Dini Qurumlarla İş üzrə Dövlət Komitəsinin tabeliyində fəaliyyət göstərən Mənəvi Dəyərlərin Təbliği Fondu tərəfindən keçirilən tender müsabiqəsinin qalibi “Laguna Group” MMC (VÖEN – 1004604201) olub.

Yeniavaz.com xəbər verir ki, müsabiqənin şərtinə görə, “Laguna Group” MMC Mənəvi Dəyərlərin Təbliği Fondunun sifarişi əsasında xaricdə yaşayan Azərbaycan əsilli din xadimlərinin ölkəmizə səfərini təşkili edəcək və qarşılığında 122 min 180 manat 23 qəpik alacaq.

Məlumat üçün bildirək ki, ümumilikdə 52 nəfər Azərbaycan əsilli din xadiminin ölkəyə səfəri nəzərdə tutulub. Bunların 32 nəfəri Türkiyədən, 10 nəfəri Gürcüstandan, 5 nəfəri Dağıstandan (Rusiya), 5 nəfəri isə İraqdan gələcək.

Qeyd edək ki, “Laguna Group” MMC 15 fevral 2017-ci ildə dövlət qeydiyyatına alınıb. Nizamnamə kapitalı 10 manat olan MMC-nin hüquqi ünvanı Bakı şəhəri, Binəqədi rayonu, Əcəmi Naxçıvani ev 27, m. 102-də yerləşir. Qanuni təmsilçisi isə Əsgərov Ramil Əsgər oğludur. Dövlət qurumlarının keçirdiyi çoxsaylı tender müsabiqələrinin qalibi olan “Laguna Group” MMC-nin hazırda dövlət büdcəsinə 5 min 272 manat 64 qəpik vergi borcu da var.

Onu da bildirək ki, 26 oktyabr 2011-ci il tarixində Binəqədi rayonu, Əcəmi Naxçıvani ev 27, m. 102 ünvanında daha bir şirkət – “My Vings” MMC (VÖEN – 1002351891) dövlət qeydiyyatına alınıb və bu şirkətin qanuni təmsilçisi Rəfiyev Müzadil İlqar oğludur.

Rəfiyev Müzadil İlqar oğlu xarici işlər nazirinin müavini Rəfiyev Yalçın İlqar oğlunun qardaşıdır. Hazırda xarici işlər nazirinin müavini olan Yalçın Rəfiyev də Binəqədi rayonu, Əcəmi Naxçıvani ev 27, m. 102 ünvanında qeydiyyatda olub.

Dövrü mətbuatda yayılan məlumatlara görə vaxtı ilə “Azərbaycan Meliorasiya və Su Təsərrüfatı” Açıq Səhmdar Cəmiyyəti kimi tanınan,  hazırda isə “Regional Su Meliorasiya Xidməti”  kimi fəaliyyətini davam etdirən qurumda bir sıra struktur dəyişikliyi olmasına baxmayaraq qurumun sabiq sədri Əhməd Əhmədzadənin toxunulmazlıq statusu verdiyi bir çox şəxslər hələ də vəzifələrinin başındadı. Hansı ki, hazırda Azərbaycan Dövlət Su Ehtiyatları Agentliyinin sədri olan Zaur Mikayılov artıq klanlaşmış belə kadrları yerindən tərpətməyə aciz qalıb. Onların bəziləri hazırda sədrin müavini vəzifəsini daşıyanların qohumları, yaxınlarıdı. Bəziləri isə dövlət vəsaitlərinin talan edilməsi hesabına var-dövlət, güc sahibi olmuşlardı.

Onlardan bir çoxu uzun illər Ə.Əhmədzadənin müavini olmuş Zakir Quliyevin qohumları, bəziləri da onun himayəsi ilə vəzifədə qalanlardır. Zakir Quliyevə yaxınlığı ilə tanınanlar biri də, uzun illər bu sahədə vəzifə tutmuş Mafizət Cəfərovdur.

Mafizət Cəfərov uzun illər Qobustan qəsəbəsi ərazisində yerləşən Pirsaat Qış Otlaqları Su Təminatı Sistemlərinin İstismarı İdarəsinə rəhbərlik edib. 2021-ci ilin oktyabrından 2024-cü ilin sentyabr ayına qədər Hacıqabul Su Meliorasiya Sistemlərinin İstismarı İdarəsinin rəisi olub. Bundan sonra Mafizət Cəfərov Aşağı Muğan Meliorativ Sistemlərinin İstismarı İdarəsinin rəisi təyin edilib.

Zakir Quliyevin himayəsi ilə vəzifədən vəzifəyə keçən Mafizət Cəfərov Hacıqabul,  Şirvan şəhərində və ətraf rayonlarda hamının yaxşı tanıdığı bir oliqarxa çevrilib. Yəni Şirvan-Salyan zonası onun nəzarət dairəsindədir. Vaxtılə gözdən uzaq Qış Otlaqlarının Su Təminatı Sistemləri İstismarı İdarəsinə rəhbərlik etdikdə fermerləri susuz qoyub özünə aid yüzlərlə hektar torpaqlardan əldə etdiyi gəlirlər hesabına milyonlar qazanan Mafizət Cəfərov indi də Aşağı Muğan Meliorativ Sistemlərinin İstismarı İdarəsində istədiyini edir. Azərbaycan Dövlət Su Ehtiyatları Agentliyinin sədri Zaur Mikayılov da onun bütün əməllərinə göz yumur.

