Azərbaycan Beynəlxalq Bankının vəzifəli şəxsi kredit üçün müraciət edən qadın müştərinin sənədləri içərisindən onun mobil nömrəsini götürərək, şəxsi məqsədlər üçün narahat edib.

Xitab24.az-ın məlumatına görə, hadisə bankın Nizami filialında qeydə alınıb.

Belə ki, həmin filialın müdir müavini müştəriyə zəng edərək işdənkənar müxtəlif formalarda təkliflərlə çıxış edib.

Müştərinin qohumu isə bankın məlumat mərkəzinə zəng edərək qadını şam yeməyinə dəvət edən həmin vəzifəli şəxsdən şikayət edib.

Bundan sonra məsələ ilə bağlı Daxili nəzarət departamenti araşdırma başladıb. Yoxlama nəticəsində video müşahidə zamanı qadının kartından vəsaiti nağdlaşdırmaq məqsədilə filialda ATM-lərin yerləşdiyi otağa daxil olarkən onunla birgə vəzifəli şəxsin də otağa gəldiyi, müştərinin nağdlaşdırma əməliyyatında iştirak etdiyi və müştəriyə məxsus olan, məxfi hesab edilən PİN kodun bank əməkdaşı tərəfindən ATM-ə daxil edildiyi müşahidə edilib. Nəticədə əməkdaşın müştəriyə aid fərdi məlumatları öz şəxsi məqsədləri üçün istifadə edərək mövcud qanunvericiliyi və əmək müqaviləsinin 3.3-cü bəndinin şərtlərini pozduğu aşkarlanıb. Bundan sonra, ABB vəzifəli şəxsi Əmək Məcəlləsinin 70-ci maddəsinin “ç” bəndinə əsasən işdən çıxarıb.

İşdən çıxarılan filial müdiri ABB-nin məhkəməyə verib. O, iddia ərizəsində işdən çıxarılması ilə bağlı əmrin ləğv edilməsini, işə bərpa və məcburi iş buraxmaya görə əmək haqqının ödənilməsi tələblərini qeyd edib. Lakin məhkəmə ABB-nin sabiq filial müdiri müavinin iddiasını təmin etməyib.

