“Professor Gindes adına respublika uşaq və yeniyetmələr üçün vərəm sanatoriyası” publik hüquqi şəxsi tərəfindən bir sıra malların satın alınması üzrə 02.09.2026-cı ildə başlanılmış kotirovka sorğusuna yekun vurulub. Müsabiqənin qalibi “YUNEST” Məhdud Məsuliyyətli Cəmiyyəti seçilib və tərəflər arasında 34.343,43 manat dəyərində satınalma müqaviləsinin bağlanılması planlaşdırılır. Məlumat satınalmaların portalında 09.10.2026-cı ildə dərc edilib.
Şərtlər toplusuna görə MMC satınalan dövlət müəssisəsini tualet üçün təmizləyici vasitə, kanalizasiya üçün vasitə, xlor, qab yuyan maye, sabun, şampun, salfetka, dəftər, bloknot, sifon, birdəfəlik kağız stəkan, qolf üçün təkər və bu kimi digər mallarla təmin etməlidir. Qeyd edək ki, Professor Gindes adına respublika uşaq və yeniyetmələr üçün vərəm sanatoriyası yuxarıda göstərilən eyni malların alınması üzrə “OMNİT TT” MMC ilə 26.05.2026-cı ildə 29.134,48 manat dəyərində müqavilə müqavilə bağlayıb.
Qeyd edək ki, Professor Gindes adına respublika uşaq və yeniyetmələr üçün vərəm sanatoriyası sözügedən MMC ilə son iki-üç ayda bir neçə müqavilə bağlayıb. Həm “YUNEST” həm də başqa ad altında.
“Binanın fasad şüşələrinin yuyulması xidməti”nin satın alınması üzrə 19.819,04 manat dəyərində müqavilə 15.09.2026-cı ildə “YUNEST” MMC ilə bir mənbədən satınalma metodu tətbiq edilməklə bağlanılıb.
Xatırlatmaq istərdik ki, bir mənbədən satınalma metodu “Dövlət Satınalmaları Haqqında” Qanunun 49-cu maddəsinə görə yalnız bu hallarda tətbiq edilə bilər: satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda.
Göründüyü kimi sözügedən MMC xüsusi hüquqlara malik olmayan, analoji işlərdə təcrübəsi olmayan, bir şirkətdir. Amma buna baxmayaraq Professor Gindes adına respublika uşaq və yeniyetmələr üçün vərəm sanatoriyası qanunun tələblərini pozaraq təsərrüfat malları sifariş verdiyi MMC ilə fasad şüşələrinin yuyulması xidməti üzrə bir mənbədən satınalma metodu tətbiq edilməklə şübhəli müqavilə bağlayıb.
“Bir sıra işlər”in satın alınması üzrə 39.600,39 manat dəyərində satınalma müqaviləsi 31.07.2026-cı ildə “AXS” MMC ilə bağlanılıb.
Şərtlər toplusuna görə MMC vərəm sanatoriyasında torpağın hamarlanması, ağardılma işləri – bardurlar, hasarlar, ağaclar, kanalizasiya borusunun sökülməsi, əkilmiş gül və kolluqların dekorativ baxımı, su borularının yenilənməsi, fasad səthlərin yuyulması və təmizlənməsi, binanın fasad örtüyünün düzəldilməsi, çiçək yataqlarının torpaq qatının hazırlığı və yumşaldılması kimi digər xidmətlər göstərmələdir.
Göründüyü kimi Professor Gindes adına respublika uşaq və yeniyetmələr üçün vərəm sanatoriyası həm malların alınması, həm də müxtəlif xidmətlərin göstərilməsi üçün bir MMC ilə ümumi dəyəri 93 762 manat dəyərində 3 satınalma müqaviləsi bağlamışdır.
Bəs sözügedən MMC barəsində nə kimi məlumatlar var. Açıq mənbələrdə “YUNEST” Məhdud Məsuliyyətli Cəmiyyəti və onun qanuni təmsilçisi barədə əlavə məlumata rast gəlinmir.
Satınalmaların portalı üzərindən apardığımız araşdırmada “YUNEST” MMC eyni VÖEN-lə həm də “AXS” MMC kimi iyul-sentyabr aylarında “Sanator-Kurort Reabilitasiya Mərkəzi” publik hüquqi şəxsi ilə müxtəlif xidmətlər üzrə ümumi dəyəri 140 893 manat dəyərində 3 satınalma müqaviləsi bağlamışdır.
Apardığımız araşdırma zamanı Professor Gindes adına respublika uşaq və yeniyetmələr üçün vərəm sanatoriyası “AXS” MMC-nin VÖEN-i kimi təqdim etdiyi eyniləşdirmə nömrəsinin “YUNEST” MMC-yə məxsusluğu məlum oldu. Sözügedən “YUNEST MMC 17.01.2012-ci ildə 3 saylı Ərazi Vergilər İdarəsində dövlət qeydiyyatına alınıb. Hüquqi ünvanı Qusar rayonu, Yuxarı Ləyər kəndi, qanuni təmsilçisi Zeynalov Nahid Zakir oğludur. MMC-nin ilk qanuni təmsilçisi Yunusov Xalid Qiyasəddin oğlu olub. Daha sonra Ağasıyev Sarxan Dünyaməddin oğlu MMC-nin rəhbəti olub.
“YUNEST” MMC-nin hazırkı qanuni təmsilçisi Zeynalov Nahid Zakir oğlunun isə uzun müddət “Bank of Baku” İdarə Heyəti sədrinin müavini vəzifəsində çalışdığı, bankın İT infrastrukturu və ödəniş sistemlərinin inkişafına rəhbərlik etməsi barədə açıq mənbələrdə məlumatlar var.
Qeyd edək ki, 2024-cü ilin sentyabr ayında Azərbaycanda bir sıra qurumların rəhbərləri və yüksəkvəzifəli əməkdaşlarının korrupsiya cinayətlərinin üstünün açılması barədə məlumatlar yayılmışdı. Məlumatda bildirilirdi ki, Səhiyyə, Elm və Təhsil Nazirlikləri və Milli Elmlər Akademiyasının tabeliyindəki mərkəzlərdə dövlət vəsaitlərinin mənimsənilməsi faktları ortaya çıxıb.
Cinayət məsuliyyətinə cəlb edilən 80 şirkətə rəhbərlik edən Rüfət Nurəddin oğlu Kərimovun ifadələri isə araşdırmanın əhatə dairəsini genişləndirib. Onun şirkətlərinə dövlət qurumlarından və onların müəssisələrindən müxtəlif təyinatlı pulların köçürülməsi Maliyyə Monitorinqi Mərkəzini şübhələndirib. Bir neçə ay davam edən istintaqla ehtimal olunandan daha böyük yeyintilər üzə çıxıb.
Müəyyən edilib ki, dövlət qurumları tərəfindən şirkətlərə tikinti materiallarının alınması, su ilə təmin etmə və digər xidmətlər adı ilə 3 milyon manat pul köçürülüb. Baş prokuror yanında Korrupsiyaya qarşı Mübarizə Baş İdarəsi cinayətdə iştirak edən şəxsləri tək-tək istintaqa cəlb edib. Hər biri Cinayət Məcəlləsinin xeyli miqdarda mənimsəmə və vəzifə saxtakarlığı maddələri ilə təqsirli biliniblər.
Onların arasında Səhiyyə Nazirliyinin “Professor Gindes adına respublika uşaq və yeniyetmələr üçün vərəm sanatoriyası” Publik Hüquqi Şəxsinin direktoru Rəşid Bədəlovun da adı keçir.
Göründüyü kimi, ötən illərdə olduğu kimi Səhiyyə Nazirliyinə tabeli tibb müəssisələrindəkorrupsiya şəbəkəsi davam edir. “Professor Gindes adına respublika uşaq və yeniyetmələr üçün vərəm sanatoriyası” Publik Hüquqi Şəxsinin direktoru Rəşid Bədəlov da köhnə şakərindən əl çəkə bilmir. Adı olub özü olmayan saxta şirkətlərə yenə də mal materialların alınması və müxtəlif xidmətlər adı altında işbirliyini davam etdirir.

