Naxçıvanda məzun geyimi ilə bağlı fərqli qaydalar bəzi valideynlərin narazılığına səbəb olub. Onların sözlərinə görə, şəhər məktəblərinin məzunlarına sərbəst geyimə icazə verildiyi halda, kənd məktəblərinin şagirdlərindən tədbirdə yalnız məktəbli forması ilə iştirak etmələri tələb olunur.

Valideynlərin “Gündəlik Naxçıvan”a verdikləri məlumata görə, əvvəlcə kənd məktəblərinə də sərbəst geyimə icazə verilib. Bu səbəbdən məktəblərdə valideynlər razılaşaraq şagirdlər üçün eyni üslubda geyim seçiblər.

Valideynlərin əksəriyyəti həmin geyimləri artıq alıb və ya sifariş verib. Sonradan qərarın dəyişdirilməsi isə onların əlavə ziyana düşməsinə səbəb olub.

Kənd məktəblərinə münasibətdə ayrı-seçkilik edildiyini düşünən valideyn Səma Fətullayeva ikiqat maddi ziyana düşdüyünü deyir:

“Mart ayında dedilər ki, bütün məktəblərdə məzun geyimi sərbəstdir, valideynlər öz aralarında razılaşıb vahid geyim seçsinlər. Bizim kənddə də valideynlər razılaşıb bir stil seçdik. Əksəriyyət artıq həmin geyimləri alıb. Mən də oğlum üçün təxminən 100 manata geyim aldım. Məzun gününə az qalmış isə deyirlər ki, kənd məktəblərinin şagirdləri məktəbli forması geyinməlidir.

Mənim oğlumun məktəbli forması köhnəlib, onunla məzun gününə getmək istəmir. İndi məcburam əlavə xərc çəkib yeni forma alım. Halbuki onu bir dəfə geyinəcək, sonra isə kənara qoyacaq. Bizi niyə xərcə salırlar? Əgər qayda varsa, hamıya eyni cür tətbiq olunmalıdır. Kənd uşaqlarını niyə fərqləndirirlər?”

Digər valideyn Vasif Abbasov da qərardan narazıdır:

“Bu ayrı-seçkiliyin niyə edildiyini anlamıram. Çox valideyn xeyli xərc çəkib, borc-xərclə sərbəst geyim alıb. İndi isə çoxu məcburdur yenidən məktəbli forması alsın. Yaxşı ki, mən hələ sərbəst geyimi almamışdım. Yoxsa digərləri kimi pulum batacaqdı. Amma indi onun yerinə yeni məktəbli forması almalıyam. Çünki qızımın forması köhnəlib, tədbirə geyinməyə uyğun deyil. Məcburam yeni forma alım və onu bir dəfə geyindikdən sonra kənara qoyum. Sərbəst geyim olsaydı, tədbirdən sonra da istifadə etmək mümkün idi.”

Valideynlər qərarın yenidən nəzərdən keçirilməsini və qaydaların bütün məktəblərə eyni şəkildə tətbiq olunmasını istəyirlər.

TƏBİB-in tabeliyində fəaliyyət göstərən “Yeni Klinika”nın rəsmi saytında rəhbərliklə bağlı məlumatların yenilənməməsi diqqət çəkib.

Klinikanın direktoru vəzifəsində çalışmış Barat Yusubov bu ilin 21 aprel tarixində vəzifəsindən azad edilib. Bir müddət sonra isə onun yerinə keçmiş müavini Qalib İmanov direktor təyin olunub.

Lakin direktor dəyişikliyindən təxminən bir ay keçməsinə baxmayaraq, “Yeni Klinika”nın rəsmi internet səhifəsində hələ də Barat Yusubov “direktor”, Qalib İmanov isə “direktor müavini” kimi təqdim edilir.

Bu vəziyyət dövlət tibb müəssisələrinin rəsmi informasiya resurslarının operativ idarə olunması məsələsini yenidən gündəmə gətirib. Çünki vətəndaşlar üçün əsas məlumat mənbələrindən biri məhz rəsmi saytlar hesab olunur.