Xitab24.az

Azərbaycan Avtomobil Yolları Dövlət Agentliyinin (AAYDA) sabiq sədri Saleh Məmmədovun vəzifədə olduğu dövrdə qurum ətrafında baş verən qalmaqallı hadisələr uzun müddət ictimai müzakirələrə səbəb olmuşdu. Xüsusilə, Azərbaycan Avtomobil Yolları Dövlət Agentliyinin (AAYDA ) maliyyə idarəsinin rəisi Müseyib Həmzəyev oğluna etdiyi təmtəraqlı 500 minlik toy ilə gündəmi zəbt edib, müzakirə obyektinə çevrilməsi ilə AAYDA-da olan maliyyə pozuntularının gündəmə gəlməsinə səbəb oldu.
Azğınlaşmış AAYDA məmurlarının yaşayış tərzi müvafiq dövlət orqanlarını hərəkətə gətirdi və apardıqları yoxlamalar nəticəsində bu qurumda ağlasığmaz korrupsiya faktları üzə üzə çıxdı. Azərbaycan Respublikasının Hesablama Palatasının Mili Məclisə hesabatında bildirilir ki, 2024-cü ildə "Avtomobil yolları" Məqsədli Büdcə Fondunun gəlirlərini formalaşdıran mənbələr üzrə daxilolmaların ümumi məbləği 330 milyon manat proqnoza qarşı 506,43 milyon manat və yaxud 153,5 % səviyyəsində icra olunub ki, bu da 176,4 milyon manat artıq vəsait deməkdir. Auditdə qeyd olunub ki, Azərbaycan Avtomobil Yolları Dövlət Agentliyinin (AAYDA) maliyyə fəaliyyətində, xüsusilə xərclər smetasının planlaşdırılması və icrası sahəsində çatışmazlıqlar mövcuddur. Belə ki, maliyyə vəsaitlərinin idarə olunması zamanı Vergi Məcəlləsinin, eləcə də Maliyyə Nazirliyinin müvafiq qərarı ilə təsdiq edilmiş mühasibat uçotu qaydalarının tələblərinə tam əməl olunmayıb. Xərclərin gəlirdən çıxılan (əməliyyat xərcləri) və çıxılmayan (kapitallaşdırılmalı xərclər) istiqamətlər üzrə düzgün qruplaşdırılması təmin edilməyib. Bundan əlavə, Agentlik 2024-cü ilin xərclər smetasında və müvafiq qaydalarda nəzərdə tutulmadığı halda məqsədli büdcə fondunun vəsaitləri hesabına 19 milyon 599,5 min manatı bank kreditləri üzrə ödənişlərə yönəldib. Auditə görə, bu yanaşma avtomobil yollarının və onlarla əlaqədar mühəndis qurğularının, eləcə də təhkim zolaqlarının saxlanılması və təmiri ilə bağlı xərclərin qarşılanmasında məhdudiyyətlər yaradıb, eyni zamanda dövlət büdcəsinin borclarla bağlı hesabatlılığında uyğunsuzluqlara səbəb olub. Xüsusilə nəzərdən qaşırımamalıdır ki, Hesbalama Palatası 2024-cü ilin xərclər smetasında aşkarladığı nöqsanları qeyd edir. Bəs yaxşı, 10 ildən artıqdır ki, AAYDA-ya rəhbərlik edən Saleh Məmmədov ölkə ərazisində böyük yol infrastrukturlarının çəkilməsi prosesində hansı maliyyə pozuntularını edib? Yəqin ki, müvafiq dövlət orqanları bu faktalrın izinə düşüblər.
Bəs yaxşı sual olunur, Saleh Məmmədov AAYDA-da bu maliyyə fırıldaqlarını kiminlə həyata keçirib? Əlbəttə ki, qurumun baş maliyyəçisi Müseyb Həmzəyevlə. Onun agentlikdə “maliyyə piramidası” qurduğu, bütün maliyyə işlərinə bilavasitə nəzarət etdiyi, “dolanbac” işləri reallaşdırdığı deyilir. Müseyib Həmzəyeb təkcə oğluna etdiyi təmtəraqlı toyla gündəmə gəlmiyib. O, mütəmadi olaraq zəngin həyat tərzi ilə bağlı media orqanlarının gündəliyini zəbt edib. Belə ki, sosial mediada yayılan başqa bir məlumata görə isə təmtəraqlı toy məclisindən bir müddət əvvəl Müseyib Həmzəyev özünə 650 min manata (380 min dollara) son model Lexus LX 600 avtomobili alıb. 2022-ci ildən istehsalına başlanılan bu Lexus markalı LX 600 avtomobili öz komfortluluğu ilə seçilir. Sosial şəbəkələrdə yayılan məlumatlarda qeyd edilir ki, Müseyib Həmzəyevin Lexus LX 600 avtomobili xüsusi hazırlanmış modellərdəndir ki, Azərbaycanda bu avtomobildən cəmi 5 ədəd var. (https://poliqon.info/amp/?id=606312) Həmçinin Poliqon-nun bildirdiyinə görə Müseyib Həmzəyev Binəqədi-Novxanı yolunun yaxınlığıda, dəniz sahilində “Rest Time Restorant”ın da sahibidir. Restoran Novxanının ən lüks istirahıt mərkəzlərindən biri olaraq tanınır. Müseyib Həmzəyevin Novxanıda həmdə böyük ərazini əhatə edən yan-yana olan özü və övladları üçün ayrı-ayrılıqda 3 villası var. Eyni zamanda, ağ şəhərdə, Premium binada, eyni blokda 3 ayrı-ayrı 800 kv.m, 550 kv.m və 370 kv.m olan mənzilləri var. Port Bakuda 150 kv.m lik mənzili var. Müseyib Həmzəyeyev Bakı şəhərində dükan, mağaza, və bir çox daşınmaz əmlak sahibidir. Onun Qəbələ və Qusar rayonlarında da villaları vardır.
