Fərid Rauf oğlu Şəfiyev Beynəlxalq Münasibətlərin Təhlili və Multikulturalizm Mərkəzi İdarə Heyətinin sədri təyin edilib.

Prezident İlham Əliyev bununla bağlı Sərəncam imzalayıb.

Qeyd edək ki, Beynəlxalq Münasibətlərin Təhlili və Multikulturalizm Mərkəzi 2026-cı ildə “Beynəlxalq Münasibətlərin Təhlili Mərkəzi” ilə Bakı Beynəlxalq Multikulturalizm Mərkəzinin yenidən təşkili əsasında yaradılıb. Mərkəz beynəlxalq və regional proseslərin, təhlükəsizlik məsələlərinin, eləcə də multikulturalizm sahəsində elmi-analitik araşdırmaların aparılması ilə məşğul olacaq.

Mərkəzin hazırkı adı və yeni hüquqi statusu 2026-cı ilin iyulunda təsdiqlənib.

Antiinhisar və İstehlak Bazarına Nəzarət Dövlət Agentliyi “Kontakt Home” əmtəə nişanı altında məişət texnikası, mobil telefonlar və elektronika məhsullarının satışını həyata keçirən “ABC-Telecom” MMC barəsində inzibati xəta haqqında protokol tərtib edilib.

Bu barədə protokol müştəri E.Novruzovun Dövlət Agentliyinə müraciətindən sonra tərtib olunub.

Məlumata görə, “Kontakt” internet saytında 2 199,99 manata reklam olunan skuter istehlakçıya 2 419,99 manata satılıb. Reklam olunan qiymətlə faktiki satış qiyməti arasında yaranan 220 manatlıq fərqlə bağlı şirkət barəsində Dövlət Agentliyi tərəfindən İnzibati Xətalar Məcəlləsinin 428.10-cu (Reklam haqqında qanunvericiliyin pozulması) maddəsi ilə inzibati protokol tərtib edilib.

İş materiallarına əsasən, şirkətin “kontakt.az” internet saytında sözügedən məhsul 2 199,99 manat qiymətə reklam edilib. Lakin həmin məhsulun sonradan istehlakçıya 2 419,99 manata satıldığı müəyyənləşdirilib.

Binəqədi Rayon Məhkəməsinin araşdırması zamanı “kontakt.az” internet səhifəsinin ekran görüntüləri də tədqiq edilib. Həmin görüntülərdən məlum olub ki, əvvəlki qiyməti 2 499,99 manat olan “ZIGZAG ONE 50CC BLACK” markalı məhsul 300 manat endirimlə 2 199,99 manata satışa təklif edilib. Saytda hissəli alış kalkulyatorunda 18 aylıq ödəniş planı seçildikdə aylıq ödəniş məbləği 122,22 manat göstərilib.

Eyni zamanda, hissəli alış kalkulyatorunun altında “Sifarişin rəsmiləşdirilməsi zamanı komissiya əlavə oluna bilər” məzmununda qeyd yerləşdirilib.

İş materiallarında olan satış sənədindən görünür ki, E.Novruzova “ZIGZAG ONE 50CC BLACK” markalı məhsul 18 aylıq hissəli ödəniş şərti ilə 2 419,99 manat məbləğində rəsmiləşdirilib. Bu zaman aylıq ödəniş məbləği 134,44 manat müəyyən edilib. Beləliklə, reklamda göstərilən 2 199,99 manatlıq qiymətlə müqavilədə əks olunan 2 419,99 manatlıq satış qiyməti arasında 220 manat fərq yaranıb. Aylıq ödəniş baxımından da reklamda göstərilən 122,22 manatla faktiki müəyyən edilmiş 134,44 manat arasında fərq olub.

İstehlakçı reklam olunan qiymətlə faktiki satış qiyməti arasında 220 manat fərq yarandığını, bununla da hüquqlarının pozulduğunu bildirərək məsələ ilə bağlı tədbir görülməsini xahiş edib.

