Son günlər bəzi media resurslarında və sosial şəbəkələrdə LOR həkimi Rəşad Məmmədov haqqında yayılan məlumatlara cavab olaraq digər media qurumlarının və sosial şəbəkə istifadəçilərinin paylaşdıqları xəbərlərin "dezinformasiya" olduğu iddia edilir. Həmin yazılarda bildirilir ki, guya pasiyentin şikayəti hüquqi qiymətini alıb, prokurorluq və məhkəmə tərəfindən təmin edilməyib, bununla da məsələ yekunlaşıb.

Lakin məhkəmə materialları, ictimaiyyətə təqdim olunan sənədlər və mövcud faktlar göstərir ki, məsələ təqdim edildiyi qədər birmənalı deyil.

Məhkəmə qərarı həqiqətən nə deyir?

İş materiallarından məlum olur ki, Sadiq adlı vətəndaş "Vip Milan" Hospitalda Rəşad Məmmədov tərəfindən burun əməliyyatı olunub və bunun üçün 3000 manat ödəniş edib.

Pasiyentin iddiasına görə, o, burnundakı çəpər əyriliyinin aradan qaldırılması ilə yanaşı, estetik görünüşünün də yaxşılaşdırılması məqsədilə əməliyyat olunub. Lakin əməliyyatdan sonra burnunda deformasiya yarandığını, sağ hissədə batıqlıq, sol hissədə çapıq və uzunmüddətli keyimə əmələ gəldiyini bildirib.

Bu müraciət əsasında Nərimanov Rayon Prokurorluğu cinayət işinin başlanmasının rədd edilməsi barədə qərar qəbul edib.

Ancaq hüquqi proses bununla bitməyib.

Pasiyent həmin qərardan məhkəməyə şikayət verib.

Bakı şəhəri Nərimanov Rayon Məhkəməsi şikayəti təmin edərək prokurorluğun cinayət işinin başlanmasının rədd edilməsi barədə qərarını ləğv edib və materialları əlavə araşdırmanın aparılması üçün yenidən istintaq orqanına göndərib.

Bu səbəbdən "şikayət təmin edilməyib" və ya "məsələ tam hüquqi qiymətini alıb" kimi fikirlər məhkəmə qərarının tam mahiyyətini əks etdirmir.

Əməliyyat yalnız çəpər əyriliyinə görə aparılıb?

Bəzi media resurslarında Rəşad Məmmədov yalnız LOR həkimi kimi təqdim olunur.

Lakin məhkəmə materiallarında yer alan izahatlar fərqli məqamları ortaya qoyur.

Pasiyent bildirib ki, məqsədi yalnız nəfəsalma problemini aradan qaldırmaq olmayıb. O, burnunun estetik görünüşünün də dəyişdirilməsini istəyib.

Ən diqqətçəkən məqam isə məhkəmədə Rəşad Məmmədovun öz izahatıdır.

Həkim bildirib ki, pasiyentə "xarici burun və burun çəpərinin korreksiyası" əməliyyatı icra olunub.

Məhz "xarici burun korreksiyası" ifadəsi əməliyyatın yalnız funksional müdaxilə ilə məhdudlaşmadığını göstərən əsas detallardan biridir.

Diplomlar hansı ixtisası təsdiq edir?

İctimaiyyətə təqdim olunan diplomlardan görünür ki, Rəşad Məmmədov:

- Azərbaycan Tibb Universitetinin "Müalicə işi" fakültəsini bitirib;

- internaturanı otorinolarinqologiya üzrə keçərək LOR həkimi ixtisası alıb.

Bu sənədlər onun LOR həkimi olduğunu təsdiq edir.

Lakin təqdim olunan sənədlərdə plastik cərrahiyyə üzrə ayrıca ixtisas və ya həmin sahədə peşə hazırlığını təsdiq edən sənəd görünmür.

Bu isə aşağıdakı sualları gündəmə gətirir:

- Xarici burun korreksiyası hansı hüquqi əsaslarla aparılıb?