Müseyib Həmzəyev - vaxtilə Arif Əsgərovun rəhbərlik etdiyi Azərbaycan Dəmir Yolları idrəsində də baş vermiş bütün maliyyə pozuntularına birbaşa memarlıq etmiş, ayrılmış dövlət büdcəsinin "anasını ağlar” qoymuş” koorrupsaner vəzifə sahibi olub. Media üzərindən apardığımız araşdırmalara görə, Cavid Qurbanovun rəhbərliyi dönəmində Azərbaycan Dəmir Yolları QSC-də nisbətən qayda qanunun yaranmasından sonra M.Həmzəyev xidmət rəisi Elşən Məmmədovla birlikdə "Azəravtoyol” ASC-yə transfer oldular. Doğrudur, qısa müddət ərzində Elşən Məmmədov yenə də güvəndiyi keçmiş Nəqliyyat nazirinə arxalanaraq özbaşnalıq etmək istərkən Müseyib Həmzəyev fürsətdən istifadə edərək onunla birlikdə milyonlar qazandığı xidmət rəisi E.Məmmədovu "baqaja” qoyaraq onu rəhbərliyə asanlıqla satan şəxslərdəndir. sabiq maliyyə maxinatorunun belə FƏRASƏTİ ONU Azərbaycan Avtomobil Yolları Dövlət Agentliyinin Maliyyıə İdarəsinin rəisi vəzifəsini işğal ETMƏYİNƏ YOL AÇMIŞDIR. MAXİNASİYA, TALAN, KÜLLİ -MİQDARDA RÜŞVƏT ALMA, VƏZİFƏDƏN -SUİ-İSTİFADƏ VƏ.S əməlləri ilə özünə var-dövlət yığmağı VƏZİFƏ BORCU HESAB EDƏN Museyib Həmzəyevin Bakıda 50 yaxın evi, çox sayda obyektlər və dükanlar eləcədə bir neçə resoran, 5 yaxın villa nəhayyət bir neçə dəbdəbəli baxçalı malikanələrə sahib korrupsioner, dələduz məmurun yüklü sərvətinin olduğu, daxil olan məlumatlarda deyilir. Qardaşı oğlu Zaur Həmzəyevin yaxın ətrafına bildirdiyinə görə onun əmisi ilə birlikdə Türkiyə, Dubay və Çexiyada mülkləri və mağazları var. Müseyib Həmzəyevin qardaşı oğlu Zaur Həmzəyev də AAYDA-da işləyib və onun güvəndiyi qohumudur. O, AAYDA-nin “Bakı 1 №-li Yol İstismari” MMC-nin rəhbəri olub. Zaur Həmzəyevin rəhbərliyi dövründə MMC-nin dövlətə 715 318 AZN vergi borcu olub və araşdırılır. Zaur Həmzəyev AAYDA-nın baş maliyyəçisi Müseyib Həmzəyevin Agenntlikdə işləyən yeganə qohumu deyil.
Belə ki, Həmzəyevin vəzifə tutan yaxın qohumlarının siyahısını təqdim edirik:
– Zaur Həmzəyev: Müseyib Həmzəyevin əmisi oğludur. O, 1 saylı Yol İstismar İdarəsinin müdiri postunu tutur.
– Araz Bəndəliyev: Həmzəyevin xalası oğludur. Hazırda 10 saylı Xüsusi Təyinatlı Yol İstismar İdarəsinin rəhbəri vəzifəsində çalışır;
– Toğrul Həmzəli: Müseyb Həmzəyevin qardaşı oğludur. O, 9 saylı Yol İstismar İdarəsinin baş mühasibi postuna sahibdir;
– Təhminə Həmzəyeva: Müseyb Həmzəyevin bacısıdır. AAYDA-nın Əməyin Təşkili şöbəsinin müdiridir;
– Mətanət Həmzəyeva: Sözügedən şəxsin bacısıdır. Hazırda “Azəryolelmitəhqiqatlayihə” İnstitutunun baş mühasibi işləyir;
– Dilavər Həmzəyev: AAYDA Maliyyə İdarəsi rəisinin yeznəsidir. O, 1 saylı Yaşıllaşdırma İdarəsinin müdir müavinidir;
– Ustubat Niftəliyev: Həmzəyevin yeznəsidir. 3 saylı Yaşılllaşdırma İdarəsinin rəisi.
Düzdür AAYDA-nın yeni sədri Vüsal Nəzirli bunların əksəriyyətini işdən azad edib. Ancaq fakt olaraq qalır ki, Müseyib Həmzəyev öz maliyyə “karusel” əməliyyatlarını həyata keçirmək üçün yaxın qohumlarını rəhbərliyində olduğu Agentliyin idarə və MMC-lərinə rəhbər vəzifəyə təyin etdirmişimiş. Bununla Müseyib Həmzəyev nəinki maliyyə korrupsiyasında, həmçinin yaxın qohumlarını rəhbərliyində olduğu qurumda vəzifəyə təyin etdirdiyinə görə də “Korrupsiaya qarçı mübarizə haqqında” qanunu kobud şəkildə pozmuşdur. Qanunda yaxın qohumların kimlərdən ibarət olduğu göstərilir. Müxtəlif vəzifələr və hallardan asılı olaraq bu dairə fərqli şəkildə müəyyən oluna bilər. Lakin ümumi qayda belədir ki, “Korrupsiyaya qarşı mübarizə haqqında” qanunun 7-ci maddəsinə əsasən, vəzifəli şəxslər qohumlarını tabeliyində olan idarə və müəssisələrdə həm birbaşa, həm də struktur bölmələr vasitəsilə işə qəbul edə bilməzlər. Müseyib Həmzəyevin qardaşı oğlu Zaur Həmzəyev yaxın ətrafına onu da bildirib ki, artıq Azərbaycanda qarantiyalı deyilik, baxmayaraq ki, lazım olan haqq hesabları vermişik ancaq hər an hər şey ola bilər. Ona görədə ya Türkiyə yada Çexiyada işimizi quracağıq. Əmim bu yaxınlarda müalicə adı ilə ölkəni tərk edəcək. Şübhə çəkməmək üçün isə sonra mən gedəcəyəm. Onu da qeyd edək ki, Müseyib Həmzəyevin mediaya adının hallanmaması üçün müxtəlif vasitələrlə əlaqə yaradır yaxud cəhd göstərir. Belə ki, O, bəzi media oranları ilə əlaqə yaradaraq AAYDA-da işləyən qohumlarını Saleh Məmmədovun qohumları kimi təqdim eləməyə nail ola bilib. Ancaq düçünürk ki, müvafiq dövlət oranları əlbəttə ki, bütün məlumatlara malikdir.