Aktualinfo.net

Həkimlərdən kredit toplamaq, ixtisasartırma kurslarında iştirak etmək və peşə hazırlığını davamlı yeniləmək tələb olunur. Ancaq bu tələbləri yerinə yetirmək üçün yaradılan imkanların kifayət edib-etməməsi sual doğurur.

Bu gün LOR həkimləri arasında əsas narazılıq ixtisasartırma kurslarında yer çatışmazlığı ilə bağlıdır. Rəsmi plana görə, 2026–2027-ci tədris ilində LOR üzrə 21 kurs açılır və hər kursa cəmi 6 nəfər qəbul olunur. Yəni 563 LOR həkiminə qarşı cəmi 126 kurs yeri nəzərdə tutulub.
LOR həkimlərin Medicina.az -a bildirdiyinə görə, hazırda əsas problemlərdən biri Əziz Əliyev adına Azərbaycan Dövlət Həkimləri Təkmilləşdirmə İnstitutunda ixtisasartırma kurslarına düşə bilməmələridir.
İnstitutun 2026–2027-ci tədris ili üçün rəsmi planında otorinolarinqologiya üzrə 21 kurs nəzərdə tutulub. Hər kursa cəmi 6 nəfər qəbul edilir. Bu isə bir tədris ili ərzində 126 yer deməkdir.
Dövlət Statistika Komitəsinin son açıqladığı məlumata görə isə 2025-ci ilin əvvəlinə Azərbaycanda 563 otorinolarinqoloq fəaliyyət göstərib. 563 LOR həkiminin olduğu ölkədə Təkmilləşdirmə İnstitutunun bir illik planında bu ixtisas üzrə 126 kurs yeri var. Üstəlik, 126 yer heç də 126 fərqli LOR həkiminin təlim keçməsi demək deyil. Eyni həkim il ərzində bir neçə fərqli kursda iştirak edə bilər.
Planın özündə də görünür ki, iki kursa LOR həkimləri ilə yanaşı üz-çənə cərrahları qəbul olunur. Kurslardan biri isə xüsusi olaraq dövlət müəssisələrində çalışan bölgə LOR həkimləri üçün nəzərdə tutulub. Deməli, bütün 126 yerin ölkədəki bütün LOR həkimləri üçün eyni şəkildə açıq olduğunu demək olmaz.
Daha bir məqam, bu kurslara digər ixtisaslardan, məsələn, hazırda estetik cərrah kimi fəaliyyət göstərənlər, hətta ümumi cərrahlar da qatılır. Məsələn, tibb üzrə fəlsəfə doktoru, tanınmış LOR, estetik cərrah Məzahir Quliyevin LOR Rinoplastika kursunda 6 həkim iştirak edir və diqqət çəkən məqam kursda bir müddət sertifikatsiz çalışdığı barədə araşdırılma aparılan, rinoplastika burun əməliyyatları icra edən Fuad Abdullayev də yer alıb. Qeyd edək ki, Fuad Abdullayev ixtisasca ümumi cərrahdır.
Səhiyyə Nazirliyi tərəfindən açıqlanan “Azərbaycan Respublikasının ərazisində plastik cərrahiyyə ixtisası üzrə praktik tibb fəaliyyətinə icazə verilən həkim-mütəxəssislərin” siyahısında Fuad Paşa oğlu Abdullayevin adı yer almır.
Bəs Fuad Abdullayev niyə LOR kursundadır?
Həkim üçün istənilən boş yer çıxış yolu deyil.
Səhiyyə Nazirliyinin rəsmi məlumatına görə, həkimlər davamlı peşəkar inkişaf çərçivəsində 5 il ərzində hər il orta hesabla 50 olmaqla minimum 250 kredit toplamalıdırlar.
Kredit yalnız Təkmilləşdirmə İnstitutunun kurslarından yığılmır. Konfrans, seminar, simpozium, təlim və digər akkreditə olunmuş elmi-tədris tədbirləri də kredit verir. Ona görə 126 kurs yerini bütün kredit toplama sisteminin ümumi imkanları kimi göstərmək düzgün olmaz. Amma bu, kurslarda yer problemini də aradan qaldırmır. Səhiyyə Nazirliyinin sertifikasiya ilə bağlı rəsmi sual-cavabında bəzi hallarda həkimin son beş ildə azı bir dəfə öz ixtisası üzrə ixtisasartırma kursunda iştirak etməsinin vacib olduğu ayrıca göstərilir.
