Son aylarda Xətai rayonunda müxtəlif ünvanlarda qanunsuz və ya icazəsiz tikinti aparılması, yolların və yaşıllıq sahələrinin zəbt edilməsi, mühəndis-kommunikasiya xətlərinə müdaxilə və yaşayış binalarının konstruksiyasının dəyişdirilməsi ilə bağlı çoxsaylı şikayətlər yayılıb. Araşdırma zamanı bəzi iddiaların rəsmi qurumların cavabları ilə təsdiqləndiyi, bəzilərinin isə rəsmən təsdiqləməsə də, faktiki olaraq iddiaların doğru olduğu müəyyənləşib.

Bizimesr.info "Poliqon"a istinadən xəbər verir ki, 2026-cı ilin əvvəlindən sentyabrın sonunadək Xətai rayonu üzrə müxtəlif media resurslarında qanunsuz tikinti ilə bağlı onlarla problemli epizod barədə məlumat yayılıb. Sakinlərin şikayətləri, jurnalistlərin ərazi müşahidələri və ayrı-ayrı dövlət qurumlarının cavabları bir sıra ünvanlara, xüsusən də Xətai rayon İcra Hakimiyyətinə qarşı ciddi suallar doğurur.

Rəşid Bağırov küçəsində kollektorun üzərində 22 ev

Xətai rayonunda qanunsuz tikinti probleminin ən ciddi nümunələrindən biri Rəşid Bağırov küçəsində ortaya çıxıb. Aprelin əvvəlində kollektorun üzərində yerləşən iki mərtəbəli evin çökməsindən sonra məlum olub ki, sözü gedən bina kollektorun üzərində inşa olunub. Daha sonra həmin ərazidə kollektorun üzərində ümumilikdə 22 evin olduğu açıqlanıb. Onlardan 8-nin qəza zonasına 100–200 metr məsafədə yerləşdiyi və aparılan təmir işlərinə mane olduğu bildirilib.

May ayında Xətai rayon prokuroru Sərdar İmanov qəza zonasında 22 evin müəyyənləşdirildiyini bildirib. Prokurorun açıqlamasına görə, araşdırma zamanı evlərin vaxtilə su idarəsinin razılığı ilə tikildiyi məlum olub. Eyni zamanda bəzi şəxslərin torpağı qanunsuz zəbt edərək ev tikdiyi də bildirilib.

Əgər bu evlər qanunsuz tikilibsə, onda kollektorun mühafizə zonasında tikintiyə hansı qurum və necə razılıq verib?

Qeyd edək ki, Bakı şəhərində icra hakimiyyətinin rəsmi, ya da qeyri-rəsmi icazəsi olmadan daş daş üstünə qoymaq mümkün deyil. Buna görə də belə bir ehtimal özünü doğruldur ki, kollektorun üzərində 22 evin tikintisin Xətai rayon icra hakimiyyəti və ADSE qeyri-rəsmi razılıq verib. Çünki bu iki qurumun kollektorun üzərində inşa edilən 22 evdən xəbərsiz olması imkansızdır.

Maraqlidir ki, qəzadan sonra Xətai rayon prokurorluğu hadisə ilə bağlı istintaq araşdırması başlatsa da, bu günə qədər heç kim məsuliyyətə cəlb edilməyib. Ən azından belə bir açıqlama ortada yoxdur.

Həmçinin Rəşid Bağırov küçəsində kollektorun üzərində müəyyən edilən 22 evin sökülməsi barədə məlumat da yoxdur. Ancaq çökən ev sökülüb və ərazidə kollektorun bərpa işləri aparılıb. Bu isə Xətai rayon icra hakimiyyəti və ADSEA hələ də qanunsuzluğun davam etməsini təmin edirlər.

Əhmədlidə kollektorun üzərində daha bir ev

Rəşid Bağırov küçəsindəki hadisədən sonra 2024-cü ildə Əhmədli qəsəbəsi, 4-cü Buta küçəsində də kollektorun üzərində iki mərtəbəli ev tikilməsi yenidən gündəmə gəlib. Bu dəfə məlumat sakin iddiası ilə məhdudlaşmayıb. ADSEA kollektorun üzərində ağır konstruksiyalı evin tikildiyini və bunun kollektorun texniki xidmətinə mane olduğunu açıqlayıb.

Buna baxmayaraq Xətai rayon icra hakimiyyəti ADSEA-nın bu açıqlamasına heç bir reaksiya verməyib. Kollektorun üzərindəki iki mərtəbəli ev isə hazırda yerindədir.

General Mehmandarov küçəsi: sakinlərin müraciəti və rəsmi cavab

General Mehmandarov və Rüfət Əsgərov küçələrinin kəsişməsindəki 2942-ci məhəllə, 2-ci döngə, giriş 18 ünvanındakı qanunsuz tikili isə bu araşdırmanın ən çox sual doğuran epizodlarından biridir.

