Bakı şəhərinin Sabunçu rayonu, Pirşağı qəsəbəsində — Əjdər Məlikov küçəsi, Pirşağı 70 ünvanında yerləşən obyektin üzərində tikinti işlərinin aparıldığı bildirilir. Məlumata görə, mövcud tikiliyə qanunsuz şəkildə ikinci mərtəbə əlavə olunur.

​Yerli sakinlərin iddialarına əsasən, tikinti işləri ilə bağlı Sabunçu Rayon İcra Hakimiyyətinin tədbir görmədiyi, məsələnin ört-basdır edilməsinə çalışıldığı barədə narahatlıqlar var. Bu iddialar müvafiq qurumlar tərəfindən araşdırılmalıdır.
​Ərazidə aparılan tikintinin qanuniliyinə dair aidiyyəti qurumların açıqlaması vacibdir. Əgər tikinti müvafiq icazələr olmadan həyata keçirilirsə, bu hal şəhərsalma və tikinti qanunvericiliyinin tələblərinə uyğun şəkildə araşdırılmalıdır. Sakinlər məsul qurumların məsələyə aydınlıq gətirməsini və qanun pozuntusu müəyyən edilərsə, müvafiq tədbirlər görməsini gözləyirlər.

Nyus.Az

Mərkəzi Bankın sabiq sədri Elman Rüstəmovun əvvəlki geniş imkanlarının artıq olmadığı haqda iddia yayılıb.

E.Rüstəmovun xaricdəki biznesi də uğursuzluğa düçar olub və övladları artıq Bakıya dönməyə məcbur qalıblar.

Biznes imperiyasının çökməsi E.Rüstəmovu müəyyən addımlara sövq edib. Belə ki, o, məşhur "Platin" restoranını satıb. İddiaya görə, restoran 22 milyon manata satılıb.

Alqı-satqı bir neçə ay öncə həyata keçirilib.

Axar.az

Azərbaycan yeni mərmiatan dron istehsal edib.

"Boran" dronu mərmi və əl qumbaralarının daşınması üçün nəzərdə tutulub və ilk dəfə ADEX-2026-da nümayiş edilir.

"Boran" adlı dron mərmi və əl qumbaralarının hədəfə çatdırılması məqsədilə hazırlanıb.

Dronun üzərində kaset tipli sistem vasitəsilə müxtəlif çaplı sursatların yerləşdirilməsi mümkündür.

Təqdim olunan məlumata görə, dron 60 millimetrlik 10 ədəd, 80 millimetrlik 6 ədəd mərmi və 12 ədəd əl qumbarası daşıya bilir.

Dronun aşağı hissəsində yerləşdirilən kamera vasitəsilə operator ərazini və hədəfi müşahidə edir. Hədəf müəyyənləşdirildikdən sonra sursatlar drondan buraxılır və aparat tapşırığı yerinə yetirdikdən sonra geri qayıdır.

"Bu gün SOCAR əməkdaşlarına SMS vasitəsilə növbəti sorğu göndərdi. Sorğu müxtəlif istiqamətlər üzrə suallardan ibarətdir, sonda isə ümumi qiymətləndirmə və əlavə rəy üçün ayrıca bölmə var. Sorğunun anonim olduğu xüsusi vurğulanır.

Fikrimi həmin bölmədə yazdım, amma onu açıq da bölüşməyi doğru hesab edirəm..."

