Bakı şəhəri, Sabunçu rayonunda 2-ci Zabrat Maştağa yolu, döngə 2,ev 10A ünvanında yaşayan Məmmədov Aliq Fikrət oğlu tərəfindən Prezident İlham Əliyevə, Baş prokuror Kamran Əliyevə, Ədliyyə naziri Fərid Əhmədova, Məhkəmə-Hüquq Şurasının sədri İnam Kərimova və digər aidiyyəti dövlət qurumlarının rəhbərlərinə şikayət məktubu ünvanlanıb.

Bir surəti də Aktualinfo.net-ə daxil olan şikayət məktubunda deyilir:

Çox hörmətli cənab Prezident İlham Əliyev!

Sabunçu rayonu Bakıxanov qəsəbəsində yerləşən, 96 nömrəli tam orta məktəbin binasında yerləşən Q. Primiv 2 nömrəli uşaq musiqi məktəbin (Ağdam 2 nömrəli) direktoru Məmmədov Elşad Aydın oğlu məni aldadaraq oğlum Məmmədov
Röyal Aliq oğlunu həmin məktəbdə təsərrüfat işləri üzrə müdir vəzifəsində işə düzəlmək məqsədilə 5000 manat və qohumum Quliyev Xəqani Nuru oğlunu təlimtərbiyə işləri üzrə müavin vəzifəsinə götürəcəyini vəd verərək 6500 manat pulalmışdır. 18 aprel 2024-cü il tarixində əmrin sürətini “whatsApp” vasitəsi ilə mənim telefonuma göndərmişdir. Röyal və Xəqanini məktəbə çağıraraq müqavilə bağlamış və kollektivə təqdim etmişdir. Şöbə müdiri Sevinc xanima tapşırıb ki, hər ikisinin telefon nömrəsini götür, məktəbin qrupuna daxil et. 051-376-59-71 nömrəsindən Röyala və Xəqaniyə zəng vurulmuş, regionun kadrlar şöbəsinin işçisiyəm deyib və sizə əmək kartı hazırlanır, hazır olanda sizə çatdırılacaq və işə çağırılacaqsınız deyib.
Aprel ayının 24-də (2024) Elşad mənə zəng edib görüşmək lazım olduğunu bildirdi. Görüşdük və mənə təşkilatçı və qardirobçu ştatları olduğunu bildirdi və dedi ki sən mənim əmimsən istəyirəm sən deyən adamları bu işə götürüm. Gör qohumdan tanışdan kim istəyir gətir. Mən sənə inanıram. Röyal və Xəqani son zəngdə iştirak ediblər. Çəkilişləri var.

Mən əvvəlcədən Xəqani vasitəsi ilə tanıdığım Seyidəhmədov Vüqar Mirzəbaba oğluna dedim. Elşad müəllim 4500 manat təşkilatçı üçün, 4000 manat qardirobçu üçün istəyir. Hərəsinə 2000 əvvəl qalıq pul işə əmrdən sonra. Vüqar axşam mənə zəng vuraraq təşkilatçı işinə həyat yoldaşını və qardirobçu işinə dostu Davudun bacısını düzəltmək istəyiblər. Elşadın istədiyi ilk ödənişi Xəqani ilə mənə verdilər bizdə, birlikdə Elşada verdik. 2024-cü ilin aprelin 30-da Elşad “whatsApp”-la mənə əmr göndərib və pulların qalığını istədi. Sonra onları məktəbə dəvət etdi, iş otağında müqavilə bağladı. Qalıq pulu yenə Xəqani və mən Elşada verdik. Sonra Vüqarı çağırıb 3 nəfəri işə götürmək üçün 13.500 manat alıb.

2026-cı ilin yanvarında Sabunçu rayon Məhkəməsinin hakim Vüsal Qurbanovun sədrliyi ilə məhkəmə iclası başlanmışdır.
İbtidai istintaq zamanı dəlil sübutlar təqdim edilmişdir. Lakin istintaq pozuntularına yol verilmişdir. Üzləşmə zamanı bizi üzləşdirən Rasim Seyfullayev adlı ( Sabunçu rayon Prokurorluğuna heç bir əlaqəsi olmayıb) müstəntiqi Elşad
Məmmədov və Natiq Məmmədov yalan kimi göstərdilər. Dedilər elə adlı adam heç prokurorluğa gəlməyib və üzləşmə aparılmayıb.
Lakin vəkilim Namiq Hacıyev və mən istintaqı Natiq Məmmədovun qərəzli apardığı üçün onun aparmasına etiraz bildirdik. Sübut olundu ki, Rasim Seyfullayev adlı adam həqiqətən orda olub. Vüqar, Təvəkkül, Xəqani, Elşad Qasımov , İsgəndər, Malik adlı şəxslərin də ifadələrin alıb. Həqiqətən Natiq Məmmədov tərəfindən istintaqın sirri yayılıb.

Hakim Vüsal Qurbanova bildirdim ki, biz Məhkəmə istintaqına inanırıq və obyektivlik gözləyirik.
Lakin təqsirləndirilən şəxs tərəfindən 4 dəfə məhkəmə prosesinə gəlməyib və proses pozulub ( 2 dəfə vəkili 2 dəfə də özü)
Elşad Məmmədov 1-ci dəfə xəstə Hepotit B olduğu üçün gəlmədiyini, 2-ci dəfə atasının ( Aydın Məmmədovun) açıq ürək əməliyyatı olunacağını bildirmişdir. Hər iki halda “televiziyaya” çıxmış, “Evdəkilərə Salam” verilişində ailəsi ilə birlikdə iştirak etmişdir. (11.07.2026). Hətta atası da oxudu. Lakin Hakim heç bir hal üçün əsas tələb etmədi.
29.07.2026-cı il Məhkəmə prosesində iştirak edən 5 nəfər zərərçəkmişlərdən 4 nəfəri Polis Nəzarətində Olma Qəti İmkan Tədbirinin dəyişilərək həbs qəti imkan tədbiri ilə əvəz olunmasını istədi. Lakin hakim Vüsal Qurbanov qəbul etmədi.

