Xətai rayonu, Məhəmməd Hadi küçəsi 58A ünvanında, “Səfalı” MTK-ya məxsus çoxmərtəbəli yaşayış binalarının arasında yerləşən obyekt bina sakinlərinin narazılığına səbəb olub.
Yenixeberorg.com: Şikayətçilərin bildirdiyinə görə, sözügedən obyekt “Bazarstore” mağazasına məxsusdur.
Sakinlər deyirlər ki, mağazanın yaşayış binalarının düz ortasında yerləşməsi fövqəladə hadisə zamanı ciddi təhlükə yarada bilər. Onların sözlərinə görə, yanğın baş verəcəyi təqdirdə yanğınsöndürmə və digər xüsusi texnikanın əraziyə daxil olması mümkünsüzləşəcək.
Onlar aidiyyəti qurumlardan problemin araşdırılmasını istəyiblər.
Məsələ ilə bağlı “Səfalı Ticarət Mərkəzi” ASC ilə əlaqə saxlamaq mümkün olmadı. ASC-nin internetdə rəsmi saytı və əlaqə nömrəsi yoxdur.
“Bazarstore” isə məsələyə münasibət bildirməkdən imtina etdi.
Xətai Rayon İcra Hakimiyyətindən bildirilib ki, məsələ qurumun səlahiyyətlərinə aid deyil.
Fövqəladə Hallar Nazirliyinə də sorğu ünvanladıq. Nazirlikdən “Bakupost”a bildirildi ki, “Bəzi çoxmənzilli binaların istismarına icazə verilməsinin sadələşdirilməsi haqqında” Azərbaycan Respublikası Prezidentinin 2019-cu il 19 fevral tarixli 529 nömrəli Fərmanına uyğun olaraq 30 dekabr 2019-cu il tarixində “Səfalı Ticarət Mərkəzi” ASC tərəfindən inşa olunmuş 4 girişli 12 və 16 mərtəbəli yaşayış binalarının istismarına icazə aktı rəsmiləşdirilib:
FHN-dən həmçinin qeyd olunub ki, sözügedən ünvanda Nazirliyin Dövlət Yanğın Nəzarəti Xidməti tərəfindən sonuncu dəfə 2026-cı ilin aprel ayında keçirilən yanğın-texniki müayinə zamanı yanğın təhlükəsizliyi qaydalarının tələblərinin pozulması faktları aşkarlanıb.
“Qeyd olunan pozuntularla bağlı binanın yanğın təhlükəsizliyinə cavabdeh şəxs barəsində inzibati xəta haqqında protokol tərtib olunub”, - deyə Nazirlikdən bildirilib.
Dövlət Şəhərsalma və Arxitektura Komitəsindən isə bildirilib ki, sözügedən yaşayış kompleksi üzrə layihə sənədləri Komitə tərəfindən razılaşdırılmayıb.
Qurumun açıqlamasında qeyd olunub ki, yaşayış kompleksinin tikintisi Komitəyə layihə sənədlərinin razılaşdırılması və tikintiyə icazələrin verilməsi ilə bağlı səlahiyyətlər həvalə edilməzdən əvvəl həyata keçirilib:
“Qeyd olunan səlahiyyətlər Azərbaycan Respublikası Prezidentinin 2018-ci il 1 avqust tarixli 226 nömrəli "Şəhərsalma fəaliyyəti sahəsində idarəetmənin təkmilləşdirilməsi ilə bağlı əlavə tədbirlər haqqında" Fərmanı ilə Dövlət Şəhərsalma və Arxitektura Komitəsinə həvalə edilib.
Bu səbəbdən sorğunuzda qeyd olunan layihə sənədlərinin razılaşdırılması, tikintiyə icazənin verilməsi, habelə obyektin tikintisi dövründə qüvvədə olmuş normativ tələblərə uyğunluğu ilə bağlı həmin dövrdə müvafiq səlahiyyətləri həyata keçirmiş aidiyyəti icra hakimiyyəti orqanına müraciət etməyiniz məqsədəuyğundur”.
Qeyd edək ki, “Səfalı” MTK ilə bağlı müxtəlif vaxtlarda mediada bir sıra iddialar dərc olunub. Həmin materiallarda tikinti qaydalarına əməl edilməməsi, işçilərin əmək hüquqlarının pozulması, əmək müqaviləsi olmadan işə cəlb edilmə və vergi pozuntuları ilə bağlı iddialar yer alıb.
Bu ilin fevral ayında isə “Səfalı” MTK-dan mənzil alan sakinlərin binanın idarə olunması ilə bağlı problemlərdən şikayət etdiyi barədə məlumatlar yayılıb.
Lalə Novruz,
BakuPost

Qarabağ Regional Təhsil İdarəsində baş verənlərlə bağlı səslənən iddialar artıq adi narazılıq həddini keçib. Müəllimlərin və təhsil işçilərinin iddiaları, kadr məsələləri, əmək münasibətləri və satınalmalar ciddi araşdırma tələb edir.

Bizə danışan və Sənan Mənsimlini yaxından tanıyan mənbənin sözlərinə görə, məktəblərdə texniki işçilərin, kitabxanaçıların, laborantların və digər əməkdaşların işə qəbulunda idarə rəhbərliyinin razılığı mühüm rol oynayır. Mənbə müəllimlərin müqavilələrinin uzadılması ilə bağlı da qeyri-rəsmi müdaxilələrdən danışır və bu proseslərdə pul tələb edildiyini iddia edir.

İdarənin fəaliyyəti ilə bağlı açıq mənbələrdə də diqqətçəkən faktlar var.

2025-ci ildə Xankəndi şəhər 4 nömrəli məktəbdə müəllimin elektron əmr olmadan işə başladığı və altı ay əməkhaqqı aldığı müəyyənləşib. Məsələ ilə bağlı məktəb direktorunun müavininə 3 min manat cərimə tətbiq edilsə də, məhkəmə sonradan bu cəriməni ləğv edib.

