K.Y.Fərəcova adına Elmi-Tədqiqat Pediatriya İnstitutu tərəfindən tibbi tullantıların daşınması və zərərsizləşdirilməsi üzrə keşirilmiş kotirovka sorğusuna 10.03.2026-ci ildə yekun vurulub. Müsabiqənin qalibi “BT TEXNO SERVİS” Məhdud Məsuliyyətli Cəmiyyəti seçilib və tərəflər arasında 20.793,96 manat məbləğində satınalma müqaviləsi bağlanmışdır. Məlumat satınalmaların portalında 10.03.2026-cı ildə dərc edilmişdir.

Qeyd edək ki, tibbi tullantıların zərərsizləşdirilməsi Nazirlər Kabinetinin “Tibbi tullantıların idarə olunmasına dair Tələblər”in təsdiq edilməsi haqqında 2007-ci il 28 dekabr tarixli 213 nömrəli qərarının 7.8 bəndinə əsasən B və C sinfinə aid tullantıların zərərsizləşdirilməsi mərkəzləşdirilmiş və mərkəzləşdirilməmiş üsulla aparıla bilər.

Tullantıların müəssisənin ərazisində mərkəzləşdirilməmiş üsulla termiki zərərsizləşdirilməsi üçün qurğuların yerləşdirilməsi Azərbaycan Respublikası Ekologiya və Təbii Sərvətlər Nazirliyinin və Azərbaycan Respublikası Səhiyyə Nazirliyinin razılığı ilə həyata keçirilir. Mərkəzləşdirilmiş üsulla tibbi tullantıların zərərsizləşdirilməsi iri zibilyandıran zavodların sobalarında aparılır. Həmin zavodun yerləşdiyi yer, istismar şəraiti, ətraf mühitə təsir səviyyəsi müvafiq normativ sənədlərlə tənzimlənir.

Qeyd edək ki, “BT TEXNO SERVİS” MMC tullantıların daşınması və zərərsizləşdirilməsi üzrə ən çox satınalmaların qalibi olan şirkətlərin biridir. Bu şirkət 21.01.2025-ci ildən 16.03.2026-cı ilə qədər dəyəri yüz minlərlə manat olan 50 satınalma müsabiqəsinin qalibi seçilib.

Qeyd edək ki, Nazirlər Kabinetinin 21.12.2018-ci il tarixli 556 saylı qərarı ilə mikro, kiçik, orta və iri sahibkarlıq subyektlərinin bölgüsü meyarları müəyyən edilib. Bu bölgüyə əsasən mikro sahibkarlara 1 – 10 nəfər işçisi olub, illik gəliri 200 min manata qədər olan müəssisələr aid edilirlər. Bölgüyə görə 11 – 50 nəfər işçisi olub, illik gəliri 200 min manatdan 3 milyon manatadək olan müəssisələr kiçik sahibkarlıq subyektinə aid edilirlər. Qərara görə 51 – 250 nəfər işçisi olub, illik gəliri 3 milyon manatdan 30 mln. manatadək olan müəssisələr orta sahibkarlıq subyektinə aiddirlər.

Qeyd edək ki, “BT TEXNO SERVİS” Məhdud Məsuliyyətli Cəmiyyəti sahibkarlıq subyektlərinin bölgüsü meyarlarına görə orta sahibkarlıq kateqoriyasına aiddir. Qanun orta sahibkarlıq subyekti kimi “BT TEXNO SERVİS” MMC-ni kotirovka sorğularında iştirakına yol vermir.

Dövlət Satınalmaları Haqqında” Azərbaycan Respublikası Qanununun 48.2.-ci maddəsinə görə ehtimal olunan qiymətdən asılı olaraq, kotirovka sorğusu metodu aşağıdakı təchizatçılar arasında keçirilir və yalnız onların təklifləri qiymətləndirilir: 48.2.1. ehtimal olunan qiymət 30 000 manatadək olduqda – mikro və kiçik sahibkarlıq subyekti olan təchizatçılar.

Göründüyü kimi Elmi-Tədqiqat Pediatriya İnstitutu ilə “BT TEXNO SERVİS” MMC arasında bağlanılmış satınalma müqaviləsində qanunun tələbləri pozulub. Belə ki, Qanun orta sahibkarlıq subyekti kimi “BT TEXNO SERVİS” MMC-nin kotirovka sorğularında iştirakına yol vermədiyi halda Pediatriya İnstitutunun Satınalma Komissiyası buna yol vermişdir. Bu da keçirilmiş satınalma prosedurunda saxtakarlıq hallarına yol yerildiyinə əsaslı şübhələr yaradır.

