Bütün ölkələr üçün səhiyyə sahəsi və vətəndaşların sağlamlığı prioritet sahələrdən biri hesab olunur. Bu sahədə mövcud olan nöqsanlar isə cəmiyyətin inkişafına birbaşa təsir edir. Lakin ölkəmizdə səhiyyə sahəsi yetərincə ürəkaçandırmı? Bunu bilmirəm.

Bakının keçmiş "Sovetski" adlanan ərazisinin sökülməsi nəticəsində Xırdalan şəhərinə köçdük. İnsanın olduğu mühiti kəşf etməsi aspektindən yanaşsaq, mən də Abşeron rayonunu kəşf etməyə başladım. Əlbəttə, bəzən kəşf yalnız maraqdan doğmur, zərurət də öz sözünü deyir.

Xırdalan şəhərinə köçəndən sonra tibbi sənədlər üçün yolum Abşeron rayon Mərkəzi Xəstəxanasına düşdü. Məlumat üçün deyim ki, Abşeron rayonunda bir baş idarə kimi Mərkəzi Rayon Xəstəxanası, 2 qəsəbə xəstəxanası, 2 poliklinika, 11 həkim məntəqəsi, 2 tibb məntəqəsi, Mərkəzi Rayon Xəstəxanası nəzdində fəaliyyət göstərən təcili və təxirəsalınmaz yardım şöbəsi əhaliyə səhiyyə xidməti göstərir.

Abşeron rayon Mərkəzi Xəstəxanasının binası əvvəllər bir uşaq bağçası kimi fəaliyyət göstərib. Daha sonra əsaslı təmir olunaraq 1983-cü ildən 60 çarpayılıq uşaq infeksion xəstəxanası kimi istifadəyə verilib. 2006-cı ildən 2008-ci ilin avqust ayına kimi xəstəxana binası sabiq icra başçısı Zakir Fərəcovun göstərişi əsasında rekonstruksiya və əsaslı təmir olunaraq 80 çarpayılıq Mərkəzi Rayon Xəstəxanası kimi əhalinin istifadəsinə verilib. Müasir avadanlıqla təchiz edilmiş 2 mərtəbəli, 80 çarpayılıq xəstəxanada doğum, uşaq, cərrahiyə, ginekologiya və reanimasiya şöbələri, laboratoriya, 3 bufet, mətbəx, camaşırxana fəaliyyət göstərib.

2021-ci ilin fevralında isə prezident İlham Əliyevin sərəncamı ilə Abşeron Rayon Mərkəzi Xəstəxanasının yeni inşa olunan binası istifadəyə verilib. Bu binaya Abşeron Rayon Mərkəzi Xəstəxanasının nəzdində olan mərkəzi xəstəxana, Abşeron rayon poliklinikası, Abşeron rayon uşaq poliklinikası və təcili və təxirəsalınmaz tibbi yardım şöbəsinin köçürülməsi nəzərdə tutulub. Ölkə başçısının müvafiq Sərəncamı ilə tikilən 150 çarpayılıq tibb müəssisəsində cərrahiyyə, terapiya, pediatriya, reanimasiya, dializ və digər şöbələr, həmçinin laboratoriyalar fəaliyyət göstərir. Tibb müəssisəsi TƏBİB-in tabeliyindədir. Bura qədər hər şey əladır. Ancaq indiki reallıq heç də ürəkaçan sayılmaz.