"DİA-AZ" xəbər verir ki, bunu sözügedən qurumun işçisi Anar Bədəlov qeyd edib.
O daha sonra özünün sosial şəbəkə hesabında belə yazır: "Prinsip etibarilə anonimliyə qarşıyam. Öz işinə və fəaliyyətinə güvənən əməkdaşın rəyini gizlətməsi üçün səbəb olmamalıdır. Sağlam idarəetmə mühitində insan fikrini açıq ifadə edə bilməlidir.
Məni daha çox düşündürən isə başqa məsələdir: belə sorğular əvvəllər də dəfələrlə keçirilib və nəticələr aidiyyəti qurumlara müəyyən mənzərə təqdim edib. Əsas sual budur: bu nəticələr nəyi dəyişib?
Əməkdaşların illərdir səsləndirdiyi problemlər, yəni idarəetmədə obyektivlik, şəffaflıq və ədalət məsələləri praktikada həllini tapmırsa, ən mükəmməl sorğunun da real əhəmiyyəti azalır.

Şəxsi münasibətlərin, tanışlığın və maddi maraqların obyektiv meyarlardan üstün olması təsəvvürü aradan qaldırılmalıdır. Belə təsəvvürlər nə sağlam korporativ mədəniyyətə, nə də şirkətin gələcək inkişafına xidmət edir.

Bununla belə, dəyişiklik imkanına inamımı itirməmişəm. İnanıram ki, SOCAR peşəkarlığın və nəticənin əsas meyar olduğu, müasir beynəlxalq şirkətlərlə müqayisə oluna bilən idarəetmə modelinə doğru inkişaf edə bilər.

Yalnız cavabını gözləyən əsas sual qalır:

Bu dəyişiklik nə vaxt baş verəcək?

Bəlkə də məsələnin mahiyyəti “dəyişiklik olacaqmı?” sualında deyil, onun üçün nə qədər zaman lazım olacağındadır..."

"Allah ara vuran insanlara lənət eləsin. Mənim Cavid Qurbanovla heç bir düşmənçiliyim yoxdur. Bəzi məsələlər aydınlaşdı..." Bunu özünün sosial şəbəkə hesabındakı paylaşımında əslən Kəlbəcərdən olan şair Səxavət Kəlbəcərli qeyd edib.
Cavid Qurbanovla bağrışdığını elan edən şair iddia edir ki, onların arasındakı ədavət, dha dəqiqi, son günlərə qədər onun Cavid Qurbanovu hədəfə almasının səbəbi "ARA VURANLAR" olub. Və bundan sonra olmayacaq...
Şair öz sosial şəbəkə hesabında belə yazır: "Gec də olsa, Dədə Şəmşir ocağının layiqli nümayəndəsi Cavid Qurbanov Qənbər oğlunu səmimi qəlbdən təbrik edirəm. Kəlbəcərli günlər arzulayıram. Təbii ki, Cavid müəllim o tənqidə layiq deyil. Şeytana lənət!
İşlə bağlı sıxıntılar və bəzi yaramaz adamların ucbatından baş verdi. Həyatda hər kəs haqqında tənqid yazmaq olar.
Amma Cavid müəllim haqqında mənim tənqid yazmağım, təbii ki, yaxşı qarşılana bilməzdi.
Kənardan da, el-oba tərəfindən də yaxşı qarşılanmadı, qınaq obyektinə çevrildim.
İnşallah, bir də belə xoşagəlməz hadisələr olmaz.
Yaşasın Kəlbəcər, yaşasın Kəlbəcərin dəyərli oğlanları!
Bütün Kəlbəcərlilərə uzun illər həsrətində olduğumuz, vüsal göz yaşları ilə qovuşduğumuz o torpaqlarda şad, firavan yaşamağı arzulayıram.
Böyük bir töhmətdən azad olduq.
Ali Baş Komandanın rəhbərliyi və şəhidlərimizin qanı, qazilərimizin canı bahasına o torpaqlara döndük.
Biz Kəlbəcərlilərə də ağır zülm oldu. 93-cü ildə oğul oldu xəstə atasını evdə qoydu, vidalaşdı, yola düşdü. Oğul oldu qoca anasını qarın üstündə qoydu, vidalaşdı, yola düşdü.
Bu cür ağrı-acılar yaşadıq və sonda qovuşduq torpaqlarımıza. O ağrılar heç vaxt silinməyəcək yaddaşımızdan.
Bu gündən sonra şəhidlərin ruhuna xatir bir-birimizə hörmətlə, bir-birimizə dayaq olaraq yaşamalıyıq".
"DİA-AZ" qeyd edir ki, buna qədər şair Səxavət Kəlbəcərli Cavid Qurbanovun ünvanına ağır ittihamlar səsləndirirdi. Və maraqlı orasıdır ki, bu ittihamların əksəriyyətində həqiqət payı yetərincə olub. İndi isə Səxavət Kəlbəcərli Cavid Qurbanovla bağlı iddialarını öz sosial şəbəkə hesabından silməklə yanaşı, onunla barışdığını elan edir.
Əlavə edək ki, bəzi rəylərdə bu "BARIŞIĞIN" müvəqqəti olacağı da ehtimal olunur...