Müşahidələr göstərir ki, bəzi dövlət qurumlarının internet səhifələrində kadr dəyişiklikləri, struktur yenilikləri və digər vacib məlumatlar vaxtında yenilənmir. Bu isə həm məlumatın aktuallığını şübhə altına alır, həm də ictimaiyyət arasında çaşqınlıq yaradır.

Xüsusilə səhiyyə sahəsində fəaliyyət göstərən müəssisələrin rəsmi platformalarında məlumatların dəqiq və güncəl olması vacib hesab edilir. Çünki həmin resurslar həm pasiyentlər, həm media nümayəndələri, həm də ictimaiyyət üçün istinad mənbəyidir.

Hazırda “Yeni Klinika”nın saytında rəhbərlik bölməsində heç bir dəyişiklik edilmədiyi görünür. Direktor postunda hələ də Barat Yusubovun adı və fotosu yer alır, Qalib İmanov isə əvvəlki vəzifəsi ilə göstərilir.(Tribuna.az )

"Artıq bir neçə ildir ki, çoxsaylı qalmaqalları və müxtəlif qanun pozuntuları ilə gündəmə gələn, bəd əməllərinə görə məhkum edilən iş adamı Arzu Kazımovla bağlı şikayətlər bitmək bilmir. Paytaxtın müxtəlif bölgələrində bina inşası və mənzil satışı həyata keçirən, barəsində cinayət işi açılan Arzu Kazımov bu gün də öz qaranlıq əməllərini davam etdirməkdədir". Bu barədə "DİA-AZ"a göndərilən məqalədə deyilir.
Məqalədə daha sonra bildirilir: "Məlumat üçün qeyd edək ki, vaxtiylə adı Mahir Abdullayev olayında hallanan Arzu Kazımov, bir müddət öncə mənzil alqı-satqısında yol verdiyi saxtakarlıqlara görə istintaqa cəlb edilib. Lakin nə qədər qəribə olsa da, haqqında cinayət işi açılmasına, hüquq-mühafizə orqanlarının diqqət mərkəzində olmasına baxmayaraq, Arzu Kazımov bu gün də mənzil alverini davam etdirməkdədir. Ən acınacaqlı məqam isə ondan ibarətdir ki, bu alver yenə də köhnə üsulla – digər alıcıların və ya artıq mənzil sahibi olan digər şəxslərin hüquqlarının kobud şəkildə pozulmsı, onların aldadılması və s. ilə müşahidə edilir.

Arzu Kazımov üçün xarakterik xüsusiyyətlərdən biri də iş adamının yalnzı alıcılara deyil, həm də öz şəriklərinə “atması”, onları da “yaman günə” qoymasıdır. Məhz buna görədir ki, bu gün Arzi Kazımovla şəriklik ömülük bədbəxt olmaq, borc bataqlğına yuvarlanmaq kimi dəyərləndirilir.

Arzu Kazımovun bəd əməllərindən zərər çəkən, milyonlarla manat məbləğndə ziyana uğrayan və taleləri puç olan insnaları isə bir sual düşündürür: Barəsində cinayət işi açılan iş adamını kim himayə edir? Necə olur ki, mənzil alqı-satqısında yol verdiyi çoxsaylı dələduzluq əməllərinə görə, barəsində cinayət işi açılan şəxs, heç bir şey olmamış kimi yenə də rahat şəkildə mənzil satışı həyata keçirir? Arzu Kazımova yaradılan bu şərait yeni şikayətçilərin və qurbanların meydana gəlməsinə səbəb olarsa, o zaman iş adamı ilə yanaşı, həm də onu himayə edən şəxslər məsuliyyətə cəlb olunmalı deyilmi?

