Tanınmış şair Səxavət Kəlbəcərli Azərbaycan Respublikasının Prezidenti İlham Əliyevə rəsmi müraciət ünvanlayıb. Şair müraciətində Ramiz Mehdiyevlə bağlı başlayan hüquqi proseslər fonunda yüksək vəzifəli şəxs Cavid Qurbanovun da fəaliyyətinin və xaricdəki böyük sərvətinin təcili araşdırılmasını tələb edib.

Səxavət Kəlbəcərli dövlətimizin 44 günlük Vətən müharibəsində qazandığı tarixi Zəfəri və ərazi bütövlüyünün bərpasını yüksək qiymətləndirərək bildirib ki, bu böyük uğurlara kölgə salan, dövlət vəsaitlərini mənimsəyən hər bir şəxs qanun qarşısında cavab verməlidir.

"Ramiz Mehdiyevə tətbiq olunan hüquqi prinsip Cavid Qurbanova da tətbiq edilməlidir!"

Müraciətdə vurğulanır ki, AMEA-nın keçmiş prezidenti Ramiz Mehdiyev barəsində dövlətə xəyanət və hakimiyyəti zorla ələ keçirmə cəhdi ilə yanaşı, vəzifə səlahiyyətlərindən sui-istifadə və cinayət yolu ilə əldə edilmiş əmlakın leqallaşdırılması ittihamları da var. Şair sual edir: Əgər eyni qanunsuzluqlar başqa məmurlar tərəfindən də törədilibsə, niyə onlar kənarda qalmalıdır?

Səxavət Kəlbəcərli uzun illər mühüm dövlət postlarında çalışmış Cavid Qurbanovun fəaliyyətinin hərtərəfli təftiş olunmasını istəyir. Müraciətdə xüsusilə aşağıdakı məqamların araşdırılması xahiş olunur:

Dövlət vəsaitlərinin mənimsənilməsi iddiaları: Cavid Qurbanovun rəhbərlik etdiyi qurumlarda büdcə vəsaitlərindən istifadə qaydaları;

Qanunsuz varlanma: Böyük biznes şəbəkəsinin və nəhəng əmlak sərvətinin hansı mənbələr hesabına formalaşması;

Birləşmiş Ərəb Əmirliklərindəki (BƏƏ) mülklər: Xarici ölkələrdə, xüsusən Dubayda olduğu iddia edilən dəbdəbəli əmlakların rəsmi gəlirlərlə uyğunluq təşkil edib-etməməsi.

"Tələbim obyektivlik və şəffaflıqdır"

Şair bildirib ki, heç kimi məhkəmə hökmü olmadan təqsirli elan etmək niyyətində deyil. Lakin qanun qarşısında hamı bərabər olmalıdır:

"Tələbim yalnız budur ki, yüksək vəzifələrdə çalışmış şəxslərin fəaliyyəti və sərvətlərinin mənşəyi qanun qarşısında obyektiv, şəffaf və eyni prinsiplər əsasında araşdırılsın. Cavid Qurbanov barəsində də dövlət vəsaitlərinin mənimsənilməsi və vəzifə səlahiyyətlərindən sui-istifadə faktları təsdiqlənərsə, cinayət işi başlanılmalı və hüquqi qiymət verilməlidir."

Müraciətin rəsmi strukturlar tərəfindən necə cavablandırılacağı və Cavid Qurbanovun fəaliyyəti ilə bağlı yeni hüquqi addımların atılıb-atılmayacağı ölkə ictimaiyyətinin diqqət mərkəzindədir.

Yazıda adıçəkilən şəxslərin də mövqeyini denləməyə hazırıq.

Gundemxeber.org

Müasir dövrdə mobil telefon və aksesuarların kreditlə satışı geniş yayılsa da, bu sahədə istehlakçıların aldadılması, üzərlərinə xəbərsiz öhdəliklərin qoyulması və hüquqlarının kobud şəkildə pozulması halları səngimək bilmir.

