Mən həkim deyiləm, ailəmdəki həkimlərin də bəhs edəcəyim problemləri yoxdur. Problem bizim gənc həkimlərimizin, səhiyyəmizin sabahı olan idealist, iş həyatının sonuna qədər 11+2 il təhsil almalarına rəğmən durmadan oxuyan, öyrənən gənc təbiblərimizindir.
Bu yazını əslində rəsmi qurumlarımıza – Səhiyyə Nazirliyi, Diasporla İş üzrə Dövlət Komitəsi və Azərbaycan-Türkiyə Parlamentlərarası Dostluq Qrupuna ünvanlayıram. Onların hər birinin funksiyası fərqli olduğu üçün, bu məktubun vahid, lakin hər üç qurumun səlahiyyət və maraq dairəsinə xitab edən rəsmi-analitik formatda yazılmasına çalışdım.
Hörmətli nazir, hörmətli komitə sədri və hörmətli millət vəkilləri!
Bu yazıdakı məqsədim qardaş Türkiyə Respublikasında uzmanlıq (rezidentura) təhsili alan və gələcəkdə ölkəmizin tibb sahəsinə böyük töhfələr verməyə hazırlaşan minlərlə gənc azərbaycanlı “asistan həkimin” qarşılaşdığı ciddi hüquqi və sosial problemə diqqətinizi cəlb etmək, bu məsələnin dövlətlərarası dialoq müstəvisində həllinə dəstək verməyinizi xahiş etməkdir.
Bildiyim qədəri ilə bu qurumlar mövcud problemdən xəbərdardırlar və onlar lazımi dəstəyi göstərmək üçün addımlar da atıblar. Ancaq gəlinən nöqtədə aydın olur ki, problem çözüldə Ankarada çözüləcək. Bu səbəbdən də ümid edirəm ki, rəsmi orqanlarımız birləşib məsələni həll etmək üçün daha ciddi addımlar atacaq, rəsməni Ankaranı ədalətli qərar verməyə nail olacaqlar.
Hazırda Türkiyənin aparıcı tibb universitetlərində və dövlət xəstəxanalarında uzmanlıq təhsili alan əcnəbi həkimlərin böyük əksəriyyətini – təxminən 85-90 faizini Azərbaycan Respublikasının vətəndaşı olan gənclər təşkil edir. Bu gənclər ağır iş şəraitində, gərgin növbə qrafikləri ilə çalışaraq həm böyük təcrübə qazanır, həm də çalışdıqları səhiyyə müəssisələrində insan həyatının xilası naminə fədakarlıq nümayiş etdirirlər. Onların ən böyük hədəfi bu çətin və şərəfli təhsil yolunu uğurla tamamlayaraq Vətənə qayıtmaq və Azərbaycan səhiyyəsinin inkişafında yaxından iştirak etməkdir.
Lakin Türkiyə Böyük Millət Məclisinə (TBMM) 02.07.2026-cı il tarixində təqdim edilən 117 sıra nömrəli “Ali Təhsil Qanunu və bəzi qanunlarda dəyişiklik edilməsinə dair Qanun Təklifi”nin 1-ci maddəsi bu gənclərin gələcəyini və təhsillərini davam etdirmək imkanlarını ciddi təhlükə altına qoyur. Belə ki, qanun layihəsində nəzərdə tutulan yeni tənzimləmə əcnəbi asistan həkimlərin çalışdıqları xəstəxanaların dövriyyə kapitalından (döner sermaye) əlavə ödəniş almasının qarşısını almağı hədəfləyir.
Türkiyədəki mövcud iqtisadi şərait, yüksək kirayə və yaşayış xərcləri fonunda asistan həkimlərin aldığı baza təqaüdünün minimal yaşayış ehtiyaclarını belə qarşılamadığı hər kəsə məlumdur. Dövriyyə kapitalından edilən ödənişlər bu gənclər üçün əlavə gəlir deyil, onların ağır əməyinin qarşılığı və təhsillərini yarımçıq qoymamalarının yeganə maddi dayağıdır. Həmçinin, bu tənzimləmə Türkiyə Konstitusiya Məhkəməsinin 28.06.2022-ci il tarixli (2019/39033 nömrəli) bərabərlik və ayrı-seçkiliyin yolverilməzliyi ilə bağlı qəbul etdiyi rəsmi qərara da tamamilə ziddir.
Hörmətli dövlət rəsmiləri və millət vəkilləri!
Türkiyədə təhsil alan bu gənclər bizim gələcək intellektual və tibbi kapitalımızdır. Qanun layihəsinin bu şəkildə qəbul edilməsi minlərlə azərbaycanlı gəncin maddi imkansızlıq səbəbindən uzmanlıq təhsilini yarımçıq qoymasına, mənəvi sarsıntı keçirməsinə və böyük kadr itkisinə yol aça bilər.
Müvafiq qurumların Türkiyədəki həmkarları ilə mövcud sıx və səmimi münasibətlərini bildiyim üçün sizdən bu məsələyə təcili reaksiya verməyinizi xahiş edirəm.
İnanıram ki, iki qardaş ölkə arasındakı yüksək səviyyəli strateji müttəfiqlik münasibətləri çərçivəsində reallaşdırılacaq rəsmi dialoq və məsləhətləşmələr vasitəsilə sözügedən qanun təklifinin 1-ci maddəsinin layihə mətnindən çıxarılmasına və ya azərbaycanlı həkimlərin hüquqlarının qorunacağı şəkildə yenidən tənzimlənməsinə nail olmaq mümkündür.