Qeyd edək ki, K.Y.Fərəcova adına Elmi-Tədqiqat Pediatriya İnstitutunun Satınalma Komissiyası tərəfindən qanun pozunuları bunlarla bitmir. K.Y.Fərəcova adına Elmi-Tədqiqat Pediatriya İnstitutu bir sıra kotirovka sorğusu müsabiqələrində ehtimal olunan qiymətlə müqayisədə 20 faizdən dəfələrlə aşağı, 50 faizdən də aşağı qiymət təqdim etmiş şirkətlərlə satınalma müqavilələri bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir. Bu həm də Elmi-Tədqiqat Pediatriya İnstitutunda dövlət satınalmalarına nəzaritin olmadığı deməkdir.

Qeyd edək ki, K.Y.Fərəcova adına Elmi-Tədqiqat Pediatriya İnstitutunun direktoru Aynur Poluxovadı. O, sözügedən vəzifəyə Səhiyyə naziri Teymur Musayevin əmri ilə 2023-cü ilin sentyabrında təyin edilib. Əldə etdiyimiz ən son son məlumatlara görə onun bu vəzifəyə təyanıtanda Azərbaycan Tibb Universitetinin (ATU) Uşaq cərrahiyyəsi kafedrasının müdiri Ramiz Poluxovun böyük rolu olub. Aynur Poluxova həm də 2016-cı ildən ATU, II Uşaq xəstəlikləri kafedrasında dosent işləyir.

Qeyd edək ki, Aynur Poluxovanın rəhbərlik etdiyi Pediatriya İnstitutunda qanunsuzluqlara təkcə satınalmalarda yol verilmir. Bu günlərdə mediaya müraciət edən vətəndaş aidiyyatı orqanlara Elmi-Tədqiqat Pediatriya İnstitutunda baş alan özbaşınalığa etiraz edib. (Məqaləni bu linkdə ətraflı oxuya bilərsiniz https://gundelikxeber.org/gundem/13812-elmi-tdqiqat-pediatriya-institutunda-sogan-kimi-qabigimizi-soydular.html )Vətəndaş bilidirir ki, 40 günlük körpəsini ağır vəziyyətdə K.Y.Fərəcova adına Elmi-Tədqiqat Pediatriya İnstitutu çatdırıblar. Uşaq təcili əməliyyata alınıb. Lakin olanlar bundan sonra başlayıb. Vətəndaş bildirir ki, əməliyyatdan çıxdıqdan sonra bizdən pul tələb etdilər bildirdilər ki, özəldə belə əməliyyatlar 1000-1500 manatdır amma siz 600 manat verməlisiz məcbur olub pulu verdik. Həmçinin tibb bacıları da pul istəyirdilər.

Qeyd edək ki, Elmi-Tədqiqat Pediatriya İnstitutu tərəfindən satınalmalarda yol verilən bu kimi qanun pozuntularına aydınlıq gətirilməsi məqsədi ilə ünvanladığımız sorğuya cavab verilmədi. Buna baxmayaraq əks tərəfin də mövqeyini dərc etməyə hazırıq.

Aktualinfo.net

TƏBİB-in icraçı direktoru Anar Bayramov Bakı Baş Səhiyyə Mərkəzində növbəti kadr dəyişikliyi edib. Bakı Baş Səhiyyə Mərkəzinin direktorunun tibbi xidmətin təşkili üzrə müavini və direktor səlahiyyətlərini icra edən Güllü İbadova vəzifəsindən kənarlaşdırılıb.

Qeyd edək ki, Güllü İbadova bir neçə il əvvəl Laçın Rayon Mərkəzi Xəstəxanasının direktoru və baş həkimi olub. Onun Baş Prokurorluq tərəfindən Laçın Rayon Mərkəzi Xəstəxanasına ayrılmış dövlət vəsaitinin mənimsənilməsi ittihamı ilə cinayət məsuliyyətinə cəlb edilməsi barədə xəbərlər yayılıb.

Məlumata görə, Güllü İbadova barəsində Cinayət Məcəlləsinin 179.2.3 və 179.2.4-cü maddələri ilə cinayət işi açılıb, iş məhkəməyə göndərilmişdi. İddialara əsasən, o, 2017–2020-ci illərdə ştat cədvəllərində saxtakarlıq edərək 17 min manatdan çox dövlət vəsaitini mənimsəməkdə ittiham olunub.

