İqtisadiyyat Nazirliyi yanında Əmlak Məsələləri Dövlət Xidmətinin tabeliyində “Daşınmaz Əmlakın Dövlət Kadastrı və Reyestri” publik hüquqi şəxsi printer üçün kartriclərin satınalınması üzrə 14.01.2026-cı ildə başladığı açıq tenderə yekun vurub. Müsabiqənin qalibi “UNİSELL” Məhdud Məsuliyyətli Cəmiyyəti seçilib və tərəflər arasında 618.899,38 manat dəyərində müqavilə bağlanıb. Məlumat satınalmaların portalında 01.05.2026-ci ildə dərc edilib.


Qeyd edək ki, “UNİSELL” Məhdud Məsuliyyətli Cəmiyyəti nəzarət orqanı olaraq Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin 16.01.2025-ci il tarixli Qərarı ilə “UNİSELL” Məhdud Məsuliyyətli Cəmiyyəti etibarsız təchizatçılar siyasına daxil edilib. MMC bir il sonra, yəni 16.01.2026-cı ildə sözügedən siyahıdan çıxarılıb.


Daşınmaz Əmlakın Dövlət Kadastrı və Reyestrinin printer üçün kartriclərin satınalınması üzrə tenderə isə 14.01.2026-cı ildə başlanılıb. Göründüyü kimi dövlət qurumunun tenderə başladığı tarix MMC-nin hələ etibarsız təchizatçılar siyasında olduğu vaxta təsadüf edir. Amma bu təsadüfdürmü?


Qeyd edək ki, medianın 17.01.2025-ci ildə yaydığı məlumata görə “Daşınmaz Əmlakın Dövlət Kadastrı və Reyestrinin 1 saylı Bakı Ərazi İdarəsi kompüter və kompüter avadanlıqlarının satın alınması ilə bağlı tenderə yekun vurub. Məlumata görə, tenderin qalibi “Unisell” şirkəti seçilib. Qurum şirkətdən 247 985,26 manatlıq kompüter və kompüter avadanlığı almağı planlaşdırır. Şirkətin bu tenderdə qalib elan edilməsi maraqlıdır. Çünki “Unisell”in adı etibarsız təchizatçılar siyahısına salınıb. Şirkət 16 yanvar 2025-ci ildən 16 yanvar 2026-cı ilədək dövlət satınalmalarında iştirak edə bilməz. Amma satınalmaların portalı üzərindən apardığımız araşdırma zamanı bu satınalma ilə bağlı məlumat tapa bilməsək də başqa məlumatlar əldə edə bildik.


Belə ki, “Daşınmaz Əmlakın Dövlət Kadastrı və Reyestri” publik hüquqi şəxsinin 17 saylı Yevlax Ərazi İdarəsi tərfindən müxtəlif kompüter avadanlıqlarının alınması üzrə “UNİSELL” MMC ilə 58.000,54 manat məbləğində satınalma müqaviləsi bağlanılıb. Məlumat satınalmaların portalında 11.04.2025-ci ildə dərc edilib.


“Daşınmaz Əmlakın Dövlət Kadastrı və Reyestri” publik hüquqi şəxsinin 8 saylı Cəlilabad Ərazi İdarəsi tərfindən müxtəlif kompüter avadanlıqlarının alınması üzrə “UNİSELL” MMC ilə 54.628,1 manat məbləğində satınalma müqaviləsi bağlanılıb. Məlumat satınalmaların portalında 10.04.2025-ci ildə dərc edilib.


Göründüyü kimi “UNİSELL” MMC etibarsız təchizatçılar siyahısına salından 3 ay sonra belə Daşınmaz Əmlakın Dövlət Kadastrı və Reyestrinə tabeli idarələr tərəfindən qalib seçilib.


