Xaçmazda 17–25 iyun tarixlərində keçirilən müəllimlərin sertifikatlaşdırılması prosesində baş verən qanunsuzluq və özbaşınalıq iddialarının rezonansı günü-gündən artır. Baş verən hadisələr fonunda Quba-Xaçmaz Regional Təhsil İdarəsinin İnzibati sektorunun müdiri, eyni zamanda sertifikasiyada imtahan rəhbəri olan Fikrət Heybətov və bu işdə əlaqəli fəaliyyətdə olduğu iddia edilən bir neçə nəfər işdən azad edilsə də, narazılıq dalğası hələ də səngiməyib.
​“7Times.az”-ın əldə etdiyi məlumata görə, hazırda bu məsələ Elm və Təhsil Nazirliyinin Daxili Nəzarət şöbəsi tərəfindən araşdırılır.
Artıq müxtəlif faktlarla əlaqədar olaraq bir neçə şəxsin izahatının alındığı bildirilir.
​Bu barədə “7Times.az” olaraq 30 iyun tarixində təqdim etdiyimiz ilk video reportajdan sonra, məsələdə adı hallanan Quba rayonunun Zizik kənd tam orta məktəbinin laborantı Ayna Həmidova, həmin məktəbin yeni təyin edilmiş direktoru Vəfa Paşayeva, həmçinin Quba-Xaçmaz Regional Təhsil İdarəsinin Quba rayonu üzrə sektorunun sürücüsü Sahil Qocayev idarə müdiri Coşqun Əliyev tərəfindən işdən azad edilib. Ondan bir neçə gün sonra isə idarənin inzibati sektorunun müdiri və imtahan rəhbəri Fikrət Heybətov da vəzifəsindən kənarlaşdırılıb.
​Araşdırmalarımız nəticəsində onlarla şəxsin bu imtahanlarda nəticələrinin öncədən razılaşdırılmış formada saxtalaşdırıldığı iddia olunur.
Belə şəxslərdən birinin də Quba rayonu Aşağı Xuc məktəbinin fiziki tərbiyə müəllimi Yunis Oruc oğlu Vəliyev olduğu bildirilir. O, imtahandan 42 bal toplayıb. İddialara əsasən, bu nəticə 5800 manat vəsait qarşılığında öncədən razılaşdırılıb və imtahan zamanı sualların bəzilərinin düzgün cavabları nəzarətçilər vasitəsilə ona ötürülüb. Faktla əlaqədar olaraq Yunis Vəliyev ilə əlaqə saxlayıb münasibətini öyrəndik. O, “7Times.az”-a açıqlamasında iddiaların əsassız olduğunu və hətta bu barədə Quba-Xaçmaz Regional Təhsil İdarəsinə izahat verdiyini bildirdi.
​Qeyd edək ki, Yunis Vəliyev hazırda həmin məktəbin direktor səlahiyyətlərini icra edir.

​Sertifikasiya imtahanında nəticələrinin öncədən razılaşdırıldığı iddia edilən növbəti şəxs isə Siyəzən şəhər İnteqrasiya təlimli internat tipli gimnaziyanın direktor səlahiyyətlərini icra edən Xalidşah Qədəşovdur. Onun da imtahanda keçid balı ilə təmin edilməsinin eyni mexanizmlə baş tutduğu — yəni imtahanın gedişi zamanı bəzi sualların düzgün cavablarının nəzarətçilər tərəfindən ona ötürüldüyü iddia olunur.

​Xaçmazda keçirilən sertifikasiya imtahanlarının nəticələrinin saxtalaşdırılması prosesində adı ən çox hallanan şəxslərdən birinin Quba-Xaçmaz Regional Təhsil İdarəsinin əməkdaşı Emin Əlyarov olduğu bildirilir. İddialara görə, o, imtahanların başlamasından bir müddət əvvəl məktəb direktorlarına müraciət edərək, bu imtahanda kim keçid balı və yaxud uğurlu nəticə (51 baldan yuxarı) istəyirsə, köməklik göstərə biləcəyini təklif edib.
​Məsələ ilə əlaqədar olaraq adı çəkilən Emin Əlyarovla əlaqə saxlayıb münasibətini öyrəndik. O, “7Times.az”-a verdiyi açıqlamada bu iddiaların tamamilə əsassız olduğunu qeyd etdi.
​Əlimizdə rəsmi video-görüntü və ya birbaşa maddi sübutlar olmasa da, apardığımız araşdırmalara və əldə etdiyimiz məlumatlara əsasən, Xaçmazda 17–25 iyun tarixlərində keçirilən müəllimlərin sertifikatlaşdırılması prosesində onlarla şəxsin keçid balı və 51 baldan yuxarı uğurlu nəticə alması üçün imtahan gedişatına kənar müdaxilələrin edildiyi güman edilir.
Əldə etdiyimiz məlumatlara görə bu imtahanda adı siyahıda olmayan bir neçə şəxs imtahana nəzarətçi kimi salınıb.(7Times.az)

