Bakı şəhəri, Nobel prospekti 84 ünvanında yerləşən və “Amal” adı ilə fəaliyyət göstərdiyi bildirilən süd məhsulları istehsalçısı barədə bir sıra ciddi iddialar irəli sürülüb.

Xalq-a daxil olan məlumatlarda qeyd olunur ki, şirkətin istehsal etdiyi bəzi məhsulların, xüsusilə də pendirin, etiketlərdə göstərildiyi kimi təbii süddən deyil, quru süddən hazırlandığı iddia edilir. Mənbələrin bildirdiyinə görə, məhsulların tərkibi ilə bağlı istehlakçılara təqdim olunan məlumatlarla istehsalat prosesində istifadə olunan xammal arasında uyğunsuzluqlar mövcud ola bilər.

İddialara əsasən, müəssisənin rəhbəri Firudin adlı şəxsdir. Eyni zamanda qeyd olunur ki, müəssisənin əsas fəaliyyəti daha çox gecə saatlarında həyata keçirilir. Məlumatlara görə bunun istehsal prosesinin şəffaflığı ilə bağlı müəyyən suallar yaratdığını bildirirlər.

Daxil olan məlumatlarda xüsusilə pendir istehsalı sahəsinə diqqət çəkilir. Bildirilir ki, bu istiqamətə Eldar adlı şəxs nəzarət edir. Həmin şəxsin xaricdən quru süd gətirilməsi prosesində iştirak etdiyi də iddialar sırasında yer alır.

Mənbələrin sözlərinə görə, məhsulların üzərində göstərilən standartların istehsalat prosesində tam şəkildə gözlənilmədiyi iddia olunur. Həmçinin qeyd edilir ki, gecə növbələrində təxminən yarım ton pendir istehsal olunur və məhsullar səhər saatlarınadək satış şəbəkələrinə paylanır.

Səsləndirilən iddiaların ciddiliyini nəzərə alaraq, aidiyyəti dövlət qurumlarının məsələni araşdırması, istehsal prosesinin mövcud qanunvericiliyin və qida təhlükəsizliyi standartlarının tələblərinə uyğunluğunu yoxlaması vacib hesab olunur.

Qeyd edək ki, yazıda yer alan məlumatlar r daxil olmuş iddialara əsaslanır. Qarşı tərəfin mövqeyini dərc etməyə hazırıq və şirkətin məsələ ilə bağlı açıqlamasını təqdim edə bilərik.(Xalq.online)

VİDEO LİNKDƏ: https://xalq.online/amal-soru-pendiri-geceler-istehsal-olunur-mehsullar-quru-sudden-hazirlanir

Azərbaycan Respublikasının Dövlət Reklam Agentliyi 255 min manat dəyərində nəqliyyat vasitələrinin satın alınması ilə bağlı tender elan edib. İlk baxışda adi dövlət satınalması kimi görünən bu müsabiqənin sənədlərinə diqqətlə baxdıqda bir sıra maraqlı suallar ortaya çıxır.

Bizimesr.com bildirir ki, tender sənədlərinə əsasən, qurum 10 ədəd nəqliyyat vasitəsi almağı planlaşdırır. Bunun üçün dövlət büdcəsindən 255 min manat vəsait ayrılması nəzərdə tutulur. Sadə hesablamaya görə, hər bir avtomobilin təxmini dəyəri 25 min 500 manat təşkil edəcək.

Lakin tenderin məzmunu ilə tanış olduqda aydın olur ki, dövlət vəsaiti hesabına hansı marka və model avtomobillərin alınacağı barədə açıq məlumat yoxdur.

Avtomobil alınır, amma hansı?

Tender sənədində nəqliyyat vasitələrinin texniki xüsusiyyətləri uzun-uzadı sadalansa da, avtomobilin markası və modeli göstərilmir. Açıqlamada qeyd edilir ki, alınacaq avtomobillər ön hava yastıqları, ABS sistemi, elektron sabitlik nəzarəti (ESC), yoxuşda starta yardım sistemi (HAC), təkər təzyiqinə nəzarət sistemi (TPMS), arxa görüntü kamerası, parklama sensorları, bluetooth, kruiz-kontrol, açarsız daxilolma sistemi və digər funksiyalarla təchiz olunmalıdır.

