Paytaxtın Sabunçu rayonu, Maştağa qəsəbəsində sakinlər acınacaqlı vəziyyətlə üzləşiblər.

Oxu.Az Xəzər TV-yə istinadən xəbər verir ki, söhbət Albalılıq bağları massivi, Rauf Hacıyev küçəsi, 7-ci döngədən gedir.

Sakinlərin sözlərinə görə, uzun müddətdir davam edən kanalizasiya problemi səbəbindən küçələr çömçəquyruqların və digər su canlılarının məskəninə çevrilib.

Onlar bildiriblər ki, məsələ ilə bağlı müvafiq qurumlara dəfələrlə müraciət etsələr də, problem hələ də həllini tapmayıb.

Vəziyyət o qədər ağırlaşıb ki, bəzi ailələr evlərini su basdığı üçün ərazini tərk etmək məcburiyyətində qalıblar. Köçə bilməyən sakinlər isə hər gün antisanitar şəraitdə hərəkət etməli olurlar.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, mərkəzləşdirilmiş tullantı su şəbəkəsi olmayan ərazilərlə bağlı müvafiq layihə sənədləri artıq hazırlanıb.

Qurumdan qeyd olunub ki, şəbəkələrin inşası agentliyin tədbirlər planına uyğun olaraq mərhələli şəkildə həyata keçiriləcək.

Həmçinin vurğulanıb ki, fevral ayından etibarən su və kanalizasiya sisteminə qoşulmaq üçün yeni qaydalar qüvvəyə minib.

Bu sistemə qoşulmaq istəyən vətəndaşlar müvafiq sənədlərlə "ASAN xidmət" və ya "ASAN Kommunal" mərkəzlərinə müraciət etməlidirlər.

Bakının Qaradağ rayonu, Lökbatan qəsəbəsində yerləşən anbarı yanan “Bakı Logistika Mərkəzi” ölkənin iri yükdaşıma və anbar komplekslərindən biri hesab olunur.

Mərkəz “Meyvəli” bazar kompleksinin ərazisində fəaliyyət göstərir və logistika, saxlanma, idxal-ixrac əməliyyatları üçün istifadə olunur.

Rəsmi sənədlərdə “Bakı Logistika Mərkəzi” ayrıca fiziki şəxsə məxsus obyekt kimi deyil, “Meyvəli” MMC ilə əlaqəli struktur kimi qeyd edilir. Müəssisənin idarəçiliyi müxtəlif dövrlərdə icraçı şəxslər tərəfindən həyata keçirilib. Açıq mənbələrdə “Meyvəli” MMC-nin qanuni təmsilçiləri sırasında Rəşad Abbasovun da adı yer alıb.

Mərkəz dövlət dəstəyi ilə həyata keçirilən iri logistika layihələrindən biri kimi təqdim olunur. Layihənin formalaşdırılması və inkişafında İqtisadiyyat Nazirliyinin iştirak etdiyi, dövlət-özəl tərəfdaşlığı modelinə uyğun fəaliyyət göstərdiyi bildirilir.

“Bakı Logistika Mərkəzi” beynəlxalq nəqliyyat marşrutları baxımından da strateji mövqedə yerləşir. Buradan Avropa, Rusiya, İran, Fars körfəzi və Hindistan istiqamətlərində yük daşımalarının həyata keçirilir.

Qeyd edək ki, mayın 12-də Bakı şəhəri, Qaradağ rayonunun Lökbatan qəsəbəsində yerləşən “Bakı Logistika”ya məxsus anbarlardan birində güclü yanğın baş verib.

Yanğının söndürülməsinə FHN-in helikopteri cəlb olunub. İlkin məlumata görə hadisə nəticəsində ölən və ya xəsarət alan yoxdur. Yanğın nəzarət altına alınıb.