Ağcabədi rayon sakini Cəbrayılov Nurlan Rəhman oğlu iddia edir ki, 9 dekabr 2022-ci il tarixində Ağcabədi rayonunda eksternat imtahanı versə də, ona təqdim edilən attestat saxta hesab olunur və bu səbəbdən iki ildən artıqdır təhsilini davam etdirə bilmir.
Bizimesr.com-a müraciət edən vətəndaş deyir ki, həmin dövrdə Ağcabədi Rayon Təhsil Şöbəsinin rəhbərliyi tərəfindən adına verilən attestat elektron sistemdə görünmür və təhsil müəssisələri tərəfindən saxta sənəd kimi qiymətləndirilir. Nəticədə, Cəbrayılov Nurlan Rəhman oğlunun peşə təhsili müəssisələrinə sənəd təqdim etmək cəhdləri uğursuz olur və müraciətləri qəbul edilmir.
Şikayətçi bildirir ki, məsələ ilə bağlı dəfələrlə Elm və Təhsil Nazirliyinə, Qarabağ Regional Təhsil İdarəsinə və Ağcabədi Rayon Təhsil Sektoruna rəsmi müraciətlər edib. Onun iddiasına görə, müraciətləri bir qurumdan digərinə yönləndirilsə də, problemin araşdırılması, attestatın yenisi ilə əvəz olunması və ya məsələ ilə bağlı konkret hüquqi cavab verilməsi təmin edilməyib.

Cəbrayılov Nurlan Rəhman oğlu problemin Elm və təhsil naziri Emin Əmrullayev tərəfindən nəzrətə götürülərək araşdırılmasını və ona qanuni attestatın verilməsini tələb edir: " 2 ildir heç bir yer bu sənədi qəbul etmir. Bu sadəcə kağız parçasıdır. Peşə təhsili almaq istəyirəm, sənədlərimi təqdim edirəm üstümə atırlar. Bu attestatı mənə Ağcabədi Rayon Təhsil Şöbəsi verib. O da Elm və Təhsil Nazirliyinin qurumudur".
Qeyd edək ki, belə məlum problemlərlə bağlı onlarla fakt mövcuddur.
Bizimesr.com

İkinci qrup əlil olan Bakı şəhər sakini “Montin City” MTK-nın ona təzyiq göstərdiyini iddia edir. Son illər Bakıda tikinti şirkətləri ilə sakinlər arasında yaranan mübahisələr ictimaiyyətin diqqətində olan mövzulardan birinə çevrilib. Evlərin sökülməsi, kompensasiya ödənişləri və mülkiyyət hüquqlarının pozulduğu iddiaları ilə bağlı vətəndaş müraciətləri vaxtaşırı gündəmə gəlir. Redaksiyamıza müraciət edən paytaxt sakini – Bakı şəhəri Nərimanov rayonu, Təbriz küçəsi, ev 47A, mənzil 2 ünvanında yaşayan ikinci qrup əlil Sevda Sadıxzadə də eyni problemlə üzləşdiyini bildirir. S.Sadıxzadə iddia edir ki, yaşadığı binanın yerləşdiyi ərazidə çoxmərtəbəli yaşayış binası tikməyi planlaşdıran “Montin City” tikinti şirkəti ona məxsus olan, 40 ildən çoxdur yaşadığı mənzili qanunsuz şəkildə əlindən almağa çalışır.

Sevda Sadıxzadənın sözlərinə görə, “Orbita” Mənzil-Tikinti Kooperativinin (MTK) törəməsi olan “Montin City” MTK tərəfindən 8 qonşunun yaşadığı ikimərtəbəli binanı söküb yerində yeni hündürmərtəbəli yaşayış binasının inşa edilməsi tələbilə Bakı şəhəri Nərimanov rayon Məhkəməsinə müraciət olunub. Qarşı tərəf isə öz növbəsində məhkəməyə kifayət qədər sübutlar təqdim edib.

