Bakı şəhərində fəaliyyət göstərən Bakı Bərpa Mərkəzi ilə bağlı narazılıq iddiası gündəmə gəlib.

Pasiyent Bağırov Azər Denmedia.az-ın qaynar xəttinə şikayət edərək bildirib ki, mərkəzdə aparılan müalicə prosesi onun səhhətində yaxşılaşma yaratmaq əvəzinə vəziyyətini daha da ağırlaşdırıb.

Onun sözlərinə görə, 28 noyabr 2025-ci il tarixində həkim Kamil Eyvazovun qəbulunda olub. Həmin zaman ona bel nahiyəsində MRT müayinəsi təyin edilib və nəticədə 3 mm ölçüdə yırtıq aşkar olunub. Bundan sonra həkim tərəfindən müalicə və fizioterapiya prosedurları təyin edilib.

Pasiyent bildirir ki, elə həmin klinikanın özündə 14 gün ərzində fizioterapiya prosedurlarına qatılıb. Lakin onun iddiasına görə, müalicə gözlənilən nəticəni verməyib və əksinə, ağrılar daha da güclənib. Hətta təzyiq problemi yarandığını qeyd edən pasiyent bu barədə həkimin köməkçisinə məlumat verdiyini, lakin bunun müalicə ilə əlaqəli ola bilməyəcəyinin deyildiyini bildirir.

Azər Bağırovun sözlərinə görə, müalicə prosesində ona dəfələrlə əməliyyat olunmasının vacibliyi bildirilib. Dekabr ayında yenidən həkim qəbulunda olduqda isə yenidən müalicə təyin olunsa da, vəziyyətində yaxşılaşma olmayıb. Pasiyent iddia edir ki, sonradan ayağından 60 ml maye çəkilib və bunun təhlükəli olmadığını bildirilsə də, bundan sonra ağrılar daha da artıb. Daha sonra həkim tərəfindən diz nahiyəsinin MRT müayinəsi istənilib. MRT nəticələrinə baxdıqdan sonra isə diz oynağının ciddi zədələndiyi bildirilib və ona başqa tibb müəssisəsinə müraciət etməsi tövsiyə olunub.

Pasiyent daha sonra digər həkimlərə müraciət etdiyini və aldığı müalicələr barədə məlumat verdiyini bildirir. Onun sözlərinə görə, həmin həkimlər dizində problem olduğu halda fizioterapiya prosedurlarının tətbiq edilməsinin düzgün olmadığını bildiriblər. Şikayətçinin sözlərinə görə, tətbiq olunan müalicə üsulları onun səhhətinə zərər vurub və nəticədə maddi itkiyə məruz qalıb. Ümumilikdə 450 manat məbləğində vətəndaşa ziyan dəyib və bu ziyanın qarşılanmasını tələb edib.

Məsələ ilə bağlı qarşı tərəfin , Bakı Bərpa Mərkəzinin və həkim Kamil Eyvazovun mövqeyini öynənməyə çalışsaqda bu mümükün olmayıb. Mövzunu diqqətdə saxlayacağıq və qarşı tərəfin də mövqeyini dərc etməyə hazırıq.(Denmedia.az)

“TamStore” supermarketlər şəbəkəsində üzərində heç bir etiket olmayan, adı, tərkibi və istehsal tarixi göstərilməyən kolbasaların satıldığı məlum olub.
Belə ki, “İnstaqram” sosial şəbəkəsində fəaliyyət göstərən “Nə yeyib, nə içirik?” adlı səhifənin hazırladığı videodan aydın olur ki, bu cür kolbasalar digər, markası məlum olan məhsullara bitişik şəkildə, hədiyyə adı ilə satılır.

Olduqca ciddi problemlə bağlı Tribuna.az-a danışan Azad İstehlakçılar İctimai Birliyinin sədri Eyyub Hüseynov bildirib ki, markalanmamış məhsulların satışı qadağandır: “Nazirlər Kabinetinin 94 saylı qərarında, “Yeyinti məhsulları haqqında” və “İstehlakçıların hüquqlarının müdafiəsi haqqında” qanunlarda birmənalı şəkildə göstərilir ki, ölkənin əmtəə bazarında satılan bütün ərzaq malları markalanmalıdır.