051 376 59 71 nömrəli telefondan zəng edilərək “hamıya işlərinizin düzəlib, yaxın günlərdə hamınızın şəxsi hesabınıza əmr gələcək” deyib və yalan əmrləri “whatsApp” larına göndərilib. Dəfələrlə tələb etməyimizə baxmayaraq həmin nömrəli telefonun sahibi istintaqa və məhkəməyə dəvət olunmayıb.

Aktualinfo.net

P.S. Q. Primiv 2 nömrəli Ağdam uşaq musiqi məktəbin direktoru olmuş Məmmədov Elşad Aydın oğlunun vəzifə səlahiyyətlərindən sui-istifadə etməsi, onlarla insanı aldadaraq işə düzəltmək adı altında pul alması barədə daha ətraflı məlumatları növbəti araşdırmalarda oxucuların diqqətinə çatdıracıq.

Aktualinfo.net

Vətəndaş Dekoliv mağazasından narazılıq edir.

Gununsesi.info xəbər verir ki, bu barədə o sosial şəbəkədə paylaşım edib:

Vətəndaşın sözlərinə görə, avqustun 15-də Dekoliv mağazasında alış-veriş zamanı kartından 127,03 ABŞ dolları tutulsa da, ona ödənişin keçmədiyi bildirilib. O, mağazanın məsələ ilə bağlı əlavə təsdiq təqdim etməməsindən narazıdır.

“Avqustun 15-də Dekoliv mağazasında alış-veriş zamanı kartla 127,03 ABŞ dolları ödəniş etdim. Ödəniş prosesində terminalda təsdiqləmə üçün imza da atıldı.

Buna baxmayaraq, mağazada mənə kart ödənişinin keçmədiyi bildirildi və məndən əlavə olaraq nağd ödəniş istəndi. Mənim üzərimdə aldığım bütün məhsulların məbləği qədər nağd pul olmadığı üçün məhsullardan birini çıxartdım və qalan məhsulların pulunu nağd ödədim.

Yəni nağd ödədiyim məbləğ kartdan tutulan 127,03 ABŞ dolları ilə eyni deyil. Buna görə əlimdə olan ikinci çeki banka təqdim etməyim problemi tam sübut etmir.

Mağazadan istədim ki, mənə kart ödənişinin uğursuz olduğu və buna görə nağd ödəniş etdiyim barədə əlavə çek və ya yazılı təsdiq versinlər. Banka müraciət edərkən məhz belə bir sənəd mənim üçün əsas sübut olardı.

Hazırda məqsədim kimisə ittiham etmək və ya mübahisə yaratmaq deyil. Sadəcə baş verən vəziyyəti sənədləşdirib banka təqdim etmək istəyirəm. Təəssüf ki, Dekoliv mağazası ilə əlaqə saxlamağa çalışsam da, cavab ala bilmirəm.

Ümid edirəm məsələ normal şəkildə həll olunacaq və mağaza mənə lazım olan təsdiqi təqdim edəcək”.

Gununsesi.info

Redaksiyanın elektron ünvanına Şahsuvar Vidadi oğlu Əhədov tərəfindən şikayət məktubu daxil olmuşdur. Şikayətçinin məktubunu olduğu kimi dərc edirik.
Yazıb sizə bildirirəm ki, 30.05.2024-cü il tarixində Gündüz Akif oğlu Gözəlovdan Bakı şəhəri, Xətai rayonu, Fəzail Bayramov küçəsi, 1156-cı məhəllə, ev-mənzil 100, bina 1-də sahəsi 208.9 kvm sahəsi olan mənzil almışam. 03.07.2024-cü ildə anamın adına 3 saylı ASAN xidmətdə çıxarış (kupça) verilib. Ailəm ilə birlikdə mənzilimizdə yaşayırdıq. 19.06.2025-ci il tarixində təsadüf nəticəsində evimin üzərində həbs olduğunu öyrəndim. Bu məsələ ilə bağlı dərhal Xətai Rayon Məhkəməsinə müraciət etdim. Hakim Aygün Həsənova təcili olaraq mənzilimizin üzərinə qoyulan həbs qərarını ləğv etdi. Hadisədən bir ay keçdikdən sonra bizə məlumat verildi ki, Eldar Məhərrəm oğlu Rəhimov Bakı şəhəri, Xətai rayonu məhkəməsinə mənzilimizə verilmiş çıxarışın ləğvi ilə bağlı iddia ərizəsi ilə müraciət edib.
Cavabdehlər kimi isə Gündüz Akif oğlu Gözəlov (mənzili aldığımız şəxs) və anam Mələk Əziz qızı Əhədova göstərilmişdir. Xatırladım ki, iddiaçı iddiasında göstərilir ki, cavabdeh şəxs kimi göstərilən Gündüz Akif oğlu Gözəlovun(mənzili aldığımız şəxs) iddiaçıya 2025-ci ilədək 70 000 manat ödənilməmiş təqribi borcu qalıb. Həmçinin iddiaçı qeyd edir ki, Gündüz Akif oğlu Gözəlov borcunu ödəmir. Biz isə vicdanlı alıcı olaraq mənzilin pulunu tam ödəməyimizə baxmayaraq, yuxarıda qeyd etdiyim tərəflərin borc mübahisəsinin qurbanına çevrilmişik. Xatırladım ki, mənzili aldığımız vaxt mənzilin əvvəlki sahibi Gündüz Akif oğlu Gözəlova qanunvericiliyin tələbinə uyğun olaraq tələb olunan vergi və rüsumları ödəmək şərti ilə 50 saylı notariusda alqı-satqı etmiş, rüsumların və ödənişlərin qəbzlərini əldə etmişik. Qeyd edim ki, 08.01.2026-cı ildə Gündüz Akif oğlu Gözəlov iddiaçı Eldar Məhərrəm oğlu Rəhimova olan borcunu tam ödəmişdir. Borcun ödənməsi Ədliyyə Nazirliyi Xətai Rayon İcra Şöbəsinin rəisi cənab Abbas Nəsibovun verdiyi möhürlü və imzalı sənədlə öz təsdiqini tapmışdır. İşə baxan hakim Əminə Abbasova borcun tam şəkildə ödənməsinə baxmayaraq, həmçinin işlə bağlı aidiyyatı qurumlara göndərilən sorğunun nəticələrini gözləmədən təcili olaraq ədalətsiz formada mənzilimizə verilən çıxarışı bir qərarla ləğv etdi.
Şübhə edirəm ki, bu qohumluq əlaqəsi işin tam obyektiv araşdırılmasının aparılmasına mane olub