Abşeron rayon Mərkəzi Xəstəxanasının bitməyən problemləri davam edir

Dövlət səviyyəsində diqqətin ayrılmasına baxmayaraq, bu xəstəxanaya yolu düşənlərin gününün çox hissəsinin növbədə gözləməklə keçməsi, əsəb və stressin pik səviyyədə olması danılmazdır. Bu əsəb-stress yalnız vətəndaşlara da aid deyil. Elə tibb işçilərinin əksəriyyəti də gərgin və əsəbidir. Bunun səbəbini soruşduqda cavab olaraq bildirilir ki, xəstəxanada tələb-təklif disbalansı yaşanır. Belə ki, kifayət qədər böyük olan xəstəxanada bəzi tibbi sahələri üzrə cəmi bir həkim təyin olunub. Məsələn, o boyda xəstəxananın cəmi bir onkoloqu var. Onkoloji xəstələrin sayının getdikcə artığını nəzərə alsaq, əlillik üçün arayış almaq istəyənləri və həmin onkoloqun qapısının ağzında yaranan növbəni siz təsəvvür edin. Saatlarla çəkən uzun növbələr, gözləməkdən yorulan vətəndaşlar əsəbi, gün ərzində normadan çox xəstə qəbul edən həkim isə gərgin olur. Bu, hələ canlı şahidi olduğum haldır. Yəni, Abşeron rayonunun inzibati ərazisində yaşayan əhaliyə xidmət göstərən Xəstəxanada ciddi həkim çatışmazlığı yaşanır. Xəstəxanaya üz tutan vətəndaşların sayı isə ilbəil artmaqdadır.

Komissiya “bufet”də fəaliyyət göstərir

Xəstəxananın problemi bununla da bitmir. İlk dəfə biləndə mən də təəccüblənmişdim. Təsəvvür edin ki, ümumi ərazisi 4 hektar, tikinti sahəsi isə 6300 kvadratmetr olan bir xəstəxananın bufeti yoxdur. Xəstəxananın həkimləri nahar yeməyini xəstələri qəbul etdikləri otaqda edirlər. Necə? Çox sadə. Saat 13:00-14:00 nahar vaxtıdır və bu saatda qəbul otaqlarının qapıları içəridən bağlanır. Daha sonra tibb işçiləri ya sifariş etdikləri, ya da evdən gətirdikləri yeməklərlə nahar edirlər. Nahar saatı bitəndən sonra yemək iyi bürümüş otaqlarda yenidən xəstə qəbulu aparılır.

Əslində xəstəxananın bufeti var. Ancaq bu, fərqli bufetdir. Vətəndaşlara xidmət edir, amma kreativ formada...Geniş ərazisi olduğunu qeyd etdiyim xəstəxanada əlilliyin təyini üçün yaradılan komissiya qəbulu məhz "bufet"də aparılır. Bəli, bəli... Xəstəxanada boş bir otaq yoxdur ki, komissiya qəbulu aparılsın. İnsanlar yalnız həftənin bəlli günündə və saatında bufet deyilən, ancaq stol və stullardan ibarət olan otağa yığılırlar və komissiyadan keçirlər.

Bir sözlə, vətəndaşlara tibbi xidmət üçün nəzərdə tutulan xəstəxanadakı nöqsanlar insanların sağalmasından daha çox, əsəblərinin daha da pozulmasına səbəb olur. Günahkar kimdir? Yəqin ki, xəstəxananın tabe olduğu müvafiq qurum... Çünki elə həmin xəstəxananın tibb işçiləri də yaşadıqları vəziyyətdən məmnun deyillər.

Sonda müvafiq qurumlara Ulu Öndər Heydər Əliyevin bu fikirlərini xatırlatmaq istərdim: "Səhiyyə bizim üçün, hər bir cəmiyyət və dövlət üçün çox lazımlı, həyatın bütün sahələrini əhatə edən sahədir. Onun üçün zəruri tədbirlər görülüb və gələcəkdə də görüləcəkdir".

Ümid edirəm ki, 434 min nəfərlik Abşeron rayonu əhalisinin və Abşeron rayon Mərkəzi Xəstəxanasının tibbi heyətinin yaşadığı çətinliklər tezliklə öz həllini tapacaq. /Bakivaxti.az/

Sumqayıt şəhəri, Corat qəsəbəsi, Səttar Əliyev küçəsi 35 ünvanında çəkilmiş fotolardan da göründüyü kimi, "Azəriqaz"a məxsus, istismar müddəti bitmiş boş borular sakinlərin rahatlığını pozur, eləcə də onların öz həyətyanı sahələrinə avtomobil ilə giriş-çıxışını ciddi şəkildə məhdudlaşdırır.

