"BP exploration (Caspian sea) limited" şirkətinə məxsus yararsız avtobuslar Bakı Gəmiqayırma Zavodunda istifadə olunur - TƏHLÜKƏLİ VƏZİYYƏTƏ niyə müdaxilə olunmur?
 
Bakı şəhəri, Qaradağ rayonu, Sahil qəsəbəsində yerləşən Bakı Gəmiqayırma Zavodunda İnsan Resursları və İnzibati İşlər Departamentində İnzibati işlər bölməsinin rəhbəri - Namiq Əliyev və onun əməkdaşı Şahin Xəlilzadə vəzifəsindən sui istifadə halına yol verərək texniki nasaz avtobusları şirkətdə nəqliyyat kimi istifadə etdirir. 2013 - cü ildən fəaliyyət göstərən zavodda 2015 - ci ildən "Atilla" ( indiki Qəsr 21)adlı şirkət avtomobil icarəsi ilə məşğuldur. Namiq Əliyev Bakı Gəmiqayırma Zavodunda BP-dən silinən, istifadəyə yararsız avtobusları ucuz qiymətə " Atilla " şirkətinin balansına keçirib. Həmin yararsız,texniki nasaz olan avtobuslar Namiq Əliyevin himayədarlığı ilə Şahin Xəlilzadə tərəfindən istismar edilərək işçi daşınır. Belə ki, ( 99-JY-973), ( 99-JE-867), (99-JB-230), (90-TB-838), (77-JH-963) və s dövlət nömrəli avtobuslarda "əl əyləci" hissəsi yoxdur və "BP" - nin balansında olan istifadəyə yararsız avtobuslar zavodda təhlükəli bir vəziyyətdə istifadə olunur. Əraziyə baxış keçirərkən gerçəkdən sıra ilə düzülmüş avtobus şinlərinin altına daş qoyulmaqla saxlanıldığı müşahidə olunur. Bu isə sürücü və çox işçi heyyətinin həyatı, yol təhlükəsizliyi qaydaları üçün böyük təhlükədir. Adının çəkilməsini istəməyən işçilər bildirir ki, adları çəkilən məsul şəxslər üçün pul işçi həyatından önəmlidir. Həmin avtobusların gündəlik istismarında sürücülər sürətlə hərəkət edir və nəticədə texniki qüsurlu bu cür sərnişindaşıma avtobuslarda işə daşınan fəhlələrin həyatı üçün böyük risk yaranır. Vətəndaşlar bildirir ki, hətta 77-GN-567 nömrəli avtobus Namiq Əliyevin avtobusu olsa da işçisi Vaqif adlı fəhlənin adına qeydə alındırılıb."90- ZK-655" dövlət nömrə qeydiyyatlı avtobusun sürücüsü olan Vaqif həm də şirkətdə fəhlə kimi çalışır. O da eyni təhlükəli durumu işçi sərnişinlərinə gündəlik yaşadır. Belə ki, bu cür avtobusların yanacağı ucuz başa gəldiyi üçün (95qəpiyə) ona görə yeyinti məqsədilə keyfiyyətli və təhlükəsiz nəqliyyat əvəzinə belə təhlükəli avtobuslardan istifadə edilir. "BP" - dən yanacağı ucuz alıb işlədilən avtobuslar hələ də şirkətin balansındadır. Həmin sırada bir tək 77-JV-953 nömrəli avtobusdan digərlərinə nisbətən yenidir. İşçilər qeyd edir ki, avtobusların əyləc sistemi olmadığından insanların həyatı ilə oyun oynanılır.
"Altına daş düzülməklə vəziyyətdən çıxış üsulu tapırlar. Belə üsulla insanların həyatı ilə oyun oynamaq olmaz. Hansı ki, belə təhlükəli işdən iki şəxs pul qazanacaq", - deyə işçilər etiraz edir. Gün ərzində sürətlə işə yetişməklə həm işçiləri zavoda daşıyır, həm də şirkətdə öz işini görür. Belə iş fəaliyyəti onların həyatı üçün böyük riskdir.
İşçi onu da qeyd edir ki, "BP" bu avtobusları özü səkkiz ildən sonra işlətmir və bu şirkət də yararsız avtobusları ondan hərrac yolu ilə təhvil alır. İşçilər tərəfindən aidiyyəti qurumlara dəfələrlə bildirilsə də zavod rəhbərliyinə məlumat verilmir və şikayətlər ört- basdır edilir. Avtobuslara texniki yoxlanışları Vaqif adlı həmin şəxs ,həm də zavodda koordinator vəzifəsini yerinə yetirən şəxs yola verir.
 
"Gəmiqayırma zavodu gətirib işlədir. İki nəfər şəxs 11 ildir ki, - Namiq Əliyev və Şahin Xəlilzadə bu işə himayədarlıq edərək işçilərin və sürücülərin həyatını təhlükəli vəziyyətində qoyaraq daha çox qazanc düşünürlər. Bir istiqamətdə iki böyük avtobus gəlməlidirsə bunlar üç etməklə dövlət şirkətinə, büdcəsinə ziyan vururlar. Dəfələrlə vətəndaşlar aidiyyəti qurumlara şikayət edilsə də bunlar iki növbəli işdə (gecə-gündüz) avtobusları işlədirlər. Aidiyyəti qurumlardan xahişimiz odur ki, "BP" - nin səkkiz ildən sonra istifadə etməyib, ancaq balansında olan yararsız avtobusları zavod necə işlədir? Demək bunlara rüşvət, pul önəmlidir. 2015 - ci ildən bu avtobuslar hesabına adı çəkilən səlahiyyətli şəxslər rüşvət mənimsəyir, insan həyatını önəmsiz hesab edirlər. Bunlara insan həyatı deyil, pul önəmlidir. Aidiyyəti qurumlar bununla bağlı ölçü götürsün, qanunsuz işə görə məsul şəxslər cəzalandırılsın".(ATATV. AZ )
 

Deyirlər, ölüm hər kəsi bərabərləşdirir. Ama görünür, Sumqayıtda bu qayda keçərli deyil. Burada hətta axirət dünyasına qovuşmaq üçün də cibində qalaq-qalaq manatın olmalıdır.

