Azərbaycanda illərdir həllini tapmayan çoxmərtəbəli binalardakı "kupça" (çıxarış) problemi indi də tikinti şirkətlərinin əlində vətəndaşları açıq şəkildə istismar etmək üçün alətə çevrilib.

Ölkənin ən böyük tikinti şirkətlərindən olan "Kristal" ətrafında növbəti sənəd qalmaqalı yaşanır.

Şirkətin tikdiyi binalarda mənzil sahibi olan sakinlər çıxarış almaq üçün rəsmi rüsumdan dəfələrlə çox pul tələb olunmasından şikayətçidirlər.

Sakinlərin redaksiyamıza verdiyi məlumata görə, şirkət mənzillərin tam ödənişini etmiş və binanın dövlət qeydiyyatı tamamlanmış sakinlərə mülkiyyət hüququnu təsdiq edən çıxarışın (kupçanın) verilməsi üçün 500 manat nağd pul tələb edir. Tikinti şirkəti bu məbləğin sənədləşmə xərcləri üçün nəzərdə tutulduğunu iddia etsə də, rəsmi rəqəmlər tamamilə fərqli mənzərəni ortaya qoyur.

Tarif Şurasının və daşınmaz əmlakın qeydiyyatı haqqında qanunvericiliyin tələblərinə əsasən, yeni tikililərdə mənzilə ilkin kupçanın verilməsi üçün dövlət rüsumu sabit olaraq 50 manatdır. Mənzilin sahəsinə (kvadratmetrinə) və texniki pasportun hazırlanmasına görə tutulan xidmət haqqı da daxil olmaqla, 60–100 kv.m-lik orta statistik bir mənzilin rəsmi sənədləşmə xərci standart müddətdə (15 iş günü) maksimum 100–150 manat arasında dəyişir. Hətta sənədin 3 gün ərzində, sürətli qaydada çıxarılması üçün ödənilən təcili xidmət haqqı belə bu məbləği 200–250 manatdan yuxarı qaldırmır. Bu isə o deməkdir ki, "Kristal" tikinti şirkəti hər sakindən rəsmi dövlət rüsumundan ən azı 2 dəfə artıq pul tələb edir.

Hüquqi baxımdan, tikinti şirkəti sakinə mənzilin tam ödənişinin edildiyinə dair maliyyə arayışı və müqaviləni təqdim etdikdən sonra onun öhdəliyi başa çatmış hesab olunur (əgər daxili müqavilədə əlavə xidmət bəndi yoxdursa). Vətəndaş həmin sənədlərlə birbaşa ASAN Xidmət mərkəzlərinə müraciət edərək dövlət rüsumunu şəxsən ödəməli və kupçasını almalıdır.

Şirkətin prosesi öz üzərinə götürərək sakinlərdən 500 manat kimi astronomik məbləğ tələb etməsi qanunvericiliyin kobud şəkildə pozulması və vətəndaşın seçmək hüququnun əlindən alınmasıdır. Ödənişlərin hansı əsasla və hansı hüquqi sənədlə (kassa mədaxil orderi yoxsa sadə qəbz ilə) yığılması isə ciddi maliyyə sualları doğurur.

Binalarda yüzlərlə, bəzən minlərlə mənzilin olduğunu nəzərə alsaq, hər mənzildən qanunsuz olaraq artıq alınan 350-400 manat yekunda milyonlarla manatlıq böyük bir qara dövriyyənin yaranmasına səbəb olur. Sakinlər bildirirlər ki, şirkət rəhbərliyi bu məbləği ödəməyənlərə sənədləşmə prosesində süni maneələr yaradır, maliyyə arayışlarının verilməsini gecikdirir.

Yazıda adıçəkilən "Kristal" tikinti şirkətinə ünvanlanan suallar cavabsız qalıb.

AFN.az

“Mado” restoranlar şəbəkəsinin Gənclik Mall filialında müştəriyə təqdim edilən şorbadan hamamböcəyi çıxıb.

1xeber.media xəbər verir ki, vətəndaş bununla bağlı bloger Saleh Nəsirova yazıb.