Qeyd edək ki, “Dövlət Satınalmaları Haqqında” Azərbaycan Respublikası Qanununun 16-cı Maddəsinə görə: Təchizatçılar bu Qanunun 35.1.4-cü,( təchizatçı birdən artıq təklif təqdim etdikdə və ya birdən artıq təklifdə iştirak etdikdə); 35.1.10 ( satınalmanın keçirilməsi zamanı bir neçə təchizatçı arasında həmin satınalma ilə bağlı hər hansı sövdələşmə həyata keçirildikdə (o cümlədən qiymətin qaldırılmasına yönələn sövdələşmə həyata keçirildikdə) – 35.1.12-ci maddələrində qeyd olunan hallarda həmin halların aşkar edildiyi gündən 5 (beş) iş günü ərzində, satınalma müqaviləsinin icra edilməsindən boyun qaçırılması və ya 1 (bir) təqvim ili ərzində 3 (üç) və ya daha çox satınalmada satınalma müqaviləsinin bağlanmasından imtina edilməsi halında isə 15 (on beş) iş günü ərzində satınalan təşkilatın əsaslandırılmış müraciəti üzrə nəzarət orqanının əsaslandırılmış qərarı ilə etibarsız təchizatçılar hesab olunurlar.


16.4. Pozuntunun ağırlıq dərəcəsindən və təchizatçının əvvəllər belə pozuntuya yol verib-verməməsindən asılı olaraq, onun etibarsız təchizatçıların reyestrində qalma müddəti bu Qanunun 14.2.8-ci maddəsində nəzərdə tutulmuş qayda ilə müəyyən edilir. Təchizatçıların etibarsız təchizatçıların reyestrində qalma müddəti 3 (üç) ildən çox ola bilməz və həmin müddət ərzində təchizatçıların satınalmalarda iştirakına yol verilmir.


Açıq mənbələrdə MMC-nin “UNİSELL” MMC etibarsız təchizatçılar siyahısına salınmasının səbəbi barədə heç bir məlumat yoxdur. Çox güman ki, bu bir neçə təchizatçı arasında satınalma ilə bağlı hər hansı bir qanunsuzluğa yol verdiyinə və ya qiymətin qaldırılmasına yönələn sövdələşmə həyata keçirdiyinə görə olub. İndi kim zəmanət verə bilər ki, MMC satınalmalarda həmin qanunsuzluqlara təkrar yol verməyəcək?


Qeyd edək ki, “UNİSELL” MMC etibarsız təchizatçılar siyahısından çıxarıldıqdan qısa müddət sonra, yəni, 29.04.2026-cı ildə Respublika Sanitariya-Karantin Mərkəzi publik hüquqi şəxsi ilə 534.999,02 manat dəyərində, “Azərbaycan Respublikası İqtisadiyyat Nazirliyinin Tikinti Təchizat Birliyi” Məhdud Məsuliyyətli Cəmiyyəti ilə 222.064,2 manat məbləğində satınalma müqavilələri bağlayıb.


Göründüyü kimi “UNİSELL” MMC etibarsız təchizatçılar siyahısından çıxarıldıqdan qısa müddət sonra ümumi dəyəi 1 375 962 manat olan 3 tenderin qalibi seçilib. Ümumiyyətlə isə, əvvəlki illərdə də MMC Daşınmaz Əmlakın Dövlət Kadastrı və Reyestrinə tabeli idarələr tərəfindən keçirilmiş onlarla tenderin qalib seçilib. Bu isə MMC-nin arxasında duranların İqtisadiyyat Nazirliyində oturduğuna şübhələri artırır.


Maraqlıdır, həm etibarsız təchizatçılar siyahısında olanda, həm də həmin siyahdan çıxarıldıqdan sonra “UNİSELL” MMC-yə satınalmalarda bu şəraiti kimlər yaradır?


Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “UNİSELL” (VÖEN: 2005964101) Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 04.12.2019-cu il tarixdə dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanı BAKI ŞƏHƏRİ, XƏTAİ RAYONU, AĞ ŞƏHƏR, ev.1, m.3, qanuni təmsilçisinin isə Qasımov Xalid Ağamalı oğlu olduğu qeyd edilib.


Rəsmi portalında Unisell MMC kompüterlər, noutbuklar, monobloklar, printerlər, monitorlar, şəbəkə avadanlıqları və istehlak materiallarının (kartric və toner) təchizatı ilə yanaşı, korporativ İT infrastrukturlarının qurulması və saxlanması istiqamətində də fəaliyyət göstərildiyi, xidmətlərin isə təcrübəli texniki heyət tərəfindən icra olunduğu qeyd edilir.