Sonradan öyrəndim ki, sən demə, iddiaçı Eldar Rəhimovun oğlu Bakı Apellyasiya Məhkəməsi Cinayət Kollegiyasının sədri Elmar Eldaroğlu Rəhimovdur. Bununla da məsələ mənə tam aydın oldu.
Şübhə edirəm ki, bu qohumluq əlaqəsi işin tam obyektiv araşdırmanın aparılmasına mane olub.
Hesab edirəm ki, Xətai rayon Məhkəməsinin hakimi Əminə Abbasovanın ədalətsiz qərarı QOHUMLUQ ƏLAQƏLƏRİNİN hüquq üzərindəki qələbəsidiir.
Xatırladım ki, bu işə baxan əvvəlki hakim hüquq və dövlətçiliyi əsas götürərək ədalətsiz qərar çıxarmamaq üçün özü-özünə etiraz edib işdən imtina etmişdi. Sonrakı hakim Əminə Abbasova isə mənə aidiyyatı olmayan mübahisəli tərəfin iddiasını təmin edərək çıxarışı ləğv etdi.
Diqqətinizə çatdırım ki, hakimin qərarı elan etməsindən 19 gün keçməsinə baxmayaraq, qərar sistemə yüklənməyib.
Bir də təkrar üçün qeyd edirəm ki, notariat qaydasında alqı-satqı müqaviləsi bağlamışam. Ödənişi bank vasitəsilə etmiş və dövlət reyestrindən verilmiş rəsmi çıxarış (kupça) əsasında mənzil əldə edən vicdanlı alıcıyam. Sadə bir vətəndaş olaraq dövlətin rəsmi möhürünə, qanuni sənədinə güvənib mülkiyyət sahibi olmuşam. Tanımadığım adamların borc mübahisəsinin qurbanıyam. Buna baxmayaraq, həyatımda heç vaxt tanımadığım iki şəxsin məhkəmə mübahisəsinə heç bir təqsirim olmadan üçüncü şəxs qismində cəlb olunmuşam. Halbuki əlimdə Ədliyyə müşaviri Abbas Nəsibov tərəfindən imzalanmış və möhürlənmiş, mənzili mənə satan şəxsin borcunun tam ödənildiyini təsdiq edən rəsmi sənəd mövcuddur.

Bütün bunlara baxmayaraq, Xətai Rayon Məhkəməsinin hakimi Əminə Abbasovanın qəbul etdiyi qərarla mənim dövlət qeydiyyatına alınmış mülkiyyət hüququm ləğv edilib!
Dövlət reyestrindən verilmiş çıxarış, həm bank ödəniş sənədləri, həmçinin borcun tam ödənilməsini təsdiq edən rəsmi sənəd mövcud olduğu halda, mənə məxsus mənzilin əlimdən alınması qərarı qanunsuzdur və anlaşılan deyil.
Azərbaycan Respublikası Konstitusiyasında "Mülkiyyət toxunulmazlığı barədə ayrıca qanunlar var. Bu mənada bilirik ki, dövlət vətəndaşın hüquqlarının təminatçısıdır. Prezident İlham Əliyev hər çıxışında açıq şəkildə bəyan edir və bildirir ki, məmur özbaşınalığı ilə bağlı hər bir siqnal ciddi araşdırılacaq. Həmçinin dövlət başçısı məhkəmə-hüquq sistemindən şəffaflığı və vətəndaş məmnunluğunu tələb etdiyi halda, Xətai Rayon Məhkəməsinin bu qərarı və 19 günlük prosessual qanunsuzluğu ölkədə aparılan islahatların ruhuna zərbə vurur.
Hörmətli redaksiya, mənə aidiyyatı olmayan məhkəmə mübahisələrinin bizim mənzilimiz üzərində gerçəkləşdirilən ədalətsiz qərarı barədə yazdığım şikayəti mənsub olduğumuz media vasitəsi ilə ictimailəşdirilməsinə köməklik göstərməyinizi, həmçinin üzərimizdə qurulan haqsız və ədalətsiz məhkəmə mübahisələrinin dayandırılmasını tədbir görülməsi üçün Məhkəmə-Hüquq Şurasından və aidiyyəti dövlət orqanlarından bu özbaşınalığa son qoyulmasını xahiş edirəm!
Mən, Mələk Əziz qızı Əhədovnın oğlu olaraq mənə verdiyi etibarnamə əsasında bu şikayət ərizəsini yazmışam.
Qeyd: KİV haqqında qanunun tələblərinə və peşə davranış qaydalarına uyğun olaraq qarşı tərəflə dəfələrlə əlaqə saxlasaq da, təəssüflər olusn ki, bu zənglərimiz uğursuzluqla nəticələndi.(Arazxeber.az)
Redaksiya olaraq materailda adı hallananların mövqeyini dərc etməyə hazırıq.