Bundan əlavə, avtomobilin mühərrik həcmi 1350-1450 kub santimetr, gücü isə 90-100 at qüvvəsi arasında göstərilib. Transmissiya növü kimi isə 4 pilləli avtomatik sürətlər qutusu tələb olunur.

Lakin bütün bu göstəricilərə baxmayaraq, sənəddə avtomobilin hansı sinfə aid olduğu barədə məlumat verilmir.

Məsələn, sedan alınacaq, yoxsa hetçbek, krossover nəzərdə tutulur, yoxsa şəhər tipli minik avtomobili?

Bu sualların heç biri tender sənədlərində cavablandırılmır.

Texniki tələblər konkret modelə işarə edir?

Diqqətini çəkən digər məqam texniki göstəricilərin həddindən artıq detallı olmasıdır. Tenderdə mühərrikin həcmi, gücü, transmissiyası, hətta disklərin ölçüsünə qədər konkret göstəricilər yazılıb. Bununla belə marka və model qeyd edilməyib.

Maraqlıdır, texniki şərtlər bazardakı çoxsaylı avtomobillər üçün hazırlanıb, yoxsa əvvəlcədən seçilmiş müəyyən modelə uyğunlaşdırılıb?

Xüsusilə də 4 pilləli avtomatik transmissiya tələbi maraq doğurur. Çünki son illərdə avtomobil bazarında CVT, 6 pilləli və daha müasir transmissiyalar geniş yayılıb. Bu baxımdan tenderdə göstərilən texniki xüsusiyyətlərin bazardakı məhdud sayda modellərə uyğun gəlməsi ehtimalı istisna edilmir.

Təsnifat kodunda da uyğunsuzluq

Tender sənədlərində diqqət çəkən başqa bir məqam satınalmanın təsnifat kodudur. Belə ki, nəqliyyat vasitələrinin alınmasına dair elan "25121600 – Dəmir yolu və tramvay vaqonları" təsnifat kodu altında yerləşdirilib. Halbuki açıqlamada göstərilən texniki göstəricilər dəmir yolu vaqonuna deyil, minik avtomobilinə aiddir.

Bu səbəbdən satınalma predmeti ilə təsnifat kodu arasında uyğunsuzluq yaranır. Bunun texniki səhv, yoxsa başqa səbəbdən baş verdiyi isə açıqlanmır. Satınalma niyə minik avtomobilləri üçün deyil, dəmir yolu və tramvay vaqonları üzrə təsnifat kodu altında yerləşdirilib?

Dövlət vəsaiti hesabına həyata keçirilən hər bir satınalma ictimai maraq kəsb edir. Xüsusilə də büdcədən yüz minlərlə manat ayrıldığı hallarda şəffaflıq və aydınlıq daha böyük əhəmiyyət daşıyır. Bu baxımdan Dövlət Reklam Agentliyinin 255 min manatlıq avtomobil alışına dair tenderi də yalnız satınalma proseduru deyil, eyni zamanda cavablandırılmalıdır.

Bizimesr.com

Joze Mourinyo Türkiyəni Avropa İnsan Hüquqları Məhkəməsinə şikayət edib.

Bu barədə NTV məlumat yayıb.

Portuqaliyalı mütəxəssisin bu addımı atmasına səbəb Super Liqada çalışdığı dövrdə Türkiyə Futbol Federasiyası tərəfindən ona verilən cəzalar olub.

Mourinyonun həmin qərarlarla bağlı hüquqi müstəvidə mübarizə aparmaq istədiyi bildirilir. Təcrübəli baş məşqçi Türkiyədə çalışdığı müddətdə bir neçə dəfə açıqlamalarına və davranışlarına görə TFF tərəfindən cəzalandırılmışdı.

Qeyd edək ki, Joze Mourinyo Türkiyədə “Fənərbaxça”nı çalışdırıb. Portuqaliyalı mütəxəssis İstanbul klubundakı dönəmində həm yerli hakimlik, həm də federasiya qərarları ilə bağlı sərt açıqlamaları ilə diqqət çəkmişdi.