Sakinlərin dəfələrlə bu problemi aradan qaldırmaq üçün Sumqayıt Regional Qaz İdarəsinin rəisi Sübhi Bayramova və Təbii qazın alışı və satışı şöbəsinin rəisi Hafiz Yunusluya müraciət etmələrinə baxmayaraq, məsələ ilə bağlı hələ də heç bir tədbir görülmür və heç bir açıqlama verilmir.

Elə isə haqlı olaraq sual yaranır: Sumqayıt Qaz İstismar İdarəsinə məxsus olan və istifadə olunmayan bu boş borular əhalinin narahatlığına açıq şəkildə səbəb olduğu halda, niyə kəsilərək ləğv edilmir? Bəlkə, qurum rəsmilərinin müraciət edən sakinlərdən umacağı nəsə var?

Ümid edirik ki, Sumqayıt Regional Qaz İdarəsinin rəisi Sübhi Bayramov və Təbii qazın alışı və satışı şöbəsinin rəisi Hafiz Yunuslu tezliklə sakinlərin səsinə səs verəcəklər.

Xeberekspress.com

Sumqayıt Apellyasiya Məhkəməsində dələduzluqda təqsirləndirilən Arif İbrahimovun barəsindəki hökmdən verilən apellyasiya şikayəti üzrə məhkəmə iclası başa çatıb.

Hakim Ruhiyyə Əsgərovanın sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İttihama görə, Arif İbrahimov tamah niyyəti ilə etibardan sui-istifadə və aldatma yolu ilə özgənin əmlakını ələ keçirmək məqsədilə zərərçəkmiş F.F.-in (adı, soyadı şərtidir) etibarını qazanaraq onun iki övladını Azərbaycan Dövlət Tibb Universitetinə qəbul etdirəcəyini vəd edib.

Belə ki, təqsirləndirilən şəxs ali məktəbə qəbul prosesində tanışlarının və imkanlarının olduğunu bildirərək zərərçəkmişi buna inandırıb və qəbul məsələsini həll edəcəyini deyərək ondan mərhələli şəkildə pul alıb.

Araşdırmalarla müəyyən edilib ki, 2023-cü ilin may ayında F.F. "MilliÖn" ödəmə terminalı vasitəsilə Arif İbrahimovun bank kartına iki dəfə olmaqla, hər dəfə 10 000 manat, ümumilikdə 20 000 manat köçürüb.

Bundan sonra, 2023-cü ilin iyun ayında zərərçəkmişin qohumu onun adından "MilliÖn" terminalı vasitəsilə həmin bank hesabına əlavə 3 000 manat göndərib.

2023-cü ilin avqust ayında isə eyni qaydada daha 3 000 manat həmin hesaba köçürülüb.

Beləliklə, F.F. müxtəlif vaxtlarda təqsirləndirilən şəxsə ümumilikdə 26 000 manat ödəyib.

Lakin sonradan məlum olub ki, Arif İbrahimovun verdiyi vədlərin heç bir real əsası olmayıb. O, zərərçəkmişin övladlarının ali məktəbə qəbulunu təşkil etməyib, aldığı vəsaiti isə öz şəxsi ehtiyaclarına sərf edib.

İstintaq orqanı onun hərəkətlərini etibardan sui-istifadə və aldatma yolu ilə xeyli miqdarda maddi ziyan vurmaqla törədilmiş dələduzluq kimi qiymətləndirib.

Abşeron Rayon Məhkəməsinin hökmü ilə o, 3 il 5 ay 29 gün müddətinə azadlıqdan məhrumetmə cəzasına məhkum edilib.

