“Medistyle” (MediStyle Hospital) Məhdud Məsuliyyətli Cəmiyyətinin (MMC) yenidən vergi borcu yaranıb.


xəbər verir ki, Qaynarinfo-nun məlumatına görə, “MediStyle Hospital”ın hazırda İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə hazırda 70.503,85 AZN vergi borcu var.


Qeyd edək ki, ötən il MMC-nin nizamnamə kapitalı 279.095 manatdan 100 manata endirilib.


Xatırladaq ki, fövqəladə hallar nazirinin müavini, tibb xidməti general-leytenantı Faiq Tağı-zadəyə məxsus olduğu deyilən “MediStyle Hospital”a uzun müddət onun bacısı oğlu İmran Ağayev rəhbərlik edib. O, həmçinin klinikanın təsisçisidir. Hazırda “MediStyle” MMC-nin qanuni təmsilçisi orada uroloq-androloq işləyən Əhmədov Ramil Famil oğludur.Tribuna.az

Rusiyanın Federal Təhlükəsizlik Xidmətinin (FSB) keçmiş yüksək vəzifəli əməkdaşı Dmitri Senin ölkədən qaçmaq üçün seçdiyi üsulla gündəmə gəlib.

47 yaşlı keçmiş agentin sözlərinə görə, Kremlin təqiblərindən xilas olmaq üçün Rusiyadan Qazaxıstana inək cəsədinin içində keçib.

Məlumata görə, Senin 2017-ci ildə korrupsiya araşdırması apardığı dövrdə “xəyanət” ittihamı ilə hədəfə çevrilib. Uzun müddət hüquqi mübarizə aparsa da, nəticə əldə edə bilməyən keçmiş agent daha sonra ölkədən qaçmaq qərarı verib.

O iddia edir ki, sərhəddəki termal kameralardan yayınmaq üçün bədənini alüminium folqa ilə büküb, xüsusi qoruyucu geyimlər geyinib və qaçaqmalçıların köməyi ilə ölü inəyin içinə gizlənib. Daha sonra traktora yüklənən heyvan cəsədi ilə birlikdə Rusiya–Qazaxıstan sərhədini keçib.

Senin təxminən bir saat ərzində cəsədin içində gözlədiyini, planı isə qış aylarında həyata keçirdiyini bildirib. O, bunun səbəbini heyvan cəsədinin isti havada tez çürüməsi ilə izah edib.

Keçmiş agent sərhədi keçdikdən sonra piyada şəkildə əvvəlcədən müəyyən edilmiş nöqtəyə çatdığını və daha sonra Monteneqroya sığındığını açıqlayıb. Senin xarici kəşfiyyat orqanlarından yardım almadığını da vurğulayıb. Hadisə beynəlxalq mediada geniş rezonans doğurub.

Bakıda fəaliyyət göstərən orta ümumtəhsil məktəblərinin rəsmi internet səhifələrində son günlər diqqət çəkən dəyişiklik müşahidə olunur.
Bakı Şəhəri üzrə Təhsil İdarəsinin rəsmi portalından məktəblərin fərdi saytlarına keçid edildikdə əvvəl mövcud olan məzmunun bir hissəsinin, xüsusilə məktəb rəhbərliyi və pedaqoji heyətin foto məlumatlarının artıq əks olunmadığı görünür.
Əvvəllər bu səhifələrdə direktorlar, müavinlər və müəllim heyətinin fotoşəkilləri ilə birlikdə təqdim olunan məlumatlar ictimaiyyət üçün məktəblərin tanınması və informasiya şəffaflığı baxımından mühüm hesab edilirdi.
Hazırda isə Bakı şəhərində fəaliyyət göstərən məktəblərin rəsmi saytlarında bu vizual məlumatlar tamamilə çıxarılıb.
Dəyişikliyin səbəbi ilə bağlı hələlik ictimaiyyətə rəsmi məlumat açıqlanmayıb.
Ancaq bu istiqamətdə müxtəlif ehtimallar irəli sürülür. Onların arasında texniki yenilənmə və ya saytların vahid formatda yenidən qurulması ilə bağlı proseslər, həmçinin şəxsi məlumatların qorunması və vizual məlumatların istifadəsinə dair daxili qaydalarda dəyişikliklər ehtimalları yer alır.
Eyni zamanda bəzi ekspertlər tərəfindən başqa bir ehtimal da gündəmə gətirilir.
İddialara görə, ayrı-ayrı təhsil müəssisələrinin fəaliyyətindəki nöqsanlarla bağlı mediada yayılan tənqidi materiallar zamanı direktor və pedaqoji heyətin foto məlumatlarının xəbər saytlarında və sosial şəbəkələrdə yayılmasının qarşısının alınması da mümkün səbəblər sırasındadır.
Lakin bu iddialar hələlik rəsmi şəkildə təsdiqlənməyib və hazırda yalnız ehtimal xarakteri daşıyır.
Editor.az
Facebook-da paylaş