Qeyd edək ki, İqtisadiyyat Nazirliyi yanında Əmlak Məsələləri Dövlət Xidmətinin rəisi Mətin Eynullayevdir. O, Prezident İlham Əliyevin 6 may 2021-ci il tarixli Sərəncamı ilə sözügedən vəzifəyə təyin edilib. Dövlət Xidmətinin tabeliyindəki “Daşınmaz Əmlakın Dövlət Kadastrı və Reyestri” publik hüquqi şəxsin İdarə Heyətinin sədri Nigar Alimovadır. Daha əvvəllər Vergilər Nazirliyində müxtəlif vəzifələrdə çalışmış Nigar Alimova 2021-ci ildən sözügedən vəzifəyə təyin edilmişdir.(aktualinfo.net)

"Bakı Şəhər Əsaslı Tikinti və Təmir” MMC növbəti satınalma müsabiqəsinə yekun vurub.

Bakı şəhərinin, Nərimanov, Səbail, Nizami, Binəqədi, Xəzər, Qaradağ, Pirallahı rayonları ərazisində dövlət mənzil fonduna aid binaların təmiri ilə bağlı keçirilən tenderin qalibi "Xezer-Constuction” MMC seçilib. Təmir işlərinə görə şirkətə 23 478 460,75 manat ödəniləcək.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən "Xezer-Construction” MMC 26 fevral 2018-ci ildə qeydiyyata alınıb. Nizamnamə kapitalı 200 manatdır. Hüquqi ünvanı Bakı şəhəri Nizami rayonu, Keşlə qəsəbəsi, Qasım bəy Zakir küçəsi, ev 1130-da yerləşir. Şirkətin qanuni təmsilçisi Binnətov Rəmzi Rüfət oğludur.
Açıq mənbələrdə şirkət və qanuni təmsilçisi haqqında heç bir məlumat yoxdur.
"Xezer-Construction” MMC bundan az əvvəl "Bakı Əsaslı Tikinti və Təmir” MMC-nin Bakı şəhəri ərazisində səkilərdə, həyətlərdə, park və bağlarda abadlıq yenidənqurma və təmir işlərinin satın alınması ilə bağlı keçirdiyi tenderin qalibi olub. Bu tender üzrə satınalma müqaviləsinin maliyyə dəyəri 61 087 536,21 manat təşkil edib.
"Bakı Əsaslı Tikinti və Təmir” MMC Bakı Şəhər İcra Hakimiyyətinin tabeliyində faəliyyət göstərirdir. MMC-nin rəhbəri Abit Əliyevdir. O, Bakı Şəhər İcra Hakimiyyətinin başçısı Eldar Əzizova yaxın şəxs kimi tanınır.(Qaynarinfo)

Nurəli Adil oğlu Yusifbəyli Sumqayıt Dövlət Universitetinin rektoru təyin edilib.

Prezident İlham Əliyev bununla bağlı Sərəncam imzalayıb.

Qeyd edək ki, SDU-nun keçmiş rektoru Rüfət Əzizov ötən il ADNSU-ya rektor təyin olunmuşdu. Bundan sonra Elm və Ali Təhsil üzrə Dövlət Agentliyinin direktor müavini Əminağa Sadıqov Sumqayıt Dövlət Universitetində rektor əvəzi vəzifəsini icra edirdi.