Qeyd edək ki,Aşağı Muğan Meliorativ Sistemlərinin İstismarı İdarəsi Salyan şəhərində yerləşir. Böyük işçi qüvvəsi olan İdarənin balansında həm də xeyli xüsusi təyinatlı texnika var.İdarənin saxlanılması üçün dövlət büdcəsindən hər il milyonlarla manat dövlət vəsaiti ayrılır.

Aktualinfo.net rəsmi mənbələrdən bununla bağlı bəzi maraqlı məlumatlar toplaya bilib. Dövlət satınalmalarının vahid internet portalı üzərindən apardığımız araşdırmada məlum oldu ki, Aşağı Muğan Meliorativ Sistemlərinin İstismarı İdarəsi hər il nasos stansiyalarında və digər qurğularda quraşdırılmış avadanlıqların təmiri işləri üçün tikinti materiallarının, nasos stansiyalarında hidromexaniki və elektrotexniki avadanlıqlar üçün mal-material və ehtiyyat hissələrinin, nasos stansiyalarında, subartezian quyularında və digər qurğularda quraşdırılmış avadanlıqların cari təmiri işləri üçün mal-materialların, nəqliyyat vasitələri üçün ehtiyyat hissələrinin, maşın – mexanizmlər və nəqliyyat vasitələri üçün ehtiyat hissələrinin, hidromexaniki avadanlıqlar üçün ehtiyyat hissələrinin, yağ-sürtkü mallarının təmir tikinti işləri üçün tikinti materiallarının satın alınması üzrə dəyəri yüzminlərlə manat olan tenderlər keçirir.

Mafizət Cəfərovun Aşağı Muğan Meliorativ Sistemlərinin İstismarı İdarəsinin rəisi vəzifəsinə keçdikdən sonra bağladığı müqavilələr araşdırılarsa bir şox şübhələrə aydınlıq gələr.

Aşağı Muğan Meliorativ Sistemlərinin İstismarı İdarəsi maşın mexanizmlər və Torpaqqazan üçün ehtiyyat hissələrinin satın alınması üzrə “ALİYEV MOTORS COMPANY” MMC ilə 54.886,52 manat dəyərində müqavilə bağlamağı planlaşdırır. Satınalmalaır portalına yerləşdirlimiş məlumata görə Aşağı Muğan Meliorativ Sistemlərinin İstismarı İdarəsi 2025-ci ilin iyul ayında Maşın – mexanizmlər və nəqliyyat vasitələri üçün ehtiyat hissələrinin satın alınması üzrə 51.802 manat dəyərində “ALİYEV MOTORS COMPANY” ilə, nəqliyyat vasitələri üçün ehtiyyat hissələrinin satın alınması üzrə 23.385,2 manat dəyərində fiziki şəxs Şamo Əlişiraz oğlu Qurbanovla bağlayıb.

Aşağı Muğan Meliorativ Sistemlərinin İstismarı İdarəsi 28.07.2025-ci ildə nasos stansiyalarında hidromexaniki və elektrotexniki avadanlıqlar üçün mal-material və ehtiyyat hissələrinin satın alınması üzrə “A+H TƏMİR TİKİNTİ” MMC ilə 91.074,17 manat dəyərində müqavilə bağlayıb.

Qeyd edək ki, Mafizət Cəfərov Aşağı Muğan Meliorativ Sistemlərinin İstismarı İdarəsin rəisi keçdikdən cəmi bir ay sonra “A+H TƏMİR TİKİNTİ” MMC ilə Torpaq qazan mexanizmlərin (ekskovator, buldozer) və nəqliyyat vasitələri üçün ehtiyat hissələrinin satın alınması üzrə 76.947,8, təmir tikinti işləri üçün tikinti materiallarının satın alınması üzrə 56.752,1, nasos stansiyalarında elektrotexniki avadanlıqlar üçün mal-materialların satın alınması üzrə 20.000 manat dəyərində üç müqavilə bağlamışdır.

Qeyd edək ki, Mafizət Cəfərov bu şirkətlə Hacıqabul Su Meliorasiya Sistemlərinin İstismarı İdarəsinin rəisi olduğu dövrdə də işbirliyində olub.

Bundan əlavə Mafizət Cəfərov Hitachi Zx210 ekskovatorunun əsaslı təmiri üzrə xidmətlərin satın alınması üzrə 25.11.2024-cü ildə “AVTO TEXNİKA DETALİNG” MMC ilə 63.720 manat dəyərində müqavilə bağlayıb. Bir ədəd ekskovatorun təmirinə ayrılan bu vəsaitin şişirdildiyi açıq aydın görsənir.

Hidromexaniki avadanlıqlar üçün ehtiyyat hissələrinin satın alınması üzrə “KM SERVİCES” MMC ilə bağlanmış 85.757,99 manat dəyərində müqavilənin də arxasında şübhəli məqamlar çoxdur.

Belə ki, bir qayda olaraq idarədə ehtiyyat hissələri texnikaları işlədən sürücülərin özlərinə tapşırılır. (Bu qayda keçmiş “Azərbaycan Meliorasiya və Su Təsərrüfatı” ASC-də  hazırda isə “Regional Su Meliorasiya Xidməti”ndə uzun illərdir yazılmamış qanundur)  Çünki, idarənin rəisi Mafizət Cəfərov onlara gün ərzində muzdlu işlərdə çalışmağa şərait yaradır. Odur ki, nəqliyyat vasitələri üçün ehtiyyat hissələrinin satın alınması üzrə keçirilən tenderin formal olduğu, hər şeyin sadəcə kağız üzərində aparıldığı buradan bəlli olur. Bunun üçün elan vermək, tender keçirmək formal xarakter daşıyır.