Sonradan onun məhkəmədə bəraət aldığı da yayılan məlumatlar sırasındadır.

Bu söhbətlər isə onun vəzifə irəliləməsinə mane olmayıb. Sabiq TƏBİB sədri Vüqar Qurbanovun dövründə Güllü İbadova Bakı Baş Səhiyyə Mərkəzinin direktorunun tibbi xidmətin təşkili üzrə müavini vəzifəsinə təyin edilmişdi. Daha sonra isə ona qurumun idarə olunması da həvalə olunmuşdu.

Xatırladaq ki, Bakı Baş Səhiyyə Mərkəzinin direktoru Elçin Əmirov da yaxın günlərdə vəzifəsindən azad edilib. Bundan sonra qurumun idarə olunması müvəqqəti olaraq Güllü İbadovaya həvalə edilmişdi. /Bakupost/

2024-cü ilin 5 iyun tarixində Qeyri-Hökumət Təşkilatlarına Dövlət Dəstəyi Agentliyi böyük pafosla bir elan yaydı. Elanda bildirilirdi ki, işğaldan azad olunmuş Qarabağ və Şərqi Zəngəzurda məskunlaşan əhali üçün QHT-lərin “səyyar xidmətləri” layihəsinə başlanılır. Tibbi xidmətlərdən tutmuş psixoloji dəstəyə, fiziki məhdudiyyətli uşaqlarla işdən mina təhlükəsi ilə bağlı maarifləndirməyə qədər geniş fəaliyyətlər vəd olunurdu. Hətta QHT nümayəndələrinin nəqliyyat, qidalanma və gecələmə xərclərinin qarşılanacağı da xüsusi vurğulanırdı.

Kağız üzərində hər şey gözəl görünürdü. Dövlət qurumu özünü həssas qrupların yanında göstərir, Qarabağa qayıdış prosesində “aktiv iştirak” görüntüsü yaradırdı. Amma aradan iki ilə yaxın vaxt keçməsinə baxmayaraq, ortada nə nəticə var, nə hesabat, nə də ictimaiyyətə təqdim edilən konkret fəaliyyət. Agentliyin rəsmi hesabatlarında belə bu təşəbbüslə bağlı ciddi bir məlumat yoxdur. Nə qədər QHT cəlb edildi? Hansı xidmətlər göstərildi? Hansı kənd və şəhərlərdə fəaliyyət oldu? Neçə şəhid ailəsi, neçə uşaq, neçə köçkün bu xidmətlərdən yararlandı? Bu sualların heç birinə cavab yoxdur.
Bu isə çox ciddi məsələdir. Çünki burada söhbət adi bir layihədən getmir. Burada işğaldan azad olunmuş ərazilərdən, illərlə əziyyət çəkmiş insanlardan, şəhid ailələrindən, həssas qruplardan danışılır. Qeyri-Hökumət Təşkilatlarına Dövlət Dəstəyi Agentliyi bu mövzuları ictimai rəğbət və reklam alətinə çevirməməlidir. Əgər elan verilirsə, nəticə də olmalıdır. Əgər dövlət vəsaiti ayrılırsa, ictimai hesabatlılıq da təmin edilməlidir. Əks halda, bu, sadəcə ucuz PR kampaniyası təsiri bağışlayır.

