərbaycan dilində danışdığı üçün turistlərə təqdim olunan menyunu deyil, adi menyunu istəyib. Sifarişlərini də həmin menyudakı qiymətlərə əsasən veriblər.

O iddia edib ki, sifarişin ümumi dəyəri 108 manat olduğu halda, onlara əvvəlcə 180 manatlıq hesab təqdim edilib. Narazılıqlarını bildirdikdən sonra hesab 160, daha sonra isə 130 manat olaraq dəyişdirilib. Turistlər yalnız menyudakı qiymətləri kalkulyatorla özləri hesabladıqdan sonra düzgün məbləği müəyyən edə biliblər:

"İndi burada dayanıb məsələni aydınlaşdırmağa çalışırıq. Bizi dörd dəfə aldatmağa cəhd etdiklərini düşündüyümüz üçün həmin hesabı ödəməyəcəyimizi bildiririk.

Qarşınızda Azərbaycan dilində danışan, sifariş verən və restoranlarda belə halların baş verə biləcəyini bildiyi üçün əvvəlcədən turistlər üçün nəzərdə tutulan menyunu deyil, adi menyunu istəyən bir insan var. Halbuki, prinsip etibarilə, belə bir ayrı-seçkilik qanunsuzdur. Siz isə qonaqlarınızın qarşısında ölkənizi bu cür biabır edirsiniz.

Baş verənlərə görə dəhşətli dərəcədə əsəbiləşmişəm. Xüsusilə ona görə ki, artıq bir saatdır burada dayanıb məsələni həll etməyə çalışırıq, amma heç bir nəticə yoxdur. Halbuki nə qədər əsəbi olduğumuzu görürlər.

Belə bir vəziyyətlə qarşılaşan olubsa, xahiş edirəm, bunun necə həll edilə biləcəyini desin. Çünki düşünürəm ki, bu "Atəşgah"da çox sayda turisti aldadırlar.

Təsəvvür edin, restoranda nə qədər yemək yediyinizi hesablamaq üçün kalkulyatordan istifadə etmək məcburiyyətində qalırsınız. Bu, nə qədər alçaldıcıdır! Sadəcə biabırçılıqdır! Heç utanmırsınız?!"

“İmprotex Trucks and Buses” Məhdud Məsuliyyətli Cəmiyyət (MMC) valyuta qaydalarını pozmaqda ittiham edilib.

Yurd.Media-nın əldə etdiyi məlumata görə, şirkət 2024-cü ildə 50 min avro məbləğində vəsaiti bank vasitəsilə avans olaraq ölkə xaricinə köçürüb.

Lakin “Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları”nın 4.3.1.3-cü yarımbəndinin tələblərinə baxmayaraq, ödənişin aparıldığı gündən 2 il müddətində 33,8 min avro məbləğində vəsait hesabına alınan mallar ölkəyə idxal edilməyib və ya həmin məbləğdə valyuta vəsaiti geri qaytarılmayıb.

“İmprotex Trucks and Buses” MMC-nin barəsində İnzibati Xətalar Məcəlləsinin 430.4-cü maddəsi ilə protokol tərtib edilib və iş baxılması üçün Nəsimi Rayon Məhkəməsinə göndərilib.

Məhkəmədə çıxış edən şirkət nümayəndəsi bildirib ki, “İmprotex Trucks and Buses” MMC-nin köçürülmüş 50 min avro məbləğli avans ödənişinin bəyanı üçün təqdim olunmuş 33,8 min avro və 10 min avro olmaqla, cəmi 43,8 min avro məbləğində iş bəyan edilib və bağlanılıb. Bildirib ki, həmin ödəniş üzrə bəyan olunmayan məbləğ 6 214 avro təşkil edib. Nümayəndə qeyd edilənlərə əsasən inzibati xəta haqqında iş üzrə icraata xitam verilməsini xahiş edib.

Nəsimi Rayon Məhkəməsinin qərarı ilə MMC barəsində İnzibati Xətalar Məcəlləsinin 430.4-cü maddəsi ilə başlanılmış inzibati xəta haqqında iş üzrə icraata xitam verilib.

Gəncə şəhərinin İkinci Qarabağ müharibəsi dövründə Ermənistan silahlı qüvvələri tərəfindən beşinci dəfə raket hücumuna məruz qalmasından altı il ötür.

2020-ci il oktyabrın 17-də gecə saat 1 radələrində düşmən cəbhə zonasından kənarda yerləşən, Gəncə şəhərinin mərkəzindəki Cavadxan qəsəbəsini SCUD/Elbrus əməliyyat-taktiki ballistik raketləri ilə növbəti dəfə xain və qəddarcasına atəşə tutub.