- Estetik müdaxilə hansı ixtisas çərçivəsində icra edilib?

- Pasiyentə əməliyyatın estetik hissəsi barədə ayrıca razılıq sənədi təqdim olunubmu?

Bu sualların cavabı yalnız aidiyyəti dövlət qurumlarının araşdırması ilə müəyyən edilə bilər.

3000 manatlıq əməliyyat bazar qiymətlərinə uyğundurmu?

Məhkəmə materiallarında göstərilir ki, pasiyent əməliyyata görə 3000 manat ödəyib.

Azərbaycanda aparılan araşdırmalar göstərir ki, burun çəpəri əyriliyinin (septoplastika) əməliyyatlarının qiyməti klinikadan və xidmət paketindən asılı olaraq dəyişir.

Təxmini bazar qiymətləri aşağıdakı kimidir:

- Dövlət xəstəxanalarında – təxminən 800–1500 manat;

- Özəl klinikalarda yalnız septoplastika – 1500–3000 manat;

- Septoplastika ilə birlikdə estetik rinoplastika – təxminən 2500–4500 manat, bəzi hallarda daha yüksək.

Bu müqayisə göstərir ki, 3000 manat yalnız çəpər əyriliyi əməliyyatı üçün bazarın yuxarı qiymət intervalına daxildir.

Əgər əməliyyat zamanı estetik korreksiya da aparılıbsa, bu məbləğ bazar qiymətləri ilə uyğun görünə bilər.

Məhkəmə materiallarında həkimin özünün "xarici burun korreksiyası" əməliyyatı etdiyini bildirməsi də bu məqamı xüsusi diqqətə çatdırır.

"Dezinformasiya" iddiası nə dərəcədə əsaslıdır?

Bəzi media resurslarında digər xəbər saytlarının və sosial şəbəkələrdə yayılan məlumatların dezinformasiya olduğu iddia edilir.

Lakin yayılan xəbərlərin əhəmiyyətli hissəsi:

- məhkəmə qərarına,

- pasiyentin rəsmi izahatına,

- həkimin məhkəmədə verdiyi ifadəyə

istinad edir.

Belə olan halda, hüquqi proses davam etdiyi və məhkəmə prokurorluğun qərarını ləğv etdiyi halda, digər media qurumlarının yaydığı məlumatları ümumilikdə "dezinformasiya" adlandırmaq hüquqi və jurnalist etikası baxımından mübahisəli görünür.

Araşdırılması vacib olan məqamlar

İctimai maraq baxımından aşağıdakı suallar açıq qalır:

- Pasiyentə estetik burun əməliyyatı icra olunubmu?

- Əgər olunubsa, bunu icra etmək üçün hansı ixtisas sənədi mövcuddur?

- "Vip Milan" Hospital estetik burun əməliyyatları üzrə müvafiq lisenziya və icazələrə malik idimi?

- Pasiyentdən 3000 manat hansı tibbi xidmətlərin müqabilində alınıb?

- Əməliyyat müqaviləsində estetik müdaxilə ayrıca göstərilibmi?

- Əməliyyatın videoyazısı, əməliyyat protokolu və tibbi sənədlər bu iddiaları təsdiq edirmi?

Bu sualların cavablandırılması həm ictimaiyyət, həm də hüquqi proses baxımından əhəmiyyət kəsb edir.

Hazırda məlum olan faktlar bunlardır:

- Pasiyent əməliyyatdan narazıdır və sağlamlığına zərər dəydiyini iddia edir.

- Prokurorluq əvvəlcə cinayət işinin başlanmasını rədd edib.

- Nərimanov Rayon Məhkəməsi həmin qərarı ləğv edərək əlavə araşdırma aparılmasına qərar verib.

- Məhkəmə materiallarında "xarici burun və burun çəpərinin korreksiyası" əməliyyatının aparıldığı qeyd olunur.

İctimaiyyətə təqdim edilən diplomlar LOR ixtisasını təsdiq edir, lakin plastik cərrahiyyə üzrə ayrıca ixtisas sənədi bu materiallarda görünmür.