Burada bir sual ortaya çıxır: dövlət həkimdən kurs keçməyi tələb edirsə, həmin kurslarda kifayət qədər yer yaradılıbmı? Həkim üçün istənilən boş yer çıxış yolu deyil. Kurs onun ixtisasına və gördüyü işə uyğun olmalıdır. Tarix iş qrafikinə uyğun gəlməlidir. Bölgədə çalışan həkim üçün isə Bakıya gəlmək əlavə yol və qalma xərci deməkdir. Ona görə də yalnız “126 yer var” deməklə kursların əlçatan olub-olmadığını müəyyən etmək mümkün deyil. Bunun üçün bir neçə suala cavab lazımdır: il ərzində bu kurslarda neçə fərqli LOR həkimi iştirak edir? Neçə həkim yer olmadığı üçün kursa qəbul edilmir? Növbədə nə qədər gözləyirlər?
Eyni həkim bir il ərzində neçə kursda iştirak edir? Altı nəfərlik qrup praktiki məşğələnin keyfiyyəti üçün məqsədəuyğun ola bilər. Amma müraciət edənlərin sayı çoxdursa, əlavə və paralel qruplar açmaq mümkündür. Bunun üçün əlavə müəllim və klinik bazalar cəlb oluna bilər. Nəzəri dərslərin uyğun hissəsi distant formada da təşkil edilə bilər. İnstitutun öz saytında distant təhsil proqramının fəaliyyət göstərdiyi də qeyd olunur. Məsələnin başqa həssas tərəfi qəbulun şəffaflığıdır. Yer az, tələb çox olanda kimin kursa necə qəbul edildiyi tam aydın olmalıdır.
Əks halda həkimlər arasında “kim daha tez yer tapır?”, “üstünlük kimə verilir?” kimi suallar yaranır.
Mövcud rəqəmlər kurslara qəbul zamanı korrupsiya olduğunu sübut etmir. Amma məhdud yerlərin şəffaf olmayan qaydada bölüşdürülməsi belə bir risk yarada bilər. Xüsusilə sertifikasiya vaxtı yaxınlaşan həkim üçün məsələ daha ciddi olur. Kurs lazımdır, yer yoxdur, qəbulun növbəsi və meyarları isə aydın deyil. Həkimin peşəkar fəaliyyəti “kursda yer tapacağammı?” sualından asılı qalmamalıdır.
Dövlət həkimdən davamlı təhsil və kredit tələb edirsə, bunun üçün kifayət qədər və əlçatan imkan da yaratmalıdır.
Mövzu və yaranan suallarla bağlı Səhiyyə Nazirliyi nəzdində Həkimləri Təkmilləşdirmə İnstututuna sorğu göndərdik. İnstitutdan açıqlama hələ gözləmə mərhələsindədir.
Eləcə də cərrah Məzahir Qurbanovla əlaqə saxlamağa cəhd etsək də, həkimdən açıqlama almaq mümkün olmadı.

Elmi-Tədqiqat Travmatologiya və Ortopediya İnstitutunda elektron sistemin işləməməsi səbəbindən vətəndaşların saatlarla növbədə gözləməsi yenidən səhiyyə sistemindəki elektron xidmətlərin vəziyyətini gündəmə gətirib.

Səhiyyə Nazirliyi yaranmış problemlə bağlı açıqlamasında məsələnin TƏBİB-in elektron sistemində yaranmış texniki nasazlıqdan qaynaqlandığını bildirib.

Nazirliyin açıqlamasına görə, sistemdə yaranan nasazlıq pasiyentlərin qeydiyyatı və xidmətlərin göstərilməsi prosesində müvəqqəti ləngimələrə və növbələrin yaranmasına səbəb olub. Sistem tam bərpa edildikdən sonra xidmətlərin əvvəlki qaydada davam etdiriləcəyi bildirilib.

Məsələ ilə bağlı diqqətçəkən məqam isə problemin məhz TƏBİB-in yenə elektron sistemi ilə əlaqələndirilməsidir.

Çünki TƏBİB-in elektron sistemləri ilə bağlı problemlər və vətəndaşların bu istiqamətdə şikayətləri yeni məsələ deyil. Müxtəlif vaxtlarda vətəndaşlar sistemlərin işləməməsi, xidmətlərin gecikməsi və bunun nəticəsində yaranan növbələrdən narazılıqlarını bildiriblər.

