“Servis+” MTK qalmaqalı: Təsisçilər Bakı Kommersiya Məhkəməsinin qərardadına qəti etiraz edirlər -TƏFSİLAT

“Servis+” Mənzil-Tikinti Kooperativi (MTK) ətrafında uzun müddətdir davam edən məhkəmə çəkişməsi yeni mərhələyə keçib. Kooperativin əsas təsisçiləri Bakı Kommersiya Məhkəməsinin son qərardadının qanunsuz olduğunu iddia edərək Ali Məhkəmənin sədri və Məhkəmə-Hüquq Şurasının sədri İnam Kərimova, ədliyyə naziri Fərid Əhmədova, Bakı Apellyasiya Məhkəməsinin sədri Mübariz Əhmədova və digər aidiyyəti dövlət qurumlarına müraciət ünvanladıqlarını bildirirlər.
Təsisçilərin sözlərinə görə, “Servis+” MTK-nın nizamnamə kapitalının 71,2 faizinə sahib olan əsas investorlar təxminən bir il əvvəl kooperativin idarəçiliyindən kənarlaşdırılıblar. Onlar iddia edirlər ki, bundan sonra layihənin keçmiş rəhbəri Arzu Kazımov kooperativ üzərində faktiki nəzarəti ələ keçirib, nəvəsi Kamal Məmmədovu MTK sədri kimi təqdim edərək yaşayış kompleksində mənzillərin satışını davam etdirib.
Müraciətdə qeyd olunur ki, Qaradağ rayonu, Lökbatan qəsəbəsində inşa edilən 8 bloklu, 16 mərtəbəli yaşayış kompleksi ilə bağlı məhkəmə çəkişmələri davam etdiyi halda mənzillərin satışı dayandırılmayıb. Təsisçilər hesab edirlər ki, bu vəziyyət həm onların əmlak hüquqlarının pozulmasına, həm də mənzil alan vətəndaşlar üçün gələcəkdə ciddi hüquqi problemlərin yaranmasına səbəb ola bilər.
Onların bildirdiyinə görə, Bakı Kommersiya Məhkəməsi 2026-cı ilin yanvar ayında iddianın təmin edilməsi tədbiri kimi kooperativdə mənzillərin satışı və digər sərəncam əməliyyatlarının dayandırılması barədə qərardad qəbul edib. Bu qərarın icrası üçün Qaradağ Rayon İcra Şöbəsi tərəfindən müvafiq tədbirlərin görüldüyü, xəbərdarlıqlar edildiyi qeyd olunur.
Təsisçilər iddia edirlər ki, buna baxmayaraq satış prosesi davam edib. Onların sözlərinə görə, icra məmurları tərəfindən aparılan yoxlamalar nəticəsində bu hal müəyyən edilib, Kamal Məmmədov barəsində inzibati protokol tərtib olunub və Qaradağ Rayon Məhkəməsi tərəfindən inzibati məsuliyyət tədbiri tətbiq edilib. Bildirilir ki, sonradan Bakı Apellyasiya Məhkəməsi də həmin qərarı qüvvədə saxlayıb.
Müraciətdə daha sonra qeyd edilir ki, kooperativin ümumi yığıncağında Kamal Məmmədov vəzifədən uzaqlaşdırılıb, Zəka Zeynalov yeni sədr seçilib və bu dəyişiklik dövlət reyestrində də qeydə alınıb. Lakin təsisçilər iddia edirlər ki, dövlət reyestrində qanuni təmsilçi kimi qeydiyyata alınmasına baxmayaraq, Zəka Zeynalov bu günədək kooperativin inzibati binasına daxil ola bilmir və faktiki idarəetməni həyata keçirə bilmir.
Onların sözlərinə görə, bu səbəbdən Bakı Kommersiya Məhkəməsinə müraciət edilərək yeni seçilmiş sədrin fəaliyyətinə maneələrin aradan qaldırılması, kooperativ sənədlərinin mühafizəsi və qanuni idarəetmənin təmin edilməsi üçün müvəqqəti təminat tədbirlərinin görülməsi xahiş olunub. Lakin təsisçilər hesab edirlər ki, məhkəmənin 14 iyul tarixli son qərardadı bu tələbləri təmin etməyərək mövcud vəziyyətin dəyişmədən qalmasına səbəb olub.
Təsisçilər bildirirlər ki, son qərardad məhkəmənin bu ilin yanvar ayında qəbul etdiyi və mənzil satışlarını qadağan edən qərardadla ziddiyyət təşkil edir. Onların fikrincə, bu vəziyyət qanunsuz hesab etdikləri fəaliyyətin davam etməsinə hüquqi zəmin yarada bilər.
Müraciətdə həmçinin iddia olunur ki, Arzu Kazımov və onun vəkili müxtəlif məhkəmə instansiyalarında əlaqələrinin olduğunu bildirirlər. Bu iddialarla bağlı redaksiyamızın müstəqil təsdiqləyici məlumatı yoxdur və adı çəkilən şəxslərin mövqeyi təqdim olunan materialda yer almır.
Təsisçilər hüquq-mühafizə orqanlarını, Məhkəmə-Hüquq Şurasını və digər aidiyyəti dövlət qurumlarını Bakı Kommersiya Məhkəməsinin əvvəlki qərardadlarının icrasının təmin edilməsinə, kooperativin sənədlərinin və əmlakının qorunmasına, mübahisəli mənzil satışlarının dayandırılmasına və qanuni idarəetmənin bərpasına kömək göstərməyə çağırırlar.
Qeyd: Məqalədə yer alan ittiham və iddialar “Servis+” MTK-nın təsisçilərinin müraciətinə əsaslanır. Arzu Kazımovun, vəkili Ruslan Umudovun, Bakı Kommersiya Məhkəməsinin və adı çəkilən digər şəxslərin bu iddialarla bağlı mövqeyi təqdim edilməyib. Onların cavabı daxil olduğu təqdirdə dərc olunmağa hazırdır.(gundemxeber.com)