Şikayətçi deyir ki, çox rahat, gözəl təmirli, bütün şəraiti olan 4 otaqlı mənzili var və 40 ildən artıqdır yaşadığı mənzilini ümumiyyətlə, satmaq fikrində deyil. Lakin “Montin City” həmin ərazidə hündürmərtəbəli bina tikmək məqsədilə sakinləri evlərindən çıxarmağa çalışır: “2020-ci ildə kompleksin tikintisi üçün hazırlıqlar aparılarkən, şirkət işçiləri binadakı mənzillərin sahəsini ölçdülər və bildirdilər ki, hər şey istədiyimizdən də yaxşı olacaq. Bakı şəhər İcra Hakimiyyəti başçısının 17 oktyabr 2022-ci il tarixli sərəncamında göstərilir ki, ərazidə qeydə alınmış daşınmaz əmlakın istifadəçiləri (mülkiyyətçiləri) ilə mülki münasibətlər müvafiq qanunvericiliyin tələblərinə uyğun qarşılıqlı razılıq əsasında olmalıdır. Amma heç kim bizdən razılıq almayıb. 2023-cü ildə bizimlə heç bir danışıq aparılmadan, bizə heç bir təklif olmadan, üzümüzü belə görmədən işi məhkəməyə göndəriblər. Səbəb də göstəriblər ki, guya biz fürsətdən istifadə edərək varlanmaq istəyirik. Məhkəmə yolu ilə bizi evlərimizdən çıxarmağa çalışırlar. Biz evimizi satmaq istəmirik, amma heç olmasa, yaşımızı nəzərə alıb, ədalətli kompensasiya təklif etsələr (hətta bazar qiymətindən bir qədər də az!), razılaşa bilərik”.

Sevda Sadıqzadənin sözlərinə görə, ona məxsus mənzilin ölçüləri tamamilə yanlış götürülüb: “İlkin hesablamada 230 kvadratmetr sahə göstərilmişdi, bu, hətta yazılı şəkildə təsdiqlənmişdi də. Lakin sonrakı mərhələlərdə mənzilin sahəsi dəfələrlə yenidən ölçüldü və hər dəfə mənzilin sahəsinin əvvəlkindən daha kiçik olduğu bildirildi. Onlar mənzilin sahəsini divardan divara qədər ölçmürlər. Üstəgəl, 40 kvadratmetrlik qarajı, vanna otaqlarından birini, anbarı, eyvanı, qapalı həyəti nəzərə almırlar. Lakin şirkətin bizə təklif etdiyi mənzil daxildən divardan divara ölçülür. Şirkət özü müştərilərə mənzil satarkən ölçüləri çöldən-çölə hesablayır. Mənim ömrüm boyu qurduğum evimi dağıdırlar. Dövlət mənim şəxsi mülkümün qarantıdır, belə olan halda, bir şirkətin buna nə ixtiyarı var?! Mənzilimin dəyəri 700 min manatdan çox olub. Sənəd məhkəməyə təqdim edilib və daha sonra şirkətin tələbi ilə yenidən qiymətləndirmə aparılıb. Bizim qiymətləndirməmizə məhəl qoymurlar. Bizə məhkəmə ilə hədə-qorxu gəlirlər”.

Şikayətçi onu da əlavə edib ki, özünün və həyat yoldaşının ciddi səhhət problemləri var: “Biz yaşlı, xəstə insanlarıq. Daimi stress sağlamlığımıza çox pis təsir göstərir. Biz ömrümüzü bu ərazidə yaşamışıq. Bir oğlum var, o da Almaniyada yaşayır, Azərbaycan diasporunun çox fəal üzvüdür, tələbəlik illərindən ömrünü bu fəaliyyətə həsr edib, diaspor işində xidmətlərinə görə bu yaxınlarda Prezident tərəfindən təltif də olunub. Demək istədiyim odur ki, əgər bina dövlətin ehtiyacı üçün lazımdırsa, başqa məsələ, amma əgər bir tikinti şirkəti pul qazanmaq istəyirsə, hər santimetrində alnımızin təri olan evimizi əlimizdən niyə almalıdır?! Heç kim yeni tikiləcək binanın nə vaxt hazır olacağını demir, bizim isə gözləmək imkanımız yoxdur. Onu təmir etməyə maddi, fiziki imkanımız da olmayacaq. Yaşımızı, səhhətimizi, övladımızın burda olmadığını və digər məqamları nəzərə alıb, bizə kompensasiya təklif edə bilərlər”.

S.Sadıqzadə məsələ ilə bağlı aidiyyəti qurumlarda olduqlarını da vurğulayıb: “Nərimanov Rayon İcra Hakimiyyətində olduq, tikinti şirkəti bizə ədalətli qərar vədi verdi. Tikinti şirkəti ilə icra hakimiyyətinin nümayəndələri gəlib mənzili yenidən ölçdülər. Amma heç nə dəyişmədi. Sonda isə bizi məhkəməyə verdilər”.

S.Sadıqzadə deyib ki, “tikinti şirkəti mənzilinin ölçüsü kiçik olan 4 qonşuya daha böyük sahəsi olan mənzil vəd edərək, onlarla razılığa gəlib. Qalan qonşuların mənzil sahəsi onlardan 3 dəfə böyükdür. Bununla tikinti şirkəti həm də qonşuları üz-üzə qoyur, onlara verdikləri artıq mənzil sahəsini bizim hesabımıza kompensasiya etmək istəyir. Həmçinin binanın ətrafını xarabazara çeviriblər, hasarlayıblar, yolu kəsiblər”. S.Sadıqzadə aidiyyatlı qurumlardan məsələnin tezliklə ədalətli həllinə kömək göstərmələrini istəyir.