Bakının Suraxanı rayonu, Qaraçuxur qəsəbəsi, Cəlal Qurbanov küçəsində yerləşən "Pearls Kids" uşaq bağçasının damında qanunsuz tikinti aparıldığı iddia edilir.

Bu azmış kimi, bağçanın ətrafında heç bir təhlükəsizlik tədbirlərinin görülmədiyi bildirilir.

Xezerxeber.az-ın məlumatına görə, tikintinin qanunsuz olması ilə bağlı sosial şəbəkələrdə də paylaşımlar edilib.

Məsələnin təfərrüatlarını öyrənmək üçün üz tutduq həmin bağçaya. Heç bir mühafizə sistemi ilə qarşılaşmadan müəssisənin ərazisinə rahat şəkildə daxil olduq. Bağçanın həyətində gördüklərimizdən isə belə aydın oldu ki, burada tikinti işləri aparılsa da, uşaqların təhlükəsizliyinin təmin olunması ilə bağlı zəruri tədbirlər görülməyib.

Özünü bağçanın direktoru kimi təqdim edən Aynur adlı xanım burada aparılan işlərin tam qanuni olduğunu bildirdi, lakin rəsmi sənəd təqdim etmədi.

Uşaqların təhlükəsizliyi məsələsinə gəlincə, o, körpələrin oyun saatlarında tikintinin dayandırıldığını bildirdi.

Məsələ ilə bağlı Suraxanı Rayon İcra Hakimiyyətindən "Xəzər Xəbər"ə bildirilib ki, icra hakimiyyəti tərəfindən bağça rəhbərliyinə tikinti işlərinin dayandırılması tövsiyə olunub. Həmçinin bununla əlaqədar aidiyyəti dövlət qurumlarına da məlumat verilib. (Xezerxeber.az)