Faktum.az-a daxil olan şikayətlər və müraciətlər Sumqayıtın yeni qəbiristanlığında baş verən özbaşınalığın, sözün əsl mənasında, “ölü biznesi”nin dəhşətli mənzərəsini ortaya qoyur.
​Azərbaycan Respublikası Nazirlər Kabinetinin 2018-ci il 4 dekabr tarixli 522 nömrəli Qərarı ilə təsdiq olunmuş “Qəbiristanlıqların salınması və idarə olunması Qaydaları”na əsasən, qəbiristanlıqlar bələdiyyələrin balansındadır və hər bir vətəndaş üçün qəbir yeri tamamilə PULSUZ ayrılmalıdır. Qanunun və İnzibati Xətalar Məcəlləsinin müvafiq maddəsinin tələbi budur.
​Amma Sumqayıtda qanunlar sanki qəbiristanlıq darvazasından içəri keçmir.

Əldə etdiyimiz məlumata görə, yeni qəbiristanlıqda tək adamlıq sadəcə qara torpaq sahəsi 300-500 manata “təklif olunur”. Yəni yerinə görə qiymət dəyişir.

Əgər ölənin yaxınları qəbrin qazılması, dəfn və baş daşı kimi xidmətlər də istəyirlərsə, qiymət birbaşa 5-6 min manata kəllə-çarxa çıxır. Bəli, yanlış oxumadınız – bir otaqlı mənzil qiymətinə qəbir yeri!

Məlumata görə, bu “axirət holdinqi”nin başında Sumqayıt Şəhər Vətəndaşlara Xidmət İdarəsinin rəisi Feyruz Əsədov və onun səlahiyyətli nümayəndəsi Şəmistan dayanır.

Dövlət rüsumu, rəsmi qəbz? Unudun!

Bura Feyruz müəllimin şəxsi krallığıdır.

​Hələ bu harasıdır! “Qiyməti baha olsa da, xidməti bari aldığına dəysin” deyəcəksiniz. Amma fotolara baxanda adamın dəhşətdən tükləri biz-biz olur. Vətəndaşlar min bir əziyyətlə, el qınağından çəkinərək Şəmistana minlərlə manat sayırlar, amma qarşılığında nə alırlar? – Zibil, çərən və adam boyu qalxan kol-kos!

​Müraciət edən vətəndaşların fəryadı hər şeyi öz adıyla çağırır: “Biz varıq hələ ki, ata-anamızın məzarını təmizləyirik. Axı Fiyruzun nümayəndəsi Şəmistana bütün bunları danışıb, kifayət qədər pul saymışıq.

Gözümüzün qabağında kimsəsizlərin qəbri kolun içində görünmür. Özümüz də yovşanı, çərəni yarıb yaxınımızın qəbrinə gedib çata bilmirik. Sabah biz olmasaq necə olacaq?
Bu nə hörmətsizlikdir?”

Bəli, Sumqayıt Bələdiyyəsi və Vətəndaşlara Xidmət İdarəsi pul yığmağa gələndə kassa aparatından da sürətli işləyir, amma qəbiristanlığı təmizləməyə gələndə sanki iflic olurlar.
Vətəndaş doğmasının məzarını ziyarət etmək üçün yanında oraq-dəryaz gəzdirməlidir?

​Sumqayıt bələdiyyəsinə və Feyruz müəllimə təmənnasız bir məsləhətimiz var: Bəlkə qəbiristanlığın girişinə turniket qoyasınız?

Giriş üçün də 10-15 manat rüsum kəsin, tam olsun! Axı bu qədər kol-kosu, yovşanı becərmək, qəbirləri təbiətlə qovuşdurub “ekoloji park”a çevirmək böyük zəhmət tələb edir!

Qarşı tərəfin cavab haqqını tanıyırıq.