Türkiyədə fəaliyyət göstərən azərbaycanlı asistan həkimlərin bu məsələ ilə bağlı geniş hüquqi və sosial əsasları ehtiva edən müraciət məktubunun mətnini rəsmi yazıma əlavə olaraq diqqətinizə təqdim edirəm.
Gənc həkimlərimizin səsinə səs verəcəyinizə və mövcud problemin həlli istiqamətində zəruri addımları atacağınıza dərin ümid və hörmətlə,
İbrahim Nəbioğlu
Aşağıda Türkiyədə çalışan azərbaycanlı asistan həkimlərin müraciət məktubunun mətnini paylaşıram. Bu məktubu onlarla gəncəcik övladlarımız imzalayıblar. Ancaq çalışdıqları xəstəxana və klinikalar tərəfində möhtəməl danlaq və ya təqibə məruz qalmasınlar deyə onların adlarını müraciətdən sildim…
Türkiyədə uzmanlıq təhsili alan əcnəbi asistan həkimlərin sosial vəziyyəti ilə bağlı məsələ yenidən gündəmə gəlib. Türkiyə Böyük Millət Məclisinə 02.07.2026-cı il tarixində təqdim edilən 117 sıra nömrəli “Ali Təhsil Qanunu və bəzi qanunlarda dəyişiklik edilməsinə dair Qanun Təklifi”nin 1-ci maddəsi bu gənc həkimlərin gələcəyinə birbaşa təsir edə biləcək məzmuna malikdir.
Bu gün Türkiyənin müxtəlif səhiyyə qurumlarında çox sayda əcnəbi asistan həkim tibb və diş həkimliyi üzrə uzmanlıq təhsili alır. Onlar əməkhaqqı almadan, ağır növbələrdə çalışır, xəstə baxır, tibbi prosesin içində yer alır və çalışdıqları qurumların dövriyyə kapitalına real töhfə verirlər. Buna baxmayaraq, onların əsas gəlir mənbələrindən biri hazırda təxminən 17.900 TL (647 AZN) təşkil edən ödənişdir.
Türkiyə şəraitində kirayə, qida, nəqliyyat və gündəlik yaşayış xərcləri nəzərə alındıqda bu məbləğin yetərli olmadığı aydındır. Məhz buna görə dövriyyə kapitalından edilən əlavə ödənişlər bu gənclər üçün sadəcə “əlavə gəlir” deyil, təhsillərini davam etdirə bilmələrinin əsas dayaqlarından biridir. Çünki bu ödəniş onların gördüyü işin, klinik xidmətə verdiyi əməyin və quruma qazandırdığı real töhfənin qarşılığıdır. Bu məsələ daha əvvəl Türkiyə Konstitusiya Məhkəməsinin də gündəmində olub.
Türkiyə Konstitusiya Məhkəməsinin 2019/39033, 28.06.2022-ci il tarixli qərarında bildirilib ki, Türkiyə vətəndaşı olan uzmanlıq tələbələri ilə əcnəbi vətəndaş olan uzmanlıq tələbələri gördükləri iş baxımından oxşar vəziyyətdədirlər. Hər iki qrup eyni səhiyyə sistemində çalışır, eyni məsuliyyəti daşıyır və dövriyyə kapitalına töhfə verir. Buna görə də onların dövriyyə kapitalından əlavə ödəniş almaq hüququ baxımından fərqli rəftara məruz qalması ayrı-seçkilik kimi qiymətləndirilib. Lakin yeni qanun təklifində yer alan 1-ci maddə faktiki olaraq əcnəbi asistan həkimlərin dövriyyə kapitalından əlavə ödəniş almasının qarşısını ala bilər. Bu isə həm Konstitusiya Məhkəməsinin əvvəlki hüquqi mövqeyi ilə ziddiyyət təşkil edir, həm də illərdir böyük fədakarlıqla çalışan gənc həkimlərin sosial vəziyyətini daha da ağırlaşdırır. Bu tənzimləmənin qəbul olunması bir çox asistan həkimi ciddi maddi çətinliklə üz-üzə qoya bilər.
Yaşayış xərclərini qarşılamaqda çətinlik çəkən bu gənclər üçün belə bir qərar təhsilin keyfiyyətinə mənfi təsir göstərə, hətta bəzi hallarda uzmanlıq təhsilinin yarımçıq qalmasına səbəb ola bilər. Məsələnin Azərbaycan üçün xüsusi önəmi var.
Hazırda Türkiyədə uzmanlıq təhsili alan azərbaycanlı gənclərin böyük bir hissəsi təhsili tamamladıqdan sonra vətənə qayıdaraq Azərbaycan səhiyyəsinə xidmət etməyi qarşısına məqsəd qoyub. Unutmaq olmaz ki, uzmanlıq təhsili yalnız dərs və imtahanlardan ibarət deyil. Bu, gecə növbələri, məsuliyyətli tibbi qərarlar, insan həyatı qarşısında daşıdığı böyük yük və davamlı peşəkar inkişaf deməkdir. Bu qədər ağır bir yolun içində gənc həkimlərin əməyinin qarşılığından məhrum edilməsi nə hüquqi, nə də vicdani baxımdan ədalətli görünür.
Bu səbəbdən 117 sıra nömrəli qanun təklifində yer alan 1-ci maddənin layihə mətnindən çıxarılması vacibdir. Çünki bu məsələ yalnız bir ödəniş məsələsi deyil; bu, fədakarlıqla çalışan, öyrənən və gələcəkdə həm Türkiyə, həm də Azərbaycan səhiyyəsinə töhfə verməyə hazırlaşan gənc həkimlərin əməyinə verilən dəyər məsələsidir.
İbrahim Nebioğlu
TEREF