Bu dəfə isə məsələni vətəndaşların şikayəti deyil, Səhiyyə Nazirliyinin açıqlaması təsdiqləyir. Nazirlik açıq şəkildə bildirir ki, yaranmış problem TƏBİB-in elektron sistemindəki texniki nasazlıqla bağlıdır.

Bu isə TƏBİB-in elektron sistemlərində yaranan problemlərin nə qədər davamlı və həll olunmamış olduğunu bir daha gündəmə gətirir.

Əgər vətəndaşın tibbi xidmətə çıxışı elektron sistemdən asılıdırsa və həmin sistem işləmədikdə insanlar saatlarla növbədə qalmalı olurlarsa, burada söhbət sadəcə texniki nasazlıqdan getmir. Problem belə hallarda birbaşa vətəndaşın aldığı tibbi xidmətə təsir edir.

Daha diqqətçəkən məqam isə odur ki, illərdir müxtəlif problemlərlə bağlı narazılıqlar səslənsə də, elektron sistemlərin dayanıqlı işləməsi məsələsi hələ də tam həllini tapmayıb.

Bu hadisə də göstərir ki, TƏBİB-in elektron sistemlərində yaranan nasazlıqlar vətəndaşların vaxtına, xidmət almasına və tibb müəssisələrindəki iş prosesinə birbaşa təsir göstərə bilir. Səhiyyə Nazirliyinin son açıqlaması isə bu problemin mənbəyini artıq konkret göstərir: “Problem TƏBİB-in sistemindədir”. Sual isə dəyişmir - TƏBİB-in elektron sistemlərində illərdir davam edən bu problemlər nə vaxt birdəfəlik həll olunacaq?

Bizimesr.info

Son vaxtlar həkimlər arasında icbari tibbi sığorta tərəfindən müayinə və əməliyyatlara görə verilən ödənişlərin az olması ilə bağlı narazılıqlar yaranıb.

“Qafqazinfo” xəbər verir ki, onlar riskli və stresli əməliyyatlara görə çox az ödəniş almalarından şikayətlənirlər.

Bunlardan biri də Topçubaşov adına Elmi-Cərrahiyyə Mərkəzinin həkimi Xəyal Aşurovdur. O, sosial şəbəkə hesabında qeyd edib ki, həkimlərə ödənilən məbləğ az olduğuna görə böyük bir risk altına girməyə dəymir. Həkim ironik olaraq icbari tibbi sığortanı məhkəməyə vermək istədiyini, buna görə çıxacağı hakim qarşısında özünü bu cür müdafiə edəcəyini bildirib: “Elə düşünün ki, qüsurlu bir övladınız və ya nəvəniz dünyaya gəlib. Axtarıb araşdırmısınız ki, Xəyal bala bu əməliyyatı edə bilir. Gəlmisiniz yanıma, məndən soruşursunuz ki, ay bala, işlər necə gedir? Mən də deyirəm ki, sənin 3 aylıq qüsurlu övladını 3 saat ümumi narkoz altında əməliyyat edəcəyəm, icbari sığorta bu əməliyyata görə mənə 80 manat pul verəcək…

Əl boyda qüsurlu bir körpənin 3 saatlıq əməliyyatından 80 manat alacağımı bilə-bilə bu stresi yaşamaq mənə rəvadırmı?! Mən bu əziyyəti, bu stresi 80 manata görə çəkməliyəmmi? Bu 3 saatlıq stresdən ötrü anestezioloq 20 manat alacaq. 20 manatdan ötrü bu əziyyəti, bu cavabdehliyi götürməlidirmi? Bu uşağın başına bir iş gəlsə, necə olacaq bizim aqibətimiz?

İnsanlara icbari tibbi sığortanın həkimləri istismar etdiyini anlada bilmirik… İnsanlar deyir bizə dəxli yoxdur, maaşımızdan tutulur. Müayinə talonuna 25 AZN yazılır, xəstə elə bilir ki, onu müayinə edən həkim 25 manat alır. O talonda yazılan 25 manatın 1 manat 80 qəpiyi həkimə çatır və hamı da bizi daş-qalaq edir…

Artıq həkimlər risk qrupu daşıyan xəstələri götürmür. Çünki qəpik-quruşdan ötrü heç kim başının ağrımasını istəmir. Xəstəyə bir şey olsa, o həkimi doğduğuna, həkim olmağına peşman edirlər… Bir dəfə gecə 11-də 9 aylıq uşağı xahiş-minnət, yalvar-yaxardan sonra əməliyyata aldım, bəlkə, səhərə saxlasam, başımdan etsəm, səhərə sağ çıxmazdı. 9 aylıq 400 crp, 29 leykositlə, 40 qızdırma ilə. Təsəvvür edə bilirsiniz? Uşağı gecə 11-də əməliyyat etdim, sonra 15 gün hər gün sarğı etdim, hər gün irinini təmizlədim. İcbari tibbi sığorta o uşağa çəkdiyim, gecəmi gündüzümə qatdığım əziyyətimə görə mənə 32 manat pul verdi… İndi siz deyin, biz necə davranmalıyıq, başımızı aşağı salıb işimizimi görməliyik, rüşvətmi almalıyıq, rayondan gələn meyvəli-çolpalı “korobka”yamı göz dikməliyik, yoxsa ölkədənmi getməliyik?”

