Bakıda fəaliyyət göstərən sahibkar Abbas Nəcəfli İçərişəhər Dövlət Tarix-Memarlıq Qoruğu İdarəsinin qərarları nəticəsində uzun illər ərzində yaratdığı biznes fəaliyyətinin ciddi təhlükə ilə üz-üzə qaldığını bildirir.

E-huquq.az-a müraciət edən sahibkarın sözlərinə görə, son 15 il ərzində İçərişəhərdə yerləşən "Qız Qalası Çay Evi", "Old Mangal" və "Sehirli Təndir" ictimai iaşə obyektlərini icarə müqavilələri əsasında idarə edib.

O bildirir ki, bu illər ərzində həmin obyektlərə böyük həcmdə şəxsi investisiya yatırılıb, əsaslı təmir işləri aparılıb, bahalı avadanlıqlar alınıb, müasir xidmət infrastrukturu yaradılıb və minlərlə yerli sakinlə yanaşı, ölkəmizə gələn xarici turistlər üçün də tanınmış məkanlara çevrilib. Lakin bir müddət əvvəl İçərişəhər Dövlət Tarix-Memarlıq Qoruğu İdarəsi tərəfindən həmin obyektlərin boşaldılması tələb olunub.

A.Nəcəfli deyir ki, ona obyektlərin dövlət layihəsi çərçivəsində istifadə olunacağı bildirilib: "Qoruğun rəhbərliyi mənə bildirdi ki, obyekt dövlət layihəsi üçün lazımdır. Mən də dövlət maraqlarını hər şeydən üstün tutaraq buna razılıq verdim. Sonradan isə gördüm ki, mənim illərlə yaratdığım obyekt - "Qız Qalası Çay Evi" başqa şəxslər tərəfindən istifadə olunur. Obyektin dizaynı, quruluşu və yaratdığım konsepsiya olduğu kimi saxlanılıb, sadəcə kosmetik dəyişikliklər edilib".

Onun sözlərinə görə, bu məsələ ilə bağlı ölkə rəhbərliyinə də müraciət edib: "Cənab Prezident İlham Əliyevə, Birinci vitse-prezident Mehriban xanım Əliyevaya, Prezident Administrasiyasına məktub yazaraq bildirdim ki, məni aldadaraq obyekti əlimdən alıblar. Dövlət layihəsi adı ilə obyekt götürülüb, lakin sonradan şəxsi maraqlar üçün istifadə edilir".

Sahibkar iddia edir ki, "Old Mangal" və "Sehirli Təndir" restoranları üzrə də analoji vəziyyət yaranıb. Əvvəllər mövcud olan uzunmüddətli əməkdaşlıq münasibətləri sonradan 6 aylıq müqavilələrlə əvəz olunub və müddət başa çatdıqdan sonra müqavilələrə xitam verildiyi bildirilib: "Səbəb kimi guya icarə haqqını gecikdirdiyimi göstərirlər. Halbuki mənim icarə haqqı üzrə borcum yoxdur. Mənə 3 gün vaxt verdilər ki, obyektləri boşaldım. Mən qanunun aliliyinə istinad edərək bildirdim ki, yalnız məhkəmə qərarı olduğu halda obyekti tərk edə bilərəm. Bundan sonra heç bir məhkəmə qərarı olmadan obyektlərin elektrik enerjisi kəsildi. Halbuki həmin vaxt restoranlarda həm yerli müştərilər, həm də xarici turistlər var idi".

A.Nəcəfli onu da bildirir ki, obyektlər üzrə icarə müqavilələri əvvəlcə onun adına bağlansa da, sonradan Qoruq İdarəsinin də razılığı ilə tərəfdaşlarının adına rəsmiləşdirilib. Onun sözlərinə görə, "Qız Qalası Çay Evi" Məzahir Məmmədlinin, "Old Mangal" Rauf Abdullayevin, "Sehirli Təndir" isə Nazim Əzizovun adına sənədləşdirilib: "Sadaladığım şəxslər mənim dostlarım, tərəfdaşlarımdır. Məzahir Məmmədli I Qarabağ müharibəsi veteranıdır, ikinci qrup əlildir. Mən adıçəkilən ictimai iaşə obyektlərinin təsisçisiyəm, lakin biz bu məkanları birgə idarə edirik".

O qeyd edir ki, rəhbərlik etdiyi restoranlar İçərişəhərin turistlərin ən çox üz tutduğu ərazilərindən birində yerləşir və illər ərzində ölkə rəhbərliyi, eləcə də xarici dövlət rəsmiləri tərəfindən də ziyarət olunub: "Cənab Prezident, Birinci vitse-prezident dəfələrlə "Sehirli Təndir" restoranımızın qonağı olublar. Eyni zamanda, müxtəlif xarici dövlətlərin yüksəkvəzifəli rəsmiləri və nümayəndə heyətləri də restoranımızda qonaq olaraq xidmətimizdən məmnun qalıblar".

