Bizə rəqib ola biləcək toplumlara baxıram, qayğıları gələcəklə bağlıdır. Çağla ayaqlaşan təhsil, əhalinin sağlamlığı, yeni texnolojilərə çatımlılıq, ordu quruculuğu, bunları gerçəkləşdirmək üçün iqtisadi yüksəliş hayındadırlar. Özümüzə baxıram…, tarixin bu an üçün ən gərəksiz qatlarında eşələnirik. Daha dəqiqi eşələndirilirik… Bu o qədər bilincli şəkildə, o qədər dəqiq qrafik üzrə baş verdirilir ki, ağlı başında insanlarımızın çoxu plana qarşı çıxmaq yerinə bu dalğaya qoşulur.
Gözünün qabağında Bakı boyda abidə - millətin yeri doldurulmayacaq tarixi mirası məhv edilən insanlar Şah İsmayılın Vatikan agenti olub-olmamasını “araşdırır”, 3 dəqiqə mübahisəyə dözməyəcək ağılları ilə məzhəb və təriqət mövzularına dalırlar.
“Vsyo”, “okeydir”, tamamdır, həqiqəti tapıblar… Şah İsmayıl Xətai ana tərəfdən Vatikana bağlıdır, “inoagentdir”🫣, şiəliyi türk dünyasını 🫪 bölmək üçün düşünüb ona icra elətdiriblər, onun sayəsində türklük 🤔 parçalanıb. Gör hardan vururlar… Tanımayan Şah İsmayıl məsələsini ortaya atıb illərlə yaxa yırtanların türklük, Türkiyə sevdalısı olduğunu düşünər… Əslində dərdləri türklüyü yenə məzhəblərdə bölməkdir.
5-6 yüzil öncə Osmanlısının bugünkü Türkiyə Cümhuriyyəti ilə çox demərəm, 4 fərqini saya bilməyənlərdən “ordu” qurub artıq çoxdan yaşanmışlarla günümüzü məşğul edirlər. İnsafən içərilərində “dərin savad” sahibləri də var. Obyektivlik üçün “Möhtəşəm yüzil”dən öyrəndiklərini səsləndirirlər, məsələn deyirlər ki, Osmanlı padşahlarının anaları da xristian olub. Amma onlar Vatikan agenti olmayıblar. Qəti… Elə-belə boyunlarıda xaç gəzdiriblər, sonra padşah öz əllərilə onlara firuzədən damla üzük düzəldib verən kimi xaçı çıxarıb atıblar, olublar qatı müsəlman. Amma bu Səfəvi var aaa, bölüb e türk dünyasını. Parça-parça edib, əhli-beyt adına kəsmədikləri baş qalmayıb…
“Millət” burda ikinci günəbaxan tumu paketi açır, pəncərəsindən şəhərinin, paytaxtının, tarix mirasının necə məhv edildiyini görməzdən gəlir, Şah İsmayıl şiəliyi gətirməsəydi, indi Azərbaycan da Türkiyə olardı, biz də NATO ölkəsi olardıq, tibbi sığorta da yaxşı işləyərdi, mərcimək şorbası ilə “kuru fasulya” yeyib xoşbaxtlığın qafiyəsini tapardıq, hələ CHP-yə üzv də olardıq düşüncəsinə qapılır.
Bakı bu gün ekskavatorla kosmopolit, multikultural obraza salınsa da türklük və şiəliyin vəhdətinin şəhəridir. Hər sökülən imarəti, hər dağıdılan məhəlləsi o tariximizin mirasıdır. Bakının sehri bu vəhdətdədir. Məscidinin, qalasının, təkkəsinin, imarətinin, hamamının üzərindəki “bismillahir-rəhmanir-rəhim”lə başlayıb Məhəmməd Peyğəmbərə (s), əhli-beytə salamla davam edən yazılardır o vəhdətin sübutu. Bunlardır Bakını özəl edən, fərqləndirən.
Miras bilirsiz nədir? Bilirsiz necə qorunur? Keçmişini qandı-qanmadı, sürüyə qoşulub pisləməklə olmur bunlar. Hər yerə döşənən daşını, bir-birini təkrarlayan minlərlə kilsəsini, zadəgan evindən çayqırağı balıqçı məhəlləsinə qədər hər tikilisini əzizləyən avropalıların etdiyi kimi olur. Minillik məbədlərində bir toteminin lələyindəki nişanı gözünün bəbəyi kimi qoruyan çinlilərdəki kimi olur.
Bakını sökərkən - minillik mirası məhv edərkən toplumun səssiz, seyrçi, laqeyd qalması üçün gərəkdir tarixin gözdən salınması. Köhnə hər şey pisdir alqısı yaratmağın, tarixi şüurdan silib milləti kökündən qoparıb havada qoymağın yolu budur.
Keçmişi baba yadigarı kimi əzizləməyi, yaxşı tərəflərini görməyi öyrədənlərin sözü dinlənməli. Əksi düşmən işidir.
Yumun gözünüzü, bir Bakını düşünün… İçəri, bayır şəhərləri göstərdi beyniniz, ya Azərsunun binasını?
Hə, o beyninizin göstərdiyini sökürlər…
Aygün Muradxanlı