Vətəndaşlar ümid edir ki, inşaat sektoru və mənzil biznesində alıcı və digər iş adamlarının kabusuna çevrilən Arzu Kazımovla bağlı əlaqədar qurumlar daha ciddi addımlar atacaq, bu şəxsin əməlləri hüquq müstəvisində ciddi şəkildə araşdırılacaq..."(DİA-AZ)

Təhsil İşçiləri Azad Həmkarlar İttifaqı Respublika Komitəsi və ya yeni adı – Elm və Təhsil İşçiləri Həmkarlar İttifaqı! - Bu qurumun funksional işi ölkədə təhsil sahəsində çalışan işçilərin hüquqlarının qorunması, sosial-iqtisadi maraqlarının təmin edilməsi və peşəkar inkişafının dəstəklənməsi vəzifəsi olmalıdır. Bilməyənlər üçün xatırladım ki, Komitənin rəsmi fəaliyyət istiqamətləri arasında təhsil sistemində keyfiyyətin yüksəldilməsi üçün işçi qruplarının yaradılması, məclislərin keçirilməsi, iş şəraitinin yaxşılaşdırılması və mədəni-kütləvi tədbirlərin təşkili yer almalıdır. Oda məlumdur ki, Elm və Təhsil İşçiləri Həmkarlar İttifaqının sədri Araz Paşayevdir.
O, bu vəzifəyə 2024-cü ilin avqust ayında təyin olunub. Bundan əvvəl isə müxtəlif vəzifələrdə, həmçinin Təhsil Tələbə Krediti Fondunun İdarə Heyətinin sədri vəzifəsində çalışıb. Və, beləliklə, Paşayevin rəhbərliyi altında Komitə artıq 15 aydır fəaliyyət göstərir. Seçildiyi zaman təhsil işçilərinə verdiyi vəədlərdən düz 15 ay keçir.
Amma və Lakin…
Əmması odur ki, bu müddət ərzində Azərbaycanda təhsil sahəsində müəllimlər arasında narazılıqların artması, direktorların müəllimlərə qarşı haqsızlıqları və digər problemlərin sayı hesabı olmayıb. Belə olan halda Elm və Təhsil İşçiləri Həmkarlar İttifaqı (Təhsil İşçiləri Azad Həmkarlar İttifaqı Respublika Komitəsi), konkret olaraq Araz Paşayevin rəhbərliyi dövründə müəllimlərin müdafiəsi üçün hansı konkret addımlar atıb?
Müşahidələrimiz göstərir ki, Elm və Təhsil İşçiləri Həmkarlar İttifaqının fəaliyyəti daha çox özlərinə yaxın müəllimlər və direktorlarla məclislər keçirmək, müəyyən rəsmi tədbirləri təşkil etmək və alqışlarla başa çatdırmaqla məhdudlaşıb. Əslində isə ölkənin təhsil işçilərinin 90%-i hər ay əmək haqqlarından Elm və Təhsil İşçiləri Həmkarlar İttifaqını üçün pul tutulduğu qurumun rəhbərini tanımır, onların problemlərini Həmkarlar İttifaqınn həll etmədi gün kimi aydındır.Nə qədər qəribə görünsə də, bu qurumun fəaliyyəti o qədər kasad və lazımsızdır ki, təhsil işçisi problemi olanda belə bu ünvan onun yadına düşmür. Düşünmür ki, Azərbaycanda onu müdafiə edə biləcək Elm və Təhsil İşçiləri Həmkarlar İttifaqı və onun rəhbəri Araz Paşayev var.
Gələk hər şeyi həll edən, pul məsələsinə. Hər üzv müəllimdən müəyyən miqdarda əmək haqqından pul tutulur. Amma bu pulların istifadəsi barədə açıqlıq, hesabat belə yoxdur: Hansı məqsədlərə xərclənir? Hara gedir? Bu suallar illərdir cavabsız qalır və Araz Paşayevin şəffaflıq məsələsində ciddi boşluqlarını göstərir.
Rəsmi bəyanatlarda, pafoslu çıxışlarda Elm və Təhsil İşçiləri Həmkarlar İttifaqı – Araz Paşayev təhsil sahəsində islahatlara dəstək verməli, işəgötürənlərlə əməkdaşlıq etməli, müəllimlərin hüquqlarını qorumaq və iş şəraitini yaxşılaşdırmaq vəzifəsini yerinə yetirməli olduğu gurultulu səslənir. Amma praktiki olaraq müəllimlərin çoxu bu dəstəyi hiss etmir, etməyib, etməyəcək də. Direktorların haqsızlıqları və müəllimlərə qarşı qeyri-ədalətli davranışları isə davam edir.
Bu vəziyyət göstərir ki, 20 aydan artıq fəaliyyəti dövründə Paşayev müəllimlərin problemlərinə əhəmiyyət verməyib, əsas diqqət formal və ya yaxın çevrə üçün tədbirlərin keçirilməsinə yönəlib, ölkənin bütün təhsil işçilərinin ehtiyaclarını nəzərə alacaq, şəffaf və məsuliyyətli rəhbərlik isə hələ görülməyib.
Nəticə olaraq, Araz Paşayevin rəhbərliyi dövründə Elm və Təhsil İşçiləri Həmkarlar İttifaqının fəaliyyəti daha çox rəsmi görüntü xarakteri daşıyır, təhsil işçilərinin real problemlərinə həlledici yanaşma isə sıfırdır. Bu da müəllimlər arasında həm narazılıq, həm də Elm və Təhsil İşçiləri Həmkarlar İttifaqa qarşı etimadsızlıq yaradıb. Hələ təhsil işçilərinin yay tətillərində istirahətə getmək istədiyi zaman rüsvayçılığı demirəm. Bu barədə isə növbəti yazııda....
!"İnfoPlyus.Tv"