3000 manatlıq ödəniş yalnız septoplastika üçün bazarın yuxarı qiymət həddinə uyğun gəlir və estetik müdaxilənin də həyata keçirildiyi ehtimalını istisna etmir.

Bu yazıda yer alan faktlar hər hansı şəxsin təqsirli olması barədə nəticə kimi təqdim edilmir. Məqsəd məhkəmə sənədlərində və ictimaiyyətə açıq olan məlumatlarda əks olunan məqamları müqayisəli şəkildə təqdim etmək, hüquqi proses tam yekunlaşmamış digər media qurumlarının məlumatlarını ümumi şəkildə "dezinformasiya" adlandırmağın nə dərəcədə əsaslı olduğunu oxucunun diqqətinə çatdırmaqdır. Yekun hüquqi qiymət yalnız səlahiyyətli istintaq orqanlarının və məhkəmənin qəbul edəcəyi qərarlardan sonra verilə bilər.

Tibbmedia.az

Qusar rayonunun ərazisindən keçən Vəlvələ çayında qum-çınqıl hasilatı ilə bağlı ciddi iddialar yayılıb.

Bizimesr.com bildirir ki, yerli sakinlər bildirir ki, çay yatağında aparılan "istismar işləri" nəticəsində təbii tarazlığın pozulduğu, çayın ekosisteminə ciddi zərər dəydiyi deyilir.

Məlumatlarda qeyd edilir ki, Vəlvələ çayı son illərdə müxtəlif şirkətlər tərəfindən qum-çınqıl çıxarılması məqsədilə istismar edilir. İddialara görə, çay yatağından normadan artıq qum və çınqıl götürülməsi çayın təbii axınına təsir göstərib, bəzi ərazilərdə yatağın dəyişməsinə və ətraf mühit problemlərinin yaranmasına səbəb olub.

Sakinlərin bildirdiyinə görə, Qusar bölgəsi üçün mühüm su mənbələrindən biri hesab edilən Vəlvələ çayında aparılan bu qanunsuz fəaliyyətlər kənd təsərrüfatına, su ehtiyatlarına və bölgənin biomüxtəlifliyinə mənfi təsir göstərməyə başlayıb.

Yayılan məlumatlarda qum-çınqıl hasilatı ilə məşğul olan bəzi şirkətlərin - o cümlədən “Azvirt” və “Falkon” MMC-lərin adları hallanır. İddia olunur ki, həmin şirkətlərin çay yatağında apardığı fəaliyyətlər ekoloji tələblərə tamamilə ziddir.

Əraziyə nəzarəti həyata keçirməli olan Ekologiya və Təbii Sərvətlər Nazirliyinin 5 saylı Regional Ekologiya və Təbii Sərvətlər İdarəsi rəhbərliyi isə bu problemlərin yaranmasına əsas verən şəxs kimi göstərilir. Məlumata görə, İdarə rəisi Elnur Cəlilovun baş verənlərdən xəbəri var.

Qeyd edək ki, çay yataqlarından qanunsuz və ya nəzarətsiz qum-çınqıl çıxarılması su axınlarının dəyişməsinə, torpaq eroziyasına və təbii landşaftın pozulmasına səbəb ola bilər.

Sakinlər aidiyyəti dövlət qurumlarından Vəlvələ çayında aparılan işlərin araşdırılmasını, hasilat fəaliyyətlərinin qanuniliyinin yoxlanılmasını və ekoloji tələblərin pozulması faktları müəyyən edilərsə, məsul şəxslər barəsində tədbir görülməsini tələb ediblər.

Məsələ ilə bağlı qarşı tərəflərin mövqeyini dərc etməyə hazırıq.

Bizimesr.com

Bir neçə il əvvəl rayonların birində direktorun məktəbdə corab, kalqotka, bir sözlə "шмотка" satdırdığı barədə məlumatlar yayılmışdı. Sonradan deyəsən, bunu bibarıçılıq hesab edib direktoru vəzifəsindən uzaqlaşdırdılar. Məncə heç yaxşı iş görmədilər. Əslində ölkənin bütün məktəblərində belə "xırda biznes"lə məşğul olan direktorlar, müəllimələr var. Hansısa alverçi "müəllimə" direktora yol tapıb, heç olmasa "bakkuş" satır və ya satdırır.