2026-cı ilin iyununda isə Qarabağ Regional Təhsil İdarəsinin fiziki şəxs Sadıqov Hidayət Məcid oğlu ilə 16 min manatlıq bina icarəsi müqaviləsi bağladığı, satınalmanın birmənbə metodu ilə həyata keçirildiyi barədə məlumat yayılıb.

Birmənbəli satınalma öz-özlüyündə qanunsuzluq deyil. Amma dövlət qurumunun belə müqaviləni hansı əsasla bağladığı və qiymətin necə müəyyənləşdirildiyi izaha ehtiyac yaradır.

Sənan Mənsimlinin təhsil sistemində sürətli yüksəlişi də ayrıca suallar doğurur.

Mənsimli Azərbaycan Texnologiya Universitetində “Telekommunikasiya, rabitə qovşaqları və kommunikasiya sistemləri” ixtisası üzrə təhsil alıb. Bu ixtisasa isə minimal keçid balı ilə daxil olmaq mümkündür. Daha sonra 13 saylı Ərazi Maliyyə Hesablaşma Mərkəzinə rəhbərlik edib, 2022-ci ildə Şirvan-Salyan Regional Təhsil İdarəsinin, 30 oktyabr 2024-cü ildə isə Qarabağ Regional Təhsil İdarəsinin rəhbəri təyin olunub.

Tendensiya.com-a danışan və Mənsimlini yaxından tanıdığını bildirən mənbənin sözlərinə görə, onun Elm və təhsil naziri Emin Əmrullayevlə tanışlığı Biləsuvarla bağlı bir səfər zamanı başlayıb.

Mənbənin iddiasına görə, həmin vaxt Mənsimlinin əmisi Kamil müəllim Biləsuvar Rayon İcra Hakimiyyətində çalışıb. Emin Əmrullayev Biləsuvara səfər edərkən Mənsimli ona bələdçilik edib. Bundan sonra aralarında yaxın münasibət yaranıb və Mənsimli sonrakı mərhələdə təhsil sistemində vəzifələrə gətirilib.

Mənbə bunu belə izah edir: “Özü münasibət yaradıb. Sonra dostlaşıblar, qonaq aparıb. Həmin vaxtdan bunu çəkib irəli”.

Sabiq deputat Etibar Əliyev də onun təyinatını kəskin tənqid edib və Mənsimlinin Emin Əmrullayevlə yaxın münasibətlərinin rol oynadığını iddia edib.

Burada əsas sual sadədir: Mənsimli hansı peşəkar meyarlarla bu vəzifələrə gətirilib?

Əgər Qarabağ Regional Təhsil İdarəsində rüşvət və korrupsiya barədə səslənən iddialar əsassızdırsa, hərtərəfli yoxlama bunu ortaya qoymalıdır.

Əksinə, əgər iddiaların arxasında real mexanizm varsa, kadr təyinatlarından tutmuş müqavilələrə, satınalmalara və pul dövriyyəsinə qədər hər şey araşdırılmalıdır.

Məsələ o həddə çatıb ki, artıq “idarədə hər şey qaydasındadır” tipli ümumi açıqlama kifayət etmir.

İdarədə tam maliyyə və kadr yoxlaması keçirilməlidir.

Əgər hər hansı vəzifəli şəxsin cinayət məsuliyyətinə səbəb ola biləcək əməli müəyyənləşərsə, həmin şəxs vəzifəsindən və əlaqələrindən asılı olmayaraq qanun qarşısında cavab verməlidir. Bu halda heç bir dostluq münasibəti, o cümlədən nazirlə yaxınlıq barədə iddialar heç kimi məsuliyyətdən kənarda saxlaya bilməz.

Çünki söhbət 357 məktəbdən, 18 mindən çox müəllimdən və 84 mindən artıq şagirddən gedir.

Qarabağ təhsil sistemi şəxsi münasibətlərin deyil, qanunun və peşəkarlığın üzərində qurulmalıdır.

İndi əsas sual budur: Qarabağ Regional Təhsil İdarəsində hərtərəfli yoxlama nə vaxt keçiriləcək?(tendensiya.com)