Məhkəmə iclasında “ABC-Telecom” MMC-ninnümayəndəsi isə protokolla razılaşmayıb. Nümayəndə qeyd edib ki, məhsulun son qiyməti və aylıq ödəniş məbləği müqavilə bağlanarkən istehlakçıya izah edilib və müqavilə onun razılığı ilə bağlanıb. Bu əsaslarla şirkətin nümayəndəsi inzibati icraata xitam verilməsini istəyib.

Məhkəmə iş materiallarını, inzibati xəta haqqında protokolu, internet səhifəsinin görüntülərini, satış sənədlərini və istehlakçının Agentliyə müraciətini araşdırıb. Məhkəmə nəticəyə gəlib ki, MMC-nin hərəkətlərində İnzibati Xətalar Məcəlləsinin 428.10-cu maddəsində nəzərdə tutulan inzibati xətanın tərkibi mövcuddur.

Beləliklə, məhkəmə hüquqi şəxsi inzibati xətanı törətməkdə təqsirli bilib. Lakin məhkəmə eyni zamanda müəyyən edib ki, şirkətin inzibati məsuliyyətə cəlb edilməsi üçün qanunla nəzərdə tutulmuş müddət artıq keçib. Bu səbəbdən məhkəmə İnzibati Xətalar Məcəlləsinin 38.1-ci maddəsini əsas götürərək MMC-yə 428.10-cu maddə ilə inzibati tənbeh təyin etməyib. Bununla əlaqədar şirkət barəsində inzibati xəta haqqında protokol üzrə başlanılmış icraata xitam verilib.

Plat.az

Qaz İxrac İdarəsinin Astara Maqistral Qaz Kəmərləri Sahəsinin Əngevül, Orduxal qaz xəttinin kəmərində təmir işləri görülərkən qəza baş verib və nəticədə məhz rəhbər şəxsin səriştəsizliyi və naşılığı səbəbindən işçilərdən biri ağır xəsarət alıb. Bu barədə "Dia-az"a məlumat verən mənbənin sözlərinə görə, bütün bu baş verənlər həm ümumi rəhbərlikdən, həm də ictimaiyyətdən, habelə hüquq-mühafizə orqanlarından gizli saxlanılır.

Hətta ağır durumda olmasına baxmayaraq xəsarət alan şəxs adi ev şəraitində müalicə olunur ki, bu isə açıq-aşkar onun həyatının risqə atılması deməkdir. Yəni görünəni odur ki, hüquq-mühafizə orqanları qarşısında yarana biləcək məsuliyyətdən yayınan rəhbərlik işçinin həyatı bahasına olsa belə, öz çirkin niyyətini icra etməkdən çəkinməyib.

İndi də gələk hadisənin təfərrüatına. Daxil olan məlumatda deyilir ki, Astara Maqistral Qaz Kəmərləri Sahəsinin Əngevül, Orduxal qaz xəttinin diametri 219 sm olan kəmərində sentyabr ayının 7-si təmir işləri görülən zaman, cavabdeh və rəhbər şəxs Əsədullayev Şərafətin idarəçilik etdiyi vaxt çilingər Məmmədov Vidadi Böyükağa oğlu "laqonda" aparatı ilə kəsim apararkən xəttdə yüksək təzyiqdə qaz olduğundan partlayış baş verib.

Partlayış baş veren zaman çilingər Vidadi Məmmədov ağır yanıq xəsarətləri alıb. Bunu görən Şərafət Əsədullayev baş verənləri rəhbərlikdən gizlədib, aidiyyatı üzrə məlumat verməyib.

"DİA-AZ"a danışan mənbə bildirir ki, artıq 4 gündür çilingər Vidadi Məmmədov evində müalicə aldığından işə də çıxa bilmir və bu fakt Qaz İxrac İdarəsinin rəhbərliyi ilə yanaşı hüquq-mühafizə orqanlarından da gizli saxlanılır.

Məsələ diqqətimizdədir. Əlavə bilgilərimiz olacaq. Bizi izləməyə davam edin...

Həbsdə olan sabiq icra başçısı Vilyam Hacıyevin oğlu Məhəmməd Hacıyev hərracda atasının maşınlarına 53 min 500 manat pul ödəyib.

