Son illər səhiyyə sahəsində vətəndaşların hüquqlarının qorunması məsələsi cəmiyyətdə ən çox müzakirə olunan mövzulardan biridir. Təəssüf ki, bəzi hallarda vətəndaşların şikayətləri lazımi səviyyədə araşdırılmır, məsul şəxslər isə suallardan yayınaraq susqun mövqe nümayiş etdirirlər. Belə hallardan biri də vətəndaş Nuray Abdullayevanın iddiaları ilə bağlıdır.
Şikayətçi Nuray Abdullayeva Xəbərmedia.info redaksiyasına müraciət edərək bildirib ki, o, 12 aprel 2024-cü il tarixində “Azərturkmed Hospital” tibb müəssisəsində həkim Elnur Rzayev tərəfindən tibbi xidmət alıb. Onun sözlərinə görə, göstərilən tibbi xidmət zamanı lazımi tibbi müayinələr aparılmayıb, tibbi müdaxilə düzgün icra edilməyib və pasientə qarşı kobud və laqeyd münasibət sərgilənib.
Şikayətçi bildirir ki, baş verən hadisə onun həm sağlamlığına, həm də psixoloji vəziyyətinə ciddi mənfi təsir göstərib.
Polisə müraciət edilib, amma nəticə yoxdur
Nuray Abdullayevanın sözlərinə görə, məsələ ilə bağlı o, 18 aprel 2025-ci il tarixində Daxili İşlər Nazirliyinin 102 qaynar xəttinə müraciət edib. Bundan sonra o, Xətai rayon polis bölməsinə çağırılıb. Şikayətçinin bildirdiyinə görə, polis əməkdaşı Nüsrəddin Hüseynov onunla əlaqə saxlayaraq bölməyə yaxınlaşmasını və ərizə ilə izahat verməsini tələb edib.
Xanım polis bölməsinə yaxınlaşaraq rəsmi qaydada ərizə və izahat təqdim etsə də, aradan təxminən bir ilə yaxın vaxt keçməsinə baxmayaraq müraciəti üzrə hər hansı nəticə əldə olunmayıb. Şikayətçinin sözlərinə görə, onun müraciəti üzrə lazımi araşdırma aparılmayıb və ərizə icraata götürülmədən bağlanıb.
Bu isə ciddi suallar yaradır: vətəndaşın şikayəti niyə araşdırılmayıb? Həqiqətən də tibbi səhlənkarlıq olubmu? Əgər olmayıbsa, niyə rəsmi izahat verilmir?
Redaksiyanın sorğusu cavabsız qaldı
Məsələ ilə bağlı Xəbərmedia.info redaksiyası Kütləvi İnformasiya Vasitələri haqqında qanunun tələblərinə uyğun olaraq adı çəkilən şəxslərin mövqeyini öyrənmək məqsədilə sorğu göndərib.
Sorğuda aşağıdakı məsələlərə aydınlıq gətirilməsi xahiş olunub:
- Elnur Rzayevin “Azərturkmed Hospital” tibb müəssisəsində həkim kimi fəaliyyət göstərib-göstərməməsi
- Nuray Abdullayevaya tibbi xidmət göstərilib-göstərilməməsi
- Pasientin lazımi müayinə aparılmaması, tibbi müdaxilənin düzgün icra edilməməsi və kobud davranış barədə iddialara münasibət
- Bu məsələ ilə bağlı tibb müəssisəsi tərəfindən hər hansı araşdırmanın aparılıb-aparılmaması
- Həkimin tibbi təhsil aldığı ali təhsil müəssisəsi və ixtisası
- Azərbaycan Respublikasında plastik-cərrah kimi fəaliyyət göstərmək üçün rəsmi icazə və ya sertifikatın olub-olmaması
Redaksiya həmçinin mövcud olduğu təqdirdə həmin sertifikat və ya icazə sənədinin surətinin təqdim edilməsini də xahiş edib.
Lakin sorğunun göndərilməsinə baxmayaraq nə həkim Elnur Rzayevdən, nə də adı çəkilən tibb müəssisəsindən redaksiyaya hər hansı cavab daxil olmayıb.
Susmaq nə deməkdir?
İctimai əhəmiyyət kəsb edən belə ciddi iddialar qarşısında susmaq bir çox hallarda cəmiyyətdə haqlı suallar doğurur. Əgər səsləndirilən ittihamlar əsassızdırsa, niyə aydın və rəsmi mövqe açıqlanmır? Niyə vətəndaşın iddiaları faktlarla təkzib edilmir?
Unutmaq olmaz ki, səhiyyə sahəsində baş verən hər bir məsələ birbaşa insan həyatı və sağlamlığı ilə bağlıdır. Belə iddiaların cavabsız qalması isə yalnız bir vətəndaşın deyil, bütövlükdə cəmiyyətin narahatlığına səbəb olur.
Cəmiyyət cavab gözləyir
Bu gün vətəndaşın şikayəti ilə bağlı bir sıra açıq suallar qalmaqdadır:
- Tibbi xidmət zamanı həqiqətən səhlənkarlıq olubmu?
- Pasientin hüquqları pozulubmu?
- Polisə edilən müraciət niyə nəticəsiz qalıb?
- Həkimin fəaliyyəti qanunvericiliyin tələblərinə uyğundurmu?
Bu suallar cavabsız qaldıqca məsələ daha da ciddi ictimai rezonans doğurur. Redaksiya bildirir ki, qarşı tərəfin mövqeyi təqdim ediləcəyi təqdirdə dərc etməyə hazırdır.
Çünki səhiyyə sahəsində baş verən hər hansı qanunsuzluğa göz yumulması yalnız bir nəfərə deyil, bütövlükdə cəmiyyətə ağır nəticələr vəd edir.