Sahibkarın sözlərinə görə, İçərişəhərdə fəaliyyət göstərən sahibkarların əksəriyyəti formal olaraq qısamüddətli, adətən 6 aylıq icarə müqavilələri imzalasalar da, onlara uzunmüddətli fəaliyyət göstərəcəkləri barədə etimad yaradılıb: "Məhz bu inam nəticəsində sahibkarlar milyonlarla manat olmasa da, böyük həcmdə vəsait xərcləyərək obyektləri bərpa edir, dizaynını qurur, avadanlıq alır, müştəri bazası formalaşdırır və həmin məkanların turizm potensialını artırırlar. Lakin bütün bu investisiyalara baxmayaraq, son vaxtlar müxtəlif bəhanələrlə, hətta "yuxarıdan tapşırıq var" ifadəsi ilə icarə müqavilələrinə xitam verirlər. Müqavilə müddəti başa çatdıqdan sonra icarə haqları artırılır. Məsələn, 6 min manatlıq icarə haqqı 10 min manata, 10 min manatlıq icarə haqqı isə 15 min manata qaldırılır. Artan icarə haqları sahibkarları xidmət və məhsulların qiymətlərini artırmağa məcbur edir. Sahibkarın fəaliyyəti yalnız icarə haqqının ödənilməsindən ibarət deyil. Hər bir ictimai iaşə obyektinin gündəlik fəaliyyəti böyük maliyyə yükü tələb edir. Kommunal xidmətlər, ərzaq məhsullarının alınması, əməkhaqqı fondu, vergilər, sosial ödənişlər, avadanlıqların saxlanılması və digər cari xərclər sahibkarın üzərinə düşür. Bu səbəbdən icarə haqlarının qəfil və əsaslandırılmadan artırılması nəticə etibarilə xidmətlərin qiymətinə də təsir göstərir və həm sahibkara, həm də istehlakçıya əlavə yük yaradır. Qiymətlərin yüksəlməsi restoran və digər obyektlərə gələn müştərilərin, xüsusilə turistlərin sayının azalmasına səbəb olur. Mövcud vəziyyət səbəbindən bir çox sahibkar zərərlə işləmək məcburiyyətində qalır. Ümumiyyətlə, hesab edirəm ki, müqavilələrin belə qısa müddətə bağlanması sahibkarlar üçün risk yaradır. İcarə müqavilələrinin cəmi 6 aylıq müddətə bağlanması sahibkarlar üçün ciddi risk yaradır. Sahibkar hər hansı obyektə daxil olarkən təmirə, avadanlığa, məhsula və digər zəruri xərclərə böyük məbləğdə vəsait yatırır. Lakin 6 ay sonra ona obyektin boşaldılması tələb olunur ki, bu da sahibkarın çəkdiyi xərcləri və etdiyi sərmayəni geri qaytarmasına imkan vermir. Heç bir sahibkar bu qədər böyük maliyyə yükünü yalnız 6 aylıq fəaliyyət üçün üzərinə götürmək istəməz. 6 aylıq müddət biznesin qurulması və qoyulan investisiyanın geri qazanılması üçün kifayət qədər uzun müddət deyil və sahibkarlar üçün qeyri-müəyyənlik yaradır".

A.Nəcəfli deyir ki, narazılıq doğuran digər məsələ isə bütün icarəçilərə eyni yanaşmanın tətbiq edilməməsidir: "Bəzi sahibkarlara münasibətdə fərqli yanaşma mövcuddur. Tanış çevrələrivə daha aşağı icarə haqları tətbiq olunur, digər sahibkarlara isə daha yüksək məbləğlər müəyyən edilir. Bu da biznes mühitində bərabər rəqabət prinsipləri ilə bağlı suallar yaradır. Ona görə də bu yanaşmaya son qoyulmalı və bütün icarəçilərə ədalətli münasibət göstərilməlidir".

Sahibkar məsələ ilə bağlı məhkəməyə müraciət edəcəyini bildirərək hesab edir ki, yaranmış vəziyyət hüquqi qiymət almalıdır: "Bu obyektlərə illərlə öz vəsaitim hesabına böyük sərmayə yatırmışam. Vergilərimi, sığorta və digər ödənişləri vaxtında etmişəm, işçilərə əməkhaqqı vermişəm. Hazırda böyük kredit öhdəliklərim də var. Buna baxmayaraq, fəaliyyətimə maneələr yaradılır. Mən artıq bununla bağlı məhkəməyə müraciət edəcəyəm. Azərbaycan Respublikasının Prezidenti cənab İlham Əliyev müxtəlif çıxışlarında sahibkarlığın inkişafının dövlət siyasətinin prioritet istiqamətlərindən biri olduğunu, investisiyaların qorunmasının, hüquqi sabitliyin təmin edilməsinin və sahibkarlara qanunsuz müdaxilələrin yolverilməzliyinin dövlət siyasətinin əsas prinsiplərindən olduğunu dəfələrlə bəyan edib. Bu istiqamətdə çoxsaylı islahatlar aparılıb, biznes mühitinin yaxşılaşdırılması və sahibkarlara dövlət dəstəyinin gücləndirilməsi üçün mühüm qərarlar qəbul edilib. Hesab edirəm ki, mənimlə bağlı yaranmış vəziyyət də Prezidentin sahibkarların müdafiəsi ilə bağlı müəyyən etdiyi siyasətə və verdiyi tapşırıqlara uyğun şəkildə obyektiv araşdırılmalı, hüquqlarım bərpa olunmalıdır".(E-huquq.az)

Gəncədə fəaliyyət göstərən “Gəncə Bazar Ticarət Mərkəzi” hərraca çıxarılıb.