Nəsimi Rayon İcra Hakimiyyəti növbəti ümumrayon iməciliyindən fotolar paylaşıb. Məlumatda prospektlərin, səkilərin, işıq dirəklərinin, məhəccərlərin yuyulduğu, yaşıllıqlara qulluq göstərildiyi qeyd olunur.
Amma bu fotolarda diqqəti çəkən tamam başqa bir məqamdır.
Bizimesr.com bildirir ki, küçələri süpürənlərin, məhəccərləri silənlərin, səkiləri yuyanların böyük əksəriyyəti yenə yaşlı qadınlardır. Elə yaşlı ki, onların bir çoxu pensiya yaşını çoxdan keçmiş, nəvə-nəticələri ilə vaxt keçirməli yaşdadır. Amma...

Ən acısı isə budur ki, bu mənzərə yeni deyil. İllərdir Bakı küçələrində eyni səhnəni görürük. Hansı rayona baxırsan bax, əlində süpürgə, belində iş jileti olan yaşlı nənələr və babalar. Qışın şaxtasında da onlar, yayın 40 dərəcə istisində də onlar.
Bəs illərdir alınan milyonlarla manatlıq kommunal texnikalar haradadır?
Bu biabırçılığa nə zaman son qoyulacaq?
Müasir küçə süpürən maşınlar, yuyucu avtomobillər, mexanikləşdirilmiş avadanlıqlar niyə bu insanların əməyini yüngülləşdirmir? Niyə XXI əsrdə hələ də şəhərin mərkəzində səki və məhəccərlər əsasən əl əməyilə təmizlənir? Özü də ahın insanların əməyi ilə...
Ən düşündürücü məqam budur ki, rayon icra hakimiyyəti bu fotoları uğur nümunəsi kimi paylaşır.
Nəsimi rayon İcra Hakimiyyətinin başçısı Tahir Budaqov - bu fotolarla nə göstərmək istəyirsiniz?
Şəhərin təmiz olduğunu, yoxsa şəhərin təmizliyinin hələ də ahıl qadınların fiziki əməyi hesabına təmin edildiyini?
Bu fotolarla iş gördüyünüzü göstərmək istəyirsiz?

Bu yaşda insanların saatlarla küçə süpürməsi, ağır fiziki iş görməsi normal qəbul edilməməlidir. Pensiya yaşı istirahət, sağlamlığın qorunması və həyatın daha rahat mərhələsi olmalıdır. Əgər şəhərin təmizliyi hələ də əsasən ahıl insanların çiyinlərindədirsə, bu, təkcə kommunal xidmətlərin deyil, sosial siyasətin də müzakirə edilməli məsələsidir.
Niyə illər keçir, texnologiyalar dəyişir, kommunal xidmətlərə yeni texnikalar alınır, rəqəmsallaşmadan danışılır, amma küçələrdə dəyişməyən tək mənzərə yenə də əlində süpürgə ilə işləyən ahıl qadınlardır?
Dövlət qurumları bu fotoları fəxrlə paylaşmazdan əvvəl, həmin fotoların cəmiyyətə hansı mesajı verdiyini heç düşünürlərmi?
Bir bir və ya daha çox şəxs, skuter, siqvey və küçə şəkili ola bilər
Bir küçə şəkili ola bilər
Bir bir və ya daha çox şəxs, küçə və yol şəkili ola bilər
Şəkilin açıqlaması yoxdur.(Bizimesr.com)

Yerli idarəetmə orqanlarının əsas vəzifəsi vətəndaşın rifahını təmin etmək, rayonda sosial-iqtisadi inkişafa təkan vermək olduğu halda, Qubada tamamilə fərqli və acınacaqlı bir mənzərə hökm sürür

Sosial şəbəkələrdə yayılan məlumatlara əsasən xəbər verir ki, rayon sakinlərinin şikayətləri Quba Rayon İcra Hakimiyyətinin Sosial-iqtisadi inkişaf və proqnozlaşdırılması şöbəsinin müdiri Şahin İsrafilovun öz vəzifə səlahiyyətlərini şəxsi maraqlarına tabe etdirdiyini göstərir. Əslən Xaçmazdan olan bu məmurun Qubada yaratdığı dözülməz bürokratik maneələr və qeyri-qanuni tələblər artıq narazılığı pik həddə çatdırıb.

