Mediaya Kəlbəcərdə işləyib pulunu ala bilməyən bir qrup usta aldandıqlarını iddia edir. Bu barədə audio müraciətdə bildirilir. Verilən məlumata görə, onları qrup halında Kəlbəcərə Ceyhun Kərimovun apardığını qeyd olunur.

Şikayətçi, yəni həmin qrupun rəhbəri 44 günlük Vətən Müharibəsinin qəhrəmanı Oruc Nurəli oğlu Hacıyev bildirilir ki, Ceyhun Kərimov Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində qaynaqçı usta kimi işləyib. Ərazini yaxşı tanıdığı üçün yaxşı pul qazanmaq eşqinə düşüb.

Bu mənada Ceyhun Kərimov adlarını çəkəcəyimiz ustaların Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində işlə təmin olunacaqları barədə yağlı vədlər verib, özü ilə sözügedən ünvana aparır…

Əvvəlcə onların işləyəcəyi “A-Kond 1” QSC-ti barədə qısa məlumat verək.

İnternet üzərindən aparılan araşdırmaya görə şirkət böyük layihələrin icraçısı kimi nəhən işlərin görülməsində təmsil olunub. Direktoru Orxan Bağırov olan bu şirkətin hətta xeyriyyəçi şirkət olduğu barədə də məlumatlar yazılıb…

İndi gələk mətləbə. Ceyhun Kərimov özü ilə gətirdiyi işçiləri fiziki şəxs Xəyal Ələsgərovla tanış edir…

Qeyd edək ki, “A-Kond 1” QSC-ti fiziki şəxs Xəyal Ələsgərovla 27 fevral 2026-cı ildə iş öhdəliyi barədə müqavilə bağlanıb.

İndi isə gəlin görək fiziki şəxs Xəyal Ələsgərov kimdir.

MN-nin “N” saylı hərbi hissəsində nə az, nə də çox düz 10 il Gizir vəzifəsində Poliqon rəisi kimi xidmət edib. Özünün verdiyi məlumata görə ailə vəziyyətinə görə ordudan iki ildir tərxis olunub. Bir ildən artıqdır müxtəlif yerlərdə malyar kimi işə başlayıb. Orta təhsillidir. Tikinti mühəndisliyinə aid nə təhsili, nə də iş təcrübəsi var…

Xatırladaq ki, Prezident Ali Baş Komandanın Qarabağa Qayıdış Dövlət Proqramı çərçivəsində regionda böyük tikinti layihələri həyata keçirilir.

Belə bir nəhəng layihənin icrasına isə sabiq gizirin rəhbərlik eləməsi gülünc doğurur. Adamın kollec təhsili, hətta iş təcrübəsi belə belə yoxdur. Sual yaranır. Belə bir naşı adamın bu boyda nəhəng layihənin icrasına rəhbərlik eləməsi görün hansı fəsadların əmələ gəlməsinə şərait yaratmış olur. Bu işdə kimlər maraqlıdır?

Budurmu ölkə rəhbərinin quruculuq siyasətinə dəstək?

Görünən mənzərə isə tam əksini göstərir.

Bu boyda məsuliyyət tələb edən, nəhəng və memarlıq baxımından Prezidentin də həmişə ifadə etdiyi Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində tikinti və digər işlərin görülməsi niyə belə bir təcrübəsiz və mühəndislik təhsili olmayan adama həvalə edilib?

Üstəlik onuunla şirkətin baş direktoru arasında rəsmi müqavilə də bağlanıb. Adam da mütəxəssis qismində elan verərək iş təcrübəsini yoxlamadan adamları işə cəlb edib. Və müqavilənin şərtlərindən irəli gələn öhdəliklərin icrasına başlanılıb. Amma…

Ammasının əmmasına isə şikayətlərlə tanış olandan sonra öyrənməyə nail olacaqsınız.

İcraçı ustaları 12 aprel 2026-cı il tarixində işə cəlb edir. 20 nəfərə yaxın adam işə başlayır. Aralarında bağlanan şifahi müqaviləyə əsasən bir ay iş günü ərzində iki dəfə avans şəkilində ödəmələr olacağına söz verilib. Hətta əmək müqaviləsi belə bağlanmayıb. 15-20 gün işlətdikdən sonra, işçilərə verilən vədə görə pul verə bilmirlər. Söz-söhbət və şikayətlər elə həmin gündən başlayır. Xəyal Ələsgərov fikirləşir ki, şikayət olarsa əsas zərbə elə onun üzünə dəyəcək. Bu mənada 25.04.2026-cı il tarixində işçilərlə müqaviləni rəsmiləşdirir. 15 gün sınaq, bir aylıq rəsmi müqavilə şərtləri ilə cibi boş evlərinə qayıdan və şikayət üçün qapı döyməkdən yorulmayan ustalar hələ də onlara məxsus pullarını ala bilmirlər.

Bu da aşağıda adları yazılan icİşçilər:

1. Oruc Nurəli oğlu Hacıyev

2. Nahid Tapdıq oğlu Xəlilov

3. Qnyaz Yusif oğlu Quliyev

4. Rüfət Vidadi oğlu Mustafayev

5. Samir Alxan oğlu Vəlixanov

Əmək müqaviləsinin 31.05.2026 tarixinədək 1 ay 7 gün müddətinə bağlanmışdır.