Həmçinin artıq bir neçə aydır vətəndaşlar özəl tibb müəssisələrinə əməliyyatla bağlı göndərişlərin verilməməsindən şikayətlənirlər. İddia olunur ki, əvvəllər özəl xəstəxanalara göndərişlər verilirdisə, artıq demək olar ki, sənədlər yalnız dövlət xəstəxanalarına verilir. Bu günlərdə tanınmış ürək cərrahı Üzeyir Rəhimov da özəl xəstəxanalarda icbari sığortanın olmamasından narazılıq etmişdi. Onun sözlərinə görə, özəl xəstəxanalara sığortahaqqı verilmir, nəticədə, vətəndaşların həkim seçmə haqqı əllərindən alınır, məcbur edilirlər ki, başqa dövlət xəstəxanasına getsinlər. Dövlət xəstəxanasında isə yaxşı həkimlər olur. Sadəcə orada ən böyük problem alqı-satqı, ləvazimat əskikliyidir, bu da çox ciddi defektdir.

Problemlə bağlı Dövlət Tibbi Sığorta və Ekspertiza Agentliyinə müraciət ünvanladıq. Qurumun İctimaiyyətlə əlaqələr və kommunikasiya departamentinin müdiri Tural Qurbanov sorğumuza cavab olaraq bildirdi ki, pasiyentlərə tibbi xidmətlərin göstərilməsi üçün dövlət tibb müəssisələrində lazımi şərait mövcuddur: “İcbari tibbi sığorta fondunun vəsaiti hesabına tibbi xidmətlərin göstərilməsi üçün göndəriş vərəqələrinin verilməsi Qaydası”na əsasən ixtisaslaşdırılmış tibbi xidmətlərin göstərilməsi göndəriş əsasında həyata keçirilir.

Qeyd edək ki, pasiyentlərə tibbi xidmətlərin göstərilməsi üçün dövlət tibb müəssisələrində lazımi şərait mövcuddur.

Pasiyentə qeydiyyatda olduğu inzibati ərazi vahidində və ya həmin tibbi ərazi bölməsində, yaxud digər tibbi ərazi bölməsində fəaliyyət göstərən dövlət tibb müəssisəsində müvafiq xidmətin göstərilməsi mümkün olmadığı hallarda onlara Dövlət Tibbi Sığorta və Ekspertiza Agentliyi tərəfindən özəl tibb müəssisəsinə göndəriş verilir və bu sahədə hər hansı məhdudiyyət yoxdur”.

Tibbi Ərazi Bölmələrini İdarəetmə Birliyinə (TƏBİB) və Səhiyyə Nazirliyinə tabeli tibb müəssisələri tərəfindən keçirilən dövlət satınalmalarında yol verilən qanunsuzluqlarla bağlı mediada kifayət qədər geniş məlumatlar yayılmaqdadır. Apardığımız araşdırmalar zamanı “Sumqayıt Tibb Mərkəzi” publik hüquqi şəxsi tərəfindən də “Dövlət Satınalmaları Haqqında” Azərbaycan Respublikası Qanununun tələblərinə əməl edilməməsinə, bağlanmış müqavilələrdə qanun pozuntularına yol verilməsinə şübhə yaradan bir sıra hallar məlum olmuşdur.

“Sumqayıt Tibb Mərkəzi” publik hüquqi şəxsi tərəfindən mətbəə mallarının satınalınması üzrə 29.06.2026-cı ildə başladılmış açıq tenderə yekun vurulub. Müsabiqənin qalibi “AZİMUT TƏCHİZAT” Məhdud Məsuliyyətli Cəmiyyəti seçilib və tərəflər arasında 39.190,16 manat dəyərində satınalma müqaviləsi bağlanılıb. Məlumat satınaılmaların portalında 22.09.2026-cı ildə dərc edilib.

Qeyd edək ki, Sumqayıt Tibb Mərkəzi tərəfindən nəzərdə tutulmuş mətbəə mallarının satın alınması üzrə keçirilmiş açıq tenderdə ehtimal olunan qiyməti 95.900,00 manat müəyyən edilib.

Bundan əlavə, Sumqayıt Tibb Mərkəzi lLiftlərə texniki xidmət üzrə “LİFT SERVİS” BİRLİYİ ilə 7.788 manat dəyərində satınalma müqaviləsini 07.09.2026-cı ildə bağlayıb. Bu açıq tenderdə ehtimal olunan qiyməti 23.520,00 manat müəyyən edilib.

Sumqayıt Tibb Mərkəzi müxtəlif növ mal materialların alınması üzrə “EUROSTAR GROUP OF COMPANIES” Məhdud Məsuliyyətli Cəmiyyəti ilə 113.333,31 manat dəyərində satınalma müqaviləsini 07.09.2026-cı ildə bağlayıb. Bu açıq tenderin ehtimal olunan qiyməti 175.889,44 manat müəyyən edilib.

Sumqayıt Tibb Mərkəzi camaşırların yuyulması, ütülənməsi və çatdırılması xidməti üzrə “STEEL MATERIALS” Məhdud Məsuliyyətli Cəmiyyəti ilə 47.200 manat dəyərində satınalma müqaviləsini 07.09.2026-cı ildə bağlayıb. Bu açıq tenderin ehtimal olunan qiyməti 118.500,00 manat müəyyən edilib.

Dövlət satınalmalarının vahid internet portalına yerləşdirilmiş bu məlumatdan da görsəndiyi kimi satınalan təşkilat olaraq Sumqayıt Tibb Mərkəzinin müəyyən etdiyi ehtimal qiyməti ilə qalib təchizatçıların təklif etdiyi qiymətlər arasında kəskin fərq var.
Qeyd edək ki, “Dövlət Satınalmaları haqqında” Azərbaycan Respublikasının Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Qeyd edək ki, ehtimal olunan qiymət satınalma prosedurunda mal, iş və xidmətlərin vergi və rüsumlar daxil olmaqla bazar şərtlərinə əsasən müəyyən edilən maksimum dəyəridir. Bu qiymət satınalan təşkilat tərəfindən təkliflərin qiymətləndirilməsi üçün istifadə edilir və bazarın təhlili, müqayisəli üsullar və ya statistik məlumatlar əsasında hesablanır və dövlət vəsaitlərindən səmərəli istifadə məqsədilə 10 faizdən çox güzəştə yol vermək olmaz.