Dövlət maaşı ilə Avropanı qarış-qarış gəzənlər və Naxçıvanın ən baha yerində mülk alanlar kimlərdir?
Naxçıvan Muxtar Respublikasında son dövrlərdə həyata keçirilən kadr təmizləmələri və idarəetmə islahatları ictimaiyyət tərəfindən rəğbətlə qarşılanır.
Lakin aparılan təmizləmə prosesində diqqətdən kənarda qalan, fəaliyyəti çoxlu suallar doğuran müəyyən şəxslər hələ də öz postlarını qoruyub saxlayırlar. İctimaiyyətin tələbi aydındır: İslahatlar yarımçıq qalmamalı, adı qalmaqallarda hallanan kadrlar da işdən uzaqlaşdırılmalıdır.
Sıradan dövlət maaşı ilə Avropa gəzintisi: Pulların mənbəyi nədir?
İddiaların mərkəzində duran əsas şəxslər — Tükəzban Quliyeva, Gülxanım Orucova və onun bacısı Günay Orucovadır.
Məlumata görə, bu üç xanım Fuad Nəcəflinin rəhbərliyi dövründə Ədliyyə Nazirliyinin keçmiş əməkdaşlarından biri ilə birlikdə İtaliya başda olmaqla Avropanın bir çox şəhərlərinə səyahətlər ediblər. Dövlət qurumunda sıradan məmur maaşı ilə çalışan bu şəxslərin hansı maliyyə resursları hesabına dəbdəbəli Avropa turlarına qatıldığı sual doğurur.
Bundan əlavə, Tükəzban Quliyeva və Gülxanım Orucovanın Naxçıvan şəhərinin ən baha və mərkəzi ərazilərində özlərinə mənzillər və daşınmaz əmlaklar əldə etdikləri bildirilir.
Bütün bunlar hansı maliyyə ilə əldə edilib bu artıq sual altındadır.
Məktəbdə dərs deyən deputat köməkçisinin FHN-dəki "söz sahibi" rolu
Gülxanım Orucovanın bacısı Günay Orucova 2024-cü ildən deputat Ziyafət Əsgərovun köməkçisi vəzifəsini icra edir.
Eyni zamanda Şərur rayonundakı orta məktəblərdən birində pedaqoji fəaliyyətlə məşğuldur.
Burada iki vacib məqam ortaya çıxır:
Təhsilin keyfiyyəti: Şərurda şagirdlərə dərs deyən müəllimənin böyüyən nəslə hansı dəyərləri və vətənpərvərlik tərbiyəsini aşıladığı sual altındadır.Adı bu tip qalmaqallarda hallanan şəxsin Azərbaycanın gələcəyi olan gənc nəsilə hansə təhsili verəcəyidə qaranlıqdır.
Qanunsuz təsir imkanları: İddialara görə, Günay Orucovanın adı Fövqəladə Hallar Nazirliyinin (FHN) yerli strukturlarında kadr məsələlərinə — işə qəbul və işdən çıxarma proseslərinə müdaxilə edən şəxs kimi çəkilir.
