Azərbaycanda fəaliyyət göstərən kolleclərdə ciddi problemlər var və bu xüsusilə, təhsilin keyfiyyəti ilə bağlıdır. Yəni, dərslər keçilmir, keçilsə belə formal tədris olunur. Eləcə də, son bir-iki ildə kolleclərə təyin olunan direktorların özbaşınalığı, ora işə pul hesabına qəbul olunan müəllimlərin təcrübəsizliyi, tələbələrin ödədikləri kreditlər hesabına bayramlara təsadüf edən aylarda “adlara” yazılıb mənimsənilən vəsaitlər və bir çox tədris edən kadrların səviyyə göstəricisinin aşağı olmamasına qədər hər şey imkan verməmişdir ki, müsbət dəyişikliklərə nail olunsun. O cümlədən, bir sıra kolleclərin və kollec rəhbərlərinin adı davalarda, məhkəmə çəkişmələrində, rüşvət qalmaqallarında, tələbənin dərsə gəlməməsi müqabilində onun valideynindən qızıl üzük, digər hədiyyə alma faktlarına görə gündəm olub.
Ötən həftə Milli Məclisin Elm və Təhsil Komitəsinin sədri Anar İsgəndərov yerli mediaya açıqlamasında bildirib ki, kolleclərin müəyyən universitetlərin tərkibinə daxil edilməsi, digər kolleclərin ləğv edilməsi azərbaycanlı gənclər üçün əhəmiyyətli olacaq və s.
Buradan belə görünür ki, Anar müəllimin fikirinə müəyyən əlavələrə ehtiyac var.Çünki kolleclərin mütləq çoxluğu üç ildən çoxdur ki,zatən universitetlərin nəzdində fəaliyyət göstərir.Yəqin hörmətli Anar müəllim bunu bilməmiş deyil və indiyə kimi müsbətə doğru heç nə dəyişməyib, əksinə kütləvi narazılıqlara rəvac verilib, bəzi kollec direktorları himayə edilib, onlara münasibət yerliçilik baxımından qanunsuzluqlarına rəğmən vəzifələrində saxlanılmaları ilə müşayiət edilib. Elm və Ali Təhsil üzrə Dövlət Agentliyinin direktoru Ülkər Səttərovanın bir sıra kollec direktorlarının özbaşınalığına, qanundan kənar idarəçiliyinə susqunluğu,Elm və Təhsil naziri Emin Əmrullayevin saytlarda gedən yazılardan sonra tədbir görməməsi kollec qarşısında müəllimlərin “istefa” tələbi irəli sürməsinə qədər gəlib çıxıb.
Ən praktik bir missal, Gəncə Dövlət Universitetinin nəzdində Gəncə Dövlət Regional kollecinin direktoru Xoşqədəm Xudiyeva haqqında saytlarda onlarla tənqidi məqalələr yayımlandı. Yazılanların həqiqətlə əlaqəsi konkret şikayətçilərə istinadlığı, qanunlara zidd əməllərə səbəb olma halları ilə təsdiqlənirdi. Amma Xoşqədəm Xudiyeva haqqında heç bir tədbir görülmür, əksinə o, himayəçiliyin imkanlarından yararlanaraq daha da kollektivə qarşı aqressiv davranırdı. Bu o dövrə kimi davam etdi ki, sonda kollecin müəllim kollektivi kütləvi şəkildə ayağa qalxdı, Xoşqədəm Xudiyevanın istefasını tələb etdi və onu nazir Emin Əmrullayev vəzifəsindən azad etdi.