Sakinlərin müraciətlərindən sonra müxtəlif media qurumları həmin ərazidə fərdi yaşayış evinin tikildiyini yazıb. XüsusiTV-nin dərc etdiyi materialda sakinlərin iddiasına görə, tikinti aparan şəxs ərazinin ona məxsus 2,5 sot torpaq olduğunu və sənədlərinin olduğunu bildirib. Eyni materialda sakinlərin ərazinin sürüşmə zonasında yerləşdiyini iddia etdikləri qeyd olunub.

Bu məsələ ilə bağlı daha ciddi iddialar da irəli sürülüb. Bəzi media materiallarında tikintiyə guya ayrı-ayrı şəxslər vasitəsilə icazə alındığı və pul verildiyi iddia edilir.

Lakin məsələnin başqa tərəfi sənədlərlə bağlıdır.

Xətai Rayon İcra Hakimiyyətinin 20 fevral 2026-cı il tarixli cavabında həmin ünvanda “müvafiq icazə sənədləri olmadan” aparılan tikinti işlərinin dayandırıldığı və ərazinin nəzarətdə saxlanıldığı bildirilir.

Bakı Şəhər Memarlıq və Şəhərsalma Baş İdarəsinin cavabında da yerində baxış zamanı birinci mərtəbə səviyyəsində tikinti işlərinin dayandırıldığı müşahidə edildiyi qeyd olunur. Həmin qurum isə sadəcə tikintinin dayandırılmasını kifayət hesab etməyərək müvafiq tədbirlərin görülməsini istəyib. Yəni binanın sökülməsini. Buna baxmayaraq Xətai Rayon İcra Hakimiyyəti binanı sökməyib və bir müddətdən sonra tikinti davam etdirilib.

Sual olunur: icazəsiz tikinti rəsmi məktubla təsdiqlənib və işlərin dayandırıldığı bildirilibsə, sonrakı mərhələdə tikilinin vəziyyəti necə dəyişib? Hazırda həmin binanın dam örtüyü belə vurulub.

Bəs görəsən Xətai Rayon İcra Hakimiyyəti yaranmış mövcud vəziyyəti necə şərh edə bilər?

Xudu Məmmədov 29: sakinlər “yolumuzu bağlayırlar” deyir

Xətai üzrə ən maraqlı yeni epizodlardan biri Xudu Məmmədov küçəsi 29, 86 nömrəli məktəbin yaxınlığında qeydə alınıb.

Baku TV-nin aprel ayında yayımladığı reportaj sakinlərin müraciəti əsasında hazırlanıb. Sakinlər ərazidə gediş-gəliş yolunun zəbt olunduğunu və qanunsuz tikinti aparıldığını iddia ediblər. Onların sözlərinə görə, uşaqların məktəbə aparılması çətinləşib, metroya gedən yollar daralıb və ərazidə gələcəkdə çoxmərtəbəli bina tikilməsi planlaşdırılır.

Sakinlərdən biri bildirib ki, tikinti aparan tərəf onlara “iki metr yol” saxladığını deyib.

Ərazidə özünü “İnam 2019” MMC-nin iş icraçısı kimi təqdim edən Ramil Məcidov yeni bina tikilmədiyini, köhnə kafenin bərpa olunduğunu bildirib. Onun sözlərinə görə, ərazidə mühafizə zolağı təhlükəsizlik məqsədilə yaradılıb. Xətai Rayon İcra Hakimiyyəti də həmin ərazinin özəl mülkiyyətdə olduğunu və icra hakimiyyətinin tikintiyə icazə vermək səlahiyyətinin olmadığını bildirib.

Amma bu açıqlama belə mübahisəlidir. Çünki Bakı şəhərində özəl mülkiyyətdə aparılan təmir üçün belə icra hakimiyyətlərinin icazəsi tələb olunur.

FHN isə əraziyə baxış keçirildiyini və yalnız hasarlanmağa cəhd edildiyini, sakinlərin narazılığı əsasında hasarlama işlərinin qarşısının alındığını açıqlayıb. FHN-in məlumatına görə, həmin vaxt ərazidə tikinti-quraşdırma işi aparılmayıb.

Xudu Məmmədov 33A: yaşıllıq ərazisi ilə bağlı sakinlərin iddiaları

Xudu Məmmədov küçəsinin 33A ünvanı üzrə isə məsələ daha çox yaşıllıq və gələcək tikinti iddiaları ilə bağlıdır. Mia.az-ın mayın 8-də yayımladığı materialda sakinlərin iddiasına əsasən, ərazidə çoxsaylı ağacların kəsilərək yerində bina tikildiyi bildirilir. Sakinlər tikinti sənədlərinin açıqlanmasını və ağacların kəsilməsi məsələsinin araşdırılmasını tələb ediblər.