"Müvafiq vəzifəli şəxs və ya qurum tərəfindən araşdırılmasına ciddi ehtiyac duyulur!" "Dia-az" xəbər verir ki, bu çağırışla çıxış edən Neftçilərin Hüquqlarının Müdafiəsi Təşkilatının (NHMT) sədri, tanınmış hüquq müdafiəçisi Mirvari Qəhrəmanlı yetkililəri təcili müdaxiləyə səsləyib. NHMT sədrinin təqdimatında növbəti işçi harayını ictimailəşdiririk. Beləliklə SOCAR çalışanı yazır:
"Müvafiq qaydalar əsasən SOCAR-a tabe olan və dənizdə çalışan neftçilər OPITO standartları üzrə BOSIET və "Stasionar dəniz platformalarında heyət üçün təhlükəsizlik" kurslarına cəlb olunurlar. Həmin təlimlər SOCAR-ın Təlim, Tədris və Sertifikatlaşdırma İdarəsi tərəfindən təşkil edilir. Hər hansı marifləndirici təlimin təşkil olunması təbii ki,təqdirə layiqdir.
Lakin təəssüf hissi ilə qeyd edirəm ki, təlimlərin keçirilməsi zamanı istifadə olunan avadanlıqların və xüsusi geyimlərin vəziyyəti ciddi narahatlıq doğurur. Məlum olduğu kimi, təlim mərkəzi 2017-ci ildə yaradılmış və lazımi avadanlıqlarla təchiz edilmişdir. Lakin hazırda istifadə olunan avadanlıqlar bütünlüklə hələ də 2017-ci ildən qalan köhnə avadanlıqlardır və vaxtaşiri yenilənmir.
Belə ki,
- BOSIET təlimləri zamanı istifadə olunan hidrokostyumlar yararsız vəziyyətdədir. Bütün kostyumlar suya daxil olduqdan sonra su buraxır, nəticədə təlim iştirakçısının hərəkəti və üzmə qabiliyyəti çətinləşir. Bu isə təlimin uğurla başa çatdırılmasına mane olur. Nəzərə almaq lazımdır ki, hidrokostyumların istismar müddəti intensiv istifadə şəraitində orta hesabla 1-3 il, təşkil edir.
Bundan əlavə, istifadə olunan hidrokostyumların, xüsusi ayaqqabıların və yanğından mühafizə kostyumlarının hər istifadədən sonra dezinfeksiya olunmaması ilə bağlı ciddi şübhələr mövcuddur. Bu hal təlim iştirakçıları arasında dəri və göbələk xəstəliklərinin yayılması riskini artırır. Təlimlərdə iştirak etmiş çoxsaylı neftçilərin müxtəlif dəri problemləri ilə üzləşməsinin müşahidə olunması da bu məsələ üzrə dərhal araşdırılma aparılmasını✅ zəruri edir.!
-Yanğın təhlükəsizliyi təlimlərində istifadə olunan xüsusi geyim və ayaqqabıların vəziyyəti də qənaətbəxş deyil. Gigiyenik normalara əməl olunmaması işçilərin sağlamlığı üçün real təhlükə yaradır.
Həmçinin diqqətə çatdırıram ki, 2017-ci ildən etibarən təlim proqramlarında faktiki yenilənmə müşahidə olunmur. Təlim günlərinin sayı artırılsa da, nəzəri materiallar və təqdim olunan məlumatların əhəmiyyətli hissəsi köhnədir. Halbuki OPITO standartları və dəniz təhlükəsizliyi sahəsində beynəlxalq tələblər mütəmadi olaraq yenilənir və tədris proqramlarının da həmin dəyişikliklərə uyğunlaşdırılması vacibdir.
Bu təlim mərkəzi 2017 ci ildə SOCAR tərəfindən inşa edilmiş və bütün vəsaitlər alınmışdır.
Təssüflər olsun ki bu gündə butun avadanlıqlar və dərs proqramı 2017 ci ilə aiddi. Bircə yenilik SOCAR tərəfindən inşa olunmuş su hovuzu Xəzər Dəniz gəmiciliyi idarəsinin balansına kecirilmiş, hal-hazırda isə həmin hovuz SOCAR Təlim İdarəsinə icarəyə verilmişdir
Yuxarıda qeyd olunan halların araşdırılması, istifadə olunan avadanlıqların texniki vəziyyətinin yoxlanılması, gigiyenik normalara əməl olunmasının təmin edilməsi, köhnəlmiş avadanlıqların yenilənməsi və təlim proqramlarının müasir beynəlxalq standartlara uyğunlaşdırılması üçün müvafiq tədbirlərin görülməsi mütləqdir!"
Mirvari Qəhrəmanlı sona bunları qeyd edərək bildirir: "Daxil olunan məlumatda deyilir ki,
- Təlimlər zamanı bir nəfər üçün 800-1200 manat civarında vəsait ödənilir
- İyulun əvvəlinədək təlimdə iştirak etməyənlər dənizə buraxılmayacaq..."
Məsələ diqqətimizdədir...

Dia-az

Goranboy rayonununun Xoylu kənd sakini Anar Sülüymanov redaksiyamıza müraciət edərək bildirir ki, rayonun Xoylu, Qaradağlı və Yolqullar kəndinə gedən ana yolda yaranmış çuxurlar sürücüləri çətin vəziyyətə salıb.

"Dia-az"ın məlumatına görə, vətəndaş deyir ki, sakinlər dəfələrlə bununla bağlı aidiyyatı qurumlara müraciət edib: "2023-cü ildə yolu bərpa edəcəklərinə söz versələr də, bu günə qədər heç bir nəticə yoxdur..."

Şikayətçi deyir ki, yağış yağan kimi nəinki avtomobillər, heç piyadalar da yolu keçə bilmir. O, mətbuat vasitəsi ilə aidiyyatı qurumlara müraciət edərək bu məsəlınin həll olunmasında kənd sakinlərinə kömək etmələrini xahiş edir.şş