Redaksiyamıza müraciət edən Abşeron rayonu, Xırdalan şəhər sakini Bəşirova Aysel Bəybala qızı “Mobifon” MMC tərəfindən üzləşdiyi ciddi haqsızlıqlar və təzyiqlərlə bağlı “Azad İstehlakçılar” İctimai Birliyinə (AİİB) şikayət ərizəsi ünvanlayıb.

İddiaya görə, Aysel Bəşirova 2026-cı ilin aprel ayından etibarən “Mobifon” MMC-nin müştərisidir və əvvəllər aldığı "iPhone 16 Pro Max" model telefonun kredit ödənişlərini vaxtlı-vaxtında həyata keçirib. Problem isə cari ilin sentyabr ayının 16-da, vətəndaşın yaxını ilə birgə şirkətin “28 May” filialına müraciət etməsi ilə başlayıb.

Yaxını üçün ikinci əl "iPhone 14 Pro Max" telefonunu kreditlə rəsmiləşdirən zaman satıcılar vətəndaşa psixoloji təsir göstərərək, sənədləri ətraflı oxumağa imkan vermədən tez bir zamanda imzalatdırıblar. Ən böyük aldatma isə aksesuar təqdimatı zamanı baş verib. Satıcılar vətəndaşın istəmədiyi halda "AirPods 4" qulaqlığını gətirərək bunun telefonun yanında “hədiyyə” olduğunu bildiriblər. Lakin vətəndaş evə qayıtdıqda sənədlərə diqqət yetirib və məlum olub ki, həmin "hədiyyə" qulaqlıq üçün onun adına 675 manat dəyərində ayrıca kredit müqaviləsi və ödəniş qrafiki tərtib edilib.

Bundan başqa, müştərinin iradəsinin əleyhinə olaraq telefon başlığı, qoruyucu şüşə və digər aksesuarlar məcburi şəkildə paketə əlavə edilib, göstərilməyən “proqram təminatı” xidmətinə görə əlavə 30 manat yazılıb və ən əsası, satılan mallara heç bir rəsmi zəmanət talonu verilməyib. Müqavilə bağlandıqdan dərhal sonra satıcılar həmin gün 120 manat ilkin ödəniş edilməsini tələb ediblər. Vətəndaş əvvəlcədən gəlir imkanlarının məhdud olduğunu və həmin gün ödəniş edə bilməyəcəyini vurğulasa da, bu diqqətə alınmayıb. Növbəti günlərdə isə şirkətin məsul şəxsləri tərəfindən vətəndaşa qarşı görünməmiş təzyiq mexanizmi işə salınıb.

120 manatlıq ödənişin gecikməsi bəhanə edilərək müştərinin adına olan, ödənişlərində heç bir problem yaşanmayan əvvəlki "iPhone 16 Pro Max" və yeni alınan telefon məsafədən bloklanıb. Qurğularda "oğurluq siqnalı" aktivləşdirilib və ödəniş edilməyəcəyi təqdirdə telefonlardakı şəxsi məlumatların 1 saat ərzində tamamilə silinəcəyi hədəsi gəlib. Məcburiyyət qarşısında qalan vətəndaş başqa bir yerdən kredit götürərək 129 AZN ödəniş etmək məcburiyyətində qalıb.

Şikayət ərizəsindən aydın olur ki, “Mobifon” MMC “İstehlakçıların hüquqlarının müdafiəsi haqqında” Azərbaycan Respublikasının Qanununun bir neçə maddəsini kobud şəkildə pozub. İlk növbədə istehlakçının məlumat almaq hüququ tapdalanıb; qiymət, əlavə faizlər, rüsumlar və şərtlər barədə əvvəlcədən tam və dürüst məlumat verilməyib. Eyni zamanda, əlavə aksesuarlar və icra olunmayan xidmətlər vətəndaşa məcburi şəkildə qəbul etdirilib. Satış zamanı mövcud qanunvericiliyə zidd olaraq “malı heç bir halda geri qaytara bilməzsiniz” məzmunlu akt imzalatdırılıb və satılan mallara zəmanət talonu təqdim edilməyib. Ən əsası isə bir öhdəliyin gecikməsinə görə tamamilə ayrı müqaviləyə aid olan və vaxtında ödənilən digər əmlakın (telefonun) bloklanması və məlumatların silinməsi ilə hədələnməsi tamamilə hüquqi əsassızlıqdır.