Hər bir məhsulun üzərində onun istehsal tarixi, son istifadə müddəti və digər zəruri məlumatlar göstərilməlidir. Qida Təhlükəsizliyi Agentliyi bir il öncə markalanma və məhsul tərkibi ilə bağlı araşdırmalara başlayıb. Lakin bu proses ardıcıl aparılmayıb.

Halbuki bu yoxlamalar davamlı olmalı, məlumatlar mütəmadi şəkildə nəzarətdə saxlanılmalı idi. Əslində, AQTA-nın icazəsi olmadan heç bir məhsul marketlər şəbəkəsinə daxil ola bilməz. Etiketsiz məhsulların marketlərdə satışa çıxarılması qəbuledilməzdir.

Markalanmamış mallar əsasən meyvə-tərəvəz dükanlarında və kiçik marketlərdə satılır.

Böyük supermarketlərdə belə halların aşkarlanması isə yolverilməzdir”.

Tribuna.az

Paytaxtın müxtəlif küçə və prospektlərində hərəkət edən “10-YY-007” dövlət qeydiyyat nişanlı “Bentley” və “10-YY-002” nömrəli “Range Rover” markalı lüks avtomobillər sosial şəbəkələrin gündəminə düşüb.

Avtoşluq və sürət həvəskarlarının paylaşım etdiyi səhifələrdə geniş müzakirə olunan bu görüntülər, izləyicilərin böyük marağına səbəb olub. İnternet resurslarında və sosial platformalarda aparılan araşdırmalar sözügedən bahalı nəqliyyat vasitələrinin sabiq millət vəkili Sabir Rüstəmxanlı və hazırkı deputat Tənzilə Rüstəmxanlının oğlu Cəmil Rüstəmxanlıya məxsus olduğunu üzə çıxarıb.

Peşəkar fəaliyyəti və idman karyerası
Cəmil Rüstəmxanlı əvvəllər Azərbaycan Avtomobil Yolları Dövlət Agentliyinin sədr müavini və qurumun İnvestisiya İdarəsinin rəisi vəzifələrində çalışıb.

Dövlət postu ilə yanaşı, o, həm də idman sahəsində fəaliyyət göstərərək “Azəryol” voleybol klubuna rəhbərlik edib, lakin onun rəhbərliyi dövründə klubun fəaliyyətinin əhəmiyyətli dərəcədə zəiflədiyi bildirilir.
Türkiyəyə köç və biznes fəaliyyəti
Yayılan xəbərlərə görə, Cəmil Rüstəmxanlı rəsmi istefa xəbərlərindən təxminən bir ay öncə, 2022-ci ilin noyabr ayında tutduğu vəzifədən ayrılıb. Məlumata görə, o, işindən ayrıldıqdan sonra Türkiyəyə köçüb və hazırda orada biznes fəaliyyəti ilə məşğul olur.

Xatırladaq ki, “YY” seriyalı nömrə nişanları ölkədə “elit” nömrələr hesab olunur və onların paytaxt küçələrindəki görüntüləri tez-tez müzakirə mövzusuna çevrilir.
PS: Sözügedən məlumatlar həm sosial şəbəkələrdə, həm də müxtəlif xəbər portallarında yer alan iddialara istinadən hazırlanıb. Həm sosial şəbəkələrdə, həm də yerli xəbər saytlarında yayılan məlumatlara görə, sözügedən nəqliyyat vasitələri məhz adıçəkilən şəxsə məxsusdur.(32gun.az)

Bakının Qaradağ rayonu Qızıldaş Qəsəbə Mədəniyyət Mərkəzində "Erkən inkişaf" kursu adı altında fəaliyyət göstərən, lakin əslində qanunsuz bağça kimi işləyən müəssisə bağlandı.