Kasıb ailələrin astmalı uşaqları üçün Duzdağ Terapiya Mərkəzində müalicə artıq əlçatmaz olur. Valideynlər deyirlər ki, əvvəllər 700–800 manata başa gələn 10 günlük müalicə indi təxminən 1500 manat tələb edir.
Qalmaq, yemək və prosedur xərclərinin kəskin artması aztəminatlı ailələri çətin vəziyyətə salıb. Xəstələr bildirirlər ki, bu qiymətlərlə ya müalicədən imtina etməli, ya da borca girməli olurlar. Bahalanma təkcə uşaqları yox, astmadan əziyyət çəkən böyükləri də çətin vəziyyətə salıb.
Sumqayıt şəhər sakini Zəfər Bayramov deyir ki, astma və tənəffüs problemindən əziyyət çəkən övladını müalicə üçün Duzdağa aparır. Onun sözlərinə görə, qiymətlərin artması səbəbindən artıq oteldə qalmaq mümkün deyil, kirayə ev tutmaq isə əvvəlki kimi sərfəli olmur:
“Övladımı Duzdağ Fizioterapiya Mərkəzində müalicəyə aparıram. Əvvəllər yaxşı idi, 10 günlük müalicəni birtəhər qarşılamaq olurdu. İndi isə qiymətlər ikiqat artıb. Əvvəllər ikimiz üçün çəkilən xərci indi birimiz üçün çəkirəm. Duzdağ otelində qalmaq, gündə 3 dəfə yemək və müalicə ilə birlikdə bir gün təxminən 145 manata başa gəlir. Halbuki bir neçə il əvvəl eyni xidmətlər üçün gündəlik xərc 70–80 manat idi. Məcbur olub oteldə qalmırıq, ev kirayələyirik. Amma kirayələr də bahalaşıb. Bir neçə il əvvəl 10 günlük kirayə evə 150–200 manat verirdik. İndi həmin evlərə 300–400 manat istəyirlər. Üstəlik, hər gün adambaşına taksiyə də əlavə 5 manat xərc çıxır. Ərzaqlar da bahalaşıb.”
Bakı şəhərində yaşayan Cəfər Məmmədov da Duzdağda müalicə və qalma xərclərinin kəskin artmasından şikayətlənir. O deyir ki, əvvəllər xərci azaltmaq üçün ev kirayələmək mümkün idisə, indi bu variant da sərf etmir:
“Astma xəstəliyindən əziyyət çəkirəm. Bu il üçüncü dəfə müalicəyə getmək istəyirəm. Mərkəzə zəng etdim, qalmaq, yemək və müalicə üçün gündə 145 manat istədilər. Əvvəllər ucuz olsun deyə ev kirayələyirdik. İndi maraqlandım, evlərin də qiyməti qalxıb. Hələ bilet pulu da 120 manat edir, əlavə xərclər də var. Sistemi elə qurublar ki, artıq ev kirayələmək də sərf etmir. Məcbur gedib Duzdağ otelində qalmalısan. Aylıq gəlirim 500 manatdır. Mən 10 günlük müalicəyə 2 min manat necə xərc çəkə bilərəm? Aidiyyəti qurumlar biz xəstələri də fikirləşməlidirlər.”
Pasiyentlər aidiyyəti qurumlardan qiymətlərə yenidən baxılmasını və sosial həssas qruplar üçün güzəştlər tətbiq olunmasını istəyirlər.
"Gündəlik Naxçıvan"

“64 ailənin yaşadığı 4 ümumi yaşayış binası 2022-ci ilin dekabrından sökülüb. 2 ilə başa çatmalı olan yeni tikinti prosesi isə “Xəmsə” şirkəti tərəfindən artıq 4 ildir ki, yubadılır”.

Bu şikayətlə “Qafqazinfo”ya Cəlilabad şəhəri Azərbaycan küçəsində yaşayan vətəndaş Əlisafa Salmanov müraciət edib.

O bildirib ki, razılaşmaya əsasən, sakinlər iki il müddətinə tikiləcək 9 mərtəbəli binada mənzillərlə təmin olunmalı idilər: “Ancaq hələ də ortada heç nə yoxdur. “Xəmsə” şirkəti təkcə binanın bünövrəsini qoymaqla kifayətlənir. Bu müddət ərzində evlərimizin tikintisi üçün dəfələrlə aidiyyəti üzrə narahatlığımızı bildirmişik, ancaq bizə deyirlər ki, “yaxın vaxtlarda tikinti işləri davam etdiriləcək”. Təbii ki, bütün işlər sadəcə sözdədir...”