Qeyd edək ki, Hesablama Palatası tərəfindən 2025-ci ildə açıqlanmış  bülleteninin 2024-cü il üzrə dördüncü nömrəsində bəzi dövlət qurumlarında keçirilmiş auditin nəticələrini açıqlayıb. Bu qurumlardan biri də Azərbaycan Dövlət Su Ehtiyatları Agentliyinin tabeliyində olan müəsisələrlə bağlıdır. “Sabirabad və Salyan rayonlarında qış otlaqlarında suvarma və drenaj obyektlərinin tikintisi” layihəsi çərçivəsində ayrılmış 27,8 milyon manatlıq vəsaitin yalnız bir hissəsi üzrə effektiv nəticələr əldə olunub-məlumatda bildirilir.

Maraqlıdır, Hesablama Palatası və digər təfdiş orqanları 30 ildən çoxdur meliorasiya və su təsərrüfatı sistemində çalışmış, bir növ bu sahədə toxunulmazlıq statusu almış Mafizət Cəfərov əvvəlki işlərini demirik, elə Aşağı Muğan Meliorativ Sistemlərinin İstismarı İdarəsində də yoxlama aparsa daha nə kimi nöqsanlar üzə çıxara bilər.

Yuxarıda qeyd etdiyimiz kimi, Mafizət Cəfərov meliorasiya və su təsərrüfatı sistemində gəlmiş -getmiş bir çox rəislər arasında xüsusilə fərqlənən şəxsdir. Onu Şirvan şəhərində və ətraf rayonlarda bir oliqarx kimi tanıyırlar. Bu rayonlarda fermer təsərrüfatları, fermaları, ət kəsimi mağazaları, restoranları var. Bakı şəhərində isə bəlkə də ünvanlarını unutduğu saysız hesabsız evləri var. Bütün bunlara isə təbii ki, vəzifə başında oturduğu idarələrdən əldə etdiyi gəlirlər hesabına sahib olub. Azərbaycan Dövlət Su Ehtiyatları Agentliyinin sədri olan Zaur Mikayılov da müavini Zakir Quliyevin bu kadrına gözün ütündə qaşın var demir.

Qeyd edək ki, məqalədə göstərilənlərə aydınlıq gətirilməsi məqsədi ilə iki həftə əvvəl Aşağı Muğan Meliorativ Sistemlərinin İstismarı İdarəsinin elektron poçtuna ünvanladığımız məktuba cavab gəlmədi. İdarənin baş mühasibi, Satınalma Komissiyasının üzvü Zalış Bünyatovla əlaqə saxlamaq cəhdlərimiz baş tutmadı. Baş mühasib işləməyən telefonu satınalmalarda əlaqələndirici şəxs kimi təqdim edir. Mafizət Cəfərov isə tender adı eşidəndə sözümüzü kəsərək qışqır-bağır salıb telefonu söndürdü. Buna baxmayaraq qarşı tərəf kimi mövqelərini dərc etməyə hazırıq.

Aktualinfo.net

Son vaxtlar paytaxtın Nəsimi rayonunda qanunsuz tikililərin sayı gözçarpacaq dərəcədə artmışdı. Belə ki, Nəsimi rayonunda qanunsuz tikililərin vüsət aldığı vaxt rayon icra başçısı vəzifəsinn boş qaldığı vaxtlara təsadüf edirdi. Bununla bağlı cumhuriyyet.az olaraq xatırladaq ki, təxminə iki ilə yaxın bir zamanda Nəsimi rayonunda icra başçısı vəzifəsi boş qaldı. Bunun ardınca prezidentin təyin etdiyi icra başçısı isə sahaibkarlardan pul tələb etdiyinə görə cəmi bir ay vəzifəsində qala bildi.

Daha sonra bu il fevral ayının 9-da Prezidentin sərəncamı ilə Tahir Budaqov Dövlət Statistika Komitəsinin sədri vəzifəsindən azad edilərək Bakı şəhəri Nəsimi Rayon İcra Hakimiyyətinin başçısı təyin edildi. Tahir Budaqov ictimai-siyasi çevrədə kifayət qədər tanınmış şəxs, YAP sədrinin müavini – Mərkəzi Aparatın rəhbəridir. Buna görə, düşünmək olardı ki, onun icra başçılığı dönəmində Nəsimi rayonunda qanunsuz tikintilərə son qoyulacaq. Amma təəssüf ki, bu ümidlər doğrulmur.

T.Budaqovun rəhbər olduğu rayonda nəinki qanunsuz tikinti marafonu start götürüb, hətta bunun üçün kütləvi ağac kəsiminə belə göz yumulur. Nəsimi rayonu, Moskva prospekti, 20 yanvar metrosundan Şamaxinka adlanan məkana gedən yolun sağında bir gecədə 20-dək ağac kəsilib. Bununla bağlı, ərazidə yaşayan sakinlərin cumhuriyyet.az-a bildirdiyinə görə, ağacların kəsildiyi yerdə obyekt tikilməsi nəzərdə tutulur. Qeyd edək ki, bu tikintinin icazəsi barədə Dövlət Şəhərsalma və Arxitektura Komitəsinin bazasında heç bir məlumat yoxdur. Dövlət Komitəsindən rəsmi icazəsi olmadan aparılan tikinti işlərini Nəsimi icra hakimiyyətinin “razılığı “əsasında aparıldığı iddia olunur.(Cumhuriyyet.az)

Qurumların fikirlərini dərc etməyə hazırıq

Həmin görüntüləri təqdim edirik:

Atçılıq üzrə peşəkar çapar Gülay Fərzəliyeva bir ildir bütün idman yarışlarından kənarlaşdırılıb.