Redaksiyamıza daxil olan video görüntülərdə “Məmməd Səid Ordubadi 2A” ünvanında — 7 saylı doğum evinin qarşısında aparılan tikinti işləri zamanı fəhlələrin həyatının ciddi təhlükə altında olduğu görünür.


Kadrlarda iki nəfərin 14-cü mərtəbədə armaturların üzərinə çıxaraq heç bir təhlükəsizlik qaydasına əməl etmədən çalışdığı əks olunub. Belə ki, fəhlələrin üzərində təhlükəsizlik kəməri, kaska və digər qoruyucu vasitələrin olmadığı görünür.


Görüntüləri redaksiyamıza təqdim edən şəxsin sözlərinə görə, ərazidə tikinti aparan “MTK” barədə məlumat lövhəsi də yerləşdirilməyib.


Aidiyyəti qurumların məsələ ilə bağlı araşdırma apararaq insan həyatını təhlükəyə atan hallara hüquqi qiymət verməsi tələb olunur.


“Millisfera.az”

Adının çəkilməsini istəməyən mənbənin redaksiyamıza verdiyi məlumata görə, Mingəçevir Turizm Kollecində tələbələrdən müxtəlif adlar altında məcburi pul yığımı həyata keçirilir.
Mənbə bildirir ki, kollecdə keçiriləcək məzun günü tədbiri üçün hər bir tələbədən məcburi şəkildə 20 manat tələb olunur. Tələbələrə bildirilib ki, tədbirdə iştirak etməyən və tələb olunan məbləği ödəməyən şəxslər buraxılış imtahanlarında problemlərlə üzləşdirilə bilər. Bu isə həm tələbələr, həm də valideynlər arasında ciddi narazılıq yaradıb.
Şikayətdə qeyd olunur ki, bundan əvvəl tələbələrdən guya toy məclisi təşkil etmək adı ilə 65 manat pul yığılması planlaşdırılırdı. Yalnız Elm və Təhsil Nazirliyinin bu kimi halları qadağan edən tapşırığından sonra həmin təşəbbüs dayandırılıb.
Bununla yanaşı, kollecdə təxminən 1500 tələbənin təqaüdündən hər ay 2 manat məcburi şəkildə tutulduğu iddia edilir. Rəhbərlik bunun “kimsəsiz tələbələrə yardım” məqsədi daşıdığını bildirsə də, tələbələr yardımın könüllü deyil, məcburi şəkildə həyata keçirildiyini vurğulayırlar.
Mənbə kollecdə fəaliyyət göstərən Həmkarlar Təşkilatının fəaliyyəti ilə bağlı da sualların yarandığını qeyd edir. Belə ki, tələbələrdən yığılan həmkarlar haqlarının hansı istiqamətlərə xərcləndiyi barədə şəffaf məlumat verilmir.
Şikayətdə kollecin keçmiş direktoru Əyyub Əyyubovun da vaxtilə korrupsiya iddiaları səbəbindən vəzifədən uzaqlaşdırıldığı xatırladılır və hazırkı direktor Kamal Əhmədovun dövründə də tələbələrdən müxtəlif adlarla pul yığılması hallarının davam etdiyi bildirilir.
Narazı tələbə və valideynlər aidiyyəti qurumlardan Mingəçevir Turizm Kollecində baş verən bu iddiaların araşdırılmasını, qanunsuz pul yığımı hallarına son qoyulmasını və məsul şəxslər barədə tədbir görülməsini tələb edirlər./Gundemxeber.com