Qeyd edilir ki, Şahin İsrafilovun rəhbərlik etdiyi şöbə kağız üzərində "inkişaf və proqnozlaşdırma" ilə məşğul olsa da, reallıqda o, rayonun "qara kassası" funksiyasını yerinə yetirir. Tikinti sektorunu tamamilə nəzarətə götürən şöbə müdiri, rəsmi dövlət portallarını və qanunları heçə sayaraq öz şəxsi "tarif və rüsumlarını" tətbiq edir. Məlumatlara görə, rayonda baş qaldıran qanunsuzluqların miqyası belədir:

Fərdi yaşayış evləri: İddia olunur ki, sadə vətəndaşın öz torpağında başını soxmağa bir daxma tikməsi və layihənin təsdiqi üçün 2000 manat "haqq" tələb olunur.

Kommersiya obyektləri: İddiaya görə, sahibkarlığın inkişafına dəstək vermək əvəzinə, hər yeni tikilən obyektdən 10 000 manat rüşvət yığılır.

Rəqəmsal korrupsiya: Hətta dövlətin şəffaflıq üçün yaratdığı Şəhərsalma və Tikinti Portalı sisteminə daxil edilən layihələr belə bu məmurun maliyyə süzgəcindən keçməsə, təsdiqini tapa bilmir.

Bildirilir ki, korrupsiya şəbəkəsi təkcə fərdi tikintilərlə bitmir. Rayonun abadlaşdırılması və sosial layihələr üçün ayrılan dövlət vəsaitləri də bu talançılıqdan payını alır. İddialara görə, Qubada udulan tenderlərin düz 20%-i hələ işə başlanılmamışdan öncə birbaşa Şahin İsrafilova çatmalıdır. Bu isə o deməkdir ki, rayonda görülən işlərin keyfiyyəti kökündən kəsilir, dövlət büdcəsi talan edilir.

Maraqlıdır ki, İcra Hakimiyyətinin memarı Murad Qədirov bu iyerarxiyada sadəcə bir "imza funksiyası" yerinə yetirir. Şahin İsrafilovun "yaşıl işıq" yandırmadığı, "haqqı" ödənilməyən heç bir memarlıq layihəsi Murad Qədirov tərəfindən təsdiq edilə bilməz. Baş memar öz peşə prinsiplərini və qanunun tələblərini deyil, şöbə müdirinin korrupsioner tapşırıqlarını icra etməklə məşğuldur.

Məlumatda qeyd edilir ki, Şahin İsrafilovun bu qədər rahat və cəzasız hərəkət etməsinin arxasında rayon rəhbərliyinin ona olan sonsuz etibarı dayanır. Lakin gələn xəbərlər göstərir ki, İsrafilov bu güvəndən sui-istifadə edərək təkcə xalqı yox, öz rəhbərliyini də aldatmağı bacarır. Özünə yaxın və güvəndiyi şəxslər vasitəsilə topladığı külli miqdarda qeyri-qanuni vəsaitləri gizlətməklə, o, əslində rəhbərlikdən də oğurluq edir, özünə gizli maliyyə imperiyası qurur. /Poliqon/

Azərbaycan Dəmir Yollarının (ADY) rəqəmsallaşma istiqamətində atdığı addımlar təqdirəlayiq olsa da, tətbiq edilən xidmətlərin etibarlı və stabil işləməsi təmin edilmədən istifadəyə verilməsi sərnişinlər üçün ciddi narahatlıq yaradır.

Xüsusilə turniketlərdə NFC vasitəsilə ödəniş zamanı tez-tez problemlər yaşanır. Bir çox hallarda sistem kartları oxumur, bəzi beynəlxalq ödəniş sistemlərini, o cümlədən Mastercard kartlarını qəbul etmir. Nəticədə turniketlər qarşısında uzun növbələr yaranır, sərnişinlər vaxt itirir və narazılıq artır.

Şikayətçi sərnişin bildirir ki, - "bu gün səhər isə turniketlər Visa kartına qoşulmuş NFC ödənişini də qəbul etmədi. Problemi həll etmək üçün məcbur qalıb ayrıca fiziki gediş kartı almaq lazım gəldi. Halbuki NFC ödəniş sisteminin əsas məqsədi sərnişinlərin rahat, sürətli və əlavə vaxt itirmədən keçid etməsini təmin etməkdir. Mövcud vəziyyətdə isə insanlar həm gecikir, həm də arxada gözləyən sərnişinlər qarşısında narahat vəziyyətə düşürlər".

Diqqət çəkən digər məqam odur ki, bu problem yeni deyil. Uzun müddətdir davam etməsinə baxmayaraq, onun aradan qaldırılması istiqamətində effektiv tədbirlərin görüldüyü müşahidə olunmur.

Dövlət qurumları ölkədə rəqəmsallaşmanın genişləndirilməsinə xüsusi önəm verdiyi bir vaxtda, belə elementar xidmətlərin etibarlı işləməməsi suallar doğurur. Üstəlik, NFC ödəniş xidməti digər dövlət qurumlarının nəqliyyat sistemlərində uğurla və sürətli şəkildə işlədiyi halda, ADY-də eyni rahatlığın təmin olunmaması sərnişinlərin haqlı narazılığına səbəb olur.

ADY son dövrlər sima ilə tanınma və digər innovativ xidmətləri təqdim edir. Lakin mövcud NFC ödəniş sistemindəki problemlər aradan qaldırılmadan yeni texnologiyaların tətbiqi onların praktik effektivliyi ilə bağlı da suallar yaradır.

Bizimesr.com

Bakıda fəaliyyət göstərən "The Mood Bistro & Grill" restoranında biznes lanç zamanı təqdim olunan yeməklərin keyfiyyəti və xidmət səviyyəsi ilə bağlı narazılıq səsləndirilib.