Xatırladaq ki, mediada Hesablama Palatasının sədri Vüqar Gülməmmədovun Milli Məclisin İqtisadi siyasət, sənaye və sahibkarlıq komitəsinin iclasında Hesablama Palatasının 2025-ci ildə fəaliyyəti haqqında hesabatının müzakirəsi açıqlanıb. Onun sözlərinə görə, ötən il kənar dövlət maliyyə nəzarəti (KDMN) tədbirləri ilə ümumilikdə 155,4 mln. manat məbləğində nöqsan aşkarlanıb.

Vüqar Gülməmmədov deyib ki, “Nəzarət tədbirlərinin nəticələri göstərir ki, keçirilmiş rəqabətli satınalmaların yarısında müqavilə məbləğləri ehtimal olunan qiymətdən 20 faiz və daha çox fərqlənib. Eyni zamanda bir mənbədən satınalma metodu ilə əksər hallarda ehtimal olunan qiymət hesablanmır.”

Göründüyü kimi “Sumqayıt Tibb Mərkəzi” publik hüquqi şəxsi açıq tender müsabiqəsində ehtimal olunan qiymətlə müqayisədə 20 faizdən dəfələrlə aşağı, hətta 60 faizdən də aşağı qiymət təqdim etmiş MMC-lərlə satınalma müqaviləsi bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir. Bununla yanaşı keçirilmiş dövlət satınalmalarında saxtakarlıq hallarına yol yerildiyinə əsaslı şübhələr yaradır.

“Azərbaycanda dövlət satınalmalarının 51 faizindən çoxunda ehtimal olunan məbləğlə qalib şirkətin təklif etdiyi qiymət arasındakı fərq 20 faizi ötüb. Dövlət satınalmalarında hazırda əsas diqqət yetirilməli olan məsələlərdən biri məhz qiymət fərqləridir.

Apardığımız araşdırmalar göstərdi ki, ehtimal olunan məbləğdən 20 faizdən çox fərqlənən satınalmaların sayı 51 faizdən yuxarıdır. MDB ölkələrində bu göstərici üzrə qırmızı xətt 15-25 faiz hesab olunur”.

Bunu da Hesablama Palatasının sədri Vüqar Gülməmmədov deyib. Maraqlıdır, Hesablama Palatasının sədrinin bu kimi açıqlamalarından bəzi qurumların rəhbərləri görəsən niyə nəticə çıxarmır. Əsasən də TƏBİB və Səhiyyə Nazirliyinə tabeli tibb müəssisələrinin rəhbərləri.

Qeyd edək ki, Sumqayıt Tibb Mərkəzinin direktoru Ramin Qasımovdur. O, sözügedən vəzifəyə cari ilin iyulunda təyin edilib. O, 2020-2024-cü illərdə Salyan rayon xəstəxanasının direktoru, 2024-cü ilin aprelindən Sumqayıt Tibb Mərkəzinin direktoru müavini vəzifələrində çalışıb. Hesablama Palatası, yaxud da digər aidiyyəti qurumlar Ramin Qasımovun Pediatriya direktoru olduğu tibb müəssisəsində yuxarıda qeyd etdiyimiz qanun pozuntularına oxşar çox nöqsanlar aşkarlaya bilər.

Aktualinfo.net

Sumqayıt şəhərində fəaliyyət göstərən tibb müəssisələrində aparılan yoxlamalar zamanı bir sıra nöqsanlar aşkarlanıb.

Sumqayit24.az-a daxil olan məlumata görə, yoxlamaların nəticəsi olaraq bir sıra əməkdaşların işdən azad edilməsi ilə bağlı əmrlər verilib.

İşdən çıxarılan şəxslərin siyahısını təqdim edirik:

1 nömrəli Sumqayıt Şəhər Xəstəxanasında:

- Poliklinika şöbəsinin müdiri Aynur Nizami qızı Məmmədova;

- Təcili və Təxirəsalınmaz Tibbi Yardım şöbəsində həkim Əliyev Şükür Məmməd oğlu ;

- Poliklinika şöbəsinin həkim-dermatoveneroloqu Elməddin Ağalar oğlu Əmrahov;

- Poliklinika şöbəsinin tibb bacısı Hicran Cəfər qızı Şahbazova ;

- Qeydiyyat bölməsinin müdiri Almaz Asif qızı Cəfərova;

- Qeydiyyat bölməsində qeydiyyatçı Qasımova İlahə Novruz qızı.

2 nömrəli Sumqayıt Şəhər Xəstəxanasında:

- Poliklinika şöbəsinin müdiri Vüqar Hakim oğlu Sultanlı;

- Qeydiyyat bölməsinin müdiri Cəmilə Aslan qızı Qocayeva.

3 nömrəli Sumqayıt Şəhər Xəstəxanasında:

- Baş həkim Elçin Ələddin oğlu Quliyev ;

- Poliklinika şöbəsinin müdiri Natiq Sadıq oğlu Həsənov ;

- Poliklinika şöbəsinin həkim-kardioloqu Sevinc Ağadadaş qızı İsgəndərova ;

- Qeydiyyat bölməsində qeydiyyatçı Allahverdiyeva Rəfiqə İbrahim qızı.