Evlərinin sökülməsi səbəbindən uzun müddətdir kirayədə qalan şikayətçinin sözlərinə görə, kirayə haqqı məsul şirkət tərəfindən ödənilməli olsa da, son aylarda bu ödənişlərin verilməsi ciddi problemə çevrilib: “Sadəcə bir il müddətində məbləği vaxtında ala bilmişik. Ondan sonra hər ayın sonunda pulu almaq mümkünsüz olub. Bununla bağlı dəfələrlə Cəlilabad Rayon İcra Hakimiyyətinə müraciətlər edilir və orada baxılır. Hətta bəzi ailələrin 3-5 aylıq kirayə haqqı yığılıb qalıb. Bir sözlə, kim daha çox qapı döyürsə, onun səsini məcbur olub eşidirlər. Tək mən yox, bütün sakinlər bu problemlərdən əziyyət çəkir. İstəyirik ki, “Xəmsə” şirkəti razılaşmada qeyd olunduğu kimi evlərimizin tikintisini tez müddətdə başa çatdırsın”.

Məsələ ilə bağlı “Xəmsə” şirkətinin nümayəndəsi olduğu deyilən, Sənan adlı şəxslə əlaqə saxladıq. Lakin o, iddiaları səsləndirən şəxsi tanımadığını və Cəlilabadla heç bir əlaqəsi olmadığını bildirib.

Vətəndaşların kirayə haqqının ödənilməməsi ittihamları ilə əlaqədar isə Cəlilabad Rayon İcra Hakimiyyətinə müraciət etdik. Qurumdan sorğumuza cavab olaraq bildirildi ki, şirkətin rəhbəri Araz Ağalarov may ayının 26-da Cəlilabad şəhərində olub: “Kirayədə yaşayan sakinlərlə görüş baş tutub. Görüşdən sonra sakinlərə kirayə haqqlarının verilməsinə başlanılıb. Həmçinin şirkət tərəfindən bu gün ödənişlərin qalan hissəsi də veriləcək”.(Qafqazinfo)