2021-ci ildə Azərbaycan Yazıçılar Birliyinin üzvləri üçün mənzil şəraitinin yaxşılaşdırılması məqsədi ilə dövlət başçısının sərəncamına əsasən ayrılmış torpaq səhəsində tikilən bina, Bakı şəhəri, Binəqədi rayonu, Binəqədi şossesi, S.S. Axundov küçəsinin şimal hissəsində yerləşir. Azərbaycan Yazıçılar Birliyi və “Xəmsə Palace 2021” MTK bağlanılan müqaviləyə əsasən binadan yazıçılara 21 mənzil verilib. Şirkətlə sakinlər arasında 08/17/2023-cü il tarixində müqavilə bağlanılsa da bina və yerləşdiyiyi ərazi hələ də yaşayış üçün yararsız haldadır. Azərbaycan Yazıçılar Birliyinindən mənzil alanlar sırasında Əməkdar incəsənət xadimi, yazıçı dramaturq Firuz Mustafa, AR Mədəniyyət Nazirliyinin “Qızıl kəlmə” və Qazaxstan respublikasının “ Alaş” mükafatları laureatı Elxan Zal Qaraxanlı, Rauf Aslanov, Seyran Səxavət, Xanəmir, Dəyanət Osmanlı kimi məşhur imzalar var. Yazıçıların narazılığına səbəb olan əsas məsələlərdən biri də, sakinlərdən təmirə başlamaq haqqı üçün 2500 AZN və mənzillərə qoyulmuş sayğaclar üçün 2600 AZN pul tələb edilməsidir. Bu barədə redasiyamıza məlumat verən şair Elxan Zal Qaraxanlı, belə absurd tariflərlə Bakının heç bir yerində rastlaşmadıqlarını bildirir. Onun dediyinə görə, “bu, həddən artıq şişirdilmiş rəqəmdir və “Xəmsə-Palase” MTK sanki “Xəmsə”sini özəlləşdirdiyi Nizami Gəncəvinin adından, cənab Presidentin mənzil verdiyi yazıçılardan xərac tələb edir. Cənab prezidend yazıçıların mənzil şəraitinin yaxşılaşdırılmasına ona görə yardım edir ki, bu gün yazıçılıq sənəti ciddi pul gətirməyən bir sahədir. Prezidentimizin və Anar müəllimin göstərdikləri qayğı sayəsində təmirsiz mənzil alan kasıb yazıçılardan hələ mənzillərin təmirinə başlamamış “Xəmsə-Palase” MTK tərəfindən 5-6 min manat pul tələb edilir, yəni mənzil alanların bezdirilərək, aldıqları mənzillərin şirkətə ucuz qiymətə satmağa məcbur etdirilməsi siyasəti həyata keçirilir. Artıq bir çox yazıçıların mənzilləri MTK tərəfindən ucuz qiymətə satın alınmış və xeyli baha qiymətə satışa çıxarılmışdır. Yazıçı nəyə görə, dövlət başçısı tərəfindən ona lütf edilmiş mənzildən imtina etməlidir?”
Xatırladaq ki, Elxan Zal Qaraxanlı müstəqillik dövrünün ən yaxşı poetik imzalarından biri hesab olunmaqla bərabər, böyük Hind - Pakistan şairi Məhəmməd İqbal və xallqımızın böyük dostu, qazax şairi Olyas Suleymenovun poetik irsini ilk dəfə Azərbaycan dilinə çevirib kitab şəklində nəşr etdirən adamdır. Şikayət edən yazıçılar arasında Firuz Mustafa, Dəyanət Osmanlı, Xanəmir kimi tanınmış imzalar var. Yazıçılar Birliyinin, “Xəmsə-Palase” MTK-nın və aidiyyatı gövlət qurumlarının məsələyə münasibətini növbəti yazımızda bildirəcəyik.
Yazıçılardan başqa binanın digər sakinləri də MTK rəhbərliyin yarıtmaz işindən narazılıq edirlər.
Mövzuya qayıdacağıq.

Nyus.Az

Xətai rayonu, Məhəmməd Hadi küçəsi 58A ünvanında, “Səfalı” MTK-ya məxsus çoxmərtəbəli yaşayış binalarının arasında yerləşən obyekt bina sakinlərinin narazılığına səbəb olub.

Şikayətçilərin “Bakupost”a bildirdiyinə görə, sözügedən obyekt “Bazarstore” mağazasına məxsusdur.

Sakinlər deyirlər ki, mağazanın yaşayış binalarının düz ortasında yerləşməsi fövqəladə hadisə zamanı ciddi təhlükə yarada bilər. Onların sözlərinə görə, yanğın baş verəcəyi təqdirdə yanğınsöndürmə və digər xüsusi texnikanın əraziyə daxil olması mümkünsüzləşəcək.

Onlar aidiyyəti qurumlardan problemin araşdırılmasını istəyiblər.

Məsələ ilə bağlı “Səfalı Ticarət Mərkəzi” ASC ilə əlaqə saxlamaq mümkün olmadı. ASC-nin internetdə rəsmi saytı və əlaqə nömrəsi yoxdur.

“Bazarstore” isə məsələyə münasibət bildirməkdən imtina etdi.

Xətai Rayon İcra Hakimiyyətindən “Bakupost”a bildirilib ki, məsələ qurumun səlahiyyətlərinə aid deyil.

Fövqəladə Hallar Nazirliyinə də sorğu ünvanladıq. Nazirlikdən “Bakupost”a bildirildi ki, “Bəzi çoxmənzilli binaların istismarına icazə verilməsinin sadələşdirilməsi haqqında” Azərbaycan Respublikası Prezidentinin 2019-cu il 19 fevral tarixli 529 nömrəli Fərmanına uyğun olaraq 30 dekabr 2019-cu il tarixində “Səfalı Ticarət Mərkəzi” ASC tərəfindən inşa olunmuş 4 girişli 12 və 16 mərtəbəli yaşayış binalarının istismarına icazə aktı rəsmiləşdirilib:

FHN-dən həmçinin qeyd olunub ki, sözügedən ünvanda Nazirliyin Dövlət Yanğın Nəzarəti Xidməti tərəfindən sonuncu dəfə 2026-cı ilin aprel ayında keçirilən yanğın-texniki müayinə zamanı yanğın təhlükəsizliyi qaydalarının tələblərinin pozulması faktları aşkarlanıb.

“Qeyd olunan pozuntularla bağlı binanın yanğın təhlükəsizliyinə cavabdeh şəxs barəsində inzibati xəta haqqında protokol tərtib olunub”, - deyə Nazirlikdən bildirilib.

Dövlət Şəhərsalma və Arxitektura Komitəsindən isə “Bakupost”a bildirilib ki, sözügedən yaşayış kompleksi üzrə layihə sənədləri Komitə tərəfindən razılaşdırılmayıb.

Qurumun açıqlamasında qeyd olunub ki, yaşayış kompleksinin tikintisi Komitəyə layihə sənədlərinin razılaşdırılması və tikintiyə icazələrin verilməsi ilə bağlı səlahiyyətlər həvalə edilməzdən əvvəl həyata keçirilib:

“Qeyd olunan səlahiyyətlər Azərbaycan Respublikası Prezidentinin 2018-ci il 1 avqust tarixli 226 nömrəli "Şəhərsalma fəaliyyəti sahəsində idarəetmənin təkmilləşdirilməsi ilə bağlı əlavə tədbirlər haqqında" Fərmanı ilə Dövlət Şəhərsalma və Arxitektura Komitəsinə həvalə edilib.

