Məmurların Sədərək gömrüyündəki gəlir davası sərhədi keçənlərin başında çatlayıb. Mübahisə Naxçıvan tərəfdəki keçid məntəqəsi ilə Türkiyənin Dilucu gömrük qapısı arasında işləyən mikroavtobusun fəaliyyətinin dayanmasına səbəb olub.

İndi insanlar yükləri ilə iki kilometrdən çox yolu piyada getməyə məcbur qalırlar. Bu marşrutda işləmiş sürücülərin sözlərinə görə, gediş haqqı bir manat idi və hər gün minlərlə insan daşınırdı.

Sürücülər iddia edirlər ki, yığılan gediş haqları rəsmiləşdirilmədən gömrükdəki vəzifəli şəxslərə çatırdı. Onların sözlərinə görə, AYNA Naxçıvanda fəaliyyətə başladıqdan sonra həmin gəlirə nəzarət etmək istəyib və gömrük qurumu ilə arasında mübahisə yaranıb.

Marşrutun dayanması xüsusilə Türkiyəyə müalicəyə gedən xəstələri və yaşlı insanları çətin vəziyyətdə qoyub. Şərur sakini Vaqif Məmmədov deyir ki, müalicə üçün hər ay İğdıra gedir, amma iki kilometrlik yolu piyada keçməkdə çətinlik çəkir:

“Yaşlı və xəstə adamam. Ayda bir dəfə müayinə və müalicə üçün İğdıra getməliyəm. Bu yolu gedib-qayıtmaq mənim üçün zülmdür. Neytral zonaya taksi də buraxmırlar. Yolu başa vurana kimi bəlkə 15 dəfə oturub dincəlirəm. Belə olmaz axı. İki dövlət qurumunun gəlir davası xüsusilə mənim kimi xəstə və yaşlı insanlara əziyyət verir”.

Naxçıvanda oxuyan tələbə Hüseyn Çetin isə hər həftə sonu İğdırdakı evlərinə gedib-gəlir. O deyir ki, mikroavtobusun dayanması hər səfərini çətinləşdirib:

“Gedib-gələndə özümüzə lazım olan əşyaları daşıyırıq. Hər dəfə taksi tutmaq çox baha başa gəlir. Az yükü olanlar üçün mikroavtobus daha sərfəli idi. İndi ya çantamızı götürüb iki kilometr piyada gedirik, ya da bizi aparacaq bir maşın gözləyirik. Hər iki halda vaxt itiririk”.
"Gündəlik Naxçıvan"

Naxçıvanda pasiyentlər üçün ayrılan pulsuz ərzağın xəstəxanadakı restoranlara yönəldildiyi bildirilir. Sakinlər bu restoranların yüksək vəzifəli məmurlara aid olduğunu deyirlər.
Xəstələrin sözlərinə görə, kəsilən ərzağın əvəzində isə onlars ucuz və keyfiyyətsiz ərzaqdan yeyilməsi mümkün olmayan yeməklər hazırlanır.
Restorandan baha yemək almağa imkanı çatmayan imkansız xəstələr isə ac qaldıqlarını bildirirlər.
Çünki, restoranda yeməyə məcbur olsunlar deyə, xəstəxana evdən gətirilən yeməkləri də qəbul etmir.
“Gündəlik Naxçıvan”a danışan şikayətçilərin sözlərinə görə, bu hal daha çox Muxtar Respublika Xəstəxanasında baş verir.
Onların sözlərinə görə, bu restoranlarda gündəlik yemək xərci 30–50 manata çatır. Şikayətçilər həmin restoranların yüksək vəzifəli şəxslərə məxsus olduğunu da deyirlər.
Xəstəxanada altı gün müalicə almış Nazir Məmmədov pulsuz yeməkləri yeyə bilmədiyini, restorandan almağa isə imkanının çatmadığını bildirir:
“Bu xəstəxanada altı gün yatdım. Evdən yemək gətirməyə icazə vermirdilər. Guya pəhriz yeməkləri yeməliyəm, ona görə. Sığorta ilə müalicə alırdım. Yeməkləri itə tökəsən, yeməz. O qədər bərbad idi.
Səhər mannı verirdilər, iyindən baş çatlayırdı. Şorbalarının da nə olduğu bəlli deyildi. Palçığa bənzər qırmızı rəngdə idi. Ancaq restoranda nə istəsən tapmaq mümkündür.
Xəstələrə veriləcək pulsuz ərzaqları oraya yönəldib, yemək hazırladıb od qiymətinə satırlar. Evdən yemək gətirməyə də ona görə icazə vermirlər ki, onlardan baha qiymətə almağa məcbur olaq”.
Digər pasiyent Elnur Şükürov da yeməklərin keyfiyyətindən şikayətlənir. O deyir ki, evdən gətirilən yeməklərin içəri buraxılmaması vəziyyəti daha da çətinləşdirib:
“Yeməklər bərbaddır, nə verdikləri bəlli deyil. Çörək daş kimidir. Divara vursan, divarı qopardar, amma qırılmaz. Yemək olmur. Bir həftə xəstəxanada yatdım. Görüş saatlarında evdən yemək gətirirdilər, buraxmırdılar. Bəzən birtəhər gizlincə keçirib onları yeyirdim”.
Pasiyentlər pulsuz yeməklərin keyfiyyətindən narazılıqlarını şəxsi təcrübələri ilə izah edirlər.
Ərzağın restoranlara yönəldilməsi və həmin obyektlərin vəzifəli şəxslərə məxsus olması barədə iddialar isə müstəqil şəkildə təsdiqlənməyib.

