Bu gün Bakı Ağır Cinayətlər Məhkəməsində “Dənizkənarı Bulvar İdarəsi” Publik Hüquqi Şəxsin İdarə Heyətinin sabiq sədri İlqar Mustafayev, onun köməkçisi Rəşad Bədəlov, “GİRASOL” MMC-nin direktoru Fuad Babayev və digərlərinin cinayət işi üzrə növbəti məhkəmə prosesi keçirilib.
Lent.az xəbər verir ki, proses şahid ifadələri ilə davam edib.
Şahid B.A. 2018-ci ildən “Park Bulvar”da əmək müqaviləsi ilə işlədiyini deyib:
“2020-ci ildə VÖEN açdırdım. Əməkhaqqım 600 manat idi, qış aylarında isə 300 manata endirilirdi. Buna səbəb kimi həmin dövrdə işin zəif olması göstərilirdi. Hazırda da orada işləyirəm. Velosiped və velokartların fəaliyyətinə, həmçinin xəzinəyə nəzarət edirdim”.
Digər şahid Ə.E. bildirib ki, ərazidə yerləşən obyektlərlə müqavilələrin bağlanmasına nəzarət edib.
Onun sözlərinə görə, obyektlərdən toplanan pullar kassa çeki ilə ona təhvil verilib:
“Mən də həmin pulları Fuad müəllimə verirdim. Yayda iş normal olurdu, qışda isə zəifləyirdi. Fuad müəllim əraziyə gətirilən gül və yaşıllaşdırma işlərinə cavabdeh idi. Bəzən Yeni il bəzəkləri üçün ‘Sədərək’dən aldığımız məhsullara görə borcumuz qalırdı”.
Növbəti məhkəmə prosesi oktyabrın 7-si saat 10:00-a təyin olunub.
Xatırladaq ki, cinayət işi Hesablama Palatasından daxil olan materiallar əsasında Baş prokuror yanında Korrupsiyaya qarşı Mübarizə Baş İdarəsində başlanıb.
İttihama əsasən, İlqar Mustafayevin digər şəxslərlə cinayət əlaqəsinə girərək qurumun ərazisindəki qeyri-yaşayış sahələrinin icarəsi, kommersiya obyektləri, gəmi gəzintiləri və başqa fəaliyyət sahələrindən əldə edilən 12 milyon manatdan artıq vəsaiti mənimsəməsinə əsaslı şübhələr müəyyənləşdirilib.
Bundan başqa, onun 1 milyon 800 min manatdan artıq vergini dövlət büdcəsinə ödəməkdən yayındığı, cinayət yolu ilə əldə edildiyi iddia olunan 10 milyon manatdan artıq vəsaiti özü və qohumlarının adına əmlaklar almaqla leqallaşdırdığı bildirilir.
İlqar Mustafayev barəsində həbs, digər təqsirləndirilən şəxslər barəsində isə polisin nəzarəti altına vermə qətimkan tədbiri seçilib. Maddi ziyanın ödənilməsinin təmin edilməsi məqsədilə 11 milyon manatdan artıq dəyəri olan əmlak üzərinə həbs qoyulub.

"Leobank"ın kartdakı qalıq vəsaitə faiz hesablanması ilə bağlı tətbiq etdiyi minimum ödəniş həddi müştəri narazılığına səbəb olub.

Sosial şəbəkə istifadəçiləri "Leobank"ın açıqladığı şərtlərin müştərilərdə yanlış təsəvvür yarada biləcəyini bildirirlər.

Qeyd edilib ki, bankın tariflərində qara Leo kartında 10 manatdan 999,99 manatadək qalıq üçün illik 5% faiz nəzərdə tutulsa da, hesablanmış faiz yalnız 1 manata çatdıqdan sonra ödənilir.

"Leobank"ın rəsmi saytında da göstərilir ki, faizlər kartdakı şəxsi vəsaitin qalığına gündəlik hesablanır, ödəniş isə hər ayın 1-də həyata keçirilir. Qara Leo kartında 10–999,99 manatlıq qalığa illik 5%, 1000 manat və daha yuxarı qalığa isə illik 6% hesablanır. Eyni zamanda, ödəniş üçün minimum məbləğ 1 manat müəyyən edilib.