Pravda.az

Xəbər verdiyimiz kimi, Dini Qurumlarla İş üzrə Dövlət Komitəsinin Tovuz-Qazax Regional İdarəsinə yeni rəis təyin olunub. Komitə sədri Ramin Məmmədovun müvafiq əmri ilə Qüdrət Əliyev bu vəzifəyə gətirilib.
Məlumata görə, Qüdrət Əliyev bu təyinatdan öncə Qazax-Tovuz Regional Təhsil İdarəsi üzrə Şəmkir rayon təhsil sektorunun müdiri işləyib və 2022-ci ilin noyabrında müqavilə müddətinin başa çatması ilə əlaqədar fəaliyyətinə xitam verilib. Lakin o, həmin vəzifədə müqavilə müddəti bitənədək fəaliyyətini davam etdirə bilib.

Q.Əliyevin karyerasındakı diqqətçəkən məqamlardan biri isə onun Şəmkir Rayon İcra Hakimiyyətinin həbsdə olan sabiq başçısı Alimpaşa Məmmədovun idarəçiliyi dövründə birinci müavin postunu tutmasıdır. Həmin dövrdə o, qəfil birinci müavin vəzifəsindən azad edilərək Şəmkir rayon Təhsil Şöbəsinin müdiri postuna gətirilmişdi. Rayonda icra hakimiyyətinin əsas fiqurlarından birinin birbaşa təhsil sahəsinə rəhbər təyin olunması o vaxt yerli ictimaiyyət və media tərəfindən "vəzifə manipulyasiyası" və idarəetmədə qeyri-şəffaflıq iddiaları ilə kəskin tənqid edilmişdi.

Bununla yanaşı, 2021-ci ilin aprelində icra hakimiyyətində keçirilən xüsusi əməliyyat zamanı ölkə mediası ilk saatlarda Qüdrət Əliyevin də rəsmən həbs edildiyi barədə geniş xəbərlər yaymışdı. Böyük rezonans doğuran bu məlumatlardan sonra Təhsil Nazirliyi rəsmi açıqlama yayaraq onun həbs olunmadığını və işinin başında olduğunu bildirməli oldu. Yaranmış bu informasiya xaosu zamanı onun adı ətrafında ciddi ajiotaj yaşanmışdı.

Alimpaşa Məmmədovun rüşvət ittihamları ilə mühakimə olunduğu dövrdə Qüdrət Əliyev sabiq başçının ən yaxın ətrafı və imza səlahiyyəti olan keçmiş müavini kimi hüquq-mühafizə organları tərəfindən dindirilib. Onun cinayət məsuliyyətinə cəlb edilməməsinə baxmayaraq, uzun müddət məhkəmədə şahid qismində ifadə verməsi və mənimsənilən büdcə vəsaitlərinin sənədləşdirilməsi prosesində adının halallanması karyerasında ən qalmaqallı kölgə olaraq qalıb.(32gun.az)

Bütün satınalmalar bir mənbədən satınalma metodunun tətbiqi ilə həyata keçirilmiş və satınalma barədə elan heç bir mətbuat orqanında dərc edilməmişdir(?)

“Laçın Rayonunda Bərpa, Tikinti və İdarəetmə Xidməti” Publik Hüquqi Şəxs (PHŞ) ″GEOPROJECT″ MMC, "İNTEGRİS" MMC, "AZİN CONSTRUCTİON" MMC və “ARCH-TİKİNTİ” MMC ilə layihələndirmə işləri, "NAKHISH" MƏNZİL-TİKİNTİ KOOPERATİVİ ilə Bəylik kəndində meyvə bağının salınması, eləcə də "HAYAT GROUP" MMC ilə xüsusi təyinatlı texnikaların təmiri ilə bağlı anlaşıb. 28.06.2026-ci il tarixdə dövlət satınalmalarının vahid internet portalında yerləşdirilmiş məlumata görə, tərəflər arasında razılaşma ″GEOPROJECT″ MMC ilə 1.287.757 manatlıq “Vəlibəyli kəndi), "İNTEGRİS" MMC ilə 896.139 manatlıq (Qoşasu kəndi) və "HAYAT GROUP" MMC ilə 38.551 manatlıq olub. Daha sonra-24.07.2026-cı il tarixdə isə eyni dövlət portalında yer alan məlumata görə, "AZİN CONSTRUCTİON" MMC ilə 1.449.984 manatlıq ( Hacıxanlı kəndi), “ARCH-TİKİNTİ” MMC ilə 874.969 manatlıq (Səfiyan kəndi) və "NAKHISH" MƏNZİL-TİKİNTİ KOOPERATİVİ ilə 74.860 manatlıq müqavilə bağlanıb.

