Prezident İlham Əliyev Naxçıvan şəhərində yerləşən Möminə xatun türbəsinin bərpası və konservasiyası işlərinə vəsait ayrılması haqqında Sərəncam imzalayıb.

Sərəncama əsasən, Naxçıvan şəhərində yerləşən Möminə xatun türbəsində bərpa və konservasiya işlərinin davam etdirilməsi üçün Azərbaycan Respublikasının 2026-cı il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Naxçıvan Muxtar Respublikasının Nazirlər Kabinetinə 9,566.0 min (doqquz milyon beş yüz altmış altı min) manat vəsait ayrılıb.

Maliyyə Nazirliyi Sərəncamın 1-ci hissəsində göstərilən məbləğdə maliyyələşməni təmin etməli, Nazirlər Kabineti bu Sərəncamdan irəli gələn məsələləri həll etməlidir.

Azərbaycan ərazisində xüsusi karantin rejiminin müddəti uzadılıb.

Bununla bağlı Baş nazir Əli Əsədov qərar imzalayıb.

Qərəra əsasən, koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti 2026-cı il 1 iyul saat 06:00-dək uzadılıb.

ATU-də İddialar: Rektor Yaşar Ömərov Haqqında Şok Faktlar Nazir təyinatı ilə bağlı iddialar və xəyanət ittihamı
Azərbaycan Texnologiya Universitetinin (ATU) rektoru Yaşar Ömərovun son vaxtlar yaxın çevrəsində səsləndirdiyi iddialar təhsil camiəsində ciddi rezonans doğurub.

Müstəqil.Az-a daxil olan məlumatda bildirilir ki, rektor Elm və Ali Təhsil üzrə Dövlət Agentliyinin direktoru Ülkər Səttarovanın yaxın gələcəkdə “birinci posta” – Elm və Təhsil Naziri vəzifəsinə gətiriləcəyini iddia edir. Bir xanımın nazir vəzifəsini icra etməsi dövlət idarəçiliyində müsbət addım hesab olunsa da, Yaşar Ömərovun hazırkı nazir Emin Əmrullayevin yaxın dostu hesab olunduğu halda bu cür proqnozlar verməsi mənəvi baxımdan “xəyanət” kimi qiymətləndirilir. Daha da rüsvayçı məqam ondan ibarətdir ki, rektorun həmin xanımın gələcək dəstəyini qazanmaq üçün hər ay ona 5 min manat məbləğində qeyri-rəsmi ödəniş (şapka) göndərdiyi deyilir.

Məhkəmə prosesləri və ağır cinayət ittihamları
Yaşar Ömərovun rəhbərliyi dövrü təkcə siyasi iddialarla deyil, həm də ağır hüquqi pozuntularla yadda qalmaqdadır. Gəncə Şəhər Prokurorluğunda aparılan araşdırmalar nəticəsində onun barəsində 2 milyon manata yaxın vəsaitin mənimsənilməsi, dövlət əmlakının leqallaşdırılması, rüşvət alma, vəzifə səlahiyyətlərindən sui-istifadə və səlahiyyət həddini aşma maddələri ilə cinayət işi təsdiqlənib. Hazırda bu iş Gəncə Ağır Cinayətlər Məhkəməsinə göndərilsə də, rektorun hələ də real cəzadan yayınması və vəzifə başında qalması ictimaiyyətdə ciddi suallar doğurur.

Etik normaların pozulması və köməkçilərin “fəaliyyəti”
Rektorun adı təkcə korrupsiya yox, həm də etik qalmaqallarda hallanır. Məlumata görə, Yaşar Ömərovun Universitetin Xarici dillər fakültəsinin müəllimlərindən biri ilə yaşadığı qeyri-etik münasibətləri əks etdirən fotolar mövcuddur ki, bu da bir təhsil müəssisəsi rəhbəri üçün qəbulolunmazdır. Onun bu işlərində “sağ əli” hesab olunan köməkçisi Qədir və prorektor Şahmar Həsənovun da fəaliyyəti diqqət çəkir. Xüsusilə Şahmar Həsənovun Samux rayonunda vətəndaşları işə düzəltmək adı ilə 45 min manatdan çox vəsaiti mənimsədiyi və barəsində dələduzluq maddəsi ilə iş açıldığı bildirilir.