Forumlar artıq institusional əməkdaşlıq mexanizmi yox, müəyyən çevrələrin daimi maliyyələşmə alətinə çevrilib

Layihələrin icra planına uyğun olaraq ilk ayı hazırlıq ayı sayılsa da, artıq bu layihələr başlamadan 16 may tarixində bitib

Xatırlayırsınızsa, ötən ilin noyabrında keçirilən Türk Dövlətləri Təşkilatına üzv ölkələrin QHT-lərinin I Həmrəylik Forumu barədə ilk gündən ciddi suallar vardı.

Ən əsas problem şəffaflığın olmaması idi. Hansı ölkədən neçə nümayəndə qatılıb? Hansı QHT-lər iştirak edib? Nümayəndələrin seçim meyarı nə olub? Bunların heç biri ictimaiyyətə açıqlanmadı. Halbuki beynəlxalq əməkdaşlıq adı ilə keçirilən tədbirlərdə legitimlik və təmsilçilik əsas məsələdir.

Sonradan məlum oldu ki, forumun əsası “Ortaq Dəyərlər” İctimai Birliyinin “Türk Dünyası QHT Platformasının yaradılması” adlı layihəsindən yaranıb və bu layihəyə QHT Agentliyi tərəfindən əvvəlcə 30 min manat ayrılıb. Daha sonra isə eyni təşkilata müsabiqədənkənar qaydada əlavə 300 min manatdan çox vəsait verilib. Burada artıq ilk ciddi problem meydana çıxır: əgər layihə ilkin mərhələdə 30 min manatlıq konsepsiya idisə, sonradan hansı əsaslandırma ilə onun büdcəsi on dəfələrlə artırıldı? Hansı nəticələrə görə? Hansı qiymətləndirmə əsasında?

Daha absurd məqam isə budur ki, cəmi 5 ay sonra eyni forumun ikinci dəfə keçirilməsinə qərar verilib. Beynəlxalq təşkilatlanma praktikasında bu tip forumlar adətən illik əsasda keçirilir və hər dəfə başqa ölkə ev sahibliyi edir. Çünki məqsəd əməkdaşlıq coğrafiyasını genişləndirmək, müxtəlif tərəflərin prosesə sahibliyini təmin etməkdir. Burada isə Azərbaycan tərəfi forumu yenidən özü təşkil edir, yenə məhdud sayda iştirakçı gətirir və yenə yüz minlərlə manat xərcləyir.

Bu dəfə isə vəsait “Avrasiya Miqrasiya Təşəbbüsləri Platforması” İctimai Birliyinə yönəldilir, yenə də müsabiqədənkənar şəkildə və yenə 300 min manatadək vəsait(?) Belə çıxır ki, forum artıq institusional əməkdaşlıq mexanizmi yox, müəyyən çevrələrin daimi maliyyələşmə alətinə çevrilib.

Ən vacib sual isə cavabsız qalır: birinci forumdan ikinci forumadək konkret nə dəyişdi? Hansı ortaq fəaliyyət planı qəbul edildi? Hansı beynəlxalq təşəbbüs ortaya çıxdı? Hansı davamlı əməkdaşlıq quruldu? Ortada görünən yeganə nəticə ardıcıl forum fotoları, pafoslu çıxışlar və şişirdilmiş PR kampaniyasıdır.

Bu mənzərə sadəcə israfçılıq və adi “tədbirçilik” deyil, sistemli şəkildə qurulmuş imitasiya sənayesini xatırladır. Kağız üzərində “Türk dünyası həmrəyliyi”, “QHT əməkdaşlığı”, “platforma quruculuğu” kimi pafoslu ifadələr dolaşdırılır. Bu xüsusda dövlət vəsaiti real vətəndaş cəmiyyəti quruculuğuna deyil, tədbir dekorasiyasına xərclənir.