Sadadığımız müqavilələrdə bir ortaq nöqtə diqqət çəkir: Bütün epizodlarda tərəflər arasında satınalma proseduru dövlət satınalmalarının vahid internet portalında keçirilməmişdir (elektron satınalma deyil). Bütün satınalmalar bir mənbədən satınalma metodunun tətbiqi ilə həyata keçirilmiş və satınalma barədə elan heç bir mətbuat orqanında dərc edilməmişdir(?)

Məhz bu faktor məlum səbəblərdən ciddi suallar doğurur, əsaslı şübhələrə rəvac verir...Bu istiqamətdə oxucularımızın “Yenixeberorg”a ötürdüyü məlumata görə, tərəflər arasındakı bu əməkdaşlığın özünəməxsus səbəbləri var... Yuxarıda qeyd etdiyimiz kimi, “Laçın Rayonunda Bərpa, Tikinti və İdarəetmə Xidməti” PHŞ müvafiq satınalma müsabiqələri elan etmədən, bir mənbədən olmaqla sadaladığımız şirkətlərlə müqavilələr bağlayıb. Həm də toplam dəyəri milyonlarla ölçülən müqavilələr...

Bu maraq doğuran faktor olmaqla bərabər, məlum qanunla qadağan da deyil. Amma,...müvafiq əsaslandırmalarla!

Bu arada qeyd edək ki, Azərbaycan Respublikasının “Dövlət satınalmaları haqqında” Qanunun 15.1 maddəsində göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız məlum portal vasitəsilə həyata keçirilir.

Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur: satınalma predmeti yalnız hər hansı konkret təchizatçıda olduqda; satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda; təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə; satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

Göründüyü kimi, "Dövlət satınalmaları haqqında" Qanunda bir mənbədən satınalamaları zəruri edən şərtlər aydın şəkildə sadalanır...

İndi isə sual olunur: , “Laçın Rayonunda Bərpa, Tikinti və İdarəetmə Xidməti” PHŞ-in müxtəlif işlərlə bağlı sadaladığımız şirkətlərlə birbaşa müqavilə bağlaması hansı səbəblərdən qaynaqlanır???

Bu prosesdə dövlətin pulunu xərcləyən tərəf kimi, , “Laçın Rayonunda Bərpa, Tikinti və İdarəetmə Xidməti” PHŞ tərəfindən hansı məsul şəxslər iştirak edib, rəhbərlik kimə məxsus olub?

Siyahıda yer alan şirkətlər hansı üstünlükləri ilə və hansı meyarlarla seçilib? Və s...

***

Biz Yenixeberorg.com olaraq, bu və digər şübhələrə aydınlıq gətirmək məqsədi ilə “Laçın Rayonunda Bərpa, Tikinti və İdarəetmə Xidməti” PHŞ-in icraçl direktoru cənab Rafiq Salmanova 6 sualdan ibarət online rəsmi sorğu ünvanladıq...Təəssüf ki, sorğumuz hələ də cavabsız olaraq qalır(?)

Haşiyə: Xatırladaq ki, “Laçın Rayonunda Bərpa, Tikinti və İdarəetmə Xidməti” PHŞ prezident cənab İlham Əliyevin 26 may 2023-cü il tarixli №2151 fərmanı ilə yaradılıb. Qurumun icraçı direktoru Rafiq Salmanov isə ötən ilin sentyabr ayından bu vəzifəni daşıyır...