Aktualinfo xatırladır ki, ümumi ərazisi 35 ha olan «Meyvəli» – meyvə və tərəvəz məhsullarının saxlanması, satışı və tranziti üçün nəzərdə tutulub. “Meyvəli” MMC-nin direktoru hazırda Əbülfət Novruz oğlu Qocayevdir. O, Prezident İlham Əliyevin 02 Sentyabr 2016-cı il tarixli Sərəncamına əsasən “Ərzaq məhsullarının tədarükü və təchizatı” Açıq Səhmdar Cəmiyyətinin İdarə Heyətinin sədri təyin edilib. 2018-ci ildə “Ərzaq Məhsullarının Tədarükü və Təchizatı” ASC ləğv edilərək, Kənd Təsərrüfatı Nazirliyi yanında “Aqrar Tədarük və Təchizat” ASC yaradılıb.

Qeyd edək ki, mətbuatda Əbülfət Qocayevin yüksək çinli dövlət məmurlarından biri ilə qohum olduğu barədə məlumatlar yayılıb və bugünə kimi təkzib olunmayıb.(“Yeni Sabah”)

Son illər Bakının nəqliyyat mənzərəsi Azərbaycan Yerüstü Nəqliyyat Agentliyinin (AYNA) “islahat” xarakterli addımları ilə kökündən dəyişməyə başlayıb. Lakin bu dəyişikliklərin cəmiyyətdə yaratdığı rezonans göstərir ki, kağız üzərindəki rəqəmlərlə küçədəki reallıq arasında ciddi uçurum var. Prosesləri analiz etdikdə görürük ki, qurumun fəaliyyətində alternativsiz məhdudiyyət prinsipi üstünlük təşkil edir.

Parklanma varlanmaya xidmət edir?

Bakının mərkəzində tətbiq edilən yeni parklanma siyasəti şəhərin yükünü azaltmaq məqsədi güdsə də, bu, daha çox sürücülərin büdcəsinə zərbə vuran bir mexanizmə çevrilib. Dünyanın inkişaf etmiş şəhərlərində mərkəzi zonada parklanma bir qədər baha olsa da, şəhər kənarlarında “Park et və get” tipli geniş, ucuz dayanacaqlar fəaliyyət göstərir. Sürücü maşınını orada qoyub rahatlıqla sürətli qatara və ya metroya minə bilir. Bakıda isə AYNA mərkəzi zonalarda qiymətləri olduqca yüksək etməklə yanaşı, sürücüyə şəhər kənarında avtomobilini təhlükəsiz və “cibinə uyğun” qoyub mərkəzə keçə biləcəyi heç bir infrastruktur təklif etməyib – nə dayanacaqlar, nə sürətli ictimai nəqliyyat. Bu da prosesin nəqliyyatı tənzimləməkdən çox, sadəcə yığıma xidmət etdiyi təəssüratını yaradır.

Avtobus zolaqları da xarüqələr yaratmadı…

Şəhərin əsas prospektlərində çəkilən avtobus zolaqları AYNA-nın ən çox fəxrlə ictimaiyyətə təqdim etdiyi, loru dillə desək, öyündüyü layihədir. Lakin məsələ ondadır ki, zolaqlar çəkildikcə sərnişinlərin narazılığı azalmır, əksinə artır. Avropada, xüsusən Londonda bu sistem tətbiq olunanda avtobus parkı 100% yenilənmişdi və saniyəlik dəqiqliklə işləyən cədvəl tərtib edilmişdi. Bakıda isə zolaq boşdur, amma sərnişin 20 dəqiqə avtobus gözləyir. Nəticədə fərdi avtomobillər üçün yol daralır, tıxac daha da kəskinləşir. Yəni AYNA yolu avtobus üçün ayırsa da, həmin yolun içini dolduracaq keyfiyyətli xidməti təmin edə bilmir.

Taksiləri yoxa çıxaran “islahat”

Taksi bazarına tətbiq edilən “rəng və il” məhdudiyyətləri təhlükəsizlik üçün olduqca vacibdir. Lakin AYNA-nın burada da yarıtmazlığı özünü göstərir. Belə ki, taksi islahatlarının icra forması bazar iqtisadiyyatının qanunları ilə ziddiyyət təşkil edir. Süni şəkildə taksi sayının azaldılması birbaşa qiymət artımına gətirib çıxardı. Bu isə o deməkdir ki, avtobusa minə bilməyən, metrosu olmayan ərazilərdə yaşayan vətəndaş artıq taksi xidmətindən də istifadə edə bilmir. Cəmiyyətin ən aşağı gəlirli təbəqəsi üçün nəqliyyat əlçatanlığı kəskin pisləşib. AYNA-nın bu islahatı taksi xidmətini “lüks”ə çevirsə də, buna paralel olaraq digər nəqliyyat vasitələrini (məsələn, metronu) daha əlçatan etməyib.

