Bakıda yerləşən məşhur "Qaynana" restoranına baş çəkən türkiyəli turist xidmət səviyyəsindən ciddi şəkildə narazı qaldığını bildirib.

Sifariş verdiyi yeməklərin bir saatdan gec gəldiyini və dəfələrlə unudulduğunu iddia edən turist, çəkdiyi video ilə digər insanları buraya gəlməməyə çağırıb. Çörək, qatıq və əsas yeməyin ayrı-ayrı vaxtlarda təqdim olunduğunu vurğulayan turist, göstərilən xidmətin ödənilən pulun dəyərinə uyğun olmadığını qeyd edib.

32gun.az yazır ki, "Qaynana" restoranının real, hüquqi və rəsmi sahibi rəsmi sənədlərdə də qeyd olunduğu kimi "Bridge Group of Companies" holdinqidir. Holdinqin rəsmi rəhbəri və təsisçisi tanınmış iş adamı Yaqub Hüseynovdur.

O, portfelində "Bridge Plaza", "Bridge" logistika mərkəzi, "HamamBath" kompleksləri, "Sultan İnn", "Molokan İnn", "Seven Rooms" mehmanxanaları, habelə "Jasmine" və "Bahar Cafe" kimi premium iaşə obyektləri də daxil olmaqla zəngin əmlak şəbəkəsinə sahibdir.(32gun.az)

Bakının Sabunçu qəsəbəsində 54 yaşlı Sevinc Şahmar qızı Məmmədova münaqişə zəminində bıçaqla qətlə yetirilib.

Hadisə bu gün səhər saatlarında qəsəbədəki evlərin birində qeydə alınıb.

Cinayəti törətməkdə şübhəli bilinən 34 yaşlı Elvin Fərman oğlu Məmmədov polis əməkdaşları tərəfindən saxlanılaraq istintaqa təhvil verilib.

Faktla bağlı araşdırma aparılır.

Qeyd edək ki, qətlə yetirilən qadın “NIDA” Vətəndaş Hərəkatının üzvü olan, 2021-ci ildə İstanbulda vəfat edən Bayram Məmmədovun anası, şübhəli şəxs isə qardaşıdır.Qafqazinfo

İsmayıllı Rayon İcra Hakimiyyətinin bayram günlərində "qələm əhlinə" nümayiş etdirdiyi "isti münasibət" və yerli istirahət mərkəzlərində təşkil etdiyi 1 gecə, 2 günlük "pulsuz" istirahət paketləri ilk baxışdan mətbuata diqqət kimi görünə bilər.
Lakin bu "xeyirxahlıq" pərdəsini azca qaldırdıqda, ortaya mahiyyətcə medianın müstəqilliyini hədəf alan, açıq-aşkar bir idarəetmə hiyləsi çıxır.
Bu, sadəcə bir bayram töhfəsi deyil – məmurların tənqiddən sığortalanmaq üçün tətbiq etdiyi ucuz və təhlükəli bir "ağızsuspayı" mexanizmidir.
İcra hakimiyyətinin yaratdığı bu "şans"dan yararlanan qələm sahiblərindən yazılmamış, amma çox sərt bir qaydaya əməl etmək tələb olunur: susmaq və tərifləmək.
İstirahət mərkəzlərində pulsuz yemək və gecələmə qarşılığında jurnalistlərə faktiki olaraq "sadiqlik aktı" imzalatdırılır:
Rayondakı bərbad yollar, su təminatındakı problemlər, bələdiyyə özbaşınalıqları və sakinlərin bitmək bilməyən şikayətləri gözə alınmamalıdır.
Qarşılığında isə rayon rəhbərliyinin "fəaliyyətini" və təbiət gözəlliklərini tərənnüm edən pafoslu, saxta reportajlar tirajlanmalıdır.
Bir sözlə, regionun real sosial problemlərini işıqlandırmalı olan jurnalist, bir neçə günlük komfort qarşılığında icra hakimiyyətinin PR agentinə çevrilir.
Ən rüsvayçı məqamlardan biri də odur ki, İcra Hakimiyyəti bu "jest"ləri çox vaxt öz büdcəsi hesabına da etmir. Rayondakı özəl turizm obyektlərinin sahiblərinə olunan şifahi "xahişlər" və ya inzibati təzyiqlər hesabına jurnalistlər yerləşdirilir.
Obyekt sahibi məmurun tapşırığını yerinə yetirməklə gələcək yoxlamalardan sığortalanır, icra hakimiyyəti bir qəpik xərcləmədən özünə media qalxanı yaradır, müstəqilliyini satan jurnalist isə bu çirkin zəncirin son halqasına çevrilir.
Filtrasiya və "Dost Mətbuat" Oyunu
Bu "qonaqpərvərlik" hər kəsə şamil olunmur. İcra Hakimiyyətinin süzgəcindən yalnız prinsiplərindən güzəştə gedən, sual verməyən və tapşırılan mətni eynilə dərc edən "loyal" media mənsubları keçə bilir. Prinsipial və obyektiv jurnalistlər isə bu siyahılardan tamamilə təcrid olunur.
İsmayıllıda "qələm əhlinə" edilən bu jest, əslində regional medianın tənqidi kəsərini kütləşdirən, jurnalist adını və bitərəfliyini bir neçə günlük istirahətə dəyişən qəbulolunmaz bir praktikadır. İcra hakimiyyəti rayonun sosial yaralarını müalicə etmək əvəzinə, həmin yaraları işıqlandıracaq gözləri "qonaqlıqla" bağlamağa üstünlük verir.(Teref.az)
Sima Babayeva