DİA-AZ

Bakının Yasamal rayonu, Seyfəddin Dağlı küçəsində yerləşən fərdi yaşayış evinin söküntüsü zamanı tikinti şirkəti ilə mülkiyyətçi arasında kompensasiya məbləğinə görə ciddi qarşıdurma və gərginlik yaranıb.

Real TV xəbər verir ki, münaqişənin səbəbi həmin ünvanda yerləşən Rzayevlər ailəsinin evidir.

Sözügedən sahə illər əvvəl söküləcək ərazi planına düşüb. Daha sonra “Lux Residence” şirkəti burada yaşayan sakinlərlə razılığa gələrək onların evlərini alıb, bir ailədən başqa. Rzayevlər ailəsi ilə şirkət arasında artıq 5 ildən çoxdur danışıqlar gedir. Tərəflər məhz qiymət məsələsində razılığa gələ bilmirlər. Bu illər ərzində məsələ məhkəməyə qədər gedib çıxıb. Evin və ərazidəki tikililərin dəyərinin müəyyənləşdirilməsi üçün ekspertiza aparılıb. Nəticədə, evin sökülməsi qarşılığında 475 min 200 manat kompensasiya məbləği müəyyən edilib. Amma ailə bu rəqəmlə razılaşmır.

Şikayətçi Şəkər Kazımova deyir ki, məhkəmədə onların razılığı olmayan bir qiymət tərtib olunub: “Bəli, xəbərdarlıq edilib, məhkəmə də olub. Gedib məhkəmədə iştirak da eləmişik. Sadəcə olaraq məhkəmədə bizim razılığımız olmayan bir qiymət tərtib olunub. “Lux Residence” tikinti şirkəti o qiymətə bizi evdən məcburi şəkildə çıxartmağa çalışır. 475 min 200 manat evimizin dəyərindən aşağı bir qiymətdir. Mən o qiymətə razı deyiləm. Evdən çıxmaq istəmirəm, amma onlar məni məcburi şəkildə çıxartmağa çalışırlar. Mənim tələb etdiyim qiymət 1 milyon yarımdır”.

Bir tərəfdə ailənin razılığı olmadığı məbləğ, digər tərəfdə isə artıq qüvvədə olan məhkəmə qərarı var. Sakinlər qərarla müəyyən edilən məbləğlə evdən çıxmaq istəmir. Şikayətçilər deyir ki, söhbət sadəcə daş divardan getmir. Bura illərdir yaşadıqları, ata-babadan qalan mülkdür.