Deputat köməkçisinin başqa bir nazirliyin kadr siyasətində hansı hüquqla rol aldığı aydınlaşdırılmalıdır.
Digər diqqətçəkən fiqur — Naxçıvan MR Prezidentinin Səlahiyyətli Nümayəndəliyində Humanitar məsələlər şöbəsinin müavini Tükəzban Quliyevadır.
Samir Seyidbəylinin "Krişalığı" Və Yarımçıq İslahatlar
Pərdəarxası məqamlar isə daha qaranlıqdır.
Naxçıvan sakinləri açıq şəkildə bildirirlər ki, Prezident Nümayəndəliyinin Humanitar şöbəsinin müavini Tükəzban Quliyevaya birbaşa Samir Seyidəhmədli "krişalıq" edir! Sakinlərin ah-naləsini, şikayətlərini hiyləgərcəsinə ört-basdır edən, Tükəzban Quliyeva kimi fiqurların özbaşınalıqlarına şərait yaradan və onları məsuliyyətdən sığortalayan şəxsin məhz Samir Seyidəhmədli olduğu vurğulanır.
Fuad Nəcəflinin dövründə də eyni mənzərə idi, indi də! Samir Seyidəhmədlinin bu havadarlığına niyə göz yumulur?
Əlavə olaraq onuda qeyd edəkki, iddialara görə Naxçıvan şəhər İcra hakimiyyətinin başçısının müavini Əhməd Vəliyevin ,Təhsil Nazirinin müavini Əli Vəliyevin, Naxçıvan Təhsil idarəsinin müdüri Təhminə Mustafayevanın görünməz himayədarı Samir Seyidəhmədlidir.
Onlara hansı şərtlər daxilində və necə himayədarlıq etdiyini, hansı vəzifələrdən nəyin müqabilində hansı vəzifələrə irəli çəkildiklərini isə istintaq araşdırmalı və lazımı qanuni tədbirlər görülməlidir.Ümummilli lider Heydər Əliyevin qeyd etdiyi kimi, "Cəzasız qalmış cinayət daha böyük cinayətlərə yol açır."
Buradan Naxçıvandakı məsul şəxslərə, Prezidentin Səlahiyyətli nümayəndəsi Ceyhun müəllimə və aidiyyəti qurumlara jurnalist kimi səslənirəm: Ümid edirik Ceyhun müəllim Ümumilli Liderimiz Heydər Əliyev cənablarının "Cəzasız qalmış cinayət daha böyük cinayətlərə yol açır." sözünə laqeyd qalmaz və tədbir görər.
Naxçıvan xalqının dərdinə gerçəkdən şərik olmaq, bu camaatın tapdanmış hüquqlarını bərpa etmək istəyirsinizsə, təmizləməyə bu haram şəbəkəsindən başlayın! Günay Orucova, Tükəzban Quliyeva və onların arxasında duranlar vəzifədən qovulmalı, dövlətdən mənimsədikləri hər bir manatın, o dəbdəbəli mülklərin hesabı məhkəmə qarşısında tələb olunmalıdır!
Naxçıvan xalqının səbri artıq tükənib, bu özbaşınalığa nöqtə qoyulmalıdır!
Sima Babayeva