“Pressline” portalı isə eyni ünvan barədə daha geniş iddialar yayıb. Materialda sakinlərin əvvəlcə ərazidə yanğın baş verdiyini, daha sonra geniş sahənin dəmir hasarla əhatəyə alındığını və girişin məhdudlaşdırıldığını iddia etdikləri yazılıb. Həmçinin sakinlər ərazidə tikinti aparmaq istəyən şirkətin “İnam 2019” MMC olduğunu iddia ediblər.

Qeyd edək ki, bu materialda sakinlərin təzyiq və hədə-qorxu ilə bağlı səsləndirdiyi iddialar da yer alır.

Xudu Məmmədov küçəsində zirzəmi - İcazə almağa məcbur deyiləm

Sentyabrda “7News” portalı Xudu Məmmədov küçəsində zirzəmidə aparılan tikinti və yenidənqurma işlərindən yazıb.

Saytın məlumatına görə, sakinlərin şikayətindən sonra jurnalistlər əraziyə gedib. Özünü obyektin sahibi kimi təqdim edən şəxsin sənədləri göstərməkdən imtina etdiyi və tikinti üçün icazə almadığını söylədiyi qeyd olunub. Obyektin sahibi jurnalistlərə bildirib ki, zirzəmi ona məxsusdur və burda görülən işlərlə bağlı da icazə almağa da ehtiyac duymur. Halbuki qanunvericiliyə görə müvafiq ixra qurumlarından mütləq icazə alınmalıdır.

Bu məlumatla bağlı da Xətai rayon icra hakimiyyəti susub.

Cavanşir küçəsi 185 - Ana su xətti və üç ağac

“7News” portalının yanvarın 1-də yaydığı məlumatda Cavanşir küçəsi 185 ünvanında tikinti ilə bağlı sakinlərin iddiaları yer alıb. Sakinlərin iddiasına görə tikinti ana su xəttinə yaxın aparılır və ərazidə üç çoxillik ağac kəsilib. Həmçinin sakinlər bildirib ki, tikinti şəhərsalma və ekoloji normalara uyğun deyil və tikinti ətraf binalar üçün təhlükə yaradır.

Materialda daha ağır iddialar da var. Sayt sakinlərin tikintinin sürətlə tamamlanması üçün rayon rəhbərliyi tərəfindən icazə verildiyini iddia etdiklərini yazıb. Bu iddiar da Xətai Rayon İcra Hakimiyyəti tərəfindən təkzib olunmayıb.

Qədir Məmmədov küçəsi: 1000 kvadratmetrlik obyekt iddiası

Paytaxt.org yanvarın 5-də Qədir Məmmədov küçəsində təxminən 1000 kvadratmetr sahəni əhatə edən “sənədsiz obyekt” barədə yazıb.

Saytın məlumatına görə, sakinlər avtomobil və piyada yolunun zəbt edildiyini, ərazidə əvvəllər yaşıllıq zolağının olduğunu və ağacların gecə vaxtı texnika ilə çıxarıldığını iddia ediblər. Həmçinin obyektin arxa hissəsində qazıntı işlərinin aparıldığı bildirilib.

Bu məlumat da Xətai Rayon İcra Hakimiyyətinin heç bur reaksiyasına səbəb olmayıb və tikinti işləri davam etdirilib.

Cavanşir və Qədir Məmmədov küçələri üzrə problem

Bu iki ünvan bir-birindən fərqli olsa da, sakinlərin iddialarında eyni mövzular - torpaq sahəsinin statusu, yolun zəbt edilməsi, yaşıllıq və tikintiyə qanunsuz icazə verilməsi ilə bağlı şikayəylər təkrarlanır.

Qanunsuz tikintiyə isə Xətai Rayon İcra Hakimiyyəti tərəfindən icazə verildiyi heç kimdə şübhə doğrurmur.

Məhəmməd Hadi 152 - burada artıq “iddia”dan söhbət getmir

Məhəmməd Hadi küçəsi 152-dəki yarımçıq bina digər nümunələrdən fərqlənir.

Xətai Rayon İcra Hakimiyyəti binanın müvafiq sənədlərinin olmadığını və tikilinin qanunsuz hesab edildiyini açıqlayıb.

Bu ünvanda yeddi ailənin həmin yarımçıq binada yaşaması məsələsi də gündəmə gəlib.

Buna baxmayaraq Xətai Rayon İcra Hakimiyyəti qanunsuz binanın tikintisini kimlər tərəfindən aparılması və vaxtında niyə müdaxilə olunmaması barədə heç bir açıqlama verməyib və qanunsuz tikiliyə görə də kimsə cəzalandırılmayıb.

Ümumiyyətlə bu günə qədər çox saylı qanunsuz tikilililərlə bağlı Xətai Rayon İcra Hakimiyyətinin heç bir vəzifəli məsul şəxsi cəzalandırılmayıb və bu da xüsusi sual doğurur.