Neftçala rayonunun Xolqaraqaşlı kəndində fermer təsərrüfatının suvarma suyu ilə təmin olunmaması ilə bağlı redaksiyamıza ciddi şikayət daxil olub. Şikayətdə səsləndirilən iddialar təsdiqini taparsa, söhbət sadəcə bir fermerin su problemindən deyil, kənd təsərrüfatı sahəsində insanların əməyinin, çəkdiyi xərcin və aylarla gözlədiyi məhsulun məsuliyyətsiz münasibət nəticəsində təhlükə altına atılmasından gedir.
Xolqaraqaşlı kənd sakini Xuraman Zeynalovanın redaksiyamıza təqdim etdiyi məlumat və ərizəyə görə, atası, fermer Nağıyev Cəmaləddin Həsənağa oğlunun kənd ərazisində təxminən 19 hektar əkin sahəsi var. Ailə uzun illərdir kənd təsərrüfatı ilə məşğul olur. Hazırda həmin təsərrüfatda yonca və pambıq sahələrinin suvarılması ilə bağlı ciddi problem yarandığı bildirilir.

Xuraman Zeynalova şikayətində konkret adlar çəkir. Onun sözlərinə görə, narazılıq Neftçala rayon su idarəsinin rəhbəri kimi təqdim etdiyi Təbriz adlı şəxsin, həmçinin kənd üzrə su təsərrüfatı işçiləri Mübariz və Əfsarağanın fəaliyyəti ilə bağlıdır. Şikayətçi bildirir ki, dəfələrlə müraciət edilməsinə, su veriləcəyinə dair sözlər eşidilməsinə baxmayaraq, fermer təsərrüfatına su vaxtında çatdırılmayıb.

Burada sual yaranır: fermer əkin aparıb, toxum səpib, torpağı becərib, xərc çəkibsə, suvarma növbəsi çatanda onu günlərlə və həftələrlə gözlətmək hansı idarəetmə prinsipinə uyğundur?

Şikayətçinin sözlərinə görə, əvvəlcə yonca sahəsi vaxtında suvarılmayıb və bunun nəticəsində məhsuldarlığın aşağı düşməsi təhlükəsi yaranıb. Daha sonra vəziyyət pambıq sahəsində daha ağır həddə çatıb. Xuraman Zeynalova bildirir ki, torpaq o qədər quruyub ki, kultivator sahəyə daxil olanda bəzi pambıq kolları kökündən çıxıb. Hazırda isə pambığın artıq açmağa başladığı, lakin sahəyə yenə də lazımi suyun verilmədiyi iddia olunur.

Fermer üçün bir gün belə bəzən məhsulun taleyini müəyyən edir. Pambıq və yonca sahəsinin suvarılmasında gecikmənin nəticəsini kabinetdə əyləşən məmur deyil, torpağa pul və zəhmət qoyan fermer çəkir. Məhsul azalanda, sahə quruyanda, çəkilən xərc batanda həmin zərərin məsuliyyətini kim daşıyacaq?

Şikayətdə daha ciddi bir iddia da səsləndirilir. Xuraman Zeynalovanın bildirdiyinə görə, ərazidə suyun fermerlər arasında bərabər və obyektiv bölüşdürülmədiyinə dair şübhələr var. O iddia edir ki, bəzi imkanlı şəxslərin sahələri istədikləri vaxt suvarıldığı halda, onların təsərrüfatı günlərlə gözlədilir. Bu iddia mütləq araşdırılmalıdır. Çünki dövlətin suvarma infrastrukturu hansısa şəxsin şəxsi mülkü deyil və su bölgüsü tanışlıq, nüfuz və yaxud maddi imkan prinsipi ilə həyata keçirilə bilməz.

Xuraman Zeynalova həmçinin bildirir ki, Neftçala rayon su idarəsinin rəhbəri Təbriz, eləcə də Mübariz və Əfsarağa adlı əməkdaşlarla əlaqə saxlamağa çalışsa da, problemin həlli istiqamətində nəticə əldə edə bilməyib. Onun sözlərinə görə, verilən vədlər də faktiki su təminatına çevrilməyib.

Əgər bu şəxslərlə bağlı səsləndirilən iddialar həqiqəti əks etdirmirsə, ictimaiyyət qarşısında çox sadə suallara cavab verilməlidir: Cəmaləddin Nağıyevin 19 hektarlıq təsərrüfatına hansı tarixlərdə və nə qədər su ayrılıb? Suvarma növbəsi hansı sənəd əsasında müəyyən edilir? Fermerə su verilməməsinin texniki və ya hüquqi səbəbi olubmu? Eyni ərazidə digər fermerlərin sahələrinə hansı ardıcıllıqla su verilib? Su bölgüsünə kim nəzarət edir?

Əgər fermerə su ayrılıbsa, bunu sənədlə göstərmək çətin olmamalıdır. Əgər ayrılmayıbsa, səbəbi izah edilməlidir. Əgər su mövcud olduğu halda bir təsərrüfat susuz saxlanılıb, digər sahələr suvarılıbsa, onda məsələ artıq adi texniki nasazlıq kimi təqdim edilə bilməz.

Kənd təsərrüfatının inkişafından danışılan bir ölkədə fermeri su üçün qapı-qapı salmaq, telefon zənglərinə cavab verməmək və əkin sahəsini qurumağa buraxmaq qəbuledilən idarəetmə modeli deyil. Fermer dövlət qurumundan xüsusi imtiyaz istəmir. O, sadəcə təsərrüfatının vaxtında suvarılmasını və hamıya tətbiq edilən qaydanın ona da şamil olunmasını tələb edir.

Xüsusilə diqqət çəkən məqam budur ki, Cəmaləddin Nağıyev yaşlı fermerdir, ailənin bildirdiyinə görə həyat yoldaşı da Parkinson xəstəliyindən əziyyət çəkir. Belə bir ailənin dolanışıq mənbələrindən biri olan təsərrüfatın su problemi səbəbindən zərərə düşməsi məsələyə daha həssas yanaşılmasını tələb edir.

