Qızıl ticarəti ilə məşğul olan Elnarə Şirməmmədova (Səfərova) həbs edilib.


“Qafqazinfo”nun əldə etdiyi məlumata görə, onun barəsində Cinayət Məcəlləsinin 178.3.2-ci (Külli miqdarda dələduzluq) maddəsi ilə iş açılıb. İş üzrə 9 nəfər zərərçəkmiş şəxs qismində tanınıb.


İttihama görə, E.Şirməmmədova vətəndaşlardan ümumilikdə bir milyon 300 min manata yaxın pulu dələduzluq yolu ilə alaraq ələ keçirib.


Məhkəmə istintaq müddətində Elnarə Şirməmmədovanın həbsdə saxlanılmasına qərar verib.


İş üzrə zərərçəkmiş şəxs qismində tanınmış şəxslər saytımıza müraciət edərək bildiriblər ki, onlara dəymiş zərərin ödənilməsi istiqamətində heç bir addım atılmır. Şikayətçilərin sözlərinə görə, E.Şirməmmədova 9 nəfərdən müxtəlif məbləğlərdə pul alaraq geri qaytarmayıb. Cinayət işində zərərçəkmiş qismində tanınmış şəxslərə müvafiq olaraq 27.120, 3800, 21.300, 3500, 467.000, 112.000, 428.790, 56.826, 134.693 manat məbləğində maddi ziyan vurulması qeyd edilib.


İddia olunur ki, Elnarə Şirməmmədova aldığı pulları geri qaytarmır və müxtəlif bəhanələr irəli sürür: “Biz onun biznesinin olmadığını sonradan öyrəndik. Onunla bizim ailəvi yaxınlığımız olub. Bütün zərərçəkmişlərə yaxın adam olub. Məsələn, bir zərərçəkən qaynıdır, biri xalası qızıdır, aralarında rəfiqəsi və ailə dostları olanlar da var. O, hər kəsə böyük miqdarlarda - 2-3 kiloqram ağırlığında qızılları nümayiş etdirərək, sərgidən alınma bahalı qızıl əşyalarını göstərərək, müxtəlif tanınmış qızıl şirkətlərinin adlarından, qızıl ticarəti ilə məşğul olan Zülfiyyə xanımın adından istifadə edərək, qızıl bazarlarında guya öz satış “polka”larının olduğunu göstərərək inandırıb ponzi sistemi qurmuşdu. Bunu özü də telefon danışığında dəfələrlə etiraf edib. Düşünürük ki, 30 yaşlı bir xanım bu əməlləri təkbaşına törədə bilməz. Çünki Elnarə Şirməmmədova bu əməlləri törədərkən ona kimlərsə kömək etmiş ola bilər. Anası və atası əsas şübhələndiyimiz şəxslərdir. Zərərçəkmişlərdən pul götürərkən anası da bəzi hallarda yanında olub və həmişə anası ilə birlikdə işlədiyini deyib. Sadəcə təqsirləndirilən şəxs özü etiraf etmir”.


Əldə etdiyimiz məlumata görə, 9 nəfərin şikayəti əsasında Səbail Rayon Polis İdarəsində açılmış cinayət işinin ibtidai istintaqı artıq başa çatıb. İş baxılması üçün Bakı Ağır Cinayətlər Məhkəməsinə göndərilib.


Bundan başqa, paytaxt sakini, qızıl biznesi ilə məşğul olan Zülfiyyə Quliyevanın da E.Şirməmmədova barəsində Nəsimi Rayon Polis İdarəsinə şikayət etməsi məlum olub. Z.Quliyeva həmcinsinin ona qarşı 940 min manatlıq dələduzluq əməli törətdiyini bildirib. Hazırda bu şikayət üzrə ayrıca material Nəsimi RPİ-də araşdırılır.


Elnarə Şirməmmədovanın atası, cənub zonasında tanınmış müğənni olan İsmayıl Səfərov mövzu ilə bağlı sorğumuza cavab olaraq bildirdi ki, hazırda məsələ ilə bağlı məhkəmə prosesi keçirilir: “Bunların mənə heç bir aidiyyəti yoxdur. Hazırda məhkəmə prosesi keçirilir. Elnarə xanım heç kimdən pul almayıb, deyilənlərin hamısı şər-böhtandır”.

