Azərbaycanın təhsil sistemində STEAM layihəsi ən böyük büdcə ayırmalarına malik olan istiqamətlərdən birinə çevrilib. Layihə çərçivəsində məktəblər və STEAM mərkəzləri müxtəlif avadanlıqlarla təmin edilir. Şübhəsiz ki, layihənin maliyyə təminatı da var. Bu məqsədlə də dövlət büdcəsindən vəsait ayrılır və bu vəsait dövlət satınalmaları vasitəsilə xərclənir.
Lakin dövlət satınalmaları portalının (satinalma.gov.az) rəsmi məlumatları və maliyyə zənciri üzrə aparılan təhlillər göstərir ki, STEAM avadanlıqlarının satınalınması prosesində büdcə vəsaitlərinin mənimsənilməsinə söykənən, ciddi suallar yaradan çoxqatlı mexanizm formalaşdırılıb.
Tenderin görünən qalibləri, əslində…

Bu araşdırmada əsas məqsəd sadəcə “STEAM üçün nə qədər pul xərclənib?” sualına cavab tapmaq deyil. Öncə bu sualllara cavab tapmalıyıq – şirkətlər Elm və Təhsil Nazirliyinin tenderlərini necə qazanıb, avadanlıqlar hansı qiymətlərlə alınıb, bu prosesdə eyni şəxslərin və ya əlaqəli şirkətlərin təkrar-təkrar qarşıya çıxmasının səbəbi nədir?
Topladığım məlumatlara əsasən, ETN-də mənimsəmə və korrupsiya zənciri olduğu ciddi şübhələr yaradan prosesin mərkəzində dayanan şəxs “İSTEAM” MMC-nin rəhbəri Nihad Hənifəyevdir. N.Hənifəyev isə Elm və Təhsil naziri Emin Əmrullayevin qaynıdır.
“İSTEAM MMC” vasitəsilə xərclənən külli miqdarda vəsaitlərin nazir E.Əmrullayevin ailə çevrəsinə və yaxınlarına yönəldilməsi ilə bağlı ciddi suallar yaranır.
Aşağıdakı (cədvəldəki) göstəricilərdən aydın olur ki, təkcə 2024-cü ilin noyabr ayında “JBA GROUP” MMC ilə ümumi məbləği 11,5 milyon manatdan çox olan iki böyük müqavilə bağlanıb.