Hörmətlə xatırlatma...

Əvvəla, hörmətli icraçı direktora xatırlatmaqda fayda var ki, hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...

Dövlət büdcəsi nə kiminsə dədə-babasından qalma xəzinə deyil, nə də hansısa yardım fondu deyil ki, ölkə ictimaiyyəti və aidiyyatı dövlət orqanları tərəfindən bir o qədər də, maraqlı görünməsin... Dövlətin pulun heç bir məmur, səlahiyyət sahibi könülü istədiyi kimi xərcləyə bilməz, xərcləməməlidir də!

Eyni zamanda məlum funksiyaların icraçısı kimi medianın sorğusu da cavablandırılmalıdır. Təkcə ona görə yox ki, hansısa yanlış informasiya tirajlana bilər, həm də ona görə ki, bu hər bir səlahiyyət sahibinin vəzifə borcudur. Gec də olsa bunu bilmək lazımdır...

Həm də onu bilmək lazımdır ki, heç bir vəzifə sahibi bir gün “qapısının döyülmədən açılacağından” sığortalanmayıb.(Yenixeberorg.com)

Sumqayıt Tibb Mərkəzində çalışan tanınmış uşaq kardioloqu Elnur İmanovun səsinin yer aldığı iddia olunan audioyazı yayılıb.

Audioyazıda icbari tibbi sığorta ilə müraciət edən xəstələrdən exokardioqrafiya müayinəsinə görə ödəniş tələb edildiyi bildirilir.

Həmçinin o da aydın olur ki, iki uşağın müayinəsi üçün ümumilikdə 10 manat istənilir. Pasiyent isə həmin şəxsdən kart nömrəsini alır ki, ödəniş etsin.

Qeyd edək ki, İcbari Tibbi Sığorta çərçivəsində göstərilən xidmətlərə görə qanunvericiliyə əsasən vətəndaşlardan əlavə ödəniş alınması qanunsuzdur.İddia olunur ki, məsələdən hazırda Sumqayıt Tibb Mərkəzinin direktoru vəzifəsini icra edən direktor müavini Təranə Rəcəbli də məlumatlıdır.

Məsələ ilə bağlı açıqlama verən Elnur İmanov iddiaları qəti şəkildə təkzib edib.

VİDEO LİNKDƏ: https://bizimesr.media/az/post/taninmis-hekimin-ses-yazisi-yayildi--qanunsuz-pul-alir-22833

Son aylar Binəqədi rayonunda müxtəlif tikinti işlərinin intensivləşdiyi müşahidə olunur.

Növbəti belə tikinti 2 saylı Dəmiryol Poliklinikasının qarşısında yerləşən ərazidə aparılır. Redaksiyamıza daxil olan görüntülər və sakinlərin müraciətlərinə əsasən, tikinti sahəsində təhlükəsizlik qaydalarına tam riayət olunmadığı iddia edilir. Bildirilir ki, tikinti ərazisi lazımi şəkildə hasarlanmayıb, piyadaların hərəkəti üçün təhlükəsiz keçid təmin edilməyib və işlərin sənədləşdirilməsi ilə bağlı da suallar mövcuddur.

Məlum olduğu kimi, Azərbaycan Respublikasının qüvvədə olan qanunvericiliyinə əsasən, tikinti işləri yalnız müvafiq dövlət qurumlarının verdiyi icazə əsasında aparılmalı, eyni zamanda tikinti zamanı əməyin mühafizəsi və təhlükəsizlik qaydalarına ciddi əməl edilməlidir.