Bakının Nərimanov rayonu, “Bakmil” metrostansiyasının qarşısında, Ələsgər Qayıbov küçəsində uzun müddətdir aparılan yol-təmir işləri sakinləri və sürücüləri çətin vəziyyətdə qoyub.

Bizimesr.com bildirir ki, bu barədə yazan sözügedən yoldan mütəmadi istifadə edən sakinlər bildirib ki, narazılıq yaradan iş uzun müddətdir yarımçıq vəziyyətdə qalıb. Sakinlər bildirib ki, yolun 2027-ci ildə təhvil veriləcəyi deyilsə də, hazırda ərazidə heç bir tikinti və ya təmir işi aparılmır.

Sakinlərin sözlərinə görə, yolun qazılıb bu vəziyyətdə saxlanılması gündəlik hərəkəti ciddi şəkildə çətinləşdirir. Xüsusilə küləkli havalarda ərazi güclü toz dumanına bürünür, göz-gözü görmür. Yağış yağan zaman isə yol palçığa çevrilir və həm piyadaların, həm də nəqliyyat vasitələrinin hərəkəti üçün ciddi problem yaradır.

Bildirilir ki, yolun ətrafında müxtəlif dövlət və özəl idarələr, eləcə də müəssisələr fəaliyyət göstərir. Həmin müəssisələrdə çalışan əməkdaşlar illərdir davam edən yol tikintisi və təmir prosesinin yaratdığı narahatlıqla üz-üzə qalıblar.

İşə gedib-gəlmək həm vaxt itkisinə, həm də əlavə çətinliklərə səbəb olur. Ərazidən hər gün istifadə edən vətəndaşlar bildirirlər ki, yolun bu vəziyyətdə saxlanılması qəbuledilməzdir.

Onların sözlərinə görə, əgər təmir işlərinə başlanılıbsa və işlər 2027-ci ilə təjvil veriləcəksə, proses yarımçıq saxlanılmamalı, qısa müddətdə başa çatdırılmalıdır. Sakinlər aidiyyəti qurumlardan yolun təmirini sürətləndirməyi, yarımçıq qalan işləri qısa müddətdə yekunlaşdırmağı və ərazidə normal hərəkət şəraitinin bərpa olunmasını xahiş edirlər.

Xatırladaq ki, sözügedən yoldakı işlər Azərbaycan Avtomobil Yolları Dövlət Agentliyi tərəfindən dövlət proqramına əsasən aparılır.(Bizimesr.com)

VİDEO LİNKDƏ: https://www.bizimesr.com/az/post/ayyda-nin-yarim-yapalaq-qoyub-qacdigi-yol----video-22751

Tovuz rayonunun Əlibəyli kəndində yaşayan şəhid Sərxan Həsənovun anası yenidən müraciət edib.

Şəhid anası yayımladığı videomüraciətdə ailəsinin ağır şəraitdə yaşadığını bildirərək, ona mənzil verilməsini xahiş edib. O qeyd edib ki, dəfələrlə Tovuz Rayon İcra Hakimiyyətinə müraciət etsə də, probleminin həlli ilə bağlı müsbət cavab ala bilməyib.

Şəhid anası deyib ki, Tovuz rayon icra başçısı Məmməd Məmmədov ilə görüş zamanı ona “Biz sizə ev verən deyilik, başqa yerə müraciət edin” cavabı verilib. O, ölkə rəhbərliyinə müraciət edərək, yaşadığı çətin şəraitin nəzərə alınmasını və ailəsinin normal yaşayış şəraiti ilə təmin olunmasını istəyib.