Suya 1 manat, işığa 1 manat, qaza 1 manat... Gəl yaşa, ay kasıb, belə yerdə deyirlər!" Bu cümlə bu gün Azərbaycan kəndlisinin, torpağa ümid bağlayan sadə vətəndaşın düşdüyü çıxılmaz vəziyyətin ən çılpaq xülasəsidir.
İndi kəndli üçün yaşamaq yox, sadəcə nəfəs almaq belə möcüzəyə çevrilib. Bazardakı kənd təsərrüfatı məhsullarının od tutub yanan qiymətlərinə baxanda insan yaxınlaşmağa qorxur.
Millət artıq dolanmaq üçün yox, sadəcə acından ölməmək üçün kartof-soğan alıb birtəhər gününü yola verir.
​Və bütün bu rəzalətin fonunda yuxarı kürsülərdə əyləşən məmurlar, aidiyyəti qurumlar çıxıb utanmadan bəyanat verirlər:
"Qiymətlər süni şəkildə artırılır!"
​Maraqlıdır, bu qiymətlər necə süni artırılır? Gözünüzü kor, qulağınızı kar etmisiniz?
Kənd təsərrüfatı ilə məşğul olan kənd sakini nə etməlidir? Torpağı əkmək, məhsulu becərmək üçün hər addımda pul ödənilir! Sahəni sulamaq üçün su tapılmır, tapılanda da hər damlası qızıla bərabər qiymətə satılır.
​Bu gün ölkədə kəndlini və kənd təsərrüfatını dirçəltmək əvəzinə, sanki onu tamamilə məhv etmək üçün xüsusi bir plan işə düşüb. Hər addımbaşı, hər qarış torpaqda qarşımıza bir sayğac çıxır.
​Quyu qazırsan – sayğac vururlar!
​Su arxından su götürürsən – sayğac qoyurlar!
​Kanaldan su gəlir – sayğacla ölçürlər!
​Bir o qalıb ki, gəlib insanın boğazına da bir sayğac bağlasınlar ki, aldığımız hər nəfəsə görə də rüsum ödəyək! Paytaxtın küçələrində harda boş yer görürsə, köhnə boyalarla xətləyib milləti soyan "Azparking" hansı prinsiplə işləyirsə, bu gün "Azersu" və digər aidiyyəti su təsərrüfatı qurumları da eyni rəzil sistemə keçib.
Kim hardan, necə və hansı haqla bir damla su tapırsa, rəsmi talançılar dərhal sayğacla başının üstünü kəsdirir.
​Belə bir dözülməz şəraitdə kənd sakini nə etsin? Necə eksin, necə becərsin?
Gübrə od qiymətinə, yanacaq od qiymətinə, su sayğacla və bahalı. Kəndli gecəsini gündüzünə qatıb can qoyduğu məhsulu hansı qiymətə satsın ki, qazancını keçdik, heç olmasa suyun, işığın, torpağın borcu altında əzilməsin?
Qiyməti qaldıranda şəhərdəki kasıb ala bilmir, qiyməti qaldırmayanda kəndli borc içində boğulur, müflis olur, torpağını atıb qaçır. Bəs bu absurd zəncirin sonu hara gedir?
​Açıq görünür ki, bu ölkədə kənd təsərrüfatına, qiymət siyasətinə və ən əsası, monopolist qurumların özbaşınalığına qarşı heç bir nəzarət mexanizmi yoxdur!
​Hər qurum öz kefində, öz çağındadır.
Hər idarə rəhbəri rəhbərlik etdiyi sahəni öz şəxsi feodal mülkü hesab edir. Kəndlinin canı çıxır, torpaq quruyur, ölkə idxaldan asılı vəziyyətə düşür, amma bu qurumların dərdi ancaq və ancaq yeni rüsumlar, yeni qadağalar və yeni sayğaclar uydurmaqdır.
​Bu gedişlə ölkə kənd təsərrüfatının tamamilə iflasına doğru gedir. Əgər bu gün kəndlinin boğazındakı o "sayğac zənciri" boşaldılmasa, sabah bazarlarda nə kartof tapılacaq, nə soğan.
Qurumların bu "kef" dövrünə son qoyulmalıdır, əks halda bu xalqın və kəndlinin ahı o rahat kürsülərinizi başınıza uçuracaq!
Sima Babayeva
TEREF

Prezident İlham Əliyevin müvafiq Sərəncamı ilə Rüfət Cahangir oğlu Hacıəlibəyov səhiyyə nazirinin müavini təyin edilib.

Bu barədə Səhiyyə Nazirliyi məlumat yayıb.