Türkiyədə polkovnik Özlem Karapınar ölkənin Hərbi Hava Qüvvələrinin tarixində general hərbi rütbəsini alan ilk qadın olub.

Karapınarın hərbi rütbəsinin artırılması ilə bağlı qərar Ali Hərbi Şuranın Türkiyə Prezidenti Rəcəb Tayyib Ərdoğanın sədrliyi ilə keçirilən iclasında qəbul edilib.

Bildirilib ki, 49 yaşlı hərbçi fəaliyyəti boyu uğurlu nailiyyətləri ilə seçilib.

Haberler

Cəlilabad rayonunda yerləşən Göytəpə meşəbəyliyinin ərazisində ağacların qanunsuz kəsilməsi ilə bağlı "Bizimesr"ə görüntülər göndərilib.

Videogörüntülərdə yaş palıd ağaclarının kəsildiyi görünür. Bildirilir ki, hadisə Cəlilabad rayonunda 11 saylı Regional Meşə Təsərrüfatı Mərkəzinin Göytəpə meşəbəyliyinin 10 A saylı dolayında baş verib.

Qeyd edək ki, 11 saylı Regional Meşə Təsərrüfatı Mərkəzi Masallı, Cəlilabad və Yardımlı rayonlarının meşə ərazilərini əhatə edir. Mərkəzə Nəsimi Nəsirovun rəhbərlik etdiyi bildirilir.

Görüntülərdə iri gövdəli palıd ağaclarının kəsilməsi əks olunur.

Məsələ ilə bağlı Ekologiya və Təbii Sərvətlər naziri Rəşad İsmayılovdan araşdırma aparılması və qanunsuzluq aşkarlanacağı təqdirdə tədbir görülməsi tələb olunur.

Bizimesr.media olaraq məsələni diqqətdə saxlayacağıq.

VİDEO LİNKDƏ: https://bizimesr.media/az/post/goytepe-mesebeyliyinde-yas-palid-agaclari-bele-kesilib-satilir---video-22848

Naxçıvan Şəhər Poliklinikasında tibbi arayış üçün rəsmi 40 manat əvəzinə vətəndaşlardan 60-80 manat alındığı bildirilir.

Şikayətçilər deyirlər ki, bundan əlavə, ödədikləri pul üçün ümumiyyətlə qəbz verilmir. Onların fikrincə, bu, yığılan vəsaitin rəsmi uçotdan kənarda saxlanıldığını göstərir.

Sürücülük vəsiqəsi üçün tibbi arayış almağa müraciət edən Cabir Quliyev deyir ki, ondan da rəsmi məbləğdən artıq pul tələb olunub: “Dedilər ki, rüsum 60 manatdır. Mən də bildirdim ki, rəsmi qiymət 40 manatdır. Cavab verdilər ki, ‘qayda belədir, hara istəyirsən get şikayət elə’. Məcbur qalıb pulu ödədim, amma qəbz istəyəndə müxtəlif bəhanələrlə yayındırdılar. Açıq görünür ki, artıq alınan 20 manat sistemə getmir”.

İşə qəbul üçün tibbi arayış alan Seyid Əhmədov da eyni halla qarşılaşdığını bildirir: “Mən iş üçün arayış alırdım. Açıq şəkildə 80 manat istədilər. Qəbz tələb edəndə dedilər ki, ‘qəbz lazım deyil, belə olur’. Məcbur qalıb pulu verdim. Bu, artıq uzun müddətdir davam edir. Hər gələndən 20 manat artıq alınır, amma heç bir rəsmi sənəd verilmir”.

Şikayətçilər bildirirlər ki, tibbi arayış üçün artıq pul alınması və ödənişə qəbz verilməməsi uzun müddətdir davam edir. Onlar aidiyyəti qurumlardan məsələnin araşdırılmasını və yığılan vəsaitin hara getdiyinə aydınlıq gətirilməsini tələb edirlər. /Gündəlik Naxçıvan/

VİDEO LİNKDƏ: https://bizimesr.media/az/post/naxcivan-seher-poliklinikasinda-tibbi-arayis-60-80-manata-satilir---qebz-de-verilmir---video-22847

