Mən uzun müddətdir ki, beynimi gəmirən bir sualın cavabını araşdırırdım: Küçələri, salonları, tiktok və instaqram səhifələrini zəbt edən bu qədər saxta "həkimlər" harada yetişir? Axı bu qədər savadsız, elementar anatomiyadan xəbərsiz, lakin əlində şpris və cərrahi alət tutmağa cəsarət edən kütlə necə peyda olur? Bəlkə haradasa gizli bir Saxta Həkim Fabriki, Zavodu var?

Axır ki, o "Fabriki" tapdıq. Və mənzərə təxmin etdiyimizdən də qorxuncdur.

Söhbət sadəcə bir-iki nəfərin kənarda, zirzəmidə qeyri-qanuni iş görməsindən getmir. Qarşımızda bütöv bir sənaye, qanunsuzluq üzərində qurulmuş və potensial qatillər yetişdirən böyük bir "fabrik" dayanır. Özünü mütəxəssis adlandıran, lakin arxasında heç bir fundamental tibbi bazası olmayan şəxslər açıq-aşkar kurslar təşkil edir, insanlardan on minlərlə manat (hətta 15.000 AZN) pul toplayır və cəmi 1 ay ərzində onlara "diplom" paylayırlar.
İllərlə davam edən ağır tibb təhsili, yuxusuz rezidentura növbələri, saysız-hesabsız imtahanlarla mənimsənilən Anatomiya, Dermatologiya kimi elmlər, hətta Lipofillinq kimi ciddi cərrahi əməliyyatlar 1 aya orta təhsilli insanlara "öyrədilir". Ən dəhşətlisi isə bu qanunsuz eksperimentlərin "real pasiyentlər" üzərində aparılmasıdır.

Bu "məzunların" daha sonra necə işlədiyini təsəvvür etmək üçün bircə faktı bilmək kifayətdir: bədən üçün nəzərdə tutulmuş ucuz, yüksək sıxlıqlı dolğuların xırda şprislərə doldurulub, ağzının məişət yapışqanı (kley) ilə bağlanaraq tələbələrə satılması və üzə vurulması. Üzün mürəkkəb damar şəbəkəsindən xəbərsiz birinin bu preparatları inyeksiya etməsi qaçılmaz olaraq nekrozlara, sağalmaz toxuma çürüməsinə və ən kritik halda – arteriya şaxələrinin tıxanması nəticəsində ani və geridönməz beyin iflicinə gətirib çıxara bilər. Bu, estetik prosedur deyil, birbaşa qəsddir.

İşin daha acınacaqlı tərəfi bu cinayət şəbəkəsinin cəmiyyətə və hüquqa açıq şəkildə meydan oxumasıdır. "Ölüm olsa da, 100 min verib çıxaram" təfəkkürü ilə fəaliyyət göstərən, insan həyatına bir məişət əşyası kimi yanaşan bu cür qruplaşmalar təkcə tibb sahəsini deyil, cəmiyyətin bütün əxlaqi və hüquqi sütunlarını sarsıdır.