“Qafqazinfo”nun əldə etdiyi məlumata görə, 17 yaşlı idmançı hazırda heç bir yarışda iştirak edə bilmir.

Gülayın yarışlardan uzaqlaşdırılmasının səbəbi isə atası barəsində başlanmış cinayət işi ilə əlaqələndirilir. Vüsal Fərzəliyev bir il əvvəl bir qrup şəxslə birlikdə həbs olunub. Ona qızının işlədiyi atçılıq kompleksindən yəhərlər və başqa əşyalar satılıb. Sonradan isə həmin əşyaların oğurluq olduğu üzə çıxıb. Özünü təqsirli hesab etməyən V.Fərzəliyev cinayət məsuliyyətinə cəlb edilib. 8 ay həbsdə qaldıqdan sonra ev dustaqlığına buraxılıb, indi isə məhkəmə araşdırması davam edir.

Gülay uzun illər ərzində atçılıq üzrə peşəkar hazırlıq keçərək müxtəlif fəndlərə yiyələnib. Bir il əvvələ qədər Dövlət Sərhəd Xidmətinin (DSX) Atçılıq Kompleksində hazırlaşaraq müxtəlif yarışlara çıxıb.

“Qafqazinfo” məsələ ilə bağlı Gülay Fərzəliyevanın özü ilə əlaqə saxlayıb. Çapar saytımıza açıqlamasından yarışlarda iştirak edə bilmədiyini təsdiqləyib və bundan çox məyus olduğunu bildirib: “DSX-nin rəisi general-polkovnik Elçin Quliyevin də məsələdən xəbəri var. Mən özüm Azərbaycanda qalmaq istəyirəm. Buna baxmayaraq, başqa ölkələrdən də mənə təkliflər var. Sadəcə atamın cinayət işinin idman fəaliyyətimə təsir etməsi məni narahat edir. Çünki hələ qanuni qüvvəyə minmiş məhkəmə hökmü yoxdur. Proseslər tez-tez təxirə salınır, məhkəmənin neçə aya başa çatacağı da məlum deyil. Amma mən bu müddətdə yarışlardan kənarda qalmaq istəmirəm. Artıq yeniliklər öyrənmişəm. Əvvəllər at üzərində manevrlər edirdimsə, indi konkur idmanında özümü peşəkar idmançı hesab edirəm. İstəməzdim ki, hansısa bir iş ucbatından karyerama kölgə düşsün. Tutaq ki, atam axırda təqsirli bilindi. Burada mənim nə günahım var? Artıq neçə aydır işimdən uzağam. Yenidən qayıdıb-qayıtmayacağım da naməlumdur. Uşaqlıqdan illərimi idmana həsr etmişəm, hər günümü at çapmaqla keçirmişəm. Ümid edirəm ki, bu məsələ tezliklə həllini tapacaq”.

Hazırda gənc idmançının əsas istəyi yarışlara qayıtmaq, turnirlərdə bacarıqlarını nümayiş etdirmək və yenidən Azərbaycan bayrağını qaldırmaqdır.

Məsələ ilə əlaqədar Azərbaycan Atçılıq Federasiyasına da sorğu ünvanlamışıq.

Qeyd edək ki, Gülay 4 yaşından at çapır. 9 yaşında olarkən DSX rəisi və Azərbaycan Atçılıq Federasiyasının prezidenti Elçin Quliyev onunla görüşüb, peşəkar məşqlərə cəlb olunması, lazımi avadanlıqla təmin edilməsi və məşq şəraitinin yaradılması barədə tapşırıq verib. O, çoxsaylı yarışlarda iştirak edib, birinci və ikinci yerləri tutub.

Hər saniyənin bir insan ömrünə bərabər olduğu o dəhşətli məqamda qulağımız səsdə olur.

Küçədən gələn o kəskin, ümidverici siqnal səsini gözləyirik. Çünki o səs ölümün caynağından qoparılacaq bir canın, yenidən həyata dönəcək bir ananın, atanın, övladın xilası deməkdir. Amma Sumqayıtda bu səs getdikcə daha çox ümidsizliyin, çarəsizliyin və fəlakətin simvoluna çevrilir. Çünki şəhərin təcili tibbi yardım sistemi bu gün sözün əsl mənasında iflic durumdadır. İnsan həyatının üzərində oyun oynanılması, saniyələrin bürokratik laqeydliyə qurban verildiyi bir mənzərə ilə üz-üzəyik. Bu mənzərə sadəcə texniki bir nasazlıq deyil, bu, birbaşa insan faktoruna, vətəndaşın yaşamaq hüququna qarşı göstərilən ən böyük biganəlikdir.

Bu qızmar yay günlərində, temperaturun kölgədə belə dözülməz həddə çatdığı bir vaxtda Sumqayıt küçələrində hərəkət edən o ağ rəngli maşınlar əslində birər "təkərli cəhənnəm"ə çevrilib. Təsəvvür edin, insult keçirən, infarktın biraddımlığında olan və ya qızdırmadan qovrulan bir xəstəni çağırışa gələn, amma içində kondisioneri işləməyən, havasızlıqdan nəfəs almağın belə möcüzə olduğu bir avtomobilə mindirirlər. Ağır vəziyyətdə olan bir insanı xilas etməli olan tibbi nəqliyyat, onu xəstəxanaya çatdırmamış vəziyyətini daha da pisləşdirir. Yay fəslinin bu amansız istisində kondisionersiz işləyən təcili yardım maşını tibbi xidmət yox, işgəncə alətidir. Bu rəzalətin baiskarları heç bir anlıq öz doğmalarını o bürkülü, havasız dəmir qutuların içində təsəvvür edirlərmi?