Düşmənin hücumu zamanı yaşayış evləri tamamilə dağılıb, sakinlər dağıntılar altında qalıb.

Nəticədə 15 nəfər şəhid olub, 55-dən artıq şəxs yaralanıb, çoxsaylı mülki infrastruktur obyektlərinə, nəqliyyat vasitələrinə külli miqdarda ziyan dəyib. Şəhid olanlar və xəsarət alanlar arasında azyaşlılar, qadınlar və qocalar da var.

Faktla bağlı Azərbaycan Baş Prokurorluğu tərəfindən Cinayət Məcəlləsinin 100.2 (təcavüzkar müharibəni aparma), 120.2.1 (cinayətkar birlik–təşkilat tərəfindən qəsdən adam öldürmə), 120.2.4 (xüsusi amansızlıqla və ya ümumi təhlükəli üsulla qəsdən adam öldürmə), 120.2.7 (qəsdən iki və ya daha çox şəxsi öldürmə), 120.2.12 (milli, irqi, dini ədavət və ya düşmənçilik niyyəti ilə qəsdən adam öldürməyə cəhd), 186.3-cü (əmlakı qəsdən məhv etmə və ya zədələmə xüsusilə külli miqdarda ziyan vurmaqla törədildikdə) və digər maddələri ilə cinayət işi başlanaraq istintaqın aparılması Baş Prokurorluğun İstintaq İdarəsinə tapşırılıb.

Bundan başqa, Ermənistan silahlı qüvvələri həmin gün - oktyabrın 17-də gecə saat 1 radələrində növbəti dəfə Cənubi Qafqazın ən böyük istilik elektrik stansiyası olan Mingəçevir Su Elektrik Stansiyasını hədəfə almaqla cəbhə zonasından 100 km-dən artıq uzaqlıqda yerləşən, iri sənaye şəhəri Mingəçevirə raketlər atıb. Raketlər Azərbaycan Ordusunun Hava Hücumundan Müdafiə Qoşunları tərəfindən zərərsizləşdirilib.

Qeyd edək ki, İkinci Qarabağ müharibəsi dövründə Ermənistan silahlı qüvvələri tərəfindən Gəncə şəhərinə ümumilikdə 5 dəfə (4, 5, 8, 11, 17 oktyabrda) raket və ağır artilleriya ilə hücum edilib. Nəticədə 27 nəfər şəhid olub, 175 nəfər yaralanıb, şəhərdə yerləşən mülki infrastruktur obyektlərinə, nəqliyyat vasitələrinə külli miqdarda ziyan dəyib.

Bu gün Füzuli Şəhəri Günüdür, şəhərin işğaldan azad olunmasından altı il ötür.

Oktyabrın 17-də Füzuli şəhəri ilə yanaşı, rayonun daha 7 yaşayış məntəqəsi - Qoçəhmədli, Çimən, Cuvarlı, Pirəhmədli, Musabəyli, İşıqlı, Dədəli kəndləri işğalçılardan təmizlənib.

Füzuli əməliyyatı Azərbaycan Ordusunun İkinci Qarabağ müharibəsində cənub-şərq cəbhəsində baş verən ən əhəmiyyətli döyüşlərdən biri olub.

Düşmən xeyli canlı qüvvə və texnika itkisi verərək ərazidən qaçıb.

Üstəlik Füzulinin keçmiş təmas xəttində yerləşən bir neçə müdafiə xəttinin yarılması Azərbaycan Ordusunun cənub cəbhəsi boyunca irəliləməsi üçün geniş imkanlar yaradıb.

Qeyd edək ki, Azərbaycanın iri yaşayış məskənlərindən biri olan Füzulinin əsası 1827-ci ildə qoyulub. Qarabulaq adlanan yaşayış məskəninin əsasında 1930-cu ildə Füzuli rayonu təşkil olunub və Qaryagin adlandırılıb. Rayon mərkəzi Qaryagin qəsəbəsi olmaqla, Qozluçay, Köndələnçay, Araz boyu və Füzuli-Ağdam magistral yolunun hər iki ətrafında olan kəndləri əhatə edib. 1959-cu ildə dahi Azərbaycan şairi Məhəmməd Füzulinin 400 illik yubileyi münasibətilə rayonun adı dəyişdirilərək Füzuli rayonu adlandırılıb. Rayonun ərazisi 1 386 kvadratkilometrdir. Tərkibinə bir şəhər və 78 kənd daxildir.

1993-cü ilin avqust ayının 23-də Ermənistan Silahlı Qüvvələrinin rayon ərazisinə hücumu nəticəsində Füzuli şəhəri daxil olmaqla, 58 kənd işğal olunmuşdu.