Xeberekspress.com

Azərbaycanın inşaat materialları bazarında aparıcı mövqeyə malik olan "Norm" sement zavodunun fəaliyyəti daim ictimaiyyətin və aidiyyəti şəxslərin diqqət mərkəzindədir. Yazın gəlişi ilə inşaat mövsümünün başlaması diqqətin artmasına səbəb olub.

Sosial şəbəkələrdə və şəxsi söhbətlərdə məhz inşaat mövsümünün başlaması ərəfəsinə təsadüf edən qiymət artımları və keyfiyyətə dair iradlar səslənməkdədir. İnşaat sektorunda fəaliyyət göstərən həmsöhbətimiz bildirir ki, yanvar ayında 7.60 – 8.00 AZN civarında olan "Norm 300" (B Klass) məhsulu aprel ayında 8.20 AZN-ə, "Norm 500" (C Klass) markalı sement isə 8.60 AZN-dən 9.00 AZN-ə qədər bahalaşıb.

Fərdi tikinti ilə məşğul olan istifadəçilər bu artımı "süni bahalaşma" və "mövsümi manipulyasiya" kimi xarakterizə edirlər. İstehlakçıların əsas tənqidi ondan ibarətdir ki, xammal yerli resurslar (daş və klinker) hesabına təmin olunmasına baxmayaraq, qiymətlər mütəmadi olaraq xarici amillər bəhanə gətirilməklə artırılır. İstifadəçilər Antiinhisar və İstehlak Bazarına Nəzarət Dövlət Xidmətini bazarda mümkün "kartel sövdələşmələri"ni araşdırmağa çağırırlar.

Şikayətçiləri dinləyərkən, "Norm"un yalnız qiyməti ilə bağlı deyil, həm də texniki göstəriciləri ilə bağlı narazılıqların olduğu üzə çıxır. Belə ki, bazar iştirakçıları arasında bu istiqamətdə də etiraz edənlər var. Bəzi partiyalarda sementin "gec donması" və bərkimə prosesindən sonra səthdə yaranan çatlarla bağlı şikayətlər yer alır. İddialara görə, kağız üzərindəki marka göstəriciləri (M-400 və ya M-500) ilə real tətbiqdəki möhkəmlik göstəriciləri arasında uyğunsuzluqlar müşahidə olunur. Bu da tikintidə keyfiyyət fərqinə səbəb olur. "Nəticədə bizim işimiz etibarsızlaşır, müştərilərimizlə üz-göz oluruq" - deyə inşaatçı həmsöhbətimiz bildirir.

Şikayətlər bununla da bitmir. Ustalar regional satış nöqtələrində və distribütor şəbəkəsindən də narazıdırlar. Onların ən çox şikayətçi olduğu məqam kisələrin çəkisi ilə bağlıdır. Bəzi istifadəçilər sement kisələrinin tam 50 kq olmadığını, daşınma zamanı qablaşdırmanın tez cırıldığını bildirirlər: "Adətən bir işi 0-dan götürür tam hazır təhvil veririk. Bu o deməkdir ki, bir çox hallarda məhsulların alınmasını, daşınmasını biz həyata keçiririk. Bu tip qablaşdırma problemləri bizim üçün həm maddi itki, həm də iş prosesinin ləngiməsi deməkdir. Yenə burada da müştərilərlə problem yaşayırıq. Bəzən bir daşıma zamanı bir neçə kisə cırılır və sement itkiyə gedir. Eyni zamanda da bizə əlavə xərc yaranır".

Səsləndirilən bu ciddi iddialarla bağlı "Norm" Açıq Səhmdar Cəmiyyətinə ünvanladığımız sorğuya rəsmi cavab verilib. Şirkətdən qiymət artımı ilə bağlı bildirilib ki, qeyd olunan sement markaları Avropa standartına uyğun istehsal edilir və bazara Klass B, Klass A400, Klass C500 kimi təqdim olunur: "Məhsullarımızın qiymətləri bir sıra daxili və xarici amillərinin təsiri ilə formalaşır. Bu amillər arasında inflyasiya, xammal və enerji resurslarının dəyərinin dəyişməsi, logistika və daşınma xərcləri, eləcə də istehsalat prosesində tələb olunan texniki və əməliyyat xərcləri mühüm rol oynayır. Şirkətimizin qiymət siyasəti sərbəst bazar prinsiplərinə əsaslanaraq müəyyən edilir. Burada bazardakı tələb və təklif nisbəti əsas meyar kimi çıxış edir. Eyni zamanda qiymətlər, mövcud bazar şəraiti və xərclərdə baş verən dəyişikliklər nəzərə alınmaqla tənzimlənir. Keyfiyyətli məhsulun istehlakçılara davamlı şəkildə təchiz edilməsi üçün istehsal və logistika sahələrində ardıcıl investisiyaların həyata keçirilməsi zəruridir. Bu isə qiymətlərin formalaşmasına birbaşa təsir göstərir. Şirkətimizdə satış prosesi tam şəffaf şəkildə təşkil olunmuşdur."

İstifadəçilərin çəki ilə bağlı narazılığına cavab olaraq zavoddan verilən cavabda qeyd olunur ki, qablaşdırma prosesində Almaniya şirkətinin müasir elektron tərəziləri istifadə olunur: "Norm" sement zavodunun qablaşdırıcı qurğuları bu sahədə dünya liderlərindən biri olan Haver&Boecker (Almaniya) şirkətinindir. Elektron tərəzilərlə təchiz edilmiş bu qurğular kisələrin düzgün və dəqiq çəkisini təmin edir. Çəkisi tələblərə cavab verməyən kisə avtomatik olaraq xətdən çıxarılır. Kisələrin üzərində məhsulun dəqiq çəkisi və ±2% məlumatı qeyd olunur. Kisələr bu sahədə ən peşəkar qlobal təchizatçılardan təmin edilir və ISO və EN standartlarının tələblərinə cavab verir".

Sementin bərkimə müddəti və çatlarla bağlı şikayətlərə gəldikdə isə "Norm"dan istehsalın robot texnologiyaları və fasiləsiz laboratoriya nəzarəti altında olduğu bildirilir: "Zavodumuzda istehsal zamanı məhsulların keyfiyyət göstəricilərinə daim nəzarət edilir və istehsal prosesində avtomatik nümunələr götürülür. Bunun üçün robot texnologiyalarından istifadə edilir və keyfiyyətə nəzarət prosesi fasiləsiz olaraq yerinə yetirilir. Laboratoriyada sementin AZS və EN standartlarına uyğunluğu üzrə fiziki-mexaniki sınaqlar aparılır və bu imkanlar təsadüfi səhvlərə yol verilməməsinə, dəqiq nəticələrin əldə edilməsinə və yüksək keyfiyyətli məhsul istehsalına zəmanət verir.