Yurd.Media-nın əldə etdiyi məlumata görə, Hesablama Palatasına daxil olan müraciətlər əsasında aparılan araşdırma nəticəsində müəssisədə ciddi çatışmazlıqların olduğunu təsdiqlənib.

Hesablama Palatasından vətəndaşlara verilən cavab məktubunda isə fəaliyyətindəki nöqsanlara görə mərkəzdəki "Erkən inkişaf" kursunun fəaliyyətinin dayandırıldığı bildirilib.

Xatırladaq ki, daha əvvəl bu məsələ ilə bağlı Mədəniyyət Nazirliyindən Yurd.Media-ya bildirilmişdi ki, "Eliza School” tədris mərkəzi ilə bağlanmış müqaviləyə əsasən Mərkəzdə "Erkən inkişaf” kursu təşkil olunub.

Lakin həmin binada uşaq bağçası təşkil olunması ilə bağlı dərc olunan yazıdan sonra İqtisadiyyat Nazirliyi yanında Əmlak Məsələləri Dövlət Xidmətindən bildirilmişdi ki, Qızıldaş Mədəniyyət Mərkəzi ilə hər hansı idarə və ya tədris mərkəzi arasında rəsmi icarə müqaviləsi mövcud deyil.

Qeyd edək ki, bağçanın fəaliyyəti dayandırılsa da, Mərkəzin bədii rəhbəri Gülnar Abbasovanın hələ də öz direktor vəzifəsini icra etdiyi bildirilir.

Yurd.Media

Naxçıvan Dövlət Universiteti (NDU) növbəti satınalma müqaviləsini reallaşdırıb.

32gun.az xəbər verir ki, Ali təhsil müəssisəsi Aİ-95 markalı benzin yanacağının satın alınması məqsədilə "NP Petrol" Məhdud Məsuliyyətli Cəmiyyəti ilə 8.832 AZN məbləğində müqavilə bağlayıb.
Zahirən sadə görünən bu satınalma, şirkətin idarəçilik tarixinə nəzər saldıqda maraqlı məqamları üzə çıxarır.
Şirkətin Rebrendinq Tarixi:"Nəxşicahan"dan "NP Petrol"a

Dövlət Vergi Xidmətinin reyestr məlumatları göstərir ki, "NP Petrol" MMC uzun illər Naxçıvanın ən böyük holdinqlərindən birinin tərkibində fəaliyyət göstərib. Şirkətin ad dəyişikliyi xronologiyası aşağıdakı kimidir:

01.03.2007: Şirkət fəaliyyətinə "N.P.-2" MMC adı ilə başlayıb.
19.09.2008 – 07.06.2023: Uzun müddət Nəxşicahan Holdinq LTD Şirkətlər Qrupunun "N.P.-2" MMC-si kimi tanınıb.
13.06.2023: Adı dəyişdirilərək "N.P.PETROL" MMC edilib.
14.06.2023 – Hazırda: Şirkət rəsmi olaraq "NP Petrol" MMC adı altında fəaliyyətini davam etdirir.
İdarəçilərin Dəyişməsi və "Talıbov" Soyadlı Rəhbərlər
Şirkətin qanuni təmsilçilərinin siyahısında Naxçıvanın keçmiş rəhbərliyi ilə yaxın qohumluq əlaqələri olduğu bildirilən şəxslərin adları diqqət çəkir. Xüsusilə Vasif Talıbovun hakimiyyəti illərində şirkətin rəhbərliyində bu soyadı daşıyan şəxslər yer alıb:

2007-03-01: Əliyev Nəriman Meydan oğlu (İlk təmsilçi).
2008-09-19: Talıbov Vüqar İlqar oğlu (Vasif Talıbovun yaxın qohumu olduğu bildirilir).
2009-06-30: Həsənov Mehman İman oğlu.
2013-08-29: Əliyev Aslan Heydər oğlu.
2015-07-10: Talıbov Abbas Fərəc oğlu (Vasif Talıbovun yaxın qohumu olduğu bildirilir).
2019-06-28: İmamquliyev Adəm Zellabdın oğlu.
2023-03-17: Həsənov Mehman İman oğlu (Yenidən rəhbərliyə qayıdış).
2023-06-13: Parlar Necmi.
2023-06-20: Əliyev Vaqif Əli oğlu.
2023-08-25: Surkit Aziz Hasan.
2025-04-07 - Hazırda: İmamquliyev Adəm Zellabdın oğlu.
Şirkətin nizamnamə kapitalı da illər ərzində kəskin dəyişikliklərə məruz qalıb. 2009-cu ildə cəmi 5 manat olan kapital, 2023-cü ilin mayında 14.284.000 manata yüksəldilsə də, sonradan yenidən 60.000 manat həcmində stabilləşib.

Unudulmayan "Karantin Skandalı"
NDU və Naxçıvan rəhbərliyi arasındakı əlaqələr təkcə tenderlərlə məhdudlaşmır.

Xatırladaq ki, 2020-ci ilin iyul ayında Naxçıvanda əcnəbi tələbələrə maddi yardım göstərilməsi məqsədilə keçirilən tədbirdə Naxçıvan MR Ali Məclisinin o dövrdəki Sədri Vasif Talıbovun köməkçisi olan oğlu Seymur Talıbov, Əmək və əhalinin sosial müdafiəsi o dövrdəki naziri Nicat Babayev və NDU-nun rektoru Elbrus İsayevin iştirakı ilə karantin qaydaları kobud şəkildə pozulub.

Rəsmi fotolardan aydın görünür ki, Operativ Qərargahın qüvvədə olan qadağalarına rəğmən, 50-dən çox şəxs bir yerə toplaşmış və bir çox iştirakçı tibbi maskadan istifadə etməmişdir. Tədbir zamanı çıxış edən rəsmi şəxslər muxtar respublikada pandemiyaya qarşı görülən qabaqlayıcı tədbirlərdən danışsalar da, reallıqda 5 nəfərdən artıq qruplarda cəmləşmə qadağasına əməl olunmayıb. Beləliklə, cəmiyyətə nümunə olmalı olan vəzifəli şəxslər ölkə üzrə tətbiq edilən xüsusi rejim qaydalarına zidd davranaraq kütləvi yığıncaq təşkil ediblər.

Elbrus İsayev və Seymur Talıbov arasındakı münasibətlər Naxçıvanda "Talıbovlar dövrü"ndə həm rəsmi, həm də qeyri-rəsmi müstəvidə kifayət qədər yaxın hesab olunurdu.

Bu yaxınlığı göstərən əsas məqamlar bunlardır:

Vəzifə iyerarxiyası: Elbrus İsayev 2019-cu ildə rektor təyin edildikdən sonra Seymur Talıbov onun ən yaxın köməkçisi və beynəlxalq əlaqələr üzrə prorektoru kimi fəaliyyət göstərib. Həmin dövrün yerli idarəetmə mühitində rektorun "xan sarayı"nın üzvü olan bir şəxslə yalnız işgüzar deyil, həm də xüsusi loyal münasibətdə olması qaçılmaz idi.

Talıbovlara sədaqət nümayişi: Vasif Talıbovun istefasından dərhal sonra Seymur Talıbovun işdən çıxarılması xəbərləri yayılanda, Elbrus İsayev mediaya açıqlama verərək bu xəbərləri qətiyyətlə təkzib etmiş və Seymur Talıbovu müdafiə etmişdi. O, "Seymur müəllim hazırda iş başındadır" deyərək ailəyə olan sadiqliyini son ana qədər nümayiş etdirməyə çalışmışdı.

Elmi əməkdaşlıq: Hər iki şəxs Naxçıvan Dövlət Universitetinin (NDU) elmi mühitində birlikdə böyüyüblər. Seymur Talıbovun NDU-da sürətli elmi yüksəlişi və doktorluq dərəcəsi alması məhz universitet rəhbərliyinin (o cümlədən Elbrus İsayevin rektorluğu dövründə) tam dəstəyi ilə reallaşıb.

