“Azəristiliktəchizat” Açıq Səhmdar Cəmiyyəti (ASC) “İdeal TM” Qapalı Səhmdar Cəmiyyəti (QSC) ilə satınalma müqaviləsi imzalayacaq.

“İdeal TM” QSC Xətai rayonu, Gəncə prospekti 35 ünvanında yerləşən 2 saylı qazanxananın yenidən qurulması işlərinin satın alınması ilə bağlı keçirilən tenderin qalibi seçilib.

Yenidənqurma işlərinin dəyəri 779 999,99 manat təşkil edir.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “İdeal TM” QSC 2018-ci ildə dövlət qeydiyyatına alınıb. Şirkətin nizamnamə kapitalı 2 010 manatdır. Hüquqi ünvanı Bakı şəhəri, Nəsimi rayonu, Tiflis prospekti 44C, mənzil 0-da yerləşir. Qanuni təmsilçisi Əliyev Əfqan Tapdıq oğludur.
Açıq mənbələrdə şirkət haqqında geniş məlumat yoxdur.

Əfqan Əliyev eyni zamanda “NN Group” MMC-nin rəhbəridir. Onun barəsində 2024-cü ildə Azərbaycan Respublikasının İnzibati Xətalar Məcəlləsinin 192.1-ci maddəsi ilə inzibati protokol tərtib edilib. Həmin maddə əmək müqaviləsi hüquqi qüvvəyə minmədən fiziki şəxslərin işə və ya xidmətlərin yerinə yetirilməsinə cəlb edilməsinə görə məsuliyyəti nəzərdə tutur.

Dövlət satınalmalarının vahid internet portalındakı məlumatlara əsasən, ötən il “Azəristiliktəchizat” ASC ilə “İdeal TM” QSC arasında ümumi dəyəri 4 390 569,55 manat olan satınalma müqaviləsi imzalanıb. Müqavilə çərçivəsində yeddi qazanxananın yenidən qurulması və modernləşdirilməsi ilə bağlı tikinti-quraşdırma, sınaq və sazlama işlərinin satın alınması nəzərdə tutulub.

“Azəristiliktəchizat” ASC-nin İdarə Heyətinin sədri İlham Mirəzliyevdir. O, 2025-ci ildən bu vəzifəni icra edir.

Qaynarinfo

Ayağı zədələndiyi üçün Sabunçu Tibb Mərkəzinə gələn vətəndaş iddia edir ki, orada ondan gipsin bir hissəsini və binti öz hesabına alması tələb olunub.

Bu barədə mətbuata müraciət edən ikayətçi pasiyent Fərid Fuad oğlu Bayramov məlumat verib.

VİDEO LİNKDƏ: https://bizimesr.media/az/post/sabuncu-xestexanasinda-biabirciliq-dediler-ki-gipsi-ve-binti-ozun-al---video-22782

O qeyd edib ki, 13:30-də xəstəxanaya gəlib və tibb işçiləri ona ayağına gips qoyulması üçün lazım olan ləvazimatların bir hissəsini öz vəsaiti hesabına almalı olduğunu deyiblər: "Dedilər ki, gipsin bir hissəsi bizdə var, qalanını özünüz alın. Binti də özünüz almalısınız. Onları almadan ayağınızı gipsə qoymayacağıq".

F.Bayramovun sözlərinə görə, bununla razılaşmayaraq aidiyyəti qurumlara şikayət edib. O bildirib ki, bundan sonra xəstəxanada münasibət dəyişib və tələb olunan ləvazimatlar tapılıb. Pasiyentin iddiasına görə, sonradan tibb işçiləri ona istifadə olunan gips və binti öz vəsaitləri hesabına aldıqlarını deyiblər.

Hazırda F.Bayramovun ayağı gipsə salınıb. Şikayətçi həmçinin onu da qeyd edib ki, ondan sonra gələn pasiyentlərdən də öz vəsaitləri hesabına bint almaları tələb olunur.

Bizimesr.media

Səhiyyə Nazirliyi Analitik Ekspertiza Mərkəzi tərəfindən “Vital Hospital” kimi tanınan “SAĞLAMLIQ VƏ GÖZƏLLİK MƏRKƏZİ” MMC-də plandankənar yoxlama keçirilib.