Ən utancverici məqam isə budur ki, Qarabağ kimi həssas və milli məsuliyyət tələb edən bir mövzu “fəaliyyət görüntüsü” yaratmaq üçün istifadə edilir. İnsanlarda belə təsəvvür yaradılır ki, guya böyük sosial proqram həyata keçirilir, amma sonradan məlum olur ki, ortada nə şəffaflıq var, nə hesabat, nə də nəticə. Dövlət qurumu reklam xarakterli elan yayır, öz media subyektləri bunu tirajlayır, rəsmi saytlar paylaşır, amma 2 ildir məsələ unudulur. Üstəlik, bu Agentliyin ilk belə qalmaqallı və şübhəli təşəbbüsü deyil: 2022-ci ildə də “Heydər Əliyevin Şuşa sevgisi” adlı layihə böyük təqdimatlarla elan edilmişdi. Amma sonradan məlum oldu ki, layihə faktiki olaraq həyata keçirilməyib. Agentliyin icraçı direktoru Aygün Əliyeva 35 min manatlıq tədbiri kağız üzərində icra edilmiş kimi rəsmiləşdirib, daxili hesabatlara isə montaj olunmuş fotolar əlavə edərək maliyyə yoxlaması aparan qurumları məharətlə aldada bilib. Ən dəhşətlisi isə budur ki, ortada ciddi faktlar olduğu halda heç bir ciddi məsuliyyət tədbiri görülmədi. Əksinə, cəzasızlıq mühiti formalaşdırıldı və nəticədə daha böyük layihələrin, daha həssas mövzuların və hətta Ümummilli lider Heydər Əliyevin adının belə PR və saxta hesabat mexanizmlərinə çevrilməsinə şərait yaradıldı.
Bu artıq təkcə səriştəsizlik və ya uğursuz idarəçilik məsələsi deyil. Bu, dövlət resurslarının, milli dəyərlərin və ictimai həssaslığın manipulyasiya predmetinə çevrilməsi barədə çox ciddi suallar yaradır. Qarabağ, şəhid ailələri, məcburi köçkünlər, fiziki məhdudiyyətli uşaqlar və hətta Ulu öndər Heydər Əliyev irsi üzərindən reklam qurmaq, sonra isə ortada heç bir real nəticə təqdim etməmək Qeyri-Hökumət Təşkilatlarına Dövlət Dəstəyi Agentliyi üçün utanc olmalıdır.
Əgər icra edilməyəcəkdisə, niyə elan verilirdi? Dövlət qurumunun əsas vəzifəsi görüntü yaratmaq deyil, real iş görməkdir. Xüsusilə də söhbət həssas qruplardan və Qarabağa qayıdış prosesindən gedirsə... Bu cür yarımçıq və nəticəsiz təşəbbüslər həm dövlət idarəçiliyinə inamı zədələyir, həm də həqiqətən fəaliyyət göstərmək istəyən QHT-lərin nüfuzuna zərbə vurur.
"Yenixeberorg" olaraq xatırladaq ki, daha təhlükəlisi isə budur ki, bu artıq sistemli yanaşmaya bənzəyir. Təmtəraqlı elanlar verilir, emosional və pafoslu mətnlər yazılır, “tarixi proses”, “şanlı qayıdış”, “həssas qruplara xidmət” kimi ifadələr ön plana çıxarılır, amma sonra nəticə görünmür. Dövlət qurumunun fəaliyyəti reklam üzərində qurulmamalıdır. Ortada nəticə yoxdursa, bu cür elanlar ictimaiyyəti aldatmaqdan başqa bir məna daşımır.
Qarabağ mövzusu reklam vitrini olmamalıdır. Şəhid ailələrinin, məcburi köçkünlərin, fiziki məhdudiyyətli uşaqların adı isə heç bir halda PR məqsədilə istifadə olunmamalıdır. Qeyri-Hökumət Təşkilatlarına Dövlət Dəstəyi Agentliyinin vəzifəsi öz rəhbərliyinin imicini formalaşdırmaq deyil, vətəndaşa real xidmət göstərməkdir.(Yenixeberorg.com)

Xəbər verdiyimiz kimi, ötən ilin dekabr ayında Qida Təhlükəsizliyi Agentliyi (AQTA) Xətai rayonu, R.Bağırov küçəsi, ev 58 ünvanında yerləşən, fiziki şəxs Firdovsi Quliyevin rəhbərliyi altında fəaliyyət göstərən “Ramin-Nur” şadlıq sarayında camış ətini dana əti adı ilə təqdim edərək istehlakçıları aldatdığını aşkarlayıb.

Həmin hadisədən sonra “Körpü Bina Tikinti” MMC-nin rəhbəri Xəlil Göyüşova məxsus və iş adamının oğlu Raminin adına verdiyi sözügedən şadlıq sarayının adını dəyişdirilib.

Həmin yoxlamadan sonra ictimaiyyət arasında camış ətini dana əti adı ilə istehlakçılara təqdim restoran kimi tanınan “Ramin-Nur” şadlıq sarayı artıq “Nova Events Hall” adı ilə fəaliyyət göstərir.

Qeyd edək ki, dünən də Qida Təhlükəsizliyi Agentliyinin əməkdaşları Bakı şəhəri, Nizami rayonu, M.Əliyev küçəsi, ev 2403, m 33F ünvanında fəaliyyət göstərən, fiziki şəxs Mehdiyev Mahir Rauf oğluna məxsus “Alp Delux” şadlıq evində yoxlama keçirib.