Penitensiar Xidmətin İxtisaslaşdırılmış Müalicə Müəssisəsinə müvəqqəti rəis təyin olunub


Bizimesr.com bildirir ki, Ədliyyə Nazirliyinin Penitensiar Xidmətinin İxtisaslaşdırılmış müalicə müəssisəsinin rəisi vəzifəsinə müvəqqəti təyinat həyata keçirilib.


Məlumata görə, sözügedən vəzifə müvəqqəti olaraq Əhəd Abdiyevə həvalə olunub. Bununla bağlı ədliyyə naziri Fərid Əhmədov tərəfindən müvafiq əmr imzalanıb.


Qeyd edək ki, Əhəd Abdiyev bundan əvvəl Ədliyyə Nazirliyi Penitensiar Xidməti Bakı İstintaq Təcridxanasında rəis müavini vəzifəsində çalışıb.


Penitensiar Xidmətin İxtisaslaşdırılmış müalicə müəssisəsi məhkumlar arasında “Tubzon” adı ilə tanınır. Uzun illərdir müəssisədə idarəetmə və məhkumların müalicəsi ilə bağlı müxtəlif problemlərin olduğu barədə iddialar səsləndirilir.


Keçmiş məhkumların və yaxınlarının səsləndirdiyi iddialarda müəssisədə bəzi xidmətlərin qeyri-rəsmi ödənişlər müqabilində həyata keçirildiyi, maddi imkanı olmayan şəxslərin müalicə ilə bağlı çətinlik yaşadığı bildirilir. Həmçinin xəstə olmayan bəzi şəxslərin uzun müddət müəssisədə saxlanıldığı barədə də fikirlər yer alır. Lakin bu iddialarla bağlı rəsmi qurumların mövqeyi açıqlanmayıb.


Diqqət çəkən məqamlardan biri isə müəssisəyə yenidən müvəqqəti rəhbər təyin edilməsidir. Bu hal penitensiar sistemdə sözügedən müəssisə ilə bağlı problemlərin tam həll olunmaması barədə müzakirələri dayandırmır.


Bizimesr.com

QHT-lərə Dövlət Dəstəyi Agentliyinin 2026-cı il üzrə kiçik, orta və böyük qrant müsabiqəsinin nəticələri martın 12-də elan olundu. Adətən nəticələrin açıqlanmasından sonra təşkilatlar müqavilə prosedurlarını tamamlayır, bildirişlərini əldə edir və layihələrin icrasına başlayırlar. Lakin bu dəfə vəziyyət fərqlidir. Üzərindən iki ay keçməsinə baxmayaraq, çoxsaylı QHT-lər hələ də qrant bildirişlərini ala bilmirlər.

Yenixeberorg.com: Ən ciddi problem isə odur ki, layihələrin icra müddəti artıq faktiki olaraq başlayıb. Bir çox təşkilatlar fəaliyyət planlarını aprel ayına uyğun qurub. Təlimlər, seminarlar, tələbə və şagirdlərlə bağlı tədbirlər məhz yaz-yay aylarına hesablanmışdı. Amma mayın ortalarında belə vəsaitdən istifadə etmək mümkün deyil. Nəticədə QHT-lər ya layihələri kağız üzərində saxlamalı, ya da sonradan qısa müddətə sıxışdırılmış şəkildə həyata keçirməlidirlər.