Daha gülünc vəziyyət isə “Forum içində forum” modelidir. Bir günlük tədbirin daxilində əlavə üç-dörd “əməkdaşlıq forumu” təşkil edilir. Azərbaycan–Şimali Kipr, Azərbaycan–Qırğızıstan, Azərbaycan–Türkmənistan forumları eyni tarixdə, eyni məkanda, eyni iştirakçılarla keçirilir. Bu artıq təşkilati xaos deyil, açıq manipulyasiya təəssüratı yaradır.

QHT-lərə Dövlət Dəstəyi Agentliyi hər il “innovativ layihələr”, “yeni yanaşmalar”, “prioritet istiqamətlər” barədə danışır. Amma nəticədə dörd fərqli təşkilat eyni mahiyyətli layihələrlə maliyyə qazanır. Sadəcə ölkələrin adı dəyişir. Bu isə iki ehtimal yaradır: ya sistem tamamilə nəzarətsizdir, ya da layihə mövzuları əvvəlcədən koordinasiya olunur.

Həmin layihələri məbləğləri ilə təqdim edirik:

1. “İslahatçı Qadınlar və İnnovasiyalar” İctimai Birliyi - Azərbaycan-Macarıstan QHT-lərinin I Əməkdaşlıq Forumu - 28000 manat,

2. Azərbaycanlıların və digər Türkdilli Xalqların Əməkdaşlıq Mərkəzi İctimai Birliyi - Azərbaycan-Şimali Kipr QHT-lərinin I Əməkdaşlıq Forumu – 25000 manat,

3. “Ortaq Dəyərlər” İctimai Birliyi Azərbaycan-Qırğızıstan QHT-lərinin I Forumu – 27000 manat,

4. “Bakı Politoloqlar Klubu” İctimai Birliyi - Azərbaycan-Türkmənistan vətəndaş cəmiyyətinin təmsilçilərinin I Forumu – 25 000 manat.

Ən diqqətçəkən nümunələrdən biri Azərbaycan–Türkmənistan vətəndaş cəmiyyəti forumudur. Tədbirdə cəmi 4 xarici iştirakçı görünür. Qalanların hamısı yerli QHT nümayəndələridir. Bu necə “ikitərəfli forumdur”? Həmin şəxslər doğrudanmı Türkmənistan vətəndaş cəmiyyətini təmsil edir? Onların mandatı nədir? Hansı təşkilatları təmsil edirlər? Bu sualların heç birinə cavab verilmir.

Bütün digər forumlarda da oxşar mənzərə müşahidə olunur: eyni simalar müxtəlif tədbirlərdə dövr etdirilir, fərqli adlar altında yeni layihələr kimi təqdim olunur. Formal olaraq ayrı-ayrı tədbirlər göstərilsə də, mahiyyətcə söhbət eyni toplantının müxtəlif adlarla sənədləşdirilməsindən gedir.

Bu istiqamətdə "Yenixeberorg"a QHT-lərin forum layihələri ilə bağlı daha bir maraqlı məlumat daxil olub.
Məlumatda iddia edilir ki, QHT Agentliyi bu layihələrdə təşkilat sədrlərinin ancaq özünə 3 aylıq 1000-1500 manat maaş yazmağa icazə verib. Layihələr 16 mayda keçirilən Türk Dövlətləri Təşkilatına üzv ölkələrin qeyri-hökumət təşkilatlarının II Həmrəylik Forumuna daxil edilib. Hələ müqavilələr bağlanmayıb və Ədliyyə Nazirliyi bildirişləri verməyib(?) Layihələrin icra planına uyğun olaraq ilk ayı hazırlıq ayı sayılsa da, artıq bu layihələr başlamadan 16 may tarixində bitib. Əgər fəaliyyət bir gündə yekunlaşıbsa, 3 aylıq idarəetmə və koordinasiya xərcləri hansı iş üçün nəzərdə tutulub? Bu açıq qanun pozuntusudur.