"Azərbaycanda onkoloji xəstələrlə bağlı vəziyyət çox ağırdır. Say durmadan artır. Hər il 10000 adam onkoloji xəstəlikdən dünyasını dəyişir. Özümdən yazmıram, rəsmi statistik rəqəmlərə əsasən deyirəm (2023-cü ildə 9818 nəfər, 2024-cü ildə 9681 nəfər)..." "Dia-az" xəbər verir ki, bunu özünün sosial şəbəkə hesabında jurnalist Aytən Məmmədova yazıb.
O daha sonra fikrini belə davam etdirir: "Xərçəng xəstəliyinə yoluxanların sayı da sürətlə çoxalır. Az qala, il ərzində 5 min nəfərə yaxın artım var. 2023-cü ildə qeydiyyatda olan xəstə sayı 69435 nəfər olub, 2024-cü ildə 73875-ə çatıb.
Bunların əksəriyyəti kasıb adamlardır, keyfiyyətli kimyaterapiya almaq, başqa ölkəyə gedib yaxşı müalicə olunmaq kimi imkanları yoxdur. Onlar Bakıda – Onkologiya Mərkəzinin dəhlizlərində ağlaya-ağlaya gəzirlər. Əksəriyyətinin müayinələrə, kimyaterapiyalara, şüalara və s. ödəməyə gücü çatmır.
Bu Mərkəzdə tələb olunan pullar bir yana, həkimlərin əksəriyyətinin davranışı da danışılası deyil. Sanki qarşılarında onkoloji xəstə yox, daş-divardı. Elə qəzəblə, əda ilə davranırlar adamla...
Onkologiya Mərkəzində son hadisədən sonra bir çox həkimlərin sosial şəbəkələrdə yazdıqlarını görürəm. Bir minnət qoyurlar, sanki havayı işləyirlər. Biri deyir, işləməyək, qoy qalsınlar, o biri yazır ki, heç vaxt ağır xəstə qəbul etmir, əməliyyat edib sağalda bilsə də...
Sonra da deyirik, niyə səhiyyə sistemi bu vəziyyətdədir? Belə düşüncə sahiblərinin olduğu məkanlarda vəziyyət necə olmalıdır?
Özünü qarşındakının yerinə qoyub, onun nə hiss etdiyini anlamaq çoxmu çətindir?
Hər peşə özlüyündə vacibdir, müqəddəsdir. Həkimlik də, müəllimlik də, mühəndislik də... O aparatlar olmasa, həkimlər necə dəqiq diaqnoz qoyar? Müəllimlər olmasa, həkimlər necə yetişər?
Azərbaycanda yaxşı həkimlər varmı? Əlbəttə ki, var. Təəssüf ki, onlar ın sayı azdır. İnsanlar da bundan əziyyət çəkir..."(DİA-AZ)

Abşeron rayonunda Masazırda qanunsuz tikinti işləri aparılması üçün hazırlıq görülür

Xalq-a daxil olan məlumata görə Abşeron rayonu Masazırda H. Əliyev pr. dəmir hasara alınaraq qanunsuz inşa işləri aparılması ilə bağlı hazırlıqlar görülüb.

Məsələnin araşdırması ilə bağlı qurumlara sorğu göndərilib.

Dövlət Şəhərsalma və Arxektura Komitəsindən və Fövqəladə Hallar Nazirliyinin müvafiq qurumundan rəsmi heç bir icazə alınmadan tikinti işlərinə Abşeron rayonunda hansı məmur icazə verdiyi müəmmalıdır.

Abşeron rayon İcra Hakimiyyətindən və aidiyyatı qurumlardan heç bir münasibət öyrənmək mümkün olmadı.

Aidiyyatı qurumların fikirlərini dərc etməyə hazırıq

Həmin görüntüləri təqdim edirik:

VİDEO LİNKDƏ: https://xalq.online/masazirda-qanunsuz-tikinti-baslanir-hansi-memur-icaze-verib

Xalq.online

“Lux Residence” tikinti şirkəti qanunsuz olaraq 86 yaşlı qadını evindən çıxarmağa çalışıb.

Muxalifet.az xəbər verir ki, Bakı şəhər, Yasamal rayonu İ.Qutqaşınlı küçəsi ev 29 ünvanında yaşayan İbrahimova Piruzə Abusət qızı bu barədə Ajans.az-a açıqlamasında bildirib.

Onun sözlərinə görə, yaşadığı ərazinin və binanın satılmasından sonra “Lux Residence” tikinti şirkəti digər bina sakinləri ilə razılığa gəlsə də, onunla bağlı fərqli mövqe sərgiləyib. Belə ki, əvvəlcə onu məcburi şəkildə evindən çıxarmağa cəhd edib, o. etiraz etdikdən sonra isə məsələ məhkəməyə daşınıb.