Bu barədə AEM-dən məlumat verilib.

Bildirilib ki, yoxlama nəticəsində insan həyatı və ya sağlamlığına zərər verəcək bir sıra qanun pozuntuları aşkar edilib: "Belə ki, klinikada tibbi təyinatlı məmulatların dezinfeksiyası və sterilizasiyası, dezinseksiya və deratizasiya tədbirlərinin, alətlərin sterilizasiyanın sanitariya norma və qaydalarının tələblərinə uyğun aparılmadığı, həmçinin “Lisenziyalar və İcazələr haqqında” Azərbaycan Respublikası Qanununun, 27-ci maddəsinin pozulması, lisenziyanın şərtlərinə riayət olunmaması aşkarlanıb.

Bu sırada aşağıdakı qanun pozuntularını sadalamaq olar: müəssisədə ambulator xidmət üzrə “terapevtik”, “kardioloji”, “ginekoloji” işlər üzrə prosedur otaqları təşkil edilməyib. “Qastroenteroloji” işin sahələri qaydalara uyğunlaşdırılmayıb. “Nefroloji”, “endokrinoloji”, “revmatoloji”, “neyrocərrahi”, “üz-çənə cərrahi”, “diyetoloji”, “hematoloji”, “dermatoloji”, “psixiatrik”, “otorinolarinqoloji”, “plastik cərrahi”, “ümumi cərrahi”, “uroloji”, “travmatoloji–ortopedik”, “anestezioloji-reanimatoloji”, “pediatrik”, “rentgenoloji”, “kompyuter tomoqrafiyası”, “nüvə maqnit rezonansı” işlər üzrə otaqlar təşkil edilməyib. Pediatriya ixtisası üzrə pediatrik işi otağında peyvənd sahəsi yaradılıb. Kardioloq və ginekoloq həkimlərin qəbul otağı birgə təşkil olunub. Peyvənd sahəsində məişət tipli soyuducudan istifadə olunur. Biomateriallar ilə reagentlərin soyuducuda bir yerdə saxlanması aşkar edilib.

“Rentgenoloji” iş üzrə fəaliyyət aşkar olunsa da, müəssisəyə dair “Xüsusi icazə” sənədinin müddətinin bitməsi müəyyən edilib. “Radioloji gigiyenik pasport” sənədi yoxlamaya təqdim edilməyib. Tibbi tullantıların idarə olunmasına dair tələblərə müvafiq olaraq cavabdeh şəxs təyin olunmayıb, müvəqqəti saxlanılma otağı qaydalara uyğun təşkil edilməyib, iri konteynerlər açıq şəkildə, əlçatan yerdə, təhlükəsizlik qaydalarına riayət olunmadan saxlanılıb. Müəssisə daxilində tibbi tullantıların idarə olunması (çeşidlənməsi, toplanması) təsnifatı üzrə aparılmır, qarışdırılır, təhlükəsizlik qaydalarına riayət olunmur, kəsici və deşici tullantılar üçün karton sərt qutudan iynə ucunun çıxıntısı aşkar edilib.

Lakin, sadalananlar aşkar edilən qanun pozuntularının heç də hamısı deyil. Belə ki, müəssisədə Özəl tibb fəaliyyəti subyektinin tabeliyində çalışan tibb mütəxəssislərini ixtisaslarına uyğun vəzifəyə təyin etmədiyi müəyyən edilib. Məsələn, ixtisasca “laborant”ın “baş tibb bacısı” vəzifəsinə təyin olunması aşkar edilibr. “Şüa diaqnostika” ixtisaslı həkim “radioloq” vəzifəsinə təyin edilib. Bəzi şəxslərin əmək müqaviləsi yoxlamaya təqdim edilməyib.

Bundan əlavə, müəssisədə lisenziyadan kənar “kosmetoloji” iş və fəaliyyətin olması faktı aşkar edilib. Bu işi ixtisasca dermatoveneroloq həkim-mütəxəssisin icra etdiyi aşkarlanıb. Həmçinin, müəssisədə yararlılıq müddəti bitmiş dərman və tibb vasitələri aşkar edilib, dərman vasitələrinin saxlanılmasına dair tələblərə riayət olunmaması faktı üzə çıxıb.