İndi cavab verməli olan tərəf fermer deyil. Neftçala rayonunda su təsərrüfatına cavabdeh qurumlar, Təbriz adlı rəhbər şəxs, Mübariz və Əfsarağa adlı əməkdaşlar ictimaiyyətə izah etməlidirlər: Xolqaraqaşlı kəndində Cəmaləddin Nağıyevin sahəsi niyə vaxtında suvarılmayıb?

Qeyd edək ki, redaksiyaya təqdim olunan ərizədə Təbriz, Mübariz və Əfsarağa adlı şəxslərin soyadları göstərilməyib. Aidiyyəti qurumun həmin şəxslərin tam kimliyini və tutduqları vəzifələri açıqlaması məqsədəuyğun olardı.

Redaksiya olaraq Azərbaycan Dövlət Su Ehtiyatları Agentliyinin, Neftçala Rayon İcra Hakimiyyətinin və ərazidə suvarma suyunun bölüşdürülməsinə cavabdeh strukturun məsələyə dərhal münasibət bildirməsini gözləyirik. Şikayətdə adı çəkilən şəxslərin də mövqeyini olduğu kimi dərc etməyə hazırıq.

Fermerin pambığı artıq açır. Burada aylarla aparılan yazışmaya deyil, təcili suya və konkret tədbirə ehtiyac var. Əks halda sabah qurumuş sahənin qarşısında “araşdırma aparılır” demək fermerin itirdiyi məhsulu geri qaytarmayacaq.
Aknews.az

Naxçıvanda 2018-ci ildən əvvəl istehsal olunan avtomobillərlə taksi fəaliyyətinə qadağa qoyulduğu bildirilir. Sürücülər iddia edirlər ki, bu qadağanın arxasında monopolist taksi şirkətləri ilə yerli Avtomobil Yolları Dövlət Agentliyi arasındakı maraq əlaqələri dayanır.
Onların fikrincə, məqsəd fərdi taksiləri bazardan sıxışdırmaq və taksi şirkətlərinin üstünlük qazanmasına şərait yaratmaqdır.
Yeni maşın almağa imkanı çatmayan sürücülər isə işsiz qaldıqları üçün Naxçıvanı tərk etməyə məcbur olduqlarını deyirlər.
Sürücülərdən H. Məmmədov bildirir ki, tətbiq olunan məhdudiyyət onun gündəlik qazancını tam dayandırıb:
“Maşınım 2017-ci il istehsalıdır. İşləməyə qoymurlar, müştəri götürən kimi gəlib mane olurlar. Qalmışıq çarəsiz. Məncə, bütün bunlar taksi monopoliyasına xidmət edir. Yerli Avtomobil Yolları Dövlət Agentliyinin də həmin şirkətlərlə əlbir olduğunu düşünürük. Şirkətlərdən hər ay pul alındığını, məbləğ artırılanda isə fərdi taksilərin bazardan sıxışdırıldığını deyirlər.
Yeni maşın almağa imkanım yoxdur. İlkin ödəniş edib kreditə götürə bilərəm, amma o krediti necə ödəyəcəyəm? İnsanların sosial vəziyyəti ağırdır. İmkanı olanın da öz maşını var. Hazırda çörək pulumu belə çıxara bilmirəm. Burada başqa iş də yoxdur. Məcburam ailəmi dolandırmaq üçün başqa yerə gedim”.
A. Nuriyev isə bütün sənədlərinin qaydasında və avtomobilinin saz olmasına baxmayaraq işləməsinə icazə verilmədiyini bildirir:
“Avtomobilim 2015-ci il istehsalıdır. Tam saz vəziyyətdədir. Kurs keçmişəm, imtahan vermişəm, sertifikatım var, bütün sənədlərim yerindədir.
Mənə demişdilər ki, avtomobilin 15 ili tamam olana qədər işləyə bilərsən, yəni 2030-cu ilə qədər. İndi isə deyirlər ki, işləyə bilməzsən. Yeni maşın almağa imkanım yoxdur. Məcbur qalıb Türkiyəyə işləməyə gedəcəyəm”.
"Gündəlik Naxçıvan"

Bakı şəhəri 117 saylı uşaq bağçasında 15 ildən artıq tibb bacısı kimi çalışmış Bahar Cəlilovanın bağçada qanun pozuntuları, vəzifə vərəsəliyi və təhlükəsizlik qaydalarının pozulması ilə bağlı səsləndirdiyi iddialar sosial şəbəkələrdə ciddi rezonans doğurub.

Məsələnin diqqətçəkən tərəfi isə yalnız videomüraciətin ictimai müzakirəyə çıxarılması deyil.Redaksiyamıza verilən məlumata görə, Bahar Cəlilova videomüraciətindən əvvəl Baş Prokuror yanında Korrupsiyaya qarşı Mübarizə Baş İdarəsinə müraciət edib. Onun sözlərinə görə, həmin müraciətlə bağlı araşdırma hələ başa çatmayıb. Deməli, ortada araşdırılması davam edən iddialar var və onların həqiqət olub-olmamasına hüquq-mühafizə orqanları hüquqi qiymət verməlidir.

Qeyd: Xatırladaq ki, Bahar Cəlilova artıq Əmək məcəlləsinin 70-ci maddəsinin “C” bəndi ilə işdən çıxarılıb. Halbuki, Azərbaycan Respublikası Əmək Məcəlləsinin 70-ci maddəsinin “c” bəndi işçinin peşəkarlıq səviyyəsinin, ixtisasının (peşəsinin) kifayət dərəcədə olmadığına görə tutduğu vəzifəyə uyğun gəlmədiyi barədə səlahiyyətli orqan tərəfindən müvafiq qərar qəbul edildiyi hallarda əmək müqaviləsinin işəgötürən tərəfindən ləğv edilməsini nəzərdə tutur.

Maraqlıdır: əgər Bahar Cəlilovada sözügüdən maddədə nəzərdə tutulan hallar var idisə, eyni müəssisədə 17 il necə fəaliyyət göstərib?