Şikayətçinin sözlərinə görə, ona məxsus mənzilin sahəsi sənədlərdə 76 kvadrat metr olsa da, ilkin mərhələdə bu göstərici saxtalaşdırılaraq 55 kvadrat metr kimi təqdim edilib.

Üstəlik, digər sakinlərlə əldə olunan razılaşmaya əsasən, hər kvadrat metr üçün 4000–5000 manat məbləğində ödəniş təklif olunduğu halda, ona həmin qiymətin yarısından da aşağı məbləğ təklif edilib.

Qeyd edək ki, məhkəmə prosesində mənzilin sahəsinin 76 kvadrat metr olduğu təsdiqlənsə də, ödəniş hər kvadrat metr üçün 2200 manat müəyyən edilib. Sakin bu qərarla razılaşmadığını və hüquqlarının pozulduğunu iddia edir.

Şikayətçi Piruzə İbrahimova, bununla bağlı Azərbaycan Respublikasının Birinci vitse-prezidenti Mehriban Əliyevaya da müraciət edib. Yaşlı qadın Mehriban xanımdan məsələnin obyektiv araşdırılmasına və digər sakinlər üçün təyin olunan ödəniş məbləğinin ona da şamil edilməsinə göstəriş verməsini xahiş edib.

Məlumat üçün onu da bildirək ki, Birinci vitse-prezident Mehriban Əliyevaya 86 yaşlı Piruzə İbrahimovanı şəxsən tanıyır. Əldə etdiyimiz məlumata görə, hətta pandemiya dönəmində Mehriban xanım ona mobil telefon da hədiyyə edib.

Muxalifet.az

P.S. Məsələni diqqətdə saxlayacağıq.