Şikayətçi Ruslan Əlicanov deyir ki, bir ay ərzində hesablanan faizin 1 manata çatması üçün kartda təxminən 240 manat orta qalıq saxlanılmalıdır. Məsələn, 100 manat qalığa illik 5% dərəcə ilə bir ay üçün təxminən 0,42 manat faiz düşür.

Beləliklə, mübahisə 5%-lik illik faiz dərəcəsinin özündən deyil, hesablanan faizin ödənilməsi üçün 1 manatlıq minimum həddin tətbiqindən qaynaqlanır. Bankın hazırkı rəsmi tariflərində həm 5%-lik dərəcə, həm də “1 manatdan başlayaraq ödəniş” şərti göstərilib.

Leobank hələlik məsələ ilə bağlı hər hansı açıqlama verməyib.

Plat.az

Paytaxtın Yasamal rayonu, Abbas Mirzə Şərifzadə küçəsi 136 ünvanında yerləşən ikibloklu yaşayış binasının sakinləri açıq-aşkar özbaşına tikinti faktı ilə üz-üzə qalıblar. Binanın birinci blokunun birinci mərtəbəsində şəhərsalma normaları və qanunvericiliyin tələbləri kənara qoyularaq irimiqyaslı qanunsuz artırma işləri başa çatdırılıb.

​Ərazidən çəkilən görüntülər də təsdiq edir ki, tikinti zamanı binanın ümumi memarlıq görünüşünə və konstruksiyasına ciddi müdaxilə olunub. Ən diqqətçəkən məqam isə obyektin birbaşa piyada səkisini zəbt etməsidir. Bu hal ərazidən keçən sakinlərin, məktəblilərin və yaşlıların təhlükəsiz hərəkətini məhdudlaşdırır.

Azərbaycan Respublikasının Şəhərsalma və Tikinti Məcəlləsinin tələblərinə əsasən, müvafiq icazə sənədləri olmadan, arxitektura layihəsindən kənara çıxılaraq inşa edilən və istismara icazə aktı mövcud olmayan hər bir tikinti qanunsuz hesab edilir. Lakin paytaxtın işlək küçələrindən birində səkinin tutulması və binanın görünüşünün dəyişdirilməsi Yasamal Rayon İcra Hakimiyyətinin nəzarətindən kənarda qalıb.

​Faktum.az olaraq məsələni diqqətdə saxlayaraq, hələ sentyabrın 8-də Yasamal Rayon İcra Hakimiyyətinə rəsmi qaydada müraciət ünvanlamışdıq. Sorğuda tikintinin hüquqi əsasları, icazə sənədlərinin mövcudluğu və söküntü tədbirləri ilə bağlı suallar yer alırdı. Ancaq aradan keçən müddət ərzində İcra Hakimiyyətindən heç bir cavab daxil olmayıb.

Hesab edirik ki, bu durum yalnız səkinin zəbt olunması deyil, eyni zamanda şəhərsalma qaydalarının pozulmasıdır. Aidiyyəti qurumların bu məsələyə səssiz qalması cavabsız suallar doğurur və mövcud qanunsuz artırmanın sökülərək ərazinin ilkin vəziyyətinə qaytarılmasını zəruri edir.(​Faktum.az )

Məsələ diqqətimizdədir!

