Xaçmaz rayonundan bir qrup sakinin redaksiyamıza ünvanladığı müraciətdə Xaçmaz Rayon Mərkəzi Xəstəxanasının fəaliyyəti ilə bağlı araşdırılması tələb olunan bir sıra ciddi iddialar səsləndirilir.
Müraciət müəllifləri bildirirlər ki, xəstəxananın direktoru Səyyaf Tağıyevin rəhbərliyi dövründə tibb müəssisəsində uzun müddətdir həllini tapmayan problemlər mövcuddur. Onların sözlərinə görə, məsələ ilə bağlı dəfələrlə TƏBİB-ə və digər aidiyyəti qurumlara müraciətlər edilsə də, narahatlıqların aradan qaldırılması istiqamətində nəticə əldə olunmayıb.
Sakinlərin iddiasına əsasən, xəstəxanada tibbi heyət çatışmazlığı, bəzi şöbələrdə antisanitar vəziyyət, təmirə ehtiyac duyan palatalar və köhnəlmiş avadanlıqların mövcudluğu pasiyentlərin narazılığına səbəb olur.
Müraciətdə, həmçinin, işə qəbul zamanı qeyri-rəsmi ödənişlərin tələb edildiyi, xəstəxana daxilində fəaliyyət göstərən aptekdə dövlət hesabına təmin edilməli olduğu iddia edilən bəzi dərman vasitələrinin ödəniş qarşılığında satıldığı, təcili tibbi yardım xidmətində çalışan sürücülərin işə qəbulunda və xidməti avtomobillərin texniki vəziyyətində problemlərin olduğu iddia edilir.
Şikayət müəllifləri bildirirlər ki, təcili tibbi yardım avtomobillərinin bəzən texniki nasazlıq və ya digər səbəblərdən çağırışlara vaxtında gedə bilməməsi xüsusilə ucqar kəndlərdə yaşayan əhalinin narazılığına səbəb olur. Bu iddiaların rəsmi araşdırmaya ehtiyacı olduğu vurğulanır.
Müraciətdə daha bir iddia kimi qeyd olunur ki, 2025-ci ilin sonlarında xəstəxanada dezinfeksiya, dezinseksiya, deratizasiya və su anbarlarının təmizlənməsi xidmətləri üçün dövlət vəsaiti ayrılmasına baxmayaraq, həmin işlərin lazımi səviyyədə həyata keçirilib-keçirilmədiyi ilə bağlı suallar yaranıb. Müraciət müəllifləri bu istiqamətdə ayrılmış vəsaitin xərclənməsinin müvafiq dövlət qurumları tərəfindən yoxlanılmasını xahiş edirlər.
Redaksiya qeyd edir ki, yuxarıda yer alan məlumatlar müraciət müəlliflərinin iddialarını əks etdirir və hazırda bu iddiaların müstəqil şəkildə təsdiqləndiyini söyləmək mümkün deyil.
Məsələ ilə bağlı Xaçmaz Rayon Mərkəzi Xəstəxanasının rəhbərliyinin və TƏBİB-in mövqeyini dərc etməyə hazırıq. Aidiyyəti qurumların cavabı daxil olduqdan sonra əlavə material təqdim ediləcək.
Qeyd: Qarşı tərəfin mövqeyi daxil olduqda olduğu kimi dərc ediləcək.