Babək prospekti 78: sakinlər narazıdır, icra hakimiyyəti isə başqa izah verir
Xətai rayonunda Babək prospekti 78 ünvanında dəmir qarajların sökülməsi ilə bağlı sakinlərin narazılığı da mediaya çıxıb.

Sakinlərin bir hissəsi söküntünün hüquqi əsaslarının onlara göstərilmədiyini iddia edib.

Xətai Rayon İcra Hakimiyyəti isə sentyabrın 24-də bildirib ki, ərazidə abadlıq və yaşıllaşdırma aparılır, ümumi istifadədə olan yerlərdə sakinlər tərəfindən yerləşdirilən dəmir qarajlar və yararsız tikililər sökülür.

Media monitorinqində ortaya çıxan daha bir vacib məqam

Araşdırmamızda diqqəti çəkən məqamlardan biri də eyni tikinti barədə müxtəlif saytların bir-birindən daha ağır iddialar irəli sürməsidir.

Məsələn, General Mehmandarov küçəsindəki tikinti barədə müxtəlif saytlarda torpağın sənədsin olması, tikintinin sürüşmə zonasında həyata keçirildiyini və tikintinin qanunsuz olduğunu və buna görə də vəzifəli şəxslərə pul verildiyini yazıblar.

İddialar çoxdur, hüquqi qiymət isə yoxdur
Mediada Rafiq Quliyevin rəhbərlik etdiyi Xətai rayonu üzrə son aylarda formalaşan mənzərə belədir:

Mediada adı keçən ayrı-ayrı şəxslərin rüşvət alması, tikintilərə qanunsuz icazə verməsi, qanunsuz tikinti aparan fiziki və hüquqi şəxslərihimayə etməsi və ya tikintinin arxasında şəxsən icra başçısının və başçısının dostu İntiqam Cümşüdovun dayanması ilə bağlı iddialar həddindən artıq çoxdur. Lakin bütün bu iddialara qarşı Xətai rayon İcra Hakimiyyətinin qarşı arqumentləri həddindən artıq zəifdir.

Xatırladaq ki, əksəriyyət rayonda qanunsuz tikililərin arxasında dayanan şəxsin məhz İntiqam Cümşüdov olduğunu ehtimal edir. Daha doğrusu, işbazlarla icra başçısı arasında vasitəçi olan şəxs məhz odur. İş o yerə çatıb ki, İntiqam Cümşüdov təhlükəsizlik qaydalarını belə nəzərə almadan bəzi işbazlara binaların üzərində əlavə mərtəbələr tikməyə razılıq verməsi barədə iddialar Xətaidə insanların dilindədir.

Qeyd edək ki, Xətai rayonunda qanunsuz tikililərin bəziləri icra hakimiyyəti və digər qurumlar tərəfindən təsdiqlənsə də, ortada bu qanunsuluqları törədən fiziki və ya hüquqi şəxslərə, həmçinin vəzifəli şəxslərə qarşı heş bir hüquqi tədbir həyata keçirilməyib. Bütün bunlar isə onu deməyə əsas verir ki, balıq başdan iylənib…