Bu səbəbdən sorğunuzda qeyd olunan layihə sənədlərinin razılaşdırılması, tikintiyə icazənin verilməsi, habelə obyektin tikintisi dövründə qüvvədə olmuş normativ tələblərə uyğunluğu ilə bağlı həmin dövrdə müvafiq səlahiyyətləri həyata keçirmiş aidiyyəti icra hakimiyyəti orqanına müraciət etməyiniz məqsədəuyğundur”,- deyə Komitədən bildirilib.

Qeyd edək ki, “Səfalı” MTK ilə bağlı müxtəlif vaxtlarda mediada bir sıra iddialar dərc olunub. Həmin materiallarda tikinti qaydalarına əməl edilməməsi, işçilərin əmək hüquqlarının pozulması, əmək müqaviləsi olmadan işə cəlb edilmə və vergi pozuntuları ilə bağlı iddialar yer alıb.

Bu ilin fevral ayında isə “Səfalı” MTK-dan mənzil alan sakinlərin binanın idarə olunması ilə bağlı problemlərdən şikayət etdiyi barədə məlumatlar yayılıb.

Bakı şəhərində avtobus dayanacaqlarının qarşısında quraşdırılan marşrut məlumat lövhələrinin yenilənməməsi sərnişinlər və turistlər üçün ciddi problemlər yaradır. Dayanacaqda gözləyən insanların hansı avtobusların həmin ərazidən keçdiyini öyrənə bildiyi əsas mənbələrdən biri olan bu lövhələr uzun illərdir dəyişdirilmədən qalır.

Bizimesr.media xəbər verir ki, vaxtilə dayanacaqlarda avtobus marşrutlarını göstərən elektron məlumat lövhələri quraşdırılmışdı. Bu layihəyə böyük vəsait xərclənsə də, sonradan həmin avadanlıqların bir hissəsi sıradan çıxdı və elektron lövhələri adi metal lövhələr əvəzlədi. Lakin hazırda istifadə olunan bu lövhələr yenilənmir və funksiyasını itirib.
Məsələn, Bilgəh-Koroğlu istiqamətində uzun müddət fəaliyyət göstərən 171 nömrəli avtobus marşrutu bir ildən artıqdır ki, dəyişdirilərək 150 nömrəli marşrutla əvəzlənib. Buna baxmayaraq, dayanacaqlarda hələ də köhnə məlumatlar saxlanılır və 171 nömrəli avtobusun gələcəyi göstərilir. Nəticədə sərnişinlər, turlstlər saatlarla həmin avtobusu gözləyir, daha sonra isə məlum olur ki, bu marşrut artıq ləğv edilib.
Eyni vəziyyət digər marşrutlarda da müşahidə olunur. Məsələn, bəzi dayanacaqlarda 136 nömrəli avtobus marşrutu göstərilsə də, bu istiqamətdə artıq 140 nömrəli marşrut fəaliyyət göstərir.

Bakı şəhərində nəqliyyat məlumatlarının aktuallığı sərnişin rahatlığı üçün vacib məsələlərdən biridir. Azərbaycan Yerüstü Nəqliyyat Agentliyi tərəfindən bu cür lövhələrin vaxtında yenilənməsi və ya müasir elektron məlumat sistemləri ilə əvəzlənməsi təmin edilməlidir.
Qurumun rəhbərliyi tərəfindən bu məsələyə diqqət ayrılmır.
Aidiyyəti qurumlar bu problemi aradan qaldırmalı, Bakıdakı avtobus dayanacaqlarında marşrut məlumatlarının düzgün və operativ şəkildə yenilənməsini təmin etməlidir.
Qeyd edək ki, Azərbaycan Yerüstü Nəqliyyat Agentliyinin direktoru Anar Rzayevdir.
Bizimesr.media

Azərbaycan Prezidenti İlham Əliyev Bakıda səfərdə olan Ukraynanın sabiq Prezidenti Viktor Yuşenko ilə görüşüb.

Bu barədə dövlət başçısı "X" hesabında qeyd edib.

"20 ildən artıq davam edən tanışlığımız əsnasında xoş xatirələrimizi bölüşdük, Azərbaycan–Ukrayna münasibətlərinin möhkəmləndirilməsi istiqamətində gördüyümüz birgə işləri xatırladıq və əlaqələrin gələcək perspektivləri barədə fikir mübadiləsi apardıq. Görüş zamanı Ukraynanın Azərbaycandakı səfiri tərəfindən mənə "İrpin şəhərinin fəxri vətəndaşı" vəsiqəsi təqdim edildi", - deyə paylaşımda qeyd edilib.

Bakı Ağır Cinayətlər Məhkəməsində Sabunçu rayonu, F.Bayramov adına 22 saylı tam orta məktəbin sabiq direktoru, rüşvət almaqda təqsirləndirilən Cavad Səfərovun cinayət işinin bəzi detalları məlum olub.

Pravda.az-ın əldə etdiyi məlumata görə, hakim Eldar İsmayılovun sədrliyi ilə keçirilən prosesdə ittiham aktı elan olunub.

İttihama əsasən, təqsirləndirilən şəxs Təhsil Nazirliyi Bakı şəhəri üzrə Təhsil İdarəsinin 2012-ci il tarixli əmri ilə paytaxtın Sabunçu rayonu, F.Bayramov adına 22 saylı tam orta məktəbin təlim-tərbiyə işləri üzrə direktor müavini vəzifəsinə təyin edilib. Daha sonra o, Bakı şəhəri üzrə Təhsil İdarəsinin 2014-cü il tarixli əmri ilə 2016-cı ilədək həmin məktəbin direktoru vəzifəsini icra edib.