İctimai tədbirlər: Universitetin daxili tədbirlərində və xarici səfərlərdə onlar tez-tez yan-yana görüntülənib, Seymur Talıbov rektordan daha nüfuzlu fiqur kimi qəbul edilib.

Lakin 2022-ci ilin sonundakı siyasi dəyişikliklərdən sonra bu "dostluq" rəsmi olaraq bitdi; Seymur Talıbov vəzifədən uzaqlaşdırıldı, Elbrus İsayev isə ...

Onu da xatırladaq ki, ötən ilin iyununda “NAXÇIVAN DÖVLƏT UNİVERSİTETİ” Publik Hüquqi Şəxs tərəfindən keçirilən təmir-tikinti materiallarının satınalınmasında 70169,89 AZN dəyərindəki tenderində qalib “GÜVƏN LUX” Məhdud Məsuliyyətli Cəmiyyəti olub. Satınalınan avadanlıqlar arasında krantlar (qab yuyan üçün, aftafalı), uzadıcı (traynik 5 metr) və su krantı üçün qoşa şlank yer alırdı. (32gun.az)

Ayaz Musaköylü

Azərbaycan Prezidenti İlham Əliyevin sosial media hesablarında Ramazan bayramı münasibətilə paylaşım edilib.

Paylaşımda deyilir: “Hörmətli həmvətənlər! Sizi mübarək Ramazan bayramı münasibətilə ürəkdən təbrik edir, hamınıza ən xoş arzu və diləklərimi yetirirəm”.

Azərbaycan Respublikasının Birinci vitse-prezidenti Mehriban Əliyeva sosial şəbəkə hesablarında Ramazan bayramı münasibətilə paylaşım edib.

Paylaşımda deyilir: “Bütün Azərbaycan xalqını və dünya müsəlmanlarını müqəddəs Ramazan bayramı münasibətilə təbrik edirəm! Allah etdiyiniz duaları, tutduğunuz orucu qəbul etsin, hər kəsə sağlamlıq və xoşbəxtlik, dünyamıza sülh və əmin-amanlıq bəxş etsin!”.

Bu gün - martın 20-i Azərbaycanda Novruz bayramı qeyd edilir.

Təbiətin, həyatın oyanması Novruzdan başlanır.

Azərbaycan xalqı bunu təntənəli və həm də yeni ilin, yeni günün – Novruzun gəlişinə azı dörd həftə əvvəldən qeyd etməyə başlayır. Belə ki, hər həftənin ikinci günləri Su, Od, Yel və Torpaq çərşənbələri qeyd olunur. Xalq inamına əsasən birinci çərşənbə günü su və su mənbələri təzələnir, hərəkətə gəlir, ikinci çərşənbədə od, üçüncü çərşənbədə yel, nəhayət dördüncü Torpaq çərşənbəsində təbiət oyanır və bu baharın gəlməsindən xəbər verir.

Azərbaycanlılar bayram süfrəsinə ciddi diqqət yetirirlər. Süfrədə adları s hərfindən başlayan yeddi növ xörək olmalıdır. Süfrədə həmçinin sumax, sirkə, süd, səməni, səbzi və s. olmalıdır. Bunlardan başqa masanın üstünə güzgü və şamlar, güzgünün üstünə boyanmış yumurtalar qoyulur. Bunların da öz rəmzi mənası var: şam - od, işıq deməkdir (hansı ki, insanı bədnəzərdən qoruyur), güzgü aydınlıq rəmzidir.

Ənənəyə görə bayramın ilk günü hamı evdə olmalıdır. Xalq arasında deyirlər: "Əgər bayram günü evdə olmasan, yeddi il evdə olmayacaqsan". Keçmişdə bir qayda olaraq, çöl qapıları bağlanmırdı. Təzə ilin birinci günü bütün gecə işıqlar söndürülmür, sönmüş od, işıq bədbəxtlik əlamətidir.