Həmçinin maraqlıdır: araşdırma davam etdiyi halda, şikayətçinin işdən azad edilməsi nə ilə izah olunur?

Azərbaycan qanunvericiliyində korrupsiya və digər hüquqpozmalar barədə məlumat verən şəxslərin müdafiəsi ilə bağlı mühüm təminatlar nəzərdə tutulur. Dövlətin korrupsiyaya qarşı mübarizə siyasətinin əsas prinsiplərindən biri də qanun pozuntusu barədə məlumat verən şəxsin təzyiq və qisas tədbirlərindən qorunmasıdır. Əgər Bahar Cəlilovanın işdən azad edilməsi onun aidiyyəti dövlət qurumlarına etdiyi müraciətlə, səsləndirdiyi iddialar araşdırılıb qurtarmayıbsa bu sadəcə əmək münasibəti məsələsi deyil. Bu halda söhbət daha ciddi hüquqi və idarəetmə sualından gedə bilər: dövlət orqanlarına və hüquq-mühafizə qurumlarına müraciət edən şəxs bunun əvəzində cəzalandırılmalıdırmı?

Rəhbər vəzifədə olmaq yalnız əmr vermək hüququ deyil, qəbul edilən qərarların qanuna və ədalət prinsipinə uyğunluğuna görə məsuliyyət daşımaq deməkdir.“Burda mənəm, Bağdadda kor xəlifə” yanaşması dövlət idarəçiliyində qəbuledilməzdir.

Heç bir rəhbər qanundan üstün deyil. Heç bir vəzifə sahibinin dövlətin korrupsiyaya qarşı mübarizə siyasətinə və qanunvericiliyin müəyyən etdiyi təminatlara məhəl qoymamaq imtiyazı yoxdur.Araşdırmanın hələ tamamlanmadığı bir vaxtda şikayətçinin işdən uzaqlaşdırılması təsadüfdür, yoxsa susdurulma effekti yaradan inzibati qərar?

Burada söhbət qanunu bilməməkdən gedir, yoxsa qanuna meydan oxumaqdan?

Cavabı ən yaxşı halda hüquqi araşdırma verəcək. Cəmiyyət isə həmin cavabı gözləyir.

Faktum.az

Dövlət Təhlükəsizliyi Xidməti (DTX) tərəfindən davam etdirilən antiterror və əməliyyat-axtarış tədbirləri çərçivəsində 2009-cu ildən beynəlxalq axtarışa verilmiş Ağalarov Namiq Rəşid oğlunun saxlanılaraq Azərbaycana gətirilməsi və istintaqa cəlb olunması təmin edilib.

Namiq Ağalarov 2008–2009-cu illərdə Əfqanıstan, Pakistan və digər ölkələrdə qanunsuz silahlı birləşmələrin tərkibində BMT mandatlı Beynəlxalq Təhlükəsizliyə Yardım Qüvvələrinin şəxsi heyətinə silahlı pusquların qurulması, məsafədən partlayıcı qurğuların tətbiqində və beynəlxalq təşkilatların nümayəndələrinə, habelə beynəlxalq missiya yerinə yetirən müxtəlif ölkə vətəndaşlarına, eləcə də logistika şəbəkələrinə qarşı silahlı hücum əməliyyatlarının təşkilində iştirakda ittiham edilir.

Ötən illər ərzində məsuliyyətdən yayınmaq üçün müxtəlif adlar altında ayrı-ayrı ölkələrdə gizlənmiş Namiq Ağalarovun eyni zamanda cihad və radikal dini təbliğat fəaliyyəti ilə də məşğul olduğuna dair məlumatlar mövcuddur.

Redaksiyamıza Radius.az-dan təkər alışına görə şikayət daxil olub.

Şikayətçinin sözlərinə görə, o, şirkətin kampaniyasından yararlanaraq təkərləri daha sərfəli qiymətə almaq istəyib. O, təkərləri aldıqdan sonra daha ucuz qiymətə dəyişdirə bildiyi üçün onların quraşdırılmasını başqa yerdə həyata keçirib.

Müştərinin iddiasına görə, alış zamanı ona kampaniyanın yalnız təkərlərin Radius.az-ın mağazasında quraşdırıldığı halda qüvvədə olduğu barədə məlumat verilməyib. Şikayətçi əlavə məbləğin də bu barədə əvvəlcədən məlumatlandırılmadan hesablandığını bildirib.

Məsələ ilə bağlı Radius.az ilə əlaqə saxladıq. Şirkət nümayəndəsi bildirib ki, müştərinin məlumatları sistem üzrə yoxlanılıb və onun avqust ayında iki ədəd təkər aldığı müəyyən edilib.

Nümayəndənin sözlərinə görə, həmin təkərlərin ümumi məbləği 395 AZN təşkil edib. O, şikayətçinin 300 AZN əvəzinə 400 AZN ödəməsi ilə bağlı iddianı təsdiqləməyib.

Şirkət nümayəndəsi qeyd edib ki, təkərlərin qiyməti onların növündən, standart satış qiymətindən və mağazada quraşdırılıb-quraşdırılmamasından asılı olaraq dəyişir. Kampaniya çərçivəsində tətbiq olunan qiymətlər də seçilən məhsul və xidmətdən asılıdır.