Qeyd edək ki, bu, şəhid Sərxan Həsənovun anasının ev məsələsi ilə bağlı etdiyi növbəti müraciətdir.(Bizimesr.com)

VİDEO LİNKDƏ: https://www.bizimesr.com/az/post/tovuz-icra-bascisi-sehid-anasina-biz-size-ev-veren-deyilik-cavabini-verib---sehid-anasi-muraciet-etdi-22746

Azərbaycanda 2026-cı ilin ilk yarısında turizm sektorunda geriləmə, bəlkə də çökmə baş verib.

2026-cı ilin ilk 6 ayında ölkəyə gələn turistlər azalıb, otellərdə gecələmələrin faizi aşağı düşüb, nəticədə otellərin gəlirlərində də geriləmə baş verib. İlk 6 aydva otellərin cəmi gəliri 279 milyon manat olub.

Belə ki, bu ilin yanvar-iyun aylarında hotellərdə gecələmələrin sayı ötən ilin eyni dövrü ilə müqayisədə 8,3 faiz azalaraq 1 milyon 807,9 min olub. Dövlət Statistika Komitəsi xəbər verir ki, otellərdə gecələmələrin böyük hissəsi yenə də Bakının payına düşüb – təqribən 59 faiz.

Bakıdan sonra turistlər ən çox Qusara (gecələmələrin 5,9 faizi), Naftalana (5,5 faiz), Qəbələyə (3,4 faiz) və Qubaya (3,1 faiz) üz tutublar.

Gecələmələrin 3,0 faizi Lənkəranda, 2,1 faizi Xaçmazda, 1,9 faizi Gəncədə, 1,8 faizi Şuşada, 1,5 faizi Şamaxıda, 1,2 faizi Naxçıvan Muxtar Respublikasında, 1,1 faizi Şabranda, 1,1 faizi Masallıda və 9,6 faizi digər şəhər və rayonlardakı hotellərdə qeydə alınıb.

Azalmanın əsas səbəbi ölkəyə gələn xarici turistlərin sayının azalma və onların htellərdə keçirdiyi günlərin aşağı düşməsidir. Belə ki, 2026-cı ilin yanvar-iyun aylarında əcnəbilərin və vətəndaşlığı olmayan şəxslərin keçirdiyi gecələmələrin sayı ötən ilin eyni dövrü ilə müqayisədə 10,3 faiz azalaraq 1 milyon 069,8 min olub ki, bu da ümumi gecələmələrin 59,2 faizini təşkil edir.

Hotellərdə gecələmələrin ümumi sayının 14,1 faizi Türkiyə, 13,0 faizi Rusiya Federasiyası, 7,1 faizi Hindistan, 6,9 faizi İsrail, 4,6 faizi Səudiyyə Ərəbistanı, 4,6 faizi Çin, 4,1 faizi Qazaxıstan, 3,9 faizi Özbəkistan, 3,8 faizi Pakistan, 2,4 faizi Birləşmiş Ərəb Əmirlikləri, 2,3 faizi Böyük Britaniya, 2,3 faizi ABŞ, 1,7 faizi Almaniya, 1,3 faizi Küveyt, 1,1 faizi İtaliya, 1,0 faizi Gürcüstan, 0,8 faizi İran, 0,7 faizi Koreya Respublikası, 0,7 faizi Ukrayna, 23,6 faizi isə digər ölkələrin payına düşüb.

Xarici turistlərin 82%-i Bakıdakı otelləri seçir. Turistlərin 5,6 faizi Qusarda, 5,6 faizi Naftalanda, 2,1 faizi Qəbələdə, 1,0 faizi Qubada, 3,8 faizi isə digər şəhərlərdəki hotellərdə qalıblar.

Ümumilikdə Azərbaycan hotellərindən istifadə edənlərin 60%-i xaricilər, 40%-i yerli vətənldaşlar olub.

Turist sayının azalması hotellərin gəlirlərini də aşağı salıb. Belə ki, ilk 6 ayıda hotellər cəmi 279 milyon manat gəlir əldə ediblər. Bu da əvvəlki ilin ilk yarısına nisbətən 11 milyon manat və ya 3,8% azdır. Hotellərin qazancı əsasən nömrələrin satışından (61,1 faiz), iaşə xidmətlərindən (26,7 faiz) olub. Gəlirlərin 3,2 faizi müalicə və sağlamlıq xidmətlərindən, 9,0 faizi isə digər xidmətlərdən əldə edilib.

Qeyd edək ki, son illər Azərbaycanda Turizm inkişaf etdirilməsi üçün Dövlət Turizm Agentliyinin keçirdiyi tenderlərin dəyəri bəlkə də yüzmilyon manatlarla ölçülür. Amma nəticə göz qabağındadır və bu sahə nəinki inkişaf edir, ciddi geriləmə edir. Görünür, bu vəsaitlər ya düzgün xəırclənmir, yada ümumiyyətlə, xərclənmir.