Onun sözlərinə görə, restoran əməkdaşları baş verən hadisəyə görə üzr istəyib və müştəriyə desert təklif ediblər.
“”Mado”da pomidor şorbasından tarakan çıxdı. Hələ də özümə gələ bilmirəm. Oranın artıq zayı çıxıb. Bəlkə ictimailəşsə, özlərini bir az düzəldərlər”, - deyə o bildirib.

1xeber.media

Xaçmaz rayon İcra Hakimiyyəti rayon mərkəzində bir sıra evlərin dam örtüyünü dəyişdirmək qərarına gəlib.

Qurum bununla bağlı tender elan edib.

Məlumata görə, tender çoxmənzilli yaşayış binalarının dam örtüyü və fasadın əsaslı təmiri işlərinin satınalınmasına görə keçirilir. Belə ki, İcra Hakimiyyəti 1.853 kv.metr dam örtüyünün sökülməsi və yenidən qurulması üçün büdcə də ayırıb.

Açıq mənbələrdə qeyd edilir ki, sözügedən sahədə işlərin görülməsi üçün İcra Hakimiyyəti 633 min267 manatlıq büdcə ayırmağa hazır olduğunu bildirib.

Qeyd edək ki, Xaçmaz İcra Hakimiyyəti bir kvadrat metr dam örtüyünün dəyişdirilməsinə 341 manat 75 qəik pul xərcləmək fikrindədir.

Bizmesr.com

Bakının Nərimanov rayonunun Təbriz küçəsində nəqliyyat infrastrukturu ilə əlaqədar genişmiqyaslı işlərə başlanılıb.


“Qafqazinfo” xəbər verir ki, layihə 2025–2030-cu illər üçün nəzərdə tutulmuş Dövlət Proqramına əsasən həyata keçirilir.


Proqrama uyğun olaraq, “Nəriman Nərimanov” metrosunun ətrafında yerləşən obyektlər hasarlanıb. Sözügedən ərazidə 10-a yaxın müxtəlif təyinatlı mağaza və kafe fəaliyyət göstərir. Artıq piyadalar yalnız onlar üçün müəyyən edilmiş yerlərdən istifadə edərək əraziyə daxil ola bilirlər.


Həmin obyektlərin söküləcəyi və onların yerində avtobuslar üçün kiçik mübadilə mərkəzi yaradılacağı bildirilir. Metronun ətrafında yeni piyada keçidləri təşkil olunacaq və kəsintisiz piyada mühiti formalaşdırılacaq.


Hələ söküntü işlərinə başlanılmasa da, obyekt sahibləri artıq bununla bağlı məlumatlar eşitdiklərini qeyd edirlər.


Fotolar: Pərvin Zeynal

Azərbaycanda bəzi bölgələrdə iyunun 30-u və iyulun 1-də gözlənilən küləkli hava şəraiti ilə bağlı sarı xəbərdarlıq verilib.

Bu barədə Milli Hidrometeorologiya Xidməti məlumat yayıb.

Gəncə, Mingəçevir, Goranboy, Samux, Naftalan, Göygöl, Daşkəsən, Gədəbəy, Yevlax, Tərtər, Bərdə, Kəlbəcər, Laçın, Yardımlı, Lerik, Naxçıvan MR-da sarı xəbərdarlığa uyğun olaraq şərq küləyi əsəcək, küləyin sürəti 13.9-20.7 m/san təşkil edəcək.

***

Azərbaycanın rayonlarında iyunun 30-u gündüzdən iyulun 1-i axşamadək bəzi yerlərdə arabir yağış yağacağı, şimşək çaxacağı gözlənilir.

Bu barədə Milli Hidrometeorologiya Xidməti məlumat yayıb.

Ayrı-ayrı yerlərdə yağışın intensiv və güclü olacağı, dolu düşəcəyi ehtimalı var.

Çaylarda sululuğun artacağı, bəzi dağ çaylarından qısamüddətli daşqın və sel keçəcəyi istisna olunmur.