Ajans.az

Vaxtaşırı təhsil sistemindəki korrupsiya və rüşvətxorluq gündəmə gələndə faktların təsdiqi hüquq mühafizə üzərinə düşür. Elə bu baxımdan cənab baş prokuror Kamran Əliyevə əziyyət olmasın deyə xahiş edirik ki, bu mövzunu xüsusi olaraq diqqətə alınması barədə göstəriş versin. . İnanırıq ki, onun nəzarətində olan hər bir iş öz ədalətli qərarını tapır.
Bu günlərdə isə Bakı İdman Liseyində elə bir dələduzluq halı baş verib ki, məktəb adına hədsiz utancverici vəziyyət yaranıb. Bakı İdman Liseyinin müəllimi Pünhan Pənahov liseyin direktoru Tərminə Əsədovaya arxalanaraq məzunlardan birinin valideynindən Dövlət İdman Akademiyasına qabiliyyət imtanından keçirəcəyi vədi ilə 5500 manat pul alaraq dələduzluq edib. Gözlənildiyi kimi əməliyyat baş tutmayıb, ortaya səs yazıları, pul köçürmə çekləri filan çıxıb. Dövlət İmtahan Mərkəzinin keçirdiyi imtahana təbii olaraq müdaxilə edə bilməyəcəyini bilən dəstə vətəndaşı məqsədyönlü şəkildə aldadaraq dələduzluq ediblər. Məsələ hazırda hüquq mühafizə orqanları tərəfindən araşdırılır. Tezliklə daha böyük başlar bu dələduzluqdan nəsibini alacaq.
Məsələnin maraqlı tərəfi odur ki, Bakı İdman Liseyinin direktoru Tərminə Əsədova Bakı şəhər təhsil idarəsinin müdir müavini Turanə Məcidlinin ailə üzvüdür. Gəlin qaynana tandeminin əks-sədası görün haralardan, hansı əməllərdən çıxır.
Bakı şəhər təhsil idarəsinə bir neçə ay əvvəl müavin təyin olunan Turanə Məcidli həmçinin müdür vəzifəsini icra edən Nərminə Hüseynovanın vəzifəsinə əməlli başlı göz dikib, şef müdir olmaq astanasındadır. O da nazir müavini gedəcəyini gözlədiyi üçün Turanə xanımın şıltaqlıqlarına göz yumur. Həmçinin Turanə Məcidli özündən yuxarı hamı üçün balıq tutan tilov rolunda həvəslə çıxış edir. Bu da yəqin elə onların marağına işlədiyi üçün hər kəsə sərf edir.
Hər hansı sahədə karyera qurmaq, vəzifə pillələrində yüksəlmək üçün illərlə əziyyət çəkmək, həmin sahənin bütün incəliklərinə dərindən bələd olmaq lazımdır. Əvvəllər ömrünü elmə, təhsilə həsr edən ziyalılar, alimlər bu sahədə söz sahibi idi. Elə məktəb də onda məktəb idi, təhsil də onda təhsil idi...
Hər şey orda qırıldı ki, şərab zavodunun mühasibi, "pesok satan", bankın kredit şöbəsinin rəisi, marketlər şəbəkəsinin meneceri təhsil sistemində söz sahibi oldu, illərin müəllimlərinə ağıl öyrətdi, islahat aparıram deyərək bütün elm aləmini təcrübə dovşanına döndərdi. Təhsilin “T”-sindən xəbəri olmayanlar bu sistemi məhv etdilər, çökdürdülər. Nə elm qalıb, nə də ki təhsil. Nə məktəb qalıb, nə də müəllim nüfuzu. Ortada çox böyük bir boşluq var və onu on illərlə doldurmaq mümkün olmayacaq.
Nə başınızı ağrıdaq, təhsil sahəsində qocaman elm xadimlərinin, pedaqoqların belə baxıb köks ötürəcəyi sürətli yüksəliş yolu keçənlərdən biri də yuxarıda adını qeyd etdiyim BŞTİ-nin müdir müavini Turanə Məcidlidir. Onun İdarədə sektor müdiri təyin olunmasından müdir müavini olmasına qədər vur-tut 8 ay kifayət elədi. Camaat 8 aya işlədiyi idarənin yolunu-irzini güclə öyrənir, amma nə sirri-xudadırsa xanım Məcidli səkkizcə aya müdirin müavini oldu. Bunun Nobel mükafatı yox, hansısa elmi kəşfi, ixtirası yox, pedaqogikanın əsaslarını bu yaratmayıb. Bəs əcəba bu hansı fitri istedaddır ki, Turanə xanımı belə sürətlə yüksəltdi?
Elə bu suallar içində itib batmışdım ki, qəflətən gözüm medya resurslarında gedən, el arasında dolaşan xəbərlərə sataşdı. Gördüm ki, mən nəinki fil qulağında yatmışıq. Sən demə belə şeylər üçün nə istedad, nə ixtira, nə mixtira gərəkmirmi. Yetər ki, Eldar Əzizov boyda qohumun, Eşqi Bağırov kimi himayədarın, nazir müavini Həsən Həsənli kimi arxa-dayağın olsun. Hələ vaxtilə Ramiz Mehdiyevin əsas kadrlarından olan Məhəbbət Kazımov kimi qayınatadan, Bakı İdman Liseyinin direktoru olan qayınasından, onun can dostu, qəlb sirdaşı olan Məhəbbət Vəliyeva kimi rəfiqədən danışmıram. Onların bir kəlməsi, him-cimi min elmi əsərdən, təcrübədən daha üstündür.
Elm, təcrübə binəva müəllimə, alimə gərəkdir ki, onu da hər 5 ildən bir imtahan edərək müti qula çevirirsən. Belə vəzifələr üçün işarəni meriyadan alırsan, sədasını ağ şəhərdən eşidirsən... Turanə Məcidlinin Bakı İdman Liseyinin direktoru olan qayınanası bu yaxınlarda kələfin ucunu dolaşdırdığı dələduzluq oyunu ilə də yuxarıda tanış olduz.
Bu boyda həngamə qarşısında Turanə Məcidli deyib ki, mən burda niyə varam? Qoymaram qayınanama kimsə güldən ağır söz desin. Deyilənə görə Eşqi Bağırov da, elə nazirin müavini Həsən müəllim də Turanə xanıma qahmar çıxıblar ki, “qorxma, biz səninləyik”.
İndi gördünüzmü adamın tiranlığı üçün necə qohum-əqrabası, arxa-dayağı olmalıdır.
Elə tutaq ki , mənim qaynatam kran sürücüsüdür, deyir ki, gəl səni Ağ şəhərdə kranla 27-ci mərtəbəyə qaldırım sərinlən. İndi nə deyirsiniz, neyniyim, razılaşım.Mənimki də belə gətirib deyə gedib sərinlənməliyəm?...
Nahaqdan işdən çıxarılan məktəb direktorlarının, direktor müavinlərinin Ali məhkəməyə qədər gedir, sonda qalib çıxır. Heç nə olmamış kimi, məsul şəxslərin, baş idarənin insan resuruslarının, o cümlədən heç rəhbərliyin VECİNƏ gəlmir... Adı rüşvət qalmaqalında hallanan direktoru bir məktəbdən çıxarıb digər məktəbə direktor təyin edirlər. Direktor, direktor müavini olmaq istəyənlər öz maşınlarını, evlərini satmalı olurlar. Bakı təhsil idarəsinin müdirinə də bu əzizovçu sərf edir, ilanı Seyidəhməd əli ilə tutur. Vallah komedixanadı, rüşvətxanadı nədi bilmək olmur. Hər nədisə, bu nə elm deyil, nə də ki, təhsil...
İllərini təhsilə həsr etmiş direktorlar deyirlər ki, Turanə Məcidlinin ifrat eqosu, təhqir və təzyiqləri onları təhsildən getməyə məcbur edir. Adam nə hədd bilir, nə də gözü , nəfsi doyur. Onun "tələbləri"nə boyun əyməyən hər kəsi yola salmaqdan zövq alır. Son zamanlar neçə təcrübəli direktor, neçə təcrübəli direktor müavini işdən ayrılmalı olublar.
Təhsilə tələ kimi baxan birisinin tələyə düşəcəyi gün təhsilin xilası günü olacaq. O zaman himayədarları da onu xilas edə bilməyəcək. Həmin gün uzaqda deyil.
Nicat Mahmudov