Qeyd edək ki, Dövlət Turizm Agentliyinin rəhbəri Fuad Nağıyevdir. Fuad Nağıyev ixtisasca hüquqşunasdır və Bakı Dəmir-Beton-8" ASC-də baş direktoru olub. Daha sonra Bakı Dəmir-Beton-8" ASC-dən Milli Turizm Təbliğat Bürosu publik hüquqi şəxsin direktoru vəzifəsinə keçib.

Bizimesr.com

Elçin Nəriman oğlu Hüseynli Azərbaycanın Hindistanda, eyni zamanda Banqladeşdə, Butan Krallığında, Maldiv Respublikasında, Nepalda və Şri-Lanka Demokratik Sosialist Respublikasında fövqəladə və səlahiyyətli səfiri vəzifəsindən geri çağırılıb.

Prezident İlham Əliyev bununla bağlı Sərəncam imzalayıb.

Dövlət başçısının digər Sərəncamı ilə E.Hüseynli Azərbaycanın İtaliyada fövqəladə və səlahiyyətli səfiri təyin edilib.

Qeyd edək ki, Elçin Hüseynli 2023-cü ildə Azərbaycanın Hindistandakı səfiri təyin edilmişdi.

Ölkədə kimi dindirsən təhsil sistemi haqında danışanda ağzından od tökülər. Tam məsuliyyəti ilə demək olar ki, Azərbaycan təhsili bütün tarixi boyu indiki acınacaqlı durumda olmayıb. Orta əsrlər mollaxanalarında, mədrəsələrində belə vəziyyət indikindən ürəkaçan olub. Əvvəllər hamının müqəddəs məkan bildiyi, məbəd hesab elədiyi məktəblər nifrət , müəllimlər qınaq obyektinə çevrilib. Bu gün məktəblər bilik verən təhsil ocağı yox, sadəcə arayış, attestat verən bir idarə funksiyasını yerinə yetirən korrupsiya və rüşvət yuvasıdır. Müəllimlər qapazaltı, qorxaq bir duruma salınıb, hüquqsuz sənəd yazan robota çevrilib. Təhsil sektorunda daydaylı direktorlar at oynadır, regional təhsil idarələri gəlirlərin bölüşdürülməsi ilə məşğuldur. Əlqərəz, bu gün təhsil sistemində kimin əlində fürsət varsa qazanır, dağıdır, məhv edir. Olan isə bu millətə və onun gələcəyinə olur...
Hər il keçirilən buraxılış imtahanlarında ortaya çıxan rüsvayçı rəqəmlər təhsil sitemindəki eybəcərliklərin bariz nümunəsidir. Nəzərə alsaq ki, qiymət alanların mütləq əksəriyyəti hazırlıq kurslarına gedən şagirdlərdir, burada ümuiyyətlə məktəblərin hər hansı bir rolundan söhbət gedə bilməz. Artıq yuxarı siniflərdə tədris yox səviyyəsindədir, heç bir kursa getməyən şagirdlər görüntü yaratmaq xatirinə məktəbə gətirilir, sadəcə tədris tamaşası qurulur. Bu həm də böyük biznes şəbəkəsidir. Repititor yanına gedən şagirdlər bunun müqabilində direktorlara aylıq və illik haqq ödəyirlər. Nəticədə milyonların dövr etdiyi “kurs bazarı” formalaşır, müdhiş korrupsiya və rüşvət piramidası yaradılır.
Təhsil sistemində dəhşətli dərəcədə dərəbəylik hökm sürür. Kimsə kimsənin kitabını oxumur, kimsənin kimsəyə sözü keçmir. Təhsil müxtəlif maraqların toqquşduğu, qruplaşmaların üstünlük qazanmağa çalışdığı bir sahəyə çevrilib. Ən üst düzən bürokratiyadan tutmuş regional qruplaşmalara qədər bütün məmur aparatı təhsil sistemindən pay qopartmağa çalışır, öz kadrlarını yerləşdirir, klanını formalaşdırır. Bəzən bir məktəb direktoruna və yaxud regionala xüsusi qaydada ,,yerləşdirilmiş'şöbə müdirlərinə nəinki regional idarə müdiri , heç nazirlik belə söz keçirdə bilmir. Çünki arxasından elə bir qüvvə boylanır ki, adamın çox şeyə heyifi gəlir. Bizə isə çox hörmətli Mehriban xanımın apardığı təhsil siyasətinin belə düşmənlərinin kimlər olduğunu ifşa etmək düşür. Azərbaycan təhsili müxtəlif qruplaşmaların maraq , bir çox hallarda isə mübarizə meydanına çevrilib. Qeyd etdiyimiz kimi nəinki regional idarələrə, heç nazirliyə belə tabe olmaq istəməyən məktəb direktorları, şöbə müdirləri at oynadırlar. Qohumbazlıq, tayfabazlıq təhsil sistemini metastaz kimi məhv edir. Direktorların işə qəbul imtahanı adlı tamaşa qurub pərdəarxasında iyrənc oyunlar oynanılır. Kimlərinsə qohumu, qudası, dostu, sevgilisi olmaq bu sahədə karyera qurmaq üçün əsas kriteriyadır. Artıq özbaşnalıqlar o həddə çatıb ki, yerindən duran hər kəs təhsil sistemindən pay qoparmaq eşqinə düşür. Eşq demişkən bütün bu oyunların, kataklizmaların mərkəzində duran əas fiqurun-Eşqi Bağırovun adını qeyd etməmək olmaz. Təhsil sistemində ən böyük qruplaşmanın yaradıcısı, “dövlət içərisində dövlət” yaratmaq iddiasında olan cənab Bağırov rəhbərlik eydiyi Məktəbəqədər və Ümumi Təhsil üzrə Dövlət Agentliyini şəxsi maraqların qorunduğu bir təşkilata çevirib. Kadr siyasəti elə bir vəziyyətdədir ki, artıq təhsil sistemi “vassalımın vassalı mənim vassalım deyil” prinsipi ilə idarə olunur. Nazirliyə tabe olan idarələr, qurumlar müxtəlif maraqları təmsil etdikləri üçün çox vaxt bir-birinin işini sabotaj edir, biri digərinə mane olur. Təhsil sahəsində islahatçılıq xəttini qorumağa çalışan nazirin mütərəqqi yenilikləri əksər hallarda bu qruplaşmalar tərəfindən qəsdən boğulur və yaxud yarıtmaz şəkildə həyata keçirilir.
“Ədalət” adıyla pərdələməyə çalışan cənab Bağırovun fəaliyyəti geniş araşdırılmalıdır...
MÜDTAnın fəaliyyəti sanki Təhsil nazirliyini oyundankənar vəziyyətə salmaq, cəmiyyətdə narazılıq formalaşdırmaq üzərində qurulub. Baş verən bütün ədalətsizlikləri əslində “Ədalət” adıyla pərdələməyə çalışan cənab Bağırovun fəaliyyəti geniş araşdırılmalıdır. Təhsil sistemində baş verən oyunlara son qoyulmazsa bunun fəsadlarını hələ uzun illər aradan qaldırmaq mümkün olmayacaq. Cənab Prezidentin yürütdüyü milli maraqlara söykənən siyasi kursu sabotaj edən, cəmiyyətdə narazılıq formalaşdıran “təhsil biznesi” kökündən boğulmalı, qruplaşmalar neytrallaşdırılmalı, şəffaf kadr siyasəti aparılmalıdır. Məktəbin, müəllimin nüfuzu bərpa olunmalı, tədris prosesi özəl kurslardan sinif otaqlarına qaytarılmalıdır. Milli varlığımızın təməl prinsipi olan təhsil sistemi bazar prinsiplərindən təmizlənməyənə qədər gələcəyimiz böyük təhlükə altındadır. Hər kəs öz sahəsində çalışsa daha yaxşı olardı-bazarkom bazarda, müəllim də məktəbdə...
PS: Növbəti yazımızda kim kimin arxasından çıxır konkret adlar,şəxslər barədə geniş müəlumat verəcəyik. Ardı var..
Nicat Mahmudov - FRAKSİYA.az