Universitet daxilindəki “qara mühasibatlıq”
Azərbaycan Texnologiya Universiteti hazırda elm ocağından çox, bir gəlir mənbəyinə çevrilib. İddia olunur ki, Universitetin Həmkarlar İttifaqının sədri Xudayar Məmmədov hər ay müəllimlərin maaşlarından tutulan təxminən 9 min manat vəsaiti rektora təslim edir. Eyni zamanda, Tələbə Həmkarlar İttifaqının sədri Firdovsi Bağırovun vasitəçiliyi ilə tələbələrin təqaüdlərindən kəsilən vəsaitlərin də prorektor Şahmar Həsənov üzərindən Yaşar Ömərova çatdırıldığı vurğulanır.

Yeni mənimsəmə metodları: “Humanistlik” pərdəsi
Rektorun vəsaitləri mənimsəmək üçün tətbiq etdiyi ən yeni metodlardan biri də “imkansız tələbələrə yardım” adı altında qurulan sxemdir. Guya 50-yə yaxın tələbəyə hər gün pulsuz günorta yeməyi verilir və bu vəsait Həmkarlar İttifaqı tərəfindən ödənilir. Lakin əslində bu, dövlət və tələbə vəsaitlərinin “humanistlik” pərdəsi altında silinməsi üçün düşünülmüş bir yoldur. Korrupsiya bataqlığına saplanmış bu rəhbərliyin fəaliyyəti müvafiq dövlət qurumları tərəfindən ən qısa zamanda dərindən araşdırılmalı və qanun qarşısında cavab vermələri təmin edilməlidir.
Ardı var…
Müstəqil.Az

Azərbaycan Strateji Obyektlərin Mühafizəsi Dövlət Agentliyinin hərbi qulluqçuları təltif edilib.

Prezident İlham Əliyev bununla bağlı Sərəncam imzalayıb.

Sərəncamla xidməti vəzifələrini yerinə yetirərkən fərqləndiklərinə görə Dövlət Agentliyinin aşağıdakı hərbi qulluqçuları təltif ediliblər:

"Vətən uğrunda" medalı ilə

Hüseynov Ramil Arif oğlu – mayor

"Hərbi xidmətlərə görə" medalı ilə

Mövlayev Samir Yaqub oğlu – mayor

Abbasov Elsevər Məhəmməd oğlu – kapitan

Eldarov Zaur Səvzixan oğlu – kapitan

Hüseynov Elçin Allahverdi oğlu – kapitan

Fərzəliyev İlkin Mirzə oğlu – leytenant

Vahabzadə Şahin İdayət oğlu – leytenant

Adamov Xəyal Fikrət oğlu – baş çavuş

Hacızadə Səbuhi Elşən oğlu – baş çavuş

Qəhrəmanzadə Elman Qəhrəman oğlu – baş çavuş.

Paytaxtın mərkəzində "tikinti işgəncəsi" pik həddə çatıb. Özünü qanunlardan üstün hesab edən "Bizim MTK" adlı tikinti şirkəti sakinlərə qarşı mənəvi və fiziki terror tətbiq edir.

3 ilə yaxındır ki, eyni mənzərə, eyni şikayətlər, lakin dəyişməyən biganəlik! Sözügedən şirkət nəinki sakinlərin gündəlik rahatlığını pozur, hətta insanların ən təməl haqqı olan istirahət hüququnu əlindən alır.

“Bizim MTK” Yasamal rayonu Həzən bəy Zərdabi 69 ünvanında yerləşən 5 mərtəbəli yaşayış binasının bir addımlığında ağır texnika işlədir. Dünən gecə saat 23:00 -02:00 aralığında davam edən səs- küy, buldozerin səsi sanki sakinlərin yuxusuna qənim kəsilmişdi. Gecənin yarısı başlayan söküntü işləri hələ də davam edir.