“Eşitmişəm Şeyx deyib ki, Əlinin tormozu tutmur. Şeyx, sənin də tormozun tutmur! Sən də hərdən tormoz et! İlişib qalarsan yollarda! Ay mənim məhəllə uşağım, mən öz işimi yaxşı bilirəm. Sən yaxşı olar ki, aktyorluğunla məşğul olasan. Bu mənim sahəmdir, sən müğənnillikdən niyə danışırsan?! Sən gözəl aktyorsan! O bizimlə eyni məhəllədə böyüyüb. Əhmədlidə yaşamışıq”.
Bunu Moderator.az-a açıqlamasında tanınmış müğənni Əli Mirəliyev deyib.
O daha sonra bildirib ki, Ruhəngiz Musəvi onun haqda sosial şəbəkələrdə rəy yazır:
“Ruhəngizdir də. Məni dəli adlandırıb. Bir də görürsən başlayır ağlamağa, bir də görürsən gülür. Dəli mənəm yoxsa o?! Əlinin qadasını alırdın ay Ruhəngiz, nə oldu?! Biz dost olmuşuq. Bir yerdə 10-15 duet oxumuşuq. Onun xasiyyətinə bələdəm. Sadəcə xətrini istəyirəm, yaxşı oxuyur. Yaxşı da insandır. Amma danışanda təntiləyir” deyə o bildirib.
Əli Mirəliyev bildirib ki, Əməkdar artist Fərqanə Qasımovaya zəng edərək, ona iradını bildirib:
“Cahangir Cahangirovun mahnılarını Hindistan tərzində oxuyur. Atan gül kimi muğam oxuyur, sən niyə “Durnalar” əsərini hind ladında aranjiman etmisən?! Zəng edib dedim ki, “qızım, sən Alim Qasımovun qızısan, atan muğamı ilə camaatı heyran edib, sən niyə bu əsəri belə oxumusan?”. Cahangir Cahangirov ölüb, amma Əli sağdır. Dedi ki, “məni camaat buna görə sevir”. Səid Rüstəmovun, Cahangir Cahangirovun, Hacı Xanməmmədovun əsərlərini sizə kim icazə verib ki, korlayasız?! Bu musiqini bilən də var axı. Mən danışmayım, sən danışma bəs kim danışsın?! Mən danışıram, adım da pis qalır. Heç kimin deyə bilmədiyini mən deyirəm. Mənim danışıqlarım sosial şəbəkələrdə paylaşılır, görün altından bir dənə mənfi rəy yazan kimsə var?” deyə o bildirib.

Bugünlərdə sosial mediada “Bakıda qutabı 75 manata satması” ilə gündəmə gələn iş adamı Araz Mehdiyev haqqında yeni və maraqlı məlumatlar üzə çıxıb.
Xatırladaq ki, bu barədə məlumatda məşhur “Cənnət Gəncə” restoranından bəhs olunurdu.
Gununsesi.info-ya daxil olan məlumatda isə məlum olub, “Cənnət Gəncə” restoranını icarəyə götürən Araz Mehdiyev əslində çox imkanlı iş adamı olub.

Belə ki, Araz Mehdiyevin özü və dostları ilə əlaqəli şirkətin Rusiyaya 2.5 milyard dollar nağd pul gətirdiyi üzə çıxıb.
Bu barədə dünyanın nüfuzlu “Reuters” agentliyinin məlumatını redaksiyamıza təqdim edən mənbəmiz bildirib ki, beynəlxalq sanksiyalara baxmayaraq, Rusiyaya 2,3 milyard dollar və avro məbləğində nağd xarici valyuta gətirilib.

Araşdırmaya görə, Rusiyaya gətirilən nağd valyutanın təxminən 1,5 milyard dolları “Aero-treyd” şirkətinin payına düşüb. Şirkətin Rusiya prezidenti Vladimir Putinin yaxın çevrəsi ilə əlaqəli olduğu bildirilir.

Məlumata görə, 2022-ci ilin martından 2023-cü ilin dekabrınadək şirkət hər biri 20 milyon dollar olmaqla, ümumilikdə 73 valyuta partiyasını bəyan edib.

Bununla belə, “Aero-treyd” Rusiyaya valyuta tədarükü ilə məşğul olmadığını bildirib.

“Aero-treyd” iş adamı Andrey Martınyukun ailəsinə məxsusdur. Şirkət Moskvanın Vnukovo hava limanı da daxil olmaqla, Rusiyanın beş şəhərindəki hava limanlarında rüsumsuz ticarət (duty-free) mağazalarını idarə edir.

Araşdırmada qeyd olunur ki, 2017–2020-ci illərdə şirkətin idarəçiliyi Martınyukdan əslən azərbaycanlı olan Yaşar Nəbiyevə keçib.