Baxış zamanı obyektdə soyuq qəlyanaltıların və isti yeməklərin hazırlanması sahələrində havalandırma sisteminin quraşdırılmadığı, qida ilə təmasda olan səthlərin yuyulabilən və dezinfeksiyaya davamlı materialla üzlənmədiyi, anbar sahəsində tavanda yerləşən su xətlərinin izolyasiya olunmadığı, soyuducu rəflərinin korroziyaya uğradığı müəyyən edilib. Şübhəli hallar səbəbilə istehlaka təqdim edilən ətlərdən nümunələr götürülərək laborator müayinələrə cəlb edilib. Sınaq nəticəsində nümunələrdə at DNT-si aşkarlanıb. /Qaynar/

Prezident İlham Əliyev hakimiyyətdə olduğu ilk vaxtlardan başlayaraq özünün çevik və düşünülmüş kadr siyasəti ilə bu stereotipi də aradan götürmüş oldu.


Hər kəsə məlum olduğu kimi, son vaxtlar ölkədə həyata keçirilməkdə olan islahatlar, xüsusən də kadr islahatları sahəsində dinamika daha da artıb. Bir-birinin ardınca nazirliklərin, mərkəzi və yerli icra hakimiyyəti orqanlarının rəhbərliyi yeni düşüncəli, sağlam təfəkkürlü gənclərə etibar olunmaqdadır.
Təbiidir ki, kadrlar yerində olmayanda, problemlərdə arta-arta ciddi narazılıqlar həddinə çatır. Məsələn, Elçin Babayevin BDU-nun rektoru təyin olunduğu vaxtdan cəmi bir neçə il ötüb. Amma Universitetdə söz-söhbətlərin, narazılıqların miqyası durmadan artmaqdadır. Yadınızdadırsa, elə ilk gündən bu təyinatla bağlı icitimai rəy müsbət olmamışdı. Səbəbi də odur ki, seçim düzgün olmayıb.


Axı, BDU ölkənin ən nüfuzlu ali təhsil ocağı olduğundan onun başında hər zaman ölkənin ən tanınmış alimləri – akademiklər, professorlar durub. Bəs, Elçin Babayev kimdir?! Sadəcə orta səviyyəli bir fəlsəfə doktoru. Uzun illərdir ki, akademiya sistemində işləyərək özünə doktorluq dissertasiyası belə yazmaq qabiliyyətində olmayan birisinin ölkənin ən sanballı elm adamlarının cəm olduğu belə bir elm və təhsil ocağına rəhbərlik etməyə nə gücü, nə də haqqı çatır. O, özündən həm yaşca, həm də başca çox-çox üstün olan insanlarla elm və təhsilin aktual problemləri barədə söhbət edə bilərmi?! Əlbəttə yox!


Görəsən, bir il öncə onun rektorluğa təqdimatına zamin duranlar bu amilləri niyə nəzərə almayıblar?! E.Babayevin Universitetə gətirə biləcəyi yeganə “yenilik” yalnız və yalnız Elmin İnkişafı Fonduna rəhbərlik etdiyi dönəmdə yaxşıca mənimsəmiş olduğu saxta yollarla daha çox qazanc əldə etməyin yeni üsulları ola bilərdi ki, onu da artıq tətbiq edib. Beləliklə, ötən illər ərzində Abel Məhərrəmovun bərbad günə salmış olduğu BDU Elçin Babayevin gəlişindən sonra daha bərbad vəziyyətə düşüb.