Məlumata görə, 1964-cü il təvəllüdlü Cavad Səfərov məktəb direktoru vəzifəsini icra etdiyi dövrdə təşkilati-sərəncamverici və inzibati-təsərrüfat funksiyalarını həyata keçirən vəzifəli şəxs olub. O, məktəbdə şagirdlərin sayı az olan siniflərdən komplekt siniflərin təşkil edilməsi, ştat cədvəlinin hazırlanması, kadrların seçilməsi və işə qəbul edilməsi, habelə işçilərin əməkhaqlarının müəyyənləşdirilməsi ilə bağlı səlahiyyətlərə malik olub.

Bundan başqa, ittihamda qeyd edilir ki, təqsirləndirilən şəxs məktəbin tədris-pedaqoji və maliyyə-təsərrüfat sənədlərinin düzgün aparılmasına, məktəbə məxsus əmlakın qorunmasına və təyinatı üzrə istifadəsinə cavabdeh şəxslərin müvafiq əmrlə təyin edilməsinə dair səlahiyyətlərə malik olub.

İttihama görə, hadisə 2015-ci ilin avqust ayının əvvəllərində baş verib. Həmin vaxt məktəbdə direktor vəzifəsini icra edən Cavad Səfərova tanışı Ruxsarə Babayeva müraciət edərək təsərrüfat işləri üzrə müdir vəzifəsinə təyin olunmasını istəyib. Təqsirləndirilən şəxs həmin qadının xeyrinə edəcəyi hərəkətə görə – onu məktəbə xadimə kimi işə qəbul etməsi, faktiki olaraq təsərrüfat işləri üzrə müdir vəzifəsini icra etməsinə şərait yaratması və xidmət üzrə ümumi himayədarlıq göstərməsi müqabilində ondan 6 000 manat rüşvət istəyib. Pul məktəbin Bakı şəhəri, Sabunçu rayonu, Maştağa qəsəbəsi, Daş karxanası ərazisində yerləşən inzibati binasındakı xidməti otaqda tələb edilib.

2015-ci ilin avqust ayının sonlarında Ruxsarə Babayeva Cavad Səfərova xidməti otağında 5 500 manat pul verib. Bundan sonra təqsirləndirilən şəxsin 2015-ci il tarixli əmri ilə Ruxsarə Babayeva həmin məktəbdə xadimə vəzifəsinə təyin edildiyi bildirilir.

İstintaqın gəldiyi nəticəyə görə, Cavad Səfərov bununla həmin şəxsin faktiki olaraq təsərrüfat işləri üzrə müdir vəzifəsini icra etməsinə qanunsuz şərait yaradıb və aldığı pul müqabilində ona xidmət üzrə ümumi himayədarlıq edib.

Beləliklə, cinayət işi üzrə ittiham tərəfinin mövqeyinə əsasən, təqsirləndirilən şəxs vəzifə səlahiyyətlərindən istifadə etməklə Ruxsarə Babayevanın xadimə vəzifəsinə qəbul edilməsinə və faktiki olaraq daha yüksək səlahiyyətlərə malik işi həyata keçirməsinə şərait yaratmaq müqabilində əvvəlcə 6 000 manat tələb edib, 5 500 manat rüşvət alıb.

Məhkəmə iclasında ifadə verən Cavad Səfərov isə elan olunmuş ittiham üzrə özünü təqsirli bilməyib. O deyib ki, Ruxsarə Babayeva 2015-ci ilin oktyabrında onun yanına gələrək işsiz olduğunu və məktəbdə xadimə işləmək istədiyini deyib.

Təqsirləndirilən şəxsin sözlərinə görə, həmin vaxt məktəbdə boş ştat olub və o, qadını işə götürəcəyini bildirib, daha sonra sənədlərini alıb. O, Ruxsarə Babayevanın vəzifəsinin məktəbin təmizlik işlərini həyata keçirməkdən ibarət olduğunu deyib.

Cavad Səfərov məhkəmədə söyləyib ki, təsərrüfat işləri üzrə müdiri vəzifəsi eyni zamanda direktor müavini vəzifəsidir və həmin vəzifəyə şəxsin işə qəbul edilməsi məktəb direktorunun səlahiyyətində deyil: “Bunun üçün Bakı şəhəri üzrə Təhsil İdarəsinin əmri tələb olunur”.

Təqsirləndirilən şəxs bu səbəbdən Ruxsarə Babayevanın təsərrüfat işləri üzrə müdir vəzifəsinə təyin etmək səlahiyyətinin olmadığını bildirib. O, qadından bunun müqabilində hər hansı məbləğdə pul almadığını vurğulayıb.

Cavad Səfərov bildirib ki, Ruxsarə Babayevanın müraciəti əsasında onu yalnız texniki işçi kimi işə qəbul edib və bunun üçün ondan heç bir pul almayıb.

O, həmçinin Ruxsarə Babayevaya hər hansı məbləğdə pul qaytarmadığını da deyib.

Məhkəmədəki ifadəsində təqsirləndirilən şəxs məktəbdə anbarın açarının və mallara nəzarətin təsərrüfat müdirində olduğunu, digər şəxsin isə anbara müdaxilə etmək səlahiyyətinin olmadığını əlavə edib.

Cavad Səfərovun sözlərinə görə, xadimələr arasında iş bölgüsünü də təsərrüfat işləri üzrə direktor müavini həyata keçirib.