Bu barədə iqtisadçı Natiq Cəfərli öz “Facebook” səhifəsində yazıb.

Ekspert əlavə edib ki, hərraca çıxarılan maşınların arasında “Range Rover” və “BMW 740İ” kimi markalar var: “Sizə Vilyamdan danışacam, yox-yox, Şekspirdən, onun ölməz əsərlərindən deyil də, Azərbaycanda İcra Başçısı işləmiş Vilyam Hacıyevdən söz açacam.

Ölkə mediası yazır ki, Vilyam müəllim korrupsiya ittihamları ilə həbs olunanda, qanuna görə əmlakı da müsadirə olunmuşdu. Sonra məhkəmə qərarı ilə dövlətə dəymiş ziyanı ödəmək üçün Vilyam müəllimin əmlakının bir hissəsi, o cümlədən, bir neçə avtomobili hərraca çıxarılıb.

İndi məlum olur ki, o hərraclarda Vilyam müəllimin maşınlarını ..... oğlu alıb. Özü də, “Range Rover” və “BMW 740İ” markalı avtomobilləri üçün cəmi 53500 manat ödəyib”.

Bizimesr.media

Peşə Təhsili üzrə Dövlət Agentliyinin sosial şəbəkə hesabında ixtisas fənn müəllimi və istehsalat təlimi ustası vəzifələrinə işə qəbul üzrə müsabiqənin müsahibə mərhələsinin nəticələrinin elan olunmasından sonra narazılıqlar artmaqdadır.

Bizimesr.media xəbər verir ki, Agentliyin paylaşımına yazılan şərhlərdə bəzi vətəndaşlar peşə təhsili müəssisələrində işə qəbul və dərs bölgüsü ilə bağlı ciddi iddialar səsləndirirlər.

Sarvan Husayn adlı şikayətçi Agentliyə müraciətində yerli peşə təhsili mərkəzlərində mövcud vakansiyaların gizlədildiyini və bəzi hallarda vəzifələrin “öz adamları” ilə doldurulduğunu iddia edib.

Şikayətçinin sözlərinə görə, xüsusilə gənc və yeni kadrların işə qəbulunda problemlər yaşanıb. O, bəzi yaşlı şəxslərin, hətta 65 yaşdan yuxarı şəxslərin işlə təmin edildiyini, buna qarşılıq gənc mütəxəssislərə imkan yaradılmadığını bildirib.

“Əgər deyirsiniz ki, əsaslı məlumat verin, əslində əsaslı məlumatlardır verdiyimiz, ancaq heç bir tədbir görülmür. Dərs bölgüsü və eləcə də işə qəbul olanların məlumatına baxsanız, dərs bölgüsünə nəzər yetirsəniz, özünüz də bunun şahidi olacaqsınız”, – deyə şikayətçi qeyd edib.

Müraciətdə konkret olaraq Sənaye və Texnologiyalar üzrə Gəncə Dövlət Peşə Təhsil Mərkəzi ilə bağlı da iddialar səsləndirilib.

Sarvan Husayn iddia edir ki, həmin təhsil müəssisəsində bəzi vakansiyalar barədə məlumatlar vətəndaşlardan gizlədilib. O, həmçinin dərs bölgüsünə nəzarət edən şəxsin müəllimlərdən müxtəlif məbləğlərdə pul tələb etdiyini, pul verildiyi halda dərs saatlarının təmin edildiyini, əks halda isə kənardan müəllimlərin dəvət olunduğunu iddia edib.

Şikayətçi hesab edir ki, peşə təhsili sahəsində şəffaflığın təmin olunması üçün nəzarət mexanizmləri gücləndirilməlidir.

“Bir daha İlqar müəllim, sizdən bir vətəndaş kimi bu məsələyə daha ciddi yanaşmanızı və tək Gəncə məktəblərinə yox, eləcə də digər rayon və şəhərlərdəki peşə məktəblərində olan belə halların qarşısının alınması üçün lazımi əməkdaşlarınıza tapşırıq verməyinizi xahiş edirəm”, – deyə o bildirib.