Uzun illərdir Bakı Şəhər İcra Hakimiyyətinin balansında fəaliyyət göstərən “Bakı Şəhər Əsaslı Tikinti və Təmir” MMC-nin keçirdiyi iri həcmli tenderlərin əsas qaliblərindən biri kimi “Xezer-Construction” MMC çıxış edir.
2026-cı ildə də eyni tendensiyanın davam etdiyinin şahidiyik. Belə ki, bu il ayrılan təxminən 25 milyon manatlıq tenderi yenidən həmin şirkətin qazandığı və artıq təmir işlərinə start verdiyi qeyd olunur. Tenderin ümumi məbləğinin 23 milyon 478 min 460 manat təşkil edir.
Layihə çərçivəsində Bakı şəhərinin Nərimanov, Səbail, Nizami, Binəqədi, Xəzər, Qaradağ və Pirallahı rayonları ərazisində dövlət mənzil fonduna aid binaların təmiri nəzərdə tutulub. Artıq Bakı Şəhər İcra Hakimiyyətinin tabeliyində olan “Bakı Şəhər Əsaslı Tikinti və Təmir” MMC ilə “Xezer-Construction” MMC arasında müqavilə imzalandıb və işlərə start verilib. Həmçinin qeyd olunur ki, müqaviləyə əsasən 100-dən çox müxtəlif xidmət növünün həyata keçirilməsi planlaşdırılır. 00-dən çox müxtəlif xidmət növünün nə olduğu açıqlanmır və yəqin ki, bura çox kiçik həcmli işlər də əlavə edilməklə görünyü yaradılması mümkün olacaq.
Elə isə sual yaranır - hər il milyonlarla manatlıq tenderləri qazanan “Xezer-Construction” MMC kimə məxsusdur və niyə digər şirkətlər bu tenderlərdə qalib ola bilmir?
Bizimesr.com bildirir ki, “Xezer-Construction” MMC haqqında açıq mənbələrdə mövcud olan bilgilər məhduddur. Bildirilir ki, şirkətin qanuni təmsilçisi Binnətov Rəmzi Rüfət oğludur və şirkət 26 fevral 2018-ci ildə dövlət qeydiyyatına alınıb. Qeyd edək ki, fəaliyyət istiqaməti əsasən abadlıq işləri, səkilərin və həyətlərin yenilənməsi kimi sahələri əhatə edir. Həmçinin şirkətin daha çox “Bakı Şəhər Əsaslı Tikinti və Təmir” MMC-nin keçirdiyi tenderlərin qalibi kimi tanındığı bildirilir. Açıq mənbələrdə şirkət haqqında geniş məlumatın, o cümlədən rəsmi internet səhifəsinin mövcud olmadığı qeyd olunur. Şirkətin nizamnamə kapitalının isə cəmi 200 manat olduğu bildirilir.
Digər diqqət çəkən məqam isə ondan ibarətdir ki, təmir işləri ilə bağlı layihə-smeta sənədlərinin hazırlanması ənənəvi olaraq “Az.Arxitektura” MMC-yə həvalə olunur. Bildirilir ki, bu sənədlərin hazırlanmasına 1 milyon 407 min 240 manat vəsait xərclənib. Rəsmi məlumatlara əsasən, “Az.Arxitektura” MMC son 4 il ərzində 9 milyon manatdan artıq dəyərdə tender müqavilələri imzalayıb.
Həmçinin qeyd edilir ki, şirkət son olaraq 28 May küçəsindən “The Ritz-Carlton Baku” otelinə qədər olan 12 hektar ərazini əhatə edən yeni istirahət parkının layihə-smeta sənədlərinin hazırlanması üzrə keçirilən tender müsabiqəsinin qalibi elan olunub və bu layihə üzrə 2 milyon 387 min 833 manat 84 qəpik vəsait ayrılıb.
“Az.Arxitektura” MMC-nin qanuni təmsilçisinin Şükürlü Yunis Sahib oğlu olduğu bildirilir. Gənc yaşına baxmayaraq Yunis Şükürlünün mühəndis-dizayner kimi tanındığı qeyd olunur. Bildirilir ki, o, bundan əvvəl Göyçay rayonu Mədəniyyət və Turizm şöbəsinin müdiri, daha sonra isə Ağdaş Regional Mədəniyyət və Turizm İdarəsinin rəis müavini vəzifələrində çalışıb.
Qeyd edək ki, Yunis Şükürlü “Global Engineering Management Company” MMC-nin də rəhbəridir. O, bu şirkəti 2022-ci ildə, yəni 19 yaşında təsis edib. Şirkətin əsasən dövlət qurumları üçün layihə-smeta sənədlərinin hazırlanması sahəsində fəaliyyət göstərdiyi və son 5 ildə 40-dan çox tenderin qalibi olduğu qeyd olunur. Eyni zamanda bildirilir ki, şirkət ötən il etibarsız təchizatçı reyestrində də yer alıb.
Əsas müzakirə doğuran məqam isə ayrılan vəsaitlərin həcmi ilə görülən işlərin mahiyyəti arasındakı fərqlə bağlıdır. İddia olunur ki, aparılan təmir işləri əsaslı xarakter daşımır. Belə ki, binaların konstruktiv problemlərinin aradan qaldırılması əvəzinə əsasən fasadların rənglənməsi, həyət ərazilərində qismən abadlıq işlərinin aparılması və dağılmış hissələrin örtüklərinin dəyişdirilməsi həyata keçirilir. Bu isə ümumi olaraq kosmetik təmir görüntüsü yaradır.
Bundan əlavə, qeyd edilir ki, təmir işləri daha çox yol kənarında yerləşən və görünən binaları əhatə edir. Məsələn, Xəzər rayonu, Buzovna qəsəbəsində aparılan işlərlə bağlı iddialara görə, eyni binaların hər il təkrar-təkrar təmir edildiyi müşahidə olunur. Bildirilir ki, bu binalar əsasən yol kənarından görünən tikililərdir və onların fasadları mütəmadi olaraq rənglənir. Arxa tərəfdə yerləşən binaların isə baxımsız vəziyyətdə qaldığı iddia olunur.
Bu vəziyyətin sakinlər arasında narazılıq yaratdığı bildirilir. Sosial şəbəkələrdə çoxsaylı Buzovna sakinlərinin gördükləri işlərin əsaslı təmir deyil, yalnız görüntü xarakteri daşıdığını qeyd etdikləri vurğulanır. Onların sözlərinə görə, yalnız yol kənarındakı binalar təmir edilir, digər binalar isə diqqətdən kənarda qalır. Həmçinin qeyd olunur ki, oxşar vəziyyət Bakı şəhərinin digər qəsəbə və rayonlarında da müşahidə edilir.
Beləliklə, qeyd olunan faktlar fonunda milyonlarla manat vəsait ayrılan təmir layihələrinin icrası, keyfiyyəti və real təsiri ilə bağlı sualların açıq qaldığı bildirilir.
Bizimesr.com

Medianın İnkişafı Agentliyi onlayn media subyektlərinə dəstək üçün müsabiqə elan edib.

