Hindistanın Müdafiə Tədqiqatları və İnkişafı Təşkilatının (DRDO) Ermənistan üçün “Pralay” taktiki raket sisteminin 300 kilometrlik ixrac modifikasiyasını hazırladığı bildirilir.


Tərəflər arasında bununla bağlı aparılan ikitərəfli danışıqlar yekun mərhələyə daxil olub.


Hazırda müzakirələrin əsas predmetini müqavilənin maliyyə parametrləri və qiymət mexanizmləri təşkil edir.


Bərk yanacaq mühərriki ilə təchiz olunan “Pralay” raketi adi döyüş başlıqları vasitəsilə rabitə qovşaqları, logistika mərkəzləri, silah-sursat anbarları və ön xəttdə yerləşən hərbi aerodromlar kimi strateji əhəmiyyət daşıyan hədəflərə yüksək dəqiqliklə zərbə endirmək məqsədilə hazırlanıb. Raket 500-1000 kiloqram ağırlığında döyüş başlığı daşıya bilir və 150-500 kilometr məsafədə yerləşən hədəfləri vurmaq imkanına malikdir.


Ənənəvi ballistik raketlərdən fərqli olaraq, “Pralay” daha yastı kvazi-ballistik trayektoriya üzrə hərəkət edir. Bununla yanaşı, uçuşun müxtəlif mərhələlərində istiqamətini dəyişmək qabiliyyəti raketin aşkarlanmasını və qarşısının alınmasını xeyli çətinləşdirir.


Nəticədə, mövcud hava hücumundan müdafiə sistemlərinin reaksiya müddəti azalır və onların ələkeçirmə imkanları əhəmiyyətli dərəcədə məhdudlaşır.


Ermənistanın “Pralay” kimi müasir hücum təyinatlı raket sistemini əldə etməyə maraq göstərməsi Cənubi Qafqazın təhlükəsizlik arxitekturası baxımından ciddi suallar doğurur. Rəsmi İrəvan son illərdə silahlı qüvvələrinin modernləşdirilməsi çərçivəsində Hindistandan “Pinaka” çoxlüləli reaktiv yaylım atəşi sistemləri, “Swathi” artilleriya aşkarlama radarları və “Akash” zenit-raket kompleksləri də daxil olmaqla bir sıra silah sistemləri tədarük edib.


Bu fonda “Pralay” kimi uzaqmənzilli zərbə vasitələrinin alınmasına yönəlmiş addımlar Ermənistanın hərbi planlaşdırmasının hansı istiqamətdə inkişaf etdiyini gündəmə gətirir.


İran və Gürcüstanla hərbi qarşıdurma yaşamayan, Türkiyə ilə münasibətlərin normallaşdırılması prosesini davam etdirən Ermənistanın hücum potensialını genişləndirməsinin hansı təhlükəsizlik ehtiyaclarından irəli gəldiyi, eləcə də bu imkanların regionun hansı aktoruna qarşı nəzərdə tutulduğu ilə bağlı suallar aktuallığını qoruyur.


Hindistanın Ermənistanla hərbi-texniki əməkdaşlığını ardıcıl şəkildə genişləndirməsi də regional təhlükəsizlik mühitinə təsirləri baxımından diqqət çəkən məqamlardandır.


Yeni Dehlinin son illərdə həyata keçirdiyi silah ixracı layihələri təkcə ikitərəfli müdafiə əlaqələrinin dərinləşdirilməsi ilə məhdudlaşmır, eyni zamanda Cənubi Qafqazda mövcud hərbi balansın dəyişməsinə təsir göstərə biləcək yeni imkanlar formalaşdırır.


Bu kontekstdə sözügedən əməkdaşlığın üçüncü dövlətlərin təhlükəsizlik maraqlarına mümkün təsirləri ayrıca qiymətləndirilməlidir.