Qurumun kommunikasiya və şəffaflıq boşluğu

Bəlkə də ən vacib məqam AYNA-nın cəmiyyətlə və ekspertlərlə qurduğu dialoqdur. Hazırda qurum “mən belə qərara gəldim, sən də əməl et” yanaşması ilə işləyir. Parklanmadan və cərimələrdən yığılan milyonlarla vəsaitin hara, hansı konkret nəqliyyat həllinə xərcləndiyi barədə şəffaf hesabat verilmir. Nəqliyyat sistemində islahat o zaman uğurlu sayılır ki, vətəndaş onun faydasını evindən çıxan kimi hiss etsin: keyfiyyətli nəqliyyatla təmin olunmaqla və vaxtına qənaət etməklə. Lakin biz hələ ki, yalnız itirilən vaxtımızın və xərclənən pullarımızın arxasınca baxırıq.

Bir sözlə, AYNA-nın islahatları “məhdudiyyət var, amma alternativ yoxdur” düsturu ilə davam edir. Cənablar, şəhəri maşınlardan təmizləmək istəyirsinizsə, öncə daha sürətli, daha təmiz və daha ucuz bir nəqliyyat sistemi yaratmalısınız. Əks halda, edilən hər bir dəyişiklik paytaxt sakinlərinin həyatını asanlaşdırmaq yox, daha da mürəkkəbləşdirməkdən başqa bir işə yaramayacaq.

AFN.az

“Mərkəzi klinikada anamı ürək MRT müayinəsinə apardım. Bunun üçün 690 manat ödəniş etməyimizə baxmayaraq, müayinəni həkim deyil, onun köməkçisi etdi”.
Bu şikayətlə Bakupost.az-a adının çəkilməsini istəməyən vətəndaş müraciət edib.
Şikayətçi bildirir ki, aprelin 28-də anasını kardioloji müayinə üçün kardioloq Firdovsi İbrahimovun qəbuluna aparıb. Onun sözlərinə görə, kifayət qədər yüksək məbləğdə ödəniş etsələr də, göstərilən xidmət onları qane etməyib:
“Keyfiyyətə nəzarət şöbəsinin müdiri Xumar xanımla da danışdım. O dedi ki, 690 manatın 500 manatı Firdovsi doktorun "xüsusi xidməti" üçün nəzərdə tutulub. Anlamıram, bu xüsusi xidmət nədən ibarətdir? Çünki biz həkimin qəbuluna ayrıca 60 manat ödəmişik, amma o, anamı iki dəqiqə belə müayinə etməyib.
Səhər saat 08:00-dan növbə götürmüşdük. Klinikada hər yerdə kameralar var. Həkimin özü orada olmayıb, köməkçisi aparat vasitəsilə anamın ürəyini dinləyib. Həmin şəxs özünü təqdim etməyib. Resepti də o yazıb, həkim yox.
Firdovsi doktor isə yalnız saat 11:00-da gəldi, sənədlərə baxdı və təcili anju olunmalıdır dedi. 60 manatı bu xidmətə görə ödəmişik”.
Şikayətçi qeyd edir ki, əvvəlcədən müayinənin bu şəkildə aparılacağı bildirilsəydi, həmin həkimi seçməzdi:
“Əvvəlcədən desəydilər ki, müayinəni həkimin komandası aparır, mən bu ödənişi etməzdim və başqa həkimə müraciət edərdim. Firdovsi doktor ölkədə yeganə kardioloq deyil”.
Vətəndaş klinika personalının pasiyentlərlə davranışından da şikayətçidir. Onun sözlərinə görə, əməkdaşlar kobud və laqeyd davranır, həmçinin gigiyenik qaydalara əməl olunmur:
“Təcili xəstələrə üstünlük verilməsi başa düşüləndir. Amma biz gördük ki, təcili olmayan pasiyentlər də növbədənkənar MRT müayinəsinə yönləndirilir. Palatada istifadə olunan termometr isə sterilizasiya edilmədən bir pasiyentdən digərinə verilir".
Şikayətçi əlavə edir ki, ona ödənişlərin ƏDV qəbzləri də təqdim olunmayıb:
“Direktor müavini ilə danışdım, çekləri göstərdim. Mənə bildirdi ki, ƏDV qəbzləri dərhal verilmir. Etiraz etdim və bildirdim ki, ödəniş edilirsə, qəbz də dərhal təqdim olunmalıdır. Hətta İqtisadiyyat Nazirliyinin “195-1” çağrı mərkəzinə zəng etməyi təklif etdim, amma razılaşmadılar.
Ümumilikdə min manata yaxın ödəniş etmişik, lakin heç bir ƏDV qəbzi verilməyib. Bu, ciddi qanun pozuntusudur.
Pasiyentin sağlamlığı və hüquqları hər şeydən üstün olmalıdır. Bu cür halların araşdırılması və məsul şəxslər barədə tədbir görülməsi vacibdir”.
Məsələ ilə bağlı Mərkəzi Klinikanın mətbuat xidmətinin rəhbəri Elşən Şükürov Bakupost.az-ın sorğusuna cavab olaraq bildirib ki, pasiyentin şikayəti araşdırılıb və iddialar öz təsdiqini tapmayıb.