Amma illər keçdikcə vəziyyət düzəlməyə doğru gedir, daha doğrudu, "шмотка" bazarı qızılla əvəzlənir. Bu həqiqətən də uğurdur...

Oxuyuruq ki, Binəqədi rayonu Azər Məmmədov adına 115 nömrəli məktəbdə qızıl alveri baş alıb gedib. Məktəb sanki Moskva Univermağının bir şöbəsidir, dərs bölgüsü düzgün aparılmır, dərsdənkənar məşğələlərin adı var, özü yoxdur, ayrılan bütün pullar mənimsənilir, ayağı qandallı müəllimin cinayəti gizlədilir, məktəbdə dərsdən başqa hər şey var.

Dərnəklər keçirilmir, şagirdlərin adları var, özləri yoxdur, yalandan yeni sinif açmaq üçün digər siniflərdən şagirdləri yönləndirirlər, siniflər arendaya verilir. Təranə müəllim qızıl alveri ilə Natəvan xanımın satıcılığını edir, Natəvan xanım isə şəxsi mülkünü daha da genişləndirir. Vəzifə səlahiyyətlərindən sui-istifadə edərək qızıl şəbəkəsi yaradır və sairə ilaxır...

Bu məlumatda adı çəkilən nə Təranə müəllimənin, nə də satıcılıq edə Natəvanın uğurudur. Bu əslində elm və təhsil naziri Emin Əmrullayevlə, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktoru Eşqi Bağırovun uğudur

Deməli, təhsil sistemi inkişaf edib. Balaca "corab biznesi" "шмотка" biznesinə, indi isə artıq daha böyük müstəviyə – "qızıl biznesi"nə yüksəlib.

Bəli, bu inkişafdır.

Kalqotka, corab, tuman, şalvar satılan məktəblər qızıla keçibsə, deməli inkişaf var. Əslində, Emin Əmrullayevlə Eşqi Bağırova da elə bu yaraşır – "Qızıl oğlanlar".

Onların rəhbərlik etdiyi təhsil sistemində kalqotka satılmamalıdır. Axı onlar xaricin nüfuzlu universitetlərində təhsil alıblar, qızıl kimi oğlanlardılar. Bu heç biabırçılıq da deyil. Qızıl satmaq niyə biabırçılıq olsun ki?
Təhsil yoxdursa, qızıl var.
Deməli, Azərbaycan təhsili inkişaf edir. Deməli, Emin Əmrullayev kalqotkadan qızıla keçidi təmin edə bilib. Eşqi Bağırov da bu "biznesi" inkişaf etdirib. Yəqin ki, növbəti mərhələdə məktəblərdə brilyant, almaz, bahalı daş-qaş biznesi də qurulacaq.

Bundan yaxşı təhsil siyasəti, bundan böyük elmi inkişaf ola bilərmi?

Təbii ki, xeyr.

Azərbaycan elmi, görünür, elə məktəblərdə satılan qızılların hesabına ayaqda qalacaq. Emin Əmrullayevə bu "fəaliyyətində" uğurlar arzulayıram. Eşqi Bağırova isə daha böyük "biznes layihələri" üçün böyük ürək...

"Qızıl oğlanlar"a eşq olsun!

Azərbaycan təhsilini kalqotka biznesindən çıxarıb qızıl biznesinə gətirə biliblər.

Bu, doğrudan da... əsl "uğurdur".

Bizimesr.com

Azərbaycan Qida Təhlükəsizliyi İnstitutunda (AQTİ) yeni təyinat olub.

Ramazan Nəbiyev AQTİ-nin İdarə Heyətinin sədri təyin edilib.