Vətəndaşın tələbi nədir?

Aysel Bəşirova AİİB sədri Eyyub Hüseynovdan və aidiyyəti dövlət qurumlarından məsələyə müdaxilə etmələrini xahiş edir. Vətəndaş "hədiyyə" adı ilə aldadılaraq rəsmiləşdirilən "AirPods 4" qulaqlığının kredit müqaviləsindən çıxarılmasını və geri alınmasını tələb edir. Bundan başqa, qanunsuz tərtib edilmiş “malı geri qaytarmamaq barədə” aktın ləğv olunması, satılmış mallara dair rəsmi zəmanət talonlarının verilməsi və icra olunmayan 30 manatlıq “proqram təminatı” haqqının ləğvi istənilir. Vətəndaş həmçinin, əhalinin oxşar aldatma halları ilə qarşılaşmaması üçün satış şəbəkəsi barədə aidiyyəti dövlət orqanları tərəfindən hüquqi tədbirlərin görülməsini xahiş edir.

Məsələ ilə bağlı qarşı tərəfin də mövqeyini dərc etməyə hazırıq.

Musavat.com

Tibb müəssisəsində qanunvericiliyin tələblərinin pozulması faktları ilə bağlı inzibati tədbirlər görülüb.


Bizimesr.media xəbər verir ki, Baş Prokurorluğun məlumatına görə, “Kristal Estetik” klinikasında həyata keçirilmiş gözüstü dəri artıqlığının götürülməsi prosedurundan sonra şəxsin səhhətinə zərər vurulması barədə daxil olmuş müraciəti əsasında rayon prokurorluğunda araşdırma aparılıb. 


Araşdırma zamanı “Kristal Estetik” MMC tərəfindən vətəndaş Aytəkin Musayevanın əmək müqaviləsi qanunla müəyyən edilmiş qaydada hüquqi qüvvəyə minmədən kosmetoloq vəzifəsi üzrə işlərin yerinə yetirilməsinə cəlb olunması müəyyən olunub. 


Bundan əlavə, A.Musayevanın ali tibb təhsilinin olmadığı, habelə vətəndaşa tətbiq edilmiş prosedurla bağlı tibbi sənədləşmənin aparılmadığı müəyyən edilib.


Faktla bağlı Xətai rayon prokurorluğunda “Kristal Estetik” MMC və cəmiyyətin direktoru Roza Əliyeva barəsində İnzibati Xətalar Məcəlləsinin 192.1-ci (əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri işlərin (xidmətlərin) yerinə yetirilməsinə cəlb edilməsi) maddəsi, həmin Məcəllənin 215.4-cü (ali və ya orta ixtisas tibb təhsili olmayan, habelə qanunda nəzərdə tutulmuş sertifikasiya şəhadətnaməsi olmayan və ya qüvvədə olmayan şəxslərin praktik tibb fəaliyyətinə buraxılması) maddəsi ilə inzibati xəta haqqında işlər üzrə icraat başlanaraq baxılması üçün Xətai Rayon Məhkəməsinə göndərilib.


Məhkəmənin qərarları ilə “Kristal Estetik” MMC İXM-nin 192.1-ci maddəsi ilə 20 min manat, 215.4-cü maddəsi ilə 6 min manat, cəmiyyətin direktoru R.Əliyeva isə həmin Məcəllənin 192.1-ci maddəsi ilə 3 min manat məbləğində inzibati qaydada cərimə edilib.


