Qaradağ Rayon 20 saylı Təcili və Təxirəsalınmaz Tibbi Yardım Stansiyasında işçilərdən təmir məqsədilə pul toplandığı iddia olunur.
Xalq.online-ın əldə etdiyi məlumata görə, stansiya əməkdaşlarının yer aldığı mesajlaşma qrupunda paylaşılan yazıda həkimlər və tibb bacılarından təmir işləri ilə əlaqədar ödəniş etmələri istənilib.
Mesajda bildirilir: “Əziz həkimlər və tibb bacıları, keçən aydan kimlər ödəniş etməyib özləri bilir. Təmirlə əlaqədar bu ayın ödənişini zəhmət olmasa göndərin. Həm Kapital Bank, həm də ABB kartı var. Ödənişi etdikdən sonra çekinizi göndərin. Təmirlə bağlı ödənişlər var, ödənməlidir”.
İddialara görə, stansiyada çalışan hər bir əməkdaşdan təmir adı altında 10 manat vəsait toplanıb. Məlumatda qeyd olunur ki, vəsaitlərin stansiyanın müdiri Bünyad Haqverdiyevin və ya onun köməkçisi olduğu bildirilən Fərqanə Gülbalayevanın bank kartlarına köçürülməsi tələb edilib.
Mənbələrin bildirdiyinə görə, stansiyada çalışan əməkdaşların sayını nəzərə aldıqda, aylıq toplanan vəsaitin minlərlə manat təşkil etdiyi ehtimal olunur.
Həmçinin Qaradağ Rayon 20 saylı Təcili və Təxirəsalınmaz Tibbi Yardım Stansiyasının müdiri Bünyad Haqverdiyev həkimlərdən, tibb baçılarından, sürücülərdən və digər personaldan müxtəlif məbləğlərdə pul alınması üçün müyyən prosesler həyata keçirildiyi iddia olunur və bununla bağlı qəbzlərdə mövcuddur.( bir qəbzi təqdim edirik)
Məsələ ilə bağlı Qaradağ Rayon 20 saylı Təcili və Təxirəsalınmaz Tibbi Yardım Stansiyasının müdiri Bünyad Haqverdiyev bildirib ki, işçilərdən təmir üçün pul yığılması ilə bağlı iddialar həqiqəti əks etdirmir.
Təmirlə bağlı hər hansı pul yığımı olmayıb. Əksinə, təmir işlərinə özüm 2 min manatdan çox vəsait xərcləmişəm”, – deyə o bildirib.
Lakin redaksiyaya təqdim olunan mesajın məzmununda “təmirlə əlaqədar ödəniş”, “ödəniş etməyənlər”, “çeklərin göndərilməsi” kimi ifadələrin yer alması müəyyən suallar yaradır. Əgər söhbət əməkdaşlara verilmiş şəxsi borcların qaytarılmasından gedirsə, həmin mesajda niyə məhz təmir işlərinə istinad olunur?
Digər mühüm məqam isə dövlət tibb müəssisələrinin təmiri ilə bağlıdır. Tibb müəssisələrinin saxlanılması, cari və əsaslı təmir işlərinin hansı mənbələr hesabına həyata keçirildiyi, bu məqsədlə ayrılan vəsaitlərin yetərli olub-olmaması və əməkdaşlardan hər hansı ödəniş tələb edilməsinin qanunauyğunluğu araşdırılmalı məsələlərdir.
Mövzu ilə bağlı aidiyyatı qurumların mövqeyinə ehtiyac var. Qurumların məsələni araşdıraraq ictimaiyyətə aydın məlumat verməsi həm yaranmış sualların cavablandırılması, həm də işçilərinin narahatlığının aradan qaldırılması baxımından vacib görünür.(Xalq.online)
Aidiyyəti qurumların mövqeyini dərc etməyə hazırdır.