“Getcontact” tətbiqinin məlumatlarına əsasən, Nəbiyevin telefon nömrəsi bəzi istifadəçilərdə “Yaşar Araz Mehtiyev” və “Arazın köməkçisi” adları ilə qeyd olunub.

Araşdırma müəllifləri ehtimal edirlər ki, burada azərbaycanlı iş adamı Araz Mehdiyev nəzərdə tutulur. Onun Yaşar Nəbiyevlə əlaqəli olduğu bildirilir. Hər iki şəxsin digər iş adamı Seymur Aslanovla birlikdə rüsumsuz ticarət sahəsində fəaliyyət göstərdiyi qeyd olunur.

Araz Mehdiyev Moskva hava limanlarında duty-free biznesinin əsas fiqurlarından biri kimi təqdim edilir. O, Şeremetyevo və Domodedovo hava limanlarında fəaliyyət göstərən iri rüsumsuz ticarət operatorlarının ortaq sahibidir.

Seymur Aslanov vasitəsilə Mehdiyevin İsveçrənin Avolta şirkəti ilə də biznes əlaqələrinin olduğu bildirilir. Avolta Vnukovo hava limanında mağazalar idarə edir.

Valyutanın gömrük rəsmiləşdirilməsi Domodedovoda aparılıb

“Reuters”in məlumatına görə, “Aero-treyd” və Araz Mehdiyev Domodedovo hava limanında Mehdiyevə məxsus duty-free operatorundan müəyyən avadanlıqları icarəyə götürüblər.

Rusiyaya gətirilən nağd valyutanın gömrük rəsmiləşdirilməsi də məhz Domodedovo hava limanında aparılıb.

Araşdırmalarda Araz Mehdiyevin bu yüksəlişinə səbəb isə onun keçmiş qaynatası olan Putinin universitet yoldaşı İlham Rəhimovun rolu danılmazdır.

On milyonlarla vəsaitin idarə olunmasında birbaşa iştirak edən Araz Mehdiyevin Bakıda icarəyə götürdüyü restoranda qutabı 75 manata satması isə təəccübə və suallara səbəb olub.

Ağcabədi rayonu, Hacıbədəlli kəndində (keçmiş Rəncbərlər kəndi) yerləşən obyekt hərrac vasitəsilə satışa çıxarılıb.
Yeniavaz.com xəbər verir ki, icra məmurlarının sifarişi əsasında hərraca çıxarılan obyekt 1 mərtəbədən ibarətdir.
Satışa çıxarılan obyektin sahəsi 7 290 kvadratmetrə bərabərdir. 12 otaqdan ibarət olan obyektin minimum satış qiyməti 4 milyon 632 min 500 manat təşkil edir.
Qeyd edək ki, müsadirə olunaraq hərraca çıxarılan obyekt barədə ilk dəfə 2015-ci ildə rəsmi mətbuatda məlumat dərc olunub. Bildirilib ki, Ağcabədi rayonunun Rəncbərlər kəndində “Fidan” MMC tərəfindən yaradılan soyuducu kompleksdə tikinti işləri başa çatmaq üzrədir. Tikintisində İqtisadiyyat və Sənaye Nazirliyinin Sahibkarlığa Kömək Milli Fondunun güzəştli kreditlərindən istifadə edildiyi və kompleksin 21 soyuducu kameradan ibarət olduğu bildirilib.
Onu da qeyd edək ki, hazırda dövlət reyestrində “Fidan” adlı 3 MMC dövlət qeydiyyatına alınıb. Bu MMC-lərdən 2-si hazırda passiv, 1-i isə aktiv vergi ödəyicisidir.
Hüquqi ünvanı Bakıda yerləşən aktiv vergi ödəyicisi olan “Fidan” MMC paytaxt ərazisində müntəzəm marşrut xətti üzrə sərnişindaşıma xidmətləri göstərir.
Passiv vergi ödəyicisi olan “Fidan” MMC-lərdən biri Yevlaxda, digəri isə Gəncə şəhərində qeydiyyatdadır.