Obyektin ilkin bazar qiyməti 18 milyon 400 min manat təşkil edir.

Avqustun 11-də baş tutacaq ilk hərracda bazarın minimum satış qiyməti 15,640,000 AZN-dir.

Bazarın Gəncənin sabiq icra başçısı Elmar Vəliyevə məxsus olduğu bildirilir.

Xatırladaq ki, bundan əvvəl E. Vəliyevə məxsus 20 hektar ərazidə yerləşən “Grand Qafqaz Ticarət Kompleksi” (“Gəncə Bazar Store” MMC) banka olan kredit borcuna görə hərraca çıxarılmışdı. Bankdan götürülmüş 5 milyon manatlıq kreditin 3 milyon 800 mini qaytarılmamışdı.

Bank bu vəsaitlə yanaşı, 99 min 996 manat faiz borcu gecikmənin hər günü üçün illik 30 faiz dərəcəsi hesablanmaqla və 250 min 589 manat da cərimə olmaqla, ümumilikdə 4 milyon 182 min manat pul tələbi ilə məhkəmədə iddia qaldırmışdı. Tələb olunurdu ki, məhkəmə borcun girov qoyulmuş əmlakın yönəldilməsinə qərar versin.

Gununsesi.info

TEREF yazır ki, Azərbaycan Avtomobil Yolları Dövlət Agentliyinin İdarə Heyətinin sabiq sədri Saleh Məmmədov Almaniyada 24 hektar torpaq sahəsi alıb.
Bu barədə məşhur müstəqil araşdırmaçı jurnalist Cavanşir Həsənli öz səhifəsində məlumat verib. Cavanşir bəy yazır:
"Hörmətli Saleh müəllim Almaniyada 24 hektar torpaq sahəsi alıb."
Daha sonra Cavanşir bəy əlavə edərək yazır ki, " O bu sahəni sənaye-kommersiya zonasına çevirmək istəyir.."
Torpaq sahəsinin qiyməti barədə verilən suala cavab olaraq Cavanşir bəy yazır:
" Qiymətlə bağlı dəqiq məlumat yoxdur, amma region üzrə mülkiyyət qiymətləri hesabatlarına əsasən, yaxşı infrastruktur xətləri olan kommersiya/sənaye məqsədli torpaqların kvadratmetri 110 € ilə 210 € arasında qiymətləndirilir. 24 hektar üçün təxminən 35 milyon - 45 milyon avro."
TEREF olaraq qaldırılan iddia ilə bağlı hörmətli Saleh müəllimində fiirlərini dərc etməyə hazırıq!

Rövşən və Yaşar adlı maklerlərin qanunsuz torpaq alverində keçmiş bələdiyyə sədrlərinin adı hallanır

"Son vaxtlar Binəqədidə qanunsuz torpaq alqı-satqısı ilə bağlı şikayətlərin sayı sürətlə artmaqdadır. Media və sosial şəbəkələr yer alan şikayətlərin təhlili, eləcə də vətəndaş müraciətləri göstərir ki, qanunsuz torpaq alverinin arxasında iki isim – Rövşən və Yaşar adlı maklerlər dayanır..." Bu barədə "DİA-AZ"a göndərilən məqalədə deyilir.

Məqalədə daha sonra bildirilir: "Bu şəxslərlə bağlı vətəndaşların narazılığına səbəb olan bir sıra məqamlar var ki, bunlardan biri həmin şəxslər tərəfindən vətəndaşlara verilən bəzi torpaq sənədlərinin əsassız çıxmasıdır. Məhz bu səbəbdən də vətəndaşlar hesab edir ki, Rövşən və Yaşar adlı maklerlər tərəfindən onlara verilən sənədlərin saxta çıxması heç də təsadüfi deyil və bu, bəzi qüvvələrin məqsədyönlü fəaliyyətindən xəbər verir.

Bundan başqa, şikayətçilər bildirir ki, onlara satılan və sonradan saxta olduğu məlum olan sənədlər Binəqədinin sabiq bələdiyyə sədrlərinə - Elman Salmanov və Aygün xanımın dönəminə təsadüf edir. Elə buna görə də bəzi vətəndaşlar iddia edir ki, Rövşən və Yaşar adlı maklerlərin fəaliyyəti keçmiş bələdiyyə sədrləri tərfindən dəstəklənmsi ehtimalı böyükdür.