Azərbaycan Prezidenti isveçrəli həmkarı Qi Parmölənə təbrik məktubu ünvanlayıb.

Təbrikdə deyilir:

"Hörmətli cənab Prezident,

İsveçrə Konfederasiyasının milli bayramı münasibətilə Sizə və bütün xalqınıza öz adımdan və Azərbaycan xalqı adından ən səmimi təbriklərimi çatdırıram.

Biz Azərbaycan ilə İsveçrə arasında dostluq və əməkdaşlıq münasibətlərinin inkişaf etdirilməsinə böyük əhəmiyyət veririk. İnanıram ki, xalqlarımızın mənafelərinə uyğun olaraq dövlətlərarası əlaqələrimizin və əməkdaşlığımızın möhkəmləndirilməsi naminə bundan sonra da birgə səylər göstərəcəyik.

Bu bayram günündə Sizə möhkəm cansağlığı, işlərinizdə uğurlar, xalqınıza daim rifah və firavanlıq arzulayıram".

Bank “BTB” ASC-nin müraciəti əsasında “Banklar haqqında” Azərbaycan Respublikası Qanununun 16.1.1-ci və 29-cu maddələrinə, eləcə də “Bankların yenidən təşkili haqqında Qaydalar”a müvafiq olaraq Bank “BTB” ASC-yə verilmiş bank lisenziyası ləğv edilib.

Bu barədə Mərkəzi Bank məlumat yayıb.

Bildirilib ki, onun hüquqi varisi olan “T-Kredit” Bank Olmayan Kredit Təşkilatı” MMC-yə lisenziya verilib.

“Daha əvvəl məlumat verildiyi kimi, Mərkəzi Bankın İdarə Heyətinin 05 mart 2026-cı il tarixli Qərarı ilə, qanunvericiliyə müvafiq olaraq, Bank “BTB” ASC-nin müraciəti əsasında onun bank olmayan kredit təşkilatına çevrilməsi formasında yenidən təşkilinə qabaqcadan razılıq verilib.

Yenidən təşkil prosesi çərçivəsində, Bank “BTB” ASC tərəfindən öz əmanətçiləri və digər kreditorları qarşısında olan öhdəliklərinin yerinə yetirilməsi planı təsdiq edilib, bankın kreditorlarının məlumatlandırılması təmin edilib. Bu çərçivədə, “Azərbaycan Beynəlxalq Bankı” ASC (ABB) ilə Bank “BTB” ASC arasında “Aktivlərin və passivlərin ötürülməsi haqqında müqavilə” imzalanmış və həmin müqaviləyə uyğun olaraq Bank “BTB” ASC-nin aktiv və öhdəliklərinin ABB-yə ötürülməsi uğurla tamamlanıb.

Qeyd edək ki, Bank “BTB” ASC-nin müştərilərinin müddətli və tələbli depozitləri şərtləri dəyişdirilmədən ABB-yə tam və fasiləsiz şəkildə ötürülüb, bütün müştərilərin öz vəsaitlərinə sərbəst çıxışı və onlardan istifadə imkanı yaradılıb.

Eyni zamanda, kredit portfelinin ötürülməsi prosesi də uğurla tamamlanıb . Bank “BTB” ASC-yə kredit borcu və ya digər öhdəlikləri olan müştərilərə qarşı tələb hüquqları müqavilə şərtləri qüvvədə saxlanılmaqla ABB-yə ötürülüb, kreditlərə xidmət olunmasının fasiləsizliyi təmin olunub.