Şikayətçi əvvəlcə sifariş edilən ispanaqlı şorbanın içərisində iri doğranmış və qızardılmamış soğanlar olduğunu deyib: "Bu səbəbdən şorbanı yeyə bilmədik. Müraciətdən sonra restoran əməkdaşları şorbanı mərci şorbası ilə əvəz etsələr də, əsas narazılıq daha sonra təqdim olunan əsas yeməklə bağlı yarandı".

Qeyd olunur ki, əsas yemək kimi təqdim edilən toyuq qanadlı kababın iç hissəsi çiy olub. Üç nəfərin sifariş etdiyi yeməklərdən ikisinin eyni vəziyyətdə olduğu iddia edilir. Müştərilər bu barədə ofisianta məlumat versələr də, boşqablar sadəcə götürülərək aparılıb. Onların sözlərinə görə, nə üzr istənilib, nə də yemək əvəz olunub və ya hər hansı kompensasiya təklif edilib. Nəticədə müştərilər yeməksiz qaldıqlarını bildirirlər.

Narazılıq doğuran digər məqam isə biznes lanç menyusunda "limitsiz çay" qeyd edilməsinə baxmayaraq, saat 15:00-da çay sifariş etmək istədikdə xidmətin artıq başa çatdığı bildirilməsi olub. Müştərilər hesab edirlər ki, əgər bu xidmət müəyyən saatadək qüvvədədirsə, həmin məhdudiyyət menyuda açıq şəkildə göstərilməlidir.

Bizimesr.com

Bakının ən baxımsız və bərbad vəziyyətdə olan rayonu Suraxanıdır desək yanılmarıq. Paytaxtın digər rayonları da problemlərdən tam azad olmayıb. Amma məsələn, Xətai, Sabunçu, Nəsimi, Nizami və başqaları ilə müqayisədə Suraxanı rayonu Əfqanıstana, Suriyaya oxşayır. Adil Əliyevin rayona icra başçısı təyin edilməsindən sonra da dəyişən heç nə olmayıb. Anaxeber.info.az bildirir ki, əksinə, Suraxanı rayonu xarabalığa çevrilməkdədir. Hazırda rayonda ən adi problemlər də həllini tapmayıb. Onlardan biri sakinlərin xeyli vaxtdır ki, şikayət etdiyi işıqlanmadır. Rayonun xüsusən Yeni Günəşli ərazisində işıqlanma olmadığı üçün avtomobil qəzaları tez-tez olur. Əslində, müasir dövrdə, Azərbaycanın dünyaya enerji satdığı zamanda Yeni Günəşlinin qaranlığa qərq olması absurd mənzərədir. Sakinlərin dəfələrlə şikayət etməsinə, telekanalların məsələni işıqlandırmasına baxmayaraq, Suraxanı rayon rəhbərliyi heç bir iş görmür, əlini ağdan qaraya vurmur. O zaman Prezident İlham Əliyev Adil Əliyevi nə üçün bu rayona nümayəndə təyin edib? Adil Əliyev bir icra başçısı kimi məsuliyyətini bildiyi halda, nə üçün vəziyyətdən narahat olmur? Doğrudanmı rayon rəhbəri axşam saatlarında avtomobili ilə Yeni Günəşlidən keçməyib və bu zülməti görməyib? Axı bu adi məsələdir, qısa müddətdə həll etmək olar?! Sanki bu ərazi neft-qaz, enerji şəhəri, "yaşıl enerji" layihələri icra edən Azərbaycanın bir ərazisi deyil. Halbuki bu şəhərdə COP29 və digər tədbirlər keçirilib, Bakının şəninə təriflər yağdırılıb. Amma gəlib bu şəhərin ucqar olmayan bir ərazisinə baxsınlar və görsünlər ki, bura Bakıdır, yoxsa Hələb şəhəridir...