Qısa olaraq onu da qeyd edək ki, Oruc Nurəli oğlu Hacıyev 44 Günlük Vətən Müharibəsinini qəhrəmanlarındandır. Torpaqların işğaldan azad olunmasında iştirak edib, amma indi biriləri həmin torpaqlarda döyüşüb qəhrəman kimi tarixə düşən

Veteranı aldadıb pulunu vermirlər.

Şikayətçilər bu işdə tez-tez layihə rəhbəri olaraq “A-KOND-1” QSC-nin təmsilçisi Asif İsmayılovun adını çəkirlər. Bu barədə “A-KOND-1” QSC-nin əlaqə nömrəsinə dəfələrlə zəng eləməyimizə baxmayaraq nə Orxan Bağırovla, nə də Asif İsmayılovla əlaqə yarada bilmədik.

Müraciət edənlər pullarını tələb edirlər. “A-Kond 1” QSC-nin yerləşdiyi ünvana dəfələrlə getsələr də müsbət nəticə əldə edə bilməyiblər. Əslində alacaqları pulun bir hissəsi əlbəl ödənilib. Qalanını isə vermirlər. Biz isə redaksiya oilaraq yazını tədbir görülməsi üçün Dövlət Vergi Xidmətinə, Əmək Müfəttişliyi Xidmətinə və Ali Baş Komandan cənab İlham Əliyevə ünvanlayırıq.

Azia.az

“Bakı-Tbilisi-Bakı sərnişin qatarının yenidən fəaliyyətə başlamasını çox yüksək qiymətləndirirəm. Azərbaycan və Gürcüstan arasında siyasi-iqtisadi əlaqələr yüksək səviyyədə olduğuna görə tərəflər belə bir addım atıb”.

Bunu “Yeni Sabah”a açıqlamasında Milli Məclisin sabiq deputatı, iqtisadçı Vahid Əhmədov deyib.

O bildirib ki, Azərbaycan və Gürcüstan arasında dəmiryolu reysinin bərpası hər iki ölkə vətəndaşları üçün sevindirici haldır:
“Regionda çox ciddi problemlərin olmasına baxmayaraq, bu addımın atılması onu göstərir ki, Bakı və Tbilisi arasında olan isti münasibətlər dəmiryolu reysinin yenidən açılması üçün şərait yaradıb. Bu bizim üçün böyük əhəmiyyət kəsb edir. Düzdü, Gürcüstanda da qiymətlər kifayət qədər yüksəlib və müəyyən inflyasiya prosesi orada da gedir. Amma insanlar üçün dəmiryolu reysinin açılması çox böyük əhəmiyyət kəsb edir. Çünki Gürcüstan bizim qonşumuzdur və tarixi qohumluq əlaqələrimiz mövcuddur. . Bakı-Tbilisi-Bakı reysinin açılması Azərbaycanın logistik və iqtisadi inkişafına təkan verən amillərdən biridir. Bu addım həm də digər qonşu dövlətlərə də bir mesajdır ki, əgər sizdə də vəziyyət stabil olarsa, Azərbaycan həmin dövlətlərlə, xüsusən Rusiya və İranla sərhədləri aça bilər. Hesab edirəm ki, qonşu dövlətlərlə nə qədər sıx iqtisadi-siyasi əlaqələr qurularsa, əhalinin sosial vəziyyəti də bir o qədər yaxşı olar”.
İqtisadçı vurğulayıb ki, bilet qiymətləri vətəndaşların cibinə münasib olmalıdır:
“İnsanların həyat şəraitini, gediş-gəlişin sayını nəzərə almaq lazımdır. Qiymətləri yüksək qoymaq olmaz. İnsanların maddi durumunu nəzərə alıb, ona uyğun qiymətlər təyin edilməlidir”.
V.Əhmədovun fikrincə, ölkəmizdə artıq 6 ildir tətbiq edilən karantin rejimi tədricən aradan qaldırılacaq:
“Karantin rejiminin ləğv edilməsinə gəlincə, onsuz da Azərbaycanda karantin rejiminin tətbiqi o qədər də hiss olunmur. İnsanlar sərbəst gəzirlər və ciddi problem yoxdur. Amma qonşu dövlətlərdə yaranan problemlər ciddi şəkildə nəzərə alınmalıdır. Xüsusən, hazırda Ermənistanda parlament seçkilərinin kampaniyası gedir və digər dövlətlərdən bu prosesə ciddi müdaxilələr var. Ona görə də, karantin rejimini saxlamağa müəyyən qədər ehtiyac var. Düşünürəm ki, yavaş-yavaş karantin rejimi də aradan qaldırılacaq”.
Xatırladaq ki, mayın 26-da Bakı-Tbilisi-Bakı marşrutu üzrə gündəlik sərnişin qatarlarının fəaliyyəti bərpa olunacaq.

Qurban bayramı ilə bağlı təhlükəsiz heyvan kəsimi və satışına nəzarət gücləndirilib.

Bu barədə Azərbaycan Qida Təhlükəsizliyi Agentliyi (AQTA) məlumat yayıb.