2025-ci ilin avqust ayında isə bu “missiya”nı 9,95 milyon manat dəyərində tenderlə “VİVA MEDICAL GROUP” MMC təhvil alıb.
Maraqlıdır ki, bu tenderlərin görünən qalibləri dəyişsə də, gətirilən bütün avadanlıqların yeganə daxili təchizatçısı dəyişməz olaraq nazir E.Əmrullayevin qaynı Nihad Hənifəyevin nəzarətindəki “İSTEAM” MMC olaraq qalır.
Diqqət çəkən əsas məqam odur ki, “İSTEAM” MMC dövlət tenderlərində hər dəfə birbaşa qalib kimi görünmür. Bunun əvəzində tenderin qalibi başqa şirkət olur, həmin şirkət isə avadanlığı ölkə daxilində “İSTEAM” MMC-dən əldə edir. Nəticədə tender sənədində bir şirkətin adı, təchizat zəncirində isə başqa şirkətin adı görünür.
N.Hənifəyevin idarə elədiyi bu “mürəkkəb sxem” malların bilavsaitə ilkin xarici istehsalçıdan alınıb sonuncu dövlət büdcəsi hesabına təhvil verilməsinədək bir neçə pilləli qapalı zəncir üzərində qurulub.
Məlumata görə, nazir E.Əmrullayev formalaşdırdığı sistemi bu şəxslərin vasitəsilə idarə edir:- Nazirin qaynı Nihad Hənifəyev – büdcə vəsaitlərinin mənimsənilməsini təşkil edən əsas yönəldici şəxs. O, xarici təchizatçılardan STEAM avadanlıqlarının tək rəsmi importoru olan “İSTEAM” MMC-nin faktiki mülkiyyətçisidir. Əvvəllər “Kaspi” liseyləri şəbəkəsində çalışıb və “Kaspi” kurslarının/proqramlarının (filiallarının) birinin rəhbəri olub. Hal-hazırda N.Hənifəyevin həyat yoldaşı “Kaspi” liseyləri şəbəkəsində bağça müdirəsidir.
– Elnur Qəzənfər oğlu Əliyev – Azərbaycan Respublikasının Təhsil İnstitutunun (ARTİ) v.i.e. direktoru. O, nazir E.Əmrullayevin müşaviri və onun uzun illərdən bəri əsas “silahdaşı” kimi tanınır. Əvəllər “Kaspi” liseylər qrupunun keçmiş baş direktoru vəzifəsində çalışıb. Məlumata görə, dövlət qurumlarında vəzifəyə keçdikdən sonra “Kaspi”dəki fəaliyyətlərin idarə olunmasını qardaşı Elşən Əliyevə (yaxın dövrə qədər həmin liseylərdən birinin direktoru) təhvil verib.
– Tural Ayvazlı – Nazir Emin Əmrullayevin müşaviri. O, maliyyə məsələlərinə nəzarət edir və nazirin ailə çevrəsinə daxil olan əsas şəxslərdən biri kimi qəbul edilir. T.Ayvazlının bacısı Xəyalə Əhmədzadə də Bakı Şəhər Təhsil İdarəsinin müdir müavinidir.
– Nazirin sinif yoldaşı Valeh Mirzəliyev – Sifarişçi qurum olan Elm və Təhsil Nazirliyinin Ərazi Tikinti Təchizat İdarəsinin rəisi vəzifəsində çalışır.
– Nazirin sinif yoldaşı Zamiq Məmmədov – Qrup daxilində satınalma və inzibati zəncirin digər idarəedici halqasının mərkəzində dayanan şəxsdir.
“VİVA” MMC və “JBA GROUP” MMC Dövlət satınalmalarında formal olaraq “açıq tender qalibi” kimi çıxış edən, əslində isə “İSTEAM” MMC-nin (Nihad Hənifəyevin) ölkə daxilindəki tək alıcılarıdır.
Bəs xaricdən alınan məhsulun üzərində qurulan qiymətlər zəncirvari şəkildə necə artırılır?
Qeyd etdiyimiz kimi, dövlət satınalmaları haqqında qanunvericiliyin tələblərini pərdələmək üçün “İSTEAM” MMC tenderlərdə birbaşa qalib kimi göstərilmir. Bunun əvəzində, əvvəlki illərdə “JBA GROUP” MMC, sonrakı dövrdə isə “VİVA MEDICAL GROUP” MMC dövlət tenderlərinin “daimi qalibi” edilir. Bu şirkətlər tenderdə təklif etdikləri avadanlıqları ölkə daxilində yalnız N.Hənifəyevin “İSTEAM” MMC-sindən alırlar.
Beləliklə, mallar xaricdən real maya dəyərinə alındıqdan sonra N.Hənifəyevin şirkətində süni şəkildə dəfələrlə baha qiymətə sənədləşdirilir və vasitəçi şirkətlər üzərindən dövlət büdcəsinə satılır. Əgər məhsul xarici istehsalçıdan müəyyən qiymətə alınırsa, daha sonra ölkə daxilində bir və ya bir neçə şirkət arasında hərəkət edir və sonda dövlət büdcəsi hesabına daha yüksək qiymətlə satılırsa, bu zaman hər mərhələnin iqtisadi əsaslandırılması ortaya qoyulmalıdır. Burada söhbət sadəcə şirkətlərin mənfəət əldə etməsindən getmir. Söhbət dövlət büdcəsindən ödənilən milyonlarla manatın hansı qiymət formalaşması mexanizmi ilə son satıcıya çatmasından gedir.
Araşdırmalar göstərir ki, avadanlıqların xarici ölkələrdəki real satış qiyməti ilə dövlətə satılan qiyməti arasındakı böyük fərq var. Şişirdilmiş qiymətlərlə dövlət büdcəsindən şirkətlərə köçürülən milyonlarla manat vəsait “İSTEAM” MMC hesablarına köçürülür, bəs bundan sonra pulların taleyi necə olur?
Nazir öz qaynının şirkətinin bazarda mütləq hegemonluğunu təmin etməklə digər azad sahibkarları STEAM təchizatı bazarından tamamilə sıxışdırıb çıxarır.
Aparılan araşdırmalarda aydın olur ki, nazir E.Əmrullayev və onun sinif yoldaşları, tələbə yoldaşları, əsgər yoldaşları, qohumları bütün irihəcmli dövlət satınalmaları üzrə proseslərə, eləcə də birmənbə hesabına maliyyələşən digər layihələrə faktiki nəzarəti tam ələ keçirib.
STEAM layihəsi isə Azərbaycan təhsilinin texnoloji gələcəyi üçün nəzərdə tutulmuş böyük dövlət layihəsidir. Lakin bu layihəyə ayrılan milyonlarla manatın necə xərclənməsi də ən azı layihənin özü qədər vacib məsələdir.
Nə üçün müxtəlif illərdə tenderlərin qalibləri dəyişsə də, STEAM avadanlıqlarının daxili təchizat zəncirində eyni şirkət meydana çıxır? Nə üçün həmin şirkətin rəhbəri nazirinin yaxın qohumudur? Avadanlıqlar xaricdən hansı qiymətə alınır və dövlətə hansı qiymətə satılır? Dövlət büdcəsindən ayrılan milyonlarla manatın son dayanacağı haradır?
Bütün bu sualalrın cavabı tapılmalıdır.