Məsələ ilə bağlı QHT- lərə Dövlət Dəstəyi Agentliyinə müraciət edən təşkilatlara bildirilib ki, müqavilələr və zəruri sənədlər artıq hazırlanaraq Ədliyyə Nazirliyinə təqdim olunub. Hətta qeyd olunur ki, bildirişlərin verilməsinə nazirlikdə Güney adlı şəxs cavabdehdir və müraciətlər ona yönləndirilməlidir. Bu isə sualları daha da artırır.

Dövlətin özü tərəfindən ayrılmış qrantlarla bağlı bildirişin verilməsi niyə iki ay çəkir? Hazır sənədlərin hərəkəti niyə bu qədər ləngiyir?

Mövzu ilə bağlı "Yenixeberorg"a danışan ekspert bildirir ki, "ortaya çıxan mənzərə ondan ibarətdir ki, QHT- lərə Dövlət Dəstəyi Agentliyi məsuliyyəti öz üzərindən ataraq prosesi Ədliyyə Nazirliyinin Qeydiyyat və Notariat Baş İdarəsinin üzərinə yönəldir. Nazirlik tərəfindən isə indiyədək ictimaiyyətə hər hansı əsaslandırılmış açıqlama verilməyib. Dövlət qurumları arasında koordinasiya problemi isə nəticədə vətəndaş cəmiyyətinin fəaliyyətinə zərbə vurur".

Əslində burada söhbət yalnız texniki gecikmədən getmir. Problem həm də planlaşdırmanın və idarəetmənin keyfiyyəti ilə bağlıdır. Bir aydan sonra məktəblər bağlanacaq, tələbə və şagird auditoriyası yay tətilinə çıxacaq. QHT-lər isə fəaliyyətləri ya təxirə salmalı, ya da 10-15 gün ərzində formal şəkildə keçirməyə məcbur qalacaqlar. Belə vəziyyətdə layihələrin keyfiyyətli icrasından danışmaq çətindir.

Digər tərəfdən, təşkilatlar sentyabr ayına tədbir saxlamaq istəmirlər. Çünki yeni qrant müsabiqəsi elan olunanda əvvəlki layihələrin başa çatdırılması tələb olunur. Beləliklə, dövlət qurumlarının yaratdığı bürokratik gecikmə QHT-ləri faktiki olaraq çıxılmaz vəziyyətə salır: ya layihəni tələsik icra et, ya da gecikməyə görə məsuliyyət daşı.

Material hazırlanarkən QHT- lərə Dövlət Dəstəyi Agentliyindəki mənbədən əldə etdiyimiz məlumata görə, bu gün Ədliyyə Nazirliyi tərəfindən xeyli sayda bildiriş təqdim olunub. Bu, müəyyən irəliləyiş sayıla bilər. Amma problemin tam həll edilmədiyi də etiraf olunur. Deməli, xeyli sayda təşkilat üçün qeyri-müəyyənlik hələ də davam edir.(Yenixeberorg.com)

Dövlət Gömrük Komitəsinin “Azərterminalkompleks” Birliyi tərəfindən Gömrük balansında olan tərəzilərin quraşdırılması üçün layihə-smeta sənədlərinin hazırlanması xidmətinin satınalınması üzrə 03.11.2025-ci ildə başlanılmış açıq tenderə yekun vurulub. Müsabiqənin qalibi “KON-LAY PROJECT” Məhdud Məsuliyyətli Cəmiyyəti seçilib və tərəflər arasında 50.976 manat məbləğində satınalma müqaviləsi bağlanılıb. Məlumat satınalmaların portalında 04.05.2026-cı ildə dərc edilib.

Yenixeberorg.com: Şərtlər toplusuna görə MMC 28.04.2027-ci ilə qədər Sədərək tırpark, Sədərək Gömrük Postun, Şahtaxtı Gömrük Postu, Astara Modul tipli Dövlət Sərhəd Buraxılış məntəqəsi və Qırmızı Körpü Gömrük Postu ərazisində 1. Topoqrafiya 2. Geologiya 3. Memarlıq həlli 4. Konstruksiya 5. Texnologiya 6. Tikintinin təşkili 7. Elektrik təchizatı 8. Video müşahidə 9. Rabitə təchizatı 10. Ekspertiza layihənin müdafiəsi 11. Smeta sənədlərinin hazırlanması işlərini həyata keçirməlidir.