“Pralay” raket kompleksinin Ermənistana mümkün ixracı Hindistan-Ermənistan müdafiə tərəfdaşlığını keyfiyyətcə yeni mərhələyə yüksəldə biləcək addım kimi qiymətləndirilə bilər. Bununla yanaşı, ixrac məqsədilə hazırlanacaq 300 kilometrlik modifikasiyanın istehsalı və tədarükü prosesində Hindistanın beynəlxalq ixrac nəzarəti mexanizmlərinə, xüsusilə də Raket Texnologiyalarına Nəzarət Rejiminin (MTCR – Missile Technology Control Regime) tələblərinə hansı səviyyədə riayət edəcəyi diqqətlə izlənilməsi vacib olan məsələlərdən biri olaraq qalır.

Son aylarda KATV1 internet provayderinin çoxsaylı abunəçiləri xidmətin keyfiyyəti ilə bağlı ciddi narazılıqlarını ifadə edirlər. Redaksiyamıza daxil olan çoxsaylı müraciətlərdə bildirilir ki, internet xidməti ayın əvvəlində, ortasında və sonunda dəfələrlə saatlarla dayanır, nəticədə həm fərdi istifadəçilər, həm də internet üzərindən fəaliyyət göstərən müəssisələr ciddi çətinliklərlə üzləşirlər.
İddialara görə, uzunmüddətli kəsintilər səbəbindən onlayn iş prosesləri dayanır, xidmət göstərən müəssisələr maddi zərərlə üzləşir, media qurumlarının fəaliyyəti isə iflic vəziyyətinə düşür.
Problemdən zərər çəkən media resursları sırasında SözTV.az, BNTV.az, Tibbmedia.az və Bakunews.tv-nin də olduğu bildirilir. Redaksiyalar qeyd edirlər ki, internet bağlantısının tez-tez kəsilməsi xəbərlərin hazırlanması, video materialların yüklənməsi və canlı yayımların həyata keçirilməsində ciddi maneələr yaradır.
Abunəçilər bildirirlər ki, aylıq 30 manat ödəniş etmələrinə baxmayaraq, bəzi hallarda internet xidməti 10–15 gün ərzində normal işləmir. Onların fikrincə, xidmətin bu səviyyədə göstərilməməsi istehlakçı hüquqlarının pozulması, ödənilmiş xidmətin tam həcmdə təqdim edilməməsi ilə bağlı suallar yaradır.
Narazılıq doğuran digər məqam isə, iddialara görə, KATV1 tərəfindən indiyədək genişmiqyaslı kəsintilərlə bağlı rəsmi üzrxahlığın edilməməsi və ya abunəçilərə hər hansı kompensasiya mexanizminin tətbiq olunmamasıdır.
Qeyd edək ki, KATV1 (AG Telekom MMC) Azərbaycanda fəaliyyət göstərən iri internet provayderlərindən biridir və rəsmi internet səhifəsində yüksəkkeyfiyyətli xidmət göstərdiyini bildirir. Bununla yanaşı, müxtəlif dövrlərdə KATV1 xidmətindən narazılıqlarla bağlı mediada və sosial platformalarda da şikayətlər dərc olunub.
Qarşı tərəfin mövqeyini dərc etməyə hazırıq. KATV1 şirkəti yaranmış vəziyyətlə bağlı açıqlama verəcəyi və ya iddialara münasibət bildirəcəyi təqdirdə, həmin mövqe dəyişdirilmədən və tam şəkildə oxuculara təqdim olunacaq.

BnTv.az

Bakı şəhəri, Xətai Rayon Bələdiyyəsinin sədri Elşad Vəliyevi bıçaqlayan şəxs həbs edilib.

Qaynarinfo-nun əldə etdiyi məlumata görə, 2002-ci ildə Yevlax rayonunda anadan olmuş Hüseynzadə Ramin Əlisahib oğlu barəsində Azərbaycan Respublikası Cinayət Məcəlləsinin 221.3-cü (xuliqanlıq əməlinin silah və ya silah qismində istifadə edilən əşyalardan istifadə edilməklə törədilməsi) maddəsi ilə açılmış cinayət işinə məhkəmədə baxılıb.