Bildirilib ki, 2022-ci ilin iyul ayından səhiyyə nazirinin səhiyyənin rəqəmsallaşdırılması məsələləri üzrə müşaviri vəzifəsində çalışan Rüfət Hacıəlibəyov bu müddət ərzində ölkənin elektron səhiyyə üzrə milli strategiyasının hazırlanmasına və həyata keçirilməsinə rəhbərlik etmiş, səhiyyə sisteminin rəqəmsal transformasiyası prosesinin əlaqələndirilməsini təmin edib. Səhiyyə nazirinin müavini kimi onun fəaliyyət istiqamətlərinə innovasiyaların tətbiqi, strateji idarəetmə, səhiyyənin rəqəmsallaşdırılması və tibbi statistika sahələri daxildir.

Rüfət Hacıəlibəyov əsas fəaliyyəti ilə yanaşı, Azərbaycanın rəqəmsallaşma sahəsində biznes və akademik mühitinin inkişafında da fəal iştirak edir. O, KOBİA yanında innovativ startapların inkişafı üzrə Ekspert Komissiyasının üzvü kimi fəaliyyət göstərib. 2017-ci ildən etibarən Bakı Mühəndislik Universitetinin Himayəçilər Şurasının üzvüdür.

Azərbaycanda informasiya texnologiyalarının inkişafına verdiyi töhfələrə görə Azərbaycan Prezidentinin 2021-ci il tarixli Sərəncamı ilə "Tərəqqi" medalı ilə təltif edilib.

Azərbaycan Respublikasının Prezidenti İlham Əliyevin 2025-ci il iyunun 23-də Goranboy rayonunda “Konstralab Industries” QSC-nin tikinti materialları istehsalı müəssisəsinin açılışında iştirakı regionun sənaye inkişafı baxımından mühüm hadisə kimi qiymətləndirilmişdi. Qazanbulaq qəsəbəsi yaxınlığında fəaliyyət göstərən müəssisənin ölkənin tikinti sektoruna töhfə verəcəyi, yeni iş yerləri yaradacağı və iqtisadi fəallığı artıracağı bildirilirdi.

Lakin bu gün müəssisəyə aparan avtomobil yolunun vəziyyəti həmin layihə ətrafında ciddi suallar yaradır. Redaksiyamıza daxil olan məlumatlara və gundemxeber.com-un əməkdaşının ərazidə apardığı müşahidələrə əsasən, Gəncə–Goranboy magistral yolundan müəssisəyə çəkilmiş asfalt yolun bir hissəsi qısa müddət ərzində yararsız vəziyyətə düşüb. Yol örtüyündə yaranmış iri çatlar, çökmələr və dağılmış hissələr ərazidə diqqəti cəlb edən əsas problemlərdəndir.
Xüsusilə sel sularının keçdiyi çay yatağı üzərində inşa edilmiş körpü və ona bitişik yol hissəsində ciddi dağıntılar müşahidə olunur. Maraqlıdır ki, həmin ərazidə son dövrdə bu miqyaslı dağıntını izah edə biləcək zəlzələ və ya torpaq sürüşməsi kimi fövqəladə təbii hadisələrin baş verməsi barədə məlumat yoxdur. Bu isə yolun tikintisinin keyfiyyəti, layihələndirmə və icra prosesinin texniki standartlara uyğun aparılıb-aparılmaması ilə bağlı suallar doğurur.
İri dövlət vəsaiti hesabına həyata keçirilən infrastruktur layihələrinin uzunömürlü və dayanıqlı olması əsas tələblərdən biridir. Əgər yeni inşa edilmiş yol cəmi bir il sonra yararsız vəziyyətə düşürsə, bu halda istifadə olunan tikinti materiallarının keyfiyyəti, görülən işlərin texniki normalara uyğunluğu və tikintiyə nəzarət mexanizmlərinin necə işlədiyi araşdırılmalıdır.
Məlumata görə, yol və körpünün tikintisi zamanı Goranboy Rayon İcra Hakimiyyətinin başçısı Məhərrəm Quliyev əraziyə baxış keçirərək görülən işləri yüksək qiymətləndirmişdi. Hazırda isə həmin yolun mövcud vəziyyəti fonunda ictimaiyyət təbii olaraq bu qiymətləndirmənin hansı əsaslara söykəndiyi barədə suallar verir. Əgər yolun qısa müddətdə yararsız hala düşməsi tikinti qüsurlarından qaynaqlanırsa, bunun səbəbləri və məsul şəxslər müəyyən edilməlidir.
Yolun vəziyyəti təkcə nəqliyyatın hərəkətinə maneə yaratmır. Bu, həm də dövlət büdcəsindən ayrılan vəsaitin səmərəli xərclənməsi, infrastruktur layihələrinin keyfiyyətinə nəzarət və vəzifəli şəxslərin məsuliyyəti məsələsini gündəmə gətirir. Dövlət başçısının iştirak etdiyi strateji əhəmiyyətli layihəyə aparan yolun belə vəziyyətə düşməsi cəmiyyətin haqlı narahatlığına səbəb olur.
Məsələnin obyektiv araşdırılması üçün aidiyyəti dövlət qurumlarının əraziyə baxış keçirməsi, yolun və körpünün texniki ekspertizasının aparılması, tikinti prosesində normativ tələblərə əməl olunub-olunmadığının müəyyən edilməsi vacibdir. Əgər pozuntular aşkarlanarsa, qanunvericiliyə uyğun tədbirlərin görülməsi, yolun əsaslı şəkildə bərpası və gələcəkdə analoji halların təkrarlanmaması üçün ciddi nəzarət mexanizmlərinin tətbiqi zəruridir.
İctimai maraq doğuran bu məsələ ilə bağlı aidiyyəti qurumların mövqeyini dərc etməyə və onların rəsmi açıqlamalarını işıqlandırmağa hazırıq.