Yaz fəslinin Azərbaycana daxil olması martın 20-si Bakı vaxtı ilə saat 18:45:53-ə təsadüf edəcək. Bu zaman gecə ilə gündüz bərabərləşir və Günəş düz şərqdə doğub, qərbdə batır.

Yaz fəslinin uzunluğu 92 gün 17 saat 38 dəqiqə 28 saniyə olacaq.

Xatırladaq ki, UNESCO Novruz bayramını 2009-cu il sentyabrın 30-da qeyri-maddi mədəni irs siyahısına daxil edib.

“Sədərək” Ticarət Mərkəzinin sahibi Yusif Qədimbəylini aldadan iş adamı həbs edilib.

“Qafqazinfo”nun əldə etdiyi məlumata görə, 41 yaşlı Elnur Səmədov külli miqdarda dələduzluqda təqsirli bilinib.

Bu iş üzrə bir neçə zərərçəkmiş var, E.Səmədovun aldatdığı şəxslərdən biri də Yusif Qədimbəylidir. Təqsirləndirilən şəxs Qədimbəyliyə Azərbaycanın müxtəlif rayonlarında yetişən mövsümi meyvələrin alınıb Rusiyada satılması və əldə olunacaq gəlirin bölünməsinə dair yalan vəd verib.

Qədimbəyli isə təklifi cəlbedici sayaraq ona 489 min manat pul verib. Elnurun pulu alıb iş görə bilməməsindən sonra isə Y.Qədimbəyli ondan şikayət edib.

İstintaq vaxtı cinayət işi üzrə başqa zərərçəkmişlər də müəyyən edilib. O, Qədimbəylidən başqa yalan vədlə ayrı-ayrı şəxslərdən ümumilikdə 723 min manat pul alıb.

E.Səmədov uzun illər müxtəlif formada biznes fəaliyyəti ilə məşğul olub. Zərərçəkmiş şəxsləri də bir-birinin vasitəsilə tanıyıb. O, məhkəmədə özünü təqsirli bilsə də, bəzi epizodlarla razılaşmayıb.

Verilmiş ittiham məhkəmə araşdırması ilə təsdiqini tapıb. Hökmə əsasən, Elnur Səmədova 8 il 6 ay həbs cəzası verilib. Həmçinin Yusif Qədimbəyli və digər zərərçəkmişlərin dəymiş ziyanın ödənilməsi ilə bağlı mülki iddiaları təmin edilib