Bir müddət əvvəl Şamaxı Rayon Mərkəzi Xəstəxanasının direktoru Natiq Əliyevin əmək fəaliyyəti və karyera yüksəlişi ilə bağlı araşdırma yazısı dərc etmişdik. Araşdırma zamanı əldə olunan rəsmi sənədlər və dövlət qurumlarından daxil olan cavablar bir sıra ciddi suallar doğurduğundan məsələ ilə bağlı aidiyyəti qurumlara sorğular göndərilmişdi.Mediatvaz.com xəbər portalı tərəfindən 02 aprel 2026-cı il tarixdə Azərbaycan Respublikasının Maliyyə Nazirliyinə ünvanlanan 10/349 nömrəli sorğuda TƏBİB-in təqdim etdiyi rəsmi məlumatlara istinad olunaraq bir sıra vacib məqamlara aydınlıq gətirilməsi xahiş edilmişdi.TƏBİB-in cavabına görə, Natiq Əliyev 22 iyun 2018-ci ildə Naxçıvan Dövlət Universitetinin “Tibbi profilaktika” ixtisasını bitirib, həmin il “Yoluxucu xəstəliklər” ixtisası üzrə rezidenturaya qəbul olunub və 14 noyabr 2022-ci ilədək rezidentura təhsili alıb.Bununla yanaşı, o, 01 oktyabr 2018-ci ildən Naxçıvan Muxtar Respublikası Xəstəxanasında həkim-rezident kimi fəaliyyət göstərib, 01 yanvar 2020-ci ildən isə Naxçıvan Dövlət Universitetində həkim-rezident vəzifəsində çalışıb. Maraqlıdır ki, eyni dövrdə – 23 iyul 2020-ci ildən 01 iyun 2022-ci ilədək Bakı şəhərində yerləşən Mərkəzi Neftçilər Xəstəxanasında da 0,5 ştat vahidi üzrə əvəzçilik qaydasında həkim-infeksionist kimi işləyib. Daha sonra isə həmin xəstəxanada rəhbər vəzifəyə təyin olunub.Rəsmi sənədlərdə göstərilən bu xronologiya haqlı olaraq sual doğurur: bir şəxs eyni vaxtda həm Naxçıvanda əyani rezidentura təhsili alıb işləyir, həm də Bakı şəhərində həkim kimi fəaliyyət göstərirsə, bu proses praktik olaraq necə həyata keçirilib? Naxçıvanla Bakı arasındakı məsafə hamıya məlumdur. Söhbət qonşu rayonlardan deyil, fərqli inzibati ərazilərdən gedir. Əgər şəxs rezidentura təhsili alırdısa, tədris və praktik məşğələlərdə iştirak necə təmin olunurdu? Əgər Naxçıvanda iş başında idisə, Bakıdakı əmək funksiyalarını necə yerinə yetirirdi? Əgər Bakıdakı vəzifəsinin tələblərini yerinə yetirirdisə, Naxçıvandakı iş və təhsil prosesində iştirakını necə təmin edirdi?Məhz bu səbəbdən Maliyyə Nazirliyinə ünvanlanan sorğuda aşağıdakı suallara cavab istənilmişdi:Eyni vaxtda Naxçıvan və Bakı şəhərlərində paralel əmək fəaliyyəti qanunvericiliyə nə dərəcədə uyğundur?İş vaxtının uçotu hansı qaydada aparılıb? Əmək funksiyalarının faktiki icrası necə yoxlanılıb? Müxtəlif müəssisələrdən alınan əməkhaqları hansı əsaslarla hesablanıb və ödənilib?
Lakin təəssüf ki, sorğunun göndərilməsindən iki aydan artıq vaxt keçməsinə baxmayaraq, Maliyyə Nazirliyindən hələ də heç bir cavab daxil olmayıb.Ortaya çıxan mənzərə isə kifayət qədər düşündürücüdür. Dövlət qurumları vəzifəli şəxslərlə bağlı suallara operativ və şəffaf cavab vermədikcə, cəmiyyətdə şübhələr daha da artır. Çünki burada söhbət təkcə bir şəxsin əmək fəaliyyətindən deyil, dövlət qurumlarında nəzarət mexanizmlərinin necə işləməsindən gedir. Əgər hər şey qanun çərçivəsində baş veribsə, bunun izahı verilməlidir. Əgər verilməyibsə, onda ictimaiyyətin sual vermək haqqı var: Natiq Əliyev eyni vaxtda həm Naxçıvanda, həm də Bakıda necə işləyib?(Mediatvaz.com)
Qarşı tərəfin cavab haqqını tanıyırıq