Qeyd edək ki, “Azərterminalkompleks” Birliyi tərəfindən nəzərdə tutulmuş layihə-smeta sənədlərinin hazırlanması xidmətinin satınalmasında ehtimal olunan qiyməti 111.285,39 manat müəyyən edilib.

Dövlət satınalmalarının portalına yerləşdirilmiş bu məlumatdan da görsəndiyi kimi satınalan təşkilat olaraq “Azərterminalkompleks” Birliyinin müəyyən etdiyi ehtimal qiyməti ilə təchizatçı “KON-LAY PROJECT” MMC-nin təklif etdiyi qiymətlər arasında kəskin fərq var.
Qeyd edək ki, “Dövlət Satınalmaları haqqında” Azərbaycan Respublikası Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Amma göründüyü kimi “Azərterminalkompleks” Birliyi açıq tender müsabiqəsində ehtimal olunan qiymətlə müqayisədə 20 faizdən dəfələrlə aşağı, hətta 50 faizdən də aşağı qiymət təqdim etmiş “KON-LAY PROJECT” MMC ilə satınalma müqaviləsi bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir.

Burada maraqlı başqa bir durum da var. Yuxarıda qeyd etdiyimiz kimi, bu məlumat satınalmaların portalında 04.05.2026-cı ildə dərc edilib.

Qeyd edək ki, bu müqavilə bağlandıqdan bir neçə gün sonra, daha dəqiq 13.05.2026-ci ildə satınalmaların portalında yeni məlumat dərc edilib. Nəzarət orqanı olaraq Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliy tərəfindən “KON-LAY PROJECT” MMC sənəd saxtalaşdırdığına görə 12.05.2026-ci il tarixdən etibarsız təchizatçılar siyahısına alınıb.

Nəzarət orqanı tərfindən etibarsız təchizatçılar siyahısına salınmış MMC barədə daha nə kimi məlumatlar var?

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “KON-LAY PROJECT” (VÖEN: 1301807111) Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 07.11.2008-ci il tarixdə dövlət qeydiyyatına alındığı göstərilir. Reyestr məlumatlarında nizamnamə kapitalı 20 manat olan MMC-nin hüquqi ünvanı BAKI ŞƏHƏRİ, YASAMAL RAYONU, HƏSƏNBƏY ZƏRDABİ PR., ev.78, m.20, qanuni təmsilçisinin isə Həsənov Anar Əzimxan Qasımov Xalid Ağamalı oğlu olduğu qeyd edilib.

MMC-nin instagram sosial şəbəkə hesabında sənaye və mülki binalarının memarlıq və layihələndirilməsi, interyer və eksteryer dizayn, landşaft, smeta, gtəmir-tikinti işləri ilə məşğul olduğu göstərilir.

Medianın 2014-cü ildə yaydığı məlumata görə Dövlət Şəhərsalma və Arxitektura Komitəsi Bakıdakı bəzi çoxmərtəbəli binaların qanunsuz tikintisinə etiraz əlaməti olaraq Bakı Şəhər İcra Hakimiyyətinə müraciət edib. Dövlət Şəhərsalma və Arxitektura Komitəsi Bakı meriyasına müraciət edərək bildirib ki, tikintisinə yeni başlanılmış bəzi obyektlərin tikinti layihələrinin tərkibi mövcud norma və standartların tələblərinə cavab verməsə də, həmçinin həmin obyektlərin ərazidə yerləşdirilməsi şəhərsalma baxımından əsaslandırılmasa da, tikinti layihələri şəhər memarlıq xidməti tərəfindən razılaşdırılıb. Komitə göstərilən obyektlərin layihələrində müvafiq dəyişikliklərin aparılmasını və yaxud bu obyektlərdə tikinti işlərinin müvafiq qaydada dayandırılmasını xahiş edib.

Eyni zamanda layihəçilərə “Kon-Lay Project” MMC və digər layihəçi şirkətlərə xəbərdarlıq edilib ki, bir daha şəhərsalma reqlamentinin pozulması ilə sifarişçinin arzusuna uyğun olaraq tikinti obyekti layihələndiriləcəyi təqdirdə onların lisenziyası müvafiq qaydada dayandırılacaq.