Məsələ təkcə kondisionerin işləməməsi ilə də bitmir; problem kökündən çürüyüb. Təcili yardımın avtomobil parkı yararsız, texniki baxımdan tamamilə bərbad vəziyyətdədir. Şəhərin bir ucundan digər ucuna can qurtarmağa tələsməli olan maşınlar hər an yolda qala biləcək qədər köhnə və baxımsızdır. Və ən dəhşətlisi, ən rüsvayçı məqam bilirsiniz nədir? Bu texniki nasazlıqların, təmir xərclərinin dövlət büdcəsindən, aidiyyəti qurumların ayırdığı vəsaitlərdən deyil, gecə-gündüz sükan arxasında can qoyan sürücülərin öz cibləri hesabına ödənilməsidir. Sürücü dövlətin maşınını işlətmək, çağırışa vaxtında çatmaq üçün öz evinin ruzisini, uşağının boğazından kəsdiyi pulu o nasaz avtomobillərin təmirinə xərcləməlidir. Bu hansı sistemin, hansı idarəetmənin məntiqidir? Təminatın sıfır dərəcəyə endiyi, məsuliyyətin isə tamamilə fəhlənin, sürücünün çiyninə yıxıldığı bir yerdə hansı keyfiyyətli tibbi yardımdan danışmaq olar? Sürücü maşının xarab olan hissəsini haradan və necə düzəldəcəyini düşünməlidir, yoxsa xəstəni vaxtında çatdırmağı? Bu, açıq-aşkar sistem daxili bir talançılığın və ya dözülməz bir bacarıqsızlığın göstəricisidir.

İndi haqlı bir sual ortaya çıxır: Bu sahəyə cavabdeh olanlar, bu sistemin başında oturanlar hara baxır? Sumqayıt Tibb Mərkəzinin direktoru Elnur Azadxanov hara baxır? Bu qədər şikayətin, bu qədər fəryadın müqabilində susmaq, heç bir tədbir görməmək nə deməkdir? Rəhbərlik etdiyiniz sahədə sürücülər öz cibinin vəsaiti ilə maşın təmir etdirirsə, xəstələr istidən boğulursa, çağırışlar saatlarla gecikirsə, siz o kürsüdə hansı haqla, hansı vicdanla əyləşirsiniz? İnsan faktoru olan, birbaşa canla, qanla işləyən bir sahəyə bu qədər soyuqqanlı, bu qədər biganə yanaşmaq sadəcə vəzifə səhlənkarlığı deyil, bu həm də mənəvi məsuliyyətsizlikdir. Hər bir gecikən çağırış, hər bir yolda qalan təcili yardım maşını itirilən bir şans, sönən bir həyat deməkdir. Sumqayıt kimi böyük və sənaye şəhərində səhiyyənin bu strateji qolunu bu günə salmaq, vətəndaşı taleyin ümidinə buraxmaq deməkdir.

Vətəndaşın vergisi ilə formalaşan büdcənin, səhiyyə islahatlarının, icbari tibbi sığortanın pafoslu hesabatlarının fonunda Sumqayıt təcili yardımının bu acınacaqlı vəziyyəti acı bir reallıq kimi üzümüzə çırpılır. Kağız üzərində hər şey gözəl, hesabatlarda rəqəmlər heyranedici ola bilər, amma reallıq Sumqayıtın küçələrində yolda qalan, kondisioneri işləməyən, sürücüsünün dilənçi kökündə təmir etdirdiyi o ağ rəngli maşınlardadır. Bu biganəliyə artıq son qoyulmalıdır. Səhiyyə rəhbərliyi və şəxsən Elnur Azadxanov bu rüsvayçılığa aydınlıq gətirməli, sürücülərin haqlı narazılığı, maşınların texniki durumu və ən əsası xəstələrin can təhlükəsizliyi təcili olaraq həllini tapmalıdır. Çünki heç kimin laqeydliyi, heç bir məmurun biganəliyi bir insanın həyatından daha dəyərli deyil və ola da bilməz.

Əli Səfərli,

NOCOMMENT.az

"Özüm həkim olduğum üçün dövlətin tibbi sığortasından heç vaxt nə özüm nə ailə üzvlərim üçün indiyədək istifadə etməmişdim. Amma, gün gəldi o bəla xətləlik bizim evdə də peyda oldu. (
Yenə də sığortasız ölkənin ən bahalı və ən qalmaqallı özəl xəstəxanasına müraciət etdik, o sahə üzrə ən tanınmış uzman həkimə görə! İlk əməliyyatın xərcini çəkə bildik, ikinci əməliyyat 13-15 min manat dəyərində olduğu üçün dövlət xəstəxanasına üz tutmalı olduq, 3-4 dəfə ucuz xərclə əməliyyatı həll etdik. Əlbəttə burda əlin cibində olmasa gülər üzlü personal görməzsən!
Kino burdan sonra başlayır, üz tutursan tibbi sığorta ilə müayinələrdən keçməyə!
Mərkəzi neftçilər xəstəxanasında filan müayinəyə yanvar ayına qədər növbədir, KT müayinəsi 100 manatlıq işi 18 manata görür amma müayinənin diskini vermir, deyir “arxada Kamil marketdən disk al gətir” )) 1 manatlıq diskə görə 2-3 gün get-gələ düşürsən.
Nizami tibb mərkəzində “ müayinəni Almaniyadakı həkimə göndəririk, cavabı o yazır” deyəndə sevinirsən, amma cavabı götürəndə məlum olur ki, orqanların bəzisinə baxmayıb, hətta əməliyyatla çıxarılan orqanı da “görüb”, “ divarları qalınlaşmayıb “ yazıb. Soruşanda da cavab olur ki “ sistem xətasıdır” . Əlbəttə kompyuter sisteminin yox, siyasi sistemin xətasıdır!
Poliklinikada isə məlum olur ki, həkim heç bir sənədi elektron sistemdə görə bilmir, qayıdırsan başdan ayağa keçdiyin bütün müayinələrin kağızlarını toplayıb poliklinikaya daşımağa. Hətta dünən MRT-dən keçdiyin orqanın bu gün də KT dən keçməli olduğunu deyirlər!
Mən həkim olduğum üçün bu labirintlərdən, tələlərdən birtəhər keçə bilirəm. İndi həkim olmayanların zülmündən, yolaverdi və yarımçıq müalicəsindən kim yazsın?"
Elnur Yusubov.