Masallı rayonundan daxil olan rəsmi şikayət məktubu, bölgədə bəzi ünsürlərin mənəviyyat, qanun və insanlıq hissini necə tamamilə itirdiyini gözlər önünə sərir.
İttihamların mərkəzində dayanan şəxs — Masallı rayonu, Musaküçə bələdiyyəsinin işçisi Eldəniz Kərimovdur.
Qarşıdakı faktlar sadəcə hüquq pozuntusu deyil; bu, dövlətə, xalqa və mənəvi dəyərlərə qarşı açıq-aşkar meydan oxumaqdır! Hüquq-mühafizə orqanları bu rəzalətə dərhal xitam verməlidir!
​Aybəniz İsmayılovanın anasının müəmmalı ölümü və həmin gün baş verənlər insanı dəhşətə gətirir.
Hər gün anası ilə mütəmadi olaraq 50 dəfə əlaqə saxlayan, ona ən yaxın ərazidə işləyən bacı, məhz ölüm günü qəfildən yoxa çıxır və heç bir zəng etmir. Bu təsadüfdür, yoxsa qabaqcadan planlaşdırılmış vicdansızlıq?
​Ən bağışlanılmaz cinayət isə budur: Şikayətçi Aybəniz Ismayılova evə gəlib anasını ölmüş vəziyyətdə taparkən təcili yardım çağırmaq istəyir, lakin Eldəniz Kərimov və onun arvadı vətəndaşın qarşısını kəsərək buna mane olurlar!
İnsan canı tapşırarkən həkim çağırmağa mane olmaq hansı caninin ağlına gələr? Bunun bir adı var: tibbi müdaxilənin qarşısını kəsərək ölümə rəvac vermək!
​Bunun dərhal ardınca evdən 15 000 AZN nağd pulun və bir o qədər dəyərdə qızıl-zinət əşyalarının oğurlanması bu şəxslərin əsl simasını ortaya qoyur. Bu soyğunçuluğu özləri etiraf edib, "hə, biz götürmüşük, verməyəcəyik" deyəcək qədər qudurğanlaşıblar.
Hələ bu da azmış kimi, ananın qırxı çıxmamış ata evinə göz dikib, yetim qalmış bacını hədələyərək qovmaq və evi satışa çıxarmaq mənəvi səfilliyin son həddidir!
​Eldəniz Kərimov təkcə ailə daxilində deyil, dövlət qarşısında da cinayətkardır. Onun Musaküçə bələdiyyəsində rüşvətxorluqla məşğul olması, dövlətin torpaqlarını qanunsuz şəkildə sataraq varlanması barədə rəsmi ittihamlar var.
Zamanında ulu öndər Heydər Əliyevin və cənab Prezidentin şəkillərini cıracaq qədər radikal, anti-dövlət mövqe nümayiş etdirən bu şəxs, hansı haqla və hansı cürətlə bu gün dövlətin bələdiyyə institutunda oturub millətə qan uddurur?
Dövlətin çörəyini yeyib, dövlətin rəhbərinə xəyanət edən, torpaq maxinasiyaları ilə bələdiyyəni talayan bu ünsürün yeri bələdiyyə kürsüsü deyil, dəmir barmaqlıqlar arxasıdır!
​Bu rəzalət zəncirinin ən qorxulu və ən kəskin tərəfi isə insan sağlamlığına yönəlmiş birbaşa qəsddir! Eldəniz Kərimovun qanunsuz əməllərinə şərik olan həyat yoldaşının (şikayətçinin bacısının) HEÇ BİR TİBB TƏHSİLİ YOXDUR!
Amma bu savadsız, diplomsuz və sertifikatsız qadın hazırda harıncasına tibb bacısı kimi fəaliyyət göstərir.
​Bu, sadəcə qanun pozuntusu deyil, bu, kütləvi qırğına rəvac verməkdir!
Tibb elmindən, insan anatomiyasından xəbəri olmayan, diplomu ümumiyyətlə olmayan birinin xəstələrə müdaxilə etməsi cinayətdir. Səhiyyə Nazirliyi, Təbib və hüquq-mühafizə orqanları hara baxır?
Masallı camaatının canı bu saxtakar, təhsilsiz cəlladların əlində oyuncaqdırmı? İnsanların həyatı ilə bu cür oynamağa kim icazə verib?
​Özünü saxtakarlıqla mərhumənin oğlu kimi təqdim edib ölüm arayışı alan, yas məclisinin xərclərini öz cibindən çıxmış kimi göstərib əslində ananın pullarını mənimsəyən Eldəniz Kərimov və onun heç bir təhsili olmayan saxta tibb bacısı arvadı qanun qarşısında diz çökməlidir!
​Baş Prokurorluq, Daxili İşlər Nazirliyi və Səhiyyə Nazirliyi və Təbibə RƏSMİ ÇAĞIRIŞ EDİRİK:
​Eldəniz Kərimovun Musaküçə bələdiyyəsindəki rüşvətxorluq və qanunsuz torpaq satışı cinayətləri dərhal araşdırılsın, fəaliyyətinə xitam verilsin!
​Evdən oğurlanan 15 000 AZN pul, qızıllar və vətəndaşa qarşı edilən hədə-qorxular üzrə dərhal cinayət işi açılsın!
​Heç bir tibbi təhsili olmadan qanunsuz olaraq tibb bacısı işləyən və insan həyatını birbaşa təhlükəyə atan o qadın dərhal vəzifəsindən kənarlaşdırılsın və cinayət məsuliyyətinə cəlb edilsin!
​Dövlətin qanunlarını və vətəndaşın hüquqlarını heçə sayan bu şəxslərin ifşası sona qədər diqqətimizdə olacaq. Heç kim qanundan üstün deyil!
Sima Babayeva
TEREF