Bizimesr.Media

"Balaca Xədicəni bu vəziyyətə salanlar niyə cəzasız qalıb?" Bunu özünün etiraz dolu müraciətində tanınmış jurnalist Aytən Məmmədova qeyd edib.
O daha sonra fikrini belə davam etdirir: "Diş müalicəsi üçün Bakı Sağlamlıq Mərkəzinə sağ-salamat aparılan 11 yaşlı Xədicənin başına orada nə gətiriblərsə, uşaq 2 il yarımdan çoxdur komadadır.
Xədicənin anası Şahnaz xanımla danışanda adam dəhşətə gəlir...
Valideynlər uşağı müalicə üçün stomatoloqa aparıb. Əvvəldən razılaşıblar ki, uşağı incitməsin deyə, sedasiya üsulu ilə müalicə edəcək. Onlar kabinetdə olanda bir xanım gəlib, sonradan biliblər ki, anestezioloq Fərəh Amanovadır.
Müalicə müddətində valideynləri kabinetdən çıxarıblar. Onlar 4 dişin müalicəsinin bir xeyli çəkəcəyini düşünüb, xəstəxananın kafesində gözləyiblər. Bir qədər sonra kabinetin qarşısına gələndə görüblər ki, gərginlikdir, bir həkim əlində elektroşok aparatı ilə gəlir. Anlayıblar ki, uşağın başına nəsə gəlib...
Şahnaz xanım deyir ki, əvvəldən müayinə aparmadan, analiz götürmədən uşağına narkoz verilib. Narkozun miqdarı artıq olduğuna görə boğulma baş verib və uşağın beyninə uzun müddət oksigen getməyib. Nəticədə beyindəki hüceyrələr məhv olub və 2 il yarımdan çoxdur ki, balaca Xədicə komadadır.
Ən dəhşətlisi budur ki, uşağın bu vəziyyətə düşməsinə görə heç kim cəzalandırılmayıb. Xədicənin atası Zamin Babayev və anası Şahnaz xanım daha haralara şikayət etməyib, amma nəticə yoxdur.
Şahnaz xanım deyir ki, səbəbkarın məsuliyyətdən kənarda saxlanması onların dərdini ikiqat artırır: “Günahkarları qoruyub, məsuliyyətdən kənarda saxladıqca Xədicə kimi qurbanların sayı da çox olacaq. Fərəh Amanova deyib ki, narkozdan əvvəl analizlər götürülüb, orqanizm müayinə olunub. Müstəntiqdə kamera görüntüləri var, orada analiz olub? Orada müayinə olub? Bu qədər yalan olar?”
Adam bilmir ki, nə yazsın, nə desin...
***
Bir neçə gün əvvəl bir xəstə yaxınının həkimin kobud davranışı barədə şikayətindən sonra sosial şəbəkələrdə həkim-xəstə münasibətləri barədə gərgin müzakirələr başladı. Həkimlərin öz həmkarlarını müdafiə etməsi normaldır, xüsusən də söhbət işinin peşəkarı olan mütəxəssisdən gedirsə...
Amma o nə ritorika, o nə təkəbbür idi? Adamlara bir minnət qoyurlar, deyirsən, İlahi, bunlar havayı iş görür. Neçə yerdə gördüm, yazırlar ki, "həkimlər olmasa, ölərlər, ağılları başlarına gələr". Hələ biri pullu və kasıb xəstələrin özlərini necə aparmasıyla bağlı kateqoriyalar müəyyənləşdirmişdi.
İnsanlara bu cür yanaşanlar necə mərhəmətli ola bilər? Bəs xəstələr olmasa, həkimlər necə dolanar?
Pullu və kasıb xəstələrin bölgüsünü aparan “həkim” çox keçmədi ki, öz səviyyəsini daha aydın şəkildə ortaya qoydu. Başqa bir həkim həmkarı ilə birlikdə sosial şəbəkədə Azərbaycandakı futbol klubunun baş məşqçisinin prostatını müzakirəyə çıxarmaqla...
Ağ xalat geyinənlərin hamısı həkim deyil. Biz bu ölkədə nələr görməmişik? Adamın qanqren ayağını qoyub, sağlam ayağını kəsmişdilər...
Hər bir peşə özlüyündə dəyərlidir. Həkimlərin istifadə etdiyi aparatları yaradan mühəndislər də, dərmanları hazırlayan kimyaçılar da, onların hamısını öyrədən müəllim də, saatından asılı olmayaraq, özünü hadisə yerinə çatdıran yanğınsöndürən də, polis də, digərləri də...
Əlbəttə, həm işinin peşəkarı, həm də qanacağı olan həkimlər də bu ölkədə kifayət qədərdir. Onların əksəriyyətinin heç reklamını da görməzsiniz. Çünki buna ehtiyacları yoxdur..."

DİA-AZ

Bu gün Çingiz Həsənlinin sədrliyi ilə Naxçıvan Muxtar Respublikası Mərkəzi Seçki Komissiyasının iclası keçirilib. İclasda əvvəlcə Komissiyanın 11 dekabr 2025-ci il tarixli iclasının protokolu təsdiqlənib.

Sonra VII çağırış Naxçıvan Muxtar Respublikası Ali Məclisinin deputatı Abdullayev Qəzənfər İsmayıl oğlunun deputat mandatından məhrum edilməsinə köməklik göstərilməsi barədə ərizəsinə baxılıb.

Ali Məclisin deputatı Abdullayev Qəzənfər İsmayıl oğlunun müraciəti qanunvericiliyə uyğun qaydada Mərkəzi Seçki Komissiyasında araşdırılıb və onun mandatından məhrum edilməsi üçün qanuni əsasın olduğu müəyyənləşib.

Mərkəzi Seçki Komissiyası Abdullayev Qəzənfər İsmayıl oğlunun ərizəsini nəzərə alaraq, Naxçıvan Muxtar Respublikası Konstitusiyasının və “Naxçıvan Muxtar Respublikası Ali Məclisinə seçkilər haqqında” Naxçıvan Muxtar Respublikası Qanununun müvafiq maddələrinə uyğun olaraq onun deputat mandatından məhrum edilməsi barədə qərar qəbul edib.

Qeyd edək ki, ötən həftə Naxçıvan Muxtar Respublikası Həmkarlar İttifaqları Şurasının sədri Qəzənfər Abdullayevin var-dövləti ilə bağlı məlumatlar yayılmış və o, sədr vəzifəsindən istefa vermişdi.