Vərəndaşlar ümid edir ki, əlaqədar qurumlar Binəqədi torpaqlarını dədə malı kimi müxtəlif insanlara satan Rövşən və Yaşar adlı maklerlər, eləcə də bu şəxslərə dəstək verən, onların qanunsuz fəaliyyətini dəstəkləyən şəxslərlə bağlı lazımi ölçü götürəcək, sərt tədbirlər görəcək.

Bunu da qeyd edək ki, Binəqədi Rayon İcra Hakimiyyətinin də sözügedən maklerlərin əlindən zara gəldiyi, lakin onların fəaliyyətinin qarşısını ala bilmədiyini iddia olunur. Bildirilir ki, İcra Hakimiyyətinin yetkililəri dəfələrlə adıçəkilən maklerlərə xəbərdarlıq etsələr də, torpaq alverçiləri öz fəaliyyətlərini bu gün də davam etdirir, vətəndaşları aldatmaq hesabına külli miqdarda qanunsuz vəsait əldə edirlər. Kənd Binəqədinin “Gülüstan” deyilən massivində, Vulkan dağı ətrafında, Binəqədidəki neft torpaqlarında, Binəqədi-Xırdalan yolunun sağında, 4-cü mədən ərazisində, Biləcəri yolu ərazisində Rövşən və Yaşar adlı maklerlər tərəfindən qanunsuz satılan torpaqların xüsusilə çox olduğu bildirilir..."

DİA-AZ

Konstitusiya Məhkəməsi Palatasının növbəti iclası keçirilib.

Bu barədə Konstitusiya Məhkəməsindən məlumat verilib.

Bildirilib ki, iclasda Konstitusiyasının 130-cu maddəsinin IV hissəsinə və "Konstitusiya Məhkəməsi haqqında" Qanunun 7.1-ci maddəsinə əsasən, Cinayət Məcəlləsinin 192.1-ci maddəsinin şərh edilməsinə dair Baş Prokurorluğun sorğusuna baxılaraq, Plenumun icraatına qəbul olunması haqqında qərardad qəbul edilib.

Sorğuya mahiyyəti üzrə Konstitusiya Məhkəməsi Plenumunun sentyabrın 3-nə təyin olunmuş iclasında baxılacaq.

20 gün əvvəl həbs edilən tiktoker İlduzə Hacıyevanın (Arzum) hansı şərtlərlə ev dustaqlığına buraxılması məlum olub.

“Qafqazinfo”nun məlumatına görə, Elnur Nuriyevin sədrlik etdiyi məhkəmə kollegiyası müdafiə tərəfinin həbs qətimkan tədbirinin ev dustaqlığı ilə əvəz edilməsi barədə vəsatətini təmin edib.

Məhkəmə Arzumun 4 övladı olmasını, onlardan birinin ağır autizm xəstəliyindən əziyyət çəkməsini nəzərə alıb. Bu əsasla Arzum ev dustaqlığına buraxılıb.

Ona ev dustaqlığında olduğu müddətdə sosial şəbəkələrdən istifadə etməyə qadağa qoyulub. O, yalnız telefon vasitəsilə ailə üzvləri ilə əlaqə saxlaya biləcək.

Bundan əlavə, vəkillərin işin yenidən araşdırılması ilə bağlı vəsatəti də təmin edilib. Apellyasiya baxışının məhkəmə istintaqı ilə aparılması qərara alınıb. Yəni ki, vəkillər yenidən sübutlarını təqdim edəcək, yeni araşdırma olacaq.

Qeyd edək ki, Arzum bugünkü iclasda məhkəmə zalından azad edilib.

Binəqədi rayonu, Xutor qəsəbəsində bir müddət əvvəl dayandırıldığı bildirilən tikinti işləri yenidən bərpa olunub və hazırda demək olar ki, yekunlaşmaq üzrədir. Maraqlıdır ki, bir vaxtlar qanunsuz hesab edilərək dayandırılan tikintinin hansı əsaslarla yenidən davam etdirilməsinə icazə verildiyi hələ də açıqlanmır.
Bizimesr.com-a daxil olan məlumata görə, sözügedən obyektin tikintisinə təxminən bir il əvvəl başlanılıb. Tikinti işləri zamanı piyadaların hərəkəti məhdudlaşdırıldığı üçün ərazi sakinləri tərəfindən aidiyyəti qurumlara çoxsaylı şikayətlər ünvanlanıb. Araşdırmalar zamanı məlum olub ki, iri ticarət mərkəzi kimi nəzərdə tutulan obyektin tikintisi üçün müvafiq icazə sənədləri ümumiyyətlə yoxdur. Bundan sonra tikinti işlərinin Binəqədi Rayon İcra Hakimiyyətinin göstərişi ilə dayandırıldığı bildirilib.