Bu barədə MEDİA-dan məlumat verilib.

Bildirilib ki, Media Reyestrinə daxil edilmiş ictimai-siyasi və idman məzmunlu kütləvi informasiya dərc edən onlayn media subyektləri müsabiqədə iştirak edə bilərlər.

Müsabiqədə iştirak etmək üçün müraciət və ona əlavə edilən sənədlər elektron formada mib.media.gov.az portalı vasitəsilə Azərbaycan Respublikasının Medianın İnkişafı Agentliyinə təqdim edilir.

Media subyektlərinin müsabiqədə iştirak etməsi üçün bir nəfər məsul redaktor və üç nəfər jurnalist olmaqla ən azı dörd nəfərdən ibarət heyəti olmalıdır.

Müsabiqənin yekununda qalib elan edilmiş onlayn media subyektləri ilə Agentlik arasında həmin subyektlərin hər birinə aylıq 5000 (beş min) manat məbləğində maliyyə yardımının göstərilməsinə dair müqavilə imzalanır və 6 (altı) ay müddətində qüvvədə olur. Bu dövr ərzində müvafiq dörd nəfər işçinin hər birinin əməkhaqqının minimum məbləği 800 (səkkiz yüz) manat təşkil etməlidir.

Qeyd edək ki, müsabiqəyə 12 may 2026-cı il saat 18:00-dək müraciət etmək mümkündür.

Müsabiqənin qaydaları ilə buradan ətraflı tanış ola bilərsiniz.

https://media.gov.az/uploads/2025/11/onlayn-media-musabiqe-qaydalari.pdf

Azərbaycan Texnologiya Universitetində (ATU) səhər saatlarında çox sayda ağacın kəsilməsini əks etdirən video görüntülər üzə çıxıb.

32gun.az-a daxil olan daxil olan foto və video materiallardan aydın olur ki, universitetin girişində və inzibati binanın qarşısında yerləşən ağaclar kəsilib.

Məlumata görə, ağacların kütləvi şəkildə kəsilməsi prosesi universitetin daxili həyətində də müşahidə olunur. Universitetin daxili ərazisindəki bəzi ağacların da kütləvi şəkildə kəsilməsini əks etdirən görüntülər mövcuddur.

ATU- nun rektoru Yaşar Ömərov yaşıllıqları qənim kəsilibdir.

Sözü gedən ərazidə quru ağaclar da var, amma nədənsə yaşıl ağaclara qarşı "ekoloji terror" törədirlər.

Yaşıllıqların məhv edilməsi fonunda Ekologiya və Təbii Sərvətlər Nazirliyinin regional strukturları baş verənlərə hələ də səssiz qalır.

***

32gun.az-a daxil olan məlumata görə, ümumilikdə 14 ağac kəsilib.

Bakının tanınmış yaşayış komplekslərindən olan “Azure Residenc“e (Meafun) bu günlərdə təkcə komfort deyil, həm də “qanunların necə işləmədiyi”nin canlı nümunəsinə çevrilib. Mediatvaz.com-a müraciət edən sakinlərin şikayətindən sonra redaksiya əməkdaşları hadisə yerində olub, çəkiliş aparıb və ortaya çıxan mənzərə açıq desək, heç də ürəkaçan deyil.