Bu günlərdə sosial şəbəkələrdə və mediada təhsil sistemi üçün üz qarası olan məlumata rast gəldik. Sən demə bu oyunbazlığı törədən Bakı şəhəri 93 nömrəli məktəbin direktoru, hər addımda fəxrlə Bakı Təhsil İdarəsinin müdiri Nərminə Hüseynovanın can sirdaşı, ən yaxın rəfiqəsi olan Xalidə İbrahimova imiş.

Hadisə necə ifşa olunub?Məktəbin yekun qiymətləndirməsində qeyri-kafi qiymət alan şagird Dövlət İmtahan Mərkəzinin keçirdiyi buraxılış imtahanından 5 qiymət alıb. Təəccüb doğuran bu halın sadə anatomiyası belədir. Hansı şagirdlər direktorla razılaşaraq rüşvət hesabına dərsə gəlmir onun illik qiymətləri yaxşı və əla olur. Kim derektorun müqəddəs siyahısından kənar repetitor yanına gedirsə, rüblük və illik qiymətləri aşağı olur və ya direktorun qəzəbinə uğrayır, sinifdə qalmaq təhlükəsi ilə üzləşir. Həll yolu sadədir, valideyn əl-ayağa düşür, direktorla dil tapan tələdən qurtulur. Dil tapmaq dedikdə bu elə-belə deyil, valideyn minlərlə manatından keçməlidir.