R.Nəbiyev bu təyinata qədər Azərbaycan Qida Təhlükəsizliyi İnstitutunun İdarə Heyəti sədrinin müavini vəzifəsində çalışırdı.

Qeyd edək ki, o, 2018-2024-cü illərdə AQTA-da müxtəlif vəzifələrdə, o cümlədən İdxal və ixraca nəzarət şöbəsinin və Qida təhlükəsizliyi şöbəsinin müdiri kimi fəaliyyət göstərib. 2024-cü ilin sentyabrından isə AQTİ-də sədr müavini idi.(Oxu.Az)

Culfa rayon Yaycı bələdiyyəsinin sədri vəzifəsində işləmiş Zülfüqarov Zülfüqar Abbas oğlunun qanunsuz əməlləri ilə bağlı cinayət işi başlanıb.

Bu barədə Ədliyyə Nazirliyinin Bələdiyyələrlə İş Baş İdarəsindən Baş Prokurorluğa materiallar daxil olub.

İstintaqla Zülfüqar Zülfüqarovun 2020-2024-cü illərdə qeyd olunan vəzifədə işləyərkən vəzifə səlahiyyətlərindən sui-istifadə etməklə torpaq sahələrinin mülkiyyət və icarəyə verilməsi qaydalarını pozması nəticəsində bələdiyyə büdcəsinə 93 min manatdan artıq məbləğdə zərər vurmasına əsaslı şübhələr müəyyən edilib.

Bundan başqa, ibtidai istintaqın gedişində təqsirləndirilən şəxsin öz qulluq mövqeyindən istifadə etməklə, vəzifəli şəxs kimi xidməti vəzifələrinin icrası ilə əlaqədar özü və üçüncü şəxslər üçün qanunsuz üstünlük əldə etmək məqsədilə bələdiyyənin adından torpaq icarəsi və satışı ilə bağlı bələdiyyə iclas qərarlarına bələdiyyə üzvlərinin adından imza etməsi, həmin sənədləri bələdiyyənin möhürü ilə təsdiqləməsi və sonradan bu sənədlərdən istifadə etməsinə dəlalət edən mötəbər sübutlar əldə edilib.

Zülfüqar Zülfüqarova Azərbaycan Respublikası Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan edilməklə barəsində istintaq orqanının qərarı ilə başqa yerə getməmək haqqında iltizam qətimkan tədbiri seçilib.

Cinayət işi üzrə ibtidai istintaq tamamlanaraq baxılması üçün aidiyyəti üzrə Culfa rayon Məhkəməsinə göndərilib.

Azərbaycanda iyulun 18-də havanın 38 dərəcə isti olacağı gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin yağmursuz keçəcəyi gözlənilir. Mülayim şimal-qərb küləyi əsəcək.

Havanın temperaturu gecə 22-26° isti, gündüz 30-35° isti olacaq. Atmosfer təzyiqi 757 mm civə sütunu, nisbi rütubət isə gecə 70-75 %, gündüz 50-60 % təşkil edəcək.

Azərbaycanın əksər rayonlarında havanın əsasən yağmursuz keçəcəyi, lakin bəzi dağlıq və dağətəyi rayonlarda arabir yağış yağacağı gözlənilir. Ayrı-ayrı yerlərdə leysan xarakterli intensiv olacağı, şimşək çaxacağı, dolu düşəcəyi, gecə və axşam bəzi yerlərdə yağıntıların bir qədər güclənəcəyi ehtimalı var. Gecə və səhər bəzi dağlıq ərazilərdə duman olacaq. Müıayim şərq küləyi əsəcək.

Havanın temperaturu gecə 23-27° isti, gündüz 33-38° isti, dağlarda gecə 14-18° isti, gündüz 22-27° isti olacaq.

Azərbaycanın FIFA referisi Elçin Məsiyev UEFA Çempionlar Liqasının oyununa təyinat alıb.

O, II təsnifat mərhələsində Serbiyanın “Srvena Zvezda” və Şimali İrlandiyanın “Larn” komandaları arasında keçiriləcək cavab görüşünü idarə edəcək.