Qeyd olunub ki, 27-28 mayda qeyd olunacaq Qurban bayramı günlərində qurbanlıq heyvanların kəsimi və satışına artan tələbat nəzərə alınaraq, AQTA Qida Təhlükəsizliyi Agentliyi aidiyyəti dövlət qurumları ilə birgə əhalinin təhlükəsiz ət və ət məhsulları ilə təmin olunması istiqamətində həyata keçirilən tədbirlərin miqyasını genişləndirib.

Qurban bayramı günlərində əvvəlki illərdə olduğu kimi qurbanlıq heyvanların satışı və kəsimi xidmətləri müvafiq dövlət qurumları ilə koordinasiyalı şəkildə əvvəlcədən müəyyən edilmiş ünvanlarda təşkil olunacaq. Satış və kəsim məntəqələrində yalnız baytarlıq nəzarətindən keçmiş heyvanlar vətəndaşlara təqdim ediləcək, heyvanların kəsimi isə baytarlıq-sanitariya tələblərinə cavab verən məntəqələrdə həyata keçiriləcək.

Eyni zamanda vətəndaşların tələbatı nəzərə alınaraq bəzi regionlarda AQTA ilə razılaşdırılmaqla yerli icra hakimiyyəti orqanları tərəfindən səyyar heyvan kəsimi çadırları quraşdırılacaq. Həmin məntəqələrdə qurbanlıq heyvanların satışı və kəsimi baytarlıq nəzarəti altında təşkil ediləcək.

AQTA vətəndaşları və bu sahədə fəaliyyət göstərən şəxsləri qurban kəsimini dini ayinlərlə yanaşı, qüvvədə olan qanunvericiliyin tələblərinə uyğun şəkildə həyata keçirməyə çağırır. Baytarlıq-sanitariya və sanitariya-gigiyena normalarına cavab verməyən yerlərdə, o cümlədən küçə, yol kənarı, məhəllə və digər ictimai ərazilərdə heyvan kəsimi və satışının aparılması, həmçinin baytarlıq şəhadətnaməsi və ya arayışı olmadan iri və xırdabuynuzlu heyvanların daşınması yolverilməzdir.

Bayram günlərində vətəndaşlardan sağlamlığı şübhə doğuran heyvanların satışı və ya antisanitar şəraitdə heyvan kəsimi halları ilə rastlaşdıqları təqdirdə hüquq-mühafizə orqanlarına, yerli icra hakimiyyətlərinə və AQTA-nın "1003 – Çağrı Mərkəzi"nə məlumat vermələri xahiş olunur.

Azərbaycan Respublikasının Kosmik Agentliyi (“Azərkosmos”) İsrailin “K.R.V Medical Group 2014 LTD” şirkəti ilə müqavilə imzalayıb.
Yeniavaz.com xəbər verir ki, “Azərkosmos” müqaviləni tender müsabiqəsi keçirmədən, bir mənbədən satınalma metodu əsasında bağlayıb.
Qeyd edək ki, “Azərkosmos” “K.R.V Medical Group 2014 LTD” şirkətindən İsraildə evlərin uzunmüddətli icarəsi xidmətlərini alacaq və bunun qarşılığında bir il üçün 1 milyon 80 min 258 manat 34 qəpik ödəyəcək.
Məlumat üçün bildirək ki, son 3 ildə “Azərkosmos” “K.R.V Medical Group 2014 LTD” ilə sayca üçüncü müqaviləni imzalayır. Əvvəlki iki müqavilə “Azersky-2” layihəsinin icrası çərçivəsində avtomobil və evlərin uzunmüddətli icarəsi xidmətləri ilə bağlı olub. Həmin müqavilələrin ümumi dəyəri isə 3 milyon 848 min 51 manat 95 qəpik təşkil edib.[left][/left]

7 ay, 7 gün əvvəl Prezident Administrasiyasının keçmiş rəhbəri, uzun illər "boz kardinal" ünvanı hesab olunan Ramiz Mehdiyev istintaqa cəlb olundu. Bundan sonra illərlə onun və ətrafının – xüsusilə kürəkəni, "vurub-yıxan əli" olan keçmiş deputat İlham Əlisəftər oğlu Əliyevin adına bağlı çeşidli qanunsuzluqların araşdırılacağına böyük ümidlər vardı. Ramiz Mehdiyev hazırda evində dustaqdır.

Kürəkəni, ailə üzvləri nəinki kölgəyə çəkilmir, əksinə, milyonluq avtomobil kolleksiyaları ilə Bakı küçələrində əzələ-gövdə nümayiş etdirir, sanki hər kəsə meydan oxumaqla qürrələnirlər. Bu günlərdə sosial şəbəkələrdə yayılan İlham və oğlu Hikmət Əliyevlərin Bakı küçələrində hərəkət edən avtomobillərinin fotoları sadə bir həyat tərzinə ironiyadır, ağlasığmaz bir dəbdəbədən xəbər verir. Maraqlıdır ki, bu avtomobillərin demək olar ki, hamısı vahid bir seriya xəttinə - 040 nömrə nişanlarına bağlanıb.