Lakin təxminən üç ay sonra tikinti yenidən bərpa edilib. Hazırda obyektin tikintisi sürətlə davam etdirilir və artıq başa çatmaq üzrədir. Maraqlıdır ki, bu dəfə sakinlərin etiraz və şikayətləri də nəticəsiz qalıb.

Bizimesr.com-un əldə etdiyi məlumata görə, obyekt hələ də lazımi icazə sənədləri olmadan inşa edilir və hüquqi statusunda hər hansı dəyişiklik baş verməyib. Maraqlıdır, əvvəllər qanunsuz sayılan tikinti indi hansı hüquqi əsaslarla davam etdirilir?

Bu suallara kim cavab verə bilər?

Tikinti üçün Dövlət Şəhərsalma və Arxitektura Komitəsinin rəsmi icazəsi varmı?
Əgər icazə verilibsə, bu sənəd nə vaxt və hansı əsaslarla təqdim olunub?
Əgər icazə yoxdursa, tikinti işlərinin davam etdirilməsinə kim göz yumur?

Məsələ ilə bağlı Binəqədi Rayon İcra Hakimiyyətinin başçısı Elxan Allahverdiyev və zərbaycan Respublikasının Dövlət Şəhərsalma və Arxitektura Komitəsinin sədri Anar Quliyev qarşısında da ciddi suallar yaranır.
Bir vaxtlar dayandırılan tikintinin yenidən başlamasına hansı əsaslarla, hansı dövlət qurumu razılıq verib?
Bununla bağlı rəsmi qərar və ya icazə sənədi mövcuddurmu?

Bizimesr.com-un araşdırmasına görə, obyektin sahibi Elman adlı sahibkardır. Tikinti işlərini isə Rövşən adlı şəxs təşkil edir və bütün rəsmi danışıqları da məhz onun apardığı bildirilir.

Məlumata əsasən, dəmir konstruksiyalar üzərində inşa edilən obyekt gələcəkdə ticarət mərkəzi kimi fəaliyyət göstərəcək.

Bizimesr.com

İmişli Rayon Su Meliorasiya Sistemlərinin İstismarı İdarəsinin rəhbərliyi ilə bağlı redaksiyamıza ciddi məzmunlu şikayət daxil olub.
Özlərini idarənin əməkdaşları kimi təqdim edən müraciətçilər Denmedia.az-a göndərdikləri məlumatda rayon sakinlərinin suvarma suyundan əziyyət çəkdiyini, buna səbəb kimi isə rəhbərliyin qanunsuz fəaliyyətini göstəriblər.
İddialara görə, idarənin rəisi Samir Məmmədov, müavinləri Araz Əliyev və Dilşad Quliyeva ilə birlikdə rayon ərazisində qanunsuz balıq hövzələrinin yaradılmasına şərait yaradıblar.
Şikayətçilərin sözlərinə görə, həmin hövzələrin su ilə təmin olunması nəticəsində kənd təsərrüfatı sahələrinin suvarılması üçün nəzərdə tutulan su təyinatından kənar istifadə edilir və nəticədə yüzlərlə fermer su çatışmazlığından əziyyət çəkir.
Müraciətdə bildirilir ki, yay mövsümündə suvarma suyuna ehtiyacın ən yüksək olduğu dövrdə əkin sahələrinin susuz qalması məhsuldarlığa ciddi zərbə vurur. Əməkdaşlar iddia edirlər ki, bu vəziyyətə baxmayaraq, rəhbərlik problemi aradan qaldırmaq əvəzinə şəxsi maraqlarını üstün tutur.
Şikayətdə daha bir diqqətçəkən iddia isə idarəyə məxsus xüsusi texnikalarla bağlıdır. Bildirilir ki, dövlət balansında olan ekskavator və digər texnikalar hər gün imkanlı şəxslərə kirayəyə verilir, dövlət əmlakından qanunsuz gəlir əldə olunur.
Mənbələrin sözlərinə görə, qanunsuz balıq hövzələrinin salınması zamanı həmin dövlət texnikalarının işlədiyini əks etdirən videogörüntülər də mövcuddur. İddia olunur ki, həmin görüntülər rəhbərliyin fəaliyyəti ilə bağlı səsləndirilən ittihamların araşdırılması üçün mühüm sübut ola bilər.
Şikayətçilər aidiyyəti dövlət qurumlarından səsləndirilən iddiaların obyektiv araşdırılmasını, dövlət texnikalarının hansı məqsədlərlə istifadə edilməsinin və suvarma suyunun təyinatı üzrə sərf olunub-olunmamasının yoxlanılmasını xahiş edirlər.(Denmedia.az)