Füzuli rayonu tarixi-dini abidələrlə, xüsusən də türbələrlə zəngindir. Füzuli rayonu digər yaşayış məntəqələrimizlə yanaşı, erməni işğalı zamanı vandalizmə məruz qalıb. Rayon ərazisində olan evlər, tarixi abidələr tamamilə dağıdılıb, ağaclar məhv edilib.

Prezident İlham Əliyevin 2023-cü il iyulun 31-də imzaladığı sərəncama əsasən, hər il oktyabrın 17-də Füzuli Şəhəri Günü təntənəli şəkildə qeyd edilir.

Alim Abbasovun jurnalistə və şikayətçiyə qarşı göstərdiyi təhqiramiz münasibət 14 oktyabr 2026-cı il tarixində Milli TV olaraq vətəndaşın şikayətini araşdırmaq və məsələyə aydınlıq gətirmək məqsədilə Şəmkir Suvarma Sistemləri İstismarı İdarəsinə müraciət etdik. Təxminən bir saata yaxın gözləməyimizə baxmayaraq, müraciətimizə lazımi münasibət göstərilmədiyini bildiririk.

Daha sonra idarəyə daxil olaraq məsul şəxslərə suallar ünvanladıq. İdarə rəisi Alim Abbasovun jurnalistə və şikayətçiyə qarşı təhqiramiz ifadələr işlətdiyini və idarəni tərk etməyimizi tələb etdi.

İdarənin satış şöbəsinin müdiri Kənan Bayramova ünvanladığımız suallar isə məsələyə aydınlıq gətirəcək dolğun cavablarla nəticələnmədi.
Vurğulayırıq ki, jurnalistin məqsədi qarşı tərəfi əsassız ittiham etmək deyil, vətəndaşın şikayətini araşdırmaq və məsul şəxslərin mövqeyini ictimaiyyətə çatdırmaqdır. Dövlət qurumlarında vətəndaş müraciətlərinə məsuliyyətlə yanaşılmalı, jurnalistlərin sualları isə qarşılıqlı hörmət çərçivəsində cavablandırılmalıdır.

Biz Milli TV olaraq inanırıq ki, idarə rəisi olan Alim Abbasovun bu hərəkətinə qıza zaman ərzində Azərbaycan Dövlət su ehtiyatları Agentliyinin rəhbəri olan hörmətli Zaur müəllim ciddi reaksiya verərək, lazımı addımı atacaq.

Çünki rəhbərin nüfuzu vəzifəsindən deyil, məsuliyyətindən, davranışından və ictimaiyyət qarşısında hesabatlılığından asılıdır.

Tam Ətraflı Videodan izlə

Millitv

AZCON Holdinq şirkətlərindən olan "Azərpoçt" MMC-də çalışmış bir sıra şəxslərin son vaxtlar Holdinqin tabeliyindəki digər şirkətlərdən olan “Azərbaycan Xəzər Dəniz Gəmiçiliyi” (ASCO) QSC-də vəzifəyə təyin edilməsi halı müşahidə edilir.

Plat.az xəbər verir ki, bu ilin aprel ayında "Azərpoçt"un idarə heyətinin sədri İsi Mustafayev vəzifəsindən ayrılıb. Onun yerinə Manaf Babayev qurumun idarə heyətinin sədri təyin edilib.

M.Babayevin gəlişindən sonra "Azərpoçt"da kadr dəyişiklikləri yaşanır. Belə ki, şirkətin bir çox köhnə işçiləri vəzifələrindən ayrılıb. Onlardan bir neçəsinə ASCO-da vəzifə verilib.

Məsələn, "Azərpoçt"da 2021-2026-cı illərdə İdarə heyətinin sədrinin müavini olmuş Xəyyam Əlizadə iyun ayında işdən çıxıb. O, bundan sonra ASCO-nun İdarə Heyətinin sədrinin müşaviri təyin edilib.

X.Əlizadənin ardınca "Azərpoçt" sədrinin müşaviri Məhəmməd Topalov da iyul ayında vəzifəsindən ayrılıb. Ona isə, ASCO-da İstismar-kommersiya departamentinin rəisi vəzifəsi həvalə edilib.

Ötən ay "Azərpoçt"un İnsan resursları biznes tərəfdaşlıq şöbəsinin rəhbəri Cavid Hüseynov da işdən çıxıb. C.Hüseynova ASCO-da Təhsil İnnovasiyaları və Rəqəmsal Mərkəzinin müdir müavini vəzifəsi verilib.

Bu ay isə, "Azərpoçt"da Layihə portfelinin idarə edilməsi ofisinin rəhbəri vəzifəsini müvəqqəti icra edən Nəzrin Manaflı-Dadaşova işdən çıxıb. O, ASCO-da təlim və inkişaf üzrə koordinator vəzifəsinə təyin edilib.