Bununla da, Mərkəzi Bankın İdarə Heyətinin yuxarıda qeyd olunan qərarı ilə Bank “BTB” ASC-nin lisenziyasının ləğv edilərək “T-Kredit” Bank Olmayan Kredit Təşkilatı” MMC-yə çevrilməsi prosesi uğurla tamamlanıb. “T-Kredit” Bank Olmayan Kredit Təşkilatı” MMC öz fəaliyyətini Bakı şəhəri, Nigar Rəfibəyli ev 9 ünvanında həyata keçirəcəkdir”, - deyə əlavə edilib.

Qeyd edək ki, Bank “BTB” ASC Prezident Administrasiyasının keçmiş rəhbəri Ramiz Mehdiyevin ailəsinə məxsusdur.

Bizimesr.media

Baş Dövlət Yol Polisi İdarəsi (BDYPİ) həftəsonu səfərə hazırlaşan sürücülərə müraciət edib.

Bu barədə BDYPİ məlumat yayıb.

Bildirilib ki, həftəsonu ilə əlaqədar bölgələrə səfərlərin artacağı, bununla da respublika əhəmiyyətli avtomobil yollarında nəqliyyat vasitələrinin və piyadaların hərəkət intensivliyinin yüksələcəyi gözlənilir:

"Bu isə bütün yol hərəkəti iştirakçılarından daha yüksək diqqət və məsuliyyət tələb edir. Baş Dövlət Yol Polisi İdarəsi səfərə çıxmağı planlaşdıran sürücüləri yol hərəkəti qaydalarına ciddi riayət etməyə çağırır. Sürücülər nəzərə almalıdırlar ki, uzun məsafəli səfər yalnız nəqliyyat vasitəsinin texniki sazlığını deyil, həm də sürücünün fiziki və psixoloji hazırlığını tələb edir".

Qeyd olunub ki, yorğun, yuxusuz və ya diqqəti yayınmış vəziyyətdə sükan arxasına əyləşmək yol-nəqliyyat hadisəsi riskini əhəmiyyətli dərəcədə artırır:

"Səfər zamanı yol və hava şəraitinə uyğun sürət həddinə riayət edilməsi, ara məsafəsinin qorunması, təhlükəli ötmə və manevrlərdən çəkinilməsi, həmçinin sükan arxasında diqqəti yayındıran amillərdən uzaq durulması təhlükəsiz hərəkətin əsas şərtlərindəndir".

Həmçinin BDYPİ piyadalara da müraciət edərək bildirir ki, avtomobil yollarında yolun müəyyən edilməmiş hissəsindən keçmək, nəqliyyat vasitələrinin sürətini düzgün qiymətləndirmədən hərəkət zolağına çıxmaq, mobil telefondan və digər diqqəti yayındıran vasitələrdən istifadə etmək ağır nəticəli yol-nəqliyyat hadisələrinə səbəb ola bilər.

"Yolun yalnız müəyyən olunmuş yerlərindən keçilməsi, yolu keçməzdən əvvəl sürücülərlə vizual təmasın yaradılması və hərəkətin təhlükəsiz olduğuna əmin olduqdan sonra yolun keçilməsi həyati əhəmiyyət daşıyır", - müraciətdə qeyd olunub.

Vətəndaş Sərviz Kazımov "Kontakt Home" mağazasından aldığı velosipedlə bağlı şirkətdən şikayət edib.

Bizimesr.media bildirir ki, şikayətçi iddia edib ki, sifariş etdiyi məhsul əvəzinə ona başqa markalı velosiped təqdim olunub, həmçinin məhsulun komplektasiyası tam olmayıb.

Şikayətçinin sözlərinə görə, övladının ad günü münasibətilə ZigZag markalı velosiped sifariş etsə də, ona Viper markalı velosiped verilib. O bildirir ki, velosipedin dəyişdirilməsinin zəruriliyi uşağın mənəvi sarsıntı keçirməsinə səbəb olub.

Sərviz Kazımov müraciətində maliyyə məsələsi ilə bağlı da narazılığını ifadə edib. Onun iddiasına görə, kredit rəsmiləşdirilməsi zamanı 200 manat məbləğ göstərilsə də, satış çekində məhsulun qiyməti 184 manat qeyd olunub. Şikayətçi bu 16 manatlıq fərqin hansı əsasla yarandığı barədə ona rəsmi izahat verilmədiyini bildirir.

Sərviz Kazımov "Kontakt Home" rəhbərliyindən müraciətinin araşdırılmasını, sifarişinə uyğun məhsulun tam komplektasiya ilə təmin edilməsini, eləcə də kredit məbləği ilə satış çekində göstərilən məbləğ arasındakı fərqə dair rəsmi izahat verilməsini tələb edib.