Məsiyevə yan xətt hakimləri Elşad Abdullayev və Pərvin Talıbov kömək edəcəklər. Dördüncü hakim funksiyasını Əliyar Ağayev yerinə yetirəcək. VAR hakimi Kley Ruperti (Niderland), onun köməkçisi isə Nicat İsmayıllı olacaq.

Qeyd edək ki, iyulun 29-da Belqraddakı “Rayko Mitiç” stadionunda keçiriləcək görüş Bakı vaxtı ilə saat 22:00-da başlayacaq.

Azərbaycanda kolbasa-sosis bazarının keyfiyyəti həmişə şübhə doğurub. Çünki dövlət qurumları kolbasa istehsal edən firmaların qanun pozuntularını dəfələrlə aşkarlayıb. Xüsusən də həmin şirkətlərin mənşəyi bilinməyən ət və toyuq məhsullarından istifadə etdiyi, "halal" sertifikatı adı altında donuz piyi vurulmuş məhsulları satışa çıxardığı və digər qanunsuzluqlar üzə çıxıb. Eyni zamanda, bu gün vitrinlərdə görünüşü bərq vuran kolbasa məhsullarının qiyməti suallar doğurur. Çünki mal və toyuq ətindən hazırlandığı etiketində qeyd olunan həmin məhsulların məcləği olduqca ucuz görünür. Belə desək, hazırda bazarda bir kilo dana əti sümüklü 17, sümüksüz 20 manatdır. Həmçinin, toyuq məhsulları çəkisindən asılı olaraq 6-10 manat civarında satılır. O zaman məşhur şirkətlər mal və toyuq ətindən hazırlanmış kolbasanı necə 6 manatdan 17 manata qədər sata bilər?! Deməli, həmin məhsulların tərkibində ya ət yoxdur, ya da mənşəyi bilinməyən, yaxud xəstə, qoca ətdən hazırlanmış kolbasa məhsullarıdır. Bu da vətəndaşları aldatmaq, onların sağlamlığına təhdid yaratmaqdır. Halbuki dünyada, onun bir parçası olan Azərbaycanda bu gün qida təhlükəsizliyi ən mühüm məsələdir.

Anaxeber.info.az sadalanan bu detallardan, xüsusən də bu günlərdə Bakıxanov qəsəbəsində ev şəraitində kolbasa-sosis hazırlayan şəxsin ifşasından çıxış edərək bəzi müşahidələri diqqətə çatdırmaq qərarına gəlib.
Belə ki, aparılan araşdırmalar, vətəndaşların sosial şəbəkələrdə yazdığı məlumatlardan irəli gələrək kolbasa-sosis bazarında həyəcanlı vəziyyət yarandığını söyləmək olar.
Məsələn, marketlərdə 7.88 manata satılan "Kral" kolbasa məhsulları var. Bu şirkət uzun illərdir ki, fəaliyyətdir. Amma onun kolbasa məhsulları ya həmişə endirimə qoyulur, çünki satılmır, ya da çox ucuz qiymətə təklif olunur. Deməli, "Kral" barəsində təftişə və Qida Təhlükəsizliyi Agentliyi tərəfindən şirkətin məhsullarındakı keyfiyyəti yoxlamağa zərurət var. Necə ola bilər, ətin kilosu 17 manat, ətdən hazırlandığı deyilən "Kral" kolbasası 7.88 manata? Bəlkə onun tərkibində elə ətdən başqa hər şey var?

Bundan başqa, "Kral" sosisləri 11 manatdır. Bəs buna necə ola bilər? Hansı məhsullar hesabına hazırlanır?