Cumhuriyyet.az
Samir Feyruzov

Hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...
Beyləqan Rayon İcra Hakimiyyəti Maşın və avadanlıqların, eləcə də, Dəftərxana və təsərrüfat mallarının alınması ilə bağlı müqavilələr imzalayıb. 02.09.2026-cı il tarixdə dövlət satınalmalarının vahid internet portalında yerləşdirilmiş məlumata görə, bu məqsədlə birinci epizodla bağlı "APO RM GROUP" MMC ilə 7998 manatlıq, ikinci epizodla bağlı isə "ALBARO" MMC ilə 5200 manatlıq razılaşmalar rəsmiləşib.
Hər iki müqavilədə bir ortaq nöqtə diqqət çəkir: Bütün epizodlarda tərəflər arasında satınalma proseduru dövlət satınalmalarının vahid internet portalında keçirilməmişdir (elektron satınalma deyil). Hər iki satınalma bir mənbədən satınalma metodunun tətbiqi ilə həyata keçirilmiş və satınalma barədə elan heç bir mətbuat orqanında dərc edilməmişdir(?)
Elə bu faktor məlum səbəblərdən ciddi suallar doğurur, əsaslı şübhələrə rəvac verir...Bu istiqamətdə oxucularımızın “Yenixeberorg”a ötürdüyü məlumata görə, tərəflər arasındakı bu əməkdaşlığın özünəməxsus səbəbləri var... Yuxarıda qeyd etdiyimiz kimi, Beyləqan Rayon İcra Hakimiyyəti müvafiq satınalma müsabiqələri elan etmədən, bir mənbədən olmaqla sadaladığımız şirkətlərlə müqavilələr bağlayıb.
Bu sözün bəlli mənasında maraq doğuran faktor olmaqla bərabər, məlum qanunla qadağan da deyil. Amma,...müvafiq əsaslandırmalarla!
Bu arada qeyd edək ki, Azərbaycan Respublikasının “Dövlət satınalmaları haqqında” Qanunun 15.1 maddəsində göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız məlum portal vasitəsilə həyata keçirilir.
Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur: satınalma predmeti yalnız hər hansı konkret təchizatçıda olduqda; satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda; təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə; satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.
Göründüyü kimi, "Dövlət satınalmaları haqqında" Qanunda bir mənbədən satınalamaları zəruri edən şərtlər aydın şəkildə sadalanır...
İndi isə sual olunur: Beyləqan Rayon İcra Hakimiyyətinin Maşın və avadanlıqların, eləcə də, Dəftərxana və təsərrüfat mallarının alınması ilə bağlı sadaladığımız şirkətlərlə birbaşa müqavilə bağlaması hansı səbəblərdən qaynaqlanır???
Yoxsa, Beyləqan Rayon İcra Hakimiyyətini müvafiq Maşın və avadanlıqlarla, eləcə də, Dəftərxana və təsərrüfat malları ilə təmin edə biləcək başqa şirkətlər yoxdur...(?) Baxın, ən aktual və cavablandırılması vacib sual da, məhz budur!
Bu prosesdə dövlətin pulunu xərcləyən tərəf kimi, Beyləqan Rayon İcra Hakimiyyəti tərəfindən hansı məsul şəxslər iştirak edib, rəhbərlik kimə məxsus olub?
Siyahıda yer alan şirkətlər hansı üstünlükləri ilə və hansı meyarlarla seçilib? Və s...
***
Digər vacib bir məqam Beyləqan Rayon İcra Hakimiyyətinin Maşın və avadanlıqlar aldığı (Yaxud alacağı: Red.) "APO RM GROUP" MMC ilə bağlıdır. İnternet üzərindən apardığımız araşdırmalarla məlum oldu ki, bu şirkət müxtəlif dizaynlı hovuzların tikintisi üzrə ixtisaslaşıb. Təsəvvür edirsiniz hovuz tikən şirkət və maşın və avadanlıqlar...(?)
"ALBARO" MMC ilə bağlı isə internet üzərində geyim modelləri ilə rastlaşmaq mümkündür...(?)
***
Biz “Yenixeberorg” olaraq, bu və digər şübhələrə aydınlıq gətirmək məqsədi ilə Beyləqan Rayon İcra Hakimiyyətinin başçısı cənab Əziz Əzizova 6 sualdan ibarət online rəsmi sorğu ünvanladıq...Təəssüf ki, sorğumuz hələ də cavabsız olaraq qalır(?)
Haşiyə: Əziz Əzizov icra hakimiyyəti strukturunda təcrübəli kadr kimi tanınır... Xatırladaq ki, cənab Əzizov 8 avqust 2006- 2 fevral 2018-ci illərdə Cəlilabad rayonuna, 2 fevral 2018-12 noyabr 2019-cu illərdə Yasamal rayonuna, 12 noyabr 2019-28 iyun 2024-cü illərdə Suraxanı rayonuna rəhbərlik edib. 8 iyul 2024-cü ildən isə Beyləqan Rayon İcra Hakimiyyətinin başçısıdır...
Və son əvəzi...
Əvvəla, hörmətli icra başçısına xatırlatmaqda fayda var ki, hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...
Dövlət büdcəsi nə kiminsə dədə-babasından qalma xəzinə deyil, nə də hansısa yardım fondu deyil ki, ölkə ictimaiyyəti və aidiyyatı dövlət orqanları tərəfindən bir o qədər də, maraqlı görünməsin... Dövlətin pulun heç bir məmur, səlahiyyət sahibi könülü istədiyi kimi xərcləyə bilməz, xərcləməməlidir də!
Eyni zamanda məlum funksiyaların icraçısı kimi medianın sorğusu da cavablandırılmalıdır. Təkcə ona görə yox ki, hansısa yanlış informasiya tirajlana bilər, həm də ona görə ki, bu hər bir səlahiyyət sahibinin vəzifə borcudur. Gec də olsa bunu bilmək lazımdır...
Həm də onu bilmək lazımdır ki, heç bir vəzifə sahibi bir gün “qapısının döyülmədən açılacağından” sığortalanmayıb.(Yenixeberorg.biz)