Məlum olduğu kimi, Bəxtiyar Əsgərov ötən gün Bakı şəhərində Naxçıvan Muxtar Respublikasının Daimi Nümayəndəliyinin rəhbəri vəzifəsindən azad edilib.

"Unikal"- İşdən çıxarılan Bəxtiyar Əsgərovun əmlaklarının siyahısını təqdim edir:

- Nərimanov rayonunda yeni tikili binalarda 3 mənzil;

- Memar Əcəmi metrosunun yaxınlığındakı yeni tikili binalarda 3 mənzil;

- Oğuz şəhərində yerləşən "Tansu" şadlıq sarayı;

- Oğuzda yerləşən villa;

- Oğuzda obyektlər və mağazalar;

Qeyd edək ki, Bəxtiyar Əsgərova məxsus olan "Tansu" şadlıq sarayında 2019-cu ildə Qida Təhlükəsizliyi Agentliyi tərəfindən monitorinq keçirilib. Şadlıq sarayında ciddi nöqsanlar aşkarlanıb və fəaliyyəti məhdudlaşdırılıb. Həmin zaman rəsmi sənədlərdə şadlıq sarayının sahibi qismində Aydınov Azər Mehrab oğlu göstərilib. O, Bəxtiyar Əsgərovun bacanağıdır.

Xatırladaq ki, Bəxtiyar Əsgərov ötən gün azad edildiyi vəzifəyə Naxçıvan Muxtar Respublikası Ali Məclisinin sabiq sədri Vasif Talıbov tərəfindən təyin edilmişdi. Onun Vasif Talıbovun yaxın adamlarından biri olduğu barədə məlumatlar yayılıb.

"Şikayətim 98 saylı usaq bağçasındandır". Bu barədə Leyla Türkmən adlı istifadəçi özünün sosial şəbəkə hesabındakı paylaşımında gileylənir.
Narazı vətəndaş daha sonra bildirir: "Mən övladımı dövlət məktəbəqədər təhsil müəssisəsinə elektron qeydiyyat vasitəsilə qeydiyyatdan keçirmişəm və övladım həmin bağçaya qəbul olunub.
Qəbul ilə bağlı bağçaya yaxınlaşdıqda mənə bildirildi ki, övladımın yerləşdirildiyi qrup ödənişlidir. Bildirildi ki, dövlət bağçasının tərkibində özəl (ödənişli) qrup fəaliyyət göstərir və həmin qrup üçün müəyyən məbləğdə ödəniş edilməlidir.
Dövlət məktəbəqədər təhsil müəssisəsinə elektron qaydada qəbul olunmuş uşağın hansı əsasla ödənişli qrupa yönləndirilməsi və dövlət bağçasının tərkibində bu formada ödənişli qrupun fəaliyyət göstərməsinin hüquqi əsasları mənə aydın şəkildə izah edilməyib.
Bununla əlaqədar olaraq, məsələnin araşdırılmasını, övladımın dövlət məktəbəqədər təhsil müəssisəsinə qəbulunun hansı əsaslarla ödənişli qrupla əlaqələndirildiyinin müəyyən edilməsini və həmin ödənişin hüquqi əsasının mənə rəsmi şəkildə bildirilməsini xahiş edirəm.
Həmçinin xahiş edirəm ki, dövlət bağçasına qəbul olunmuş uşaqlar üçün ödənişli qrupun seçilməsinin məcburi olub-olmaması və ödəniş etmədən dövlət hesabına fəaliyyət göstərən qrupda uşağın yerləşdirilməsinin mümkünlüyü araşdırılsın.
Məsələ ilə bağlı qanunvericiliyə uyğun tədbir görülməsini və nəticəsi barədə mənə yazılı məlumat verilməsini xahiş edirəm..."

Dia-az

Sosial şəbəkələrdə müştəri hüquqlarının pozulması ilə bağlı növbəti şikayət "Omid" mağazalar şəbəkəsindən edilib.