Sevda Sadıqzadənin vəkili Əli Zamanov ”525”ə bu iş üzrə iki ildir məhkəmə icraatında iş aparıldığını bildirib: “Bakı şəhəri, Nərimanov rayonu, Təbriz küçəsi, ev 47A ünvanında yerləşən yaşayış binasını sökərək ərazidə hündürmərtəbəli yaşayış binası tikmək istəyirlər. Sakinlərə kompensasiya vermirlər, sadəcə olaraq onların yaşadığı bina sökülüb yenisi tikildikdən sonra yaşayış sahəsi veriləcək. Vəd olunan yaşayış sahəsi isə sakinlərdən bir neçəsinə məxsus mənzilin sahəsindən xeyli kiçikdir. Ona görə sakinlər həmin binada ev istəmirlər. Çünki həm tikintinin, həm də təmirin keyfiyyəti aşağı olur, MTK-lar mənzilləri standart təmirlə verirlər”.

Vəkilin sözlərinə görə, kompensasiya vermək istəməyən tikinti şirkəti qərəzli olaraq binanın sökülməsi tələb ilə məhkəməyə müraciət edib: “Artıq bu iş üzrə bir qonşu ilə bağlı məhkəmə qərarı var. Ona mənzil sahəsindən də kiçik mənzil təklif edirlər. Məhkəmə qətnamə çıxarıb. Həmin qonşunun qaraj sahəsi, anbarı olub. Qaraj sahəsini nəzərə alsalar da, anbar nəzərə alınmayıb. Binada bəzi qonşuların mənzil sahəsi böyükdür. Mənzilinin sahəsi kiçik olan bir neçə sakinə əlavə mənzil sahəsi təklif edərək onları razı salıblar. Məqsəd də budur ki, həmin şəxslər digər sakinlərə təzyiq göstərsinlər. Bu iş üzrə tərəfinizdən müstəqil mütəxəssis rəyi alınıb, real bazar qiyməti, həm ərazidə yerləşən yaşayış sahələrinin, yeni tikililərin və köhnə tikililərin bazar qiymətləri müəyyən olunub. Eyni zamanda həmin sahədə anbar və qaraj sahələrinin real bazar qiyməti ilə bağlı da mütəxəssis rəyi verilib. Məhkəmə hələ ki, birinci iş üzrə onları nəzərə almayıb. Halbuki tikinti şirkəti tərəfindən həmin ərazidə tikilməsi nəzərdə tutulan binada yaşayış sahəsinin bir kvadratmetri təmirsiz vəziyyətdə 3500-4000 min manata təklif olunur. Mənzilləri ölçüləri də, məlum məsələdir ki, çöldən-çölə götürülür, amma sakinlərə məxsus mənzillər ölçülərkən ölçülər içdən-içə götürülür.

Biz məhkmə prosesləri gedişatında dəfələrlə MTK-ya kompensasiya təklifi irəli sürmüşük. Lakin MTK-a kompensasiya vermək istəmir. Bildirir ki, gələcəkdə bizim binanın yerində inşa ediləcək binanın B blokunda mənzil verə bilərlər. Onların təklif etdiyi mənzilin ölçüləri bizim mənzilin faktiki ölçülərindən kiçik, təmiri standart (divarda ucuz boya və döşəmədə laminat), mənzilin yerləşmə bucağı barədə heç bir məlumat verilmir. MTK-nın tikdiyi binada mənzillərin 1 kvadratmetri 4000 manat, mənzilin mərtəbə və yerləşmə bucağına uyğun olaraq daha yuxarı qiymətə təklif olunur.

Bununla bağlı məhkəmə tərəfindən də ekspertiza keçirilib. Ekspertizada qiymətlər təhrif olunub, çox aşağı qiymətləndirilib, tikinti şirkətinin özünün təklif etdiyi qiymətdən aşağı qiymətləndirici qiymət çıxarıb. Bu da ondan xəbər verir ki, tikinti şirkəti tərəfindən ekspert rəyinə müdaxilə var. Hazırda iş üzrə yekun qiymətləndirmə keçirilib. Onun rəyini gözləyirik. Məhkəmə bu ay yekunlaşmaq üzrədir. Məsələ ilə bağlı aidiyyəti orqanlara şikayətlərimizə baxmayaraq, hələ ki, heç bir nəticə yoxdur.