Yuxarıda qeyd edilən hallar Qanunun 28.2.10-cu maddəsi əsas götürülərək müəssisənin fəaliyyətinin insan həyat və sağlamlığı üçün ciddi təhlükə daşıdığını sübut edir. Bu səbəbdən, “SAĞLAMLIQ VƏ GÖZƏLLİK MƏRKƏZİ” MMC-də stasionar tibbi xidmətin fəaliyyətinin dayandırılması qərara alınıb və qeyd edilən nöqsanların 10 iş günündə aradan qaldırılması barədə sahibkara göstəriş verilib. Müddət bitdikdən sonra müəssisədə yenidən yoxlama keçiriləcək və nəticəyə uyğun müvafiq addımlar atılacaq", - məlumatda bildirilib.

Qeyd edək ki, bir müddət əvvəl "Vital Hospital"da ölü doğulan uşağın zirzəmiyə atıldığı iddia edilirdi.

Bizimesr.media

Peşə Təhsili üzrə Dövlət Agentliyinin müəllim və istehsalat təlimi ustalarının işə qəbulu üzrə keçirilən imtahanlarla bağlı tələblər irəli çıxır.

İmtahanlarda iştirak edən namizədlər sualların hazırlanması və nəticələrin qiymətləndirilməsi prosesinin daha şəffaf olmasını tələb edirlər. Namizədlərin sözlərinə görə, artıq bir neçə ildir keçirilən işə qəbul imtahanlarının sualları Təhsil İnstitutu tərəfindən Peşə Təhsili üzrə Dövlət Agentliyinin sifarişi əsasında hazırlanır.

Onlar iddia edirlər ki, hər imtahandan sonra test tapşırıqları ilə bağlı çoxsaylı iradlar səsləndirilir, suallarda məzmun və texniki qüsurlar aşkar olunur. Yalnız narazılıqlar geniş ictimai rezonans doğurduqdan sonra keçid balına 1-2 bal əlavə edilməsi ilə kifayətlənildiyi bildirilir.

Əsas narazılıq isə imtahandan sonra sualların namizədlərə təqdim edilməməsi ilə bağlıdır. İmtahanda iştirak edənlər bildirirlər ki, test tapşırıqları açıqlanmadığı üçün onların düzgünlüyünü yoxlamaq, mübahisəli sualları əsaslandırmaq və ya apellyasiya zamanı sübut təqdim etmək mümkün olmur.

Namizədlər qeyd edirlər ki, imtahan zamanı qeydlər apardıqları vərəqlər də zaldan çıxarkən onlardan alınır. Bu isə sonradan sualları xatırlamağı və müzakirə etməyi demək olar ki, mümkünsüz edir. "Əlimizdə heç bir sübut olmur. Onlarla sualı yadda saxlamaq mümkün deyil. İmtahandan çıxanda qeyd etdiyimiz vərəqləri də əlimizdən alırlar. Bu, düzgün yanaşma deyil. İmtahan sualları gizli sənəd deyil. Suallar açıqlanmalı, müzakirə olunmalı və səhvlər varsa aradan qaldırılmalıdır", – deyə namizədlər bildirirlər.

Onların sözlərinə görə, avqust ayında keçirilməsi gözlənilən növbəti imtahanlar ərəfəsində də eyni problemlərin yaşanacağı ilə bağlı narahatlıqlar var. Namizədlər hesab edirlər ki, test tapşırıqları yenə də mübahisə doğuracağı halda, sualların açıqlanmaması səbəbindən iddialarını sübut etmək imkanından məhrum olacaqlar.

Qeyd edək ki, əvvəlki illərdə də Təhsil İnstitutunun hazırladığı bəzi test tapşırıqları ilə bağlı müəllimlər tərəfindən müxtəlif iradlar səsləndirilib. Hətta Peşə Təhsili Üzrə dövlət Agentliyi bu narazılıqları Təhsil İnstitutuna yönəldərək "sualları onlar hazırlayıb" kimi açıqlamalar verib.