Həmçinin, "Ovqat", "SAB",, "Cənnət", "Halal Zəhmət", "Hicaz", "Rosko",
"Çerkizovo", "Ovçular" və digər şirkətlər "Kral"dan geri qalmır. Hazırda bu firmaların əksəriyyəti endirimlə satışda olan kolbasa-sosislərinin qiyməti suallar yaradır. Axı 8-12 manat arası satılan bu məhsulların tərkibinə nə vurulur?
Məsələn, "Ovqat" və digər firmalar 11-12 manata qoyun ətinin kolbasasını satır. Bəs bazarda qoyun əti neçəyədir? Təbii ki, 20 manatdan yuxarıdır. Deməli, ortada saxtakarlıq var və bu faktlar dövlət orqanlarının araşdırmasını zəruri edir. O baxımdan, AQTA və digər müvafiq qurumlar məşhur firmaların işində yoxlamalar apara bilər. Söhbət hamının sevimli qidası olan, xüsusən uşaqların ən çox yediyi məhsullardan gedir. Bu vəziyyət isə ondan xəbər verir ki, genofondumuz darmadağın edilir. Söz dövlətin orqanlarınındır...(Anaxeber.info.az)

ABŞ Prezidenti Donald Tramp ölkənin seçki sisteminin kiberhücumlar, manipulyasiya və xarici müdaxilələr qarşısında ciddi şəkildə həssas olduğunu bəyan edib.

Tramp bunu Ağ Evdən xalqa müraciətlə çıxışında deyib.

“Bu gecə seçki sistemimizdəki ciddi boşluqları üzə çıxaran mühüm kəşfiyyat məlumatlarının dərhal açıqlanacağını elan edirəm”, – o bildirib.

ABŞ liderinin sözlərinə görə, həmin sənədlər seçki sisteminin indiyədək görünməmiş səviyyədə kiberhücumlara, sui-istifadəyə və xarici müdaxiləyə açıq olduğunu göstərir.

Tramp həmçinin qeyd edib ki, sözügedən məlumatlar uzun illər ictimaiyyətdən gizlədilib və bu məsələyə görə keçmiş prezidentlər Co Bayden və Barak Obamanı tənqid edib.

O, Çinin 2020-ci ildən etibarən 220 milyondan çox amerikalı seçicinin məlumatlarını əldə etdiyini və bunun ABŞ tarixində ən böyük seçki məlumatı sızmalarından biri olduğunu irəli sürüb.

Trampın sözlərinə görə, bəzi kəşfiyyat qurumları Çinin ABŞ seçkilərinə mümkün müdaxiləsi ilə bağlı məlumatları gizlətməyə çalışıb.

Prezident əlavə edib ki, Federal Təhqiqat Bürosunun (FTB) topladığı ilkin məlumatlara əsasən, Çin hökumətinin ABŞ seçkilərinə təsir göstərmək üçün müxtəlif üsullardan istifadə etdiyi ehtimal olunur.

Donald Tramp bildirib ki, Çin, Rusiya, İran, Şimali Koreya və digər aktorlar ABŞ-nin seçki infrastrukturuna müdaxilə etmək imkanına malikdir.

Onun sözlərinə görə, Daxili Təhlükəsizlik Departamentinin araşdırması nəticəsində ABŞ seçkilərində səs vermək üçün qeydiyyatdan keçmiş təxminən 278 min xarici vətəndaş müəyyən edilib.

“Bu açıqlamalar göstərir ki, seçki sistemimiz o qədər kövrək və həssasdır ki, onu müdafiə etmək mümkün deyil. Yüz milyonlarla seçicinin məlumatı xarici hökumətlərin əlindədir, səsvermə və səslərin sayılması sistemləri isə kiberhücumlara və manipulyasiyalara açıqdır”, – deyə Tramp vurğulayıb.

ABŞ Prezidenti ölkədə etibarlı və şəffaf seçki sisteminin yaradılması üçün həm demokratların, həm də respublikaçıların birgə fəaliyyət göstərməsinin vacib olduğunu bildirib.

Bu çərçivədə Tramp noyabrda keçiriləcək aralıq seçkilər öncəsi Konqresi “Amerikanı Xilas Et” adlı qanun layihəsini mümkün qədər tez qəbul etməyə çağırıb.

Sənəd səsvermə zamanı şəxsiyyətin məcburi təsdiqlənməsini və poçt vasitəsilə səsvermənin məhdudlaşdırılmasını nəzərdə tutur.