Göründüyü kimi, Dövlət Gömrük Komitəsinin “Azərterminalkompleks” Birliyi həm şəhərsalma reqlamentinin pozulması ilə sifarişçinin arzusuna uyğun olaraq tikinti obyekti layihələndirən, həm də sənəd saxtalaşdıran bir MMC ilə ehtimal qiyməti 50 faizdən də aşağı olan satınalma müqaviləsi bağlamışdır

Qeyd edək ki, “Kon-Lay Project” MMC 2025-ci ildə bəzi dövlət qurumları tərəfindən keçirilmiş 25 satınalmanın qalibi olub. Mediada MMC-nin qalibi olduğu satınalmalarda şübhəli məqamların olduğu iddia edilir.

Ağdam, Füzuli və Xocavənd rayonlarında Bərpa,Tikinti və İdarəetmə Xidməti ilə Xocavənd rayonunun Hadrut, Sos, Tağaverd, Qırmızı Bazar qəsəbəsi, Quzey Xırman və Xanoba kəndlərinin fərdi yaşayış evlərinin əsaslı təmir işlərinin layihələndirilməsi üzrə 2.417.831,8, Füzuli rayonu ərazisində yerləşən Dövlətyarlı kəndinin layihəsinə əlavə və dəyişikliklərin edilməsi üzrə 358.838, Dövlətyarlı kəndi ərazisində “Ağıllı kənd”in tikintisinin 1-ci mərhələsi üzrə tikinti işlərinə müəllif nəzarəti xidmətinin aparılması üzrə isə 257.830 manat dəyərində 3 müqavilə bağlayıb.

İndi kim zəmanət verə bilər ki, “Kon-Lay Project” MMC daha əvvəllər də qalibi olduğu satınalmalarda sənəd saxtalaşdırmayıb, tenderləri danışıq yolu ilə əldə etməyib?

Qeyd edək ki, Dövlət Gömrük Komitəsinin “Azərterminalkompleks” Birliyinin rəisi Kənan Aşurludur. Kənan Aşurlu uzun illər Fövqəlada Hallar Nazirliyində işləyib. O, 2019-cu ilin sonunadək Fövqəladə Hallar Nazirliyinin Bakı Regional Mərkəzinin rəisi vəzifəsində çalışıb. 2022-ci ilin avqust ayında “Azərterminalkompleks” Birliyinə rəhbər təyin olunub. 2024-cü ilin yanvarında Prezident İlham Əliyevin Sərəncamına əsasən gömrük xidməti general-mayoru ali xüsusi rütbəsi verilib.

Xatırladaq ki, Kənan Aşurlu 2022-ci ilin iyunun 20-də Dövlət Təhlükəsizliyi Xidməti tərəfindən keçirilən xüsusi əməliyyat nəticəsində saxlanılmış gömrük general-mayoru Ehtiram Xəlilovun yerinə təyin edilib.

2026-ci ilin aprelində Hesablama Palatasının audit hesabatında “Azərterminalkompleks” Birliyində maliyyə və uçot pozuntuları aşkarlandığı bildirilir. Hesabatda yazılıb ki, “2023-cü ildə digər pozuntu isə Komitənin Yasamal rayonu, İnşaatçılar prospekti 2 ünvanında yerləşən yeni inzibati binasının tikintisi ilə bağlı müəyyən edilib.

Belə ki, “Azərterminalkompleks” Birliyi tərəfindən Komitənin yeni inzibati binasının tikintisi çərçivəsində bağlanılmış müqavilələr üzrə aparılmış hesablaşmalarda kapitallaşdırılmalı olan dəyər 17 milyon 988,8 min manat olduğu halda, maliyyə uçotu sənədlərində bu məbləğ 2 milyon 733,9 min manat az əks etdirilib. Binanın tikintisi üzrə əvvəlki təchizatçılarla bağlanmış müqavilələrin icra olunmayan hissəsinə görə sonrakı təchizatçı ilə bağlanılmış müqavilələrin tərkibində iki müqavilə üzrə bəzi işlərin qiymətləri də artırılıb. Nəticə olaraq xərclər şişirdilib”- məlumatda deyilir.(aktualinfo.net)

Sabunçu rayonu, Elşən Mehdiyev küçəsində yerləşən park ərazisində aparıldığı bildirilən tikinti işləri ətrafında ciddi suallar yaranıb. Redaksiyamıza daxil olan məlumatlara görə, ərazidə “Füzuli” adlı şəxs tərəfindən həyata keçirildiyi iddia olunan tikinti ilə bağlı jurnalist araşdırmasına mane olunmağa cəhd edilib.