Faktum.az

Faiz müqabilində borc verilməsi ilk baxışdan sadə mülki münasibət kimi görünsə də, bu sahədə ciddi hüquqi risklər mövcuddur. Xüsusilə müxtəlif şəxslərə davamlı və sistemli şəkildə faizlə borc verən şəxslər bilməlidirlər ki, belə fəaliyyət müəyyən hallarda sadə borc münasibətindən çıxaraq onlar üçün hüquqi məsuliyyət məsələsi yarada bilər.
Bu barədə Ali Məhkəmədən məlumat verilib.
Bildirilib ki, Azərbaycan Mülki Məcəlləsinin 740.1-ci maddəsinə əsasən qanunda və ya müqavilədə ayrı qayda nəzərdə tutulmayıbsa, borcverən borcalandan müqavilədə nəzərdə tutulmuş qaydada və məbləğdə faiz almaq hüququna malikdir.
Yəni fiziki şəxslər arasında faizlə borc verilməsi öz-özlüyündə qadağan deyil:
“Lakin konkret şəxsə borc verilməsi ilə müxtəlif şəxslərə mütəmadi, sistemli və gəlir əldə etmək məqsədilə faizlə borc verilməsi eyni hüquqi hal deyil. Məhz bu fəaliyyətin xarakteri onun qanuniliyinin qiymətləndirilməsində mühüm əhəmiyyət daşıyır”.
Faizlə borc münasibətləri yazılı şəkildə rəsmiləşdirilməli, müqavilədə əsas borcun məbləği, faiz dərəcəsi, hesablanma qaydası, qaytarılma müddəti və ödəniş qaydası dəqiq göstərilməlidir:
“Eyni zamanda, pulun faktiki olaraq verilməsi və sonradan qaytarılması da mümkün qədər sübut edilə bilən formada həyata keçirilməlidir. Bu baxımdan bank köçürmələri daha təhlükəsiz üsullardan biridir. Nağd ödənişlər həyata keçirilirsə, onların da müvafiq qəbz və digər sənədlərlə təsdiqlənməsi məqsədəuyğundur.
Çünki məhkəmə mübahisəsi zamanı “pul vermişəm”, “pul qaytarılıb”, “faiz ödənilib” kimi şifahi izahatların deyil, bunları təsdiq edən sübutların əhəmiyyəti böyükdür".
Əgər şəxs gəlir əldə etmək məqsədilə müxtəlif və qeyri-məhdud sayda şəxslərə müntəzəm şəkildə faizlə borc verirsə, artıq onun fəaliyyətinin hüquqi statusu məsələsi ortaya çıxır: “Mülki Məcəllənin 740.10-cu maddəsinə əsasən gəlir əldə etmək məqsədilə müntəzəm olaraq, habelə qeyri-məhdud subyektlərə pul vəsaitlərinin borc verilməsi yalnız normativ hüquqi aktlara uyğun olaraq kreditlərin verilməsi fəaliyyətinin həyata keçirilməsi hüququna malik şəxs tərəfindən həyata keçirilə bilər. Bu tələblər nəzərə alınmadan fəaliyyət göstərilməsi qanunsuz sahibkarlıq kimi qiymətləndirilə və hüquqi məsuliyyətə səbəb ola bilər".
Ən mühüm risklərdən biri budur ki, borc verən şəxs borcalana qarşı məhkəməyə müraciət etdikdə, öz fəaliyyətinin qanuniliyi də araşdırıla bilər:
“Məhkəmə borc verənin fəaliyyətində qanunsuz sahibkarlıq və ya digər hüquq pozuntularının əlamətlərini müəyyən edərsə, xüsusi qərardad qəbul edərək materialları hüquqi qiymət verilməsi üçün prokurorluq orqanlarına göndərə bilər.
Başqa sözlə, borcunu tələb etmək üçün məhkəməyə gedən şəxs öz fəaliyyətinin hüquqi araşdırmaya məruz qalması ilə üzləşə bilər".
Qanunsuz fəaliyyət borc verənin öz tələbini də riskə ata bilər: “Əgər konkret iş üzrə borc verənin qanunsuz fəaliyyətlə məşğul olduğu müəyyən edilərsə, bu, onun müqavilədə razılaşdırılmış faiz və digər məbləğləri tələb etməsinə ciddi təsir göstərə bilər.
Belə vəziyyətdə borc verən şəxsin müqavilədə nəzərdə tutulan gəliri (faiz və digər məbləğləri) tələb etmək imkanları məhdudlaşa, yalnız qanunvericilikdə nəzərdə tutulan gecikdirilmiş məbləğə illik 5 faiz tələb etmək imkanı qala bilər”.
Faizlə borc verən şəxslər münasibətləri yazılı müqavilə ilə rəsmiləşdirməli, faktiki verilən məbləği və faiz şərtlərini dəqiq göstərməli, bütün ödənişləri sənədləşdirməli və fəaliyyət sistemli xarakter daşıyırsa, onun hüquqi statusunu əvvəlcədən düzgün müəyyən etməlidirlər:
“Pulun sizə məxsus olması onu istənilən formada və sistemli şəkildə qanunvericiliyin müəyyən etdiyi tələblərdən kənar dövriyyəyə buraxmaq hüququ vermir.
Əks halda bu gün “asan qazanc” kimi görünən fəaliyyət məhkəmə mübahisəsinə, xüsusi qərardada və hətta inzibati və ya cinayət məsuliyyətinə səbəb ola bilər".

Sumqayıt şəhərində şəhərsalma və tikinti normativlərinin pozulması ilə bağlı növbəti qanunsuzluq aşkarlanıb. Şəhərin Sərvər Bədəlbəyli küçəsi, ev 289a ünvanında yerləşən çoxmərtəbəli yaşayış binasında sakinlrin narahatlığına səbəb olan özbaşınalıq baş verir.

​Faktum.az-a daxil olan məlumata görə, binanın birinci mərtəbəsində mənzillərin/obyektlərin pəncərə yerləri kəsilərək qanunsuz olaraq qapıya çevrilib. Bununla da binanın ümumi fasad görünüşü və daşıyıcı divar strukturu kobud şəkildə pozulub. Eyni zamanda, ümumi istifadədə olan ərazidə – səki və yaşıllıq zolağında qanunsuz pilləkənlər inşa edilib.