Zirzəmi bağlanıb. Sadəcə qapı kilidlənməyib – işıqlar söndürülüb, müşahidə kameraları deaktiv edilib, giriş bloklanıb. Maraqlıdır ki, məhz həmin zirzəmidə binanın elektrik qovşaqları, su nasosları və istilik sistemləri yerləşir. Yəni fövqəladə vəziyyət baş versə, ilk lazım olan yer elə həmin “bağlı zona”dır. Bundan əlavə, yüzlərlə vətəndaşın daşınar əmlakı (avtomobili) də təhlükə altındadır. Əmlaka hər hansı bir ziyan dəysə müşahidə kameraları olmadığından nə baş verdiyini nə bilmək, nə də sübut etmək mümkün olacaq. Amma görünür, təhlükəsizlik məsələsi kimlər üçünsə prioritet deyil.

Sakinlər bunu artıq “parkinq mübahisəsi” kimi yox, açıq risk kimi qiymətləndirir. Onların sözlərinə görə, 324 ailə faktiki olaraq idarəetmə eksperimentinin içində yaşayır – gah lift dayanır, gah binadaxili sürahilər (eskalator) söndürülür, gah digər texniki sistemlər “səbəbsiz” sıradan çıxır, gah da müxtəlif adlarla ödənişlər tələb olunur. Bütün bunların isə təsadüf olmadığı iddia edilir.

Ən maraqlı və eyni zamanda ən düşündürücü məqam isə başqadır: sakinlərin bildirdiyinə görə, sözügedən MTK məhkəmə qərarı ilə bina üzərində hüququnu itirib. Yəni hüquqi baxımdan məsələ artıq həll olunmuş sayılmalıdır. Amma görünən odur ki, bu qərar kağız üzərində qalıb. Praktikada isə əvvəlki idarəetmə eyni qaydada davam edir.

Bu yerdə sual yaranır: əgər məhkəmə qərarı var və icra olunmursa, problem haradadır? Qanunda, yoxsa onun tətbiqində?

Sakinlər binanı idarə edən Güvənli Servis Management MMC və əlaqəli şəxslərin fəaliyyətindən narazıdır. Onların iddiasına görə, qərarlar sakinlərin iradəsi nəzərə alınmadan qəbul edilir və vəziyyət getdikcə daha da gərginləşir.

Məsələ ilə bağlı Daxili İşlər Nazirliyi, Fövqəladə Hallar Nazirliyi və Əmlak Məsələləri Dövlət Xidməti-nə dəfələrlə müraciət edildiyi bildirilsə də, sakinlərin sözlərinə görə, hələlik ortada real nəticə yoxdur. Görünür, bu məsələ də “baxılır” statusunda qalmaqda davam edir.

Sakinlər arasında səslənən iddialardan biri də odur ki, adı hallanan Babək Babayev məmur qohumuna arxayın olduğu üçün vəziyyətə bu qədər rahat yanaşır. Onların fikrincə, məhz bu “rahatlıq” məhkəmə qərarına baxmayaraq əvvəlki fəaliyyətin davam etdirilməsinə şərait yaradır. Amma fakt budur ki, bir tərəfdə məhkəmə qərarı, digər tərəfdə isə dəyişməyən reallıq var. Arada isə 324 ailə qalır.

Sakinlər tərəfindən son dəqiqə verilən məlumata görə, medianın gəlişini eşitdikdən dərhal sonra qarajın işığı yandırılsa da Babək Babayevin tapşırığı ilə bəzi şəxslərin giriş kartları bloklanıb.

Qeyd edək ki, sakinlər məhkəmə qərarının icra olunmadığı üçün məsələ məhz bura qədər gəlib çıxdığını deyirlər. Məhkəmə qərarının icra olunmaması isə bütöv bir yaşayış binasının yüzlərlə sakinlərini dövlətin qurumları və qanunları ilə üz-üzə qoyur. Qanunların icrası mı zəifdir, Babək Babayevin “qoruyucu mələyi”mi güclüdür aidiyyəti dövlət qurumlarıın məsələdən xəbərdar olmasından sonra bəlli olacaq.
Qarşı tərəfin mövqeyini dərc etməyə hazırıq.

Məsələ ictimai əhəmiyyət daşıdığından Mediatvaz.com olaraq prosesi diqqətdə saxlayacağıq. Görünən odur ki, burada təkcə zirzəmi yox, daha dərin problemlər var. Odur ki, mövzunu davam etdirəcəyik!!!(Mediatvaz.com)