Lakin imtahan sualları ictimaiyyətə açıqlanmadığından həmin iddiaların obyektiv şəkildə araşdırılması və geniş müzakirəyə çıxarılması mümkün olmayıb.

Bizimesr.media

Sabirabad Rayon Mərkəzi Xəstəxanasının külli miqdarda mənimsəmədə ittiham olunan sabiq direktoru Həsən Hüseynovun məhkəməsi başlayıb.

Baxış iclası avqustun 11-nə təyin edilib.

İttihama görə, Həsən Hüseynov qulluq mövqeyindən istifadə etməklə 186 min manat mənimsəyib. O, istintaq dövründə dəymiş ziyanın təxminən 20 min manatını ödəyib.

H,Hüseynov Cinayət Məcəlləsinin 179.3.2-ci (Mənimsəmə, külli miqdarda törədildikdə) maddəsi ilə ittiham elan olunub, barəsində başqa yerə getməmək iltizam qətimkan tədbiri seçilib.

Xatırladaq ki, Sabirabad Rayon Mərkəzi Xəstəxanasının vəzifəli şəxsi Əlişirin Əliyev, Qabil Quliyev və İntiqam Kərimovun cinayət işi üzrə hazırda Bakı Ağır Cinayətlər Məhkəməsində məhkəmə prosesi davam edir.

H.Hüseynovun Dövlət Gömrük Komitəsinin (DGK) keçmiş rəisi general-polkovnik Səfər Mehdiyevin bacanağıdır. O, ötən il xəstəxanada qadın işçilərdən birini döyməsi iddiası ilə də gündəmə gəlmişdi.

1xeber.media

İyulun 31-də Qırğızıstanda, İssık-Kul gölünün sahilində beşulduzlu "Baku Resort & Spa" mehmanxanasının açılışı olub.

Prezident İlham Əliyev və birinci xanım Mehriban Əliyeva, Qırğız Respublikasının Prezidenti Sadır Japarov və birinci xanım Ayqul Japarova, Özbəkistan Prezidenti Şavkat Mirziyoyev və birinci xanım Ziroatxon Mirziyoyeva, Qazaxıstan Prezidenti Kasım-Jomart Tokayev, Tacikistan Prezidenti Emoməli Rəhmon və Türkmənistan Prezidenti Sərdar Berdiməhəmmədov tədbirdə iştirak ediblər.

Son vaxtlar sosial şəbəkələrdə, xüsusilə Facebook və instagram platformalarında Bakı şəhəri, Xətai rayonu, 8 Noyabr küçəsi 4 ünvanında yerləşən “Amay” Ticarət Mərkəzinin 3-cü giriş hissəsinin 2-ci mərtəbəsində fəaliyyət göstərən Devin Media tərəfindən yayımlanan reklamlarda Türkiyənin məşhur seriallarının adları, afişaları və aktyorlarının görüntülərindən istifadə olunaraq vətəndaşlar aktyor seçimlərinə dəvət edilir.

Reklamlarda “Serialın səlahiyyətli agentliyi” ifadəsinin işlədilməsi isə Devin Medianın həmin serialların hüquq sahibləri ilə rəsmi əməkdaşlıq etdiyi barədə təsəvvür yaradır.

Son vaxtlar sosial şəbəkələrdə, xüsusilə Facebook və instagram platformalarında Bakı şəhəri, Xətai rayonu, 8 Noyabr küçəsi 4 ünvanında yerləşən “Amay” Ticarət Mərkəzinin 3-cü giriş hissəsinin 2-ci mərtəbəsində fəaliyyət göstərən Devin Media tərəfindən yayımlanan reklamlarda Türkiyənin məşhur seriallarının adları, afişaları və aktyorlarının görüntülərindən istifadə olunaraq vətəndaşlar aktyor seçimlərinə dəvət edilir.

Reklamlarda “Serialın səlahiyyətli agentliyi” ifadəsinin işlədilməsi isə Devin Medianın həmin serialların hüquq sahibləri ilə rəsmi əməkdaşlıq etdiyi barədə təsəvvür yaradır.