“AzerGold” QSC-də yeni təyinat baş tutub.

Yurd.Media-nın əldə etdiyi məlumata görə, Seyhun Osmanov “AzerGold”da Satınalma şöbəsinin rəhbəri vəzifəsinə təyin olunub.

O, 2025-ci ildən yeni tətinata qədər həmin şöbədə mütəxəssis vəzifəsində çalışıb.

Seyhun Osmanov 2024-2025-ci illərdə AZAL-da, 2023-2024-cü illərdə "Best Bearings Company" MMC-də çalışıb.

Xalq artisti Zaur Rzayevin səhhəti yenidən pisləşib.

Əvvəl müğənni bir neçə gün xəstəxanaya aparılıb.

Z.Rzayevin ailəsi ifaçının bir neçə gün əvvəl reanimasiyaya yerləşdirildiyini bildirib:

“İndi evə buraxılıb. Vəziyyəti ağırdır. Amma həkimlər müalicənin evdə davam etdirilməsini məsləhət görüblər. Hazırda ev şəraitində müalicəsi davam edir”.

Qeyd edək ki, Z.Rzayev sentyabrın 5-də xəstəxanaya yerləşdirilib. Ona qaraciyər sirrozunun dekompensasiya mərhələsi, assit və qaraciyər ensefalopatiyası diaqnozları qoyulub. Sənətçiyə zəruri tibbi xidmətlər göstərilib.(Axşam.az)

Gördüyünüz bu ərazi Mətbuat prospektindən ('Azərbaycan' nəşriyyatı) Hüseyn Cavid prospektinə keçid yolu olan Ayna Sultanova küçəsidir. Göründüyü kimi, yolun həm sağ, həm də sol hissəsi Azərbaycan Yerüstü Nəqliyyat Agentliyi (AYNA) tərəfindən ağ xətlərlə nişanlanaraq parklanma zonasına çevrilib. Nəqliyyatın sıx hərəkət etdiyi belə küçələr əslində boş və açıq saxlanılmalıdır ki, tıxaclar yaranmasın.
Gundemxebertv.com bildirir ki, bu məsələ ilə bağlı istər mətbuatda, istərsə də sosial şəbəkələrdə dəfələrlə çəkilişlər olunub işıqlandırılsa da, heç bir xeyri yoxdur. Gözləri doymaq bilmir! Məqsəd sanki insanları incitmək, onların cibinə girmək və qiymətli vaxtlarını yollarda almaqdır. İnsanın ömrü yollarda, tıxaclardamı keçməlidir? Təkcə bu küçə deyil, Bakının demək olar ki, bütün yolları eyni acınacaqlı vəziyyətdədir.