Azərbaycan Dövlət Neft Şirkətinin (SOCAR) balansında olan 12 sot torpaq sahəsini almaq istəyən iş adamı 31 min manat pulundan olub.
Bizimesr.com bildirir ki, bu dələduzluq əməli ilə bağlı iki nəfər cinayət məsuliyyətinə cəlb edilib.
Təqsirləndirilən şəxslər-Səmədov Emil Nadir oğlu və Abasov Rövşən Ziyafət oğlu “Azərbaycan Dövlət Neft Şirkəti”nin balansında olan Binəqədi rayonunun Biləcəri qəsəbəsində yerləşən torpaq sahəsini Elşən Quliyevin adına özəlləşdirə biləcəkləri barədə yalan vəd veriblər. Bu işin həlli üçün isə zərərçəkmiş şəxsdən 31 min manat pul alıblar.
Məhkəmədə Emil Səmədov cinayət əməlinə görə özünü qismən təqsirli bilib. Emil ifadəsində Elşən Quliyevi Rövşən vasitəsilə tanıdığını deyib.
Rövşən ona torpaq özəlləşdirmə ilə bağlı kömək lazım olduğunu bildirib. O da SOCAR-da yüksək vəzifədə işləyən tanışları vasitəsilə bu işi həll edə biləcəyini deyib. Emil zərərçəkmişdən aldığı 31 min manatın 1000 manatını Rövşənə verdiyini, qalanını isə şəxsi ehtiyacları üçün xərclədiyini etiraf edib.

Rövşən Abasov isə bu cinayətdə özünü təqsirli bilməyib. Onun sözlərinə görə, Emilin həqiqətən də yüksək vəzifədə işləyən tanışlarının olduğuna inanıb. Hətta Emil zərərçəkmişə onu sənədləşmə üçün Azərbaycan Dövlət Neft Şirkətinə çağıracaqlarını deyib.
Zərərçəkmiş şəxs özü də məhkəmədə ifadə verib. Elşən Quliyevin sözlərinə görə, Rövşən ona Azərbaycan Dövlət Neft Şirkətinin direktoru Rövşən Nəcəfin qohumu olduğunu deyib. Xüsusilə buna görə onun sözlərinə inanıb. Təqsirləndirilən şəxs isə bu məsələ ilə bağlı düz danışdığını əlavə edib. O, həqiqətən də Rövşən Nəcəfin qohumu olduğunu, lakin direktorun bu işə aidiyyəti olmadığını qeyd edib.
İstintaq müddətində Rövşən Abasov ona çatan 1000 manatı zərərçəkmişə geri ödəyib. Emil isə 30 min manatdan cəmi 8 min manat qaytara bilib.
Yekunda təqsirləndirilən şəxslər ikisi də xeyli miqdarda dələduzluqda təqsirli biliniblər. Nəsimi Rayon Məhkəməsinin hökmü ilə Emil Səmədova 2 il həbs cəzası verilib. Rövşən Abasov isə 5 min manat cərimə cəzasına məhkum edilib.
Bizimesr.com

Fərid Qayıbovun AFFA-ya təsir və nüfuz etmək cəhdləri alınmadıqdan sonra iki qurum arasındakı körpülər yandırılıb

Bununla bağlı Poliqon-nu məlumatlandıran mənbə bildirib ki, Gənclər və İdman naziri Fərid Qayıbovla AFFA rəhbərliyi arasında qarşıdurma və fikir ayrılığı birincinin özünə yaxın adamı AFFA icraiyyə Komitəsinə yerləşdirmək cəhdinin uğursuzluqla nəticələnməsindən sonra başlayıb.

Belə ki, iddiaya görə Fərid Qayıbov Gənclər və İdman Naziriliyinin İdman şöbəsinin müdiri Elnur Məmmədovu AFFA İcraiyyə Komitəsinə üzv seçdirmək istəsə də, AFFA rəhbərliyi buna imkan verməyib. Bundan sonra isə Nazirliklə Futbol cameəsi arasında soyuq müharibə başlayıb.

Mənbə qeyd edib ki, Fərid Qayıbov "Qarabağ"ın UEFA miqyasında olan oyunlarına getsə də, heç bir zaman Azərbaycan millisinin keçirdiyi oyunlara qatılmayıb. Bu da öz-özlüyündə nazirin AFFA ilə gizli mübarizə apardığının göstəricisidir.