Məsələ ilə bağlı Peşə Təhsili üzrə Dövlət Agentliyinin və Sənaye və Texnologiyalar üzrə Gəncə Dövlət Peşə Təhsil Mərkəzinin mövqeyi həmişəki kimi yoxdur. Qurumlar və İlqar Bayramlı təin olunan gündən susmaqdadır.

Bir neçə gün öncə Lənkəran rayonunda 10 dan çox şam cinsindən olan ağacların kəsilib yerində iki mərtəbə tikililərin inşa edilməsi faktini işiqlandırmışdıq.
Amma çox təəssüflər olsun ki, aidiyyatı dövlət qurumlarından bununla bağlı hər hansı bir reaksiya olmadı.

Belə faktlar cənub bölgəsində çoxdur.
Bu "soyqrım" faktları-çayların qazılması, ağacların kəsilməsi, kərpiczavodlara torpaqların daşınması 1 saylı Regional Ekologiya və Təbii Sərvətlər idarəsinin rəisi Rafiq Ədilovun rəhbərliyi altında baş verir.

Lənkəran şəhərində Gülağa Məmmədov küçəsi ilə Heydər Əliyev prospektinin kəsişdiyi yerdə iridiamterili ağacların kəsilərək yerində hündür mərtəbə tikili salınır.
Nə qədər ki, Dövlət Ekoloji Təhlükəsizlik Xidmətinin rəisi Hikmət Əlizadədir, ekologiyamız da belə məhv olub aradan gedəcək.
Araşdırmamız davam edir.

Qarşı tərəfin mövqeyin dinləyib dərc etməyə hazırıq.

Nyus.Az

Mingəçevir şəhər sakini, 1977-ci il təvəllüdlü Həsənzadə Elçin Yusif oğlu ağır xəstəlikdən əziyyət çəkən 1 yaş 4 aylıq övladının müalicəsi üçün aidiyyəti dövlət qurumlarına və ictimaiyyətə müraciət edib.

4 nəfərdən ibarət olan ailənin aylıq gəlirinin cəmi 367 manat təşkil etdiyini bildirən valideyn, bu məbləğin gündəlik ehtiyacları və körpənin müalicə xərclərini qarşılamağa kifayət etmədiyini vurğulayır. 2025-ci il təvəllüdlü Həsənzadə Atilla Elçin oğlunda anadangəlmə ciddi sağlamlıq problemləri, o cümlədən onurğa və bel əyriliyi müəyyən olunub.
Vaxtında aparılan reabilitasiya və masaj prosedurlarından sonra müsbət irəliləyişlər əldə edilsə də, maddi imkansızlıq səbəbindən müalicə prosesi dayanıb. Atilla hazırda yaşına uyğun olaraq müstəqil yeriyə və ayaq üstə dura bilmir.
Valideyn Elçin Həsənzadə aidiyyəti qurumlardan və xeyriyyəçilərdən aşağıdakı məsələlərdə dəstək olmalarını xahiş edir:
***
Körpə ovladı xəstə onun müalicəsinə Maddi imkanı olmayan
ÇARƏSİZ VƏZİYYƏTDƏ OLAN AİLƏ
Azərbaycan Respublikasının Əmək və Əhalinin Sosial Müdafiəsi Nazirliyinə
Dövlət Sosial Müdafiə Fonduna
Azərbaycan Respublikasının İnsan Hüquqları üzrə Müvəkkilinə
Yaşadığım Mingəçevir Şəhər İcra Hakimiyyətinə
MÜRACİƏT
Mən, 1977-20-10 tarixdə anadan olmuş Həsənzadə Elçin Yusif oğlu iki azyaşlı övladımın valideyniyəm. Ailəmizin maddi vəziyyəti olduqca ağırdır. Ailədə dörd nəfər yaşayırıq və mənim aylıq gəlirim cəmi 367 manatdır. Bu məbləğ ailəmizin gündəlik yaşayış və xüsusilə də övladımın müalicə xərclərini qarşılamağa kifayət etmir.
Mənim 1 yaş 4 aylıq oğlum [uşağın adı,Həsənzadə Atilla Elçin oğlu 2025-14May da dogulub] anadangəlmə ciddi sağlamlıq problemlərindən əziyyət çəkir. Uşaqda həkimlər tərəfindən anadangəlmə , həmçinin onurğa/bel əyriliyi müəyyən edilmişdir.
Uşaq hazırda öz yaşına uyğun olaraq ayaq üstə dura və yeriyə bilmir. Əvvəllər hətta müstəqil otura bilmirdi. İmkanım daxilində bir neçə dəfə masaj və reabilitasiya xidməti göstərməyə çalışmışam. Bundan sonra müəyyən irəliləyiş olmuş, uşaq artıq otura bilir. Lakin müalicə və reabilitasiyanın davam etdirilməsi üçün ailəmin maddi imkanı yoxdur.