Yüksək səs-küydən diksinərək oyanan azyaşlı övladlarımın psixologiyası pozulub. Tez- tez səsə oyanır, qorxduqlarını dilə gətirirlər.

Hələ binada yaşayan təzyiqi olan, yataq xəstəsi olan yaşlı insanları demirəm. Vəziyyət kritik həddə çatıb.

Gecələr buldozerin səs-küyündən evlərin divarları titrəyir. Gündüzlər uşaqlar binanın həyətinə çıxa bilmir, insanlar öz evlərində dustaq həyatı yaşayırlar.

Dəfələrlə şirkətin məsul şəxslərinə etirazımızı bildirib, narazılıq etsək də, vəziyyət dəyişmir. "BİZİM MTK" nə tikintisini yekunlaşdırır, nə də ərazidən əl çəkir. İllərdir toz-torpaq, səs- küy və daimi gərginlik içərisindəyik.

Maraqlıdır ki, yaşayış binasının bir addımlığında gecə saatlarında ağır texnikanın işləməsinə necə icazə verilir? Qanunvericiliyə görə, yaşayış ərazilərində gecə saatlarında səs-küylü tikinti işlərinin aparılması məhdudlaşdırılır. Azərbaycan Respublikasının qanunvericiliyinə əsasən, yaşayış binalarının yaxınlığında axşam saat 23:00-dan səhər 08:00-a qədər sakinlərin dincliyini pozmaq, yüksək səslə müşayiət olunan işlər görmək qadağandır. Görünən odur ki, bəzi tikinti şirkətləri sakinlərin rahatlığını və qanunun tələblərini nəzərə almaq niyyətində deyil. "BİZİM MTK" üçün qanun deyil, qazanc və qrafik daha önəmlidir.


Bina sakinləri olaraq aidiyyəti qurumları məsələyə müdaxilə etməyə çağırır, gecə saatlarında tikinti və söküntü işlərinin dayandırılmasını, həmçinin uzun illərdir davam edən tikinti prosesinin nəhayət başa çatdırılmasını tələb edirik.

Şəhərin mərkəzində insanların rahat yaşamaq hüququ tikinti şirkətlərinin maraqlarından üstün tutulmalıdır. Fövqəladə Hallar Nazirliyinə, Bakı Şəhər İcra Hakimiyyətinə və Daxili İşlər Nazirliyinə səslənirik: bu özbaşınalığa kim son qoyacaq?

"BİZİM MTK"-nın özbaşınalığı bununla da bitmir. Şirkət sakinlərin nəinki yuxusuna, həm də nəfəs aldığı yaşıl sahələrə qənim kəsilib. Binanın ön və arxa həyətindəki həmişəyaşıl və meyvə ağacları gizli şəkildə kəsilib.

​Ağacların yerində yalnız kötüklər qalmışdı.

Dünənki söküntüdə isə ağaclardan geriyə qalan kötüklərin yeri də itirilib.

"BİZİM MTK" tikinti meydançasını genişləndirmək üçün təbiət qatilliynə əl ataraq, sakinlərin ekoloji hüquqlarını da ayaq altına alıb. Bu, sadəcə tikinti deyil, bu, bir ərazinin həm insanına, həm də təbiətinə qarşı aparılan "terror" siyasətidir.

Sakinlər olaraq bu vəhşiliyə biganə qalmayaraq Ekologiya və Təbii Sərvətlər Nazirliyinə rəsmi müraciət etdik. Nazirliyin əməkdaşları gəlib, əraziyə baxış keçirdilər, kötükləri sayıb, şəkillərini çəkdilər.Və bitdi!

Hələlik onlardan da bir cavab çıxmayıb!