Ərazidə yaşayan sakinlərin sözlərinə görə, aparılan tikinti səbəbindən səkilər demək olar ki, keçilməz vəziyyətə düşüb. Onlar bildirirlər ki, piyadalar, xüsusilə yaşlı insanlar, uşaqlar və əlilliyi olan şəxslər yolun hərəkət hissəsinə çıxmağa məcbur qalırlar ki, bu da onların təhlükəsizliyi üçün ciddi risk yaradır.

Məsələnin araşdırılması məqsədilə Bizimesr.media tərəfindən Binəqədi Rayon İcra Hakimiyyətinə, Fövqəladə Hallar Nazirliyinə və Azərbaycan Respublikası Dövlət Şəhərsalma və Arxitektura Komitəsinə rəsmi sorğular ünvanlanacaq.(Bizimesr.media)

Qarşı tərəfin mövqeyini dərc etməyə hazırıq.

VİDEO LİNKDƏ: https://bizimesr.media/az/post/bileceri-qesebesinde-tikinti-yoxsa-tehluke---piyadalar-naraziliq-edir---video-22832

Qazax Rayon İcra Hakimiyyətinin başçısı Rəcəb Babaşovun “10 ilə yaxındır avtomobildən istifadə etmirəm” açıqlaması sosial şəbəkələrdə və mediada geniş müzakirələrə səbəb olub.

Korrekt.az xəbər verir ki, icra başçısının bu sözlərindən sonra əvvəllər mətbuatda dərc edilən məlumatlar və yayılan fotolar yenidən gündəmə gəlib.

Qeyd edək ki, mediada dərc olunan xəbərlərdə onun və ailə üzvlərinin bahalı avtomobillərə sahib olması barədə çoxsaylı məlumatlar yayılıb və bu günə kimi təkzib olunmayıb.

2019-cu ildə yayılan xəbərlərdə Rəcəb Babaşovun təxminən 250 min manat dəyərində olduğu bildirilən “Range Rover” markalı avtomobildən istifadə etdiyi iddia olunurdu. Həmin materiallarda 99 FF 099 dövlət qeydiyyat nişanlı avtomobilin fotoları da paylaşılmışdı.

Bununla yanaşı, 2020-ci ildə müxtəlif media orqanlarında Rəcəb Babaşovun oğlu Elşən Babaşovun adına qeydiyyatda olduğu bildirilən təxminən 275 min ABŞ dolları (o dövrün məzənnəsi ilə təxminən 450 min manat) dəyərində “Mercedes-Benz G63 AMG” markalı avtomobil barədə xəbərlər dərc edilib. Həmin məlumatlarda Elşən Babaşovun sözügedən avtomobildən istifadə etdiyi qeyd olunurdu.

Daha sonra, 2024-cü ildə yayımlanan araşdırmalarda Elşən Babaşov bahalı avtomobilləri və dövlət nömrə nişanları (77-LL-077) ilə yenidən gündəmə gəlib.

Hörmətli Rəcəb müəllimində mövqeyini dərc edə bilərik!