Bakupost.az

Bakıda WUF13 ilə bağlı keçiriləcək tədbirlər zamanı 8 dil üzrə sinxron tərcümə təmin ediləcək.

Bu barədə Prezident İlham Əliyev Bakı Olimpiya Stadionunun ərazisində WUF13 ilə bağlı görülən işlərlə tanış olarkən məlumat verilib.

Bildirilib ki, tədbirlərdə BMT-nin 6 rəsmi dili - ərəb, Çin, ingilis, fransız, rus və ispan dilləri ilə yanaşı, Azərbaycan və türk dillərində də sinxron tərcümə təmin ediləcək.

Eyni zamanda, əlilliyi olan şəxslər üçün beynəlxalq işarə dili xidməti nəzərdə tutulub.

Qeyd edək ki, WUF13 mayın 17-22-də Bakıda keçiriləcək. Forum Azərbaycanın BMT-nin Məskunlaşma Proqramı (UN-Habitat) ilə sıx əməkdaşlığı çərçivəsində keçirilir və dayanıqlı şəhərsalma, "ağıllı şəhərlər" və innovativ şəhər həlləri sahəsində beynəlxalq təcrübə mübadiləsinə yönəlib.

Bakıda fəaliyyət göstərən "General Hospital" daha bir vətəndaşa saxta sağlamlıq arayışı verib. "Yaşam Medical" klinikası isə vətəndaşa düzgün olmayan analiz cavabı göndərib.
"Unikal"a müraciət edən Ruslan Hüseynov bildirib ki, paytaxtda yerləşən restoranlardan birində çalışan zaman "Yaşam Medical" klinikasının əməkdaşları ondan qan analizi götürüblər:
"20 manat da ödəniş etdim. Bir neçə gün sonra, 14 mart 2026-cı il tarixində analizin cavabı gəldi. Cavabda heç bir problemin olmadığı bildirildi.
Bir müddət sonra isə başqa bir restoranda işləməyə başladım. Bu səbəbdən sağlamlıq kağızı almalı idim. Beləliklə, digər bir özəl klinikada qan analizi verdim. Məndə hepatit aşkarlandı. Qeyd edim ki, bu analiz cavabı 4 may 2026-cı il tarixində qeydə alınıb. Məlum oldu ki, yoluxma uzun müddət əvvəl baş verib.
Şikayətim "Yaşam Medical" klinikasındandır. Nəyə görə vətəndaşların verdikləri analizlər düzgün yoxlanılmır? Düzgün yoxlasaydılar, hepatitə yoluxmağım barədə daha tez məlumatlı olardım.
Onu da qeyd edim ki, məndə bu xəstəlik aşkarlanandan sonra yenidən yoxlanış etmək istədim. Bu dəfə "General Hospital"a müraciət etdim, lakin məlum oldu ki, həmin klinika heç bir yoxlanış etmədən saxta sağlamlıq arayışı verir. Mənə kart nömrəsi göndərdilər, ödəniş etdim. Ertəsi gün isə mənə sağlamlığımda heç bir problem olmadığı barədə saxta arayış göndərdilər".
Xatırladaq ki, "General Hospital" dəfələrlə saxta sağlamlıq arayışlarının verilməsi ilə bağlı gündəmə gəlib. Hətta bu məsələ ilə bağlı cinayət işi də başlanılmışdı. Onu da qeyd edək ki, "General Hospital" klinikasının baş həkimi Rüstəm Mikayılovdur.