Gəncə Dövlət Universitetinin bir qrup professor-müəllim heyəti adından Azərbaycan Respublikasının Maliyyə Naziri Sahil Babayevə və Elm və Təhsil Naziri Emin Əmrullayevə ünvanlandığı bildirilən müraciətdə ali təhsil müəssisəsində baş verdiyi iddia olunan qanunsuzluqlar, maliyyə pozuntuları və kadr siyasəti ilə bağlı narahatlıqlar ifadə olunub.
Müraciət müəllifləri universitetdə idarəetmə, qəbul planlarının müəyyənləşdirilməsi, kadr təyinatları və maliyyə məsələləri ilə bağlı bir sıra ciddi iddialar irəli sürərək, aidiyyəti dövlət qurumlarından obyektiv araşdırma aparılmasını xahiş ediblər.
Müraciətdə iddia olunur ki, qəbul planlarının hazırlanması və dəyişdirilməsi zamanı şəffaflıq təmin edilməyib, bəzi ixtisaslar üzrə planlar obyektiv meyarlara deyil, ayrı-ayrı şəxslərin maraqlarına uyğun artırılıb. Həmçinin bəzi fakültə rəhbərlərinin tutduqları vəzifələrə uyğun ixtisasa malik olmadıqları, akkreditasiya zamanı iradlara baxmayaraq vəzifələrində saxlanıldıqları qeyd edilir.
Müraciətdə universitet rəhbərliyinin kadr siyasəti ilə bağlı da narazılıqlar ifadə olunub. Müəlliflərin sözlərinə görə, rəhbər vəzifələrə təyinatlar qanunvericiliyin tələblərinə uyğun aparılmayıb və bəzi təyinatlar mübahisə doğurur.
Professor-müəllim heyəti maliyyə məsələlərinə də toxunaraq bildirir ki, müəllimlər uzun müddətdir əməkhaqlarının artırılmamasından, məzuniyyət ödənişlərinin gecikdirilməsindən və stimullaşdırıcı əlavələrin qeyri-bərabər bölüşdürülməsindən narazıdırlar. Müraciətdə universitetin maliyyə fəaliyyətinin hərtərəfli audit olunması və dövlət vəsaitlərinin istifadəsinin qanunauyğunluğunun yoxlanılması xahiş edilir.
Müraciət müəllifləri həmçinin universitetin nəzdində fəaliyyət göstərən Regional Kollecdə də korrupsiya xarakterli pozuntuların olduğu barədə iddialar səsləndirərək, bu məsələlərin də araşdırılmasının vacibliyini vurğulayırlar.
Sənədin sonunda professor-müəllim heyəti Maliyyə Nazirliyi və Elm və Təhsil Nazirliyindən müraciətdə göstərilən bütün iddiaların obyektiv, hərtərəfli və qanunvericiliyin tələblərinə uyğun araşdırılmasını, qanun pozuntuları təsdiqini tapacağı halda məsul şəxslər barəsində müvafiq tədbirlərin görülməsini xahiş edir.
Qeyd: Bu yazıda yer alan məlumatlar redaksiyaya daxil olmuş müraciətdə əks olunan iddialara əsaslanır. Həmin iddiaların doğruluğu rəsmi qurumlar tərəfindən təsdiqlənməyib. Mövzu ilə bağlı adı çəkilən şəxslərin və Gəncə Dövlət Universitetinin mövqeyini dərc etməyə hazırıq.

Gundemxeber.com

SOCAR-ın Abşeronneft Neft və Qazçıxarma İdarəsinin İstehsalat proseslərinin avtomatlaşdırılması və nəzarət-ölçü cihazları sahəsinin rəisi Gözəlov Xanhüseyn Tahir oğlu şirkətin prezidenti Rövşən Nəcəfə müraciət edib.

Bizimesr.com bildirir ki, müraciətdə SOCAR-a məxsus dəniz özüllərinin və boru xətlərinin qanunsuz şəkildə sökülərək satıldığı, bu proses zamanı Xəzər dənizinin ekoloji vəziyyətinə zərər vurulduğu deyilir.

“Azneft” İstehsalat Birliyi və Abşeronneft NQÇİ-də bəzi vəzifəli şəxslər tərəfindən dövlətə məxsus avadanlıqların, o cümlədən dəniz özülləri və boruların təhlükəli şəraitdə kəsilərək çıxarıldığını müşahidə edib.

Sökülmə işləri zamanı ətraf mühitin mühafizəsi ilə bağlı tələblərə əməl olunmur və bu hallar Xəzər dənizinin çirklənməsinə səbəb olur. O, Dübəndi və Şüvəlan sahillərində qeydə alınan neft ləkələrinin də bu proseslərlə bağlı ola biləcəyini qeyd edib.