Xəzər rayon Mənzil-Kommunal Təsərrüfatı Birliyi tərəfindən müxtəlif təyinatlı malların satın alınması üzrə 01.04.2026-cı ildə başlanılmış açıq tenderə yekun vurulub. Müsabiqənin qalibi “EVEREST-2022” Məhdud Məsuliyyətli Cəmiyyəti seçilib və tərfələr arasında 601.370,48 manat dəyərində satınalma müqaviləsinin bağlanılması planlaşdırılır. Məlumat satınaılmaların portalında 09.10.2026-cı ildə dərc edilib.

Şərtlər toplusuna görə “EVEREST-2022” MMC Kommunal Təsərrüfatı Birliyini 95 ədəd metal 1000 litrlik yaşıl rəngli, 40 ədəd metal 1000 litrlik narıncı rəngli zibil konteynerləri, 30 ədəd arxalı oturacaq, 5.000 cüt beş barmaq,sintetik parça, üzəri boyalı əlcək, 8.000 ədəd 72% (100qr) təsərrüfat sabunu, 800 kq yağlı boya, hər birindən 60 ədəd sapsız bel ucu iti və çalov, 140 ədəd bel sapı, 120 ədəd konteyner təkəri, 200 kq zibil torbası, 120 ədəd ixtisaslaşdırılmış araba, 340 cüt botinka qış üçün, 340 cüt botinka yay üçün, 340 dəst fəhlə paltarı, 340 dəst fəhlə paltarı qış üçün, 340 ədəd işarə jileti yay üçün, 340 ədəd işarə jileti qış üçün, 150 ədə kepka, 150 ədəd ləçək, 260 ədəd xalat, 340 ədəd gödəkçə, 56 ədəd avtoşin KAMAZ üçün, 24 ədəd avtoşin ZİL üçün və digər bu kimi təsərrüfat malları və digər nəqliyyat vasitələri üçün ehtiyyat hissələri ilə təchiz etməlidir.

Qeyd edək ki, Xəzər rayon Mənzil-Kommunal Təsərrüfatı Birliyi 12.12.2025-ci ildə, yəni yuxarıda bəhs edilən tenderdən doqquz ay əvvəl, müxtəlif təyinatlı malların alınması üzrə “TİKİNTİ-TƏMİR-TƏCHİZAT-BƏRPA” Qapalı Səhmdar Cəmiyyəti ilə 359.762,53 manat məbləğində müqavilə bağlayıb.

Göründüyü kimi, Xəzər rayon Mənzil-Kommunal Təsərrüfatı Birliyi son 9 ayda müxtəlif təyinatlı malların satın alınması üzrə ümumi dəyəri 961 132 manat olan 2 satınalma müqaviləsi bağlayıb.