Ramin Hüseynzadə Xətai Rayon Bələdiyyəsinin sədri Elşad Vəliyevə bıçaqlı hücum etməkdə təqsirli bilinib. O, özü ilə gətirdiyi mətbəx bıçağından silah qismində istifadə edərək bələdiyyə sədrinə qarın və sağ ayaq nahiyəsindən bir neçə dəfə zərbə endirib və ona müxtəlif dərəcəli bədən xəsarətləri yetirib. Bundan başqa, yumruq zərbəsi ilə Elşad Vəliyevin sol göz nahiyəsinə vuraraq sol gözaltı nahiyədə dərialtı hematoma və sol göz almasına qansızma ilə nəticələnən, sağlamlığın qısa müddətə pozulmasına səbəb olan yüngül xəsarətlər yetirib.

Məhkəmə materiallarından məlum olub ki, Ramin Hüseynzadə bir müddət Elşad Vəliyevin ailəsinə məxsus restoranda ofisiant işləyib. Həmin dövrdə o, qanunsuz olaraq qaraja daxil olub, bələdiyyə sədrinə məxsus avtomobilin şüşələrini sındırıb. Hadisədən sonra Elşad Vəliyev onu bağışlasa da, işdən çıxarıb.

Bundan sonra Ramin Hüseynzadə Elşad Vəliyevdən qisas almaq məqsədilə, sonuncu Naxçıvanda olduğu dövrdə təxminən bir ay ərzində onun yaşadığı evin yaxınlığında gözləyib. Bələdiyyə sədrini gördükdə isə ona bıçaqla hücum edib və "Gör səni indi necə öldürürəm, məhv edirəm" kimi ifadələr səsləndirib.

Təqsirləndirilən şəxs məhkəmədə özünü elan olunmuş ittiham üzrə qismən təqsirli bildiyini deyib. İfadəsində göstərib ki, Elşad Vəliyevlə münasibətləri restoranda ofisiant işlədiyi dövrdə pozulub. İşdən çıxarıldıqdan sonra psixoloji gərginlik yaşadığını, yuxularının pozulduğunu və kiminsə onu izlədiyini düşündüyünü bildirib. Onun sözlərinə görə, bu məsələlərə aydınlıq gətirmək üçün zərərçəkmişin yaşadığı evin yaxınlığına gedib. Həmin vaxt Elşad Vəliyevlə qarşılaşıb, aralarında mübahisə yaranıb və o, bıçaqla 2-3 dəfə zərbə endirib.

Məhkəmənin hökmü ilə Ramin Hüseynzadə Cinayət Məcəlləsinin 221.3-cü maddəsində nəzərdə tutulan cinayət əməlini törətməkdə təqsirli bilinib. Ona 2 il 4 ay müddətinə azadlıqdan məhrumetmə cəzası təyin edilib. Təqsirləndirilən şəxs cəzasını ümumi rejimli cəzaçəkmə müəssisəsində çəkəcək.