Bununla yanaşı, "Norm" şirkətinin satış strategiyasına uyğun olaraq, müştərilərə satışdan əvvəl və sonra texniki dəstək göstərilir. Bu çərçivədə sementin keyfiyyəti ilə bağlı bizə hər hansı müraciət daxil olursa, texniki dəstək şöbəmiz tərəfindən yerində nümunələr götürülür və müştəriyə, yaxud ustaya nəticələr, tövsiyələr, eləcə də müvafiq dəstək təqdim edilir. Məlumat üçün qeyd edək ki, çatların yaranması hər zaman məhsulun keyfiyyəti ilə əlaqəli olmaya da bilər. Burada hava şəraiti, məhlulda digər məhsulların istifadəsi, tətbiq zamanı qaydalara riayət olunması da əhəmiyyətlidir. Məsələn, küləkli havalar betonda çata yaxud soyuq havalar betonda bərkimənin gecikməsinə səbəb ola bilər. Həmçinin hörgü-suvaq məhlulunun hazırlanması zamanı qum-sement nisbətinə düzgün riayət edilməzsə, eləcə də tətbiqdən sonrakı suvağa qulluq işləri düzgün aparılmazsa, problemlər yarana bilər. İstifadə olunan təbii qumun keyfiyyəti (əsasən, narınlığı və çirkliliyi) də nəticəyə ikiqat təsir göstərən amildir. Bütün sadalananlarla yanaşı mart və aprel aylarında həddindən artıq yağışlı günlər müşahidə edildi, istifadəçilər belə havalarda sement kisələrinin düzgün saxlanılmasını təmin edə bilmədikdə və kisələr islandıqda bu faktor da sementin tərkibinə öz mənfi təsirini göstərmiş olur".(AFN.az )

Körpü Bina Tikinti şirkəti barədə şikayət daxil olub.

“Xəbərsiz”ə müraciət edən şikayətçinin iddiasına görə, şirkətdə çalışan İbadullayev Novruz Xaləddin oğlu rəhbərlik tərəfindən vəzifə səlahiyyətlərinə daxil olmayan işlərə cəlb olunub.

Zərərçəkmişin bildirdiyinə görə, məhz bu məcburi iş zamanı o, baş nahiyəsindən xəsarət alıb. Hadisə nəticəsində onun əmək qabiliyyətini itirdiyi, hazırda işləyə bilmədiyi qeyd olunur.

Şikayətçinin sözlərinə görə, aldığı zərbədən sonra başında ağrılar, şiş və digər sağlamlıq problemləri yaranıb.
Məsələ ilə bağlı o, şirkət rəhbərliyinin, o cümlədən şirkətin rəhbəri Göyüşov Xəlilin hər hansı dəstək göstərmədiyini iddia edir.

Zərərçəkmiş həm maddi, həm də mənəvi baxımdan çətin vəziyyətdə olduğunu bildirir.

İdiallarla bağlı şirkətlə əlaqə saxlamağa çalışsaq da, çoxsaylı zənglərimiz cavabsız qaldı.

Qeyd edək ki, əmək qanunvericiliyinə əsasən, işçilərin vəzifə səlahiyyətlərindən kənar işlərə məcbur edilməsi və iş yerində təhlükəsizlik qaydalarının pozulması ciddi hüquqi məsuliyyət yaradır.

Xəbərsiz

İngiltərə Ali Məhkəməsi Milli Cinayət Agentliyi (NCA) tərəfindən qaldırılmış iddia əsasında Azərbaycan Milli Məclisinin deputatı Cavanşir Feyziyev ilə bağlı mühüm qərar qəbul edib.

Bizimesr.com bildirir ki, qərara əsasən, Feyziyevin xaricdəki əmlak və maliyyə aktivləri dondurulub.

Məhkəmə sənədlərindən məlum olur ki, məsələ yalnız Londonda yerləşən və daha əvvəl dondurulduğu bildirilən 22 daşınmaz əmlakla məhdudlaşmır. Araşdırma çərçivəsində deputatın Lixtenşteyndə fəaliyyət göstərən LGT Bank bankındakı şəxsi hesabına da məhdudiyyət qoyulduğu üzə çıxıb. Həmin hesabda bir neçə milyon İsveçrə frankı məbləğində vəsaitin olduğu bildirilir.

Diqqət çəkən məqam ondan ibarətdir ki, sözügedən bank hesabı hər hansı şirkət və ya üçüncü şəxsə deyil, birbaşa Cavanşir Feyziyevin adına rəsmiləşdirilib.

Oxşar iddialar daha əvvəl digər azərbaycanlı məmurların da xaricdəki aktivləri ilə bağlı səsləndirilib. Məsələn, Fövqəladə Hallar naziri Kəmaləddin Heydərovun Andorradakı maliyyə fəaliyyətləri ilə bağlı iddialar ictimai müzakirələrə səbəb olmuşdu. / Avropada yaşayan jurnalist Cavanşir Həsənli/

Bizimesr.com

Çoxmənzilli yaşayış binaların altında bir çox obyektlərin fəaliyyətinə qanunla icazə verilməsə də, Nizami rayonunda bu qayda gözlənilmir.