Bakının Nəsimi rayonu, Maqsud Əlizadə küçəsi 46 ünvanında çoxmərtəbəli binanın inşası ətrafda yaşayan sakinlər üçün təhlükə törədir.
Onlar bu iddialarla Xəzər TV-yə müraciət ediblər.
Şikayətçilərin sözlərinə görə, “Baku Rifah MTK” heç bir təhküləsizlik tədbirləri görmədən tikinti işlərini davam etdirir. Sakinlər təklif olunan kompensasiya məbləğinin bazar qiymətindən aşağı olduğunu iddia edirlər. “Şirkət 7-ci ildir ki, bizə olmayan əziyyət verir. Bütün binanın zibili, səs küyü həyətdədir. Hazırda mənim evimin arxasını qazırlar. Mən bu evdən çıxmaq istəmirəm, imkan versinlər rahat yaşayım...”, - sakinlərdən biri bildirib.
Digər sakin isə kvadrat metrə görə cəmi 1600 manatdan kompensasiya təklif olunduğunu, evlərinin qəzalı vəziyyətə salındığını, lakin təmir olunmadığını qeyd edib. MKT rəsmisi Emin Nəsirov isə sakinlərə 1800-2000 AZN kompensasiya təklif olunduğunu bildirib. O qeyd edib ki, evlər söküləməlidir ki, yeni binanın tikintisinə başlanılsın.(Xəzər TV)

Bütün ölkələr üçün səhiyyə sahəsi və vətəndaşların sağlamlığı prioritet sahələrdən biri hesab olunur. Bu sahədə mövcud olan nöqsanlar isə cəmiyyətin inkişafına birbaşa təsir edir. Lakin ölkəmizdə səhiyyə sahəsi yetərincə ürəkaçandırmı? Bunu bilmirəm.

Bakının keçmiş "Sovetski" adlanan ərazisinin sökülməsi nəticəsində Xırdalan şəhərinə köçdük. İnsanın olduğu mühiti kəşf etməsi aspektindən yanaşsaq, mən də Abşeron rayonunu kəşf etməyə başladım. Əlbəttə, bəzən kəşf yalnız maraqdan doğmur, zərurət də öz sözünü deyir.

Xırdalan şəhərinə köçəndən sonra tibbi sənədlər üçün yolum Abşeron rayon Mərkəzi Xəstəxanasına düşdü. Məlumat üçün deyim ki, Abşeron rayonunda bir baş idarə kimi Mərkəzi Rayon Xəstəxanası, 2 qəsəbə xəstəxanası, 2 poliklinika, 11 həkim məntəqəsi, 2 tibb məntəqəsi, Mərkəzi Rayon Xəstəxanası nəzdində fəaliyyət göstərən təcili və təxirəsalınmaz yardım şöbəsi əhaliyə səhiyyə xidməti göstərir.

Abşeron rayon Mərkəzi Xəstəxanasının binası əvvəllər bir uşaq bağçası kimi fəaliyyət göstərib. Daha sonra əsaslı təmir olunaraq 1983-cü ildən 60 çarpayılıq uşaq infeksion xəstəxanası kimi istifadəyə verilib. 2006-cı ildən 2008-ci ilin avqust ayına kimi xəstəxana binası sabiq icra başçısı Zakir Fərəcovun göstərişi əsasında rekonstruksiya və əsaslı təmir olunaraq 80 çarpayılıq Mərkəzi Rayon Xəstəxanası kimi əhalinin istifadəsinə verilib. Müasir avadanlıqla təchiz edilmiş 2 mərtəbəli, 80 çarpayılıq xəstəxanada doğum, uşaq, cərrahiyə, ginekologiya və reanimasiya şöbələri, laboratoriya, 3 bufet, mətbəx, camaşırxana fəaliyyət göstərib.