Bizimesr.media

“İyun ayından bəri Masallı rayonu Miyankü kənd Nadir Aslanov adına tam orta məktəbin transformatoru partlayıb, hələ də düzəldilməyib...”.
Bu şikayətlə “Qafqazinfo”ya övladları həmin məktəbin şagirdi olan valideynlər müraciət edib.
Onlar bildirib ki, aylar öncə baş verən problem tədris ili başladıqda da həll olunmayıb: “Məktəbdə nə işıq var, nə də su. Düşündük ki, dərslər başlayanda vəziyyət düzələcək, düzəlməyibmiş. Uşaqlar çox əziyyət çəkir, otaqlar qaranlıqdır”.
Valideynlər həmçinin qeyd edib ki, bu hadisə nəticəsində məktəbdə anti-sanitar vəziyyət yaranıb: “Təssəvvür edin ki, şagirdlər saatlarla məktəbdə olur, ancaq su yoxdur. Çox pis haldır, biz uşaqlarımızın gigiyenasından çox narahatıq. Hazırda məktəbdə su olmadığı üçün anti-sanitar vəziyyət hökm sürür. Dəfələrlə müvafiq qurumlara müraciət etmişik, ancaq nəticə yoxdur. Ən azından bizə desinlər ki, 5 günə, 10 günə, lap 20 günə gəlib düzəldəcəklər. Onu da demirlər, vəziyyət qeyri-müəyyəndir”.
Məsələ ilə bağlı təhsil müəssisəsi ilə əlaqə saxladıq. Miyankü kənd Nadir Aslanov adına tam orta məktəbdən sorğumuza cavab olaraq bildirildi ki, transformatorun sıradan çıxması və elektrik enerjisi ilə təminatda yaranmış problemin həlli istiqamətində digər aidiyyəti qurumlarla birlikdə zəruri tədbirlər görülür.
“Transformatorun təchizatı müəyyən texniki və təşkilati mərhələlərdən keçir. Məsələ diqqətdə saxlanılır və müvafiq proses yekunlaşdıqdan sonra məktəbin elektrik enerjisi ilə təminatı bərpa ediləcək.Təhsil müəssisəsinin suya olan ehtiyacı kənar mənbələr hesabına təmin edilir”, - məlumatda qeyd edilib.

“İdeal Kredit” bank olmayan kredit təşkilatı (BOKT) və onun vəzifəli şəxsi ümumilikdə 56 min manat cərimələnib.

Banker.az Azərbaycan Mərkəzi Bankına istinadən xəbər verir ki, cərimə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində qanunvericiliyin tələblərinin pozulması ilə bağlı tətbiq edilib.

Bakı şəhəri Nərimanov Rayon Məhkəməsinin qərarı ilə İnzibati Xətalar Məcəlləsinin 598.1.1-ci və 598.1.2-ci maddələrinə əsasən “İdeal Kredit” BOKT 50 min manat, onun vəzifəli şəxsi isə 6 min manat məbləğində cərimə edilib.

Sözügedən maddələr maliyyə institutlarında müştəri uyğunluğu tədbirlərinə, məlumat və sənədlərin saxlanılmasına, eləcə də daxili nəzarət proqramının tətbiqinə dair tələblərin pozulmasını əhatə edir.

Qeyd edək ki, bu, “İdeal Kredit”lə bağlı ilk belə hal deyil. 2025-ci ilin sentyabrında BOKT-un vəzifəli şəxsi həmin Məcəllənin 598.1.1-ci və 598.1.2-ci maddələri üzrə 2 500 manat cərimə edilmişdi.

“İdeal Kredit” 2003-cü ildən fəaliyyət göstərir. BOKT-un nizamnamə kapitalı 646,7 min manatdır. 2025-ci ildə şirkətin təsisçi strukturunda dəyişiklikdən sonra Qubad Qubadov və Eldar Hüseynovun hər biri BOKT-da 50% paya sahib olub.

BOKT 2025-ci ili 3 milyon manat xalis mənfəətlə başa vurub. İlin sonunda aktivləri 24,2 milyon manat, kredit portfeli 22 milyon manat, öhdəlikləri 13,8 milyon manat, balans kapitalı isə 10,4 milyon manat təşkil edib.

Anası infarkt keçirən şəxs Mərkəzi Klinikada üzləşdiyi xoşagəlməz durumdan danışıb.