Azərbaycan–Macarıstan forumu ilə bağlı vəziyyət isə açıq qalıb. Macarıstandakı siyasi dəyişikliklər səbəbindən lazımi iştirak təmin olunmayıb. Buna baxmayaraq tədbir yenə də “beynəlxalq əməkdaşlıq forumu” kimi təqdim edilir. Yəni əsas məqsəd real nəticə yox, tədbirin keçirildiyini göstərməkdir.

Ən problemli məqamlardan biri də maliyyə xərclərinin şişirdilməsi ehtimalıdır. Eyni məkan, eyni iştirakçılar, eyni qida xidməti, eyni logistika müxtəlif forumların ayrıca xərcləri kimi rəsmiləşdirilir. Praktik olaraq bir tədbir bir neçə tədbir kimi sənədləşdirilir. Bu isə ciddi audit və araşdırma tələb edən məsələdir.

Vəziyyəti daha da qəribə edən məqam həmin qonaqların paralel şəkildə başqa tədbirlərə, o cümlədən Beynəlxalq Şəhərsalma Forumundakı QHT-lərə Dövlət Dəstəyi Agentliyi pavilyonuna yönləndirilməsidir. Yəni bir dəfə ölkəyə gətirilmiş iştirakçılar müxtəlif layihələrin “iştirakçısı” kimi göstərilir və müxtəlif büdcələr üzrə xərc kimi silinir. Bu artıq koordinasiyalı “tədbir iqtisadiyyatı” təsiri bağışlayır.

Bir məqamı da unutmadan qeyd etmək yerinə düşər ki, QHT-lərə Dövlət Dəstəyi Agentliyinin keçirdiyi forum və tədbirlərin əksəriyyətinə QHT nümayəndəsi adı altında müxtəlif ali təhsil ocaqlarının tələbələri də gətirilir. Yaxın vaxtlarda həmin ali məktəblərin hansı maraqlar səbəbindən buna razılıq verdiyinə də ayrıca toxunacayıq...

Bütün bunların fonunda ən acınacaqlı nəticə isə odur ki, forumlarda ciddi və nüfuzlu xarici və beynəlxalq QHT nümayəndələri görünmür. İştirakçıların böyük hissəsi resursu və təsir imkanları zəif olan şəxslərdən ibarətdir. Yəni ortada nə real beynəlxalq şəbəkələşmə var, nə strateji əməkdaşlıq, nə də vətəndaş cəmiyyətinin inkişafına xidmət edən dayanıqlı nəticə.

Nəticədə isə dövlətə və cəmiyyətə təqdim olunan mənzərə budur: çoxlu forum, çoxlu banner, çoxlu şəkil, çoxlu çıxış və sıfıra yaxın nəticə.

Bu model artıq “QHT inkişafı” deyil. Bu, büdcə hesabına süni aktivlik istehsalıdır. Kağız üzərində beynəlxalq əməkdaşlıq görüntüsü yaradılır, reallıqda isə eyni tədbirlər fərqli adlarla dövr etdirilərək həm PR qurulur, həm də maliyyə axını təmin edilir.

Ən təhlükəli tərəf isə budur ki, bu cür imitasiya fəaliyyəti real vətəndaş cəmiyyətinin nüfuzunu da məhv edir. Çünki nəticədə ictimaiyyətdə belə təsəvvür yaranır: QHT sektoru inkişaf yox, tədbir biznesi ilə məşğuldur. Halbuki həqiqi vətəndaş cəmiyyəti nümayiş üçün yox, nəticə üçün işləməlidir.(Yenixeberorg.com)

Qarşı tərəfin cavab haqqını tanıyırıq.