2021-ci ilin fevralında isə prezident İlham Əliyevin sərəncamı ilə Abşeron Rayon Mərkəzi Xəstəxanasının yeni inşa olunan binası istifadəyə verilib. Bu binaya Abşeron Rayon Mərkəzi Xəstəxanasının nəzdində olan mərkəzi xəstəxana, Abşeron rayon poliklinikası, Abşeron rayon uşaq poliklinikası və təcili və təxirəsalınmaz tibbi yardım şöbəsinin köçürülməsi nəzərdə tutulub. Ölkə başçısının müvafiq Sərəncamı ilə tikilən 150 çarpayılıq tibb müəssisəsində cərrahiyyə, terapiya, pediatriya, reanimasiya, dializ və digər şöbələr, həmçinin laboratoriyalar fəaliyyət göstərir. Tibb müəssisəsi TƏBİB-in tabeliyindədir. Bura qədər hər şey əladır. Ancaq indiki reallıq heç də ürəkaçan sayılmaz.

Abşeron rayon Mərkəzi Xəstəxanasının bitməyən problemləri davam edir

Dövlət səviyyəsində diqqətin ayrılmasına baxmayaraq, bu xəstəxanaya yolu düşənlərin gününün çox hissəsinin növbədə gözləməklə keçməsi, əsəb və stressin pik səviyyədə olması danılmazdır. Bu əsəb-stress yalnız vətəndaşlara da aid deyil. Elə tibb işçilərinin əksəriyyəti də gərgin və əsəbidir. Bunun səbəbini soruşduqda cavab olaraq bildirilir ki, xəstəxanada tələb-təklif disbalansı yaşanır. Belə ki, kifayət qədər böyük olan xəstəxanada bəzi tibbi sahələri üzrə cəmi bir həkim təyin olunub. Məsələn, o boyda xəstəxananın cəmi bir onkoloqu var. Onkoloji xəstələrin sayının getdikcə artığını nəzərə alsaq, əlillik üçün arayış almaq istəyənləri və həmin onkoloqun qapısının ağzında yaranan növbəni siz təsəvvür edin. Saatlarla çəkən uzun növbələr, gözləməkdən yorulan vətəndaşlar əsəbi, gün ərzində normadan çox xəstə qəbul edən həkim isə gərgin olur. Bu, hələ canlı şahidi olduğum haldır. Yəni, Abşeron rayonunun inzibati ərazisində yaşayan əhaliyə xidmət göstərən Xəstəxanada ciddi həkim çatışmazlığı yaşanır. Xəstəxanaya üz tutan vətəndaşların sayı isə ilbəil artmaqdadır.

Komissiya “bufet”də fəaliyyət göstərir

Xəstəxananın problemi bununla da bitmir. İlk dəfə biləndə mən də təəccüblənmişdim. Təsəvvür edin ki, ümumi ərazisi 4 hektar, tikinti sahəsi isə 6300 kvadratmetr olan bir xəstəxananın bufeti yoxdur. Xəstəxananın həkimləri nahar yeməyini xəstələri qəbul etdikləri otaqda edirlər. Necə? Çox sadə. Saat 13:00-14:00 nahar vaxtıdır və bu saatda qəbul otaqlarının qapıları içəridən bağlanır. Daha sonra tibb işçiləri ya sifariş etdikləri, ya da evdən gətirdikləri yeməklərlə nahar edirlər. Nahar saatı bitəndən sonra yemək iyi bürümüş otaqlarda yenidən xəstə qəbulu aparılır.

Əslində xəstəxananın bufeti var. Ancaq bu, fərqli bufetdir. Vətəndaşlara xidmət edir, amma kreativ formada...Geniş ərazisi olduğunu qeyd etdiyim xəstəxanada əlilliyin təyini üçün yaradılan komissiya qəbulu məhz "bufet"də aparılır. Bəli, bəli... Xəstəxanada boş bir otaq yoxdur ki, komissiya qəbulu aparılsın. İnsanlar yalnız həftənin bəlli günündə və saatında bufet deyilən, ancaq stol və stullardan ibarət olan otağa yığılırlar və komissiyadan keçirlər.