Onu əvəz edən Nigar Səfixanova bu təyinatadək Tovuz Dövlət Sosial-İqtisadi kollecinin direktoru işləyirdi. O da bu təyinata qədər Tovuz Dövlət Sosial-İqtisadi kollecində məhkəmə qərarını icra etməkdən boyun qaçırmaq istəyən, təhsil müəssisəsinə aidiyyatı olmayan şəxsləri işə götürən, Tədris işləri üzrə direktor müavini Ramilə Tağıyeva, Təlim-tərbiyə işləri üzrə direktor müavini Lamiyə Namazova ilə bacara bilməyən, işə bərpa olunmalarına dair məhkəmə qərarı olan bir neçə müəllimi növbəti dəfə “özünə məxsus şəkildə” ixtisara salan birisi kimi tanınır. Yeri gəlmişkən, qeyd edək ki, haqlarında məhkəmə qərarı əsasında işə bərpa olunmuş Vəliyeva Aynurə Mirzəli qızı, İsayeva Aygün Müslüm qızı Nigar Səfixanova tərəfindən “sizə uyğun dərs yükü yoxdur, ştatınız ixtisara düşdü” deyilərək təkrar ixtisara salınıblar. Onlara hansı qərara, hansı əmrə əsasən, ixtisara düşmələri izah olunmayıb. Bu barədə onlara əmr göstərilməyib. Buradan da hasil olan qənaət odur ki, məcburiyyətdən birinci halda formal olaraq, məhkəmə qərarı icra olunub, lakin hər iki müəllim hələ də aparılan prinsip üzündən onlara dərs yükü verilmədən “ixtisar adı altında” kənarda saxlanılıblar. Beləliklə, orada nizam intizamı, davamiyyəti, təlim-tərbiyyəni tətbiq edə bilməyən, işinin şəkil çəkib paylaşmaqdan ibarət olduğu və kollektivdən küsüb onları aylarla danışdırmayan bir şəxsin hazırda Gəncə Dövlət Universitetinin nəzdində Gəncə Dövlət Regional Kollecində nizam-intizamı təmin edəcəyi, şəffaf davranacağı, tərəfsiz olacağı, kollektivdən küsməyəcəyi əvvəlki rəhbərliyin “hərəkətlərindən” nəticə çıxaracağı təfərrüatdır.
O cümlədən, götürək Elm və Ali Təhsil üzrə Dövlət Agentliyinin direktoru Ülkər Səttərova tərəfindən Bakı Dövlət Universitetinin nəzdində İqtisadiyyat və Humanitar kollecinə direktor əvəzi təyin olunan Hicran Əyyubovanı (Qeyd edək ki,Hicran Əyyubova hələ də direktor əvəzidir).
Hicran Əyyubova bu təyinatadək Tovuz Dövlət Sosial-İqtisadi kollecində direktor olub. Orada bir sıra qanuna zidd əməllərinə görə şiddətli töhmət alıb, ona dair onun müavininə qızıl üzük, həmçinin müəyyən dəyərdə ətir və şokolad bağlaması təqdim olunması, bu məsələ ilə bağlı Daxili İşlər Nazirliyinin (DİN) 102 Zəng Mərkəzinə məlumat verildiyi saytlarda yazılıb. Bu mənada, Şəmkir rayon sakininin adı keçən və bu bağlamanı verdiyi deyilən şikayətçi Şəhriyar Quliyevin anası Xatirə xanımın adı mətbuatda keçib. Yəni, kollecin aqronomluq fakültəsinin 3-cü kurs tələbəsi Şəhriyar Quliyevə görə onun anası – Xatirə Uğuzova kollecin şöbə müdirinə 600 AZN, direktorun özünə 900 manat, daha sonra Hicran Əyyubovaya çatacaq QIZIL ÜZÜK, 140 manat dəyərində ətir və şokolad bağlamasını onun Lamiyə adlı müavininə verməsinə dair saytlarda Akif İbrahimovun videomüraciəti yayımlanıb.
Tovuz Dövlət Sosial-İqtisadi Kollecində işlədiyi müddətdə kütləvi şəkildə müəllimləri işdən çıxarıb, onların yerinə isə əlinə bir dəfə jurnal almamış, bir saat dərs deməmiş müəllimləri işə götürüb. Yeri gəlmişkən, hələ o zaman əksəriyyətinə məlum idi ki, işdən çıxarılan şəxslərin yerinə qəbul edilənlər hansı “meyyarlar” əsasında kollecə qəbul olunublar.