Həkimlərin bildirdiyi kimi, uşağın vaxtında müayinə, müalicə və reabilitasiya tədbirləri ilə təmin olunması onun gələcək sağlamlığı və fiziki inkişafı baxımından böyük əhəmiyyət daşıyır. Maddi imkansızlıq səbəbindən bu müalicələri davam etdirə bilməməyimiz məni bir valideyn kimi ciddi narahat edir.
Bu səbəbdən Sizdən xahiş edirəm:
Övladımın tibbi vəziyyətinin və reabilitasiya ehtiyacının aidiyyəti dövlət tibb müəssisələrində qiymətləndirilməsinə və zəruri müalicə-reabilitasiya xidmətləri ilə təmin edilməsinə köməklik göstərəsiniz.
Uşağın əlillik vəziyyətinin və ona qanunvericiliklə nəzərdə tutulmuş sosial təminatların müəyyən edilməsi məsələsinə baxılmasını təmin edəsiniz.
Ailəmizin maddi vəziyyətinin araşdırılmasını və imkan daxilində ünvanlı sosial yardım və digər sosial dəstək tədbirlərindən yararlanmağımıza köməklik göstərəsiniz.
Uşağın masaj, fizioterapiya və digər zəruri reabilitasiya xidmətləri ilə təmin olunmasına yardım göstərəsiniz.
Müalicə və reabilitasiya xərclərini öz imkanlarımız hesabına qarşılaya bilmədiyimiz nəzərə alınaraq, mümkün olan digər dövlət və sosial yardım mexanizmlərinin tətbiq edilməsini xahiş edirəm.
Mənim məqsədim övladımın vaxtında müalicə və reabilitasiya almasını təmin etməkdir. Maddi imkanım buna yol vermədiyi üçün aidiyyəti dövlət qurumlarından və imkan daxilində xeyriyyə və beynəlxalq humanitar təşkilatlardan dəstək göstərilməsini xahiş edirəm.
Müraciətimə həssaslıqla yanaşılmasını və azyaşlı uşağın sağlamlığı nəzərə alınaraq məsələnin mümkün qədər təxirəsalınmaz qaydada araşdırılmasını xahiş edirəm.
Əlavə olunur:
Uşağın tibbi sənədlərinin surətləri;
Tibbi müayinə və analiz nəticələri;
Uşağın doğum haqqında şəhadətnaməsinin surəti;
Valideynlərin şəxsiyyət vəsiqələrinin surətləri;
Ailənin gəlirini təsdiq edən sənəd;
Digər aidiyyəti sənədlər.
Müraciət edən: [Həsənzadə Elçin Yusif oglu,
Ünvan: Mingəçevir Şəhər Nizami 10/37.mənzil 53]
Telefon: 0556492651
Tarix: 08-09-2026

Bakıda mənzil seçimi edən alıcıların və kirayə axtaranların ən böyük çətinliklərindən biri - büdcəyə uyğun tapılan evin gündəlik saatlarla tıxacda qalmaqla nəticələnməsidir. Azərbaycanda fəaliyyət göstərən innovativ "Prayk.com" platforması daşınmaz əmlak axtarışında yeni mərhələ açaraq süni intellekt əsaslı interaktiv qiymət və nəqliyyat sıxlığı analitikasını istifadəyə verdi.