Siyahı kifayət qədər zəngindir və hər birinin qiyməti yüz minlərlə manatla ölçülür:

Mercedes-Maybach S-Class (90-AA-040) - Dövlət seriyasına yaxınlığı ilə seçilən, status rəmzi olan lüks sedan.

Rolls-Royce Ghost/Phantom (10-YY-040) - Dünyanın ən bahalı lüks avtomobillərindən biri.

Mercedes-Maybach GLS (10-AY-040) - Son model ultra-lüks yolsuzluq avtomobili.

Mercedes-AMG G-Class (Gelandewagen) (10-AB-040 və 10-PP-040) - Qara və mat rənglərdə, xüsusi tyuninq olunmuş bir neçə "G-Class".

Bentley Bentayga (10-PP-040) - Eksklüziv idman-lüks krossoveri.

Təkcə bu qarajın ümumi bazar dəyəri milyonlarla manat təşkil edir. Keçmiş bir deputatın və onun gənc övladının bu dərəcədə nəhəng maliyyə resurslarına sahib olması hansı leqal biznesin nəticəsidir? Bu resurslar uzun illər boyu sahibkarlar və dövlətin büdcəsindən müxtəlif yollarla mənimsənilən vəsaitlərin kiçik bir təzahürü deyil?

Mətbuatda və ictimaiyyətdə ən çox rezonans doğuran məqam isə hüquq-mühafizə orqanlarının bu aşkar dəbdəbə qarşısındakı sükutudur. Ramiz Mehdiyevin adı dövlətə xəyanət dosyesində hallanarkən, onun ailəsinin toxunulmazlığı hansı qanunlarla qorunur?

Karantin dövründə xüsusi rejim qaydalarını nümayişkaranə şəkildə pozaraq toy edən və buna görə qısa müddətli həbs həyatı yaşayan kürəkəni üçün sanki qanunlar elə həmin xırda xətalarla bitir. Təkcə Şabran rayonunda sabibkar Mansur İbrahimova qarşı törədilən cinayət – onun 10 milyonlarla manat dəyərində olan biznesinin 5 min 600 manata rəsmiləşdirilərək əlindən alınması, bu cinayətin bu gün də araşdırılmamış qalması da anlaşılmaz suallar sırasındadır. Mehdiyevin, onun kürəkəninin qeyri-qanuni varlanma faktları ortadadır. Ramiz Mehdiyevin kürəkəninin lüks həyatı və sərvəti hüquqi müstəvidə ciddi şəkildə araşdırılmalıdır.

Sadə bir hesablama aparmaqla xalqın, elə sahibkar Mansur İbrahimovun əlindən alınan biznesinin pulları hara gedir sualına cavab axtarmaqda fayda var. Fotoşəkillərdə görünən cəmi 6 avtomobilin ümumi dəyəri minimum 2.5 milyon - 3 milyon manat (təxminən 1.5 - 1.8 milyon dollar) arasındadır. İndi isə gəlin bu qarajın təkcə yanacaq (benzin) talanına baxaq.

Bir maşının günlük benzin xərci orta hesabla 50 manatdır. Bu halda 6 maşının ümumi günlük benzin xərci 300 manat, aylıq benzin xərci isə 9 min manat, illik təkcə benzin xərci 108 min manatdır. Bunun üzərinə avtomobillərin illik sığorta haqlarını, xaricdən gətirilən xüsusi ehtiyat hissələrini, lüks təkər dəstlərini və ayda bir neçə min manat maaş alan xüsusi mühafizəçi-sürücü heyətini də gəlsək, bu qarajın illik saxlanma xərci yüz minlərlə manat edir. Azərbaycanda minlərlə ailənin aylıq dolanışıq büdcəsi (minimum əməkhaqqı 400 manatdır) bu oliqarx övladlarının cəmi bir neçə günlük benzin puluna bərabərdir. Ramiz Mehdiyevin dövlət idarəçiliyində olduğu onilliklər ərzində formalaşan bu kölgə iqtisadiyyatının və qanunsuz varlanmanın bariz nümunəsi olan "040" kolleksiyası, sadə bir avtomobil sevdası deyil. Bu, xalqa və dövlətin apardığı antikorrupsiya siyasətinə qarşı açıq-aşkar bir çağırışdır.