Şərtlər toplusuna görə qalib “TİKİNTİ-TƏMİR-TƏCHİZAT-BƏRPA” QSC Kommunal Təsərrüfatı Birliyini 40 ədəd fəhlə arabası (9 ay sonra 30 ədəd), 1.000 kq yağlı boya, 6.200 ədəd 72% (100qr) təsərrüfat sabunu (9 ay sonra 8.000 ədəd), 250 ədəd konteyner təkəri, 10 ədəd karobka filtr, 20 ədəd dizel filtri, 20 ədəd hava filtri, 20 ədəd yağ filtri və digər bu kimi eyni adlı təsərrüfat malları ilə təchiz edib.

Bundan əlavə Xəzər rayon Mənzil-Kommunal Təsərrüfatı Birliyi 02.11.2022-ci ildə əməkdaşların stifadəsi üçün nəzərdə tutulan bir sıra malların və lavazimatların satın alınması üzrə “TİKİNTİ-TƏMİR-TƏCHİZAT-BƏRPA” QSC ilə 289.745,46 manat dəyərində müqavilə bağlayıb.

Şərtlər toplusuna görə QSC Kommunal Təsərrüfatı Birliyini 200 ədəd fəhlə arabası, hər birindən 650 ədəd olmaqla vedrə dəmir 10 lt, bel sapı, bel çalov böyük, bel çalov kiçik, bel çalov ucu iti, xəkəndaz, 62.000 ədəd süpürgə həyət üçün və digər bu kimi eyni adlı təsərrüfat malları ilə təchiz edib.

Göründüyü kimi Xəzər rayon Mənzil-Kommunal Təsərrüfatı Birliyi 2022-ci ilin noyabrından bu yana əməkdaşların xidməti istifadəsi üçün nəzərdə tutulan malların satınalınması üzrə ümumi dəyəri 1 250 877 manat dəyərində 3 satınalma müqaviləsi bağlayıb. Birliyin 2023-2024-cü illərdə satın aldığı təsərrüfat malları barədə satınalmaların portalına məlumat yerləşdirilməyib. Maraqlıdır, Xəzər rayon Kommunal Təsərrüfatı Birliyi bir milyon iki yüz əlli min manat dövlət vəsitinə aldığı bu təsərrüfat malları harada işlənib?

Göründüyü kimi Xəzər rayon Mənzil-Kommunal Təsərrüfatı Birliyi son dörd ildə konkret sayı bəlli olmayan əməkdaşlarının xidməti istifadəsi üçün ləvazimatlara, geyimə milyon manatdan yuxarı dövlət vəsaiti xərcləyib. Hələ Xəzər rayon Mənzil Kommunal Təsərrüfat Birliyinin son illər nəqliyyat və xüsusi texnikaların satınalınmasına, o cümlədən onlara ehtiyyat hissələrinin alınması məqsədi ilə xərclədiyi milyonlarla mant dövlət vəsaitini bura qatmamışıq.

Qeyd edək ki, Xəzər rayon Mənzil-Kommunal Təsərrüfatı Birliyinin aldığı bu təsərrüfat mallarının istifadə müddətinin nə qədər olması barədə konkret bir fikir söyləmək çətindir. Amma bu təsərrüfüt mallarının böyük hissəsinin əməkdaşların xidməti istifadəsinə heç verilmədiyini söyləmək olar. Çünki Xəzər rayon Mənzil-Kommunal Təsərrüfatı Birliyinin işçilərinin sayı məlum deyil. Belə olan halda hər il yüzminlərlə manata alınan geyim dəstləridən kimlərin istifadə etdiyi də, təsərrüfat mallarının harada istifadı olunduğu da bəlli deyil. Odur ki, Birliyin milyon manatdan çox dövlət vəsitinə aldığığ təsərrüfat mallarını həm də kimlərsə “yeyir”.

Qeyd edək ki, Qeyd edək ki, Xəzər rayon Mənzil-Kommunal Təsərrüfatı Birliyinin rəisi Hikmət İslamovdur. O, uzun illər Xəzər rayon Mənzil Kommunal Təsərrüfatı Birliyinin rəisi olmuş Böyükağa İslamovun oğludur.

Bu gün Bakı şəhər İcra Hakimiyyətinin yaydığı məlumata görə Xəzər rayonu ərazisində payız-qış mövsümünə hazırlıq, abadlıq və yaşıllaşdırma işlərinin təşkili, küçə və prospektlərdə mövcud nöqsanların aradan qaldırılmasının müzakirəsinə həsr olunmuş geniş müşavirə keçirilib.