Korrekt.az

ZƏRƏRCƏKƏNLƏR PROKRORLUGA MÜRACİƏT ETDİ, Redaksiyamıza daxil olan şikayətlərin ardı-arası kəsilmir. İnsanların saf niyyətindən, halal zəhmətlə qazandığı son qəpiyindən istifadə edib cibini dolduranların sırasına daha bir ad əlavə olunub: Röyal Masıyev!
​Daxil olan məlumatlar sadəcə bir narazılıq deyil, açıq-aşkar vətəndaşları soymaq, aldatmaq, talamaq və eyni zamanda dövləti aldatmaq mənzərəsidir.
Bu şəxs əslində adi bir prarab (iş icraçısı) olduğu halda, utanmadan, çəkinmədən özünü böyük tikinti şirkətinin rəhbəri kimi təqdim edir.
Yalan-palan vədlərlə insanların etibarını qazanır, təkcə mənzillərin deyil, iri obyektlərin də tikintisi və təmiri adı altında vətəndaşlardan astronomik, baha məbləğlərdə pul qopardır!
​Bəs nəticə nədir?
Nəticə rəzalətdir!
Röyal Masıyev baha qiymətə aldığı sifarişləri dəfələrlə ucuz, keyfiyyətsiz, heç bir normativə cavab verməyən bərbad materiallarla "yola verir".
Ortaya çıxardıqları isə təmir deyil, sözün əsl mənasında gözdağıdır! Bəzi hallarda isə külli miqdarda pulu cibinə qoyub heç bir iş görmədən aradan çıxır. İnsanları həm müflis edir, həm də illərlə topladıqları əziyyəti bir anın içində puç edir.
​Qanun tanımayan "biznes": Qara bazar üsulları və vergidən yayınma!
​Məsələ bununla da bitmir. İddialara görə, Röyal Masıyevin fəaliyyəti tamamilə qeyri-rəsmidir. Bu şəxsin hansı VÖEN-lə fəaliyyət göstərdiyi, ümumiyyətlə qanuni bir çərçivədə çalışıb-çalışmadığı məlum deyil!
Vətəndaşlardan nağd şəkildə böyük məbləğdə pullar alır, qarşılığında isə nə rəsmi qəbz verir, nə də müqavilə bağlayır. Dövlətə bir qəpik də vergi ödəməyən, "qara каssа" sistemi ilə cibini dolduran bu şəxs həm vətəndaşların haqqına girir, həm də açıq-aşkar dövlət büdcəsindən yayınır!
​Bu adəti hardan götürdüyü də bizə qaranlıq deyil. Bildirilir ki, bu şəxs əvvəllər "Evin az" şirkətində çalışıb və orada da analoji maliyyə fırıldaqlarına, insanları aldatdığına və pul mənimsədiyinə görə işdən rüsvayçılıqla qovulub.
Amma görünür, bir yerdən qovulmaq, rüsvay olmaq buna dərs olmayıb. Əksinə, özünə yeni "şikar"lar axtararaq insanları tələyə salmağı peşəyə çevirib.
​Artıq canı boğaza yığılan zərərçəkənlər Prokurorluq orqanlarına rəsmi şikayət ediblər. Media olaraq bəyan edirik: bu özbaşınalığa, vətəndaşın haqqının tapdalanmasına və dövlətin vergisindən yayınma hallarına sakit baxa bilmərik!
Məsələ ilə bağlı hüquq-mühafizə və aidiyyəti vergi orqanlarına rəsmi müraciətlər ünvanlanacaq.
Bu cür əməllərlə insanların həyatını qaraldanlar qanun qarşısında mütləq cavab verməlidir və verəcək də!
​Obyektivlik və jurnalist etikası prinsiplərinə uyğun olaraq, haqqında bəhs edilən qarşı tərəfin də mövqeyini dərc etməyə hazır olduğumuzu bildiririk.(Teref)
Sima Babayeva

İyulun sonundan etibarən azı 72 min qanunsuz miqrant Mərakeşin Fenidek sahillərindən İspaniyanın Seuta şəhərinə daxil olub.

Bu barədə İspaniyanın daxili işlər naziri Fernando Qrande-Marlaska Avropa İttifaqı (Aİ) ölkələrinin DİN rəhbərlərinin görüşünün yekunlarına həsr olunmuş mətbuat konfransında bildirib.

Onun sözlərinə görə, həmin şəxslərdən təxminən 70 min nəfəri Mərakeşə geri qayıdıb.

Yerli mətbuat İspaniya ərazisinə keçməyə çalışarkən həlak olanların sayının 75 nəfərə çatdığını açıqlayıb.

Qeyd edək ki, iyulun 30-da Mərakeşin Fenidek sahillərindən on minlərlə miqrant İspaniyaya məxsus Seuta və Melilya anklavlarına üzərək və ya piyada keçməyə cəhd edib. Bundan sonra İspaniya hökuməti bölgəyə əlavə hərbi qüvvələr göndərərək sərhəd təhlükəsizliyini gücləndirib.