Bundan əlavə, Suraxanı rayonunda, xüsusən Yeni Günəşlidə yollar bərbaddır. Bu yollardan ancaq at-araba ilə keçmək yaxşıdır. Çünki avtomobillər texniki nasazlığını itirir və bu vəziyyət də Adil Əliyevi narahat etmir. Yəni texnologiya əsrində şəhərin Yeni Günəşli ərazisi işıqlanma və yolsuzluq dərdi çəkir, sanki əhali Afrikanın geridəqalmış bir bölgəsində məskunlaşıb. Bəs bu işıqlanma və yollara ayrılan maliyyə vəsaiti hansı istiqamətə xərclənib?
Ən çox ikrah doğuran məqam isə budur ki, Adil Əliyev və Suraxanı İH haqda mənfi fikir bildirəndə, "trol dəstəsi" dərhal sosial şəbəkələrdə peyda olur. Onlar Suraxanı icra başçısını elə "sidq-ürəklə" müdafiə edir ki, sanki qohum-əqrəbalarıdır. Sonda isə trolların əksəriyyətinin yaşayış yerinin Suraxanı olmadığı üzə çıxır. Belə desək, təlimat almış qırğılar tökülüşür tənqid yazılan səhifələrə, Adil Əliyevi müdafiə edirlər. Amma bu dəstək kampaniyası rayonun problemlərini həll etmir. Heç Adil Əliyevin də bu trol dəstəsinə ehtiyacı olmamalıdır. Əgər həqiqi təqdir və alqış eşitmək istəyirsə, gəlib problemlərin həllinə köməklik etsin, qoy sakinlər səmimi şəkildə ona təşəkkür bildirsinlər. Ancaq problemlər göz deşir, Adil Əliyev isə trollar vasitəsi ilə onları malalamağa çalışır. Bu isə rayonda ona olan münasibəti müsbət mənada dəyişə bilməz.
Ümumiyyətlə, Yeni Günəşlidə yol, işıq, səliqə - sahman, abadlıq işləri həllini tapmasa, sakinlərin icra başçısından narazılığı getdikcə artacaq. Bu da prezidentə şikayətlərin çoxalması deməkdir. Prezident isə icra başçılarına xalqla işləməyi tapşırıb.
Ancaq Adil Əliyevin fəaliyyəti Suraxanı ərazisində nəzərə çarpmır. Onunla yanaşı müvafiq qurumlar da vəzifələrini yerinə yetirmirlər. Bu da rayonun baxımsız vəziyyətə düşməsinə gətirib çıxarıb. Hərçənd bu müddət ərzində ayrılan vəsaitlərlə çox işlər görmək olardı. Bəs bu pullar hara gedib? Sakinlər həm də hüquq-mühafizə orqanlarını Suraxanı İH-də araşdırma aparmağa çağırır...
Qarşı tərəfi dinləməyə və mövqeyini dərc etməyə hazırıq.

Anaxeber.info.az
Azər Talıbov

Prezident İlham Əliyev Azərbaycanı istəməyən qüvvələrin heç vaxt əl çəkməyəcəyini deyib və bu mübarizənin daimi olacağını bəyan edib.

Şuşada "Sülhün təşviqində medianın missiyası: Həqiqətin bərpası və etimadın yenidən qurulması" mövzusunda keçirilən IV Şuşa Qlobal Media Forumunun açılış mərasimində çıxış edən Azərbaycan Prezidenti dünyanın dəyişdiyini, yeni təhdidlərin və təxribatların ortaya çıxdığını bildirib.

"Biz gələcəyə baxmalıyıq, dünya dəyişir, yeni təhdidlər və təxribatlar ortaya çıxır. Kimsə fikirləşirsə ki, bizi istəməyən qüvvələr bizdən əl çəkəcək, bu heç vaxt olmayacaq, bu mübarizə daimi olmalıdır. Mübarizə öz hüquqlarımızı və milli kimliyimizi qorumaq üçündür, mübarizə öz müstəqilliyimizi öz əlimizdə saxlamaq üçündür. Bir çox misallar var ki, bəzi ölkələr və onların rəhbərləri kiminsə qanadının altına sığınırlar və hesab edirlər ki, bu onları qoruyacaq, amma nəticə etibarilə qurban olurlar, böyük oyunların qurbanları. Bizim xalqımız həm işğal görüb, həm dağıntı görüb, həm zəfər, həm də bərpa görüb və bunun iştirakçısıdır", - İlham Əliyev deyib.

Prezident bəyan edib ki, milli kimlik, milli ləyaqət hər şeydən üstün olmalıdır:

"Məğlub ola bilərsən, amma gərək heç vaxt əyilməyəsən, sınmayasan, heç vaxt işğalçı ilə razılaşmayasan, işğalçının diqtəsi ilə oturub durmayasan. Lazım olsa, ölsən də belə gərək ləyaqətlə yaşayasan və öz övladlarına, nəvə-nəticələrinə bunu aşılayasan. Ona görə də bizim gələcək inkişafımız gənc nəsillə bağlı olacaq. Onlar da bizim kimi vətənə bağlı, mətin, iradəli, güclü olmalıdır ki, Azərbaycan da daim yüksəklərdə olsun".

Keçən günlərdə SOCAR "Azəriqaz" İstehsalat Birliyində çalışan işçilərdən birinə istinadla qurumda olduqca yüksək vəzifə tutan bir məmur haqda ilginc faktları ictimailəşdirdik. Qeyd edək ki, bütün bu açıqlananlara hüquqi qiymətin verilməsi an məsələsidir. Biz isə vəd etdiyimiz kimi "DİA-AZ" olaraq növbəti faktı təqdim edirik...

Keçən məqalədə qeyd olunurdu ki, SOCAR "Azəriqaz" rəhbərliyi bütün region rəislərinə aylıq hesab qoyub: "Həmin hesab qurumun direktor müavini Nail Abdullayev tərəfindən müəyyən olunub. Bir neçə gün olar ki, Nail Abdullayev Naxçıvan qaz istismar idarəsinin işçiləri ilə görüşüb. Həmin görüşə öz katibəsini də aparıb. Görün, Nail Abdullayev özünə nə qədər arxayındır ki, bir katibəsini İstismar departamentinə rəis müavini təyin edib.

Qarabag regional qaz idarəsinin rəisi isə Nail Abdullayevlə oturub restoranda yemək yeyir. Sonra isə rəis Azay müəllim rayon rəislərinin hamısından 50 manatdan yığır ki, bəs "rəhbərə" qonaqlıq vermişəm...."

