Abşeron rayonunun Mehdiabad qəsəbəsində yerləşən 4 saylı tam orta məktəbdə baş verdiyi iddia olunan hadisə cəmiyyətdə ciddi rezonans doğurub. Sosial şəbəkələrdə yayılan məlumatlara görə, hicab taxan şagirdlər dərsə buraxılmayıb və bu səbəbdən valideynlər narazılıqlarını açıq şəkildə ifadə etməyə başlayıblar.

Valideynlərin sözlərinə görə, şagirdlər məktəbə rəsmi məktəbli forması ilə gəlsələr də, hicab taxdıqları üçün məktəb rəhbərliyi tərəfindən dərsə buraxılmayıblar. Daha diqqət çəkən məqam isə odur ki, iddialara görə, bundan əvvəl məktəb rəhbərliyinin razılığı ilə şagirdlərin ağ rəngli hicabla dərsə gəlməsinə problem yaradılmırdı. Lakin son günlər bu məsələdə qəfil qadağanın tətbiq edildiyi bildirilir.

Məsələ ilə bağlı ən ciddi sual isə belədir: bu qadağa hansı hüquqi sənədə əsaslanır?

Çünki bu günə qədər Azərbaycan Respublikası Elm və Təhsil Nazirliyi tərəfindən məktəblərdə hicabla bağlı yeni və ya əlavə qadağanı nəzərdə tutan hər hansı rəsmi qərar elan edilməyib. Belə olan halda, konkret bir məktəbdə tətbiq edilən bu cür qadağa istər-istəməz ciddi suallar yaradır və məktəb rəhbərliyinin səlahiyyət həddini aşdığı barədə fikirləri gücləndirir.

Təhsil sistemi şəxsi təşəbbüslərlə və fərdi qərarlarla idarə olunan sahə deyil. Bu sahə qanunvericilik, dövlət siyasəti və rəsmi normativ aktlar əsasında fəaliyyət göstərməlidir. Nazirliyin qərarı olmadan direktor səviyyəsində belə həssas mövzuda qadağa tətbiq etmək isə idarəetmə prinsipləri ilə ziddiyyət təşkil edir.

Bir çox müşahidəçilərin fikrincə, bu cür addımlar bəzən bəzi məktəb rəhbərlərinin “intizam yaradırıq” görüntüsü formalaşdırmaq cəhdindən başqa bir şey deyil. Lakin belə addımların nəticəsi çox vaxt əksinə olur – təhsil müəssisələrində gərginlik yaranır, valideynlərlə məktəb arasında qarşıdurma artır və ən əsası, bu prosesdən zərər çəkən tərəf şagirdlər olur.

Unutmaq olmaz ki, məktəb rəhbərliyinin əsas vəzifəsi şagirdləri təhsildən uzaqlaşdırmaq deyil, əksinə onları təhsilə cəlb etməkdir. Geyimə görə şagirdi dərsə buraxmamaq isə bir çox hallarda onun təhsil hüququnun məhdudlaşdırılması kimi qiymətləndirilə bilər.

Digər tərəfdən, belə addımlar cəmiyyətin onsuz da həssas olan dini və sosial məsələlərində əlavə gərginlik yaratmaq riski daşıyır. Təhsil müəssisəsi isə mübahisə və qarşıdurma mərkəzinə yox, sağlam və sabit mühitə çevrilməlidir.

Hazırda ictimaiyyət rəsmi qurumların mövqeyini gözləyir. Valideynlər haqlı olaraq soruşurlar: əgər nazirliyin belə bir qərarı yoxdursa, məktəb rəhbərliyi hansı səlahiyyətlə şagirdləri dərsdən kənarlaşdırır?

Əgər bu məsələ araşdırılmasa və hüquqi qiymət verilməsə, sabah eyni vəziyyətin başqa məktəblərdə də təkrarlanması qaçılmaz olacaq. Təhsil sistemində qaydaları direktorların fərdi qərarları yox, dövlətin qanunları və rəsmi qərarları müəyyən etməlidir.

İndi isə əsas sual açıq qalır: Mehdiabad məktəbində baş verənlər həqiqətən qayda tətbiqidirmi, yoxsa bu artıq açıq özbaşınalıq nümunəsidir?