Sabunçu Su Kanal İdarəsindən dəhşətli faktlar əldə edilib.
Denmedia.az saytının qaynar xəttinə daxil olan məlumatda özünü adıçəkilən qurumun əməkdaşı kimi təqdim edən şəxs Sabunçu Su Kanal İdarəsinin rəisi Yaşar Mahmudovun fəaliyyəti ilə bağlı bir sıra ciddi iddialar səsləndirib.
Mənbənin sözlərinə görə, Yaşar Mahmudov əvvəllər Nizami rayon Kommunal İstismar Sahəsində, daha sonra həmin rayonun Su İdarəsində çalışıb və ötən ilin oktyabr ayında ADSEA-nin aparat rəhbəri Fuad Quliyevin xeyir duası ilə Sabunçu Su Kanal İdarəsinə rəis təyin edilib.
İddia olunur ki, o, yeni vəzifəyə gələrkən özü ilə üç nəzarətçi gətirib. Mənbənin bildirdiyinə görə, onlardan ikisi cəmi 15 gün ərzində vəzifədə irəli çəkilərək biri qrup rəhbəri, digəri isə mühəndis təyin edilib.
Şikayətçi iddia edir ki, Yaşar Mahmudov hər keçirilən iclasda "Mən Fuad müəllimin adamıyam" ifadəsini işlətməklə əməkdaşlara təzyiq göstərir.
Mənbənin digər iddiasına görə, Nardaran, Bilgəh, Ləhiş Bağları və Kürdəxanı Bağları ərazilərində Yaşar Mahmudovun nəzarəti altında 10-12 min manat və daha yüksək məbləğlərə su xətləri satılır, 3-5 min manat müqabilində isə abonent kodları açılır. Bunuda onunla əlaqələndirir ki, ADSEA-nin aparat rəhbəri Fuad Quliyevə hər ay müəyyən məbləğdə vəsait çatdırır.
Şikayətçinin sözlərinə görə, Texniki Şöbənin vasitəsilə həmin xətlər üçün qanunsuz texniki şərtlər hazırlanır və sayğaclar quraşdırılır. Halbuki, iddia olunduğuna əsasən, həmin ərazilərdə dövlətə məxsus su xətləri mövcud deyil.
Müraciətdə daha sonra bildirilir ki, Sabunçu Su Kanal İdarəsinin 120 nəzarətçi əməkdaşı var. Əvvəllər fəaliyyət göstərən "Debitor və Qanunsuz İstifadəyə Nəzarət" qrupu ləğv edilərək "Fakturaya Nəzarət" qrupuna birləşdirilib və bu dəyişiklik əməkdaşlar arasında narazılıq yaradıb.
Mənbə həmçinin iddia edir ki, Maştağa və Kürdəxanı ərazilərində maklerlər tərəfindən inşa edilən evlərə qanunsuz su xətləri çəkilir və həmin tikililər üçün küllü miqdarda rüşvət almaqla qanunsuz müqavilələr rəsmiləşdirilir.
Şikayətçinin sözlərinə görə, idarədə bəzi şəxslər Yaşar Mahmudovun yüksək vəzifəli himayədarlarının olduğunu bildirərək, onun fəaliyyəti ilə bağlı iradların nəticəsiz qalacağını iddia edirlər.
Qarşı tərəfin mövqeyini dərc etməyə hazırıq.
Nizami Rəsulov
Denmedia.az