Musavat.com

Bakının Yasamal rayonu ərazisində yaşayış binaları inşa edən "Lux Residence" şirkəti ilə bağlı redaksiyamıza şikayət məktubu daxil olub.
Qaynarinfo-nun məlumatına görə, Yasamal rayonu, Kazım Kazımzadə küçəsi 31 ünvanında yaşayan İsayev Famil Zahir oğlu yazır ki, "Lux Residence" şirkətinin apardığı inşaat işləri onun evini yararsız hala salıb. Famil İsayevin sözlərinə görə, şirkət bunu məqsədli şəkildə edib.
"Evdən çıxmağımızı istəyirlər. Amma az kompensasiya verirlər. Təsəvvür edin, yaşadığımız evin ümumi sahəsi 51,7 kvadratmetrdir, amma onlar hesab edirlər ki, 32,5 kvadratmetrdir. Təklif etdikləri məbləğ hətta 32,5 kvadratmetr üçün də yetərli deyil", deyə şikayətçi bildirir.
Famil İsayevin sözlərindən məlum olur ki, "Lux Residence" əvvəlcə onlara 91 000 manat kompensasiya təklif edib:
"Təbii ki, biz buna etiraz etdik. Bizi məhkəməyə verdilər. İddiada göstəriblər ki, guya yaşadığımız ev qeyri-qanuni tikilidir. Halbuki bu ev bizim baba mülkümüzdür. Evi 1916-cı ildə atamın babası inşa edib. Babam bu evdə anadan olub. Nənəm bu evə gəlin gəlib. Yəni 110 ildir bu ev bizdədir. Bu müddət ərzində evin qeyri-qanuni tikili olduğu üzə çıxmayıb?".
Şikayətçi yazır ki, Yasamal Rayon Məhkəməsi də iddianın absurdluğunu görüb və məsələni kompensasiya mübahisəsinə çevirib. Famil İsayevin sözlərinə görə, bundan sonra şirkət evin sahəsini ölçmək üçün "Central Consulting" şirkətinə müraciət edib:
"Biz həmin şirkəti evə buraxmadıq. Amma şirkət saxta ekspertiza rəyi hazırlayıb. Rəydə evin sahəsinin 32,5 kvadratmetr olduğu yazılıb. "Central Consulting" şirkətinin saxtakarlığını elə hazırladığı rəy vasitəsilə sübut etmək mümkündür. Təsəvvür edin, rəyə yazıblar ki, ev kərpicdən tikilib. Halbuki ev qaya daşlarından inşa edilib. Bundan başqa, evin qapısının dəmir materialdan olduğu yazılıb, amma qapı taxtadandır. Rəydə qeyd ediblər ki, ev 1 mərtəbəlidir, amma iki mərtəbəlidir. İkinci mərtəbədə əmim yaşayır. Bütün bunları bir kənara qoyaraq sual edirik: "Central Consulting" şirkəti evə baxmadan bu rəyi necə hazırlayıb? Bu açıq-aşkar saxtakarlıq deyilmi?"
Famil İsayevin sözlərinə görə, "Central Consulting" şirkətinin rəyini qəbul etmədiyinə görə məhkəmə tərəfindən evin ekspertizası həyata keçirilib:
"Məhkəmənin hazırladığı rəydə isə açıq-aşkar yazılıb ki, evin ümumi sahəsi (çöldən-çölə) 51,7 kvadratmetrdir. Amma maraqlıdır ki, işə baxan Ayşən Sultanova-Məmmədova heç məhkəmənin rəyini nəzərə almadı və bizə 109 000 manat kompensasiya verilməsi barədə qərar çıxardı. Bir məqamı da qeyd edim ki, məhkəmədə şirkətin nümayəndəsi vətəndaşlara kompensasiya olaraq hər kvadratmetrə görə 4000 manat ödədiklərini deyib. Təsəvvür edin, bu hesabla 109 000 manat heç 32,5 kvadratmetr üçün yetərli deyil. 4000 manatdan hesablayanda 32,5 kvadratmetr üçün 130 000 manat kompensasiya düşür. İndi özünüz baxın ki, nə qədər qanunsuzluq edirlər, haqqımıza girirlər".
Famil İsayev bildirir ki, qərardan apellyasiya şikayəti verəcək. Eyni zamanda məsələ ilə əlaqədar ölkə rəhbərliyinə və digər səlahiyyətli şəxslərə müraciət edəcək.
"Sona qədər qanuni şəkildə mübarizəmi aparacağam. Qardaşım hərbçidir, iki müharibədə iştirak edib. Bu ev təkcə mənə məxsus deyil ki, verilən məbləğlə razılaşım. Biz artıq pul istəmirik, sadəcə haqqımızı tələb edirik", deyə şikayətçi sonda vurğulayır.
"Lux Residence" şirkəti 100 manat nizamnamə kapitalı ilə yaradılıb. Şirkətin qanuni təmsilçisi Cəfərzadə Hüseyn İlşat oğludur. Hüseyn Cəfərzadə haqqında publik mənbələrdə heç bir məlumat yoxdur.
"Lux Residence" şirkəti haqqında isə mediada və sosial şəbəkə platformalarında əsasən tənqidi materiallara rast gəlinir. Məsələn, təxminən bir həftə əvvəl mediada Yasamal rayonu, İ. Qutqaşınlı küçəsi, ev 29-da yaşayan İbrahimova Firuzə Abusət qızının "Lux Residence" şirkətinin özbaşınalıqlarından şikayəti yer alıb.
Cari ilin aprel ayında isə mediada Pəricahan Abdullayeva adlı vətəndaşın "Lux Residence" şirkəti ilə bağlı videomüraciəti yayılıb. Vətəndaş bildirib ki, "Lux Residence" şirkəti onun evini başına uçurub.(Qaynarinfo)