“Lux Residence”in hüquqşünası Saleh İskəndərov bildirib ki, qiymət də məhkəmənin dövründə aparılmış ekspertiza nəticəsində müəyyən olunub: “Hansı ki, cavabdehin 80 kvadratlıq evi və 70 kvadratlıq yarımtikilisi var. Buna uyğun qiymət müəyyən olunub və həmin məbləğin də 20 faiz artığı təklif edilib. Yasamal Rayon Məhkəməsi və Apellyasiya Məhkəməsində məsələyə baxılıb, qətnamə dəyişdirilmədən saxlanılıb. Mart ayından etibarən məlumatlıdır ki, qətnamə icra olunmalıdır. Lakin bu günə qədər müxtəlif bəhanələr gətirərək icra eləmir və şirkətdən ümumilikdə milyon yarım kompensasiya tələb edir. Yəni mənzilə çöldən müşahidə apardıqda da, mənzilin təmirinə, ölçüsünə baxdıqda da milyon yarım, əlbəttə ki, əsassız bir tələbdir. Sadəcə vətəndaş belə deyək, əsassız varlanmaq niyyətindədir”.(Real TV)

Daha ətraflı videosüjetdə:

VİDEO LİNKDE : https://ajans.az/news/70617/lux-residence-den-novbeti-sikayet-meni-mecburi-cixarmaga-calisirlar

Naxçıvanda son günlər yaşanan ət qıtlığının ardınca qiymətlər kəskin bahalaşıb. Sakinlərin sözlərinə görə, mal ətinin kiloqramı 16 manatdan 20 manata, quzu ətinin qiyməti isə 17 manatdan 22 manata yüksəlib.

Bu barədə “Gündəlik Naxçıvan”a danışan sakinlər bildirirlər ki, qiymət artımından əvvəl qəssab dükanlarında bir neçə gün ət tapılmayıb. Onların sözlərinə görə, uzun müddət Naxçıvanda ət Bakı ilə müqayisədə daha ucuz satılsa da, son bahalaşmadan sonra qiymətlər demək olar ki, bərabərləşib.

On ildən çoxdur qəssab işləyən Ziya Məmmədov bahalaşmada satıcıların günahı olmadığını deyir. Onun sözlərinə görə, yemin qiymətinin artması heyvandarlıqla məşğul olan fermerlərin xərclərini çoxaldıb:

“Son vaxtlar ət qıtlığı yaranmağa başlayıb. Hər şey kimi yemin də qiyməti qalxıb. Fermerlər üçün sərfəli olmadığına görə heyvanlarını satmaq istəmirlər. Biz də əti baha almağa məcbur qalırıq. Qiymətin qalxması bizim üçün də zərərlidir, çünki sata bilmirik. Əvvəllər kəsdiyimiz əti bir günə satırdıq, indi bəzən üç günə güclə satırıq. Çox vaxt ziyana düşürük. Xeyir-şər mərasimləri olmasa, ümumiyyətlə, ət sata bilmərik”.

Sakinlərdən Kərim Quliyev isə bahalaşmanın daha çox aztəminatlı ailələrə təsir etdiyini bildirir:

“Son vaxtlaradək bazarda ən yaxşı mal ətinin kiloqramı 18 manat idi, topdan isə daha ucuz almaq olurdu. Hüzr yerimiz vardı, həmişə aldığım yerdən ət götürməyə getdim. Dana ətinə 20 manat dedilər, 19 manata verdilər. Əvvəllər həmin əti topdan 16–17 manata, bəzən daha ucuz almaq olurdu. Quzu və qoç əti də daha ucuz idi. Heç olmasa kasıb ailələr ayda bir dəfə bir-iki kiloqram ət ala bilirdilər. İndi isə qiymətə baxıb keçirlər. Əvvəllər qəssablar hər gün təzə ət kəsirdilər, indi təzə ət tapmaq çətinləşib. Çünki baha olduğuna görə sata bilmirlər”.