Azərbaycan Respublikası Konstitusiyasının 12-ci maddəsinə əsasən dövlətin ali məqsədi dedikdə, dövlətin bütün fəaliyyətinin mərkəzində insanın dayanması nəzərdə tutulur. Yəni qanunların qəbul edilməsi, dövlət orqanlarının fəaliyyəti və məhkəmələrin qərarları insan hüquq və azadlıqlarının qorunmasına xidmət etməlidir. Konstitusiyanın 13-cü maddəsinin I hissəsinə əsasən, Azərbaycan Respublikasında mülkiyyət toxunulmazdır və dövlət tərəfindən müdafiə olunur. Məhkəmələr dövlət hakimiyyətinin bir qolu kimi mülkiyyət hüququna müdaxilə edən hər bir iddia üzrə xüsusilə ciddi araşdırma aparmalı, mülkiyyət hüququnun məhdudlaşdırılmasının qanuni əsaslarını, zəruriliyini və mütənasibliyini ətraflı qiymətləndirməlidirlər.

Konstitusiyanın 29-cu maddəsinin IV hissəsinə görə dövlət ehtiyacları üçün mülkiyyətin özgəninkiləşdirilməsinə yalnız qabaqcadan onun dəyərini ədalətli ödəmək şərti ilə yol verilə bilər. Əks halda mülkiyyətin alınmasına yol verilmir. Nəzərə alsaq ki, hətta dövlət ehtiyacları üçün mülkiyyət özgəninkiləşdirilən zaman onun faktiki sahəsi nəzərə alınaraq ədalətli şəkildə kompensasiya ödənilir. Lakin hazırkı iş üzrə bu tələb tamamilə gözardı edilib”.

“Montin City” MTK-nın nümayəndəsi Mehman Abdullayev “525”ə açıqlamasında iş üzrə məhkəmə prosesi davam etdiyindən şikayətlərlə bağlı şərh vermək istəmədiklərini bildirib: “Məhkəmə prosesi hələ davam edir. Yekunda hansı qərar qəbul olunarsa, biz də ona əməl edəcəyik”.

XVIII əsrdə yaşamış böyük filosof Jan Jak Russonun məşhur bir fikir var: “İnsanlar atalarının ölümünü unuda bilər, lakin mülkiyyətlərinin itirilməsini heç vaxt unutmazlar”. Qoca Russo bu fikri insanlar arasındakı bərabərsizliyin mənşəyi və əsaslarından bəhs edən əsərində xüsusi mülkiyyət anlayışının insan psixologiyasına və cəmiyyətə təsirini izah edərkən işlədirdi. Aradan əsrlər keçsə də, bu fikir aktuallığını təəssüf ki, hələ də itirməyib. Həqiqət isə budur ki, bir insanın qanuni mülkiyyətindən məhrum edilməsi təkcə maddi itki deyil, həm də onun hüquqlarına və qanunun aliliyinə olan inamına ağır zərbədir. Bu baxımdan redaksiyamıza müraciət edən II qrup əlilliyi olan vətəndaşın səsləndirdiyi iddiaların ciddi araşdırılmasına ehtiyac var. Azərbaycan Respublikasının Konstitusiyası mülkiyyət hüququnun toxunulmazlığını birmənalı şəkildə təmin edir. Vətəndaşın qanunda nəzərdə tutulmuş prosedurlar olmadan öz mülkiyyətindən məhrum edilməsi yolverilməzdir; heç bir tikinti layihəsi, heç bir iqtisadi maraq və ya kommersiya məqsədi insanın – vətəndaşın qanunla qorunan mülkiyyət hüququndan üstün sayıla bilməz.(Tribuna.az

“Heç bir MTK vətəndaşın evini özbaşına sökə bilməz” - Hüquqşünasdan açıqlama


“Razı olmasanız da sökəcəyəm” yanaşması qanunsuzdur, konstitusiyanın qoruduğu mülkiyyət hüququ pozulur”
Yasamalda sakinlərlə “Bizim Ev” MTK arasında gərginlik pik həddə çatıb. İllərdir davam edən tikinti və söküntü işlərindən bezən sakinlər şirkəti qanunsuz müdaxilədə, hədə-qorxuda və şəxsi mülkiyyətə qəsddə ittiham edərək aidiyyəti qurumlardan təcili müdaxilə tələb edirlər.

Qeyd edək ki, Bakı şəhərinin Yasamal rayonu, Həsən bəy Zərdabi küçəsi 69 ünvanında yaşayan sakinlər uzun illərdir davam edən tikinti işlərinin girovuna çevrildiklərini bildirirlər. Redaksiyamıza müraciət edən sakinlərin sözlərinə görə, “Bizim Ev” MTK-nın fəaliyyəti artıq adi tikinti narahatlığını çoxdan aşıb və insanların normal yaşayış hüququnu, təhlükəsizliyini və mülkiyyət hüququnu ciddi şəkildə pozur.