Dəmir Yumruq Alfa-A -nın araşdırması zamanı müəyyən edilib ki, Devin Medianın sosial şəbəkələrdə yerləşdirdiyi reklam üzərinə klik edən istifadəçi ilk olaraq elektron müraciət formasına yönləndirilir. Bu mərhələdə namizəddən ad, soyad və WhatsApp nömrəsini daxil etməsi istənilir.

Daha sonra istifadəçiyə məlumatların qorunması və hüquqi şərtlərlə tanış olmaq imkanı yaradılır, “Müraciəti göndər” düyməsi vasitəsilə isə müraciət tamamlanır. Eyni zamanda, daxil edilən məlumatların şifrələnərək qorunduğu bildirilir. Müraciət formasında müxtəlif qanunvericilik aktlarına istinad edilməsi də diqqət çəkir.

Məsələ ilə yaxından maraqlanan hüquqşunas Xəyal Məmmədov Dəmir Yumruq Alfa-A -ya açıqlamasında qeyd edib ki, bu cür təqdimat bəzi vətəndaşlarda şirkətin hüquqi baxımdan xüsusi səlahiyyətlərə malik olduğu barədə təəssürat yarada bilər.

Onun sözlərinə görə, hüquqi normalara istinad edilməsindən əvvəl şirkətin öz fəaliyyətinin qanunvericiliyin tələblərinə uyğun olması əsas şərtdir.

Qeyd edək ki, araşdırma zamanı müəyyən olunub ki, müraciət başa çatdıqdan sonra istifadəçiyə 010 265 86 31 nömrəsindən əlaqə saxlanılacağı bildirilir və həmin nömrənin yaddaşa yazılması tövsiyə edilir. Redaksiya həmin nömrəni GetContact tətbiqi vasitəsilə də yoxlayıb. Tətbiqdə nömrə “yüksək riskli nömrə” kimi işarələnib və çoxsaylı istifadəçilər tərəfindən spam və ya dələduzluq şübhəsi ilə işarələndiyi göstərilib. Eyni zamanda, nömrə ilə bağlı istifadəçi rəyləri də yer alır və onların əksəriyyəti mənfi məzmun daşıyır.

Hüquqşunasın apardığı araşdırma çərçivəsində Türkiyədə sözügedən serialların yaradıcı heyəti ilə əlaqə yarada biləcək şəxslər vasitəsilə məlumat əldə etməyə çalışıb.

Onun sözlərinə görə, əldə olunan məlumata əsasən, Devin Medianın həmin serialların Azərbaycandakı səlahiyyətli agenti olması barədə hər hansı məlumat təsdiqlənməyib və Devin Media ilə hər hansı rəsmi əməkdaşlıqlarının mövcud olmadığını qeyd ediblər:

“Türkiyədə sözügedən serialların yaradıcı heyəti ilə əlaqə yarada biləcək şəxslər bildiriblər ki, bu kimi hallara təkcə Azərbaycanda deyil, digər ölkələrdə də müşahidə olunduğunu bildiriblər. Onların qeyd etdiyinə görə, bəzi şəxslər Türkiyə istehsalı olan serialların adlarından, loqolarından və tanınmış brendlərindən istifadə etməklə kommersiya fəaliyyəti göstərməyə çalışırlar. Həmin şəxslər bildiriblər ki, belə hallar Türkiyə ərazisində baş verdiyi təqdirdə hüquqi müdaxilə daha asan olsa da, xarici ölkələrdə baş verən oxşar halların araşdırılması və hüquqi qiymətləndirilməsi daha mürəkkəb prosedurlar tələb edir. Hüquqşünas hesab edir ki, əgər şirkət reklamlarında “Serialın səlahiyyətli agentliyi” ifadəsindən istifadə edirsə, bunu təsdiq edən agentlik müqaviləsi, səlahiyyət sənədi və ya digər hüquqi əsaslar ictimaiyyətə təqdim edilməlidir”.