Platforma nə təklif edir?

- Xəritədə elanlar və real vaxt rejimində yol sıxlığı: İstifadəçilər xəritə üzərindən təkcə Bakı və regionlardakı dəqiq elanları deyil, həm də həmin ərazinin günün müxtəlif saatlarındakı faktiki yol və tıxac vəziyyətini bir toxunuşla izləyə bilirlər.

- Süni intellekt (AI) analitikası: Alqoritmlər mənzilin yerləşdiyi lokasiya, infrastruktur əlçatanlığı, qiymət dinamikası və pik saatlardakı yol sıxlığını qarşılaşdıraraq əmlakın "real yaşayış dəyərini" hesablayır.

- Bazar qiymətləri və büdcə təhlili: Alıcı mənzili seçməmişdən öncə təklif olunan qiymətin bazar ortalamasına uyğunluğunu dərhal görür, işə və ya təhsil müəssisələrinə gediş-gəliş vaxtını qabaqcadan dəqiqləşdirir.

Rəsmi açıqlama:

"Biz istifadəçilərimizə sadəcə elanlar toplusu deyil, əsaslandırılmış qərar vermə aləti təqdim edirik. İnsanlar illər boyu formalaşdırdıqları büdcə ilə mənzil əldə edir, lakin sonra hər gün yollarda ciddi vaxt itkisi ilə qarşılaşırlar. Prayk.com-un süni intellektlə inteqrasiya olunmuş xəritə və qiymət analitikası bu riski minimuma endirərək seçim prosesini şəffaf və analitik səviyyəyə qaldırır", - deyə platformanın nümayəndəsi bildirib.

Xəritəni canlı sınaqdan keçirin:

- Xəritədə elanlar: prayk.com/az/map

- Bazar qiymətləri: prayk.com/az/qiymetler

Naxçıvanda Prezidentin səlahiyyətli nümayəndəsi Ceyhun Cəlilov sentyabrın 18-də Naxçıvan şəhərində vətəndaşları qəbul edəcək. Bu barədə Səlahiyyətli Nümayəndəlik məlumat yayıb.

Qəbul əvvəlcədən tərtib olunmuş qeydiyyat siyahısı əsasında keçiriləcək.

Yerli sakinlər isə bu cür görüşlərə əsasən əvvəlcədən seçilmiş şəxslərin buraxıldığını, real problemi və şikayəti olan vətəndaşların isə çox vaxt kənarda qaldığını iddia edirlər.

Sakinlərin sözlərinə görə, hazırda Naxçıvanda əsas problemlər arasında işsizlik, polis və məmur özbaşınalığı, korrupsiya və rüşvətxorluq xüsusi yer tutur və vətəndaşlar bu problemlərdən ciddi əziyyət çəkirlər.

Onlar həmçinin bildirirlər ki, görüşlərə qatılan bəzi “şikayətçilər” əvvəlcədən hazırlanır və çıxışlarında əsasən hökuməti tərifləyirlər.

"Gündəlik Naxçıvan"

Gəncə Şəhər Birləşmiş Xəstəxanasının tabeliyində fəaliyyət göstərən Akademik Zülfüqar Məmmədov adına 3 nömrəli şəhər xəstəxanasının baş həkimi Turanə Rüstəmovanın fəaliyyəti ilə bağlı redaksiyaya ciddi iddialar daxil olub.
Məlumatlarda bildirilir ki, 2025-ci ildə sözügedən tibb müəssisəsinə baş həkim təyin olunan Turanə Rüstəmovanın idarəçilik fəaliyyəti xəstəxana əməkdaşları arasında narazılığa səbəb olub. İddialara görə, müəssisədə bəzi şöbə müdirləri və həkimlərdən müxtəlif adlar altında aylıq ödənişlər tələb olunur.

Redaksiyaya təqdim edilən məlumatlarda xüsusilə “fond pulu” adı altında həkimlərdən mütəmadi şəkildə vəsait toplandığı iddia edilir. Bu vəsaitlərin hansı hüquqi əsasla yığıldığı, harada uçota alındığı və hansı məqsədlə xərcləndiyi isə açıq qalır.