Sakinlərin iddiasına görə, MTK tərəfindən aparılan tikinti və qazıntı işləri gecə-gündüz davam edir. Ağır texnikaların yaratdığı səs-küy insanların istirahətini mümkünsüz edib, qazılmış yollar isə sakinlərin gündəlik hərəkətini çətinləşdirib. Xüsusilə yaşlılar, uşaqlar və fiziki məhdudiyyətli şəxslər üçün vəziyyət daha da ağırlaşıb. Lakin narazılıqlar bununla bitmir. İddia olunur ki, mənzillərinin sökülməsi ilə bağlı MTK ilə müqavilə bağlamaqdan imtina edən sakinlər müxtəlif təzyiq və hədə-qorxu ilə üzləşirlər. Onların sözlərinə görə, evdə olmadıqları vaxtlarda MTK əməkdaşları həyətlərə daxil olur, ağacları kəsir, hasarları və divarlardakı dəmir konstruksiyaları xüsusi kəsici alətlərlə sökürlər. Sakinlər həmçinin telefon vasitəsilə hədələndiklərini, onlara müxtəlif yollarla təzyiq göstərildiyini iddia edirlər. Onların fikrincə, məqsəd müqavilə bağlamaq istəməyən sakinləri bezdirərək mənzillərini tərk etməyə və ya şirkətin şərtləri ilə razılaşmağa məcbur etməkdir.

Son hadisələrdən birində isə sakinlərdən birinin evdə olmadığı vaxt həyətə daxil olan şəxslərin dəmir konstruksiyaları kəsdiyi, qonşuların xəbər verməsindən sonra isə ərazini tərk etdiyi bildirilir. İddialara görə, baş verənlər müşahidə kameraları tərəfindən qeydə alınıb.

Sakinlər baş verənləri açıq şəkildə özbaşınalıq və şəxsi mülkiyyətə müdaxilə kimi qiymətləndirərək sual edirlər: hansı qanun tikinti şirkətinə vətəndaşın həyətinə icazəsiz daxil olmaq, ağacları kəsmək, hasarları sökmək və insanları öz evlərində rahat yaşamaq hüququndan məhrum etmək səlahiyyəti verir?

Şəhərin yenilənməsi və yeni tikinti layihələrinin həyata keçirilməsi vacib olsa da, bu proses vətəndaşların konstitusion hüquqlarının pozulması, hədə-qorxu və təzyiq hesabına həyata keçirilə bilməz. Tikinti şirkətləri qanun çərçivəsində fəaliyyət göstərməli, sakinlərlə dialoq qurmalı və mülkiyyət hüququna hörmət etməlidirlər.

Əks halda, bu cür hallar təkcə bir binanın və ya bir məhəllənin problemi olmaqdan çıxır, bütövlükdə cəmiyyətdə hüququn aliliyinə və ədalət prinsiplərinə inamı sarsıdan təhlükəli bir presedentə çevrilir.

Mövzu ilə bağlı fikirlərini Sherg.az-a bölüşən hüquqşünas Əkrəm Həsənov bildirib ki, tikinti şirkətləri və ya MTK-ların vətəndaşların evlərini, hasarlarını və digər tikililərini özbaşına sökmək səlahiyyəti yoxdur. Hüquqşünasın fikrincə, çoxmənzilli yaşayış binalarının sökülməsi yalnız əmlak sahiblərinin könüllü razılığı əsasında həyata keçirilə bilər:

“Bu razılıq təhdid, təzyiq və ya məcburetmə yolu ilə deyil, qarşılıqlı razılaşma əsasında əldə olunmalıdır. Hər bir mənzil sahibinin öz əmlakı üçün tələb etdiyi qiyməti müəyyən etmək hüququ var. Digər sakinlərin hansı şərtlərlə razılaşması heç bir halda başqa bir mülkiyyətçini həmin şərtləri qəbul etməyə məcbur etmir. Əmlak sahibi “mənim əmlakımın dəyəri budur, razısınızsa anlaşaq, razı deyilsinizsə mənim mülkiyyətimə toxunmayın” demək hüququna malikdir. Təəssüf ki, Azərbaycanda son illər bu sahədə mənfi bir praktika formalaşıb. Bəzi tikinti şirkətləri əvvəlcə bir neçə sakinlə razılıq əldə edir, daha sonra isə razılaşmayan sakinlərə qarşı müxtəlif təzyiq vasitələrindən istifadə edirlər. Məhkəmə çəkişmələri başladılır, qanunsuz söküntü işləri aparılır, bəzi hallarda binaların işıq, qaz və su təchizatının dayandırılması kimi üsullara əl atılır. Aidiyyəti qurumların bu hallara vaxtında və effektiv reaksiya verməməsi isə vətəndaşlarda ciddi narazılıq yaradır. Bütün bunlar Konstitusiya ilə qorunan mülkiyyət hüququnun pozulması kimi qiymətləndirilməlidir. Azərbaycanda yaşayış binalarının məcburi qaydada sökülməsi yalnız dövlət ehtiyacları yarandıqda mümkündür və bunun üçün də müvafiq məhkəmə qərarı və qanunla müəyyən edilmiş kompensasiya mexanizmi olmalıdır. Heç bir özəl tikinti şirkəti və ya MTK “burada bina tikəcəyəm, razı olsanız da, olmasanız da bu binanı sökəcəyəm” mövqeyi sərgiləyə bilməz. Bu, hüquqi dövlət prinsiplərinə zidd olan özbaşınalıqdır. Tikinti şirkəti ilk növbədə sakinlərlə danışıqlar aparmalı, onları qane edən şərtlər təklif etməli və yalnız könüllü razılıq əldə edildikdən sonra layihəni həyata keçirməlidir”.