Xəzər rayon İcra Hakimiyyətində keçirilən müşavirədə rayonun kommunal-təsərrüfat qurumlarının rəhbərləri, qəsəbə, inzibati ərazi dairələri üzrə nümayəndələr və bələdiyyə sədrləri iştirak ediblər. Rayon İcra Hakimiyyətinin başçısı Elşən Salahov qeyd olunan sahələrdə görülən işləri, eləcə də rayonun ümumi memarlıq və estetik görünüşünə xələl gətirən, qəzalı tikililərin vəziyyətini təhlil edib, mövcud nöqsanlar barədə danışaraq aidiyyəti rəhbər şəxslərə müvafiq tapşırıqlar verib.

Yol verilən nöqsanlara və ərazilərə nəzarətin zəif təmin edildiyinə görə Xəzər rayon İcra Hakimiyyəti başçısının Qala və Zirə qəsəbələrinin inzibati ərazi dairələri üzrə nümayəndələrinə töhmət verilib, Buzovna və Türkan qəsəbələrinin inzibati ərazi dairələri üzrə nümayəndələrinə isə xəbərdarlıq edilib.

Aktualinfo.net

P.S. Xəzər rayon İcra Hakimiyyətinin başçısı Elşən Salahovun töhmət verdiyi, cəzalandırdığı icra nümayəndələri günahsız qurbanlardır. Yuxarıda qeyd etdiyimiz məlumatlardan da göründüyü kimi milyonlarla manat dövlət vəsaiti Xəzər rayon Mənzil-Kommunal Təsərrüfatı Birliyinin xətti ilə talan edilir. Əsl cəzalandırılmalı olan şəxs də, məhz birliyin rəisi Hikmət İslamov olmalı idi.

Azərbaycanın tanınmış kulinar-texnoloqu Mübariz Vəliyev “Azdad” şirkətinə məxsus “Sport” peçenyelərin tərkibində zərərli əlavələrin olduğunu bildirib.

Tribuna.az xəbər verir ki, M.Vəliyevin sözlərinə görə, özü də əvvəllər bu peçenyedən istifadə edib:

“Tərkibində günəbaxan yağın və palma yağının qarışığından istifadə olunub. Həmçinin qida əlavələri olan E503, E500 və E223-dən istifadə olunub. Bundan əlavə qida aromatı da istifadə olunub”.

Yazıda barəsində danışılan peçenyenin hazırlandığı müəssisənin mövqeyini dərc etməyə hazırıq.

Azərbaycan Prezidenti İlham Əliyevin oktyabrın 12-də Kambocanın Baş naziri Hun Manet ilə məhdud tərkibdə görüşü olub.

Bu barədə "Report"un əməkdaşı xəbər verib.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Bakı şəhər İdarəsi “Azəriqaz” İstehsalat Birliyinə xəbərdarlıq edib.
Yurd.Media xəbər verir ki, bu barədə Dövlət Əmək Müfəttişliyi Xidmətinin Bakı şəhər İdarəsinin vətəndaş Daşqın Abbasova ünvanladığı rəsmi məktubda bildirilib.
Məktubda qeyd olunub ki, vətəndaşın “Azəriqaz” İstehsalat Birliyində əmək hüquqlarının pozulması ilə bağlı 14 avqust 2026-cı il tarixli müraciətinə baxılıb.
Araşdırma zamanı müəyyən edilib ki, vətəndaşla “Azəriqaz” İstehsalat Birliyi arasında 6 oktyabr 2021-ci il tarixində bağlanmış əmək müqaviləsi qüvvədə olub.
Müraciətdə göstərilən halların araşdırılması məqsədilə “Azəriqaz” İstehsalat Birliyinə müvafiq məktubla müraciət edilib və vətəndaşa aid sənədlərin Azərbaycan Respublikası Əmək Məcəlləsinin 15-ci maddəsinin 2-ci hissəsinin tələblərinə uyğun təqdim olunması tələb edilib.
Rəsmi məktubda bildirilib ki, müəssisə tərəfindən tələb olunan sənədlərin təqdim edilməməsi, yaxud tam, düzgün və vaxtında təqdim olunmaması Azərbaycan Respublikası İnzibati Xətalar Məcəlləsinin 539.3-cü maddəsinə uyğun olaraq inzibati məsuliyyət yaradır.
Dövlət Əmək Müfəttişliyi Xidmətinin Bakı şəhər İdarəsi vətəndaşa ünvanladığı cavabda “Azəriqaz” İstehsalat Birliyi tərəfindən sənədlərin təqdim edilməməsi ilə bağlı inzibati xəta tərkibinin yarandığını və qurum barəsində inzibati xəta haqqında iş üzrə icraata başlanıldığını bildirib.
Məktubda həmçinin qeyd olunub ki, işin nəticəsi barədə vətəndaşa əlavə məlumat veriləcək.
Qeyd edək ki, vətəndaş müraciətdə göstərilən məsələlərlə bağlı məhkəməyə müraciət etmək hüququna malikdir.