Bakı şəhər sakini, uzun müddət neft sektorunda çalışmış Məhəmməd Xudu oğlu Şirinov 6 ildir ona təyin edilmiş pensiyanı ala bilmədiyini deyir.
1959-cu il təvəllüdlü M.Şirinov bildirib ki, pensiya təminatı ilə bağlı Bakı İnzibati Məhkəməsinin 16 iyun 2017-ci il tarixli qərarı həmin vaxt qüvvəyə minərək icraya yönəldilib.
Həmin qərar 2020-ci ilədək icra edilib: “Lakin 2020-ci ildən bu günədək 1 saylı Bakı İnzibati Məhkəməsinin qərarı icra olunmur. Nərimanov İcra Şöbəsinə dəfələrlə müraciətlər etsəm də, icra sənədinin icra edilməməsi ilə bağlı tədbir görülmür. Hətta məhkəməyə qərarın icra olunmamasına dair müraciət də etdik. Bakı İnzibati Məhkəməsi 21 oktyabr 2025-ci ildə qərardad çıxararaq Əmək və Əhalinin Sosial Müdafiəsi Nazirliyinin tabeliyində DSMF-nin Xüsusi Şərtlərlə Təyinat üzrə Mərkəzi Filialını qərarı icra etmədiyinə görə 200 manat cərimələdi”.
Məhəmməd Şirinov əlavə edib ki, dövlət qurumunun sonradan məhkəməyə etdiyi müraciətinə hüquqi qiymət verilib: “Hələ 2023-cü ildə yeni açılmış hallarla bağlı icraatın təzələnməsinə dair verilən ərizə üç instansiya məhkəməsində araşdırılmasına baxmayaraq, əsassız olduğu üçün rədd edildi.
Artıq 6 ildən çoxdur ki, DSMF-nin Xüsusi Şərtlərlə Təyinat üzrə Mərkəzi Filialı məhkəmə qərarını icra etməkdən imtina edir. Ədliyyə Nazirliyinin İcra Xidmətinin Nərimanov rayon Şöbəsi isə borclu - DSMF-nin Xüsusi Şərtlərlə Təyinat üzrə Mərkəzi Filialı və onun səlahiyyətli şəxsləri barəsində icra tədbiri tətbiq etmir. Hətta qərarı icra etmədiklərinə görə onlar cərimələnsələr belə, qərarı icra etməkdən boyun qaçırırlar”.
İddialarla əlaqədar DSMF-yə sorğu ünvanladıq. Müraciətimizə cavab olaraq bildirildi ki, Məhəmməd Xudu oğlu Şirinovun pensiya işi araşdırılarkən ona saxta sənədlər əsasında güzəştli şərtlərlə yaşa görə pensiya təyin olunduğu aşkar edilib: “Bu səbəbdən pensiya ödənişi 1 avqust 2020-ci ildən dayandırılıb. Məhəmməd Şirinova 65 yaşının tamam olduğu 19 mart 2024-cü il tarixindən isə hüququ yarandığı üçün yaşa görə pensiya təyin edilib və əvvəllər ona artıq ödənilmiş vəsait də hər ay 28 manat olmaqla pensiyasından tutulur. Qanuni əsasla ona təyin edilmiş pensiyası hazırda 349,76 manatdır. Ona əsassız təyin edilmiş pensiya işinə hüquqi qiymətin verilməsi üçün materiallar hüquq-mühafizə orqanına göndərilib. Həmçinin Məhəmməd Şirinovun pensiya məsələsi ilə əlaqədar yeni açılmış hallara dair icraatın təzələnməsi üçün Bakı İnzibati Məhkəməsinə müraciət edilib”. /Qafqazinfo/