Hökmə əsasən, Cavad Səfərov 8 il müddətinə azadlıqdan məhrum edilib. Sabiq direktorun cəzası şərti hesab edilməklə ona iki il sınaq müddəti təyin edilib. Məhkəmə kollegiyası təqsirləndirilən şəxsin şəxsiyyətini, yaşını, baş vermiş cinayət hadisəsinin üstündən xeyli müddət keçməsini, keçmiş məcburi köçkün olmasını, yaşadığı ərazi üzrə müsbət xarakterizə olunmasını nəzərə alaraq, onun cəza çəkmədən də islah oluna biləcəyini mümkün hesab edib.

SOCAR ətrafında son dövrlərdə diqqət çəkən ziddiyyətli mənzərə yaranıb: bir tərəfdən yeni şirkətlər yaradılır, digər tərəfdən isə mövcud strukturlarda işçilərin ixtisarı və “optimallaşdırma” prosesləri barədə məlumatlar yayılır. Təbii olaraq ortaya sual çıxır: **Əgər yeni fəaliyyət istiqamətləri üçün şirkətlər yaratmağa ehtiyac varsa, onda niyə mövcud işçi qüvvəsinin bir hissəsi işdən çıxarılır?**
Bu suala cavab vermək üçün əvvəlcə “yeni şirkət yaradılması” ilə “yeni iş yerlərinin yaradılması” anlayışlarını bir-birindən ayırmaq lazımdır.
Yeni şirkət mütləq yeni iş yeri demək deyil
2026-cı ilin iyulunda “SOCAR Drilling” MMC-nin dövlət qeydiyyatına alındığı barədə məlumat yayıldı. Məlumata görə, bu, ilin əvvəlindən SOCAR brendi ilə yaradılan altıncı şirkət olub.
SOCAR-ın öz korporativ strukturunda da törəmə və asılı şirkətlər sistemi uzun illərdir mövcuddur. Məsələn, şirkətin sənədlərində törəmə müəssisə, asılı şirkət, birgə müəssisə və digər hüquqi formalar ayrıca müəyyənləşdirilir.
Deməli, yeni MMC-nin yaradılması avtomatik olaraq SOCAR-ın ümumi işçi sayının artacağı anlamına gəlmir. Yeni şirkət müəyyən bir fəaliyyət istiqamətini ayrıca idarə etmək, maliyyə və məsuliyyətləri ayırmaq, investisiya cəlb etmək, tərəfdaşlarla işləmək və ya daha çevik kommersiya strukturu yaratmaq məqsədi daşıya bilər.
Amma məhz burada əsas sual yaranır: bu strukturlaşma işçinin xeyrinə, yoxsa yalnız idarəetmənin və maliyyə modelinin dəyişdirilməsinə xidmət edir?**
“Optimallaşdırma” sözünün arxasında nə dayanır?
Son aylarda SOCAR-da ixtisarlarla bağlı müxtəlif məlumatlar yayılıb. Bəzi məlumatlarda əsasən fəhlələrin və aşağı pillədə çalışan əməkdaşların ixtisar edildiyi, inzibati və baş ofis strukturlarında isə yeni vəzifələrin yaradıldığı iddia olunur.
Bu iddiaların hamısını təsdiqlənmiş fakt kimi qəbul etmək düzgün olmaz. Lakin məsələni araşdırmaq üçün kifayət qədər ciddi sual yaradır.
Əgər məqsəd həqiqətən səmərəliliyi artırmaqdırsa, optimallaşdırmanın meyarları ictimaiyyətə aydın izah edilməlidir.
Neçə ştat ixtisar olunub?
Neçə yeni ştat yaradılıb?
İnzibati heyətin sayı necə dəyişib?
Fəhlələrin sayı necə dəyişib?
Yeni yaradılan şirkətlərdə hansı vəzifələr açılır?
İxtisar olunan işçilərə həmin yeni şirkətlərdə işləmək imkanı yaradılırmı?
Bu suallar cavabsız qaldıqda “optimallaşdırma” ifadəsi cəmiyyətdə haqlı olaraq şübhə yaradır.
Bir struktur bağlanır, digəri niyə yaradılır?
Dövlət şirkətlərində struktur dəyişikliklərinin iqtisadi məntiqi ola bilər. Məsələn, müəyyən fəaliyyət növünün ayrıca hüquqi şəxsə keçirilməsi onun gəlir və xərclərinin ayrıca uçotuna, idarəetmənin sadələşdirilməsinə və kommersiya fəaliyyətinin daha çevik aparılmasına imkan verə bilər.
SOCAR-ın idarəetmə modelinin təkmilləşdirilməsi də yeni məsələ deyil. 2021-ci ildə SOCAR-ın Müşahidə Şurasının yaradılması ilə şirkətin korporativ idarəetmə modelinin gücləndirilməsi nəzərdə tutulmuşdu. Həmin sənəddə SOCAR-ın strukturunun təsdiqi, maliyyə hesabatlarının və dividend siyasətinin müəyyənləşdirilməsi kimi məsələlər ayrıca idarəetmə mexanizmlərinə bağlanmışdı.
Bu baxımdan yeni şirkətlərin yaradılması müəyyən strategiyanın tərkib hissəsi ola bilər.
Lakin burada vacib məsələ şəffaflıqdır.
Əsas problem: işçi ixtisarı deyil, ixtisarın necə aparılmasıdır
İqtisadi baxımdan şirkət hər zaman strukturunu dəyişə, xərcləri azalda və əmək məhsuldarlığını artırmağa çalışa bilər. Bu, özəl şirkətlərdə də, dövlət şirkətlərində də normal idarəetmə prosesidir.