Suraxanı rayonu Mənzil Kommunal Təsərrüfat Birliyinin rəisi Mais Məmmədov qanunsuz tapşırıqları və fəaliyyəti ilə böyük narazılıq yaradıb. Xüsusən də MKTB əməkdaşlarının canını boğazına yığan rəis Mais Məmmədov barəsində Prezident İlham Əliyevə və Bakı meri Eldar Əzizova şikayət gedir.
AnaXeber.info.az məlumat verir ki, Tik-Tok platformasında videomüraciət yayan Cavid adlı MKTB işçisi Mais Məmmədov və onun briqada rəhbəri barəsində faktlar açıqlayıb. Şikayətçi bildirib ki, 2-ci qrup əlildir, 400 manat əmək haqqı alır və vəzifəsi məişət tullantılarını yığışdırmaqdır. Ancaq Mais Məmmədovun idarəçiliyi həddini aşır və işçilərə qanunsuz əmrlər verilir. Məsələn, elə MKTB işçisi Caviddən tələb olunur ki, 7 hektar ərazisi olan Neftçilər parkının döşəməsini yuyub silsin. O isə deyir ki, nə sağlamlığı buna imkan verir, nə də vəzifəsi bu işi görməkdir. Sadəcə, məişət tullantılarını yığmaq borcu var. Çıxışında şikayətçi deyib ki, Suraxanı baxımsız vəziyyətdədir, MKTB rəisi isə qanunsuz əməlləri ilə məşğuldur.
Qeyd edək ki, ümumiyyətlə,
Suraxanını xarabalığa çevirən MKTB rəisi Mais Məmmədovun fəaliyyəti kütləvi narazılıq yaradıb. Suraxanı sakinləri bildirirlər ki, Yeni Günəşli və digər ərazilər tör-töküntü, səliqəsiz, bərbad vəziyyətdədir. Mais Məmmədovu isə yalnız gəlir və biznesi maraqlandırır. Bu da Baş Prokurorluq yanında Korrupsiya ilə Mübarizə Baş İdarəsinin Suraxanı MKTB-də araşdırmalar aparmasını zəruri edir. Çünki bir MKTB rəisi postu nə qədər gəlirlidir ki, Mais Məmmədovu oliqarxa çevirib. Onun Yeni Günəşli ərazisində "Neo servis" və başqa avtomobil satışı mərkəzi, o cümlədən iaşə obyektləri, maşın kolleksiyası var.
tutduğu vəzifədən istifadə edərək rayonun ayrı-ayrı qəsəbələrində biznes obyektləri tikdirib.
Mətbuatda yayılan xəbərlərə görə, ona aid Yeni Günəşli qəsəbəsində yerləşən «Qrand» şadlıq sarayını, Şabran rayonundakı dəvə fermasını, eləcə də digər ticarət obyektlərini göstərmək olar. Adıçəkilən məmur ölkə qanunlarının əksinə iş tutur».
Maraqlıdır, Mais Məmmədov MKTB rəisi maaşı ilə bu biznesə necə sahib olub? O baxımdan hüquq-mühafizə orqanlarının yoxlamaları zəruridir. Necə ki "qara maskalı"lar icra başçılarının kabinetinə gələrək" onlara "sürpriz" edirlər, eynilə Suraxanı rayon MKTB rəisinin kabinetində də oxşar mənzərəyə zərurət yarana bilər.
Yerli sakinlər də deyirlər ki, Mais Məmmədovdan şikayətçidirlər. Hazırda rayonda səliqə-sahman yox, zibil yeşikləri tapılmır, amma abadlığa ayrılan vəsait qəhətə çıxır.
Yada salaq ki, Suraxanı MKTB-yə 74, 62, 63, 68, 103, 104 və 105 saylı MKİS-lər daxildir. Birliyin rəisi Mais Məmmədov isə ona tapşırılan işlərin öhdəsindən gələ bilmir. Birliyin tabeliyində olan mənzil-kommunal istismar sahələrinin rəisləri MKTB rəhbərinə hər ay tələb olunan səviyyədə «qulluq» edirlər. Suraxanı rayonu ərazisində heç kim Mais Məmmədovun razılığı olmadan eyvan artıra, dama su çəni qoya, yaxud mənzilinin daxilində əlavə dəyişiklik edə bilməz. «Jek» rəisləri hər gün cavabdeh olduqları ərazilərə çıxıb müşahidə aparırlar. Belə halla qarşılaşan kimi isə Mais müəllimə məlumat verirlər. Birlik rəisi özünə yaxın adamları həmin şəxslərin yanına göndərib görülən işin qarşılığında nəysə verməli olduqlarını bildirirlər. Bununla razılaşmayan şəxslərin iş görməsinə qətiyyən icazə verilmir.
Eyni zamanda, Suraxanı rayon Mənzil-Kommunal Təsərrüfatı Birliyinin nəzarətində olan ərazilərdə anti-sanitariya baş alıb gedir. Qurumun balansında kifayət qədər texnikanın olmasına baxmayaraq, rayonun bir sıra qəsəbələri zibillik içində itib-batır. «Jek»lərdə əməlli-başlı özbaşınalıq hökm sürür. Belə ki, rəislər vətəndaşlara lazım olan arayışları hansısa maraqlarının qarşılığında verirlər.
Əlavə edək ki, Mais Məmmədov artıq 30 ilə yaxındır sözügedən vəzifənin başındadır. Bəs onu keçmiş və indiki icra başçısı üçün vacib edən hansı səbəblərdir? - Sual açıq qalır, amma adı çəkilən tərəflərin mövqeyini işıqlandırmağa hazırıq.

Anaxeberinfo.az
Azər Talıbov