Azərbaycan Respublikasının Prezidenti İlham Əliyev mayın 12-də BP şirkətinin baş icraçı direktoru Meq O`Nili qəbul edib.

Dövlətimizin başçısı Meq O`Nili bp şirkətinin baş icraçı direktoru vəzifəsinə təyin olunması münasibəti ilə təbrik etdi, onun rəhbərliyi ilə SOCAR-BP uğurlu əməkdaşlığının gələcəkdə də davam edəcəyinə əminliyini bildirdi.

Prezident İlham Əliyev ölkəmizlə BP arasında 30 ildən artıqdır ki, nadir tərəfdaşlıq tarixçəsinin olduğunu dedi. Dövlət başçısı vurğuladı ki, bu müddətdə həyata keçirilmiş bütün layihələrdən əldə edilən gəlir əsasən Azərbaycanın sosial-iqtisadi inkişafı üçün istifadə olunub.

Azərbaycanla BP arasında icra olunan layihələrin sayının artmaqda olduğunu deyən Prezident bunun əməkdaşlığın hər iki tərəf üçün faydalı olduğunu nümayiş etdirdiyini vurğuladı və tərəfdaşlığın strateji xarakter daşıdığını diqqətə çatdırdı.

Təbriklərə görə təşəkkürünü bildirən Meq O`Nil Bakıda olmaqdan şərəf hissi keçirdiyini dedi.

BP şirkətinin baş icraçı direktoru Ümummilli lider Heydər Əliyevin və Prezident İlham Əliyevin rəhbərliyi ilə neft və qazdan əldə edilən gəlirin ölkənin inkişafına sərf olunması ilə bağlı uzaqgörən liderliklərini xüsusi vurğuladı.

Meq O`Nil bu xüsusda Bakının inkişafına, o cümlədən yollara və infrastruktura yatırılan sərmayəyə toxundu.

Dövlət başçısı qeyd etdi ki, bəzi hallarda neft və qazdan əldə edilən gəlir sosial qeyri-bərabərliyə səbəb olur. Azərbaycanın timsalında isə bu, ölkənin tərəqqisinə kömək edib. Müstəqilliyimizi bərpa etdikdən bir müddət sonra "Əsrin müqaviləsi"nin imzalandığını xatırladan Prezident İlham Əliyev Birinci Qarabağ müharibəsindən sonra ölkəmizdə vəziyyətin çətin olduğunu dedi, ərazilərimizin itkisinə məruz qaldığımızı və humanitar fəlakətlə üzləşdiyimizi vurğuladı. Azərbaycan Prezidenti bildirdi ki, o zaman büdcəmiz sıfır səviyyəsində idi və bu vəziyyətdən çıxmağın yeganə yolu əsas beynəlxalq şirkətləri ölkəmizə cəlb etmək, onları investisiya yatırmağa inandırmaq idi. Prezident İlham Əliyev bu xüsusda BP-yə göstərdiyi etimada görə minnətdarlığını bildirdi.

Söhbət zamanı BP-nin ölkəmizdə icra etdiyi enerji, o cümlədən bərpaolunan enerji layihələri qeyd olundu, şirkətin işğaldan azad edilmiş ərazilərimizdə həyata keçirdiyi layihənin önəminə toxunuldu.