Görün Azərbaycan Texniki İntitutunun məzunu olan Xalidə İbrahimova BŞTİ-nin müdiri ilə nə qədər yaxındır ki, ötən dərs ilində Bakı şəhəri 42 nömrəli məktəbin direktorluğu da ona tapşırıb. Məlumata görə məktəb direktoru, müavin və digər vəzifələrə təyinat məsələlərində Xalidə İbrahimova BŞTİ-nin müdiri Nərminə xanımın ən etibarlı vasitəçisidir. Bu səbəbdən o qədər maddi zənginlik qazanıb ki, agentlikdə və idarədə heç kimi saymır. 42 nömrəlı məktəbin əvvəlki direktoru Firəngiz Həmidova nə qədər əzazil, rüşvətxor olsa da, Xalidə İbrahimova onun əməllərinə rəhmət oxutdurur.

Vaxtilə Təhsil Nazirliyində çalışan, Mikayıl Cabbarovun təmizləmə əməliyyatı zamanı Nazirlikdən uzaqlaşdırılan Xalidə İbrahimova BŞTİ-də işlədiyi dövrdə məktəb direktorlarını, indi isə müəllim, şagird və valideynləri cana yığıb.

Məlumata görə MÜTDA direktoru Eşqi Bağırov bir neçə dəfə onu zərərsizləşdirmək istəsə də, Xalidə İbrahimova Nazirlikdəki dayaqları vasitəsilə və Nərminə xanımın yuxarı rəhbərlikdən dəstək alaraq göstərdiyi müqavimətlə Agentlik rəhbərinin qərarını bərtəraf etməyi bacarıb.

Xalidə İbrahimova o qədər hökm sahibidir ki, istədiyi zaman BŞTİ müdirinin yanına girə bilir, başqa direktorların göndərdiyi sərvətlər də onun vasitəsilə ünvanına çatdırılır. Ad günləri və adi görüşlərdə Nərminə Hüseynova ilə çəkdirdiyi məhrəm foto və video görüntülər isə onun yaxınlığa dair and yerinə çevrilib. Yeni müştərilərə göstərir, onların inamını qazanır və iş həll etmək potensialını sərgiləyir.

Bu qədər hökm sahibi olan məktəb direktoru üçün hansısa şagird və müəllimin taleyi ilə oynamaq kiçik məsələdir. Adamın yuxarıların qara kassası, etibarlı kadrı kimi gözü ayağının altını görmür. Ayağının altında qalanların canı çıxsın prinsipi ilə irəli, ancaq irəli... Qarşıda qandal görünür. Təkmi, cütmü? Dostları ayırmaq günahdır.(Tehsilmedia.info)

EFFEKT-İNŞAAT" Mənzil-Tikinti Kooperativinin dövlət büdcəsinə iri məbləğdə vergi borcu var.

32gun.az-ın əldə etdiyi məlumata görə, sözügedən kooperativin hazırda dövlət qarşısında 294.214,43 AZN məbləğində vergi borcu mövcuddur.

Qeyd edək ki, 1000 AZN nizamnamə kapitalı olan MTK Bakı şəhəri, Nəsimi rayonu, Neftçilər prospekti, ev 145, mənzil 16 ünvanında hüquqi qeydiyyatdadır. Kooperativin qanuni təmsilçisi Tofiq Sultan oğlu Əhmədovdur.

Azərbaycanın bank-maliyyə və sahibkarlıq sektorunda uzun illər əsas söz sahiblərindən biri olmuş, ictimaiyyətdə daha çox “Şapka Mamed” ləqəbi ilə tanınan Məmməd Musayevin ətrafında qalmaqal daha da dərinləşir. Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinin keçirdiyi son əməliyyat dövlətə məxsus “Aqrarkredit” QSC BOKT-un keçmiş rəhbərinin cinayət təqibi ilə üz-üzə qaldığını açıq müstəviyə çıxardı.

Məmməd Musayevin dövründə “Aqrarkredit”də baş verən qanunsuzluqlar yalnız bir istiqamətlə məhdudlaşmır. Onun rəhbərlik etdiyi dönəmin maliyyə maxinasiyaları artıq digər dövlət və özəl qurumlardakı əlaqələri ilə birgə araşdırılır.

Məmməd Musayev bir iş üzrə deyil, bir neçə epizod və müxtəlif qurumlardakı qanunsuz əməlləri üzrə cinayət məsuliyyətinə cəlb olunacağı istisna edilmir.

DİN-in Baş Mütəşəkkil Cinayətkarlıqla Mübarizə İdarəsi tərəfindən həyata keçirilən əməliyyat nəticəsində kənd təsərrüfatına dəstək adı altında dövlət vəsaitlərini mənimsəyən mütəşəkkil dəstə ifşa olunub. Həbs edilənlər arasında Məmməd Musayevin birbaşa qohumları və idarəçilikdəki yaxın adamları yer alır.

Bilinən odur ki, “Şurabad broyler” MMC-nin direktoru Tofiq Musayev Məmməd Musayevin qardaşı oğludur. “Salyansüd” MMC-nin qanuni təmsilçisi Fazil Rüstəmov isə Məmməd Musayevin Azərbaycan Sahibkarlar Konfederasiyasındakı müavini, Fuad Süleymanov “Şurabad quşçuluq” MMC-nin direktoru, Faiq Rüstəmov, Süleyman İsmayılov və Yaşar Qurbanov qanunsuz sxemdə iştirak edən şəxslərdir.