Təbriz Məmmədov klinikadan şikayətlənib, həkim Firdovsi İbrahimov tərəfindən təhqirlərə məruz qaldığını iddia edib.
"Anam infarkt keçirdi. Gecə saat 2-də öz maşınımla xəstəxanaya apardım. Daha sonra təcili şəkildə Mərkəzi Klinikaya göndərildi. Səhər saatlarında isə məndən əlavə ödəniş tələb olundu. Əvvəlcə məndən 2500 AZN tələb edildi. Etiraz etdikdən sonra məbləğ 1900 AZN-ə endirildi, daha sonra isə 1600 AZN-də dayandı. Mən pul ödəməkdən imtina etmədim. Sadəcə soruşdum ki, bu 1600 manat hansı tibbi xidmətin qarşılığıdır? Əgər sığorta qarşılamırsa, mənə bunu yazılı şəkildə göstərin.
Lakin bu sadə sualın cavabını yazılı şəkildə vermək əvəzinə, Mərkəzi Klinikada həkim Firdovsi İbrahimov tərəfindən mənə qarşı təhqiramiz ifadələr işlədildi.
Mənə deyilən sözləri olduğu kimi yazıram: “Sən bazar adamısan”, “sən alçaqsan”, “şərəfsizsən” və digər təhqiramiz ifadələr.
Mən həkimə qarşı bir dəfə də olsun təhqir işlətmədim. Sadəcə anamın müalicəsi üçün tələb olunan ödənişin rəsmi əsasını soruşdum".
Təbriz Məmmədov iddia edib ki, məsələnin ən ağır tərəfi bundan sonra baş verib:
"Anam infarkt keçirmişdi, ürəyinə müdaxilə olunmuş və stent qoyulmuşdu. Belə ağır vəziyyətdə olan xəstənin yanında mənimlə bağlı “oğlun pulu ödəmir”, “oğlun səni istəmir” məzmununda danışılması mənim üçün qəbuledilməzdir. Mərkəzi Klinikaya insan ən ağır günündə, yaxınını xilas etmək üçün gedir. O anda ailəyə əlavə stress və təhqir yaşatmaq yox, dəstək göstərilməlidir. Mən heç kimdən xüsusi münasibət istəmirəm. Pulsuz xidmət də tələb etmirəm. Pul tələb olunursa — hansı xidmətə görə olduğunu və rəsmi əsasını göstər".
Vətəndaş hadisə ilə bağlı aidiyyəti qurumlara rəsmi müraciət etdiyini bildirib.
Qeyd edək ki, Firdovsi İbrahimov Mərkəzi Klinikanın Kardiologiya şöbəsinin müdiridir.(Xitab24.az)

"Deputat"larından biri "istirahətə" göndərilir

"Naxçıvandan bəlkə də bir çoxlarınızı təəccübləndirəcək maraqlı bir məlumat almışam..." "Dia-az" xəbər verir ki, bunu özünün sosial şəbəkə hesabında jurnalist Heydər Oöuz yazıb.

O daha sonra bildirir: "İddialara görə, Naxçıvan MR deputatlarından birinə öz xoşuyla “ərizə yazıb” mandatından imtina etməsi tapşırığı verilib. Başqa sözlə desək, onu “işdən çıxarıblar”. Deputat nədir, işdən çıxarılmaq nədir, deyə soruşmayın. Türklər demişkən, orası Naxçıvandır və oranın “deputatxana”sının (pis yerə yozmayın, “xana” fars dilində otaq deməkdir və Naxçıvan Ali Məclisi də məktəb şagirdlərinin partalarında əyləşib şagird kimi əl qaldırdıqlarından mədrəsəxana tələbələrinə bənzəyirlər, mən də bu səbəbdən onlara deputatxana uşaqları adı qoymuşam) üzvləri yerli rəhbərlik tərəfindən “seçilirlər”. Elə ona görə də özlərini yaxşı aparmayanda yerli rəhbərlik “deputatxana” uşaqlarından istefa ərizəsi ala bilir. Təbii ki, şifahi qaydada.