Bu gün Bakı Ağır Cinayətlər Məhkəməsində “Dənizkənarı Bulvar İdarəsi” Publik Hüquqi Şəxsin İdarə Heyətinin sabiq sədri İlqar Mustafayev, onun köməkçisi Rəşad Bədəlov, “GİRASOL” MMC-nin direktoru Fuad Babayev və digərlərinin cinayət işi üzrə növbəti məhkəmə prosesi keçirilib.
Lent.az xəbər verir ki, proses şahid ifadələri ilə davam edib.
Şahid B.A. 2018-ci ildən “Park Bulvar”da əmək müqaviləsi ilə işlədiyini deyib:
“2020-ci ildə VÖEN açdırdım. Əməkhaqqım 600 manat idi, qış aylarında isə 300 manata endirilirdi. Buna səbəb kimi həmin dövrdə işin zəif olması göstərilirdi. Hazırda da orada işləyirəm. Velosiped və velokartların fəaliyyətinə, həmçinin xəzinəyə nəzarət edirdim”.
Digər şahid Ə.E. bildirib ki, ərazidə yerləşən obyektlərlə müqavilələrin bağlanmasına nəzarət edib.
Onun sözlərinə görə, obyektlərdən toplanan pullar kassa çeki ilə ona təhvil verilib:
“Mən də həmin pulları Fuad müəllimə verirdim. Yayda iş normal olurdu, qışda isə zəifləyirdi. Fuad müəllim əraziyə gətirilən gül və yaşıllaşdırma işlərinə cavabdeh idi. Bəzən Yeni il bəzəkləri üçün ‘Sədərək’dən aldığımız məhsullara görə borcumuz qalırdı”.
Növbəti məhkəmə prosesi oktyabrın 7-si saat 10:00-a təyin olunub.
Xatırladaq ki, cinayət işi Hesablama Palatasından daxil olan materiallar əsasında Baş prokuror yanında Korrupsiyaya qarşı Mübarizə Baş İdarəsində başlanıb.
İttihama əsasən, İlqar Mustafayevin digər şəxslərlə cinayət əlaqəsinə girərək qurumun ərazisindəki qeyri-yaşayış sahələrinin icarəsi, kommersiya obyektləri, gəmi gəzintiləri və başqa fəaliyyət sahələrindən əldə edilən 12 milyon manatdan artıq vəsaiti mənimsəməsinə əsaslı şübhələr müəyyənləşdirilib.
Bundan başqa, onun 1 milyon 800 min manatdan artıq vergini dövlət büdcəsinə ödəməkdən yayındığı, cinayət yolu ilə əldə edildiyi iddia olunan 10 milyon manatdan artıq vəsaiti özü və qohumlarının adına əmlaklar almaqla leqallaşdırdığı bildirilir.
İlqar Mustafayev barəsində həbs, digər təqsirləndirilən şəxslər barəsində isə polisin nəzarəti altına vermə qətimkan tədbiri seçilib. Maddi ziyanın ödənilməsinin təmin edilməsi məqsədilə 11 milyon manatdan artıq dəyəri olan əmlak üzərinə həbs qoyulub.

Şəmkirdə dələduzluq edən məmurlara cinayət işi açılıb.

Lent.az-ın xəbərinə görə, rayon İcra Hakimiyyəti başçısı Aparatında Sosial-iqtisadi inkişafın təhlili və proqnozlaşdırılması şöbəsinin baş məsləhətçisi işləyən 33 yaşlı Fərid Allahverdiyev (şərti adla) və Mənzil İstismarı İdarəsində sahə rəisi olan 64 yaşlı Qədim Rzayev (şərti adla) dələduzluqda ittiham olunublar.

İttihama görə, Qədimin iş yoldaşı Nazim (şərti adla) gəlinini Qarabağlılar kəndindəki kitabxanaya müdir düzəltdirmək istəyib. Həmin şəxs bu niyyətini Qədimə bildirib. Qədim də bunu iclaslardan tanış olduğu Fəridə deyərək, işi həll edə bilib-bilməyəcəyini soruşub. Fərid Allahverdiyev Bakıdakı nüfuzlu tanışlarının sayəsində bu işi yerinə yetirə biləcəyinə söz verib. Bunun üçün o, 5500 manat pul lazım olduğunu Qədimə bildirib. Qədim bu məlumatı deyəndən sonra Nazim həmin məbləği onlara çatdırıb. Pulun 500-ü Qədimə, 5000-i isə Fəridə çatıb. Lakin Fərid Nazimin gəlinini kitabxanaya müdir təyin etmək üçün heç kimlə danışmayıb. Beləcə zərərçəkənin pulunu ələ keçirərək, şəxsi ehtiyaclarına sərf edib.