“Yeni Sabah” xəbər verir ki, Şəhriyar Bəylərov adlı vətəndaşın sözlərinə görə, mağazadan təxminən 1700 manat dəyərində kreditlə məhsul alsa da, şirkət alınan malların siyahısını və dəqiq məbləğ hesablamasını təqdim etməkdən imtina edir.

Şikayətçi həmçinin qeyd edib ki, əsas məbləğin üzərinə 400 manatdan çox əlavə faiz hesablanıb. 

Müştərinin tələbinə responds olaraq mağaza tərəfindən "kreditdə olan malların siyahısı verilmir" cavabı verilib. Vətəndaşlar bu halın istehlakçı hüquqlarının açıq-aşkar pozulması olduğunu bildirirlər.

Azərbaycan Dövlət Kukla Teatrının nəzarətçisi Gülay Abdullayeva teatrın layihələr üzrə meneceri Aynurə Əkbərova tərəfindən aldadıldığını iddia edərək ölkə rəhbərliyindən kömək istəyib.
“Bakupost” xəbər verir ki, G.Abdullayeva müraciətində A.Əkbərovanın Xətai rayon İcra Hakimiyyəti başçısının keçmiş müavini Zaməddin Əkbərovun qızı olduğunu qeyd edib.
5 ildir teatrda çalışdığını deyən şikayətçi bildirib ki, A.Əkbərova ona torpaq satışı və sənədləşdirmə ilə bağlı vəd verib. G.Abdullayevanın sözlərinə görə, o, bu vədə inanaraq A.Əkbərovaya 5 930 manat ödəyib. Bildirib ki, həmin məbləği ödəmək üçün bankdan kredit götürüb.
Şikayətçinin iddiasına görə, A.Əkbərova 2025-ci ilin iyunundan 2026-cı ilin mayınadək ona cəmi 1 000 manata yaxın pul qaytarıb. Qalan məbləğin ödənilmədiyini deyən G.Abdullayeva hazırda kredit borcunun öz üzərində qaldığını bildirib:
“Artıq maddi və mənəvi olaraq çox ağır vəziyyətdəyəm. Əməkhaqqımın böyük hissəsi kredit ödənişinə gedir. Maddi ehtiyaclarımı qarşılamaq üçün evdəki əşyalarımı satmağa məcbur qalıram. Həyatım alt-üst olub. Mən sadəcə inanıb güvənmişəm. Son ümid yeri olaraq dövlət başçısına müraciət edirəm”.
Onun sözlərinə görə, qarşı tərəfə etiraz etdikdən sonra özünə və ailəsinə qarşı təhdid xarakterli səs yazıları da göndərilib:
“Anurə Əkbərova maddi ziyanımı qarşılamaq əvəzinə məni polisə və məhkəməyə şikayət edib. Məhkəmə onun şikayətini təmin etmədi. Daha sonra yaşadığı ərazi üzrə Mehdiabad Polis İdarəsinə müraciət etdi. Mənim izahatım alınıb. Sadəcə müraciətlərimə obyektiv şəkildə baxılmasını istəyirəm. Mən dövlətimə güvənirəm və kömək istəyirəm”.
O həmçinin atasının birinci qrup əlil olduğunu, anasının isə xadimə işlədiyini deyib. G.Abdullayeva məsələ ilə bağlı polisə müraciət etdiyini və hazırda araşdırma aparıldığını bildirib.
“Bakupost”un sorğusuna cavab olaraq Azərbaycan Dövlət Kukla Teatrının mətbuat katibi Həmidə Rüstəmova bildirdi ki, sözügedən məsələ əməkdaşların teatr fəaliyyəti ilə bağlı deyil:
“Bu, onların öz aralarında olan sövdələşmədir və şəxsi fəaliyyətləri ilə bağlıdır. Ümid edirik ki, problemi qanunvericilik çərçivəsində həll edəcəklər”.
İddialarla bağlı Aynurə Əkbərovanın mövqeyini dərc etməyə hazırıq.

Qeyd edək ki, Zaməddin Əkbərov 2016-cı ildə Xətai rayon İcra Hakimiyyəti başçısının müavini vəzifəsində çalışmağa başlayıb. 2017-ci ildə bu vəzifədən azad olunub.