Səhiyyə Nazirliyi tərəfindən “Caspian İnternational Hospital”dan plandankənar yoxlama keçirilib.
Yoxlama zamanı sözügedən klinikada ciddi nöqsanlar üzə çıxıb. Belə ki, yoxlama zamanı lisenziyadan kənar ginekoloji iş üzrə ekstakorqonal mayalandırma, dövlət qeydiyyatından keçməmiş, yararlılıq müddəti bitmiş və saxlama şəraitinə riayət etmədən dərman vasitələri aşkarlanıb.
Müəssisədə yoxlama baş direktor Cəbrayıl Abbasovun iştirakı ilə aparılıb. “Caspian İnternational Hospital”ın baş direktoru izahatında bildirib ki, xəbərdarlıqdan sonra müəssisədə sonsuzluqla bağlı prosedurların keçirilməsi saxlanılıb.
Nəticədə “Caspian İnternational Hospital” barəsində İnzibati Xətalar Məcəlləsinin 215.1-ci, 221.1-ci və 221.10-cu maddələri üzrə protokol tərtib edilib. Protokol baxılması üçün Səbail Rayon Məhkəməsinə göndərilib. Məhkəmənin qərarına əsasən, “Caspian İnternational Hospital” 6 000 manat cərimələnib.
Qeyd edək ki, rəsmi məlumata görə, hazırda “Caspian İnternational Hospital”ın 29 154 912.6 AZN vergi borcu var.
Şirkətin qanuni təmsilçisi Cəbrayıl Abbasov qeyd olunsa da, səhiyyə müəssisəsinin real sahibinin Şamo Fərzəlibəyov olduğuna dair məlumatlar yayılıb. Məlumata görə, o, əvvəllər səhiyyə nazirinin müavini olmuş Elsəvər Ağayevin qudasıdır. Şamo Fərzəlibəyov eyni zamanda, “Badam Medical Center” və “Arash Medical Company” tibb şirkətinin rəhbəri olaraq da göstərilir.

Xitab24.az

Bir neçə gündür ki, sahibkarlara qənim kəsilən və ayrı-ayrı dövlət qurumlarındakı, xüsusən də məhkəmə sistemindəki ortaqları ilə əlbir olaraq iş adamlarının mal-mülklərini ələ keçirən “Biləcəri Təmir-Quraşdırma” QTSC-nin rəhbəri Nazim Tahirovun əməlləri barədə oxucularımızı məlumatlandırıq. Xatırladaq ki, keçən gün Alim Lətifov adlı sahibkar külli miqdarda pulunun Nazim Tahirov tərəfindən mənimsədildiyini idda edərək, hətta pulunu geri tələb etməsin deyə hazırda özünün və ailə üzvlərinin də ölümlə təhdid olunduğunu bildirmişdi.
Bəli, dəyərli oxucular... məhz ÖLÜM təhdidi... Qeyd edək ki, Nazirm Tahirovun "aktivində" ÖLÜM MƏSƏLƏSİ sıradan bir hadisədir və aşağıda təqdim edəcəyimiz fakt da bunu təsdiqləyir... Beləliklə, NAzim Tahirovun ölüm həddinə çatdırdığı daha bir sahibkar...
Redaksiyamız 2017-ci ilin fevral ayında baş verən bir intihar hadisəsinin şok təfərrüatlarının izinə düşüb. Xatırladaq ki, hadisə doqquz il əvvəl baş verib və bu barədə rəsmi yayılan məlumatlarda deyilirdi ki, Bakıda 54 yaşlı kişi özünü zəncirlə asıb. Xəbərə görə, hadisə Sabunçu rayonunda qeydə alınıb. Belə ki, 1963-cü il təvəllüdlü Nəsirov Yusif Təvəkkül oğlu özünü yaşadığı evin həyətində zəncirlə asaraq intihar edib. Faktla bağlı Sabunçu Rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılıb, intiharın səbəbləri araşdırılır.

Lakin əldə etdiyimiz məlumatlar da təsdiqləyir ki, əslində bu faktlar yetərincə araşdırılmayıb. Hər halda təqdim etdiyimiz iddialardan da belə anlaşılırdı. Qeyd olunurdu ki, intihar edən şəxsin (hazırki araşdırmalarımızdan aydın olur ki, Nəsirov Yusif Təvəkkül oğlu kifayət qədər ciddi və uğur qazanan sahibkarlardan olub və o sağlığında 16 saylı İnşaat-İstehsalat Təsərrüfat Trestinə rəhbərlik edərək, hətta dəfələrlə dövlət siafrişlərini də həyata keçirib) kimliyini öyrəndikdə görürük ki, burada şübhəli məqamlar yetərincədir.