İddialara görə, tikinti aparılan əraziyə yaxınlaşan media nümayəndələrinə obyekt barədə məlumat verilmək əvəzinə, “bu obyekt elə bir adamındır ki, ona icra başçısı da söz deyə bilməz” kimi ifadələr səsləndirilib. Bu isə cəmiyyətdə haqlı olaraq suallar doğurur.

Azərbaycan Respublikasının Prezidenti İlham Əliyev dəfələrlə çıxışlarında bildirib ki, ölkədə “toxunulmaz”, “əvəzolunmaz” şəxs yoxdur və qanun hər kəs üçün eyni tətbiq edilməlidir. Lakin Sabunçuda baş verən bu hadisə fonunda sakinlər və ictimaiyyət nümayəndələri sual edir:

Əgər doğrudan da heç kəs qanundan üstün deyilsə, bəs Sabunçu rayonunda kimlər bu qədər rahat şəkildə “icra başçısı belə söz deyə bilməz” mesajı verə bilir?

Ərazidə aparılan tikintinin hansı təyinat üzrə həyata keçirildiyi, aidiyyəti qurumlardan icazəsinin olub-olmadığı, park ərazisində hansı əsaslarla tikinti aparıldığı da hələlik açıq qalan məsələlər sırasındadır.

Məsələnin diqqət çəkən digər tərəfi isə jurnalist fəaliyyətinə maneə yaradılması ilə bağlı iddialardır. Qanunvericiliyə əsasən media nümayəndələrinin ictimai əhəmiyyətli məsələləri araşdırmaq hüququ var və bu fəaliyyətə müdaxilə yolverilməz hesab olunur.

İndi isə gözlər Sabunçu Rayon İcra Hakimiyyətinə, eləcə də aidiyyəti nəzarət qurumlarına çevrilib. İctimaiyyət aşağıdakı suallara aydın cavab gözləyir:

Park ərazisində aparılan tikintiyə kim tərəfindən icazə verilib?

Tikinti ilə bağlı şəhərsalma və memarlıq sənədləri mövcuddurmu?

Jurnalistlərin araşdırmasına mane olduğu iddia edilən şəxslər barədə tədbir görüləcəkmi?

“İcra başçısı belə söz deyə bilməz” deyilən həmin nüfuz sahibi kimdir?

Mövzunu diqqətdə saxlayacağıq.

Bntv.az

Sabunçu rayonu, Bakıxanov qəsəbəsində park ərazisində aparılan işlər narazılığa səbəb olub.

Tribuna.az-a bu barədə məlumat verən Bakıxanov sakinləri bildirib ki, parkda fəaliyyət göstərən restoran ağacların məhv edilməsi hesabına böyüdülür.

Sakinləri park ərazisinin kiçildilməsi və ağacların məhv edilməsi narahat edir.

Bildirilir ki, restoranın ətrafında olan ağaclar tikintinin ortasında qalıb. Sakinlər ehtimal edir ki, yaxın günlərdə o ağaclar da kəsiləcək.

Sakinlər parkı biznes mərkəzinə çevirən və yaşıllıqlar üçün təhlükə yaradanlara qarşı tezliklə tədbir görülməsini istəyir.

VİDEO LİNKDƏ: https://dia-az.org/manset/481032-sabuncuda-tam-derebeylikdir.html

Füzuli rayonu 33 nömrəli tam orta ümumtəhsil məktəbinin direktoru Mədinə Hallacova sosial media hesabında məktəbin problemləri ilə bağlı tənqidi paylaşımlarına, həmçinin yazılı əmr olmadan təhsil müəssisəsində yoxlama aparılmasına etirazlarına görə cəzalandırıldığını bildirir.