Görüşdə ölkəmizin Avropanın enerji təhlükəsizliyinin təmin olunmasında rolu qeyd edildi, SOCAR-BP əməkdaşlığının perspektivləri müzakirə olundu.

"Şəkildəki bu şəxsi Qaz rayonunda tanıyanlar var, tanımayanlar üçün deyim ki, Qum bələdiyyəsinin saxtakarlıqla təyin olunmuş üzvlərindən biri olan Seylan Şamiloviç Şamxalzadədir..." Dia-az" xəbər verir ki, bunu yazan müəllif olduqca ilginc faktları da açıqlayıb.

Məlumatda daha sonra deyilir: "Seylan adlı bu şəxs keçmiş Qum bələdiyyəsinin sədri Sərxan Qurbanovla Gürcüstanda adı bilinməyən bir məktəbdə təhsil alıblar. Ancaq fakt odur ki, bu iki şəxsin diplomları Azərbaycanda tanınmır.
İlk öncə bir məsələni burada bildirek. Keçən dönəmdə Sərxan bələdiyyə sədri təyin olunandan sonra bu Seylana jest edərək Çınarlı kəndinin girişində obyekt üçün yer verdi. Həmin yeri Seylan çörək bişirmə sexi kimi istifadə edir.
İkinci bir məsələ, son bələdiyyə seçkilərində Qax rayon İcra Hakimiyyətinin keçmiş başçısının göstəriş verdiyi namizədlərin təbliğatını elə məntəqə sədrləri aparırdı. Onların şəkillərini məlumat lövhələrinə yapışdırırdı məntəqə sədrləri.
Bu saxtakar bəzi yerlərdə iddialı şəkildə bəyan edib ki, bəs "kənd bizdən soruşulur". Hər halda bu fakt belə yetərli sayıla bilər ki, gərəkən qurumlar araşdırma aparsın..."