Bildirilir ki, bir müddət əvvəl kimsə Fərid Qayıbova məsləhət görüb ki, AFFA ilə əlaəqlərini və təsir imkanlarını bərpa eləməyə çalışsın. Bundan sonra nazir qadın futbolçulardan ibarət Azərbaycan milli komandasının üzvləri ilə görüşüb və bununla da Nazirliyin futbolla bu və ya digər şəkildə maraqlandığını və futbola dəstək verdiyini nümayiş etdirmək istəyib. Lakin bu dəfə də AFFA rəhbərliyi onun bu təşəbbüsünü bir şəkildə bloklayıb. Belə ki, nazir Fərid Qayıbovla görüşə gedən qadın milli futbol komandasını AFFA rəhbərliyindən heç kim müşaiyyət etməyib və bu da Fərid Qayıbova çox pis tədir edib. Necə deyərlər Fərid Qayıbovun AFFA rəhbərliyinə uzatdığı əli havada asılı qalıb.

Mənbə bildirir ki, bundan sonra AFFA ilə Gənclər və İdman Naziriliyi arasında soyuq müharibə daha da güclənib.

Neftçala rayon Şirvanlı kəndi İbrahim Babayev adına tam orta məktəbinin direktoru Rasəf Heydərov təhsil ocağının istilik sistemini sökərək satıb

Bu barədə Şirvanlı kəndinin sakinlərinin redaksiyamızın vatçap xəttinə ünvanladıqları şikayətdə bildirilir.

Sakinlər qeyd edirlər ki, Şirvanlı kəndi İbrahim Babayev adına tam orta məktəbinin uzun illərdir ki, təmirə ehtiyacı var. Məktəbin xaricini ağardıb, rəngləyib müəyyən qədər gözügəlimli eləsələr də, sinif otaqları çox bərbəd vəziyyətdədir. Məktəbin istilik sistemi olsa da, uzun illərdir ki, çalışmır və valideynlər qış aylarında öz hesablarına aldıqları odun-ocaqla sinif otaqlarını qızdırmağa çalışır. Onlar bunu uşaqlarının məktəbdə xəstələnməməsi üçün edirlər.
Məktəbin rəhbərliyi isə bu günə qədər mərkəzləşdirilmiş istilik sisteminin təmir olunması üçün heç bir addım atmayıb. Valideynlərin şikayətinə isə, sadəcə təmir üçün pulun olmadığı bildirilir və hər il bu təkarar olunur.

Təhsil ili başa çatdıqdan sonra isə məktəbin direktoru Rasəf Heydərov məktəbin istilik sistemini söküb, “Kamaz”a yükləyərək harasa daşıyıb. Kənd sakinləri iddia edirlər ki, direktor məktəbin istilik sistemini “metallom” olaraq satıb. Bundan başqa direktor məktəbin həyətindəki su çənlərini və beton plitələri də satıb. Sakinlərin bizə göndərdikləri videomaterialda da bu iddialar faktlaşdırılıb.



Məktəbin istilik sisteminin və digər inventarlarının satılması ilə bağlı sakinlərin sualını cavablandıran direktor Rasəf Heydərov bildirib ki, o Nazirliyin tapşırığına əsasən istilik sistemini satb?! Qeyd edək ki, bu yerli sakinlərin iddasıdır.

Məsələ ilə bağlı Neftçaladan olan bir tanışımızdan bu iddiaları dəqiqləşdirməyi xahiş etdik. Tanışımız direktor Rasəf Heydərovla danışdığını qeyd edərək, onun adından bizə bildirdi ki, doörudan da məktəbin istilik sistemi sökülüb və satılıb. Direktor bunu məktəbin yeni istilik sistemi ilə təmin olunacağı ilə əlaqələndirib və bildirib ki, “metallom”a satılan köhnə istilik sistemindən əldə olunan gəlir də məktəbə sərf olunacaqş Direktor onu da vurğulayıb ki, bu satışdan Şirvan - Salyan Regional Təhsil İdarəsinin rəhbərliyi də məlumatlıdır və onların təlimatına əsasən belə bir addım atıb.

Qeyd edək ki, əlaqə saxladığımız Şirvanlı kənd sakinləri isə direktorun bu açıqlamasına inanmadıqlarını bildiriblər. Onlar qeyd ediblər ki, əgər məktəbdə yeni istilik sistemi qurulacaqdısa, direktor bu barədə onlarla söybətində deyərdi. Ancaq dirrektor bu barədə heç bir şey deməyib və onlarda güman edirlər ki, belə bir şey olsaydı, Rasəf Heydərov onları bu barədə məlumatlandırardı.