Azərbaycan Avtomobil Yolları Dövlət Agentliyinin (AAYDA) tabeliyindəki "Avtomobil Yollarının Mühafizə Xidməti" Publik Hüquqi Şəxsə yeni direktor təyin edilib.
Qaynarinfo-nun məlumatına görə, AAYDA sədri Vüsal Nəsirlinin müvafiq əmri ilə Xidmətin direktoru vəzifəsinə Zaur İbrahimov gətirilib. Publik Hüquqi Şəxsdə rəis sözü direktorla əvəzlənib.
Xəbəri dəqiqləşdirmək üçün AAYDA-nın mətbuat xidməti ilə əlaqə saxlamaq cəhdlərimiz nəticəsiz qaldı.
Qeyd edək ki, bu ilin fevral ayında Əmək və Əhalinin Sosial Müdafiəsi Nazirliyi (ƏƏSMN) yanında Sosial Xidmətlər Agentliyinin İdarə Heyətinin sədr müavini vəzifəsindən azad olunan Zaur İbrahimov AAYDA İdarə Heyəti sədrinin inzibati idarəetmə məsələləri üzrə məsləhətçisi təyin olunmuşdu.
Xatırladaq ki, Avtomobil Yollarının Mühafizə Xidmətinin rəisi Səftər İsmayılov bir neçə gün əvvəl vəzifəsindən azad olunmuşdu. Məlumata görə, Xidmətdə aparılan yoxlama zamanı ciddi pozuntular aşkarlanıb. Sözügedən qurumun bir sıra vəzifəli şəxsləri barəsində araşdırmalara başlanılıb.


Qaynarinfo

“Azure Residence”də Qalmaqal Böyüməkdə Davam Edir: Məhkəmənin Çıxardığı Ziddiyyətli Qərarlar Sakinlərin Həyatını Təhlükəyə Atır!
Paytaxtın ən bahalı və nüfuzlu yaşayış komplekslərindən biri hesab olunan “Azure Residence”də (Xətai rayonu, 8 Noyabr prospekti) sular durulmur. Kompleksdə artıq təkcə sadə idarəetmə narazılıqlarından deyil, məhkəmə qərarlarının nümayişkaranə şəkildə icra edilməməsi, sakinlərə məxsus mülkiyyətin qanunsuz mənimsənilməsi və məhkəmə tərəfindən çıxarılan ziddiyyətli qərarlar ucbatından yüzlərlə ailənin təhlükəsizliyinin risk altına düşməsindən bəhs edilir.Ali Məhkəmənin Qərarı Var, Amma İcra Olunmur!
Kompleks sakinlərinin verdiyi məlumata görə, Azərbaycan Respublikası Ali Məhkəməsinin qüvvədə olan qərarlarına əsasən binanın idarəçiliyi qanuni şəkildə sakinlərin təsis etdiyi “Xətai-48” Mənzil Mülkiyyətçilərinin Müştərək Cəmiyyətinə (MMMC) verilmişdir. Hətta Xətai rayon İcra Şöbəsinin böyük icra məmurunun rəsmi sənədlərinə görə, binanın mərkəzi qazanxana kompleksi rəsmən icra yolu ilə bələdiyyəyə, oradan isə rəsmi aktla “Xətai-48” MMMC-yə təhvil verilmişdir.
Lakin binanın əvvəlki qanunsuz idarəedicisi “Guvenli-Servis Management” MMC və mülkiyyətçi Babək Babayev məhkəmə qərarlarını heçə sayaraq binanın strateji idarəetmə sahələrini və mərkəzi mühəndis-kommunikasiya sistemlərini əldə saxlamaq üçün qanunsuz müqavimət göstərirlər.
Sakinlərin və hüquqşünasların bildirdiyinə görə, qarşı tərəf məhkəmə sistemini qanunsuz şəkildə manipulyasiya edir. Belə ki, Xətai Rayon Məhkəməsi tərəfindən əvvəlcə “Guvenli-Servis” şirkətinin xeyrinə binanın qazanxana və mühəndis sistemlərinə müdaxiləni təmin edən Müvəqqəti Təminat Tədbiri (MTT) qərardadı çıxarılmışdır. Qanuni idarəedici olan “Xətai-48” MMMC dərhal həmin qanunsuz qərardaddan Bakı Apellyasiya Məhkəməsinə şikayət vermiş və mülki iş materialları yuxarı instansiyaya göndərilmişdir.
Qanunvericiliyin fundamental prinsiplərinə görə, qazanxana kompleksinin hüquqi taleyi yuxarı instansiyanın icraatında olduğu halda, eyni predmet üzrə birinci instansiyada paralel qərar çıxarıla bilməz. Lakin borclu şirkətlə sinxron hərəkət edən mülkiyyətçi Babək Babayev eyni texniki obyekti (qazanxananı) bu səfər fərdi mülkiyyətçi adı altında yenidən eyni məhkəmənin önünə gətirmişdir. Məhkəmə isə predmetin tamamilə eyni olduğunu və ilkin qərarın artıq Apellyasiya icraatında yerləşdiyini bildiyi halda, qərəzli şəkildə dərhal Babək Babayevin də xeyrinə yeni bir paralel Müvəqqəti Təminat Tədbiri (MTT) çıxarmışdır. Bu addım hüquqi anarxiyaya yol açmış və sakinlərin kütləvi etirazına səbəb olmuşdur. Məsələ ilə bağlı artıq Məhkəmə-Hüquq Şurasına da rəsmi şikayətlər ünvanlanıb.
Narazılıq doğuran ən dramatik məsələlərdən biri də kompleksin ümumi istifadədə olan sahələrində aparılan qanunsuz dəyişikliklərdir. Bir vaxtlar “Azure Residence”in əsas rəmzi və üstünlüyü sayılan lazerli hovuz kompleksi və sakinlərin əyləncə zonaları sökülərək fərqli təyinatlara uyğunlaşdırılıb, ofis və qeyri-yaşayış sahəsi kimi satılıb və ya icarəyə verilib.
Daha acınacaqlısı odur ki, məhkəmənin son qərarları ilə strateji əhəmiyyətli qazanxana, generator otağı və lift sistemlərinin açarları heç bir xidmət müqaviləsi olmayan, Fövqəladə Hallar Nazirliyinin (FHN) xüsusi lisenziyasından keçməyən kənar şəxslərin ixtiyarına verilmək istənilir. Sakinlər bildirirlər ki, mərkəzi texniki otaqların açarlarının qeyri-peşəkar şəxslərə paylanması binada hər an kütləvi yanğın, partlayış və lift qəzaları riski yaradır və yüzlərlə insanın həyatını birbaşa təhlükəyə atır.
Kompleksdə illərdir yığılan milyonlarla manat xidmət haqlarının hara xərcləndiyi barədə sakinlərin mülkiyyətçi olaraq hesabat ala bilmədiyi qeyd olunur. Buna baxmayaraq, binada davamlı olaraq istilik, isti-soyuq su və havalandırma sistemlərində ciddi texniki nasazlıqlar yaşanır. Qeyri-yaşayış sahələrinin sahibləri isə binanın vahid qazanxana sistemindən istifadə etsələr də, xərclərə ortaq olmaqdan və “Xətai-48” MMMC ilə rəsmi müqavilə bağlamaqdan imtina edirlər.
Sakinlər və hüquqşünaslar hesab edirlər ki, bu məsələ artıq adi bir kommersiya mübahisəsi deyil, dövlətin adından çıxarılan Ali Məhkəmə qərarlarının icrasının məcburi olması (qanunun aliliyi) və insan həyatının qorunması məsələsidir.
Məsələnin ciddiliyi nəzərə alınaraq, Azərbaycan Respublikasının Ədliyyə naziri Fərid Əhmədova və digər aidiyyəti hüquq-mühafizə orqanlarına, həmçinin Məhkəmə-Hüquq Şurasına rəsmi sorğular və şikayətlər göndərilmişdir.
Mediatvaz.com