Problem o zaman başlayır ki, “xərclərin azaldılması” əsasən sıravi işçinin işdən çıxarılması kimi görünür, eyni vaxtda yeni idarəetmə strukturları və vəzifələr yaradılır.
Çünki bir fəhlənin işdən çıxarılması ilə bir idarəçi vəzifəsinin yaradılmasının iqtisadi nəticəsi eyni deyil.
Əgər şirkət həqiqətən qənaət etmək istəyirsə, cəmiyyətin qarşısında daha geniş sual dayanır: **qənaət niyə ilk növbədə aşağı maaşlı işçinin hesabına aparılmalıdır?**
Bu sual xüsusilə neft-qaz sektorunda vacibdir. Çünki burada söhbət yalnız bir əmək müqaviləsindən getmir. Söhbət illərlə həmin sistemdə çalışmış, peşə təcrübəsi toplamış insanların gəlirindən, ailələrinin sosial vəziyyətindən və əmək bazarına reinteqrasiyasından gedir.
Dövlət şirkəti kommersiya şirkətinə çevrilirmi?
SOCAR dövlət şirkətidir, lakin eyni zamanda böyük kommersiya strukturu kimi fəaliyyət göstərir. Onun çoxsaylı törəmə və birgə müəssisələri mövcuddur.
Məsələn, “SOCAR Polymer” dövlət-özəl sektor tərəfdaşlığı nəticəsində yaranmış müəssisə kimi təqdim olunur və 2026-cı ilin ilk beş ayında qeyri-neft sektoru üzrə Azərbaycanın əsas dövlət ixracatçıları arasında yer alıb.
Bu model göstərir ki, SOCAR daxilində dövlət kapitalı ilə yanaşı, tərəfdaşlıq və ayrıca kommersiya strukturları da mühüm rol oynayır.
Bu prosesin özü mənfi deyil.
Əksinə, düzgün qurulduğu halda belə şirkətlər daha çevik, rəqabətqabiliyyətli və gəlirli bizneslər yarada bilər.
Amma əsas prinsip dəyişməməlidir: **struktur dəyişikliklərinin nəticəsi ölçülə bilən və ictimaiyyət üçün başadüşülən olmalıdır.**
Yeni şirkətlər işdən çıxarılanlar üçün imkan yaradırmı?
Əslində məsələnin ən maraqlı tərəfi də budur.
Əgər SOCAR yeni fəaliyyət sahələri üzrə şirkətlər yaradırsa, niyə struktur dəyişiklikləri nəticəsində işini itirən təcrübəli əməkdaşların bir hissəsi həmin şirkətlərə yönləndirilmir?
Məsələn, yeni şirkət yaradılırsa, onun kadr ehtiyacının müəyyən hissəsi mövcud SOCAR əməkdaşlarının daxili seçim yolu ilə qarşılanıla bilər. Bu halda həm təcrübəli kadr qorunar, həm də işçinin işsiz qalmasının qarşısı alınar.
Əgər belə mexanizm yoxdur və eyni vaxtda bir tərəfdən işçilər ixtisar edilir, digər tərəfdən yeni hüquqi şəxslərə kadr qəbulu aparılırsa, bu artıq daha ciddi izah tələb edən məsələdir.
İctimaiyyət hansı rəqəmləri bilməlidir?
SOCAR ətrafında gedən prosesləri düzgün qiymətləndirmək üçün emosional müzakirədən daha çox rəqəmlərə ehtiyac var.
Şirkət açıqlamalıdır:
* Son iki ildə ümumi işçi sayı nə qədər dəyişib?
* Neçə nəfər ixtisar olunub?
* Neçə yeni işçi qəbul edilib?
* Yeni yaradılan şirkətlərdə neçə ştat nəzərdə tutulub?
* Baş ofis və inzibati heyətin sayı necə dəyişib?
* Fəhlə və texniki heyətin sayı necə dəyişib?
* İxtisar olunan işçilərin yeni yaradılan şirkətlərə keçirilməsi üçün mexanizm varmı?
* Struktur dəyişiklikləri nəticəsində dövlət nə qədər qənaət edir?
Bu rəqəmlər açıqlanarsa, “SOCAR işçiləri niyə ixtisar edir?” sualına emosiyalarla yox, faktlarla cavab vermək mümkün olacaq.
Əsas sual budur: şirkət böyüyür, yoxsa sadəcə forması dəyişir?
Yeni şirkətlərin yaradılması SOCAR-ın kiçilməsi anlamına gəlmir. Əksinə, bu, şirkətin fəaliyyətini yeni hüquqi və kommersiya strukturları altında genişləndirməsi də ola bilər.
Amma əgər yeni şirkətlərin sayı artır, yeni vəzifələr yaranır, yeni layihələr başlayır, eyni zamanda mövcud əməkdaşların sayı azalırsa, cəmiyyətin soruşmağa haqqı var:
SOCAR-da həqiqətən optimallaşdırma gedir, yoxsa iş yerlərinin və idarəetmə strukturlarının yenidən bölüşdürülməsi prosesi aparılır?
Bu suala cavab vermək üçün isə şüarlar yox, açıq statistika lazımdır.
Çünki dövlət şirkətində aparılan struktur dəyişikliyi yalnız menecmentin daxili məsələsi deyil. Burada söhbət minlərlə insanın əmək və sosial təminatından, dövlət aktivlərinin idarə olunmasından və nəticə etibarilə cəmiyyətin maraqlarından gedir.
Yeni şirkət yaratmaq asandır. Əsas məsələ həmin şirkətlərin neçə yeni iş yeri yaratdığını və eyni vaxtda neçə mövcud iş yerinin niyə itirildiyini izah etməkdir.
Sos Xəbər