4 nömrəli Sumqayıt Şəhər Xəstəxanasında:

- Poliklinika şöbəsinin həkim-psixiatrı Rəfail Əkbər oğlu Abdullayev.

Bundan əlavə, 2 nömrəli Şəhər Xəstəxanasının baş həkimi Arzu Bəndəliyevanın vəzifəsi dəyişdirilərək 1 nömrəli Şəhər Xəstəxanasının Poliklinika şöbəsinin müdiri təyin edilib.

1 nömrəli Sumqayıt Şəhər Xəstəxanası səhər saatlarında gərgin anlar yaşanıb.

Tribuna.az-a bu barədə məlumat verən pasiyentlər bildirib ki, xəstəxanaya müraciət edənlərin çoxluğu izdihama səbəb olub.

Şikayətçi bildirib ki, xəstəxanada hər gün demək olar ki, belə izdiham yaşanır və bu da gərginliyə səbəb olur.

Sözügedən xəstəxana yaşanan izdihamla bağlı hələlik heç bir açıqlama yaymayıb

Xəstəxanaya səhər saatlarında yaşananları təqdim edirik:

VİDEO LİNKDƏ: https://tribuna.az/sumqayit-seher-xestexanasinda-gergin-anlar-video/

Bərdə şəhər sakini Qarayeva Kəmalə Yolçu qızı rayon Mərkəzi Xəstəxanasının baş həkimi Vüsal Məmmədova müraciət edib. Anaxeberinfo.az məlumat verir ki, vətəndaş müraciətində Bərdə rayon Mərkəzi Xəstəxanasında işləyən Elnurə
Əliyevadan şikayətlənib.

Kəmalə Qarayeva bildirir ki, Elnurə Əliyeva ixtisasca cərrahdır, amma xəstəxanadakı işi icbari tibbi sığorta üçün anketlər yazmaq və xəstələrə göndərməkdir. Vətəndaş qeyd edib ki, Elnurə Əliyeva cərrah işləmir, yalnız anket yazır.

K.Qarayevanın sözlərinə görə, həyat yoldaşı onkoloji xəstəlikdən əziyyət çəkib və dünyasını dəyişib. O, müraciətində başına gələnləri açıqlayıb:

"Elnurə Əliyeva onkoloq olmadığı halda, yoldaşımın analiz kağızlarına baxdı, dedi, onu sağaldacam. Ona bildirdik ki, bu insan onkoloji xəstədir və siz buna müalicə yazırsınız, necə olacaq?
Bildirdi ki, əlbəttə, bilirəm, narahat olma, neçə belə xəstəm olub, bunu da sağaldacam. Mən bildirdim ki, bəlkə bir də müayinə olunsun, kontraskotiya olsun, USM aparatına düşsün. Dedi, narahat olmayın, özüm yönəldəcəm.
Hətta bildirdim ki, ehtiyac varsa, bəlkə Bakıya getsin, kimyaterapiya olunsun? Dedi ki, kimyaterapiyaya ehtiyac yoxdur. Hələ dedi ki, orada kimyaterapiyalıq nə var ki?!"

Şikayətçi bildirib ki, özü və yaxınları Elnurə Əliyevaya dönə-dönə eyni sualı verib:" Soruşduq ki, bu xəstəni saxlaya biləcəksiniz? Hər dəfəsində də qəti şəkildə narahat olmamağa arxayın etdi.
Deməli, xəstələr bu həkimin yanına gəlir. O da xəstələri böyrək həkiminin yanına göndərir. Böyrək həkimi də xəstəyə baxıb resept yazırmış. Xəstələr də yenidən qayıdır bu həkimin yanına. Elnurə həkim böyrək həkiminin yazdığı reseptə baxır, cırıb tullayır, yenidən özü xəstələrə resept yazırmış. Ona bildirdik ki, niyə o biri həkimin yazdıqlarını cırırsınız? Dedi, ondan da yaxşı dərman yazacam".

Şikayətçi bildirib ki,
bir ayın içində xəstə kilo verə bilmədi, yəni arıqlamadı, yeməyindən də qalmadı: "Amma hər şeyi qaydasında olan adamın üç gün içində böyrəkləri işləmədi.
Reseptlərin hamısını aparıb aptekdə satıcıdan maraqlandım ki, bunlar nə üçündür? Aptekdə bildirdilər ki, bu dərmanlar böyrək üçündür. Bu xəstənin limfaları şişmişdi.
İmkan vermədi ki, biz bir başqa həkimin yanına gedək, görək nə idi dərdi... Əgər bu xəstənin böyrəklərində problem var idisə, sən böyrək həkimi deyilsən və niyə qoymursan bu adam böyrək həkiminin yanına getsin? Niyə böyrək həkiminin yazdığı resepti cırıb atırsan?

Bu xəstə kontraskotiyaya düşəndə ona maye içirirlər. O da xəstənin kreatinini yüksəldir. Müayinə vaxtı xəstənin kreatini normal çıxmışdı. Böyrək dayananda isə kreatin qalxır 500-600 olur. Əgər bu xəstənin böyrəyində getdikcə fəaliyyət dayanırdısa, niyə kreatini müayinələrdə yüksək çıxmırdı?
Bu həkimin yazdıqlarından sonra ev dərman, reseptlə dolu olurdu.
Hər həftə yanına çağırırdı. Evdə olan dərmanlardan hər dəfə yeni qutu aldırırdı. Hamısı da firma dərmanları.
Yəni xəstəmiz öz ayağıyla gedib-gəldiyi həkimin müayinələrindən sonra öldü.
Hər gün işinə, bazarlığına, müalicəsinə özü gedən adam idi. Yəni yataq xəstəsi deyildi ki, ölümcül olduğunu deyək. Xəstəliyi olsa da, ağır deyildi və hər işi özü görürdü. Bu Elnurə həkimin yazdığı müalicələrdən sonra 1 ayın içində öldü. Mən Elnurə Əliyevanın fəaliyyətinin araşdırılmasını xahiş edirəm. Onun ixtisası cərrah olduğu halda, onkoloji xəstəni böyrək dərmanları ilə sıradan çıxardı və bizi də sağaldacağına əmin etdi. Nəticəsi də göz qabağındadır. Dövlət orqanları onun dərman firmaları ilə işbirliyini də araşdırmalıdır".