Əldə etdiyimiz məlumatlardan aydın olur ki, özünü öldürməyə vadar edilən Nəsirov Yusif Təvəkkül oğlunun başı son günlərdə cəncəldə olub. Məhkəmədə ona qarşı 6 milyon manatdan artıq iddia qaldırılıb. Və əslində intihar səbəbi də budur.

Məlumatlara görə, həmin ərəfədə Nazim Tahirovun rəhbərlik etdiyi qurum Rusiyadan borular ixrac edirmiş və bu ixrac prosesi zamanı Tahirovun Rusiyadakı müəssisələrə külli-miqdarda borcu yaranır. Vəziyyətdən heç cürə çıxmağa müvəffəq ola bilməyən Tahirov bu aman çoxdandır partnyorluq etdiyi Yusif Nəsirova kömək üçün ağız açır. Həm pulla və həm də sonradan ölümünə nədən olan bir hadisə ilə Tahirova dəstək olan Nəsirov bunun qarşılığında “Biləcəri Təmir-Quraşdırma” QTSC-dən 2 milyon manatlıq boru götürür. Amma sonradan... Dediyimiz bəlalı hadisə isə bu olur. Tahirova arxa durmaq üçün Nəsirov ona Rusiyadakı müəssisələri aldatmasına şərait yaradır. Razılaşır ki, məhkəmə yolu ilə guya Nəsirovun Tahirova 6 milyon manatdan artıq borclu olmasını sübutlayan qərar çıxarılsın. Həmin saxta məhkəmə qəarı isə Rusiyada Tahirovdan satdıqları boruların pulunu gözləyən müəssisələrə göndərilir. Nəticədə, Tahirov xeyli dərəcədə vəziyyətdən çıxmağa müvəffəq olur. Amma üstündən müəyyən müddət keçəndən sonra Tahirov Nəsirova etdiyi yaxşılığın qarşılığını YAMANLIQLA çıxmaq qərarını verir. Axı necə də olmalı idi ki? Ələ gözəl fürsət düşmüşdü. Əlində bir məhkəmə qərarı var idi ki, kiminsə ona 6 milyon manatdan artıq borcu var...

Beləcə Tahirov günlərin birində Nəsirovdan olmayan borcu - Rusiyadakı müəssisələri aldatmaq üçün uydurulmuş borcu tələb edir... Nəticəsi isə atıq məlumdur. Düşdüyü durumdan həm şoka düşən və həm də çıxış yolu tapa bilməyən Nəsirov sonda intihar etməli olur... Canına qıyır...
Acınacaqlısı isə odur ki, Nazim Tahirov bütün bu əməlləri zamanında ört-basdır edə bilib. Elə buna görədir ki, yenə də İŞ BAŞINDADIR... yenə də növbəti qurbanlarını bir-bir məhv etmə yolunu seçib...
Məsələ diqqətimizdədir... Araşdırma davam edir...
DİA.AZ

Azərbaycanda sabah 37 dərəcə isti gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin səhər bəzi şəhərətrafı ərazilərdə qısamüddətli az yağış yağacağı ehtimalı var. Mülayim şimal-qərb küləyi gündüz yarımadanın bəzi yerlərində arabir güclənəcək.

Havanın temperaturu gecə 20-23° isti, gündüz 27-30° isti olacaq. Atmosfer təzyiqi 758 mm civə sütunu, nisbi rütubət isə gecə 70-80 %, gündüz 60-65 % təşkil edəcək.

Azərbaycanın rayonlarında havanın bəzi yerlərdə arabir yağış yağacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, bəzi şimal və qərb rayonlarında yağıntıların güclənəcəyi ehtimalı var. Gecə və səhər bəzi dağlıq ərazilərdə duman olacaq. Qərb küləyi bəzi yerlərdə arabir güclənəcək.

Havanın temperaturu gecə 20-25° isti, gündüz 32-37° isti, dağlarda gecə 11-16° isti, gündüz 18-23°, bəzi yerlərdə 25-29° isti olacaq.