İlkin ittihama görə, sözügedən şəxslər regionlarda kənd təsərrüfatının inkişafı və güzəştli maliyyələşmə adı altında “Aqrarkredit” QSC-dən 100 milyon manatdan artıq kredit alıblar. Lakin araşdırmalar nəticəsində bəlli olub ki, həmin nəhəng vəsait aqrar sektora deyil, şəxsi ehtiyaclara və mütəşəkkil qrupun biznes maraqlarına sərf olunub. Təqsirləndirilən şəxslər barəsində Cinayət Məcəlləsinin 178.4-cü (xüsusilə külli miqdarda dələduzluq) maddəsi ilə cinayət işi açılıb və 4 aylıq həbs qətimkan tədbiri seçilib.

Cinayət təqibində əsas diqqət Məmməd Musayevə yönəlib. İstintaq materiallarına əsasən, həbs edilənlər bu cinayətləri məhz Məmməd Musayevin bilavasitə göstərişi və rəhbərliyi ilə törədiblər.

Media araşdırmalarında xüsusi yer tutan digər böyük maxinasiya isə 2014-cü ildəki "Beynəlxalq Bank" qalmaqalından sonra müflis olan "Azərinşaatservis" MMC-nin əmlaklarının mənimsənilməsi ilə bağlıdır. Müflisləşmədən sonra "Azərinşaatservis"in bütün texnikaları, avadanlıqları və torpaq sahələri “Aqrarkredit” BOKT-un idarəçiliyinə verilmişdi. Məqsəd bu əmlakları hərrac yolu ilə satıb, quruma borcu olan 49 fiziki və hüquqi şəxsin (tələbkarın) pulunu ödənilmək idi.

Lakin media araşdırmaları bu prosesin arxasında şəbəkələşmiş bir qrupun durduğunu ortaya çıxarıb.

Məlum olur ki, sxemin başında Məmməd Musayevlə yanaşı, vaxtilə “Azərsu”da müavin postunu tutmuş Arzuman Abbasov dayanıb. Haqqin.az saytının məlumatına görə, proseslərin qanun çərçivəsinə salınmasını “Aqrarkredit”in hüquq şöbəsinin müdiri Vilayət adlı şəxs təşkil edib. Qanunsuz əməliyyatlardan gələn maliyyə axınını və bölüşdürülməni isə Arzuman Abbasovun yaxın adamı və "qara kassası" kimi tanınan Nazim adlı şəxs idarə edib. Zərərçəkənlərin iddialarına görə, bu şəbəkəyə Ədliyyə Nazirliyinin Probasiya Baş İdarəsinin rəisi Vilayət Məmmədov, Binəqədi İcra Şöbəsinin rəisi Fuad Nəbiyev və icra məmuru Asəm Əhmədov da köməklik göstəriblər.

Bu maxinasiyanın pik nöqtəsi Binəqədi rayonunda yerləşən 3.5 hektarlıq torpaq sahəsi ətrafında yaşanıb. Real bazar dəyəri 30-35 milyon manat olan bu ərazi 49 payçının, o cümlədən xeyrinə 3.8 milyon manatlıq məhkəmə qətnaməsi olan “SİRR-M” MMC-nin borclarının ödənilməsinə yönəldilməli idi. Lakin proseslərdə dəfələrlə qanun pozuntularına yol verilib. Bazar dəyəri 30 milyon manatdan çox olan torpaq sahəsinə əvvəlcə Binəqədi İcra Şöbəsi tərəfindən 13 milyon manat qiymət qoyulub, etirazlardan sonra bu rəqəm müəmmalı şəkildə 25 milyon manata qaldırılıb. “Kəngərli” MMC və digər tələbkarların şikayəti ilə Binəqədi Rayon Məhkəməsi və Bakı Apellyasiya Məhkəməsi icra məmurunun və “Aqrarkredit”in bu hərəkətlərini qanunsuz hesab edib. Məhkəmənin qadağalarına və 18 mart 2026-cı ildə icra məmurunun sifarişi geri çəkməsinə baxmayaraq, cəmi 4 gün sonra - 22 mart 2026-cı ildə, qeyri-iş günündə “Aqrarkredit”in təşkilatçılığı ilə gizli hərrac keçirilib. 8 aprel 2026-cı il tarixli hərrac protokoluna əsasən, “Aqrarkredit” əldə olunan vəsaitdən 1.6 milyon manatı icra xidməti haqqı, 863 min manatı isə icra şöbəsinin ödənişi kimi silib. Lakin torpağın hansı qiymətə satıldığı gizlədilib və 49 payçıya tək bir qəpik də ödənilməyib.