"DİA-AZ"ın əldə etdiyi yeni məlumatlardan aydın olur ki, Nail Abdullayevin sirri onun təkcə katibəsini vəzifəyə gətirməsi ilə məhdudlaşmır. Adam başdan-ayağa SİRR DAĞARCIĞI imiş.. Növbəti faktı isə tanınmış hüquq müdafiəçisi, Neftçilərin Hüquqlarının Müdafiəsi Təşkilatının (NHMT) sədri Mirvari Qəhrəmanlı açıqlayıb.

NHMT sədri özünün sosial şəbəkə hesabında belə yazır: "Kastalar!!
Bu irsi mənşəyə, qohumluq əlaqələrinə və sosial statusa əsaslanan, insanların qapalı qruplara bölündüyü sosial təbəqələşmə formasıdır❗️
Təccüblüdür? Düzdürsə, əlbəttə ki ...
"Azəriqaz"ın baş direktorunun 1-ci müavini (əməliyyatlar üzrə) cənab Nail Abdullayevin bu vəzifə hətta əsas iş yeri deyilmiş...
Əlahəzrətin əsas iş yeri SOCARDOWNSTREAM-da baş direktorun müşaviri imiş!!?"

Hər halda, bu fakt çox ilginc xarakter daşıyır və zəruri iz

DİA-AZ

Dövlət büdcəsindən maliyyələşən layihələrdən söhbət getdiyi üçün belə təşkilatların fəaliyyəti barədə ictimaiyyət üçün əlçatan məlumatların məhdud olması əlavə suallar yaradır

QHT-lərə Dövlət Dəstəyi Agentliyinin keçirdiyi qrant müsabiqələri ilə bağlı son illər müxtəlif suallar səsləndirilir. Müsabiqələrin şəffaflığı, layihələrin qiymətləndirilməsi meyarları, qaliblərin seçilməsi prosesi və ayrılan dövlət vəsaitlərinin səmərəliliyi ilə bağlı müzakirələr zaman-zaman ictimaiyyətin diqqət mərkəzində olub. Agentlik isə hər dəfə bəyan edib ki, təqdim olunan layihələr çoxmərhələli ekspertiza prosesindən keçir, qiymətləndirmə müstəqil ekspertlər tərəfindən aparılır, təkrarçılığa və oxşar layihələrin maliyyələşdirilməsinə imkan verilmir.

Lakin "Yenixeberorg"a daxil olan yeni məlumatlar və apardığımız ilkin araşdırma bu bəyanatlarla bağlı yeni suallar ortaya çıxarır.

Eyni adlı layihələr – təsadüfdür, yoxsa sistem problemi?

Redaksiyamıza daxil olan məlumatda iddia olunur ki, QHT-lərə Dövlət Dəstəyi Agentliyinin 2026-cı il qrant müsabiqəsində qalib elan olunan iki təşkilat mahiyyət etibarilə eyni layihə ilə maliyyələşdirilib.

Söhbət "Ahıllara və Tənhalara Dəstək" İctimai Birliyi və "Sənsiz" Xeyriyyə İctimai Birliyindən gedir. Hər iki təşkilat "Yüksək mənəvi dəyərlərin təbliği" adlı layihənin icraçısı kimi təqdim olunub. Rəsmi məlumatlara əsasən, layihələrdən biri üçün 8 min manat, digəri üçün isə 5 min 500 manat qrant ayrılıb.

İlk baxışdan eyni adda layihələrin olması təsadüfi görünə bilər. Lakin "Yenixeberorg"a təqdim olunan məlumatlarda bildirilir ki, oxşarlıq təkcə layihənin adı ilə məhdudlaşmır.

Görünən odur ki, layihələrin məqsədi, fəaliyyət istiqamətləri, icra mexanizmi, gözlənilən nəticələr və büdcə strukturu böyük ölçüdə üst-üstə düşür. Fərqlər əsasən layihənin keçiriləcəyi məkan, tarix və benefisiar qrupları ilə bağlı kiçik dəyişikliklərdən ibarətdir.

Təkrarçılığa yol verilmədiyi deyilirdi...

QHT-lərə Dövlət Dəstəyi Agentliyi indiyədək müxtəlif platformalarda bildirib ki, layihələr ekspertlər tərəfindən bir neçə mərhələdə qiymətləndirilir və oxşar məzmunlu layihələrin maliyyələşdirilməsinə yol verilmir.

Bu halda isə ortaya məntiqi suallar çıxır. Əgər layihələr həqiqətən də mahiyyət etibarilə eynidirsə, bu oxşarlıq ekspertlərin diqqətindən necə yayınıb?

Yox əgər layihələr arasında ciddi fərqlər mövcuddursa, həmin fərqlər nədən ibarətdir və bu fərqlər iki ayrı dövlət qrantının ayrılmasını necə əsaslandırır? Bu sualların cavablandırılması yalnız media üçün deyil, dövlət vəsaitlərinin xərclənməsinə nəzarət baxımından da vacibdir.

Digər diqqətçəkən məqam

Araşdırmamız zamanı diqqətimizi çəkən digər məsələ "Sənsiz" Xeyriyyə İctimai Birliyi ilə bağlı oldu.

Açıq informasiya mənbələrindən təşkilat haqqında demək olar ki, hər hansı məlumat əldə etmək mümkün olmadı. Təşkilatın əvvəlki layihələri, ictimai fəaliyyəti, sosial şəbəkə hesabları və ya media çıxışları barədə geniş məlumat yoxdur.