Nizami rayonu, Qara Qarayev prospekti 8 ünvanında yaşayan sakinlər bildirib ki, binanın altında obyekt fəaliyyətə başlayır. Sakinlərin sözlərinə görə, bina obyektə çevrilib. Bu məqsədlə binaya əlavə artırma da edilib və dəmir konstriksiyadan ibarət pilləkənlər qoyulub.

Sakinlər bildirib ki, bina qəzalıdır və belə artırmalar binanı daha da təhlükəli hala gətirir: “Dəfələrlə zəng edib bildirmişik ki, bina qəzalıdır, bina çökür. İcra başçısı vecinə də alçadı”.

Sakinlər onsuz da təhlükəli halda olan binada belə əlavələrin tezliklə qarşısının alınması üçün tədbir görülməsini istəyir. Xatırladaq ki, Nizami rayon icra hakimiyyətini başçısı Cəbrayılov Coşqun Adil oğludur. O, 2022-ci ildən bu vəzifəni icra edir.(Bizimesr.com)

Qarşı tərəfi dinləməyə hazırıq.

Azərbaycanda "saxta kürü" bazarı böyük yoxlamaya məruz qalıb. İllərdir bazarlarda, şadlıq evlərində insanlara satılan və yedizdirilən "kürü" Qida Təhlükəsizliyi Agentliyinin rəhbəri Qoşqar Təhməzlinin nəhayət ki, yadına düşüb. Maraqlı yoxlamalardır, maraqlı nəticələri olacaq...

Qida Təhlükəsizliyi Agentliyinin rəhbəri Qoşqar Təhməzlinin nəzarəti altında ilə həyata keçirilən son yoxlamalar genişmiqyaslı şəkildə təqdim olunsa da, bu addımların vaxtı və məqsədi ilə bağlı suallar yaratmaya bilməz... Niyə indi?

Qida Təhlükəsizliyi Agentliyinin məlumatına görə, saxta kürü məhsullarına qarşı aparılan monitorinqlər çərçivəsində 10 ərzaq bazarı, 8 ticarət obyekti, 14 idxalçı anbarı və 61 ictimai iaşə müəssisəsi yoxlanılıb. Yoxlamalar zamanı Keşlə Bazarı, Özbək Bazarı, Sahil Bazarı və Yaşıl Bazar kimi məkanlarda ciddi nöqsanlar aşkar edildiyi bildirilib.

Həmçinin Balique 2023 LTD və Natural Fish kimi obyektlərdə etiketsiz, sənədsiz və yararlılıq müddəti bitmiş məhsulların satışda olduğu üzə çıxıb. Laborator nəticələrə əsasən, “Natural Fish” məhsullarından birində Listeria monocytogenes bakteriyası da aşkarlanıb.

Bundan əlavə, Food Fish MMC-yə məxsus anbarda məhsulların laborator nəticələr və sağlamlıq aktı olmadan satışa çıxarıldığı müəyyən edilib. Ümumilikdə isə tonlarla etiketsiz və yararlılıq müddəti bitmiş kürü məhsulları aşkarlanıb.

Deməli, Qida Təhlükəsizliyi Agentliyinin səriştəsizliyi nəticəsində bir neçə ay bu məhsulların satışı həyata keçirilib, şadlıq evlərində bu məhsullardan insanlar qidalanıb və ya marketlərdən alınaraq istifadə olunub. Amma bu gün Qida Təhlükəsizliyi Agentliyi öz fəaliyyətini ifşa edərək bu məhsulları yararsız hesab edir.

İllərdir bazarda satılan kürü məhsullarının böyük hissəsi saxta olduğu halda, bu sahəyə indiyə qədər ciddi nəzarətin olmaması sual doğurur. Demək olar ki, bütün marketlərdə və şadlıq evlərində təqdim olunan “qara kürü”nün əslində saxta və sağlamlıq üçün zərərli olduğunu hər kəs bilirdi.

Əsas diqqət çəkən məqam isə yoxlamaların məhz indi başlamasıdır.

Bizimesr.com-a daxil olan məlumata görə, bu proses təsadüfi deyil. Bir neçə ay əvvəl ət və ət məhsulları bazarında da oxşar vəziyyət yaşanmış, geniş yoxlamalardan sonra Monqolustandan buzlu ət məhsullarının bazara daxil olması ilə bağlı faktlarla yekunlaşmışdı.

Daxil olan məlumatlara əsasən, hazırda saxta kürü bazarında da eyni ssenarinin tətbiq olunduğu iddia edilir. Bildirilir ki, “Food Fish” MMC bazardan çıxarılır və bu sahə başqa şəxslərin nəzarətinə keçəcək. Eyni zamanda, bazara Qazaxıstan və Rusiya kimi ölkələrdən "kürü" və "kürü məhsulları"nın gətirilməsi planlaşdırılır.

Bu baxımdan, Qida Təhlükəsizliyi Agentliyinin son addımlarının illərdir bazarda fəaliyyət göstərən mövcud oyunçuların sıradan çıxarılmasına və yeni idxalçıların önünün açılmasına xidmət etdiyi iddia olunur.