DİA-AZ

Cəmiyyətin hörmət göstərdiyi, sayğıyla andığı bir şəxsiyyətin xatirəsindən sui-istifadə edilərək dövlət vəsaitinin mənimsənilməsi barədə faktların ortaya çıxması təkcə maliyyə cinayəti deyil, həm də mənəvi aşınmanın göstəricisi idi
Kimlər dövlət büdcəsi ilə bağlı şübhəli layihələrin üstünün örtülməsinə çalışır? Niyə konkret faktlar təqdim olunduğu halda məsələ hüquqi müstəviyə daşınmır? Niyə dövlətin pulları ilə bağlı sual verənlər cəzalandırılır, amma həmin pulların taleyi ilə bağlı cavab verməli olan şəxslər toxunulmaz qalır?
Srağagün Fəxri xiyabanda Ulu Öndər Heydər Əliyevin məzarını ziyarət edən insanların sayı-hesabı yox idi. Minlərlə insan ora böyük ehtiram hissi ilə axışırdı. Bu mənzərə bir daha sübut etdi ki, xalqın Ulu Öndərə sevgisi və bağlılığı illər keçsə də dəyişmir. İnsanlar onun dövlətçilik fəlsəfəsinə, ölkəyə qazandırdığı sabitliyə və siyasi irsinə hörmət göstərmək üçün gəlmişdilər.
Ancaq 3 gün öncə QHT-lərə Dövlət Dəstəyi Agentliyinin təmsilçisi Aygün Əliyevanın da Fəxri Xiyabanda görünməsi "Yenixeberorg"un oxucuları tərəfindən ciddi narazılıq və ikrah hissi doğurub. Səbəb isə bir ilə yaxındır məhz bu qurumun ətrafında dolaşan korrupsiya, saxta tender və büdcə vəsaitlərinin mənimsənilməsi ilə bağlı təqdim etdiyimiz faktlar və bu faktların aidiyyatı dövlət orqanları tərəfindən araşdırılmamasıdır.
Xatırlayırsınızsa, 2022-ci ilin may ayında QHT-lərə Dövlət Dəstəyi Agentliyinin icraçı direktoru Aygün Əliyeva tərəfindən “Turalux” MMC-yə 30-35 min manat civarında vəsait ayrıldığı bildirilmişdi. Guya məqsəd “Heydər Əliyevin Şuşa sevgisi” adlı tədbirin keçirilməsi idi. Lakin zaman keçdikcə məlum oldu ki, ortada nə ciddi tədbir var, nə ictimai hesabat, nə də xərclənən vəsaitin şəffaf izahı.
Ən ağır məqam isə budur ki, Ulu Öndərin adı korrupsiya iddialarının mərkəzinə çevrildi. Cəmiyyətin hörmət göstərdiyi, sayğıyla andığı bir şəxsiyyətin xatirəsindən sui-istifadə edilərək dövlət vəsaitinin mənimsənilməsi barədə faktların ortaya çıxması təkcə maliyyə cinayəti deyil, həm də mənəvi aşınmanın göstəricisi idi. Həm də ölkə Prezidenti İlham Əliyevin ailəsinə hörmətsizlikdir.
Bu gün əsas sual budur: niyə bu məsələ araşdırılmadı?
Əgər ortada saxta tender, şübhəli ödəniş və mənimsəmə iddiaları varsa, niyə hüquq-mühafizə orqanları susdu? Niyə Hesablama Palatası, maliyyə nəzarəti strukturları və digər aidiyyəti qurumlar bu məsələ ilə bağlı ciddi araşdırma aparmadılar? Yoxsa müəyyən dairələr bu faktların ictimailəşməsində maraqlı deyil?
Cəmiyyətdə belə bir qənaət yaranır ki, məsələ artıq təkcə bir şəxsin və ya bir qurumun problemi deyil. Burada müəyyən himayədarlıq münasibətlərinin olduğu ehtimalı getdikcə güclənir. Çünki adi bir QHT rəhbəri ən xırda sənəd səhvinə görə məsuliyyətə cəlb olunduğu halda, dövlət büdcəsindən on minlərlə manatın ayrıldığı layihə ilə bağlı ciddi suallar cavabsız qalırsa, deməli ortada qeyri-adi bir “toxunulmazlıq” mexanizmi mövcuddur.
Daha ciddi fakt isə məsələni gündəmə gətirən bəzi QHT rəhbərlərinə qarşı təzyiqlərlə bağlıdır. Bildirilir ki, xüsusilə bəzi xanım QHT sədrləri bu faktları ictimailəşdirdikdən sonra müxtəlif təzyiqlərlə üzləşiblər. Onların qrant layihələrinin dayandırılması, tədbirlərdən kənarlaşdırılması və digər imtiyazlardan məhrum edilməsi artıq sektorda qorxu atmosferi yaradıb.
Ən təhlükəli məqam isə digər QHT rəhbərlərinin də qrant və maliyyə asılılığı vasitəsilə susdurulmasıdır. Bu istiqamətdə "Yenixeberorg.com"a ötürülən məlumatlardan da aydın olur ki bəzi şəxslər qrant imkanlarını itirməmək üçün bu məsələlər barədə danışmır, hətta həqiqətləri dilə gətirən şəxslərə qarşı mövqe tutmağa məcbur edilirlər. Belə olan halda QHT sektoru vətəndaş cəmiyyətinin dayağı yox, idarə olunan və susdurulan bir mexanizmə çevrilib.
Bütün bunların fonunda ortaya çox ciddi suallar çıxır:
Kimlər QHT-lərə Dövlət Dəstəyi Agentliyindəki bu iddiaların araşdırılmamasında maraqlıdır?
Kimlər dövlət büdcəsi ilə bağlı şübhəli layihələrin üstünün örtülməsinə çalışır? Niyə konkret faktlar təqdim olunduğu halda məsələ hüquqi müstəviyə daşınmır? Niyə dövlətin pulları ilə bağlı sual verənlər cəzalandırılır, amma həmin pulların taleyi ilə bağlı cavab verməli olan şəxslər toxunulmaz qalır?
QHT-lərə Dövlət Dəstəyi Agentliyində qaydalar kağız üzərində... -Bu, hüquqi nihilizmdir
Əgər bu gün bir layihə üzrə ortaya çıxan faktlar ört-basdır edilirsə, cəmiyyət haqlı olaraq düşünür ki, görünməyən daha böyük korrupsiya sxemləri də mövcud ola bilər. Çünki cəzasızlıq korrupsiyanı böyüdür. Himayədarlıq isə onu sistemləşdirir.
Ən acınacaqlısı isə odur ki, bütün bunlar Ulu Öndərin adı altında edilir. Halbuki Heydər Əliyev dövlətçilik anlayışında dövlətə sədaqəti, qanunun aliliyini və milli maraqları hər şeydən üstün tuturdu. Bu gün onun adından istifadə edib şəxsi maraqlar güdmək, büdcə vəsaitlərini şübhəli layihələrə yönəltmək həmin siyasi irsə qarşı açıq hörmətsizlikdir. Görünən də odur ki, belələrinin həm də çox güclü “krışa”sı var.
Bu məsələ artıq lokal qalmaqal deyil. Bu, dövlət və cəmiyyət münasibətləri, ictimai etimad və şəffaflıq məsələsidir. Ona görə də bu iddiaların ən yüksək səviyyədə araşdırılması, bütün sənədlərin ictimaiyyətə açıqlanması və məsul şəxslərin hüquqi qiymət alması vacibdir.(Yenixeberorg.com)
Qarşı tərəfin cavab haqqını tanıyırıq.