Diqqət çəkən əsas məqamlardan biri odur ki, betondan tikilən həmin pilləkənlərin bir hissəsi sonradan uçub dağılıb və ərazidə təhlükəli tikinti qalıqları, eləcə də antisanitar mənzərə yaranıb. Açıqda qalan naqillər, qoruyucu məhəccərlərin olmaması və dağıntılar həm binada yaşanyan sakinlərin, həm də ərazidən keçən vətəndaşların həyatı üçün real təhlükə mənbəyinə çevrilib.

Xatırladaq ki, Azərbaycan Respublikasının Şəhərsalma və Tikinti Məcəlləsinin tələblərinə əsasən, yaşayış binalarının fasadında və daşıyıcı konstruksiyalarında istənilən dəyişiklik yalnız müvafiq dövlət qurumlarının rəsmi icazəsi və təsdiq olunmuş layihə əsasında həyata keçirilə bilər. Lakin aidiyyəti qurumların bu özbaşınalığa hələ də göz yumması ciddi suallar doğurur.

​Sumqayıt Şəhər İcra Hakimiyyəti, Dövlət Şəhərsalma və Arxitektura Komitəsi və Fövqəladə Hallar Nazirliyi bu qanunsuzluğa və sakinlərin təhlükəsizliyini təhdid edən duruma nə vaxt reaksiya verəcək

​Faktum.az olaraq tərəfimizdən aidiyyəti qurumlara rəsmi sorğular göndərilib.

Məsələni diqqətdə saxlayırıq.

Bakıda məişət tullantılarının idarə olunmasını həyata keçirən dövlət qurumu -“Təmiz Şəhər” ASC-nin 2025-ci il üzrə maliyyə hesabatı şirkətin maliyyə vəziyyəti ilə bağlı diqqətçəkən rəqəmlər ortaya qoyub.

Ötən il ASC-nin gəlirləri 4,8 milyon manat azalaraq 36 milyon 787 min manata düşüb. Bu, 2024-cü illə müqayisədə 11,5 faiz azalma deməkdir.

Lakin gəlirlər azalarkən hansı səbəbdən şirkətin xərcləri əksinə artıb?

Belə ki, 2025-ci ildə “Təmiz Şəhər”in ümumi xərcləri 41 milyon 630 min manat təşkil edib. Bu, əvvəlki illə müqayisədə 5 milyon 772 min manat və ya 16,1 faiz çoxdur. Nəticədə ASC ili 5 milyon 666 min manat xalis zərərlə başa vurub. 2024-cü ildə isə şirkətin zərəri 1 milyon 667 min manat olub. Başqa sözlə, bir il ərzində zərər təxminən 4 milyon manat və ya 3,4 dəfə artıb.

Gəlir azalır, xərc artır?

Şirkətin maliyyə göstəricilərində diqqət çəkən əsas məqamlardan biri gəlirlə xərclərin əks istiqamətdə hərəkət etməsidir. Gəlirlər 11,5 faiz azaldığı halda xərclərin 16,1 faiz artması şirkətin xərclərinin idarə olunması məsələsini gündəmə gətirir.

Əlbəttə, xərclərin artması özlüyündə maliyyə pozuntusu demək deyil. Enerji tarifləri, əməkhaqqı, xidmətlərin qiyməti, inflyasiya, avadanlıqların istismarı və digər amillər dövlət şirkətinin xərclərinə təsir göstərə bilər. Lakin gəlirlər azalarkən xərclərin əhəmiyyətli dərəcədə artması idarəetmə və maliyyə səmərəliliyinin düzgün idarə olunmamaması böyük suallar yaradır.

3,8 milyon manatlıq “digər əməliyyat xərcləri” nədir?

Hesabatda ən çox diqqət çəkən məqamlardan biri isə “digər əməliyyat xərcləri”nin kəskin artmasıdır. Belə ki, bu xərc 2024-cü ildə cəmi 68 min manat olduğu halda, 2025-ci ildə 3 milyon 820 min manata yüksəlib. Yəni artım təxminən 3 milyon 756 min manat, başqa sözlə, təqribən 60 dəfə olub.

Məhz bu rəqəm bir sıra suallar yaradır. 3,82 milyon manat konkret olaraq hansı işlərə və xidmətlərə xərclənib?
Bu vəsait hansı şirkətlərə və ya podratçılara ödənilib?
Həmin xidmətlərin satın alınması üçün tender və ya kotirovka keçirilibmi?
Müqavilələrin predmeti nə olub?
Eyni xidmətlər əvvəlki illərdə həyata keçirilibsə, həmin işlərə nə qədər vəsait ödənilib?

Əsas xərclər-əməkhaqqı və elektrik

2025-ci ildə “Təmiz Şəhər” ASC əməkhaqqına 12 milyon 675 min manat, elektrik enerjisinə isə 11 milyon 770 min manat xərcləyib. Əməkhaqqı xərcləri 166 min manat və ya 1,3 faiz artıb. Elektrik enerjisinə çəkilən xərc isə 835 min manat və ya 7,6 faiz yüksəlib. Burada da şirkətin işçi sayının, orta əməkhaqqının, enerji sərfiyyatının və fəaliyyət həcminin əvvəlki illərlə müqayisəsi maraqlıdlr. Çünki yalnız xərclərin ümumi məbləğini bilmək onların səmərəli olub-olmadığını müəyyənləşdirməyə imkan vermir.

249 milyon manatlıq yığılmış zərər

Şirkətin maliyyə vəziyyətində daha ciddi məqam isə yığılmış zərərlə bağlıdır. 2025-ci ilin sonunda “Təmiz Şəhər” ASC-nin yığılmış zərəri 249 milyon 185 min manata yüksəlib. 2024-cü ilin sonunda bu göstərici 243,5 milyon manat olub.