Bizimesr.com

Peşə Təhsili üzrə Dövlət Agentliyi tərkibində fəaliyyət göstərən bir neçə Peşə Mərkəzində tələbələr arasında vərəm aşkarlanıb.
Məlumata görə, Peşə Təhsili üzrə Dövlət Agentliyi tərkibində fəaliyyət göstərən bir neçə peşə mərkəzində tələbələr arasında vərəm aşkarlanıb. Xüsusilə Emal Sənaye üzrə Bakı Dövlət Peşə Təhsil Mərkəzi və Buzovnada yerləşən Mədəniyyət və Sənətkarlıq üzrə Bakı Dövlət Peşə Təhsil Mərkəzində (5 saylı) yoluxma halları daha kritik vəziyyətdədir.
Agentliyin Tərəfdaşlarla iş və kommunikasiya şöbəsinin İctimaiyyətlə əlaqələr sektorunun böyük məsləhətçisi Həvva Gözəlova məsələ ilə bağlı açıqlamasında peşə təhsil müəssisələrinin bağlanması barədə yayılan iddiaları təkzib edib və tədris prosesinin davam etdiyini bildirib.
Lakin Bizimesr.com-a daxil olan məlumatlara əsasən, Emal Sənaye üzrə Bakı Dövlət Peşə Təhsil Mərkəzinin əsas korpusu artıq 3 həftədir ki, vərəm səbəbindən fəaliyyətini dayandırıb. Bildirilir ki, tələbələr arasında kütləvi yoluxma müşahidə olunduğundan dərslər onlayn formata keçirilib.
Eyni vəziyyətin Buzovnada yerləşən Mədəniyyət və Sənətkarlıq üzrə Bakı Dövlət Peşə Təhsil Mərkəzinində yaşandığı qeyd olunur. Məlumata görə, müayinəyə cəlb edilən tələbələr arasında yoluxma sayı kifayət qədər yüksək olub və bu səbəbdən dərslər əsas korpusda dayandırılıb. Bundan əlavə, digər peşə mərkəzlərində də vərəm halları ilə bağlı şübhələrin olduğu iddia edilir. Daha bir məlumata görə, vərəmə yoluxan tələbələrdən bir neçəsinin vəziyyəti olduqca ağırdır.
Qeyd edək ki, Emal Sənaye üzrə Bakı Dövlət Peşə Təhsil Mərkəzinin direktor əvəzi təyin olunan Əlağa Kərimovdur. Mədəniyyət və Sənətkarlıq üzrə Bakı Dövlət Peşə Təhsil Mərkəzinin direktoru isə Pərviz Həmzəyevdir.
Bizimesr.az

Qarabağın yenidən qurulması Azərbaycan xalqı üçün mənəvi və strateji əhəmiyyət kəsb edən mühüm məsələdir. Lakin təəssüflə qeyd etməliyik ki, yenidənqurma və bərpa prosesində əsas rol sahibi olan Qarabağ İqtisadi Rayonunda Bərpa, Tikinti və İdarəetmə Xidməti son zamanlar daha çox uğurları ilə deyil, maliyyə qalmaqalları və idarəetmə nöqsanları ilə gündəmə gəlir.

AFN.az-ın araşdırmaları göstərir ki, icraçı direktor Leysan Məmmədovun rəhbərlik etdiyi Xidmətin fəaliyyəti rəsmi audit sənədlərində büdcə vəsaitlərinin "yeyinti poliqonu"na bənzəyir.

Leysan Məmmədovun smeta hiylələri
Hesablama Palatasının son audit hesabatları Leysan Məmmədovun idarəetmə üslubundakı böyük bir boşluğu yenidən üzə çıxarıb: Smeta sənədlərinin şişirdilməsi. Audit nəticələrinə görə, Horovlu kəndində fərdi evlərin tikintisi zamanı iş həcmlərinin süni şəkildə artırılması nəticəsində təxminən 1 milyon manata yaxın (996,046 AZN) vəsaitin artıq xərclənməsinin qarşısı son anda alınıb.

Bu, sadəcə texniki səhv deyil, dövlət vəsaitinin mənimsənilməsinə münbit şərait yaradan sistemli bir nəzarətsizlikdir. Bu cümləni rahatlıqla qura bilməyimizə səbəb Leysan Məmmədovun bundan əvvəlki vəzifələrdə yol verdiyi eyni tip nöqsanların artıq dəfələrlə aidiyyatı dövlət qurumları və media tərəfindən ifşa olunmasıdır. Tərəfimizdən hazırlanan həmin yazı ilə BURADAN tanış ola bilərsiz.


Rəqabət, yoxsa inhisar?
Xidmətin satınalma siyasəti ekspertlər tərəfindən kəskin tənqid olunur. Milyonlarla manatlıq layihələrin çox vaxt eyni podratçı qrupları arasında bölüşdürülməsi satınalmalarda şəffaflıq və rəqabətlilik prinsiplərini sual altına qoyur. Leysan Məmmədovun rəhbərliyi dövründə tenderlərin sanki öncədən müəyyən edilmiş subyektlərə istiqamətləndirilməsi, "bərpa işləri təcilidir" bəhanəsi ilə bir çox hallarda şəffaf prosedurlardan yan keçilməsi büdcə xərclərinin səmərəliliyini sıfıra endirir.