“Balıq başdan iylənər” deyiblər. Rektorun yarıtmaz idarəçiliyi onun tabeçililində olan şəxslərin fəaliyyətində də özünü göstərir. Bəzən bu qüsurlu fəaliyyət korrupsiya sərhədlərini də aşaraq dövlətə və dövlət siyasətinə qarşı yönəlir. Məsələn, Bakı Dövlət Universiteti jurnalustika kafedrasının dosenti Vəfa İsgəndərovanın fəaliyyəti ilə bağlı iddialar ciddi narahatçılıq doğurur. Bununla bağlı Mustafayeva Leyla Rauf qızı mediaya müraciətində ( https://www.linkedin.com/posts/leylamustrauf_media-mediainkiagnafagentliyi-jurnalistika-share-7457868703666294784-wYPn/?utm_source=social_share_send&utm_medium=ios_app&rcm=ACoAADNVjMMBg38pOlF2mCGJAs2-MKW7ewHt7z0 ) ciddi həyacan təbili çalır. Məlumat üçün bildirək ki, Bakı Dövlət Universitetinin Beynəlxalq Münasibətlər və İqtisadiyyat fakültəsinin məzunu olan Leyla xanım 2020-ci ildən etibarən 18 ay müddətində “Karabakh is Azerbaijan” platformasında fəaliyyət göstərib. Bu dövr ərzində informasiya müstəvisində ölkəmizin maraqlarının müdafiəsi istiqamətində aktiv iştirak edib. O, daha sonra Diasporla İş üzrə Dövlət Komitəsində çalışmış, Varşavada keçirilən Demokratiya Forumunda, həmçinin İslam Əməkdaşlıq Təşkilatında fəal iştirak edib. Bir sözlə Leyla Mustafayevanın bütün fəaliyyəti dövlətimizə və vətəndaşlarımıza xidmət istiqamətində olub.


Amma maraqlıdır ki, son dövrlərdə bəzi şəxslər tərəfindən Leyla xanımın işlədiyi mərkəzə, birbaşa onun şəxsi həyatına təsir edə biləcək istiqamətdə addımlar atılmaqdadır. Bu hallar Leyla Mystafayevanın təkcə peşə fəaliyyəti deyil, eyni zamanda şəxsi nüfuzunu və təhlükəsizliyini də narahat edən səviyyəyə çatmışdır. Bu kampaniyanın başında isə birbaşa BDU-nun dosenti Vəfa İsgəndərova durur. Məlumat üçün onu da bildirək ki, Vəfa Aslan İsgəndərova ilə Leyla Mustafayev arasında yaranmış problem konkret müqavilə münasibətlərinə əsaslanır. 2025-ci ildə “Pilgrim Edu” MMC ilə Vəfa İsgəndərov arasında övladı üçün rəsmi müqavilə bağlanmış, xidmətlər tam şəkildə icra olunmuş, “Boost” proqramında iştirakı təmin olunmuşdur. Amma heç bir əsas olmadan sonradan V. İsgəndərova tərəfindən müxtəlif şikayətlər və müraciətlərlə davam etdirilmişdir.


Məsələ Nəsimi rayon 21 saylı Polis Bölməsi tərəfindən araşdırılmış və hər hansı qanun pozuntusu müəyyən edilməmişdir. Bunun ardınca Vəfa xanım başqa mübarizə yollarına əl atmışdır ki, bunun da kökündə birbaşa dövlətçiliyə yönəlik fəaliyyət durur. Belə ki, “Pilgrim Edu” MMC və Leyla Mustafayevə qarşı qərəz kampaniyasına “asylum seeker” (siyasi sığınacaq axtaran şəxslər) kimi tanınan bəzi şəxslər də cəlb edilib. Bu prosesə rəhbərlik edən Ruslan Aliyev Vəfa İsgəndərovun xaricdə həyata keçirdiyi fəaliyyətləri sayəsində ölkədən kənar müxalif düşüncəli şəxsləri də işə cəlb edib. Bu məqamda xüsusilə Azərbaycanda yaşayan gənclərlə bağlı göstərilən zərərli təşəbbüslər narahatlıq doğurur. Gənclərin “Müqavimət media” kimi qeyri-rəsmi və mübahisəli platformalara yönləndirilməsi qəbuledilməzdir.


Eyni zamanda Vəfa İsgəndərovanı Leyla xanımın tələbələrindən ibarət qrup yaratmağı və onları koordinasiyalı şəkildə yönləndirməyi əlavə suallar yaradır. Bu məsələ ilə bağlı müvafiq dövlət qurumlarına rəsmi şəkildə müraciət edilib. Bu qədər səlahiyyət və vəzifə həddini aşan şəxsin prezidentin “dəmir yumruq” ifadəsini məsxərəyə qoyması da təəccüblü deyil. Jurnalistika kafedrasının dosenti olaraq fəaliyyət göstərən bir şəxsin elmi və pedoqoji baxımdan daha peşəkar və etik çərçivədə davranması tələb olunur. Xüsusilə “Təhsildə psixologiya” adlı seminarla bağlı digər universitetlərin rəhbərliyi ilə qurulan əlaqələrdə təzyiq xarakterli yanaşmaların olması ciddi suallar doğurur. Ölkənin əsas ali təhsil ocağının dossentinin xaricdə məskunlaşmış müəmmalı siyasi yönlü qruplarla birgə “Pilgrim Edu” MMC əməkdaşlarına və tərəfdaş qurumlara yönəlmiş təzyiq cəhdləri, eləcə də ADNSU-da keçirilmiş seminarla bağlı universitet rəhbərliyinə edilən müraciətlər vəziyyəti daha da həssas edir.