İşdən çıxarılanlardan Ələkbərova Şahnaz Azər qızı, Vəliyeva Aynurə Mirzəli qızı, İsayeva Aygün Müslüm qızı, Musayeva Şəhla Dilqəm qızı tərəfindən Azərbaycan Respublikasının Elm və Təhsil Nazirliyinə, müxtəlif dövlət qurumlarına, eləcə də saytlara müraciət ünvanlandı. Sonrakı müddətdə bu şəxslərdən üçü, o cümlədən Vəliyeva Aynurə Mirzəli qızı və İsayeva Aygün Müslüm qızı haqqında 2 məhkəmə instansiyası işə bərpa olunmaları barədə qərarı qüvvədə saxladı, təsdiqlədi. Hətta bu şəxslər qanunsuz işdən çıxarıldıqları aylara görə 10 min manat və daha çox təzminatlarını belə aldılar. Buradan çıxarılan nəticə isə ondan ibarətdir ki, bir ştata dair 4 şəxsə vəsait ödənilib,onlar əmək haqqı alıb.
O cümlədən,işdən çıxarılan müəllimlər saytlara müraciət edərək bildirdilər ki, 2024-cü ilin oktyabr, noyabr aylarında adlarına əmək haqqı yazılıb. DSMF buna dair arayış verib, Kapital bank isə təsdiq edib ki, kartlarına köçürülməyib. Bu və digər halların özü bir maliyyə pozuntusu, korrupsiya halı yox, faktıdır. Araşdırılanda hansı kartlara köçürülüb, necə nağdlaşdrılıb məlum olacaq.
Həmçinin, Hicran Əyyubova Dövlət Əmək Müfəttişliyi tərəfindən 30.12.2024-cü il tarixli MN1612925 saylı protokolla inzibati məsuliyyətə cəlb edilərək cərimələnib, saxta sənəd tərtib etdiyini (29 sentyabr 2024-cü il tarixi, bazar günü) Dövlət Əmək Müfəttişliyinin Regional idarəsi aşkarlayıb.
Hicran Əyyubovaya dair bu sadalanan faktlar onun Tovuz Dövlət Sosial-İqtisadi Kollecinə rəhbərliyi dövrünə təsadüf edənlərin bir qismidir. Nəticədə nə baş verdi? Təhsil ictimaiyyəti Hicran Əyyubovanın vəzifədən alınıb, cəzalandırılacağını gözləyərkən o, BDU nəzdində İqtisadiyyat və Humanitar Kollecinə müvəqqəti olaraq, direktor təyin olundu. Fəaliyyəti Tovuz Dövlət Sosial-İqtisadi Kollecində farmalizimdən o yana keçməyən bu şəxs,gələr-gəlməz təhsil müəssisəsinin baş mühasibi Vəliyevə Rəfiqə və Qeydiyyat, Qiymətləndirmə və Monitorinq bölməsinin müdiri Afaq Malıyevanı Əmək Məcəlləsinin 70-ci maddəsinin ç bəndi ilə işdən çıxartdı. Dəftərxana müdiri Nigar Haşımlının isə ştatı ləğv olundu. Saytlara davamlı şikayətlər göndərildi və s. Sonrakı müddətdə hər üç şəxs məhkəməyə müraciət etdi. Bir müddət sonra BDU nəzdində İqtisadiyyat və Humanitar Kollecinin Qeydiyyat, Qiymətləndirmə və Monitorinq bölməsinin müdiri Afaq Malıyevanın Əmək Məcəlləsinin 70-ci maddəsinin ç bəndi ilə işdən çıxarılmasını Abşeron Rayon Məhkəməsi qanunsuz hesab etdi. Hazırda bir neçə müəllimə dair məhkəmə prosesi davam etməkdədir.
Eləcə də, götürək bir neçə ay bundan qabaq Qazax Dövlət Sosial- İqtisadi Kollecinə direktor təyin edilmiş Gülnar Qəhrəmanovanı. Bir müddət öncə “Qaçın, direktor gəldi… qaçın, direktor getdi…” başlıqlı məqalədə İlham Hacalı adlı müəllif qeyd edirdi ki, Gülnar Qəhrəmanovanın atası Qılman kişi qatı müxalifətçidir.
Sitat: “Hələ ki, mövzumuzu Qəhrəmanovanı kollecə direktor təyin edənlərin yanlışlığı ilə bitirmək istəyirəm. Nə qədər gec deyil, səhvlərini düzəltsələr, daha yaxşı olardı.Bu sadəcə olaraq ictimai rəydən əmələ gələn yekdil nəticədir. Bu adi bir bostan məhsuluna gözətçi qoyulması ilə eyni tutulmamalıdır. Kadrın tərcümeyi-halı, sağlamlıq durumu, insanlarla ünsiyyəti, savadı və idarəçiliyi yoxlanılmalıdır. Özündənrazı, qərəzçilk, tabeçiliyində olanlara yuxarıdan aşağı baxmaq hallarının olmaması üçün elə yerindəcə rəhbər işə təyin olunanlara göstəriş verilməlidir”.