Bir sözlə, vətəndaşlara tibbi xidmət üçün nəzərdə tutulan xəstəxanadakı nöqsanlar insanların sağalmasından daha çox, əsəblərinin daha da pozulmasına səbəb olur. Günahkar kimdir? Yəqin ki, xəstəxananın tabe olduğu müvafiq qurum... Çünki elə həmin xəstəxananın tibb işçiləri də yaşadıqları vəziyyətdən məmnun deyillər.

Sonda müvafiq qurumlara Ulu Öndər Heydər Əliyevin bu fikirlərini xatırlatmaq istərdim: "Səhiyyə bizim üçün, hər bir cəmiyyət və dövlət üçün çox lazımlı, həyatın bütün sahələrini əhatə edən sahədir. Onun üçün zəruri tədbirlər görülüb və gələcəkdə də görüləcəkdir".

Ümid edirəm ki, 434 min nəfərlik Abşeron rayonu əhalisinin və Abşeron rayon Mərkəzi Xəstəxanasının tibbi heyətinin yaşadığı çətinliklər tezliklə öz həllini tapacaq. /Bakivaxti.az/

Sumqayıt şəhəri, Corat qəsəbəsi, Səttar Əliyev küçəsi 35 ünvanında çəkilmiş fotolardan da göründüyü kimi, "Azəriqaz"a məxsus, istismar müddəti bitmiş boş borular sakinlərin rahatlığını pozur, eləcə də onların öz həyətyanı sahələrinə avtomobil ilə giriş-çıxışını ciddi şəkildə məhdudlaşdırır.

Sakinlərin dəfələrlə bu problemi aradan qaldırmaq üçün Sumqayıt Regional Qaz İdarəsinin rəisi Sübhi Bayramova və Təbii qazın alışı və satışı şöbəsinin rəisi Hafiz Yunusluya müraciət etmələrinə baxmayaraq, məsələ ilə bağlı hələ də heç bir tədbir görülmür və heç bir açıqlama verilmir.

Elə isə haqlı olaraq sual yaranır: Sumqayıt Qaz İstismar İdarəsinə məxsus olan və istifadə olunmayan bu boş borular əhalinin narahatlığına açıq şəkildə səbəb olduğu halda, niyə kəsilərək ləğv edilmir? Bəlkə, qurum rəsmilərinin müraciət edən sakinlərdən umacağı nəsə var?

Ümid edirik ki, Sumqayıt Regional Qaz İdarəsinin rəisi Sübhi Bayramov və Təbii qazın alışı və satışı şöbəsinin rəisi Hafiz Yunuslu tezliklə sakinlərin səsinə səs verəcəklər.

Xeberekspress.com

Sumqayıt Apellyasiya Məhkəməsində dələduzluqda təqsirləndirilən Arif İbrahimovun barəsindəki hökmdən verilən apellyasiya şikayəti üzrə məhkəmə iclası başa çatıb.

Hakim Ruhiyyə Əsgərovanın sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İttihama görə, Arif İbrahimov tamah niyyəti ilə etibardan sui-istifadə və aldatma yolu ilə özgənin əmlakını ələ keçirmək məqsədilə zərərçəkmiş F.F.-in (adı, soyadı şərtidir) etibarını qazanaraq onun iki övladını Azərbaycan Dövlət Tibb Universitetinə qəbul etdirəcəyini vəd edib.

Belə ki, təqsirləndirilən şəxs ali məktəbə qəbul prosesində tanışlarının və imkanlarının olduğunu bildirərək zərərçəkmişi buna inandırıb və qəbul məsələsini həll edəcəyini deyərək ondan mərhələli şəkildə pul alıb.

Araşdırmalarla müəyyən edilib ki, 2023-cü ilin may ayında F.F. "MilliÖn" ödəmə terminalı vasitəsilə Arif İbrahimovun bank kartına iki dəfə olmaqla, hər dəfə 10 000 manat, ümumilikdə 20 000 manat köçürüb.

Bundan sonra, 2023-cü ilin iyun ayında zərərçəkmişin qohumu onun adından "MilliÖn" terminalı vasitəsilə həmin bank hesabına əlavə 3 000 manat göndərib.