İnanırıq ki, son vaxtlar dövlət orqanlarının birbaşa ölkə Prezidentinin tapşırığı və dəstəyi ilə bu istiqamətdə həyata keçirmiş olduğu qətiyyətli tədbirlər hər kəsə dərs olacaqdır. Öz fəaliyyətində dönüş yarada bilməyənlər əmin olsunlar ki, onların da qapısını tez-gec DTX əməkdaşları döyməli olacaqlar.


Cumhuriyyet.az

Tovuz Rayon Qoylar kənd sakini Məqsəd Abbasov kanalımıza müraciət edərək bildirir ki, sosial durumu çox ağırdır, heç yerdə işləmir kirayə yaşayır. Şikayətçi deyir ki, Əmək və Əhalinin Sosial Müdafiə Fonduna sosial yardımla bağlı dəfələrlə müraciət etsə də, hər dəfə bir səbəb göstərərək sosial yardım verməkdən imtina ediblər.
Şikayətçi qeyd edir ki, sonuncu dəfə onun işsiz olduğunu əsas gətirib sosial yardım verməkdən imtina ediblər. Vətəndaş deyir ki, icra hakimiyyətinə işlə bağlı müraciət etdiyində isə ona iş olmadığını bildiriblər. İcra başçısından maddi durumunun ağır olduğu üçün yardım istədiyində isə onu dinləmirlər belə.
O, bu laqeyidlikdən bezdiyini, çörək almağa, komunallarını ödəməyə imkanı olmadığı üçün ölkədən getmək istədiyini və xarici ölkələrdən sığınacaq istədiyini qeyd edir. Abbasov aidiyyatı qurumlara müraciət edərək onu işlə təmin etmələrini və ya sosial yardım alması üçün kömək etmələrini xahiş edir...
KANAL13
Daha ətraflı aşağıdakı videoda:

Quba şəhəri, "Qəçrəş yolu" yaşayış massivi ərazisindəki qanunsuz tikintinin qarşısı alınıb.

"Unikal"ın əldə etdiyi məlumata görə, qanunsuz tikintiyə Quba Rayon İcra Hakimiyyəti tərəfindən müdaxilə edilib.

Quba Rayon İcra Hakimiyyəti bu barədə "Unikal"ın sorğusunu təsdiqləyib: "Aşkar edilmiş qanunsuz tikinti ilə bağlı Quba Rayon İcra Hakimiyyəti tərəfindən aidiyyatı qurumlara məlumat verilib. Nəticədə qanunsuz tikintinin qarşısı alnıb".

Əldə etdiyimiz daha bir məlumata görə, sözügedən qanunsuz tikinti Azərbaycan Respublikası Fövqəladə Hallar Nazirliyinin (FHN) Gəncə Regional Mərkəzinin rəisi polkovnik Rövşən Nəbiyevə məxsus olub.

Belə ki, o, Qəçrəş yolu üzərindəki özünə məxsus olduğu bildirilən 20 sot torpaq sahəsində 3 mərtəbəli qeyri-yaşayış obyekti tikdirmək istəyib.

Qeyd edək ki, Rövşən Nəbiyev bu vəzifəyə ötən ilin iyun ayında gətirilib.

Ekologiya və Təbii Sərvətlər Nazirliyi (ETSN) BMT-nin Ətraf Mühit Proqramı (UNEP) tərəfindən iyunun 5-də Bakıda keçiriləcək “Ümumdünya Ətraf Mühit Günü” - WED2026 (World Environment Day) çərçivəsində tədbirin təşkili üçün “LEGACY EVENTS MANAGEMENT” Məhdud Məsuliyyətli Cəmiyyəti ilə 445 min 480,92 manat dəyərində müqavilə bağlayıb.

Müqavilə bir mənbədən satınalma çərçivəsində reallaşdırılıb. Bu da cəmiyyətdə xeyli diqqətə və müzakirələrə səbəb olub. Çünki Azərbaycanda “Dövlət satınalmaları haqqında” Qanuna əsasən, bir mənbədən satınalma metodu yalnız xüsusi hallarda tətbiq edilir. Qanunun 15.1 maddəsində də göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız portal vasitəsilə həyata keçirilir.