Fakt əsasında F. Allahverdiyev və Q. Rzayev saxlanılaraq, barələrində Cinayət Məcəlləsinin 178.2.1-ci (dələduzluq qabaqcadan əlbir olan bir qrup şəxs tərəfindən törədildikdə) və 178.2.4-cü (dələduzluq xeyli miqdarda törədildikdə) maddələri ilə cinayət işi başlanıb.

Fərid Allahverdiyev ifadəsində bildirib ki, 2018-ci ildən 2024-cü ilin iyun ayınadək Şəmkir rayon İcra Hakimiyyəti başçısı Aparatında Sosial-iqtisadi inkişafın təhlili və proqnozlaşdırılması şöbəsinin baş məsləhətçisi işləyib. 2024-cü ilin yanvar ayında maddi sıxıntıları olub və borcları artıb. Məhz pula ehtiyacı olduğu üçün məlum cinayəti törədib.

Hər iki təqsirləndirilən şəxs əməlindən peşman lduqlarını və zərərçəkənə dəymiş ziyanı ödədiklərini deyiblər. Fərid Allahverdiyev barəsində aparılan cinayət təqibinə xitam verilməsini, Qədim Rzayev isə barəsində amnistiya aktının tətbiq olunmasını istəyib.

Məhkəmənin qərarı ilə F. Allahverdiyev barəsində açılan cinayət işinə xitam verilib. Q. Rzayev barəsində isə amnistiya aktı tətbiq edilib. Onların hər ikisi məsuliyyətdən azad olunublar.

"Leobank"ın kartdakı qalıq vəsaitə faiz hesablanması ilə bağlı tətbiq etdiyi minimum ödəniş həddi müştəri narazılığına səbəb olub.

Sosial şəbəkə istifadəçiləri "Leobank"ın açıqladığı şərtlərin müştərilərdə yanlış təsəvvür yarada biləcəyini bildirirlər.

Qeyd edilib ki, bankın tariflərində qara Leo kartında 10 manatdan 999,99 manatadək qalıq üçün illik 5% faiz nəzərdə tutulsa da, hesablanmış faiz yalnız 1 manata çatdıqdan sonra ödənilir.

"Leobank"ın rəsmi saytında da göstərilir ki, faizlər kartdakı şəxsi vəsaitin qalığına gündəlik hesablanır, ödəniş isə hər ayın 1-də həyata keçirilir. Qara Leo kartında 10–999,99 manatlıq qalığa illik 5%, 1000 manat və daha yuxarı qalığa isə illik 6% hesablanır. Eyni zamanda, ödəniş üçün minimum məbləğ 1 manat müəyyən edilib.

Şikayətçi Ruslan Əlicanov deyir ki, bir ay ərzində hesablanan faizin 1 manata çatması üçün kartda təxminən 240 manat orta qalıq saxlanılmalıdır. Məsələn, 100 manat qalığa illik 5% dərəcə ilə bir ay üçün təxminən 0,42 manat faiz düşür.

Beləliklə, mübahisə 5%-lik illik faiz dərəcəsinin özündən deyil, hesablanan faizin ödənilməsi üçün 1 manatlıq minimum həddin tətbiqindən qaynaqlanır. Bankın hazırkı rəsmi tariflərində həm 5%-lik dərəcə, həm də “1 manatdan başlayaraq ödəniş” şərti göstərilib.

Leobank hələlik məsələ ilə bağlı hər hansı açıqlama verməyib.

Plat.az