Sakinlərin isə səbri artıq tükənib. İnsanların sağlamlığını və əsəblərini korlayan bu "gecə terroru” dərhal dayandırılmalı, şirkət barəsində ciddi hüquqi tədbirlər görülməlidir!(Teref)

"Son illərdə qeyri-neft sektorundan SOCAR-a kadrlar üzrə vitse-prezident təyinatı o qədər parıltılı təqdim edildi ki, kənardan baxan elə bildi neftçinin həyatında yeni bir dövr başlayır..." "Dia-az" xəbər verir ki, bunu öz etiraz dolu müraciətində SOCAR işçisi Rac Kərimov qeyd edib.

O daha sonra fikrini belə davam etdirir: "Lakin bir həqiqət var ki, mobil operatorun rəqəmsal dünyası ilə ağır sənayenin o sərt istehsalat sahəsi arasında yerlə-göy qədər fərq var. Kondisionerli ofislərdə texnoloji terminlərlə "strateji hədəflər" müəyyən etmək başqadır, dənizin ortasında, o amansız səs-küyün, aqressiv emosional mühitin və ağır fiziki yükün altında çalışan insanın ruhunu anlamaq tam başqa. Əslində, dənizdə neft sənayesi bir növ ön cəbhə kimidir. Hər bir neftçi bir əsgər tək soyuğun, yağışın, tufanın altında təbiətin sərt üzü ilə tək-tək vuruşur, hər gün bu ölkənin iqtisadi müstəqilliyi üçün bir döyüş verir. Amma acı həqiqət budur ki, cəbhədə vuruşan bu "əsgərlərə" göstərilməli olan qayğı hələ də kağız üzərindəki quru rəqəmlərdən o yana keçə bilməyib.
Televiziya ekranlarında neftçi peşəsinin nə qədər "romantik" və "maraqlı" olması haqqında gözəl çıxışlar edilir, mahnılar bəstələnir, romantik obrazlar yaradılır. Amma o işıqlı studiyalardan kənarda, platformalarda və qazma sahələrində tam fərqli, çox daha sərt bir mənzərə var. Orada insanlar emosional tükənmişliklə və bəzən ən adi insani qayğıların çatışmazlığı ilə mübarizə aparırlar. Maraqlıdır, Ziba xanım (SOCAR-ın vitse-prezidenti Ziba Mustafayeva nəzərdə tutulur -dia-az) bu vaxta qədər o ağır şəraitdə, bir əsgər fədakarlığı ilə çalışan neftçi üçün realda, hiss olunan hansı addımı atıb? SOCAR səviyyəsində keçirilən o dəbdəbəli, parıltılı tədbirlərin hansı birinə həqiqi bir dəniz neftçisi dəvət olunub, onun dərdi, onun gələcək qayğıları ilə səmimi şəkildə maraqlanılıb?
Yuxarıda oturanlar üçün kadr siyasəti bəlkə də sadəcə rəqəmlərdən və hesabatlardan ibarətdir, amma sahədə küləyə qarşı sinə gərənlər üçün bu, bir ədalət və ləyaqət məsələsidir. İnsan resursları idarəçiliyi yalnız "LinkedIn", "Facebook" profillərində ingilis dilli terminlərlə bəzədilmiş təqdimatlar hazırlamaq deyil. Əsl rəhbərlik o ağır şəraitdə çalışan işçinin karyera yüksəlişinə mane olan bürokratik sədləri dağıtmaq, ona layiq olduğu dəyəri ofis divarlarından kənarda da hiss etdirməkdir. Təəssüf ki, hələ də o fədakarlığı görən, dənizçinin və neftçinin səsinə səs verən bir rəhbər səmimiyyəti yoxdur. Ancaq əmi, dayı, bibi, xala hesabına nəyəsə nail olmaq olar. Görünən odur ki, neftçi peşəsi hələ də mahnılarda "qəhrəmanlıq", reallıqda isə sadəcə ağır bir yük olaraq qalır. Kadrlar şöbəsinin "islahatları" isə dənizin sahilinə belə çata bilmir, çünki ofisdən dəniz çox uzaq, dalğaların səsi isə rəsmi pafoslu çıxışların parıltısından daha sərtdir...(Dia-az)

Azərbaycanın su təsərrüfatı sektorunda keçirilən tenderlər yenidən müzakirə mövzusuna çevrilib. Müxtəlif qurumlar tərəfindən keçirilən satınalma prosedurlarında qalib elan olunan bəzi şirkətlərin fəaliyyəti və maliyyə vəziyyəti ilə bağlı ortaya çıxan məlumatlar bu proseslərin şəffaflığı barədə suallar yaradır.