Bir bu epizod üzrə Məmməd Musayevin rəhbərliyi ilə 30 milyon manatlıq torpaq sahəsi “buxarlanıb”, 49 payçı “quru yerdə” qalıb.

Məmməd Musayev “Aqrarkredit”-ə rəhbərlik etdiyi müddətdə bu şəkildə neçə torpağı, əmlakı, mal-mülkü payi-mal edib?

Bunu bir özü bilir, bir də onunla bu işlərdə əli olanlar. İndiki halda isə Məmməd Musayev və ətrafı bildiklərini – illər ərzində törətdikləri maxinasiyaları bir-bir açıb deməlidirlər. Baş Mütəşəkkil Cinayətkarlıqla Mübarizə İdarəsində proses başlayıb və görünən odur ki, nə Məmməd Musayevin, nə də onunla əlbir olub iş görənlərin başında “şapka” qalmayacaq.

2001-ci ildən 2025-ci ilə qədər 24 il boyunca “Aqrarkredit” QSC-nin İdarə Heyətinin sədri olan, eyni zamanda Azərbaycan Sahibkarlar Konfederasiyasının prezidenti kimi fəaliyyət göstərən Məmməd Musayev maliyyə naziri Sahil Babayevin sədrliyi ilə ötən il keçirilən növbədənkənar iclasdan sonra postundan uzaqlaşdırılmışdı.

O zaman bu addım adi kadr dəyişikliyi kimi qələmə verilsə də, bu gün ortaya çıxan mənzərə tamamilə fərqli reallığı göstərir. Dövlətin milyardlarla manatlıq resursunu idarə edən BOKT-un daxilində yaradılmış bu kölgə şəbəkəsinin fəaliyyəti indi bütün incəlikləri ilə araşdırılır.

Mediaya sızan məlumatlar onu göstərir ki, Məmməd Musayevin məsələsi yalnız “Aqrarkredit”lə bitməyəcək. Onun rəhbərlik etdiyi digər təşkilatlardakı maliyyə axınları, müflisləşən əmlakların satışı və dövlət subsidiyalarının mənimsənilməsi epizodları üzrə də araşdırmalar genişləndirilir. Yaxın günlərdə “Şapka Mamed”in rəsmi olaraq həbs olunması və ona qarşı bir neçə ağır maddə üzrə ittihamların irəli sürülməsi istisna deyil.

İddialara görə, həbs olunan şəxslər Məmməd Musayevlə birlikdə xüsusilə külli miqdarda dələduzluq cinayətinin törədilməsində iştirak ediblər. M.Musayev uzun illərdir bank sektorunda tanınan fiqurlardan biri olmaqla yanaşı, müxtəlif media orqanlarında "Turanbank"ın faktiki sahibi kimi təqdim olunur. Bu rezonans doğuran cinayət işi ilə bağlı hüquqşünas Əkrəm Həsənov da sosial şəbəkədə diqqətçəkən paylaşım edib. O, Məmməd Musayevin uzun illər Azərbaycan Mərkəzi Bankının sədri olmuş Elman Rüstəmovla yaxın münasibətlərinə diqqət çəkərək bildirib ki, bank sektorunda əsas təsir sahibi məhz bu iki şəxs olub.

Əkrəm Həsənov yazır ki, illərdir Məmməd Musayevin fəaliyyəti ilə bağlı tənqidi fikirlər səsləndirib və onun həm dövlətə məxsus "Aqrarkredit"ə rəhbərlik etdiyini, həm də Azərbaycan Sahibkarlar Konfederasiyasına başçılıq etdiyini xatırladıb. Hüquqşünasın sözlərinə görə, mətbuatda dəfələrlə Musayevin "Turanbank"ın faktiki sahibi olması barədə məlumatlar yayılsa da, bunlar indiyədək təkzib edilməyib.

Əkrəm Həsənov daha sonra hazırda müdafiəsini həyata keçirdiyi bir əmanətçi ilə bağlı məhkəmə çəkişməsinə toxunub. Onun iddiasına görə, "Turanbank" müştərinin əmanətini qaytardığını bəyan etsə də, bunu təsdiqləyən hər hansı sənəd təqdim edə bilmir.

"Belə də bank olar? Son illər bank sisteminin və əmanətlərin etibarlılığına bu bank qədər zərər vuran olmayıb", – deyə hüquqşünas qeyd edib.

O, həmçinin hüquq-mühafizə orqanlarını "Turanbank"da da genişmiqyaslı yoxlamalar aparmağa çağıraraq bildirib ki, əmanətin qaytarıldığını sübut edə bilməyən bankda daha ciddi qanun pozuntularının olması ehtimalı istisna deyil. Əkrəm Həsənov "Aqrarkredit"lə "Turanbank" arasında mümkün əlaqələrin də araşdırılmasının vacibliyini vurğulayıb və bu prosesdə ekspert kimi ödənişsiz dəstək verməyə hazır olduğunu açıqlayıb.(Musavat.com)