Dünyanın inkişaf etmiş ölkələrində də məhz bu cür prinsip tətbiq olunduğunu vurğulayan Ə. Həsənov qeyd edib ki, mülkiyyət hüququ toxunulmazdır və dövlət tərəfindən qorunur:

“Azərbaycan qanunvericiliyinində də vətəndaşların mülkiyyət hüququnun real və effektiv müdafiəsinin təmin olunması hüquqi dövlət quruculuğunun əsas tələblərindən biridir. Lakin praktikada mülkiyyət hüququnun müdafiəsi yoxdur”.(Teref)

Daxili İşlər Nazirliyində (DİN) bu ilin 6 ayında əməliyyat-xidməti fəaliyyətin yekunlarına və qarşıda duran vəzifələrə həsr olunmuş kollegiya iclası keçirilib.

Bu barədə DİN məlumat yayıb.

İclası giriş sözü ilə açan daxili işlər naziri general-polkovnik Vilayət Eyvazov daxili işlər orqanları və Daxili Qoşunların cinayətkarlıqla mübarizə, ictimai asayişin qorunması, insan hüquq və azadlıqlarının müdafiəsi sahəsində xidməti vəzifələrini layiqincə yerinə yetirdiyini bildirib.

Beynəlxalq və respublika əhəmiyyətli kütləvi tədbirlərdə, habelə işğaldan azad edilmiş ərazilərdə təhlükəsizliyin etibarlı təmin olunduğunu, qanunla müəyyən edilmiş funksiyaların digər hüquq mühafizə orqanları ilə qarşılıqlı əlaqədə peşəkarlıqla icra edildiyini vurğulayıb.

Qarşıda mühüm vəzifələrin dayandığını da diqqətə çatdıraraq onların ətraflı müzakirəsinin, eləcə də xidməti fəaliyyətin təkmilləşdirilməsi məqsədilə əlavə təşkilati tədbirlərin müəyyənləşdirilib həyata keçirilməsinin vacibliyini qeyd edib.

İclasda hesabat məruzəsi və məruzəətrafı çıxışlar dinlənilib.

Hesabat məruzəsində vurğulanıb ki, ötən 6 ayda əməliyyat-axtarış və istintaq fəaliyyətinin subyekti olan bütün dövlət qurumları üzrə 15.420 cinayət qeydə alınıb və onların 95,4 faizi daxili işlər və prokurorluq orqanları tərəfindən prosessual qaydada araşdırılan hüquqazidd əməllər olub, 87 faizini böyük ictimai təhlükə törətməyən və az ağır növləri təşkil edib.

2025-ci ilin 6 ayı ilə müqayisədə ümumi cinayətlər 8,6, ağır və xüsusilə ağır cinayətlər 6,5, mülkiyyət əleyhinə olanlar 15,3, onlardan oğurluqlar 11,5, dələduzluqlar 16,8, soyğunçuluqlar 8,8, quldurluqlar 44,2, hədə-qorxu ilə tələb etmələr 10,5, habelə xuliqanlıqlar 12,5, yetkinlik yaşına çatmayanların cinayətləri 15,3, ailə münaqişəsi zəminində törədilənlər 3,5, qrup halında baş verənlər 16,6 faiz, odlu silahın tətbiqi ilə törədilənlər 3 fakt, yol-nəqliyyat hadisələrinin sayı 7,6 faiz, qəzalarda xəsarət alanların sayı 19 faiz, həlak olanların sayı 9 faiz azalıb.

Cinayətlərin açılması 1,1 faiz, qeyri-aşkar şəraitdə törədilənlərin açılması 2,5 faiz, mülkiyyət əleyhinə olanların açılması 4,4 faiz, onlardan oğurluqların açılması 10,7 faiz, dələduzluqların açılması 1,2 faiz yaxşılaşıb, adam oğurluğu və avtonəqliyyat vasitəsinin qaçırılması cinayətlərinin açılması tam təmin edilib.