Beləliklə, yalnız bir il ərzində yığılmış zərər təxminən 5,7 milyon manat artıb. Digər tərəfdən, şirkətə müxtəlif formalarda kapital kimi ayrılmış vəsaitin ümumi məbləği 291 milyon manat göstərilir. Bu rəqəmlər müqayisə ediləndə ortaya ciddi sual çıxır - dövlət tərəfindən şirkətə ayrılmış böyük həcmdə kapitalın hansı hissəsi faktiki olaraq şirkətin fəaliyyətinin maliyyələşdirilməsinə, hansı hissəsi isə illər ərzində yaranan zərərlərin bağlanmasına yönəlib?

Nəticə olaraq hesabat idarəetmənin səmərəliliyi ilə bağlı ciddi araşdırma üçün kifayət qədər əsas yaradır.

Xüsusilə gəlirlərin azalmasına baxmayaraq xərclərin artması, “digər əməliyyat xərcləri”nin bir ildə 60 dəfəyə yaxın yüksəlməsi, yığılmış zərərin 249 milyon manata çatması, aktivlərin və kapitalın azalması diqqətdən kənarda qala bilməz. Burada ən vacib məsələ 3 milyon 820 min manatlıq “digər əməliyyat xərclərinin” mahiyyətinin açıqlanmasıdır.

Maraqlıdır, bu vəsait nəyə xərclənib? Bakının tullantılarını idarə edən dövlət şirkəti niyə hər il zərər edir və dövlətin ayırdığı yüz milyonlarla manat vəsait fonunda bu zərərin qarşısını almaq mümkün olmur?

Qeyd edək ki, “Təmiz Şəhər” ASC-nin İdarə Heyətinin sədri Etibar Abbasovdur. ASC Azərbaycan İnvestisiya Holdinqi-nin tabeçiliyində fəaliyyət göstərir.(Bizimesr.media)

Sosial şəbəkələrdə qarşıma bir video çıxdı... Bir qazimizin, bu torpaq üçün canından keçən, bir gözünü səngərdə qoyub gələn bir Vətən oğlunun fəryadı idi.
Sözlərin hər cümləsi adamın boğazında düyünlənir, adamın içini göynədir. Amma bir məqam var ki, bax o, sadəcə göynətmir — insanı yandırır, qanını dondurur!
Gözünün birini itirmiş, o biri gözü isə cəmi 8 faiz görən, linza və əməliyyatlarla ayaqda durmağa çalışan bir qaziyə 2-ci qrup əlillik verilibmiş. Növbəti komissiyada nə baş verib?
Heç bir izahat verilmədən, rəy dəyişdirilib, haqqı əlindən alınıb. Qazi haqqını tələb etmək üçün komissiya sədri Aygün Məmmədbəylinin qapısına gedib. Və görün orada nə eşidib:
"Sizin əgər qeyrətiniz olsaydı, siz erməniyə güllə atmazdınız."Əgər iddia olunan kimi bu cür fikir səsləndirilibsə, o zaman aidiyyatı qurumlar Aygün Məmmədbəylinin ailə kökünü araşdırsa daha gözəl olar.Soykökündə ermənilərlə bağlılıqı var ya yox bilinməlidir.
Bu sözü deyən bir həkimdir! Bu ölkədə sülh içində yaşasın, rahat kresloda oturub qərar versin deyə sağlamlığını səngərdə qoyub gələn qaziyə deyilir bu sözlər!
İnsan adama nə deyəcəyini, vicdanı harada axtaracağını bilmir. Bu necə bir həddini aşmaqdır? Bu necə bir məmur özbaşınalığıdır?
Kreslo Qanunundan Hündür Deyil!
Aygün Məmmədbəyli kimdir?
O kabinetdə oturub özünü qanundan, dövlətdən, xalqdan üstün görən kimdir?
"Mənim oğlum cənab prezidentin yanında oturur, istəsəm səni bir dəqiqəyə məhv elətdirərəm", "Mən nə istəyirəm onu eləyə bilərəm" deyərək hansı gücə, hansı özbaşınalığa arxalanır? Əgər bir məmur dövlət rəhbərinin adını öz qanunsuzluğuna, öz kobudluğuna sipər edirsə, bu təkcə qaziyə deyil, dövlətin özünə atılan daşdır!
Qazi deyir: “Biz pulun acgözü deyilik. Biz onunla fəxr eləyirik ki, erməniyə güllə atmışıq!” Bax budur ləyaqət, budur mərdlik! 4 övlad atası olan, kəllə-beyin travması ilə 16 dəfə əməliyyat olunan bir adamı o dərəcəyə çatdırıblar ki, "Mən 3-cü qrupumdan da imtina eləyirəm, təki bu təhqiri götürməyim" deyir.
Bir Vətən oğluna "qeyrətsiz" damğası vurmaq üçün gərək insanın içindəki bütün vicdan, bütün insaf ölmüş ola. O kabinetdə oturan həkim də, komissiya sədri də unutmamalıdır ki, bu gün orada rahat nəfəs alırlarsa, o gözünü itirən, canını fəda edən oğulların sayəsindədir!
Ədalət Bərpa Olunmalıdır!
Qazi fəryad edir, deyir ki, o otaqda kamera var, səs yazan var. Çıxarın o səs yazılarını ortalığa! Görünsün kim kimdir! Biz buradan aidiyyəti qurumlara, Ali Baş Komandana, İnsan Hüquqları Müvəkkilliyinə və bütün vicdanlı insanlara səslənirik: Bu məsələ bir qazinin fərdi problemi deyil. Bu, bu millətin namus, ləyaqət məsələsidir.
Qazisini kabinetlərdə təhqir etdirən bir cəmiyyət gələcəyinə dik baxa bilməz!
Aygün Məmmədbəyli kimi məmurlar anlamaq məcburiyyətindədirlər ki, o kreslo onlara insanları əzmək üçün verilməyib. O zabitlərin, o qazilərin tökdüyü qanın hesabını heç kim heç kimə bağışlamayacaq.
Qeyd (Redaksiyadan): Yazıda adı çəkilən qarşı tərəfin (Aygün Məmmədbəyli və ya müvafiq komissiyanın) da mövqeyini dinləməyə və dərc etməyə hazırıq.
Sima Babayeva