Tənqidlərin digər istiqaməti isə kadr və əməkdaşlıq siyasətidir. Audit zamanı məlum olub ki, xidmət rəhbərliyi işğaldan azad edilmiş ərazilər üçün nəzərdə tutulan əlavə ödənişləri və maaşları qanunsuz şəkildə hesablayaraq 137 min manatdan çox vəsaitin artıq ödənilməsinə yol verib. Bu isə rəhbərliyin həm maliyyə savadlılığı, həm də inzibati nəzarət mexanizminin iflic vəziyyətində olduğunun göstəricisidir.

Olmayan hesabatlılıq
Qarabağ üçün ayrılan milyardların hara və necə xərcləndiyi barədə cəmiyyətə dolğun məlumat verilməməsi, Leysan Məmmədovun rəhbərliyi etdiyi qurumu "qapalı qutu"ya çevirib. Hesablama Palatasının isə hər müdaxiləsində yeni bir qanunsuzluq aşkar etməsi xidmətə olan etimad limitini tükədir.

Uğrunda minlərlə şəhid verdiyimiz torpaqların bərpası, işğaldan azad edilən ərazilərdə aparılan quruculuq işləri kimlərinsə şəxsi qazanc mənbəyinə çevrilə bilməz. Leysan Məmmədovun rəhbərliyi altında yığılıb qalmış bu nöqsanlar, maliyyə problemləri və smeta oyunları göstərir ki, xidmətdə köklü kadr və idarəetmə dəyişiklikləri qaçılmazdır.

Hesablama Palatasının aşkar etdiyi bu rəqəmlər xidmət rəhbərliyi üçün sadəcə "hesabat xətası"dır, yoxsa böyük bir yeyintinin rəsmi təsdiqi? Bundan sonra iş hüquq-mühafizə orqanlarının üzərinə düşür...

AFN.az

Səhiyyə Nazirliyinin Analitik Ekspertiza Mərkəzi tərəfindən özəl tibb müəssisələrində onlarla yoxlama keçirilməsi və “Medicare Klinikası” MMC-də lisenziyadan kənar fəaliyyətin aşkar olunması rəsmi şəkildə yayımlandı

Bizimesr.com bildirir ki, hətta verilmiş müddət ərzində nöqsanlar aradan qaldırılmadığı üçün klinikanın lisenziyasının dayandırılması barədə qərar qəbul edildiyi bildirilirdi.Lakin ortaya çıxan sual son dərəcə ciddidir: əgər lisenziya dayandırılıbsa, bu klinika hansı əsasla fəaliyyətini davam etdirir? Bu, artıq təkcə inzibati pozuntu deyil, “Lisenziyalar və icazələr haqqında” qanunun və vətəndaşların sağlamlıq hüququnun açıq şəkildə sual altına düşməsi deməkdir. Əgər klinikanın lisenziyası rəsmi qaydada bərpa olunmayıbsa, fəaliyyət göstərməsi qanunvericilik baxımından ciddi pozuntu sayılır.Mediatvaz.com xəbər verir ki,digər narahatedici məqam isə bəzi həkimlərlə əmək müqavilələrinin bağlanmaması ilə bağlı iddialardır. Bu hal təsdiqini taparsa, bu, həm Əmək Məcəlləsinin, həm də tibbi fəaliyyətin tənzimlənməsi qaydalarının kobud şəkildə pozulması anlamına gəlir.Ən narahatedici məqam isə odur ki, daha əvvəl bu klinikada ölüm faktının baş verdiyi bildirilir. Belə bir hadisədən sonra nəzarətin sərtləşdirilməsi gözlənildiyi halda, əksinə, eyni müəssisə ətrafında yeni suallar yaranır.

Belə ki, 2023-ci ilin aprel ayında 23 yaşlı Arzu Əzimovanın estetik əməliyyatdan sonra həyatını itirməsi ilə bağlı yayılan məlumatlar o zaman cəmiyyətdə ciddi narahatlıq doğurmuşdu. Bildirilirdi ki, o, Medicare Klinikasında rinoplastika əməliyyatı keçirib, əməliyyatdan sonra vəziyyəti ağırlaşaraq komaya düşüb və aparılan tibbi müdaxilələrə baxmayaraq vəfat edib.

Tirajlanan məlumatlarda iddia olunurdu ki, əməliyyatı icra edən həkimin estetik cərrahiyyə aparmaq üçün müvafiq sertifikatı olmayıb. Eyni zamanda həmin həkimlə “Medicare” klinikası arasında rəsmi əmək müqaviləsinin mövcud olmadığı da qeyd edilirdi.Diqqətçəkən başqa bir məqam isə bunun tək hadisə olmamasıdır.

21 dekabr 2023-cü il tarixində də 1971-ci il təvəllüdlü Lətafət Məmmədovanın “Medicare” klinikasında əməliyyat zamanı həyatını itirdiyi barədə rəsmi məlumat yayılmışdı. Qısa zaman aralığında eyni müəssisə ətrafında iki ölüm faktının hallanması sualları daha da artırır.İnsan həyatı üzərindən yaranan suallar cavabsız qaldıqca, ictimai etimad daha da sarsılır. Səssizlik isə bu kimi hallarda ən təhlükəli mövqedir.Belə hadisələrdən sonra nəzarətin gücləndirilməsi gözlənildiyi halda, əksinə, iddiaların davam etməsi ictimai narahatlığı artırır.Çünki burada söhbət təkcə qaydalardan yox, insan həyatından gedir – və bu mövzuda səssizlik qəbulolunmazdır.

Qarşı tərəfin cavab haqqını tanıyırıq

Bizimesr.com