Maraqlı burasındadır ki, “istefa ərizəsi” tələb olunan bu şəxs təkcə “deputat” da deyil. Həm də Naxçıvan MR “zəhmətkeşlərinin” guya hüquqlarını qoruyan samballı bir orqanının rəhbəridir. İddialara inansaq, deputat mandatı əlindən əlindən sonra onu rəhbərlik etdiyi idarədən də qovacaqlar.

Adı yoxdur, - deyə soruşmayın. Adı, təbii ki, var. Amma mən Naxçıvan hökumətini qabaqlayıb “rəsmi” məlumat yaymaq istəmirəm. Ümid edirəm ki, yaxın saatlarda və günlərdə Ali Məclisin özü bu barədə məlumat yayar, siz də, mən də bu “etirafı” öz ağızlarından eşidərik..."

Azərbaycan Avtomobil Yolları Dövlət Agentliyinin tabeliyində olan “Bakı 4 №-li Yol İstismarı” MMC-nin rəhbəri Fazil Musayevin işçilərin pulunu ödəmədiyi iddia olunur.
Bu barədə şikayətçi Nizam Mustafayev məlumat verib.
O bildirib ki, Fazil Musayev onun haqqını ödəməkdən boyun qaçırır:
“Yasamal rayonunda yerləşən “Royal Park”ın yanı, sosial evlərə gedən yolun çəkilişi üçün Fazil Musayev məndən ağır tonnajlı maşın və asfaltın örtüyünün alt qatı üçün məhsul istəmişdi. Mən də əvvəlcədən danışdığımız məbləğə əsasən maşını verdim. Lakin bu günə qədər də pulumu verməyib”.
Şikayətçi bildirib ki, o, şirkət rəhbəri ilə bağlı AAYDA-ya müraciət də edib. Lakin maaş ödəməyən MMC rəhbəri ilə bağlı fərqli addım atılıb:
“İşçilərin maaşını verməyən şirkət rəhbəri əslində cəzalandırılmalı idi. Ancaq əksinə olaraq, AAYDA pulumuzu verməyən adamın vəzifəsini yüksəldir”.
Qeyd edək ki, Fazil Musayevin adı mediaya yad deyil. Onun adı müxtəlif qalmaqallarda hallanıb.
Belə ki, havaya qatı və kəskin qoxulu tüstünün buraxılmasına görə Fazil Musayevin “Bakı 4 №-Li Yol İstismarı” MMC-sinə məxsus Balaxanı asfalt zavodu bir neçə dəfə Ekologiya və Təbii Sərvətlər Nazirliyi tərəfindən xəbərdarlıq edilərək cərimələnib.
ETSN-nin xəbərdarlıq və cərimələrinə baxmayaraq, Fazil Musayev havaya qatı tüstü buraxan və havanı zəhərləyən asfalt zavodunu işlətməkdə davam edir.
Qeyd edək ki, “Bakı 4 №-Li Yol İstismarı” MMC rəhbəri Fazil Musayev AAYDA-nın keçmiş İdarə Heyətinin sədri Saleh Məmmədova yaxınlığı ilə tanınıb.
İddialara əsasən, məhz bu yaxınlığa görə Fazil Musayev dövlət vəsaitləri hesabına istehsal olunan asfaltın qanunsuz satışını da həyata keçirib.
Xatırladaq ki, iyul ayında Azərbaycan Avtomobil Yolları Dövlət Agentliyinə (AAYDA) məxsus bir sıra yol istismar qurumları ləğv olunduğunu elan edilsə də, siyahıda “Bakı 4 №-li Yol İstismarı” MMC-nin adı yox idi.
tribuna.az

Polisin 2024-cü ildə kibercinayətkarlığa qarşı keçirdiyi genişmiqyaslı əməliyyatla həbs edilən dəstə üzvlərinin məhkəməsi maraqlı hökmlə başa çatıb.

“Qafqazinfo”nun əldə etdiyi məlumata görə, Bakı Ağır Cinayətlər Məhkəməsində təqsirləndirilən şəxslərin hamısına qanunda nəzərdə tutulmuş ən aşağı həddən də az cəza verilib.