Akademik Y.H.Məmmədəliyev adına Neft-Kimya Prosesləri İnstitutu sərnişin liftlərinin alınması, quraşdırılması və İnstitutun laboratoriya otaqlarının və dəhlizinin, sanitar qovşaqlarının cari təmiri işlərinin satın alınması ilə bağlı tenderə yekun vurub.
Qaynarinfo-nun məlumatına görə, tenderin qalibi "Harmony İndustrial Construction and Engeering Group” MMC seçilib. Tərəflər arasında bağlanacaq satınalma müqaviləsinin maliyyə dəyəri 735 839,15 manat təşkil edir.
İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, 28 fevral 2005-ci ildə qeydiyyata alınan "Harmony İndustrial Construction and Engeering Group” MMC-nin qanuni təmsilçisi Orucov Əlövəst Bilal oğludur. Nizamnamə kapitalı 10 AZN olan şirkətin hüquqi ünvanı isə Ceyhun Hacıbəyli küçəsi, ev 52, mənzil 20-də yerləşir.
Əlövsət Orucov həm də "A-Marble” və "Piramida-2001” şirkətlərinin qanuni təmsilçisidir. Bu şirkətlər də "Harmony İndustrial Construction and Engeering Group” MMC-nin yerləşdiyi hüquqi ünvanda qeydiyyatdadır.
Sözügedən şirkətlər, o cümlədən "Harmony İndustrial Construction and Engeering Group” MMC haqqında açıq mənbələrdə heç bir məlumat yoxdur. Əlövsət Orucov barəsində də məlumatlar məhduddur.
Maraqlıdır ki, "Harmony İndustrial Constrcuttion and Engeering Group” MMC ən müxtəlif satınalma predmetləri üzrə keçirilən tenderlərin qalibi seçilir. Yəni, şirkətin konkret olaraq hansı sahə üzrə ixtisalaşdığı məlum deyil. Məsələn, şirkət gah tibbi avadanlıqlar satır, gah inzibati binalarda təmir işləri həyata keçirir, gah yol çəkir, gah da lift quraşdırır. Hətta bəzi hallarda elektrik xətlərinin çəkilməsi ilə bağlı tenderlərin qalibi olur.
Şirkətin maddi-texniki bazasının bu layihələri həyata keçirmək üçün yetərli səviyyədə olub-olmadığı məlum deyil.
Akademik Y.H.Məmmədəliyev adına Neft-Kimya Prosesləri İnstitutu Azərbaycan Milli Elmlər Akademiyasının tabeliyində fəaliyyət göstərir.(Qaynarinfo)

Şuşa Şəhəri Dövlət Qoruğu İdarəsi Şuşada yaşayış binalarının tikintisi ilə bağlı iki tenderin nəticəsini açıqlayıb.

Bizimesr.com bildirir ki, hər iki layihə Şuşa şəhərinin D-5 massivində çoxmənzilli yaşayış binalarının inşasını nəzərdə tutur.

Birinci tender çərçivəsində ərazidə 6 ədəd 4 mərtəbəli yaşayış binasının tikilməsi planlaşdırılır. Layihənin icrası üçün ayrılan vəsait 12 milyon 984 min 241 manat təşkil edir.

İkinci tender isə həmin massivdə daha 8 ədəd 4 mərtəbəli yaşayış binasının inşasını əhatə edir. Bu layihə üzrə qalib şirkətə 24 milyon 76 min 360 manat ödəniləcək. Hər iki tenderin qalibi “Diler İnşaat” QSC seçilib.

Şirkətin rəsmi qeydiyyat məlumatlarına əsasən, hüquqi ünvanı Bakı şəhəri, Yasamal rayonu, Moskva prospekti 73A-da yerləşir. Nizamnamə kapitalı 2 010 manat olan şirkətin qanuni təmsilçisi Süleymanov Elxan Füzuli oğludur.

Şirkətin rəsmi internet səhifəsində isə rəhbər kimi Orxan Quluzadənin adı göstərilir. Açıq mənbələrdə yer alan məlumatlara görə, onun deputat Ülvi Quliyevin oğlu olduğu bildirilir.(Bizimesr.com )

Prezident İlham Əliyev Azərbaycanın vaxtilə separatizmdən əziyyət çəkən ölkə kimi separatizmin bütün forma və təzahürlərini pislədiyini vurğulayıb.

Prezident İlham Əliyev bunu Çin Dövlət Şurasının Baş nazirinin müavinini ilə görüşündə deyib.

Dövlət başçısı qeyd edib ki, Azərbaycan Çinin Tayvan regionunda keçirilmiş qanunsuz seçkiləri nəinki tanımayıb, hətta onun pislənilməsi bəyanatı ilə çıxış edən yeganə dövlətlərdən biri olub. Prezident İlham Əliyev bu xüsusda vurğulayıb ki, Azərbaycan “vahid Çin” siyasətini daim dəstəkləyir.