Xəyal Məmmədovun sözlərinə görə, “Reklam haqqında” Qanunun 5-ci maddəsi reklamın doğru, dürüst olmasını və istehlakçını aldatmamasını tələb edir:

“Eyni zamanda, “İstehlakçıların hüquqlarının müdafiəsi haqqında” Qanunun 13-cü maddəsinə əsasən istehlakçı xidmət barədə düzgün və etibarlı məlumat almaq hüququna malikdir. Hüquqşünas əlavə edib ki, reklamlarda xarici serialların adlarının, loqolarının, afişalarının və digər müəllif hüquqları ilə qorunan elementlərinin hüquq sahibinin razılığı olmadan kommersiya məqsədilə istifadə olunması da müəllif hüquqları baxımından ayrıca hüquqi araşdırma predmeti ola bilər. Hazırda əsas sual “Serialın səlahiyyətli agentliyi” ifadəsinin hansı hüquqi əsaslara söykəndiyidir. Devin Media bu iddianı təsdiq edən rəsmi sənədləri təqdim edərsə, yaranmış suallara aydınlıq gətirilmiş olar. Eyni zamanda, şirkətin bu məsələ ilə bağlı mövqeyinin açıqlanması da ictimai maraq baxımından əhəmiyyət daşıyır”.(Dya-a.az)

Bakıda və Abşeron yarımadasında avqustun 1-də hava şəraitinin yağmursuz keçəcəyi gözlənilir.

Bu barədə Milli Hidrometeorologiya Xidməti məlumat yayıb.

Bildirilib ki, şimal-qərb küləyi gündüz şimal-şərq küləyi ilə əvəz olunacaq.

Havanın temperaturu gecə 22-25° isti, gündüz 31-36° isti olacaq. Atmosfer təzyiqi 769 mm civə sütunu, nisbi rütubət isə gecə 70-75 %, gündüz 50-55 % təşkil edəcək.

Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli az yağış yağacağı, şimşək çaxacağı ehtimalı var. Gecə və səhər bəzi dağlıq ərazilərdə arabir duman olacaq. Şərq küləyi əsəcək.

Havanın temperaturu gecə 22-26° isti, gündüz 34-39° isti, dağlarda gecə 15-20° isti, gündüz 23-28° isti olacaq.

"Texnika və Texnologiyalar üzrə Bakı Dövlət Peşə Təhsil Mərkəzi" Publik Hüquqi Şəxsi çilingər emalatxanası üçün avadanlıqların satın alınması üzrə keçirdiyi tenderə yekun vurub.

32gun.az yazır ki, Satınalma müsabiqəsinin qalibi "POLİNOM" Məhdud Məsuliyyətli Cəmiyyəti olub.

Şirkətlə 25 min 830 manatlıq müqavilənin bağlanması nəzərdə tutulur.

Qeyd edək ki, Abşeron rayonu, Xırdalan şəhərində qeydiyyatda olan və Elman Xankişiyevin rəhbərlik etdiyi bu MMC-nin nizamnamə kapitalı cəmi 10 manat təşkil edir.

Respublika Gigiyena və Epidemiologiya Mərkəzi proqram təminatının (SERP) modullarına texniki xidmətlə bağlı rəqabətsiz "Bir mənbə" metodu ilə "SİNAM" Məhdud Məsuliyyətli Cəmiyyəti ilə anlaşıb.

32gun.az yazır ki, tərəflər arasında 118 min 118 manatlıq "zerkalnı" müqavilə bağlayıb.

Araşdırmamız zamanı bəlli olub ki, müqavilə bağlanmış şirkətin külli miqdarda vergi borcu mövcuddur.

32gun.az-ın əldə etdiyi məlumata görə, şirkətin 4 milyon 785 min manatlıq nəhəng borcu var.

Bildirək ki, Əbülfət Rəhmanovun qanuni təmsilçisi olduğu, Bakı şəhəri, Əhməd Cəmil küçəsində qeydiyyatdan keçən bu MMC-nin nizamnamə kapitalı 44 min 487 manatdır.

Xatırladaq ki, Azərbaycan Respublikası Səhiyyə Nazirliyinin tabeliyində fəaliyyət göstərən Respublika Gigiyena və Epidemiologiya Mərkəzinin baş direktoru Sara Həsənovadır.

32gun.az