Rusiya prokurorluğu azərbaycanlı iş adamı Şahlar Novruzov və xanımını dələduzluqda ittiham edir.

Lent.az Rusiya mediasına istinadla bildirir ki, Krasnodarda iş adamı Şahlar Novruzov barəsində məhkəmə prosesi başlayıb. Prokurorluq onu “Tuapse Dəniz Kommersiya Limanı” MMC-nin payları ilə bağlı xüsusilə külli miqdarda dələduzluğa cəhd etməkdə ittiham edir. Məhkəmə prosesi qapalı keçirilib.

İstintaqın versiyasına görə, Novruzov 2014-cü ildə müəssisəni “Vonixel Limited” adlı ofşor şirkətə satıb. İddiaya görə, lakin 10 il sonra liman üzərində nəzarəti yenidən ələ keçirmək qərarına gələrək saxta boşanma prosesi təşkil edib. Bu prosesdə onun həyat yoldaşı rolunu oynayan qohumu sövdələşmənin ləğv edilməsini tələb edib.

Krasnodar Vilayət Məhkəməsi Şahlar Novruzovla yanaşı və Leyla Hacıyevanı da məsuliyyətə cəlb edib.

Şahlar Novruzov “Kafe Starıy Baku” MMC və “Dar Frut” MMC-nin direktoru vəzifələrində çalışıb. Bundan başqa, iş adamı “Tuapse Dəniz Kommersiya Limanı” (TMKL), “TMKL Müəssisəsi” və “Temryuk Dəniz Aşırma Terminalı” şirkətlərinə sahib olub. Tuapsedə yerləşən liman müəssisələri vasitəsilə Rusiyanın cənubuna idxal olunan meyvə və tərəvəzlərin əhəmiyyətli hissəsi daşınır.

Hüquq-mühafizə orqanlarındakı mənbənin verdiyi məlumata görə, Novruzov və Hacıyevaya qarşı cinayət işi TMKL şirkətinin sahibinin dəyişdirilməsi ilə bağlıdır.

2014-cü ilin oktyabrında Şahlar Novruzov Oleq Basindən “Tuapse Dəniz Kommersiya Limanı” MMC-nin 100 faiz payını alıb. İttihama görə, həmin ilin dekabrında isə bu payları Britaniya Vircin adalarında qeydiyyatdan keçmiş “Vonixel Limited” şirkətinə verib. Əvəzində Novruzov “Vonixel Limited”in səhmlərini əldə edib. Beləliklə, Tuapsedəki dəniz aşırma terminalına nəzarət xarici sahiblərin əlinə keçib.

2022-ci ildə Britaniyanın asılı ərazisi olan Britaniya Vircin adaları Rusiya üçün “dost olmayan ölkələr” siyahısına daxil edilib. İttiham tərəfinin fikrincə, məhz bu dövrdə Şahlar Novruzovun biznesi yenidən öz nəzarətinə qaytarmaq və Rusiya nəzarət orqanlarının diqqətindən yayındırmaq ideyası yaranıb.