İş üzrə milyonçu qardaşlar kimi tanınan Bahadır Qasımov və İkram Qasımov, onların əmisi oğlu Fərhad Quliyev, habelə Cavid Əzizov, Vəli Əliyev, Anar Əhmədov mühakimə olunub.

Onlara cinayət yolu ilə əldə edilmiş pul vəsaitlərinin və digər əmlakın leqallaşdırılması, külli miqdarda gəlir götürməklə qanunsuz sahibkarlıq, habelə valyuta tənzimi qaydalarının pozulması maddələri ilə ittiham irəli sürülüb.

Səbinə Məmmədzadənin sədrlik etdiyi məhkəmə kollegiyası yekunda verilmiş ittihamların kifayət qədər dəlil və sübutla təsdiqləndiyi qənaətinə gəlib. Lakin təqsirləndirilən şəxslərə münasibətdə Cinayət Məcəlləsinin 62-ci (sankisya həddinin ən aşağı həddindən də az cəza təyin etmə) maddəsi tətbiq olunub.

Hökmə əsasən, ötən həftə ev dustaqlığına buraxılan Bahadır Qasımov azadlıqda qalıb. Onun həbsdə keçirdiyi 2 il 11 ay cəzası yetərli sayılıb. Qardaşı İkram Qasımova və əmisi oğlu Fərhad Quliyevə 4 il 6 ay, Cavid Əzizov və Anar Əhmədova 4 il, Vəli Əliyevə isə 3 il həbs cəzası verilib.

Digər güzəşt isə əksəriyyəti İkram Qasımovun özünə, ailə üzlərinə və digər qohumlarına məxsus 200-300 milyon manat dəyərində qiymətləndirilən əmlakla bağlı olub.

100-ə yaxın “Range Rover”, “Bentley”, “Mercedes”, BMW, “Mitsubishi” və digər markalı minik və yük avtomobilləri, Bakıda və bölgələrdə yerləşən villalar, çoxsaylı mənzillər, qeyri-yaşayış sahələri, qayıqlar və digər əmlak üzərindəki həbs qərarı ləğv edilib. Məlumat üçün bildirək ki, təxmini hesablama ilə sadalanan əmlakların ümumi bazar dəyərinin 500 milyon manata yaxın olduğu bildirilirdi.

Yalnız İkram Qasımovun Yasamaldakı ofisindən və yaşadığı evdən götürülmüş 3 milyon manatdan artıq nağd pul, 1 milyon manat dəyərində qızıl-zinət əşyaları, Xızı rayonundakı bağ evi və bir neçə nəqliyyat vasitəsi müsadirə olunub. Müsadirə edilən əmlakın ümumi dəyəri 5-6 milyon manat təşkil edir.

Qeyd edək ki, Bahadır və İkram Qasımovlar xarici ölkələrdən Azərbaycana və əksinə qanunsuz pul köçürmələri həyata keçirməkdə ittiham olunublar. Yasamal rayonunda “Bahadırın bankı” kimi tanınan şirkət vasitəsilə xarici ölkələrə ümumilikdə 254 milyon 409 min 947 manat qanunsuz pul köçürülüb. Bu məbləğdən 2 milyon 500 min manatı xidmət haqqı kimi onlara qalıb.

“Əgər münaqişə şiddətlənərsə, müharibənin coğrafiyasını dəyişdirəcəyik”.


Bunu İran İnqilab Keşikçiləri Korpusunun (SEPAH) sözçüsü Hüseyn Mühibbi deyib.


“Müharibənin coğrafiyasını mütləq dəyişdirəcəyik. Meydana yeni imkanlara malik yeni silahlar yerləşdirəcəyik. Dünya silahlarımızın gücünə və dəqiqliyinə şahid olacaq və heyran qalacaq”, - Mühibbi əlavə edib.


O, yeni hədəflərə yönələ biləcəklərini də qeyd edib: “Hədəflərimizin əvvəlki kimi olması vacib deyil”.


Mühibbi vurğulayıb ki, SEPAH uzunmüddətli müharibəyə hazırdır.