Daha ciddi iddialardan biri xəstəxanaya ayrılan dərman preparatlarının taleyi ilə bağlıdır. Mənbələrin sözlərinə görə, dövlət tibb müəssisəsi üçün nəzərdə tutulan bəzi dərman vasitələrinin xəstəxanadan kənara çıxarılaraq apteklərə satıldığı iddia olunur. Bu məlumat təsdiqini taparsa, söhbət artıq yalnız inzibati pozuntudan deyil, dövlət əmlakının və səhiyyə resurslarının istifadəsi ilə bağlı ciddi hüquqi məsələlərdən gedə bilər.

Digər diqqətçəkən məqam təsərrüfat şöbəsinin əməkdaşları ilə bağlıdır. İddialara əsasən, həmin şöbədə adı işçi kimi rəsmiləşdirilən bəzi şəxslər faktiki olaraq işə gəlmirlər. Bununla yanaşı, həmin əməkdaşlara məxsus əməkhaqqı kartlarının baş həkimin nəzarətində olduğu barədə də məlumatlar səsləndirilir.

Redaksiyaya verilən məlumatlarda xəstəxanada ən adi dəftərxana ləvazimatlarının belə çatışmadığı bildirilir. Laborator analizlərin nəticələrinin adətən A4 formatlı kağızda xəstələrə təqdim edilməli olduğu halda, xəstəxanada kağız çatışmazlığı səbəbindən vətəndaşların nəticələri telefonla çəkməyə və ya elektron sistem üzərindən əldə etməyə məcbur qaldıqları deyilir.

Bu isə başqa bir sualı gündəmə gətirir: xəstəxananın dəftərxana və təsərrüfat təminatı üçün ayrılan vəsaitlər hara xərclənir?

Məlumatlarda əlcək, süpürgə, ağ xalat, müxtəlif təsərrüfat malları, avadanlıqlar və digər mal-materialların satın alınması üçün müvafiq satınalmaların həyata keçirildiyi, lakin həmin məhsulların bir hissəsinin xəstəxanada faktiki olaraq görünmədiyi iddia olunur.

Əgər satınalma sənədlərində mal və avadanlıqların xəstəxanaya təhvil verildiyi göstərilirsə, onların faktiki mövcudluğunun inventarizasiya yolu ilə yoxlanılması vacibdir. Hansı şirkətlərdən nə qədər məhsul alınıb? Bunun üçün nə qədər dövlət vəsaiti xərclənib? Malların təhvil-təslim aktları varmı? Hazırda həmin mal-materiallar xəstəxananın anbarında mövcuddurmu?

Ortaya çıxan iddialar kifayət qədər ağırdır və onların hər biri TƏBİB, Gəncə Şəhər Birləşmiş Xəstəxanası, eləcə də zərurət yaranacağı təqdirdə hüquq-mühafizə orqanları tərəfindən ayrıca araşdırılmalıdır.

Xüsusilə əməkdaşlardan qeyri-rəsmi vəsaitlərin toplanması, dövlət hesabına alınmış dərman və avadanlıqların taleyi, faktiki işə çıxmayan şəxslərə əməkhaqqı ödənilməsi və əməkhaqqı kartlarının üçüncü şəxslərin nəzarətində saxlanılması barədə iddialar cavabsız buraxıla biləcək məsələlər deyil.

BakuNews.az məsələ ilə bağlı qarşı tərəfin – baş həkim Turanə Rüstəmovanın, Gəncə Şəhər Birləşmiş Xəstəxanasının və TƏBİB-in mövqeyini dərc etməyə hazırdır.

Redaksiyamız sözügedən xəstəxanada aparılan satınalmalar, dərman təminatı, əməkhaqqı ödənişləri və təsərrüfat xərcləri ilə bağlı məlumatları araşdıraraq mövzuya daha geniş şəkildə qayıdacaq.

Ofeliya Davudqızı

BakuNews.az