Mədinə Hallacova vəzifəsindən azad edilib. Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktoru Eşqi Bağırovun imzaladığı əmrə əsasən, onunla müqaviləyə Əmək Məcəlləsinin 70ç maddəsi əsasında (işçi əmək funksiyasını və ya əmək müqaviləsi üzrə öhdəliklərini yerinə yetirmədikdə, əmək vəzifələrini kobud şəkildə pozduqda) xitam verilib.

Əmrdə göstərilib ki, Mədinə Hallacova əmək müqaviləsi üzrə öhdəliklərini mütəmadi pozub. Məktəbdə şagird davamiyyəti yoxlanılanda onun üzrsüz səbəbdən iş yerində olmadığı aşkarlanıb.

Ötən ilin sentyabr və bu ilin mart aylarında direktor izahat verməyə çağırılsa da, imtina edib. Əmrdə yazıldığına görə, onun bu hərəkətləri aktlaşdırılıb. Daha sonra 19 mart 2026-cı ildə yazılı izahat verərək, gələcəkdə bir daha etik davranış qaydalarını pozmayacağını bildirsə də, buna əməl etməyib və mayın 6-da onunla əmək müqaviləsinə xitam verilib.

Mədinə Hallacova Bizimyol.info portalına bildirib ki, əmrdə onunla bağlı yazılanlar həqiqətə uyğun deyil. Onun sözlərinə görə, qanunsuz göstərişlərə “baş əyməməsi” və problemləri sosial media hesabında ictimailəşdirməsi onun işdən çıxarılması ilə nəticələnib.

2023-cü il aprelin 11-dən həmin məktəbə direktor kimi təyinat aldığını deyən deyən Mədinə Hallacovanın sözlərinə görə, məktəbin şagirdləri keçmiş məcburi köçkün uşaqlarıdır. Çünki ərazidə yaşayanlar məcburi köçkün ailələridir: “Bu mənada, həssas qrupa daxil olan şəxslərdir. Onlar da mənim çıxarılmağımdan narazıdır. İşdən azad olunmağım haqda əmri oxuyanda mənə məlum olub ki, haqqımda bir neçə akt tərtib ediblər. Füzuli təhsil sektoru o aktları nə vaxt, necə tərtib edib, məlum deyil. Niyə sonradan çağırıb mənə bu barədə də məlumat verilməyib? əgər doğrudan da elə aktlar olubsa...”

Mədinə Hallacova deyir ki, o, bütün işlərini qayda-qanunlar çərçivəsində görüb. Onun sözlərinə görə, Füzuli rayon təhsil sektoru ilə aralarındakı problemlərdən biri rəhbərlik etdiyi məktəbə monitorinq məqsədilə gələn yoxlamanı buraxmaq istəməməsi olub: “Masamın üstündə Əmək Məcəlləsi, İnzibati Xətalar Məcəlləsi olub. Həmişə çalışmışam ki, bütün məsələləri qanun çərçivəsində həll edim. İşçilərimdən soruşsunlar, görsünlər ki, mənim haqqımda nə deyirlər. Yoxlama göndərirlər, mən də deyirəm ki, “əmri göstərin, sonra buyurun, keçin yoxlayın”. Bu da xoşlarına gəlmir. Mən işçimin sənədlərini qeyri-leqal formada içəri girən istənilən adamın qarşısına qoya bilmərəm. Niyə konfidensiallığı pozmalıyam? Əmr istəmişəm, olmayıb, içəri buraxmamışam. Bu iş prinsipi də xoşlarına getməyib. Məni hədələyiblər ki, müqavilən uzadılmayacaq”.

Keçmiş direktorun sözlərinə görə, 2024-cü il sentyabrın 27-də şəhidlərin anım günü ilə əlaqədar ailələri ziyarət edərkən Füzuli rayon təhsil sektorunun əməkdaşları məktəbə gəlib və çəkiliş ediblər. Onun iş yerində olmadığını videogörüntülərlə sübut etmək istəyiblər: “Bu çəkilişə, bu şantaja görə mən Daxili İşlər Nazirliyinin 102 xidmətinə şikayət etdim. Çünki heç kimin ixtiyarı yoxdur ki, gəlib bu şəkildə məktəbdə çəkiliş eləsin, şantaj eləsin. Onlar dedilər ki, bizim çəkilişə icazəmiz var. Bununla bağlı Qarabağ Regional Təhsil İdarəsinə sorğu göndərildi”.