Sakinlər bildiriblər ki, sinif otaqları ümumlukdə normal təhsil fəaliyyəti üçün yararsızdır və məktəbin maddi bazası da həddindən artıq köhnəlib. Bu üzdən də məktəbin əsaslı təmirə ehtiyacı var.

“Ona görə də biz düşünürük ki, Rasəf müəllim bütün bunları öz əməlini ört-basdır etmək üçün deyir və öz əməlinə Şirvan - Salyan Regional Təhsil İdarəsinin rəhbərliyini də şərik edir. Bütün hallarda Rasəf müəllimin dedikləri düzdürsə, biz bunu yaxın iki ay ərzində görəcəyik”, deyə bizimlə əlaqədə olan yerli sakinlər bildiriblər.

Biz də öz tərəfimizdən bildiririk ki, avqustun sonlarında bu məsələyə bir daha qayıdacağıq.

Poliqon

Azərbaycan Beynəlxalq Bank yenə müştəriləri həyəcanlandırıb və panikaya salıb.

Sosial mediada ABB kartları ilə bağlı problem yarandığı haqda məlumatlar yayılır. Bildirilir ki, kart hesablarında pulların silinməsi və ya borc göstərilməsi hallarına rast gəlinir.

Bu da müştərilərin narahatlığına səbəb olub. Hazırda bankın çağrı mərkəzi ilə əlaqə saxlamaq da mümkün deyil. Bildirilir ki, növbəti dəfə sistemdə texniki problem yaşanmaqdadır. Bundan əvvəl də müştərilərin hesabından vəsaitin silinməsi halları olmuşdu, texniki problemlər həllini tapandan sonra bərpa olunmuşdu.

Sosial media istifadəçilərinin sözləri görə, sadəcə, ikinci dəfə belə halın təkrarlanması göstərir ki, ABB öz etibarlılığını itirir, reputasiyası zədələnir. Çünki müştərilər üçün bank kartının təhlükəsizliyi ən prioritet məsələdir.(Tribuna.az)

Nəsimi Rayon İcra Hakimiyyəti media nümayəndələrinin rəsmi sorğularını cavablandırmaqdan imtina edib. Bu isə rayonda baş verən hadisələrin araşdırılması və ictimaiyyəti narahat edən məsələlərin aydınlaşdırılması baxımından ciddi suallar yaradır.

Bizimesr.com bildirir ki, Nəsimi rayonu ərazisində aparılan tikinti işləri, o cümlədən qanunsuz olduğu iddia edilən tikintilərlə bağlı dəfələrlə rayon rəhbərliyinə rəsmi sorğular göndərir, amma sorğuların heç birinə cavab verilmir.

Ən təəssüf doğuran məqam isə odur ki, Nəsimi Rayon İcra Hakimiyyətinin başçısı Tahir Budaqov və rayonun memarı Ələsgər Rüstəmov ictimai maraq doğuran suallara münasibət bildirməkdən yayınırlar. Halbuki dövlət qurumlarının fəaliyyəti şəffaf olmalı, media sorğuları isə qanunvericiliyin tələblərinə uyğun olaraq cavablandırılmalıdır.

Rayon ərazisində son dövrlər tikinti işlərinin sürətlə artdığı müşahidə olunur. Bəzi ünvanlarda tikinti lövhələrinin olmaması, icazələrin mövcudluğu ilə bağlı yaranan suallar və vətəndaş müraciətləri araşdırma aparılmasını zəruri edir. Lakin məsul şəxslərin susqunluğu həm mediada, həm də cəmiyyətdə haqlı narazılıq yaradır.

Susmaq problemləri aradan qaldırmır. Əksinə, cavabsız qalan hər sual qanunsuzluqlarla bağlı şübhələri daha da artırır. Dövlət qurumlarının ictimaiyyət qarşısında hesabatlı olması hüquqi dövlətin əsas prinsiplərindən biridir və bu prinsipə əməl olunması hər bir vəzifəli şəxsin borcudur.

Redaksiyamız qarşı tərəfin mövqeyini dərc etməyə hazırdır.

Bizimesr.com