“250 saylı Stasionar Dəniz Özülü sökülüb”

250 saylı Stasionar Dəniz Özülünün sökülməsi və 11 saylı estakadada yerləşən 8 düymlük istismara yararlı neft xəttinin kəsilməsi ilə bağlı videogörüntülər mövcuddur. Onun sözlərinə görə, 250 saylı SDÖ-nün sökülməsi 2026-cı ilin yanvar-fevral aylarında, boru xətlərinin sökülməsi isə iyul ayında həyata keçirilib. İstismara yararlı olan dövlətə məxsus boruların sənədləşmə və icazə məsələləri araşdırılmadan kəsilərək ərazidən çıxarılması ilə bağlı tədbir görülməlidir.

“Müraciətlərimdən sonra mənə töhmət verildi”

Xanhüseyn Gözəlov həmçinin SOCAR rəhbərliyinə və digər dövlət qurumlarına idarədə qohumbazlıq, korrupsiya və digər pozuntularla bağlı məlumat verdiyini bildirib. O iddia edir ki, müraciətlərindən sonra ona qarşı təzyiqlər başlayıb və sonuncu xəbərdarlıqla şiddətli töhmət verilib. Müraciətdə qeyd olunur ki, idarə rəhbərliyinə yaxın bir əməkdaş tərəfindən onun barəsində həqiqətə uyğun olmayan məlumatlar yayılıb.

“Araşdırılmadan bağlanır”

Gözəlov SOCAR rəhbərliyinə ünvanladığı müraciətdə bildirib ki, idarədə mövcud olduğunu iddia etdiyi problemlərlə bağlı dəfələrlə müraciət etsə də, nəticə əldə olunmayıb. O, bəzi müraciətlərin SOCAR prezidentinin müşaviri Zaur Qəhrəmanov tərəfindən araşdırılmadan bağlandığını iddia edib.

Sahə rəisi SOCAR rəhbərliyindən dövlət əmlakının qorunması, Xəzər dənizinin çirklənməsinin qarşısının alınması, eləcə də müraciət etdiyi üçün ona qarşı göstərildiyini bildirdiyi təzyiqlərin araşdırılmasını xahiş edib.

Qeyd olunan faktlarla bağlı SOCAR rəhbərliyi narahat deyil.

Bizimesr.com

VİDEOLAR LİNKDƏ: https://www.bizimesr.com/az/post/rovsen-necef-socar-i-sokur---deniz-ozulleri-ve-neft-borulari-qanunsuz-sokulur----videolar-22750

“Servis+” MTK qalmaqalı: Təsisçilər Bakı Kommersiya Məhkəməsinin qərardadına qəti etiraz edirlər -TƏFSİLAT