İyulun 8-də Adil Əliyevin Suraxanı rayonuna icra başçısı təyin edilməsinin iki ili tamam oldu. Anaxeber.info.az yazır ki, bu 2 il müddətində Suraxanı rayonunda köklü şəkildə heç nə dəyişməyib və problemlər olduğu kimi qalıb. Yerli sakinlərin, sosial şəbəkələrdə şikayətini yazanların, mətbuatın yaydığı videoların əsasında belə qənaətə gəlmək olar ki, Suraxanı Adil Əliyevin rəhbərliyi dövründən əvvəl necə idisə, elə bu gün də eyni vəziyyətdədir. Hətta ən kiçik problemlər belə həllini tapmayıb. Xüsusən də Yeni Günəşli, eləcə də Köhnə Günəşli, həmçinin, Qaraçuxur və Yeni Suraxanı ərazilərində sakinlər üçün hər hansı bir abadlıq işi görülməyib. Məsələn, Yeni Günəşlidə yaşayanlar deyirlər ki, yollar dağınıq, asfalt vurulmur, dəfələrlə şikayət olunsa da heç bir tədbir görülməyib. İcra başçısı Adil Əliyevə olan müraciətlər də nəticəsiz qalıb. Hər gün işə gedib-gələn icra başçısı Yeni Günəşlinin yollarından xəbərsizdirmi? Öz xidməti avtomobili bu yolların bərbad vəziyyətdə olduğunu nasaz olanda görmürmü? Necə ola bilər ki, 2 il ərzində bir dəfə bu yollara bir maşın asfalt tökülməyib. Konkret olaraq şir heykəli olan ərazidən axıra qədər yollar çala-çuxurdur. Həmçinin, digər küçələr də o vəziyyətdədir. Ən dəhşətlisi odur ki, işıqlanma yoxdur. Gecələr göz gözü görmür və istənilən an qəza riski, piyada vurulması təhlükəsi yaşanır. Necə olur ki, Bakının digər rayonlarında pis-yaxşı yollar düzəldilib, işıqlanma var, amma Adil Əliyevin rəhbəri olduğu rayon zülmətə qərq olub, küçələri bərbad gündədir?!
Bir icra başçısı kimi onun özünə təsir etmirmi? Yəni 2 il ərzində Yeni Günəşlini həqiqətən də günəşli bir yerə, cənnətə çevirmək olardı.
Amma təkcə yol və işıq məsələsi deyil, həm də yaşıllıqların məhvi, yerində binalar, obyektlər tikilməsi vətəndaşları narazı salır. Bu günlərdə SPACE telekanalında ağacların kəsilməsi barədə süjet verildi. Məlum oldu ki, Suraxanı rayonunda bir iş adamı ağac kəsib tikinti aparır. Bəs ictimai istifadədə olan ərazidə tikintiyə icazəni kim verir? - Suraxanı İH.

Belə çıxır ki, Adil Əliyevin başçılıq etdiyi rayonda istənilən qanunsuzluğa yol vermək olar. Ümumiyyətlə, paytaxtda ən geridə qalan, abadlığı, yolu, işığı olmayan yer bu ərazilərdir. Bütün bunların nəticəsidir ki, Adil Əliyevə BŞİH rəhbəri Eldar Əzizov töhmət verib. Bəli, Bakıda iki icra başçısı töhmət alıbsa, biri də Adil Əliyevdir. Yəni 2 il ərzində icra başçısı həm də bu neqativ rəylə yadda qaldı. Töhmət isə əsaslı idi.
A.Əliyevə töhmət verilməsinə səbəb rayon ərazisində qanunsuz tikintilərin sayının çoxluğu olub.

Belə ki, müşavirədə Suraxanıda qanunsuz tikinti hallarının artdığı, rayonun digərləri ilə müqayisədə bu baxımdan “seçildiyi” vurğulanıb.

Bununla yanaşı, rayon tabeliyində olan qəsəbələrdə sanitar təmizliyin olmaması, zibillərin götürülməməsi ilə bağlı da icra başçısına irad tutulub.
Qeyd edək ki, töhmət alan icra başçısı Adil Əliyev bütün çatışmazlıqların bir ay ərzində aradan qaldırılacağına söz verib. Amma üstündən aylar keçib, heç nə dəyişməyib. Doğrudur, icra başçısı şəhid ailələrinə və qazilərə münasibətdə diqqətlidir, belə də olmalıdır, amma rayonun problemlərini başdı başına buraxıb...