Bizimesr.info

Sumqayıt Tibb Mərkəzinin tabeliyində fəaliyyət göstərən tibb müəssisələrində 13 əməkdaş bir gündə işdən azad edilib. İşdən çıxarılanlar arasında üç poliklinikanın baş həkimləri də var.

Buna səbəb vətəndaşlara sağlamlıq haqqında tibbi arayışların qısa müddət ərzində verilməsi olub.

Məlumata əsasən, TƏBİB tərəfindən aparılan araşdırma zamanı Sumqayıt Tibb Mərkəzinin tabeliyindəki poliklinikalarda sağlamlıq arayışlarının 20 dəqiqə ərzində verildiyi müəyyən edilib. Qurum bunu prosedur pozuntusu kimi qiymətləndirib.

Nəticədə 13 əməkdaşın əmək müqaviləsinə eyni gündə xitam verilib.

İşdən azad edilənlər arasında Sumqayıt şəhər 1, 2 və 3 nömrəli poliklinikaların baş həkimləri də var. Həmçinin həmin tibb müəssisələrində çalışan katibələr də eyni səbəblə işdən çıxarılıb.

Məsələ ilə bağlı TƏBİB-in rəsmi mövqeyi hələlik məlum deyil.

Tibb işçiləri bu qərarın əsassız olduğunu bildirirlər.

Teleqraf

Mətbuatda 48 saylı notariat ofisinin xüsusi notariusu Səadət Hüseynovun Bakı şəhərində fərqli üç ünvanda, o cümlədən Baş Dövlət Yol Polisi İdarəsinin Qeydiyyat İmtahan İdarəsinin həyətində, bundan başqa “Meyvəli” deyilən yerdə Baş Dövlət Yol Polisi İdarəsinin (BDYPİ) Qeydiyyat İmtahan İdarəsinin həyətində və eləcə də Binəqədi şossesində də fəaliyyət göstərməsi barədə təəccüb doğuran informasiyalar dolaşır. Məsələ burasıdır ki, Azərbaycan Respublikasının Qanununa və Azərbaycan Respublikasının digər qanunvericilik aktlarına əsasən əqdlər, habelə ərizələr və başqa sənədlər notariusun və ya notariat hərəkəti aparan digər vəzifəli şəxsin iştirakı ilə imzalanmalıdır. Sual olunur: Əgər Səadət Hüseynov bir ofisdə əyləşirsə, digər ofislərdə sadalanan qaydalara necə əməl olunur?”
Təbiidir ki, 48 saylı notariat ofisinin rəhbərinin bunca geniş səlahiyyəti Ədliyyə Nazirliyinin Qeydiyyat və Notariat Baş İdarəsi, bu idarənin notariat sahəsinə nəzarət edən rəis müavini Mehman Soltanov verib. Diqqətəlayiq haldır ki, Səadət Hüseynovun ofisinin məhz BDYPİ-nin strukturlarının həndəvərində fəaliyyət göstərməsi əsasən avtomobillə, sahiblik, etibarnamə və s. ilə bağlı əməliyyatların təsdiqi məsələlərinin cazibədar olması ilə əlaqədardır.
KİV həmçinin yazır ki, Səadət Hüseynov BDYPİ-nin siqnal idarəsinin rəisi Müşfiq Rəhimovun yeznəsidir. Müşfiq Rəhimov isə uzun illər BDYPİ-nin Qeydiyyat-İmtahan İdarəsinin rəis müavini işləyib. Belə çıxır ki, eyni müştərilər yeznə və qayının xidmətindən istifadə ediblər.
Bu və digər məsələlərlə bağlı suallarımızı cavablandırması üçün Səadət Hüseynova zəng vursaq da, telefonun dəstəyini qaldırmadı. Salamlaşma və ilk suallarımızı mesaj formasında göndərəndən sonra cavab əvəzinə ondan hədələyici mesaj aldıq: “Xahiş edirəm artıq dərəcədə narahat eləməyin. Mən sizi tanımıram, qoy bizdə sizə nəzarət edən ağsaqqaları narahat etməyək»
Qərara gəldik ki, Səadət Hüseynovla söhbətimizin davamını örtülü mesaj statusundan ictimai müstəviyə keçirək. Əlbəttə, S.Hüseynov jurnalistlərlə söhbət etməyi nəinki özünə, heç 50 min manat qiyməti olan telefon nömrəsinə sığışdırmır. Malik olduğu başqa daşınar və daşınmaz əmlakları, nəhayətsiz kapitalı demirik, təkcə o telefon nömrəsini quru maaşla alması üçün orta statistik məmur yarım ömür xərcləməlidir.
Mövzuya qayıdacağıq.
Mənbə: Dəryaz.az
Təqdim etdi: DİA-AZ.COM (Ərsoyun Bloqu)

Xaçmaz rayonunun Qaracəlli kəndindən olan fermer Seymur Abu Hamza aldığı şaftalı tinglərinin bir qisminin vəd edilən sorta uyğun olmadığını iddia edir.