Bir neçə ildir Azərbaycanda müəllimlərin işə qəbulu imtahanlarında, eləcə də Peşə Təhsili müəssisələrində müəllim və usta qəbulu imtahanlarında sualların hazırlanmasında ciddi səhvlərin olması böyük narazı təhsil işçisi ordusu yaradıb. Təəssüflər olsun ki, bu məsələ ilə bağlı nə sualları hazırlamağa məsul olan Təhsil İnstitutundan, nə Elm və Təhsil Nazirliyindən, nə də digər aidiyyəti qurumlardan heç bir məntiqli cavab verilmir.
Bu illər ərzində böyük bir müəllim ordusu məhz bu səbəbdən ciddi narazılıq ifadə edir və bu addımlar müəllim ordusunun ölkəmizə, dövlətimizin idarəetmə sisteminə qarşı ciddi aqressiya yaratmasına səbəb olub.
Qəribə hal budur ki, bu şəxslər - Təhsil İnstitutunun rəhbəri Elnur Əliyev və elm və təhsil naziri Emin Əmrullayev qətiyyən narahat görünmür və fəaliyyətləri ilə bağlı hər hansı narahatlıq nümayiş etdirmirlər. Onlar bu davranışı özlərinin doğru yolda hesab etdiklərini göstərən amillər kimi qiymətləndirirlər.
Təbii ki, biri elm və təhsil naziri, digəri isə Təhsil İnstitutunun rəhbəri olaraq, əllərində böyük trol ordusu, böyük maddi imkanlar və iri layihələrdən gələn milyonlarla vəsait olduğu halda onlar üçün heç bir problem yoxdur.
Amma burada maraqlı bir məqam var...
Kimdir bu adamlar? Bu dövlətə, vətənə və xalqa münasibətləri necədir?
Karyeralarına diqqət yetirdikdə görünür ki, Elnur Əliyevin fəaliyyəti uzun illər Prezidentin ictimai-siyasi məsələlər üzrə şöbəsinin sabiq rəhbəri, sonradan vəzifəsindən azad edilən və barəsində müxtəlif yeyinti və digər iddialar səsləndirilən Əli Həsənovun sahibi olduğu "Kaspi" Təhsil Mərkəzindən başlayır. Elnur Əliyev "Kaspi" Təhsil Şirkətinin direktoru olub. Eyni dövrdə Emin Əmrullayev də Elnur Əliyevin rəhbərliyi altında çalışıb və Əli Həsənovun rəhbərlik etdiyi şirkətdə fəaliyyət göstəriblər.
Maraqlıdır, "Kaspi" Təhsil Şirkəti əslində kimin idi və ya kimin dəstəyi ilə fəaliyyət göstərirdi?
Təbii ki, o dövrdə Ramiz Mehdiyevin icazəsi və nəzarəti olmadan belə bir mərkəzin fəaliyyət göstərməsi mümkün deyildi.
İndi isə zaman ardıcıllığına nəzər salaq.
2019-cu ilin oktyabr ayında Prezident İlham Əliyev Ramiz Mehdiyevlə bağlı sərəncam imzaladı və Ramiz Mehdiyev Azərbaycan Respublikası Prezidentinin Administrasiyasının rəhbəri vəzifəsindən azad edildi.
Düz bir ay sonra, 29 noyabr 2019-cu il tarixində Prezident İlham Əliyev Azərbaycan Respublikası Prezidentinin ictimai-siyasi məsələlər üzrə köməkçisi – şöbə müdiri Əli Həsənovu da vəzifəsindən azad etdi.
Emin Əmrullayev barədə qısa arayış:
2010–2012-ci illərdə "2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" və "Fulbright" proqramının birgə dəstəyi ilə Kolumbiya Universitetində ictimai (inzibati) idarəetmə ixtisası üzrə magistr təhsili alıb.
Hər kəs yaxşı bilir ki, həmin dövrdə xarici ölkələrdə təhsil məsələsi birmənalı şəkildə Ramiz Mehdiyevin nəzarətində idi və onun razılığı olmadan dövlət hesabına xaricdə təhsil almaq mümkün deyildi. Məhz həmin dövrdə Emin Əmrullayev də xaricdə təhsil almağa göndərilib.
Daha bir uyğunluq:
Emin Əmrullayev 2009–2010-cu illərdə "Kaspi Education" MMC-də Beynəlxalq əlaqələr şöbəsinin müdiri vəzifəsində çalışıb. "Kaspi Education" MMC də Əli Həsənovun rəhbərlik etdiyi şirkətidir. Bu isə o deməkdir ki, yəqin ki, Emin Əmrullayev Əli Həsənovun dəstəyi və Elnur Əliyevin təqdimatı ilə xaricdə təhsil almağa göndərilib.
2020-ci ildə Emin Əmrullayev təhsil naziri təyin olundu. Daha sonra nazirliyin adı dəyişdirilərək Elm və Təhsil Nazirliyi oldu. 2020-ci ildə Elnur Əliyev hələ də "Kaspi" Təhsil Şirkətinin direktoru idi.
Elnur Qəzənfər oğlu Əliyev 2021-ci ildən Emin Əmrullayevin yanında görünməyə başladı və sadiq dostlar ölkə təhsilinə ciddi nəzarəti ələ almağa qərar verdilər.
Elnur Əliyev əvvəl Nazirliyin Ümumi və məktəbəqədər təhsilin təşkili və idarə olunması şöbəsinin müdiri, 2023-cü ilin dekabr ayında isə elm və təhsil naziri Emin Əmrullayevin əmri ilə nazirin müşaviri təyin edildi və eyni zamanda Azərbaycan Respublikasının Təhsil İnstitutunun direktoru səlahiyyətlərini icra etməyə başladı.