Gundemxeber.com

QHT-lərə Dövlət Dəstəyi Agentliyinin fəaliyyətini illərdir izləyənlər artıq bir həqiqəti yaxşı bilir: bu qurumun ən uğurlu işi islahat haqqında danışmaqdır. Şəffaflıq, açıqlıq, hesabatlılıq, yeni yanaşma, innovativ idarəetmə...

Bəzi tədbirlərdə iştirakçılardan əlavə köynək gətirmələri xahiş olunur. Məqsəd müxtəlif şəkillər çəkərək guya tədbirin bir neçə gün davam etdiyini göstərməkdir.

Bu sözlər o qədər təkrarlanıb ki, artıq onların praktik nəticə verəcəyinə inanmaq getdikcə çətinləşir. Çünki hər il eyni vədlər verilir, hər il eyni problemlər yaşanır və hər il həmin problemlər yeni bəhanələrlə izah edilir.

Əslində, islahatın mahiyyəti çox sadədir. İşlər əvvəlkindən daha yaxşı təşkil olunursa, qərarlar vaxtında qəbul edilirsə, bürokratik əngəllər aradan qaldırılırsa, vətəndaş və QHT-lər rahat işləyə bilirsə, buna islahat deyilir. Əgər proseslər daha da ağırlaşır, qərarlar gecikir, layihələr yarım ilə yaxın gözlədilir, sonra isə bir neçə həftəyə başa çatdırılması tələb olunursa, bunun adına islahat yox, idarəetmə böhranı demək daha doğru olar.

"Yenixeberorg.com"un 14 may tarixli yazısında diqqətə çatdırmışdıq ki, Agentlik martın 12-də qrant müsabiqəsinin nəticələrini elan etsə də, layihələrin icrasına başlanılmır. Səbəb kimi Ədliyyə Nazirliyindən bildirişlərin alınmaması göstərilirdi. Yazımızdan sonra QHT-lərə ardıcıl mesajlar göndərildi. Bildirildi ki, problem qısa müddətdə həll olunacaq, layihələr dərhal başlayacaq.

Doğrudan da başladı. Amma necə?

Aylarla gözlədilən layihələr iyul ayında, yayın ən isti günlərində, tələm-tələsik icraya buraxıldı. Elə bil altı ay ərzində itirilmiş vaxtın əvəzini QHT-lər çıxmalıdır. Sanki gecikməyə səbəb olan qurum yox, layihəni həyata keçirən təşkilatlardır. Bunu biz demirik, "Yenixeberorg"a problemlərini bölüşən QHT-lər söyləyirlər.

İllərdir Agentliyin rəhbər şəxsləri müxtəlif tədbirlərdə eyni fikri səsləndirirlər. Deyirlər ki, müsabiqələr sentyabr ayında elan olunacaq ki, QHT-lərin layihə hazırlamaq üçün kifayət qədər vaxtı olsun. Nəticələr daha tez açıqlanacaq, icraya daha erkən başlanacaq və bütün proses daha səmərəli olacaq.

Bəs nəticə nə oldu?

QHT-lər layihələrini sentyabr-noyabr aylarında təqdim etdilər. Nəticəni almaq üçün aylarla gözlədilər. Layihələrin rəsmiləşdirilməsi yenə uzandı.