İstintaq materiallarında bildirilir ki, planı həyata keçirmək üçün Novruzov qohumu Leyla Hacıyevanı özünü onun həyat yoldaşı kimi təqdim etməyə razı salıb. İttihama görə, onların hesablaması qanundakı bir normaya əsaslanırdı: həyat yoldaşlarından biri razılığı olmadan bağlanmış müqaviləni etibarsız saydıra bilər.

2024-cü ilin fevralında Leyla Hacıyeva Krasnodarın Prikuban rayon məhkəməsinə boşanma ərizəsi, həmçinin TMKL şirkətinin 100 faiz payının “Vonixel Limited” ofşoruna verilməsi ilə bağlı müqavilənin etibarsız sayılması tələbi ilə müraciət edib.

Hacıyeva məhkəməyə 2014-cü ildə Azərbaycanda bağlandığı göstərilən nikah haqqında şəhadətnamənin surətini təqdim edib. Lakin həmin vaxt Tuapsedəki liman obyektləri ətrafındakı hadisələr artıq Rusiya hüquq-mühafizə orqanlarının diqqətini cəlb edib. Onlar Şahlar Novruzov və Leyla Hacıyeva arasında əslində nikahın bağlanmadığı barədə məlumat əldə ediblər.

2025-ci ilin martında dələduzluğa cəhd faktı üzrə cinayət işi açılıb. Şahlar Novruzov həbs olunub və hazırda da həbsdə saxlanılır.

Məlumata görə, biznesmen və qadın özlərini təqsirli hesab etmirlər. Onlar nikahın saxta olmasının sübuta yetirilmədiyini bildirirlər. TMKL paylarını mənimsəməyə cəhd ittihamına gəlincə isə, Şahlar Novruzovun müdafiə tərəfi Tuapse limanındakı bütün aktiv əməliyyatlarının qanuni olduğunu deyir.

2025-ci ilin noyabrında Krasnodar diyarının Arbitraj Məhkəməsi Baş Prokurorluğun iddiasını təmin edərək Şahlar Novruzova məxsus əmlakın, o cümlədən “Tuapse Dəniz Kommersiya Limanı”, “TMKL Müəssisəsi”, “Dar Frut” və “Temryuk Dəniz Aşırma Terminalı” şirkətlərinin Rusiya dövlətinin gəlirinə keçirilməsi barədə qərar çıxarıb.

Məhkəmə belə qənaətə gəlib ki, mübahisəli aktivlər “Müdafiə və təhlükəsizlik baxımından strateji əhəmiyyət daşıyan təsərrüfat cəmiyyətlərinə xarici investisiyaların qoyulması qaydası haqqında” qanunun pozulması ilə əldə olunub. Belə ki, həmin sövdələşmələr Rusiya hökuməti ilə razılaşdırılmayıb.

Lent.az

“Azərişıq” ASC Xocalı rayonu Almalı, Mehdibəyli, Aşağı Qılıçbağ, Çanaqçı, Pirlər, Dağyurd, Qarabulaq və Qarakötük yaşayış məntəqələrinin xarici və daxili elektrik şəbəkəsini yenidən quracaq.

Bizimesr.com xəbər verir ki, bununla bağlıə elan edilmiş tenderin nəticəsi açıqlanıb.

Məlumatda deyilir ki, tenderin qalibi “HARMONY İNDUSTRİAL CONSTRUCTİON AND ENGİNEERİNG GROUP” MMC olub. Tərəflər arasında anlaşmaya əsasən layihənin icrasına 7 milyon 880 min 419 manat xərc çəkiləcək.

Qeyd edədk ki, sözügedən şirkət 2005-ci ildə yaradılıb. 10 manat nizamnamə kapitalına malik olan “Harmony İndustrial Construction and Engineering Group” MMC-nin direktoru Orucov Əlövsət Bilal oğludur. Şirkətin hüquqi ünvanı isə Ceyhun Hacıbəyli küçəsi, ev 52, mənzil 20-də yerləşir.

Tribuna.az-ın araşdırması zamanı bəlli olub ki, bu ünvanda daha iki şirkət qeydiyyatdadır. Onlardan biri “Piramida-2001” MMC, digəri isə “A-Marble” MMC-dir. Əlövsət Orucov həm də “A-Marble” MMC-nin qanuni təmsilçisidir. “Piramida-2001” MMC də onun nəzarətindədir. Bu şirkətin qanuni təmsilçisi Orucova Maya Zülfüqar qızı olub. Ehtimal olunur ki, Maya Orucova Əlövsət Orucovun xanımıdır.

Xatırladaq ki, Ağstafanın icra başçısı Seymur Vaqif oğlu Orucovdur. Onun Əlövsət Orucovla hansı qohumluq əlaqəsinə malik olması barədə açıq mənbələrdə heç bir məlumat yoxdur. Lakin belə bir ehtimal var ki, Maya Orucova ilə Seymur Orucov yaxın qohumdurlar.(Bizimesr.com)

Yazıda adları keçən qurum və şəxslərin də mövqeyini dərc etməyə hazırıq.