Maraqlı irəliləyiş və təyinatlarda tələsməmə prinsipi işləməyə başladı. Diqqəti bu zaman maraqlı bir istiqamətə yönəltmək lazımdır. Araşdırma aparılsa, görünər ki, müəllimlərin imtahan sualları ilə bağlı narazılığı məhz 2023-cü ildən başlayıb. İmtahan sualları Təhsil İnstitutunda hazırlanır. Bu institutun rəhbərliyinə Elnur Əliyev gəldikdən sonra məhz bu narazılıqların başlaması suallar doğurmaya bilməz.
Müəllimlərin işə qəbulu imtahanı 2019-cu ildən keçirilir. Bu illər ərzində ümumi narazılıqlar əsasən vaxt, sistemdəki kiçik problemlər və digər texniki məsələlərlə bağlı idi. Lakin məhz 2023-cü ildən, Elnur Əliyevin Təhsil İnstitutuna gəlişindən sonra suallarda ciddi problemlərin yarandığı və narazılıqların artdığı göz önündədir.
Artıq üç ildir ki, eyni hallar davam edir, vəziyyət daha da gərginləşir və böyük müəllim ordusunun narazılığı artır. Bu hal müəllim ordusunun dövlətə münasibətini pisləşdirir, onları dövlətdən narazı salır və xoşagəlməz vəziyyət yaradır.
Bunların hamısı təsadüfdürmü?
Bir neçə arqument göstərməklə bu suala cavab vermək olar.
Elnur Əliyevin təhsildə böyük bir monopoliya yaratmaqla məşğul olduğu illərdir deyilir. Bunu bir sıra təhsil ekspertləri və narazı şəxslər açıq şəkildə bildirirlər.
Məlumata görə, Elnur Əliyev sürətlə təhsil sektorundakı bütün agentlikləri nəzarətə götürür. Nazirlikdə dörd agentlik var.
Əvvəl Təhsildə Keyfiyyət Təminatı Agentliyi, daha sonra Elm və Ali Təhsil üzrə Dövlət Agentliyi, ardınca Məktəbəqədər və Ümumi Təhsil üzrə Dövlət Agentliyi, daha sonra isə Peşə Təhsili üzrə Dövlət Agentliyi istiqamətində dəyişikliklər baş verdi.
Emin Əmrullayev öz dostu Elnur Nəsibovu da kənarda saxlamaq məcburiyyətində qaldı. Çünki Elnur Əliyevin daha güclü dəstəyə malik olduğu və proseslərə daha ciddi təsir göstərdiyi irəli sürülür.
Nə baş verdi?
Ötən il peşə təhsili müəssisələrində keçirilən imtahanlarda sualların hazırlanması ilə bağlı ciddi narazılıqlar yarandı. Hətta Peşə Təhsili üzrə Dövlət Agentliyinin rəhbəri Ceyhun Kərəmovun rəhbərlik etdiyi agentlik "Sualları Təhsil İnstitutu hazırlayır" məzmunlu açıqlama verməyə məcbur oldu. İddialara görə, bu vəziyyət Elnur Əliyevin xoşuna gəlmədi və bir neçə gün sonra Elnur Nəsibovla Ceyhun Kərəmov vəzifədən uzaqlaşdırıldı.
Qısa müddət sonra, 2024-cü ildə Təhsilin iqtisadiyyatı şöbəsinə rəhbər gətirdiyi İlqar Bayramlı əvvəl Təhsilin İnkişafı Fondunun İdarə Heyətinin sədri vəzifəsini icra etməyə başladı, daha sonra isə Peşə Təhsili üzrə Dövlət Agentliyinə rəhbər təyin edildi. Beləliklə, Elnur Əliyev həm Təhsilin İnkişafı Fondunu, həm də Peşə Təhsili üzrə Dövlət Agentliyini nəzarətə götürdü. Hər iki şəxs – Elnur Nəsibov və Ceyhun Kərəmov – Elnur Əliyev üçün kiçik maneə idi.
Bəs indi nə baş verir?
Bu il keçirilən imtahanlarda yenidən sualların düzgün hazırlanmaması, ciddi səhvlərin olması və böyük müəllim ordusunun narazılığı açıq aşkar ortadadır.
Elə isə indi hədəf kimdir?
Təbii ki, Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov. Bu gün narazı müəllimlər şikayət üçün hara üz tuturlar - Eşqi Bağırovun rəhbərlik etdiyi quruma.
Narazı müəllimlər kimdən şikayətçidirlər - təbii ki, Eşqi Bağırovdan.
Eyni ssenari təkrarlanır.
Ötən gün biologiya müəllimləri suallardan narazı qalaraq Təhsil İnstitutuna üz tutdular və sualların Elnur Əliyevin rəhbərlik etdiyi qurum tərəfindən hazırlandığını bildirdilər. Məktəbəqədər və Ümumi Təhsil üzrə Dövlət Agentliyində onlara "Bizlik bir məsələ yoxdur, gedin Təhsil İnstitutuna müraciət edin" deyildi.
Deməli, Ceyhun Kərəmov üçün oynanılan ssenari indi də Eşqi Bağırov üçün təkrarlanır.
Eşqi Bağırov Elnur Əliyevin qarşısında duruş gətirə biləcəkmi?
Bu, böyük sualdır.
Yəqin ki, gətirə bilməyəcək və Elnur Əliyev bu agentliyi də öz nəzarətinə alacaq.
Beləliklə, görünən odur ki, vaxtilə "Kaspi" Təhsil Mərkəzində fəaliyyət göstərmiş, Əli Həsənovun komandasında yer almış şəxslər bu gün də ölkə təhsilində ciddi narazılıqların əsas fiqurları kimi göstərilir.
Bu isə hələ də cavabsız qalan böyük suallar yaradır. Ölkənin təhsilini niyə məhz bu adamlar idarə etməlidir və bu qədər narazılıqlar dövlətimiz üçün nə dərəcədə faydalıdır?
Ədil Hüseynli
TEREF