Dərs ili başlayana kimi 6 nəfər müəllim işə götürdü. Həmin götürdükləri də bu günə kimi əlinə jurnal alıb sinif tanımayanlardır. Belədirsə, həmin müəllimlər tələbəyə nə öyrədəcək və ya nədən danışacaq. Kollec tədris müəssisəsinə deyil, təcrübə sahəsinə çevrilib. Bu da Gülnar Qəhrəmanovanın “qəhrəmanlığıdır”.
Gülnar Qəhrəmanova hələ Ağstafa şəhər 2 saylı tam orta məktəbində direktor olarkən 2 dəfə töhmət alıb. Xanımın işdə qalıb-qalmaması müzakirəyə gedəcək halda, kimlərsə tələm-tələsik, nəyəsə aldanaraq, Gülnar Qəhrəmanovanı kollecə direktor təyin etdiriblər.
O, kollecə necə təyin olunubsa, eləcə də kollecdə vəzifə bölgüsü aparır. Savadlı müəllimlər, bacarıqlı işini bilən texniki işçilər “gözümçıxdıya” salınır. İş işbilməzə, yerində olmayanlara tapşırılır.
Prezident cənab İlham Əliyev keçirdiyi iclaslarda, verdiyi müsahibələrdə də bu deyilənləri qeyd edir. Lakin kimlərinsə, Prezidentin dediklərini qulaq ardına vurması sonradan xoşagəlməz hallara gətirib çıxarır,”- bildirilir.
Müəllifin bu fikirindən çıxan qənaət ondan ibarətdir ki,səhv Gülnar Qəhrəmanovada deyil,onu ora təyin edənlərindi.Bəli,Bəli..!
Bax belə, Milli Məclisin Elm və Təhsil Komitəsinin sədri, hörmətli Anar İsgəndərov. Yuxarıda sadalananlar kolleclərin bir neçə ildir ki, universitetlərin tərkibinə, tabeçiliyinə verildiyindən sonra baş verənlərin bir qismidir.
Bunu da yuxarı-aşağı təhsil ictimaiəti bilməmiş deyil. Təxmini də olsa məlumatlısınız ki, son illərdə bu təhsil müəssisələrində keyfiyyət dəyşikliyinə deyil, kəmiyyətə fikir verilib.Şəkil çəkib paylaşmaq, işləyirik görüntüsünü təşviq etmək, təcrübəli müəllimləri işdən çıxarmaq, nəyinsə qarşılığında onların yerinə aidiyatı olmayan şəxsləri kolleclərə müəllim götürmək çoxdan dəb halını alıb. Məzmuna deyil, mahiyyətdən uzaq formaya üstünlük vermək çoxdan adiləşib. Bunları da Elm və Ali Təhsil üzrə Dövlət Agentliyinin rəhbərliyi, Elm və Təhsil naziri bilməmiş deyil!
Belə olan təqdirdə kollecləri növbəti dəfə universitetlərin tərkibinə vermək üçün qanuni mexanizm hazırlamırsız, neynirsiz edin,hörmətli Anar İsgəndərov.Dəyişən nə olacaq ki? Bu qənaətimiz o anlama gəlməsin ki,sizin yanaşmanıza hörmətsizlik etmək və ya onu ciddi qəbul etməmək kimi bir fikirimiz var.Əlbəttə yox,olada bilməz!
Ona görə də kolleclərdə baş verən xoşagəlməz vəziyyətlərə görə, bir ziyalı,tariçi-alim,millət vəkili və ən nəhayyət Milli Məclisin Elm və Təhsil Komitəsinin sədri kimi hərəni öz adı ilə çağırın.Himayəçilikdən,yerlibazlıqdan qaynaqlanaraq idarə olunan bu təhsil müəssisələrindəki özbaşınalığa iradınızı bildirin,bəlkə də yetər!
faktinfo.az