Paytaxtda nəqliyyat vasitələrinin hərəkətinin məhdudlaşdırıldığı ərazilərdə yerləşən ictimai iaşə obyektlərinə, istirahət məkanlarına və parklanma məntəqələrinə əlçatanlığın təmin edilməsi məqsədilə ödənişsiz şatllar istifadəyə verilib.

Bu barədə Azərbaycan Yerüstü Nəqliyyat Agentliyindən (AYNA) məlumat verilib.

Bildirilib ki, yeni şatllardan biri - C1 nömrəli mikroavtobus Xaqani bağı ilə Zərifə Əliyeva küçəsinin sonunu, C2 nömrəli mikroavtobus isə Sabir bağı ilə Əziz Əliyev küçəsinin sonunu əlaqələndirir.

Şatllar sərnişinlərin rahat və operativ hərəkətini təmin etmək üçün 7-10 dəqiqə hərəkət intervalı ilə fəaliyyət göstərir.

Qeyd edək ki, istifadəyə verilən şatllar ekoloji cəhətdən təmiz nəqliyyat vasitələridir və şəhərdə dayanıqlı mobillik prinsiplərinin təşviqinə xidmət edir.

Həyata keçirilən bu yenilik mərkəzdə piyadayönümlü və əlçatan şəhər mühitinin təmin edilməsi ilə yanaşı ziyarətçilərin rahat hərəkəti üçün əlavə imkanlar yarаdır.

Qeyd edək ki, istifadəyə verilən şatllar bu mərhələdə yalnız həftəsonları, bayram günləri saat 12:00-dan 00:00-dək çalışacaq.

Nicat Əhmədov İL MMC-də işləyib. Anaxeber.info.az-a müraciət edən vətəndaşın sözlərinə görə, şirkətin "Malyuk" uşaq qidaları şöbəsində 5 il fəaliyyət göstərib.

Nicat Əhmədov bildirib ki, bu müddətdə müqaviləsiz işləyib: "Dəfələrlə dedim ki, müqavilə bağlansın, amma etmədilər. Sonra heç bir səbəb olmadan mənimlə işləməyi dayandırdılar. İyulun 1-dən etibarən işləmirəm. Ancaq mənə 1500 manata yaxın ödənişləri qalıb.

Amma bu pulu vermirlər".
Vətəndaş İL MMC-dən maaşını istəyir və aidiyyatı qurumlara müraciət edəcəyini bildirir. Nicat Əhmədov Əmək Müffətişliyi, Dövlət Vergi Xidmətindən köməklik göstərilməsini xahiş edir.
Qeyd edək ki, İL MMC-nin direktoru Arzu Salamdır. O, bu ilin mayından sözügedən vəzifənin icrasına başlayıb.

Anaxeber.info.az

Rayonlarda fərdi təsərrüfatlarda Dövlət Aqrar İnkişaf Mərkəzlərinin tabeliyində olan Baytarlıq Xidmətinin əməkdaşları tərəfindən süni mayalanma xidmətinin göstərilməsi üçün heyvan sahiblərindən 50 manat vəsait alınması ilə bağlı ciddi narazılıqlar var.
Süni mayalanma tədbirlərinin həyata keçirilməsi üçün dövlət büdcəsindən vəsait ayrıldığı halda fermerlərin əlavə ödəniş etməyə məcbur qalması qəbuledilməzdir. Dövlət dəstəyi fermerin yükünü azaltmalı olduğu halda, bəzi yerlərdə vəziyyət tam əksinədir.
Kəndlinin və fermerin hesabına əlavə gəlir əldə edilməsi cəhdləri aqrar sahədə aparılan dövlət siyasətinə və ayrılan büdcə vəsaitlərinin məqsədinə ziddir. Bu cür halların qarşısı alınmalı, məsul şəxslərin fəaliyyəti ciddi nəzarətdə saxlanılmalıdır.
Razi Abasbəyli
TEREF