Əvvəlcədən dəqiq tarixləri müəyyən edilən tədbirin təşkili və keçirilməsi, o cümlədən bir sıra xidmətlərin göstərilməsi bir mənbədən satınalma metoduna uyğun gəlmir. Düzdür, dövlət qurumları adətən bir mənbədən satınalma metodunu təcili tələbat (63,8%) və konkret təchizatçının unikal mövqeyi (42,6%) ilə izah edirlər. Lakin nazirliyin müqaviləsi bu səbəblərin heç biri ilə uyğunlaşmır. Əvvəla, beynəlxalq tədbirlər 1-2 il əvvəldən planlaşdırılır. Belə ki, UNEP-in Azərbaycanda keçiriləcəyini 2024-cü il iyunun 27-də proqramın icraçı direktoru İnger Andersen ölkəyə rəsmi səfəri zamanı elan edib.

Göründüyü kimi, burada təcili təlabatdan söhbət gedə bilməz. Təchizatçının unikal mövqeyinə gəlincə, satınalmanın "qalibi"- “LEGACY EVENTS MANAGEMENT” MMC Bakı şəhəri Lokal Gəlirlər Baş İdarəsində 07.03.2025-ci il tarixində dövlət qeydiyyatına alınıb. Yəni, qərardan aylar sonra, təşkil olunacaq tədbirdən 1 il 2 ay əvvəl. Bu ötən müddətdə Azərbaycanda bir çox beynəlxalq tədbirlər keçirilsə də, "LEGACY EVENTS MANAGEMENT" onların işində iştirak etməyib. Bir sözlə, unikal təcrübədən söhbət belə gedə bilməz. Ölkə bazarında rəqabət şəraiti olduğu halda, yəni hər hansı malı və xidməti bir deyil, bir neçə şirkət satdığı halda, nazirliyin “tək təchizatçı” seçimi burada açıq suallar yaradır.

Dövlət Vergi Xidmətinin hüquqi şəxslərin dövlət reyestrinə daxil edilən məlumatlarda MMC-nin nizamnamə kapitalı 100 manat, qanuni təmsilçisi İsayev İsmayıl Abdulla oğlu, təsisçisi isə Quliyeva Gülnaz Arif qızının olduğu göstərəlir.

Maraqlıdır kı, MMC-nin dövlətə borcu da var -13742.61 manat.

Dövlət satınalmalarında isə o sahibkarlar iştirak edə bilərlər ki, onlar riskli vergi ödəyicisi qrupuna daxil deyillər. Eləcə də satınalma müqaviləsinin icrası üçün müvafiq sahədə təcrübəsi, zəruri texniki imkan, maddi-texniki baza və müvafiq tələblərə cavab verən işçi qüvvəsi var.

"LEGACY EVENTS MANAGEMENT”in rəsmi səhfəsi belə olmadığı üçün bu tələblərə nə dərəcədə cavab verdiyini müəyyən etmək çətindir./Axar.az/

Bakı şəhəri, Nizami rayonunda fəaliyyət göstərən “Alp Delux” şadlıq evində istehlaka təqdim edilən ətlərdə at DNT-si aşkarlanıb.

Bu barədə Azərbaycan Qida Təhlükəsizliyi Agentliyindən məlumat verilib.

Bildirilib ki, restorana baxış zamanı obyektdə soyuq qəlyanaltıların və isti yeməklərin hazırlanması sahələrində havalandırma sisteminin quraşdırılmadığı, qida ilə təmasda olan səthlərin yuyulabilən və dezinfeksiyaya davamlı materialla üzlənmədiyi, anbar sahəsində tavanda yerləşən su xətlərinin izolyasiya olunmadığı, soyuducu rəflərinin korroziyaya uğradığı müəyyən edilib.

Şübhəli hallar səbəbilə istehlaka təqdim edilən ətlərdən nümunələr götürülərək laborator müayinələrə cəlb edilib. Sınaq nəticəsində nümunələrdə at DNT-si aşkarlanıb. Nöqsanlarla bağlı obyektin rəhbəri barəsində inzibati protokol tərtib edilib. Ətlər dövriyyədən çıxarılaraq istehlaka təqdim olunmasının qarşısı alınıb, icrası məcburi göstərişlər verilib.