2023-cü ilin avqust ayında isə eyni qaydada daha 3 000 manat həmin hesaba köçürülüb.

Beləliklə, F.F. müxtəlif vaxtlarda təqsirləndirilən şəxsə ümumilikdə 26 000 manat ödəyib.

Lakin sonradan məlum olub ki, Arif İbrahimovun verdiyi vədlərin heç bir real əsası olmayıb. O, zərərçəkmişin övladlarının ali məktəbə qəbulunu təşkil etməyib, aldığı vəsaiti isə öz şəxsi ehtiyaclarına sərf edib.

İstintaq orqanı onun hərəkətlərini etibardan sui-istifadə və aldatma yolu ilə xeyli miqdarda maddi ziyan vurmaqla törədilmiş dələduzluq kimi qiymətləndirib.

Abşeron Rayon Məhkəməsinin hökmü ilə o, 3 il 5 ay 29 gün müddətinə azadlıqdan məhrumetmə cəzasına məhkum edilib.

Pravda.az

Xəbər verdiyimiz kimi, Dini Qurumlarla İş üzrə Dövlət Komitəsinin Tovuz-Qazax Regional İdarəsinə yeni rəis təyin olunub. Komitə sədri Ramin Məmmədovun müvafiq əmri ilə Qüdrət Əliyev bu vəzifəyə gətirilib.
Məlumata görə, Qüdrət Əliyev bu təyinatdan öncə Qazax-Tovuz Regional Təhsil İdarəsi üzrə Şəmkir rayon təhsil sektorunun müdiri işləyib və 2022-ci ilin noyabrında müqavilə müddətinin başa çatması ilə əlaqədar fəaliyyətinə xitam verilib. Lakin o, həmin vəzifədə müqavilə müddəti bitənədək fəaliyyətini davam etdirə bilib.

Q.Əliyevin karyerasındakı diqqətçəkən məqamlardan biri isə onun Şəmkir Rayon İcra Hakimiyyətinin həbsdə olan sabiq başçısı Alimpaşa Məmmədovun idarəçiliyi dövründə birinci müavin postunu tutmasıdır. Həmin dövrdə o, qəfil birinci müavin vəzifəsindən azad edilərək Şəmkir rayon Təhsil Şöbəsinin müdiri postuna gətirilmişdi. Rayonda icra hakimiyyətinin əsas fiqurlarından birinin birbaşa təhsil sahəsinə rəhbər təyin olunması o vaxt yerli ictimaiyyət və media tərəfindən "vəzifə manipulyasiyası" və idarəetmədə qeyri-şəffaflıq iddiaları ilə kəskin tənqid edilmişdi.

Bununla yanaşı, 2021-ci ilin aprelində icra hakimiyyətində keçirilən xüsusi əməliyyat zamanı ölkə mediası ilk saatlarda Qüdrət Əliyevin də rəsmən həbs edildiyi barədə geniş xəbərlər yaymışdı. Böyük rezonans doğuran bu məlumatlardan sonra Təhsil Nazirliyi rəsmi açıqlama yayaraq onun həbs olunmadığını və işinin başında olduğunu bildirməli oldu. Yaranmış bu informasiya xaosu zamanı onun adı ətrafında ciddi ajiotaj yaşanmışdı.

Alimpaşa Məmmədovun rüşvət ittihamları ilə mühakimə olunduğu dövrdə Qüdrət Əliyev sabiq başçının ən yaxın ətrafı və imza səlahiyyəti olan keçmiş müavini kimi hüquq-mühafizə organları tərəfindən dindirilib. Onun cinayət məsuliyyətinə cəlb edilməməsinə baxmayaraq, uzun müddət məhkəmədə şahid qismində ifadə verməsi və mənimsənilən büdcə vəsaitlərinin sənədləşdirilməsi prosesində adının halallanması karyerasında ən qalmaqallı kölgə olaraq qalıb.(32gun.az)