Bu məsələ Elm və Təhsil naziri Emin Əmrullayevə qədər gedib çıxıb. Mədinə Hallacova nazirin qəbulunda olub. Görüş zamanı “102”yə şikayət məsələsi də müzakirə olunub: “O zaman da ona fərqli formada çatdırmışdılar şikayət etməyimi. Ona bu addımımın səbəbini izah etdim. Bunlar baş verənləri öz istədikləri kimi çatdırırlar. Bilmirəm, kənardan necə görünür, amma çox obyektiv, hətta tənqidə də açıq insandır Emin müəllim. Sadəcə, imkan vermirlər ki, məsələlərdən hərtərəfli xəbər tutsun”.

Mədinə Hallacova qeyd edir ki, rəhbərlik etdiyi məktəbdə yağış yağarkən ciddi problemlər yaşanırdı, elektrik sistemində təhlükəli vəziyyət yaranırdı. Həm bunu, həm də məktəbdəki bir sıra başqa problemləri Facebook hesabından paylaşaraq ictimailəşdirib. Onun sözlərinə görə, bu paylaşımlarından sonra işdən çıxarılmasını qətiləşdiriblər: “Mən ADA-da ixtisasartırma təhsili alıram. Orada praktika günüm olmalıydı. Bir də əvvəldən 25 günlük məzuniyyətim qalmışdı. Elektron şəkildə Füzuli rayon təhsil sektoruna məktub göndərdim ki, sabah bu məsələ ilə əlaqədar Bakıya gedirəm. Təsəvvür edin, mənə problem yaradılsın deyə, təhsil sektorunun müdiri məzuniyyət götürür və mənim elektron ərizəmə baxmır. Axşam saat 10-da mənə zəng olundu ki, ərizə gərək əlbəəl verilsin. Dedim ki, eybi yox, sabah işçimə deyərəm, gətirib çatdırar. Çünki sabah mən ADA-da olmalıyam. Ertəsi gün mənə deyirlər ki, ərizəniz keçərsizdir. Akt tərtib edirlər ki, Mədinə Hallacova iş yerində yoxdur. Bu cür davranmaqda məqsəd sosial şəbəkələrdəki tənqidlərimə görə məni işdən çıxarmaq üçün zəmin yaratmaq idi”.

Mədinə Hallacova əlavə edib ki, baş verənlərlə əlaqədar Həmkarlar İttifaqına müraciət edib. Lakin onu qəbul etməyiblər. Daha sonra nazir Emin Əmrullayevin Qusarda görüşündə onun qəbuluna düşmək üçün şimal bölgəsinə yollanıb. Amma onunla görüşə bilməyib: “Biləndə ki, mən nazirin qəbuluna gedirəm, məhz həmin gün də yoxlama keçirib, yenidən akt tərtib ediblər”.

Qeyd edək ki, Mədinə Hallacovanın işdən çıxarılması barədə əmrdə yazılıb ki, o, “Facebook” hesabında ötən ilin sentyabrında, bu ilin mart və aprel aylarında Məktəbəqədər və Ümumi Təhsil üzrə Dövlət Agentliyi, eləcə də Qarabağ Regional Təhsil İdarəsinin fəaliyyəti barədə tənqidi fikirlər səsləndirib, narazılıqlarını geniş ictimaiyyətə açıq şəkildə çatdırıb. Bu isə əmrdə onun işdən çıxarılmasına əsas kimi göstərilib.

Bizimyol.info Mədinə Hallacovanın dediklərinə münasibət öyrənmək üçün onunla müqaviləyə xitam vermiş Məktəbəqədər və Ümumi Təhsil üzrə Dövlət Agentliyi ilə əlaqə saxlayıb. Bu qurumdan isə tövsiyə olunub ki, Qarabağ Regional Təhsil İdarəsindən münasibət bildirilsin. Lakin adıçəkilən qurumdan fikir öyrənmək cəhdlərimiz nəticəsiz qalıb.

Bizimyol.info