Zaqatala Rayon İcra Hakimiyyəti tərəfindən küçələrin cari təmiri, yanacaq alınması, kommunal binaların bərpası, eləcə də məhəllədaxili yolların və çoxmənzilli binaların həyətlərinin asfaltlaşdırılması adı altında külli miqdarda vəsait ayrılaq təkrar-

təkrar tenderlər elan edilib.

NOCOMMENT.az xəbər verir ki, lakin aparılan təhlillər zamanı maraqlı və şübhə doğuran məqamlar üzə çıxıb.

Məlum olub ki, tenderlərin qalibi olan şirkətlərin əksəriyyəti eyni müəssisələrdən ibarətdir, ayrılan maliyyə və görülən işlər isə hər il demək olar ki, eyni ünvanları əks etdirir. Bu yaxın tarixlərdə eyni ünvanlara dəfələrlə vəsaitlərin ayrılması ciddi maliyyə pozuntuları ehtimalını ortaya qoyur.

Məsələn, Zaqatala şəhəri Faiq Əmirov küçəsi 286 saylı binanın həyətində abadlıq işlərinin aparılması məqsədilə 2025-ci ilin 8-ci və 10-cu aylarına təsadüf edən qısa müddət ərzində dəfələrlə vəsait əldə olunub. Həmin tarixlərə nəzər salsaq:

* 27.10.2025 tarixində 45.368,37 AZN

* 29.08.2025 tarixində 24.730,59 AZN

* 28.08.2025 tarixində isə 21.663,51 AZN olmaqla ümumilikdə təxminən 90 min manatlıq abadlıq maliyyəsi ayrılıb və bütün bu müqavilələr eyni MMC – "İstehsal Təmir Sahəsi" Məhdud Məsuliyyətli Cəmiyyəti ilə bağlanıb.

Eyni hal Vaqif İsmayılov küçəsi 7 saylı binanın həyəti ilə bağlı Tenderlərdə də təkrarlanıb. Həmin ünvandakı abadlıq işləri üçün də eyni şirkətə yaxın tarixlərdə fərqli məbləğlərdə – 28.124,67 AZN (23.10.2025), 20.249,7 AZN (26.08.2025) və 36.612 AZN (19.05.2025) olmaqla vəsaitlər ayrılıb.

Bənzər vəziyyət asfaltlaşdırma işlərini həyata keçirən "VNM İnşaat" MMC-nin də tenderlərində müşahidə olunub. Belə ki, Zaqatala şəhərinin küçələrinin asfaltlaşdırılması üzrə 26.11.2025 tarixində 575.559,63 AZN, qısa bir neçə gün sonra – 04.12.2025 tarixində isə yenidən 138.991,02 AZN məbləğində tender rəsmiləşdirilib ki, bu da cəmiyyətdə işlərin real olaraq yerinə yetirilib-yetirilməməsi sualını doğurur.

Eyni işlərə və ünvanlara təkrarən dövlət büdcəsindən vəsaitlərin ayrılması Dövlət Satınalmaları Qanununun və büdcə intizamının kobud şəkildə pozulması şübhələrini artırır. Buna görə də Hesablama Palatası və Maliyyə Nazirliyi tərəfindən rayonda ayrılan tenderlərə və görülən işlərə audit yoxlamalarının aparılması zəruri hesab olunur.

Son illər ərzində Zaqatala rayonuna ayrılan əsas tenderlərin siyahısı aşağıdakılardır:

* "İstehsal Təmir Sahəsi" MMC: Zaqatala şəhərinin Ərəblinski küçəsində yağış sel sularının kənarlaşdırılması üçün arxların cari təmiri işləri – 28.290,5 AZN

* "Qafqaz-oil" MMC: Dizel yanacağı və benzin Ai92 alınması – 27.141 AZN

* "Zaqatala-2016" MMC: Şəhər ərazisində yerləşən kommunal binalarda təmir və bərpa işləri – 70.927,38 AZN

* "VNM İnşaat" MMC: Məhəllədaxili yolların və çoxmənzilli binaların həyətlərinin asfaltlaşdırılması – 138.991,02 AZN

* "VNM İnşaat" MMC: Zaqatala şəhərinin küçələrinin asfaltlaşdırılması işlərinin həyata keçirilməsi – 575.559,63 AZN

* "İstehsal Təmir Sahəsi" MMC: Faiq Əmirov küçəsi 286 saylı binanın həyətində abadlıq işləri – 45.368,37 AZN, 24.730,59 AZN və söhbətgahların quraşdırılması üçün 21.663,51 AZN

* "İstehsal Təmir Sahəsi" MMC: Vaqif İsmayılov küçəsi 7 saylı binanın həyətində abadlıq işləri – 36.612 AZN, 28.124,67 AZN və söhbətgahların tikintisi üçün 20.249,7 AZN

* "Balakən Kommunal-2011" MMC: Maşın, avadanlıq, nəqliyyat ehtiyat hissələri və inventarların satınalınması – 24.606,4 AZN

* "Servis Universal" MMC: Kebeloba məktəb yolunun kənarında su arxının quraşdırılması – 22.840 AZN, həmçinin mənzil fondunun təmiri – 54.534,5 AZN, Vasif Qurbanov və Aslanbey Qardaşov küçələrində binaların dam örtüklərinin təmiri – 23.055 AZN

* "Nur General Supplier" MMC: Avtomobillərin cari təmiri və yağ dəyişdirilməsi xidmətləri – 36.544,6 AZN

* "İstehsal Təmir Sahəsi" MMC: Məişət tullantıları poliqonunda zibil quyularının qazılması – 42.850,52 AZN, küçə və meydanlarda təmir-abadlıq işləri – 30.892,91 AZN, magistral yol kənarlarındakı istinad divarlarının təmiri – 97.085,92 AZN

* "Azsur Group" MMC: Zaqatala şəhərinin küçələrinin asfaltlaşdırılması – 590.000 AZN, şəhərdə meydanların təmiri – 45.961 AZN

* "Zaqatala-2016" MMC: Heydər Əliyev Prospektində əsaslı təmir işləri – 360.184,62 AZN

SARA,

NOCOMMENT

Mənbə: Ofeliya Pəncəliyeva