"Real Azərbaycan"a müraciət edən vətəndaş Xəyalə Quliyeva bildirir ki, fevral ayında görmə zəifliyi səbəbindən Nərimanov rayonunda yerləşən “Funda Hospital”da göz həkimi kimi fəaliyyət göstərən İmran Cərullazadəyə müraciət edib.

Onun sözlərinə görə, ilkin müayinə zamanı həkim əməliyyatın zəruri olduğunu bildirib və prosedurun cəmi 5–6 dəqiqə davam edəcəyini, heç bir narahatlığa əsas olmadığını qeyd edib.

Lakin Xəyalə Quliyeva iddia edir ki, əməliyyatdan sonra vəziyyəti yaxşılaşmaq əvəzinə daha da pisləşib.

Onun sözlərinə görə, əməliyyatdan bir gün sonra yenidən həkimə müraciət etdikdə, əməliyyatın uğursuz nəticələndiyi qəbul edilsə də, vəziyyətə ciddi yanaşılmayıb.

Şikayətçi əlavə edir ki, bir həftə sonra aparılan yoxlamalarda əməliyyat olunan gözün daha da zəiflədiyi məlum olub, lakin buna “normal hal” kimi izah verilib.

Xəyalə Quliyevanın iddiasına görə, sonrakı günlərdə vəziyyət daha da ağırlaşıb, gözündə çirkli ifrazat, batma hissi və güclü ağrılar yaranıb, görmə isə demək olar ki, tam itmə həddinə çatıb. O, bu vəziyyətlə bağlı yenidən “Funda Hospital”a müraciət etsə də, evə göndərildiyini bildirib.

Şikayətçi qeyd edir ki, gecə saatlarında ağrılar şiddətləndiyinə görə təcili şəkildə Göz Xəstəlikləri İnstitutuna aparılıb və orada həkim səhvi nəticəsində bu vəziyyətin yarandığı bildirilib.

Daha sonra Türkiyəyə gedən Xəyalə Quliyeva “Dünya Göz Xəstəxanası”nda əməliyyat olunduğunu və ona “Endoftalmit” diaqnozu qoyulduğunu bildirir. Onun sözlərinə görə, bu diaqnoz ciddi və təhlükəli göz xəstəliyi hesab olunur və əlavə müdaxilə tələb edir.

Şikayətçi bildirir ki, bütün bu müddət ərzində İmran Cərullazadəyə dəfələrlə müraciət etsə də, ona məsuliyyəti qəbul etmədiyini və hara istəsən şikayət edə bilərsən cavabı alıb.

Xəyalə Quliyeva məsələ ilə bağlı baş prokuror Kamran Əliyevə də şikayət etdiyini, həkimin cinayət məsuliyyətinə cəlb olunmasını tələb etdiyini qeyd edib.

Onun sözlərinə görə, həm maddi ziyana uğrayıb, həm də görmə qabiliyyətini ciddi şəkildə itirib.

Real Azərbaycan