Son günlər paytaxtda fəaliyyət göstərən bəzi restoranlarda müştərilərin narazlığına səbəb olan yeni hal müşahidə olunur.
 
Belə ki, əvvəllər müştərilərə ödənişsiz təqdim olunan yaş salfetkaların artıq pulla verilməsi halları var.
 
“Cebheinfo.az” xəbər verir ki, restoranlarda çörək, çay və əlavə sifarişlər üçün ayrıca ödəniş tələb olunması artıq geniş yayılmış vəziyyətdir.
 
Lakin indi masada istifadə üçün verilən birdəfəlik yaş salfetkanın da hər ədədinə görə pul alınması müştərilərdə haqlı suallar yaradır. Belə hallardan biri dünən paytaxtın "Fəvvarələr bağı” razisində yerləşən “Saurma 1” restoranında müşahidə olunub.
 
Yeməkdən sonra birdəfəlik nəm salfetka istəyən müştəriyə onun ödənişli olduğu bildirilib və hər salfetka üçün ayrıca məbləğ tələb olunub. Oxşar vəziyyətin Bakıda fəaliyyət göstərən digər restoranlarda da müşahidə edildiyi bildirilir.
 
Əvvəllər müştəri restoranda yaş salfetka istədikdə bunun üçün ayrıca ödəniş tələb olunmurdu, bəzi restoranlar isə həm də reklam xatirinə masaya birdəfəlik yas salfetkalar qoyurdu. İndi isə bəzi restoranlarda bir ədəd salfetka belə pullu xidmətə çevrilib. Müştəri salfetka istəyir, qarşılığında isə ona bunun ödənişli olduğu bildirilir.
 
Açığı, burada düşündürücü məqam salfetkanın qiyməti deyil, xidmətləri heç də ucuz olmayan restoranların belə belə xırda bir şeyə görə ayrıca ödəniş tələb edilməsidir. Bir ədəd birdəfəlik yaş salfetkanın qiyməti nə qədər ola bilər ki, restoran onu da müştərinin hesabına yazmağı vacib hesab ediir?
 
Müştəri onsuz da restoranda yeməyə, içkiyə və xidmətə görə pul ödəyir. İndi isə masada istifadə etdiyi salfetkanın da hesabını ayrıca ödəməli olur. Bu yanaşma isə restoranlarda gələcəkdə daha hansı adi ehtiyacların ayrıca ödənişə çevrilə biləcəyi ilə bağlı təsəvvür yaradır.
 
Ən diqqətçəkən məqam isə odur ki, artıq bəzi restoranlarda sanki ən xırda şeydən belə pul qazanmaq yanaşması formalaşıb. Əvvəllər adi və ödənişsiz hesab olunan salfetka kimi sadə bir vasitə də indi ayrıca ödənişə cəlb edilir.
 
Bu da müştəridə belə bir fikir yaradır ki, restoranlar əlavə gəlir əldə etmək üçün mümkün olan hər bir xırda imkandan istifadə etməyə başlayıblar. Halbuki xidmət sektorunda müştəri məmnuniyyəti yalnız yeməyin keyfiyyəti ilə ölçülmür.
 
Müştərinin restoranda özünü necə hiss etməsi və ona hansı münasibətin göstərilməsi də mühüm əhəmiyyət daşıyır. Bir neçə qəpiklik salfetkanın pulunu almaq müştəri üçün böyük maddi ziyan, restoran üçün isə böyük gəlir gətirməyə bilər.
 
Amma bu cür xırda ödənişlər müştəridə haqlı narazılıq yarada, restoran haqqında mənfi fikir formalaşdıra bilər.
 
Əgər bu yanaşma davam etsə, sabah restoranda istifadə etdiyimiz hər adi şeyə görə ayrıca pul tələb olunması da təəccüblü olmayacaq. Bu gün yaş salfetka, sabah isə başqa bir xırda vasitəyə görə pul tələb olunacaq.