Təşkilatın rəhbəri kimi göstərilən Zemfira Rəhimova haqqında da açıq mənbələrdə ətraflı informasiya tapılmadı.

Bu, əlbəttə, özlüyündə hansısa qanun pozuntusunun sübutu deyil. Lakin dövlət büdcəsindən maliyyələşən layihələrdən söhbət getdiyi üçün belə təşkilatların fəaliyyəti barədə ictimaiyyət üçün əlçatan məlumatların məhdud olması əlavə suallar yaradır.

Dövlət vəsaiti – ictimai hesabatlılıq tələb edir!

QHT-lərə ayrılan qrantlar dövlət büdcəsi hesabına maliyyələşdirilir. Buna görə də müsabiqələrin keçirilməsi, layihələrin qiymətləndirilməsi və qaliblərin müəyyənləşdirilməsi prosesi maksimum şəffaf olmalı, yaranan bütün suallara əsaslandırılmış cavab verilməlidir.

Əgər eyni və ya böyük ölçüdə oxşar layihələr müxtəlif təşkilatlar tərəfindən təqdim olunaraq maliyyələşdirilibsə, bu, qiymətləndirmə mexanizminin effektivliyi ilə bağlı suallar doğurur.

Əksinə, əgər layihələr arasında ciddi fərqlər varsa, həmin fərqlərin ictimaiyyətə izah edilməsi də Agentliyin marağında olmalıdır. Şəffaflıq həm dövlət qurumunun nüfuzunu qoruyur, həm də qrant müsabiqələrinə inamı artırır.

Araşdırmalar davam edir!

Redaksiyamız bu məsələ ilə bağlı araşdırmalarını davam etdirir. Növbəti mərhələdə hər iki layihənin məzmununu daha detallı müqayisə etməyə, layihə sənədlərindəki oxşarlıqları təhlil etməyə və qrantların qiymətləndirilməsi prosesinə dair əlavə məlumatlar əldə etməyə çalışacağıq. Təbii ki, QHT-lərə Dövlət Dəstəyi Agentliyində müvafiq sənədlər dəyişdirilməyəcəksə ...

Sonda kiçik bir çağırış etmək istəyirik: Əgər QHT sektorunda çalışan şəxslərin qrant müsabiqələri, qiymətləndirmə prosesi və ya digər ictimai əhəmiyyət daşıyan məsələlərlə bağlı məlumatları varsa, onları redaksiyamızla bölüşə bilərlər. Təqdim olunan bütün məlumatlar jurnalist araşdırması prinsiplərinə uyğun şəkildə yoxlanılacaq və təsdiqləndiyi halda ictimaiyyətə çatdırılacaq.(Yenixeberorg.com)

Qarşı tərəfin cavab haqqını tanıyırıq.

Azərbaycan Texnologiya Universitetində (ATU) əsassız pul tələb olunması ilə bağlı iddialar səngimir. Bu barədə sosial şəbəkələrdə mütəmadi olaraq tənqidi məlumatlar dərc edilirdi.
Redaksiyamıza daxil olan növbəti "WhatsApp" səs yazısı da universitetdə qanunsuz pul yığımlarının davam etdiyini sübut edir. Sözügedən səs yazısının Texnologiya Universitetinin Xarici dillər kafedrasının müdiri əvəzi Aysel Məmmədliyə məxsus olduğu bildirilir. Səs yazısından aydın olur ki, müəllimlərdən və universitetin müxtəlif şöbələrindən müəyyən məbləğdə əsassız pullar tələb edilir.
İddialara görə, universitetdə dekan, kafedra müdiri və ya şöbə rəhbəri vəzifəsinə təyin olunmaq üçün namizədlər öncə öz vəsaitləri hesabına təhsil müəssisəsinin daxilində təmir işləri aparmalıdırlar.
Diqqət çəkən digər məqam: Universitetin rektoru Yaşar Ömərovun fəaliyyətinə qarşı heç bir tədbir görülmədiyi, dövlət qurumlarının bu vəziyyətə səssiz qaldığı vurğulanır. İddia olunur ki, Elm və Təhsil nazirinin yaxın dostu kimi tanınan Y.Ömərov universiteti şəxsi maraqlarına uyğun idarə edir. Rektorun əsassız pul tələblərini rəhbər heyətdəki digər şəxslər vasitəsilə topladığı, redaksiyamızda buna dair ciddi fakt və əsasların olduğu bildirilir.
Bu prosesdə Xarici dillər kafedrasının müdiri Aysel Məmmədlinin rektorun ən yaxın adamı kimi universitetdə əsas fiqura çevrildiyi və ali məktəbdə nüfuzlu şəxs qismində tanındığı qeyd edilir.
Məsələ ilə bağlı Dövlət Təhlükəsizliyi Xidməti (DTX) və Baş Prokurorluq yanında Korrupsiyaya Qarşı Mübarizə Baş İdarəsi tərəfindən hələ ki heç bir rəsmi reaksiya verilməyib. Universitet rəhbərliyinə bu "toxunulmazlığı" kimin verdiyi isə sual doğurur.
Azərbaycan Texnologiya Universitetinin rektoru və digər rəhbər şəxsləri haqqında yeni səs yazıları, foto və video materiallar da redaksiyamıza daxil olub. Mövzu diqqətimizdədir.
Ardı var...(Teref)