Azərbaycanda kolleclərin fəaliyyətində dəyişikliklərin edilməsi məsələsi gündəmə gəlib. Belə ki, bəzi kolleclərin profilinə uyğun universitetlərin tərkibinə daxil edilməsi, ehtiyac olmayan digər kolleclərin isə ləğvi nəzərdə tutulur.
Bu qərar hansı zərurətdən yarandı? Tələbələrin taleyi necə olacaq?
Globalinfo.az-a danışan deputat Razi Nurullayev deyib ki, kolleclərin yenidən təşkili məsələsinə yalnız təhsil müəssisələrinin birləşdirilməsi və ya ləğvi kimi yanaşmaq düzgün deyil:
“Burada əsas məqsəd orta ixtisas təhsilinin keyfiyyətini yüksəltmək, mütəxəssis hazırlığını əmək bazarının tələblərinə uyğunlaşdırmaq və mövcud təhsil resurslarından daha səmərəli istifadə etməkdir. Eyni profilli kollecin müvafiq universitetin tərkibində fəaliyyət göstərməsi tədris proqramlarının uyğunlaşdırılmasına, laboratoriya və maddi-texniki bazadan birgə istifadəyə, tələbələrin nəzəri biliklərlə yanaşı praktik bacarıqlarının inkişafına şərait yarada bilər. Digər tərəfdən, bəzi kolleclərdə tələbə sayının azalması, ixtisaslara tələbatın dəyişməsi və kadr hazırlığının müasir ehtiyaclarla uzlaşması məsələləri də bu cür struktur dəyişikliklərini gündəmə gətirən amillər sırasındadır”.
Deputat bildirib ki, bu prosesdə əsas məsələlərdən biri tələbələrin gələcəyidir:
“İnanıram ki, heç bir tələbə kənarda qalmayacaq və onların təhsillərini başa vurmaları üçün müvafiq şərait yaradılacaq. Kolleclərin yenidən təşkili tələbələrin təhsil hüquqlarına xələl gətirməməli, onların indiyədək əldə etdikləri nəticələr və gələcək planları nəzərə alınmalıdır. Eyni zamanda, müəllimlərin əmək hüquqlarının qorunması və bölgələrdə yaşayan gənclərin təhsilə əlçatanlığının təmin edilməsi də diqqətdə saxlanılmalıdır. Əsas məqsəd təhsil sistemini müasirləşdirməklə yanaşı, tələbələrin maraqlarını qorumaq və onların gələcəyə inamını gücləndirməkdir”.

"Cənab Prezidentdən nümunə götürmək bu qədər çətindir?" Bu replikanın müəllifi olan jurnalist Xəyyam Salmanzadə daha sonra aşağıdaki fotonu paylaşaraq yazır:

"4 mart 2020-ci il. Tovuz. Prezident İlham Əliyev onun üçün qoyulmuş xüsusi kreslonun adi stulla əvəz olunmasını tələb edir və bildirir: “Belə şeylərə yol vermək olmaz. Qətiyyən!”
İndi sualım Cəlilabad Rayon İcra Hakimiyyətinin başçısı Rafiq Cəlilovadır.
Cənab Cəlilov, görəsən, bu görüntüləri heç izləməyib, yoxsa izləyib, amma nəticə çıxarmaq istəməyib?
Sizi vəzifəyə təyin edən Prezident özü üçün xüsusi kreslo istəmədiyi halda, siz niyə onun nümunəsindən dərs götürmürsünüz?
Yoxsa kreslo elə əzizdir ki, onu itirmək qorxusu insanı hər yerdə özünü xüsusi hiss etməyə vadar edir?
Bir daha xatırladaq: vəzifə insanı xalqdan üstün etmir. Kreslo müvəqqətidir, hörmət isə davranışla qazanılır!
Cənab Cəlilov, Prezidentdən nümunə götürmək üçün daha nə baş verməlidir?.."(Dia-az)

Özəl təhsil ocağı kimi yüksək qiymətlərlə ad çıxaran "Landau School"un Nərimanov rayonunda yerləşən "City Garden" korpusunda ciddi problemlər baş qaldırıb. 32gun.az-ın əldə etdiyi məlumata görə, jurnalist İlkin Muradova müraciət edən valideynlərdən məktəb rəhbərliyinin məsuliyyətsizliyindən və təqdim olunan bərbat xidmətdən şikayətlənirlər.