Anaxeber.info.az

“Protez-Ortopedik İstehsalat Və Reabilitasiya Mərkəzi” publik hüquqi şəxsi dövlət satınalmalarının vahid internet portalında keçirilmədən əlillərin reabilitasiyası məqsədi ilə malların satınalınması üzrə “Prima Trading” Məhdud Məsuliyyətli Cəmiyyəti ilə 16.718.673,84 manat dəyərində birbaşa müqavilə bağlayıb. Məlumay satınalmaların portalında 24.08.2026-cı ildə dərc edilib.

Qeyd edək ki, Protez-Ortopedik İstehsalat Və Reabilitasiya Mərkəzinin 17 milyon manat civarında müqavilə bağladığı “Prima Trading” MMC-nin barəsində açıq mənbələrdə heç bir məlumat yoxdu.

Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarda “PRIMA TRADING” (VÖEN 1506779251) Məhdud Məsuliyyətli Cəmiyyətinin 03.05.2024-cü il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ NƏRİMANOV RAYONU, SABİT RƏHMAN, ev.76, m.252, qanuni təmsilçisinin isə Rövşənzadə Ziya Mirzə oğlu olduğu göstərilir. MMC-nin təsisçisi və ilk qanuni təmsilçisi İbayeva Ülviyyə Ramiz qızı olub.

Dövlət Vergi Xidmətinin məlumatlarından da göründüyü kimi MMC 03.05.2024-cü il tarixdə dövlət qeydiyyatına alınıb. MMC dövlət qeydiyyatına alındığı tarixdən iki il keçməsinə baxmayaraq Protez-Ortopedik İstehsalat Və Reabilitasiya Mərkəzi analoji işlərdə heç bir təcrübəsi olmayan “Prima Trading” MMC ilə 17 milyon manat civarında birbaşa müqavilə bağlayıb.

Apardığımız daha ətraflı araşdırma zamanı məlum oldu ki, “Prima Trading” MMC-nin adı dövlət satınalmalarında ilk dəfə keçsədə qanuni təmsilçisi Rövşənzadə Ziya Mirzə oğlu ilə Protez-Ortopedik İstehsalat Və Reabilitasiya Mərkəzi ilə daha əvvəllər işbirliyində olub. Belə ki, Rövşənzadə Ziya Mirzə oğlu həm də “LOTUS CO” Qapalı Səhmdar Cəmiyyətinin qanuni təmsilçisidir.

Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarda “LOTUS CO” (VÖEN 2904468381) Məhdud Məsuliyyətli Cəmiyyətinin 01.08.2017 il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2010 manat olan MMC-nin hüquqi ünvanının BAKI ŞƏHƏRİ NƏSİMİ RAYONU, MİR CƏLAL , ev.60, m.89, qanuni təmsilçisinin isə Rövşənzadə Ziya Mirzə oğlu olduğu göstərilir. MMC-ninilk hüquqi ünvanı SUMQAYIT ŞƏHƏRİ, 17 MKR, ev 65, mənzil 47, təsisçisi və ilk qanuni təmsilçisi Qasımova Sevda Babaxan qızı olub. Dadaşov İkram Hüseynağa oğlu, Allahverdiyev Rahib Tofiq oğlu, Cəfərov Seymur Məmməd oğlu müxtəlif vaxtlarda QSC-nin qanuni təmsilçiləri olub. 2022-ci ilin yanvarından QSC-nin qanuni təmsilçisi Rövşənzadə Ziya Mirzə oğludur.

Qeyd edək ki, “LOTUS CO” QSC Azərbaycan Respublikasının Əmək və Əhalinin Sosial Müdafiəsi Nazirliyinə tabeli qurumlarla 2019-2023-cü illərdə ümumi dətəri milyonlarla ölçülən 70-ə yaxın satınalma müqaciləri bağlayıb.

Məsələn, Əmək və Əhalinin Sosial Müdafiəsi Nazirliyinə tabeli Dövlət Məşğulluq Agentliyi 15.05.2023-cü ildə İsmayıllı “DOST EVİ” Yaradıcılıq, Sərgi və Satış Mərkəzi üçün malların alınması və quraşdırılması işlərinin satın alınması üzrə 985.898,26 manat, Protez-Ortopedik İstehsalat Və Reabilitasiya Mərkəzi 06.12.2022-ci ildə protez-ortez məmulatları və ortopedik ayaqqabı istehsalında istifadə olunan digər köməkçi materiallar üzrə 200.486,54 manat, açıq məkan üçün velo-arabalar üzrə 178.180 manat, Dövlət Məşğulluq Agentliyi 09.08.2022-ci ildə maşın və avadanlıqların satın alınması üzrə 1.827.226,96 manat, Protez-Ortopedik İstehsalat Və Reabilitasiya Mərkəzi 03.08.2022-ci ildə serebral-iflic xəstələri üçün kreslo-arabalar üzrə 392.940 manat, Dövlət Sosial Müdafiə Fondu 14.06.2022-ci ildə təsərrüfat mallarının satınalınması üzrə 227.791,57 manat, Dayanıqlı və Operativ Sosial Təminat Agentliyi 18.05.2022-ci ildə “DOST İnklüziv İnkişaf və Yaradıcılıq Mərkəzi” MMC üçün texnoloji avadanlıqlar və proqram təminatının satın alınması üzrə 263.848,58 manat, “DOST İnklüziv İnkişaf və Yaradıcılıq Mərkəzi” MMC üçün mal, material və avadanlıqların satın alınması üzrə 290.314,75 manat dəyərində müqavilələri “LOTUS CO” QSC ilə bağlayıb.