Gununsesi.info xəbər verir ki, fermerin sözlərinə görə, o, təsərrüfatı üçün ümumilikdə 2100 ədəd şaftalı tingi alıb.

Tinglərin alınmasına və sonrakı üç il ərzində onların becərilməsinə ciddi maliyyə vəsaiti, əmək və vaxt sərf edib.

Lakin fermer bildirir ki, ağaclar məhsula düşdükdən və satış mərhələsinə çatdıqdan sonra təxminən 1400 ağacın əvvəlcədən vəd edilən sort olmadığı məlum olub.

Məsələ ilə bağlı fermerin təqdim etməyə hazır olduğu WhatsApp yazışmaları və səs yazılarının da olduğu bildirilir.

Fermer qeyd edir ki, zərurət yaranacağı təqdirdə həmin materialları araşdırılması üçün aidiyyəti dövlət qurumlarına təqdim etməyə hazırdır.

Fermerin sözlərinə görə, məsələdə Agro Plant MMC, eləcə də Gürkan Baş və Anar Hüseynlinin adları keçir.

Seymur Abu Hamzanın əsas narahatlığı isə problemin yalnız onun təsərrüfatı ilə məhdudlaşmaması və gələcəkdə digər fermerlərin də analoji vəziyyətlə üzləşə bilməsidir.

Fermer hesab edir ki, tinglər fermerlərə satılmazdan əvvəl onların sort xüsusiyyətləri, mənşəyi, sertifikatları, müvafiq sənədləri və keyfiyyəti ciddi şəkildə yoxlanılmalıdır.

O həmçinin bildirir ki, Qaracəlli kəndində təxminən 20 hektar ərazidə, eləcə də Quba rayonunda yeni meyvə tinglərinin yetişdirildiyi barədə məlumat var. Fermer həmin tinglərin istehsalı, sortu, mənşəyi, sertifikatlaşdırılması və satışına dair məsələlərin aidiyyəti qurumlar tərəfindən araşdırılmasını xahiş edir.

Fermerin fikrincə, bu kimi məsələlər vaxtında araşdırılmalı, tinglərin keyfiyyətinə və sort uyğunluğuna nəzarət gücləndirilməlidir. Onun sözlərinə görə, məqsəd təkcə özünün üzləşdiyi problemin həlli deyil, digər fermerlərin də illərlə əmək və vəsait sərf etdikdən sonra analoji problemlə qarşılaşmasının qarşısını almaqdır.

Seymur Abu Hamza Azərbaycan Respublikasının Kənd Təsərrüfatı Nazirliyinə və digər aidiyyəti qurumlara müraciət edərək məsələnin araşdırılmasını, tinglərin mənşəyi və sort xüsusiyyətlərinin yoxlanılmasını, həmçinin ting bazarında nəzarət mexanizmlərinin gücləndirilməsini xahiş edir.

Qeyd edək ki, səsləndirilən iddialarla bağlı adı çəkilən şirkət və şəxslərin mövqeyini öyrənmək üçün onlara müraciət edilə bilər.

Qarşı tərəfin açıqlaması daxil olduğu halda, xəbər yenilənəcək.

Bakı şəhər sakini Nihat Eyvazov, həyat yoldaşı və 2 yaşlı oğlu Namid Eyvazov özünü "loqoped-psixoloq" kimi təqdim edən Türkan Mehdizadə tərəfindən fiziki zorakılığa məruz qalıb

Poliqon xəbər verir ki, bu barədə sosial şəbəkədə vətəndaş Nihat Eyvazovun müraciəti yayımlanıb.

Şikayətçi Nahid Eyvazov bildirir ki, Türkan Mehdizadənin video çıxışlarını Tik-tok sosial şəbəkəsində görüb və əlaqə yaradıblar. Özünü loqoped-psixoloq kimi təqdim edən T.Mehdizadə N. Eyvazovu və ailəsini Yasamal rayonu Zahid Xəlilov küçəsi 128 (Bakı Dövlət Universiteti ilə üzbəüz) ünvanında yerləşən Elite city yaşayış binasının 17-ci mərtəbəsində qəbul edib.

N. Eyvazov bildirir ki, Türkan Mehdizadə ilə yaranmış davanın səbəbi, yanında fizioterapevt kimi təqdim etdiyi anasının uşağıma qışqırması və “ağırdı götürə bilmirəm” sözünə etiraz etdiyimə görə baş verib. İlk əvvəl Mehdizadənin anası N.Eyvazovu və yoldaşını təhqir edib, daha sonra söhbətə qoşulan “loqoped- psixoloq” Türkan vətəndaşa fiziki zorakılıqlar etməyə başlayıb. Şikayətçi qeyd edir ki, Türkan Mehdizadə ilə anası onun üzünü çırmaqlayıb, həyat yoldaşını vurub və 2 yaşlı övladına xəsarət yetirib.