Bununla bağlı araşdırma aparmışıq.

Vergi borcu olan şirkət tenderin qalibi olub

Cari ildə Azərbaycan Dövlət Su Ehtiyatları Agentliyinin (ADSEA) tabeliyində fəaliyyət göstərən Regional Su Meliorasiya Xidmətinin Naxçıvan Su Meliorasiya Sistemlərinin İstismarı İdarəsi tərəfindən keçirilən satınalma proseduru artıq yekunlaşıb.
Söhbət Culfa rayonu ərazisində yerləşən Yaycı-2 nasos stansiyasından Dizə kəndinə çəkilmiş təzyiqli boru xəttinin əsaslı təmiri işlərindən gedir.
Tenderin qalibi “PUVA İnşaat Tesisat Sanayi ve Ticaret Limited” şirkətinin Azərbaycan Respublikasındakı filialı seçilib. Tərəflər arasında 635 012,74 manat məbləğində müqavilənin bağlanıb. Şirkətin qanuni təmsilçisi Nərimzadə Şadiman Mehman oğludur.
Şirkət tendering qalibi elan edilərkən dövlət büdcəsinə 45 586,02 manat vergi borcu olub. Qanunvericiliyə görə vergi borcu olan şirkətlər satınalma müsabiqələrində iştirak edə bilməz. Hazırda isə şirkətin vergi borcu sıfırlanıb.

8 ayda 21 milyon manatdan çox tender

ADSEA və onun tabeliyində olan qurumların ötən il keçirdikləri tenderlərə diqqə etdikdə müyyən suallar yaranır.
Araşdırma zamanı məlum olur ki, ötən ilin 8 ayı ərzində ADSEA-nın tabeliyində fəaliyyət göstərən İri Şəhərlərin Birləşmiş Su Təchizatı Xidməti (keçmiş “Azərsu”) 41 tender keçirib. Bu tenderlər təmir işlərindən tutmuş ehtiyat hissələrinin və müxtəlif texniki avadanlıqların satın alınmasına qədər geniş sahəni əhatə edir.
41 tender üzrə bağlanan müqavilələrin ümumi maliyyə dəyəri isə 21 milyon 526 min 815 manat təşkil edir.

Qalib şirkətlər haqqında məlumat azdır

Araşdırmalar göstərir ki, bu tenderlərdə qalib seçilən bəzi şirkətlər haqqında açıq mənbələrdə kifayət qədər məlumat yoxdur. Bu isə satınalma proseslərinin şəffaflığı ilə bağlı müəyyən suallar yaradır.
Məsələn, qalib şirkətlərdən biri “İnterkabel” firmasıdır. Şirkət 1997-ci ildə qeydiyyata alınıb və nizamnamə kapitalı cəmi 20 manatdır. Hüquqi ünvanı Bakı şəhəri Nərimanov rayonunda yerləşən şirkətin qanuni təmsilçisi Babayev Ramil Arif oğludur.
Şirkət elektrik kabellərinin satın alınması ilə bağlı keçirilən tenderin qalibi seçilib və bu tender üzrə müqavilənin maliyyə dəyəri 467 048,72 manatdır. Lakin şirkət və rəhbərliyi haqqında açıq mənbələrdə demək olar ki, məlumat yoxdur.