Şikayətçi bildirir ki, problem qanunvericiliyə uyğun şəkildə həll edilməyəcəyi təqdirdə, istehlakçı hüquqlarının müdafiəsi məqsədilə aidiyyəti dövlət qurumlarına müraciət edəcək.

Prezident İlham Əliyevin sosial media hesablarında 1 Avqust - Azərbaycan Əlifbası və Azərbaycan Dili Günü ilə bağlı paylaşım edilib.

Paylaşımda deyilir:

"Bu gün 50 milyondan çox insan üçün Azərbaycan dili ana dilidir.

Təmiz, saf, ədəbi Azərbaycan dilinin qoruyucuları bizik - müstəqil Azərbaycan dövləti".

“Azəristiliktəchizat” Açıq Səhmdar Cəmiyyəti (ASC) “İdeal TM” Qapalı Səhmdar Cəmiyyəti (QSC) ilə satınalma müqaviləsi imzalayacaq.

“İdeal TM” QSC Xətai rayonu, Gəncə prospekti 35 ünvanında yerləşən 2 saylı qazanxananın yenidən qurulması işlərinin satın alınması ilə bağlı keçirilən tenderin qalibi seçilib.

Yenidənqurma işlərinin dəyəri 779 999,99 manat təşkil edir.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “İdeal TM” QSC 2018-ci ildə dövlət qeydiyyatına alınıb. Şirkətin nizamnamə kapitalı 2 010 manatdır. Hüquqi ünvanı Bakı şəhəri, Nəsimi rayonu, Tiflis prospekti 44C, mənzil 0-da yerləşir. Qanuni təmsilçisi Əliyev Əfqan Tapdıq oğludur.
Açıq mənbələrdə şirkət haqqında geniş məlumat yoxdur.

Əfqan Əliyev eyni zamanda “NN Group” MMC-nin rəhbəridir. Onun barəsində 2024-cü ildə Azərbaycan Respublikasının İnzibati Xətalar Məcəlləsinin 192.1-ci maddəsi ilə inzibati protokol tərtib edilib. Həmin maddə əmək müqaviləsi hüquqi qüvvəyə minmədən fiziki şəxslərin işə və ya xidmətlərin yerinə yetirilməsinə cəlb edilməsinə görə məsuliyyəti nəzərdə tutur.

Dövlət satınalmalarının vahid internet portalındakı məlumatlara əsasən, ötən il “Azəristiliktəchizat” ASC ilə “İdeal TM” QSC arasında ümumi dəyəri 4 390 569,55 manat olan satınalma müqaviləsi imzalanıb. Müqavilə çərçivəsində yeddi qazanxananın yenidən qurulması və modernləşdirilməsi ilə bağlı tikinti-quraşdırma, sınaq və sazlama işlərinin satın alınması nəzərdə tutulub.

“Azəristiliktəchizat” ASC-nin İdarə Heyətinin sədri İlham Mirəzliyevdir. O, 2025-ci ildən bu vəzifəni icra edir.

Qaynarinfo

Ayağı zədələndiyi üçün Sabunçu Tibb Mərkəzinə gələn vətəndaş iddia edir ki, orada ondan gipsin bir hissəsini və binti öz hesabına alması tələb olunub.

Bu barədə mətbuata müraciət edən ikayətçi pasiyent Fərid Fuad oğlu Bayramov məlumat verib.

VİDEO LİNKDƏ: https://bizimesr.media/az/post/sabuncu-xestexanasinda-biabirciliq-dediler-ki-gipsi-ve-binti-ozun-al---video-22782

O qeyd edib ki, 13:30-də xəstəxanaya gəlib və tibb işçiləri ona ayağına gips qoyulması üçün lazım olan ləvazimatların bir hissəsini öz vəsaiti hesabına almalı olduğunu deyiblər: "Dedilər ki, gipsin bir hissəsi bizdə var, qalanını özünüz alın. Binti də özünüz almalısınız. Onları almadan ayağınızı gipsə qoymayacağıq".

F.Bayramovun sözlərinə görə, bununla razılaşmayaraq aidiyyəti qurumlara şikayət edib. O bildirib ki, bundan sonra xəstəxanada münasibət dəyişib və tələb olunan ləvazimatlar tapılıb. Pasiyentin iddiasına görə, sonradan tibb işçiləri ona istifadə olunan gips və binti öz vəsaitləri hesabına aldıqlarını deyiblər.

Hazırda F.Bayramovun ayağı gipsə salınıb. Şikayətçi həmçinin onu da qeyd edib ki, ondan sonra gələn pasiyentlərdən də öz vəsaitləri hesabına bint almaları tələb olunur.

Bizimesr.media