Nahid Eyvazov özünə və ailəsinə edilən zorakılıqla bağlı hüquq mühafizə orqanlarına rəsmi şikayət edib. Hazırda özünü "loqoped - psoxoloq" kimi təqdim edən Türkan Mehdizadəyə cinayət işinin açıldığı bildirilir. (Poliqon)

Bakının Nəsimi rayonu, 54 saylı orta məktəbdə Müəllim Günü ilə bağlı pul yığılır.

Tribuna.az xəbər verir ki, Elşən Teymurov Tik-Tok hesabında bununla bağlı valideyn komitəsinə göndərilən səsi yayıb.

Şəhərin Memar Əcəmi istiqamətində yerləşən 54 saylı məktəbin konkret olaraq 8 D sinfindən söhbət gedir.

Qeyd edək ki, Elm və Təhsil Nazirliyi bütün məktəblərə pul yığılmaması barədə xəbərdarlıq edib.

VİDEO LİNKDƏ; https://diaaz.info/manset/491857-bu-mektebde-de-bazar-aciblar.html

Goranboy Rayon İcra Hakimiyyətində yeni kadr təyinatları olub.


Bununla bağlı icra başçısı Məhərrəm Quliyev müvafiq əmrlər imzalayıb.


Əmrə əsasən, Ziya Aslanov icra başçının köməkçisi vəzifəsinə gətirilib.


Digər əmrlə, Şəmsi Ziyadov qurumun İctimai-siyasi və humanitar məsələlər sektorunun müdiri vəzifəsinə təyinat alıb. O, bu təyinata qədər Goranboy Rayon İcra Hakimiyyəti başçısının Boluslu kənd inzibati ərazi dairəsi üzrə nümayəndəsi olub.


Əfqan Vəliyev isə İcra Hakimiyyətinin Müharibə iştirakçıları və şəhid ailələri ilə işin təşkili sektorunun böyük məsləhətçi təyin edilib.


Xatırladaq ki, yeni təyinatlar olan vəzifələr vakant idi.


Ölkə.az

Şərurda üzərində İlham Əliyevin şəkli olan ənənəvi məktəbli kitabçalarının qəbul edilmədiyi bildirilir. Onların əvəzinə üzərində rayon məktəblərinin şəkilləri olan yeni gündəliklər təklif edilir. Valideynlərin sözlərinə görə, yeni gündəliklər əvvəlkilərdən ikiqat baha satılır.

Valideynlər bildirirlər ki, rayondakı “Kitab evi”ndə məktəblər üçün ayrıca gündəliklər hazırlanıb və şagirdlərə yalnız həmin gündəliklərdən istifadə etməli olduqları deyilib. Onlar Şərur şəhər 2 nömrəli tam orta məktəb üçün hazırlanmış gündəliyin şəklini “Gündəlik Naxçıvan”a təqdim ediblər.

Üç övladı həmin məktəbdə təhsil alan V.N. deyir ki, tətil vaxtı aldığı ənənəvi gündəliklər məktəb tərəfindən qəbul edilmədiyindən əlavə xərc çəkməyə məcbur olub:

“Gündəliklər rayondakı kitab evində hazırlanır və buna başçının qohumları nəzarət edir. Bizə deyirlər ki, yalnız məktəbin özü üçün hazırlanan bu gündəliyi almalıyıq. Başqa gündəlik keçərli sayılmır. Əvvəl istifadə etdiyimiz gündəlik 1 manat 50 qəpik idi, indi isə bunu 3 manata satırlar. Başqa gündəlik alanlara deyilib ki, qaytarsınlar. Yeni gündəliyin məcburi olduğunu bildirirlər.

Mən üç uşağımın gündəliyinə 4 manat 50 qəpik vermişdim. Bu pul heçə sayılır. İndi əlavə 9 manat verib onların dediyi gündəlikləri almalıyam.”

Adının açıqlanmasını istəməyən digər valideyn də yeni qaydadan narazıdır:

“Nəyə görə kiminsə cibini doldurmaq üçün gündəliyi məcburi şəkildə ikiqat qiymətə almalıyıq? Valideynləri məcbur edirlər ki, məhz həmin kitab evindən alıb istifadə etsinlər. Başqa gündəlik alanlara isə onu qaytarmaq tapşırılır. Bizə deyilənə görə, bu satışın arxasında rayon rəhbərliyinə yaxın şəxslər dayanır. Öz kommersiya maraqlarına görə bizi əlavə xərcə salırlar. Gündəlik monopoliyası yaradıblar. Düşünmürlər ki, camaat kasıbdır.”