Qeyd edək ki, "Azərpoçt"dan işdən çıxan şəxslərin ASCO-ya üz tutması heç də təsadüfi görünmür. Belə ki, hazırda ASCO-nun sədri olan Əfqan Cəlilov 2021-2023-cü illərdə "Azərpoçt"un idarə heyətinin sədri olub.

Qaradağ rayonu, Lökbatan qəsəbəsi, 28 May, Nəriman Nərimanov və Dadaş Bünyadzadə küçələrinin kəsişməsində aparılan tikinti işləri sakinlərin narazılığına səbəb olub.


Tribuna.az-a bu barədə məlumat verən sakinlər bildirib ki, sözügedən ərazidə əvvəllər ağaclar olub.
Tikinti başladığı ərəfədə ağaclar hamısı gecə ilə məhv edilərək kəsilib.


Sakinlər bildirib ki, ərazidə 13 mərtəbəli, birinci mərtəbəsi qeyri-yaşayış sahəsi kimi nəzərdə tutulan bina tikilir.


Sakinlər iddia edirlər ki, tikinti işləri zamanı heç təhlükəsizlik qaydalarına da lazımi səviyyədə əməl olunmur. Onların sözlərinə görə, ərazidə tikinti aparılsa da, təhlükəsizlik tədbirlərinin təşkil edilmir.


Sakinlərin iddiasına əsasən, Natiq Əliyev rayona icra başçısı təyin ediləndən sonra bu cür tikililərin sayı artıb.


Sakinlər məsələ ilə bağlı aidiyyəti qurumların tədbir görməsini tələb edir.


VİDEO LİNKDƏ: https://tribuna.az/qaradagda-sakinlerin-naraziligi-boyuyur-video/

Bu gün Yeni Azərbaycan Partiyasının (YAP) yeni seçilmiş İdarə Heyətinin ilk iclası keçirilib.

Teleqraf-ın əldə etdiyi məlumata görə, toplantıda struktur dəyişiklikləri ilə bağlı qərar qəbul edilib.

Eyni zamanda partiyanın Veteranlar Şurasına, Təftiş Komissiyasına, eləcə də Gənclər Birliyinə sədri postuna rəhbərlik edəcək şəxslər müəyyənləşib.

İclasda həmçinin Prezident Administrasiyasının sabiq rəhbəri, AMEA-nın keçmiş prezidenti Ramiz Mehdiyevin YAP üzvlüyündən çıxarılması məsələsinə baxılıb və onun partiyadan çıxarılması ilə bağlı qərar qəbul edilib.

Xatırladaq ki, Ramiz Mehdiyev Yeni Azərbaycan Partiyasının və Veteranlar Şurasının üzvü idi. O, 2021-ci ilin mart ayına qədər YAP İdarə Heyətinin üzvü olub.

Ramiz Mehdiyev barəsində 2025-ci ilin oktyabrında Dövlət Təhlükəsizliyi Xidmətində cinayət işi başlanıb.

Ramiz Mehdiyevə Cinayət Məcəlləsinin 193-1.3.2-ci (cinayət yolu ilə əldə edilmiş əmlakın leqallaşdırılması), 274-cü (dövlətə xəyanət) və 278.1-ci (hakimiyyəti zorla ələ keçirməyə və ya dövlətin konstitusiya quruluşunu zorla dəyişdirməyə yönələn hərəkətlər) maddələri ilə ittiham irəli sürülüb.

Yasamal rayonu, Abbas Mirzə Şərifzadə küçəsi 131A ünvanında aparılan tikinti işləri sakinlərin narazılığına səbəb olub.

Tribuna.az xəbər verir ki, sakinlərin sözlərinə görə, “ASAN xidmət” mərkəzinin yaxınlığında, təxminən 300 kvadratmetr ərazidə aparılan tikintinin təyinatı məlum deyil.

Şikayətçilər bildirirlər ki, ərazidə tikinti işləri ilə bağlı aidiyyəti qurumlara müraciətlər edilsə də, indiyədək problemin həlli istiqamətində nəticə əldə olunmayıb.

Sakinlərin iddiasına görə, tikintinin dayandırılması ilə bağlı tədbir görülmədiyindən işlər davam etdirilib və obyekt artıq ikinci mərtəbəyədək qaldırılıb.

Şikayətçilər Yasamal Rayon İcra Hakimiyyətindən və aidiyyəti qurumlardan ərazidə aparılan tikintinin qanuniliyinin araşdırılmasını, obyektin hansı təyinatla tikildiyinə aydınlıq gətirilməsini və qanun pozuntusu varsa, müvafiq tədbirlər görülməsini tələb edirlər.

Məsələ ilə bağlı aidiyyəti qurumların mövqeyini dərc etməyə hazırıq.