Anaxeberinfo.az

Səhiyyə Nazirliyinin Azərbaycan Elmi-Tədqiqat Tibbi Bərpa İnstitutu Publik Hüquqi Şəxsinin sabiq baş direktoru Mətanət Əfəndiyeva barəsində tətbiq edilən cərimə ləğv edilib və məsələ yenidən araşdırılacaq.

Bizimesr.media bildirir ki, Qaynarinfo-nun məlumatına görə, sabiq baş direktor Mətanət Əfəndiyeva Elmi-Tədqiqat Tibbi Bərpa İnstitutunda həkim-radioloq vəzifəsində işləyən Ramil Abdullayevin şikayəti əsasında İnzibati Xətalar Məcəlləsinin 192.5-ci maddəsi ilə 2 000 manat (**düzəliş edildi**) cərimə olunub.

Bir neçə ay əvvəl vəzifəsindən azad edilən Mətanət Əfəndiyeva Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən barəsində tərtib edilən protokolun qanunsuz və əsassız olduğunu hesab edərək məhkəməyə müraciət edib.

Mətanət Əfəndiyeva

O, iddia edib ki, Ramil Abdullayev məzuniyyətdə olduğu vaxt sabiq baş direktor tərəfindən işə çağırılması barədə əmr olmadığı halda rəhbərliyə hər hansı məlumat vermədən işə çıxaraq pasiyentləri qəbul edib.

R. Abdullayevin rəhbərliyə bu barədə hər hansı məlumat vermədən, özbaşına işə çıxdığı, guya rəhbərlik tərəfindən işə çağırıldığı barədə xəstələrin qəbulu və qeydiyyatı şöbəsinə məlumat verərək əməkdaşları inandırdığı və bununla da ona pasiyent yönləndirilməsinə nail olduğu iddia edilib. Məsələnin üzə çıxmasından sonra isə izləri itirmək üçün İcbari Tibbi Sığorta sisteminə daxil olaraq müvafiq məlumatları sildiyi bildirilib.

Ramil Abdullayev

Həmçinin bu hadisə ilə bağlı İcbari Tibbi Sığorta tərəfindən şifahi şəkildə həkimin məzuniyyətdə olduğu halda işləməsinin qanunsuz olduğu bildirilib və həmin həkimin göstərdiyi xidmətlərin sistemdən silinməsi tələb olunub. Bildirilib ki, əks halda müəssisəni böyük cərimə gözləyir. Məhkəmədə Mətanət Əfəndiyevanın Dövlət Əmək Müfəttişliyi Xidmətinin qərarından verdiyi şikayət qismən təmin olunub və həmin qərar ləğv edilib. Qərarın surəti yenidən araşdırma aparılması üçün Dövlət Əmək Müfəttişliyi Xidmətinə göndərilib.

Qeyd edək ki, ötən ilin dekabrında həkim-radioloq Ramil Abdullayev KİV-lərə açıqlamasında Azərbaycan Elmi-Tədqiqat Tibbi Bərpa İnstitutu Publik Hüquqi Şəxsində həkim-radioloq vəzifəsində işləyərkən rəhbərlik tərəfindən təzyiq və qanunsuz tələblərlə üzləşdiyini iddia edib.

O, son bir neçə ay ərzində institutun direktoru Mətanət Əfəndiyeva tərəfindən təzyiq və təhdidlərə məruz qaldığını deyib. Həkim iddia edib ki, direktor ondan icbari tibbi sığorta xətti ilə aldığı bonusların yarısını tələb edib və bu təkliflə razılaşmadığına görə rəhbərlik tərəfindən fəaliyyətinə məhdudiyyət qoyulub.


Qaynarinfo

TƏBİB-in tabeliyində “İnnovasiya və Təchizat Mərkəzi” PHŞ (VÖEN: 1300242201) “Avromed Company” QSC (VÖEN: 1500166751) ilə satınalma müqaviləsi imzalayıb.

Müqaviləyə görə, şirkət dövlət qurumunu şəkərli diabet xəstəliyi üzrə tədbirlərilə bağlı xərclər çərçivəsində inyeksion şəkərsalıcı və oral hipoqlikemik dərman vasitələri ilə təmin edəcək. Tərəflər arasında imzalanmış müqavilənin dəyəri 37 milyon 30 min manat təşkil edib.

“Avromed Company” QSC 2001-ci ildə yaradılıb. Nizamnamə kapitalı 57 min manat olan şirkətin qanuni təmsilçisi İskəndərov Kamran İnqilab oğludur. Şirkət Bakı şəhəri, Nəsimi rayonu, Neftçilər pr., ev.153 ünvanında yerləşir.

Qeyd edək ki, “Avromed Company” QSC-nin daha əvvəl millət vəkili Cavanşir Feyziyevə məxsus olub. Cavanşir Feyziyev 2016-cı ildə isə “Avromed” şirkətindəki səhmlərini satıb.

Bizimesr.media