Göründüyü kimi Ziya Rövşənzadənin qanuni təmsiçisi olduğu “LOTUS CO” QSC Əmək və Əhalinin Sosial Müdafiəsi Nazirliyinə tabeli qurumlarla 2023-cü ilə qədər işbirliyində olub. Həmin vaxtdan QSC-nin adı heç ir satınalmadan keçməyib. Maraqlıdır ki, üç il sonra Ziya Rövşənzadənin qanuni təmsiçisi olduğu “PRIMA TRADING” Əmək və Əhalinin Sosial Müdafiəsi Nazirliyinə tabeli Protez-Ortopedik İstehsalat Və Reabilitasiya Mərkəzi ilə yenidən işbirliyinə başlayıb, nə az, nə də çox 17 milyon manat civarında birbaşa müqavilə bağlayıb.

Maraqlıdır, Ziya Rövşənzadənin qanuni təmsiçisi olduğu, barəsində olan bir çox şübhəli məlumatlarla diqqət çəkən bu şirkətlərə dövlət satınalmalarında belə şəraiti kimlər yaradır? Şirkət niyə ancaq Əmək və Əhalinin Sosial Müdafiəsi Nazirliyinə tabeli qurumların satınalmalarının qalibi olur? Bunu zənnimizcə elə sözügedən nazirlikdə axtarmaq lazımdı.

Qeyd edək ki, Azərbaycan Respublikasının əmək və əhalinin sosial müdafiəsi naziri Anar Əliyevdir. O, Prezidentin 7 fevral 2025-ci il tarixli Sərəncamı ilə sözügedən vəzifəyə təyin olunub. Anar Əliyev 30 oktyabr 2018-ci ilədək Əmək və Əhalinin Sosial Müdafiəsi Nazirliyinin Aparatının rəhbəri olub. Həmin vaxtdan əmək və əhalinin sosial müdafiəsi nazirinin müavini vəzifəsində çalışıb. Əmək və Əhalinin Sosial Müdafiəsi Nazirliyi sistemində çoxdan yüksək vəzifə tutduğunu nəzərə alsaq Ziya Rövşənzadənin qanuni təmsiçisi olduğu şirkətlərə sözügedən nazirlikdə kimlərin şərait yaratdığını Anar Əliyev daha yaxşı bilmiş olar.

Aktualinfo.net

Ölkənin tanınmış elektronika mağazalar şəbəkələrindən olan “İrşad Electronics” ətrafında ciddi iddialar səslənib. Şirkətin keçmiş əməkdaşı Ruslan Hüseynov rəhbərlik tərəfindən ona qarşı təzyiqlər və hədə-qorxular olduğunu iddia edib.

Bnun sözlərinə görə, onu maliyyə departamentinin rəhbərinin otağına aparıblar: "Orada şirkət idarə heyətinin üzvləri hamısı birləşib məni sorğu-sual, hədə-qorxu əsasında, necə desək, nələrisə mənim boyunuma qoymağa çalışırdılar".

R.Hüseynov bildirib ki, 2025-ci ilin mart ayında Abdülkərimli Mehrap adlı müştəri ilə tanış olub və həm nəğd, həm də köçürmə üsulu ilə alışlar başlayıb: "Həmin şəxsin 240 min manat borcu var idi.

Abdülkərimli Mehrabla noyabr ayının 27-də görüşməli idik. Sadəcə, görüşə az qalmış əlaqə kəsildi, zəng çatmadı. Apardığım araşdırmaya görə öyrəndim ki, həmin şəxs ölkəni tərk edib".

O, bunu öz yuxarı rəhbərinə bildirdiyini qeyd edib. Şikayətçi iddia edir ki, şirkət rəhbərliyi onu daim hədələyib, borcun ödənilməsini tələb edib və əks təqdirdə onu həbs etdirəcəkləri ilə hədə-qorxu gəliblər. Buna görə də məcburi şəkildə evini onların adına keçirdiyini iddia edib.

Məsələ ilə bağlı “İrşad Electronics”ə sorğu ünvanlanıb. Şirkət bildirib ki, Ruslan Hüseynova hər hansı qanunsuz təzyiq göstərilməsi barədə iddiaları qəbul etmirlər. Şirkət tərəfindən R.Hüseynovun əmək fəaliyyəti ilə bağlı yaranan məsələlər üzrə daxili araşdırma aparılıb. Araşdırma zamanı şirkətə külli miqdarda maddi zərər vurulmasına dair əsaslı şübhələr yarandığından materiallar hüquq-mühafizə orqanlarına təqdim edilib.

“İrşad Electronics” ev məsələsini təkzib etsə də, Ruslan Hüseynov evin şirkətin satınalma və tikinti departamentinin rəhbəri Elnur Kərimovun adına keçirildiyini göstərən sənədləri təqdim edib. Faktla bağlı araşdırmalar davam etdirilir.(NOCOMMENT.az )

VİDEO LİNKDƏ: https://nocomment.az/cemiyyet/meni-otaga-aparib-hede-qorxu-geldiler-ve-irsad-electronics-de-ne-bas-verir-530864

Azərbaycan Avtomobil Yolları Dövlət Agentliyinin (AAYDA) tabeliyində olan "54№-li Yol İstismarı" Məhdud Məsuliyyətli Cəmiyyətinin də dövlət büdcəsinə külli miqdarda borcu yığılıb.

32gun.az yazır ki, Goranboy rayonunun Zeyvə kəndində qeydiyyatda olan idarənin vergi borcu hazırda 2.973.544,66 AZN təşkil edir.
MMC-nin qanuni təmsilçisi, rəisi Məzahir Yaqub oğlu Səlimovdur.