“Servis+” Mənzil-Tikinti Kooperativi (MTK) ətrafında uzun müddətdir davam edən məhkəmə çəkişməsi yeni mərhələyə keçib. Kooperativin əsas təsisçiləri Bakı Kommersiya Məhkəməsinin son qərardadının qanunsuz olduğunu iddia edərək Ali Məhkəmənin sədri və Məhkəmə-Hüquq Şurasının sədri İnam Kərimova, ədliyyə naziri Fərid Əhmədova, Bakı Apellyasiya Məhkəməsinin sədri Mübariz Əhmədova və digər aidiyyəti dövlət qurumlarına müraciət ünvanladıqlarını bildirirlər.
Təsisçilərin sözlərinə görə, “Servis+” MTK-nın nizamnamə kapitalının 71,2 faizinə sahib olan əsas investorlar təxminən bir il əvvəl kooperativin idarəçiliyindən kənarlaşdırılıblar. Onlar iddia edirlər ki, bundan sonra layihənin keçmiş rəhbəri Arzu Kazımov kooperativ üzərində faktiki nəzarəti ələ keçirib, nəvəsi Kamal Məmmədovu MTK sədri kimi təqdim edərək yaşayış kompleksində mənzillərin satışını davam etdirib.
Müraciətdə qeyd olunur ki, Qaradağ rayonu, Lökbatan qəsəbəsində inşa edilən 8 bloklu, 16 mərtəbəli yaşayış kompleksi ilə bağlı məhkəmə çəkişmələri davam etdiyi halda mənzillərin satışı dayandırılmayıb. Təsisçilər hesab edirlər ki, bu vəziyyət həm onların əmlak hüquqlarının pozulmasına, həm də mənzil alan vətəndaşlar üçün gələcəkdə ciddi hüquqi problemlərin yaranmasına səbəb ola bilər.
Onların bildirdiyinə görə, Bakı Kommersiya Məhkəməsi 2026-cı ilin yanvar ayında iddianın təmin edilməsi tədbiri kimi kooperativdə mənzillərin satışı və digər sərəncam əməliyyatlarının dayandırılması barədə qərardad qəbul edib. Bu qərarın icrası üçün Qaradağ Rayon İcra Şöbəsi tərəfindən müvafiq tədbirlərin görüldüyü, xəbərdarlıqlar edildiyi qeyd olunur.
Təsisçilər iddia edirlər ki, buna baxmayaraq satış prosesi davam edib. Onların sözlərinə görə, icra məmurları tərəfindən aparılan yoxlamalar nəticəsində bu hal müəyyən edilib, Kamal Məmmədov barəsində inzibati protokol tərtib olunub və Qaradağ Rayon Məhkəməsi tərəfindən inzibati məsuliyyət tədbiri tətbiq edilib. Bildirilir ki, sonradan Bakı Apellyasiya Məhkəməsi də həmin qərarı qüvvədə saxlayıb.
Müraciətdə daha sonra qeyd edilir ki, kooperativin ümumi yığıncağında Kamal Məmmədov vəzifədən uzaqlaşdırılıb, Zəka Zeynalov yeni sədr seçilib və bu dəyişiklik dövlət reyestrində də qeydə alınıb. Lakin təsisçilər iddia edirlər ki, dövlət reyestrində qanuni təmsilçi kimi qeydiyyata alınmasına baxmayaraq, Zəka Zeynalov bu günədək kooperativin inzibati binasına daxil ola bilmir və faktiki idarəetməni həyata keçirə bilmir.
Onların sözlərinə görə, bu səbəbdən Bakı Kommersiya Məhkəməsinə müraciət edilərək yeni seçilmiş sədrin fəaliyyətinə maneələrin aradan qaldırılması, kooperativ sənədlərinin mühafizəsi və qanuni idarəetmənin təmin edilməsi üçün müvəqqəti təminat tədbirlərinin görülməsi xahiş olunub. Lakin təsisçilər hesab edirlər ki, məhkəmənin 14 iyul tarixli son qərardadı bu tələbləri təmin etməyərək mövcud vəziyyətin dəyişmədən qalmasına səbəb olub.
Təsisçilər bildirirlər ki, son qərardad məhkəmənin bu ilin yanvar ayında qəbul etdiyi və mənzil satışlarını qadağan edən qərardadla ziddiyyət təşkil edir. Onların fikrincə, bu vəziyyət qanunsuz hesab etdikləri fəaliyyətin davam etməsinə hüquqi zəmin yarada bilər.
Müraciətdə həmçinin iddia olunur ki, Arzu Kazımov və onun vəkili müxtəlif məhkəmə instansiyalarında əlaqələrinin olduğunu bildirirlər. Bu iddialarla bağlı redaksiyamızın müstəqil təsdiqləyici məlumatı yoxdur və adı çəkilən şəxslərin mövqeyi təqdim olunan materialda yer almır.
Təsisçilər hüquq-mühafizə orqanlarını, Məhkəmə-Hüquq Şurasını və digər aidiyyəti dövlət qurumlarını Bakı Kommersiya Məhkəməsinin əvvəlki qərardadlarının icrasının təmin edilməsinə, kooperativin sənədlərinin və əmlakının qorunmasına, mübahisəli mənzil satışlarının dayandırılmasına və qanuni idarəetmənin bərpasına kömək göstərməyə çağırırlar.
Qeyd: Məqalədə yer alan ittiham və iddialar “Servis+” MTK-nın təsisçilərinin müraciətinə əsaslanır. Arzu Kazımovun, vəkili Ruslan Umudovun, Bakı Kommersiya Məhkəməsinin və adı çəkilən digər şəxslərin bu iddialarla bağlı mövqeyi təqdim edilməyib. Onların cavabı daxil olduğu təqdirdə dərc olunmağa hazırdır.(gundemxeber.com)

Bakının Nərimanov rayonu, “Bakmil” metrostansiyasının qarşısında, Ələsgər Qayıbov küçəsində uzun müddətdir aparılan yol-təmir işləri sakinləri və sürücüləri çətin vəziyyətdə qoyub.

Bizimesr.com bildirir ki, bu barədə yazan sözügedən yoldan mütəmadi istifadə edən sakinlər bildirib ki, narazılıq yaradan iş uzun müddətdir yarımçıq vəziyyətdə qalıb. Sakinlər bildirib ki, yolun 2027-ci ildə təhvil veriləcəyi deyilsə də, hazırda ərazidə heç bir tikinti və ya təmir işi aparılmır.

Sakinlərin sözlərinə görə, yolun qazılıb bu vəziyyətdə saxlanılması gündəlik hərəkəti ciddi şəkildə çətinləşdirir. Xüsusilə küləkli havalarda ərazi güclü toz dumanına bürünür, göz-gözü görmür. Yağış yağan zaman isə yol palçığa çevrilir və həm piyadaların, həm də nəqliyyat vasitələrinin hərəkəti üçün ciddi problem yaradır.

Bildirilir ki, yolun ətrafında müxtəlif dövlət və özəl idarələr, eləcə də müəssisələr fəaliyyət göstərir. Həmin müəssisələrdə çalışan əməkdaşlar illərdir davam edən yol tikintisi və təmir prosesinin yaratdığı narahatlıqla üz-üzə qalıblar.

İşə gedib-gəlmək həm vaxt itkisinə, həm də əlavə çətinliklərə səbəb olur. Ərazidən hər gün istifadə edən vətəndaşlar bildirirlər ki, yolun bu vəziyyətdə saxlanılması qəbuledilməzdir.

Onların sözlərinə görə, əgər təmir işlərinə başlanılıbsa və işlər 2027-ci ilə təjvil veriləcəksə, proses yarımçıq saxlanılmamalı, qısa müddətdə başa çatdırılmalıdır. Sakinlər aidiyyəti qurumlardan yolun təmirini sürətləndirməyi, yarımçıq qalan işləri qısa müddətdə yekunlaşdırmağı və ərazidə normal hərəkət şəraitinin bərpa olunmasını xahiş edirlər.

Xatırladaq ki, sözügedən yoldakı işlər Azərbaycan Avtomobil Yolları Dövlət Agentliyi tərəfindən dövlət proqramına əsasən aparılır.(Bizimesr.com)

VİDEO LİNKDƏ: https://www.bizimesr.com/az/post/ayyda-nin-yarim-yapalaq-qoyub-qacdigi-yol----video-22751