Valideynlərin bildirdiyinə görə, təhsil ocağı "yeni korpus tikirik" bəhanəsi ilə təhsil haqqını qaldırıb, üstəlik dərs ili müddətində yemək üçün əlavə 1.000 AZN ödəniş tələb edib. Lakin vədlərə baxmayaraq, məktəbin təmiri vaxtında bitirilməyib, dərs ili gecikdirilərək sentyabrın 28-də başlayıb və gecikən 2 həftənin ödənişi valideynlərə qaytarılmayıb. Bundan əlavə, hazır olmayan idman zalı və aşağı keyfiyyətli, qoxu gələn yeməklər uşaqların ac qalmasına səbəb olur.
Sözügedən problemlərlə bağlı direktor verdiyi vədləri inkar edərək məktəbə baxış keçirməyə belə şərait yaratmır, narazı qalan valideynlərə isə ödənilən vəsaitlər geri qaytarılmır. Yüksək məbləğlər müqabilində biabırçı şərait təklif edən məktəb rəhbərliyinin şikayətlərə qarşı nümayiş etdirdiyi laqeydlik isə "Landau School"un fəaliyyətindəki idarəetmə kəsirlərini bir daha gözlər önünə sərir.


Qeyd edək ki, "LANDAU School" təhsil kompleksinin baş icraçı direktoru Rəşad Tağıyev, baş akademik direktoru və təsisçisi isə Emil Leznikdir. Məktəbin Müşahidə Şurasının üzvləri sırasına isə Emil Leznik, Rahul D'Mello və Timur Leznik daxildir.


Xatırladaq ki, 2021-ci ildə “Landau School” özəl məktəbinin "Bayıl" korpusunun həyətində valideynlərdən biri ilə məktəbin təhlükəsizlik əməkdaşı arasında dava baş verib. Yaşanan mübahisə tərəflər arasında fiziki qarşıdurmaya səbəb olub.


Məktəbin qanuni təmsilçisi Timur Leznik, təhsil üzrə direktoru isə Yefim Leznikdir. Həmtəsisçilərdən biri olan Emil Leznik isə qardaşı Timur Lezniklə birgə “Leznik and Company” MMC-nin də təsisçisidir.

Pakistan Baş naziri Məhəmməd Şahbaz Şərif Azərbaycan Prezidenti İlham Əliyevə zəng edib.

Bu barədə Prezidentin Mətbuat Xidmətindən məlumat verilib.

Telefon danışığı zamanı Azərbaycan ilə Pakistan arasında dostluq, qardaşlıq və strateji tərəfdaşlıq münasibətlərinin inkişafından məmnunluq ifadə olunub, yüksək səviyyədə mütəmadi görüşlərin və məsləhətləşmələrin ikitərəfli əlaqələrin daha da möhkəmlənməsində rolu qeyd edilib.

Baş nazir Şahbaz Şərif Pakistan xalqının Prezident İlham Əliyevə və Azərbaycan xalqına böyük hörmət və ehtiram bəslədiyini bir daha vurğulayıb.

Söhbət zamanı siyasi sahədə mövcud yüksəksəviyyəli münasibətlərin iqtisadi, ticari və investisiya sahələrində əməkdaşlığın genişləndirilməsi ilə müşayiət olunmasının vacibliyi qeyd edilib.

Pakistanın Baş naziri Azərbaycanın "ASAN xidmət" modeli əsasında İslamabadda yaradılmış xidmət mərkəzinin fəaliyyətindən məmnunluğunu bildirib, bu təcrübənin Pakistanın digər bölgələrində də tətbiq olunması üçün Azərbaycan tərəfindən dəstəyin göstərilməsini xahiş edib.

Prezident İlham Əliyev bu istiqamətdə lazımi dəstəyin göstərilməsinə razılığını ifadə edib.

Pakistanın Baş naziri buna görə dövlət başçısına təşəkkür edərək, Azərbaycanın bu dəstəyini iki ölkə arasında dostluğun və həmrəyliyin növbəti bariz nümunəsi kimi qiymətləndirib.

Telefon danışığı zamanı son dövrlərdə Pakistanın regional və beynəlxalq səviyyələrdə dialoqun təşviqi, vasitəçilik və gərginliyin azaldılması istiqamətində göstərdiyi diplomatik səylər təqdir olunub.

Dövlətimizin başçısı və Pakistanın Baş naziri ikitərəfli və çoxtərəfli gündəlikdə duran məsələlərə, həmçinin regional və beynəlxalq vəziyyətə dair fikir mübadiləsi aparıblar.