Sonda isə layihələrin böyük hissəsi yay aylarında, minimum müddətdə icra edilməyə məcbur edildi.

İslahat bu işin harasındadır?

Ən qəribəsi isə odur ki, bu vəziyyət heç kimi narahat etmir. Əksinə, hər şey normal proses kimi təqdim olunur. Sanki dövlət büdcəsindən maliyyələşən layihələrin yarım il gecikməsi adi hadisədir. Sanki ictimai fayda daşıyan layihələrin bir neçə həftəyə "yekunlaşdırılması" normal idarəetmə modelidir.

Əgər kimsə bu yazılanların şişirdildiyini düşünürsə, sosial şəbəkələrə nəzər salması kifayətdir.

Bir banner.

Bir təlimçi.

Beş-altı iştirakçı.

Kiçik bir otaq.

Bir neçə foto.

Bir neçə status.

Və bunun adına layihə icrası deyilir!

İştirakçıların üz ifadələrinə baxanda belə hiss olunur ki, onların əksəriyyəti tədbirə hansı mövzuda gəldiyini belə bilmir. Elə bil hansısa idarədən "gedin, bir saat oturun, sonra çıxarsınız" tapşırığı verilib.

Sektorda artıq açıq sirrə çevrilmiş başqa bir mənzərə də var. Bəzi tədbirlərdə iştirakçılardan əlavə köynək gətirmələri xahiş olunur. Məqsəd müxtəlif şəkillər çəkərək guya tədbirin bir neçə gün davam etdiyini göstərməkdir. Əgər layihənin "uğuru" köynək dəyişməklə ölçülürsə, burada artıq ciddi problem var.

Əlbəttə, bütün məsuliyyəti QHT-lərin üzərinə yıxmaq olar. Amma bu, ən asan yoldur.

Sual budur: layihələri aylarla gözlədən kimdir? Sənədləşməni uzadan kimdir?

QHT-ləri iyul ayında tələsik tədbirlər keçirməyə məcbur edən kimdir?

Axı heç bir təşkilat layihəsini iki həftəyə sığışdırmaq istəməz. Heç bir QHT öz nüfuzunu formal tədbirlərlə zədələməkdə maraqlı deyil. İnsanları bu vəziyyətə salan idarəetmə modelidirsə, o zaman tənqid də ilk növbədə həmin modelə yönəlməlidir.

Təəssüf ki, son illər Agentliyin fəaliyyətində təhlükəli bir tendensiya formalaşıb. Mahiyyətdən daha çox görüntüyə üstünlük verilir. Tədbirlər keçirilir, təqdimatlar hazırlanır, çıxışlarda islahatdan danışılır, statistik rəqəmlər səsləndirilir. Amma bütün bu pafosun arxasında ən elementar idarəetmə problemləri həll olunmur.

Dövlət vəsaiti ilə maliyyələşən layihələrin əsas məqsədi sosial şəbəkələrdə şəkil paylaşmaq deyil. Məqsəd cəmiyyət üçün real nəticə yaratmaqdır. Tədbirin neçə şəkli çəkildiyi yox, hansı problemi həll etdiyi önəmlidir. Təəssüf ki, mövcud sistem QHT-ləri nəticə istehsal etməyə deyil, hesabat hazırlamağa sövq edir.

Ən acınacaqlısı isə budur ki, bütün bunlar tədricən normaya çevrilir. Sabah yenə eyni gecikmələr olacaq, yenə eyni izahatlar veriləcək, yenə eyni pafoslu çıxışlar səslənəcək, ilin sonunda isə yenə "uğurla icra edilmiş layihələr" barədə hesabat hazırlanacaq.

Amma cəmiyyət bütün bunları görür. QHT sektoru da görür.

Layihələri həyata keçirən insanlar da görür.

Görünməyən yalnız bir şeydir - illərdir vəd edilən islahatların real nəticəsi.

İslahat sözünü hər çıxışda işlətmək asandır. Çətin olan həmin islahatı idarəetmədə göstərməkdir. Təəssüf ki, bu gün ortada gördüyümüz mənzərə göstərir ki, Agentlik hələ də görüntü ilə nəticə arasındakı fərqi tam anlaya bilməyib.

Çünki islahat odur ki, problemlər azalır.

Burada isə problemlər əvvəl yaranır, sonra onlara bəraət qazandırılır.

Bu isə islahat deyil. Bu, sadəcə dövlət vəsaiti hesabına həyata keçirilən tezbazar layihələr sistemidir.(Yenixeberorg.com)

Qarşı tərəfin cavab haqqını tanıyırıq.