Digər qalib şirkət – “Az-Tex-İmport”

Tenderlərdə qalib gələn şirkətlərdən biri də “Az-Tex-İmport” MMC-dir. Şirkət 2017-ci ildə qeydiyyata alınıb və nizamnamə kapitalı 226 010 manatdır. Hüquqi ünvanı Bakı şəhəri Xətai rayonunda yerləşən şirkətin qanuni təmsilçisi İbadullayev İlkin Sahib oğludur.
Bu şirkət kabel sınaq və diaqnostika cihazları üçün nəqliyyat vasitəsinin satın alınması ilə bağlı keçirilən tenderin qalibi olub. Müqavilənin maliyyə dəyəri isə 540 min manat təşkil edir.
Lakin şirkətin maddi-texniki bazası və fəaliyyət miqyası barədə açıq məlumatlar demək olar ki, yoxdur.

“B2B” MMC ətrafında iddialar

Tenderlərdə qalib olan digər şirkətlərdən biri də “B2B” MMC-dir. Şirkət 2019-cu ildə qeydiyyata alınıb və nizamnamə kapitalı cəmi 10 manatdır. Qanuni təmsilçisi Bəşirov Ramal Bəşir oğludur.
Mediada yayılan məlumatlara görə, Ramal Bəşirov vaxtilə keçmiş vergilər naziri Fazil Məmmədova məxsus olduğu iddia edilən “Caspel” şirkətində çalışıb.
Başqa iddialara görə isə “B2B Group” MMC-nin sahibi keçmiş məmur olub. Bəzi məlumatlarda şirkətin 2015-ci ildə ləğv edilən Milli Təhlükəsizlik Nazirliyinin Səbail Rayon İdarəsinin keçmiş rəisi və sonradan nazir müavini vəzifəsində çalışmış general-mayor Elçin Əliyevə məxsus olduğu iddia edilib. Lakin şirkət tərəfindən mediaya verilən açıqlamada bu iddialar təkzib olunub.

Araşdırmaya ehtiyac var

Beləliklə, su təsərrüfatı sahəsində keçirilən tenderlərdə həm vergi borcu olan şirkətin qalib elan olunması, həm də fəaliyyəti barədə məhdud məlumat olan şirkətlərin iri məbləğli müqavilələr əldə etməsi müəyyən suallar doğurur.
İri Şəhərlərin Birləşmiş Su Təchizatı Xidməti Azərbaycan Dövlət Su Ehtiyatları Agentliyinin tabeliyində fəaliyyət göstərir. Qurumun rəhbəri Zaur Mikayılovdur və o, 2023-cü ildə bu vəzifəyə təyin olunub.
Ekspertlər hesab edir ki, dövlət vəsaitlərinin xərcləndiyi bu kimi tender proseslərinin daha şəffaf şəkildə aparılması və qalib şirkətlərin fəaliyyəti barədə məlumatların açıq olması ictimai etimad baxımından vacibdir.(anaxeber.info.az)

Ərazidən saxlanılan tullantılar stadionun ərazisində toplandığı və daha sonra yaxınlıqdakı binaların qarşısında yandırıldığı iddia olunur.

Xəzər TV-yə xəbər verir ki, şəhərin Xətai rayonu, Səməd bəy Mehmandarov küçəsi, 42-46 ünvanında yaşayan sakinlər yandırılan tullantıların tüstüsünün mənzillərinə dolduğunu bildirir.

Sakinlərin dediklərinə görə, bu hal daha çox davam edir və tez-tez təkrarlanır. Şikayətçilər iddia edirlər ki, zibillər ərazi üzrə Mənzil-Kommunal İstismar Sahəsinin üzərindən ora daşınır və yandırılır.

Qarşı tərəf bu iddiaları təkzib edir. 99 saylı Mənzil-Kommunal İstismar Sahəsinin istehsalçısı Azər Nəhmədovun rəyinə görə, tətillə qeyd olunan tonqal qalanıb. O bildirib ki, tullantı maşın daxil ola bildiyi üçün zibillər aşkar olaraq saxlanılır toplanır və daha sonra daşınır. Stadion ərazisində tullantıların yandırılması və bunun tez-tez baş verməsi ilə bağlı iddiaların olması əsassız olduğu qeyd olunub.(Xəzər TV)