Həyata keçirilmiş istintaq hərəkətləri və əməliyyat tədbirləri ilə cinayətlərin 93,9 faizi, o cümlədən prokurorluq orqanları ilə birgə keçmiş illərdən bağlı qalmış 218 və görülmüş operativ cavab tədbirləri ilə 3.013 cinayət açılıb, eləcə də 4.474 hüquqazidd əməlin qarşısı alınıb. Müxtəlif cinayətlər törətmiş 6.887 şəxs məhkəmə məsuliyyətinə verilib. İstintaqdan və təhqiqat orqanlarından yayınan 4.282, o cümlədən ağır və xüsusilə ağır cinayətlərə görə 645 təqsirləndirilən şəxs tutulub. Axtarış işinin nəticələri 3 faiz yaxşılaşaraq 82,7 faizə yüksəlib.

Mütəşəkkil cinayətkarlıqla mübarizə tədbirləri çərçivəsində 288, o cümlədən ağır və xüsusilə ağır cinayətlər törətmiş 104 kriminal qrup zərərsizləşdirilib, qanunsuz olaraq odlu silah saxlayan və daşıyan 70 nəfər cinayət məsuliyyətinə cəlb edilib. Eyni zamanda 3.088 odlu silah, 337 qumbara və 99 mindən çox patron aşkarlanıb.

Qeyri-leqal dövriyyədən ötən ilin müvafiq dövrü ilə müqayisədə 1 ton 360 kiloqram çox, yəni 4 ton 318 kiloqram narkotik vasitə çıxarılıb, qanunsuz kultivasiya edilən və yabanı halda bitən 254 tondan artıq çətənə və xaş-xaş kolu aşkarlanıb məhv edilib. Bu növ əməllərə görə 41 cinayətkar qrup zərərsizləşdirilib, 2.652 şəxs cinayət məsuliyyətinə cəlb olunub.

Vətəndaşların qəbulu və müraciətlərinə baxılması sahəsində mühüm funksiyaların icrası da davam etdirilərək 3.889 şəxsin qəbulu həyata keçirilib, qaldırılan məsələlərin əksəriyyəti öz qanuni həllini tapıb. Nazirliyə daxil olmuş müraciətlər operativ araşdırılaraq hər biri təşəbbüskarların hüquqları izah edilməklə yazılı cavablandırılıb.

Kollegiya iclasına yekun vuran nazir general-polkovnik V.Eyvazov xidməti vəzifələrin və qarşıya qoyulan tapşırıqların hesabat dövründə bütövlükdə layiqincə yerinə yetirildiyini qeyd edib, qanunçuluğun və hüquq qaydasının möhkəmləndirilməsi sahəsində əldə olunan müsbət nəticələrin inkişaf etdirilməsi üçün fəaliyyətin effektivliyinin artırılması ilə bağlı tapşırıq və tövsiyələrini verib.

Həmçinin, vətəndaş məmnunluğunun təmin edilməsinin Azərbaycan Prezidenti İlham Əliyevin müəyyənləşdirdiyi əsas vəzifələrdən olduğunu vurğulayaraq cinayətlərin qarşısının alınması, açılması, hüquqazidd əməllər nəticəsində vurulmuş maddi ziyanın ödətdirilməsi, müraciətlərə baxılması və vətəndaş qəbulu işinə daha böyük həssaslıqla yanaşılmasını tələb edib.

Azərbaycanda iyulun 10-da 37 dərəcə isti gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin əsasən yağmursuz keçəcəyi gözlənilir. Şimal-qərb küləyi gündüz şimal-şərq küləyi ilə əvəz olunacaq.

Havanın temperaturu gecə 20-23° isti, gündüz 30-35° isti olacaq. Atmosfer təzyiqi 757 mm civə sütunu, nisbi rütubət isə gecə 75-85 %, gündüz 55-65 % təşkil edəcək.

Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi dağlıq ərazilərdə duman olacaq. Mülayim şərq küləyi əsəcək.

Havanın temperaturu gecə 20-25° isti, gündüz 32-37° isti, dağlarda gecə 11-16° isti, gündüz 20-25°, bəzi yerlərdə 28-30° isti olacaq.

"Dövlətimizin vətəndaşlara xidmət sahəsində ən güvənilən qurumlarından biri olan ASAN xidmət ilə bağlı yaşadığımız ciddi bir problemi ictimailəşdirmək və aidiyyəti qurumların diqqətinə çatdırmaq istəyirəm..." "DİA-AZ" xəbər verir ki, bunu özünün etiraz dolu müraciətində Elvin Əlişzadə adlı sosial şəbəkə istifadəçisi qeyd edib.
O daha sonra fikrini belə davam etdirir: "Almaniya Federativ Respublikasına təqdim ediləcək rəsmi sənədlərin tərcüməsi, təsdiqi və apostil proseduru ilə bağlı 1 saylı Sumqayıt ASAN xidmət mərkəzinə müraciət etdik.
Müraciət zamanı prosesdə iştirak edən şəxslər tərəfindən bizə sənədlərin rəsmiləşdirilməsi ardıcıllığı ilə bağlı məlumat verildi. Bildirildi ki, əvvəlcə sənədlərin tərcüməsi və təsdiqi həyata keçirilməli, daha sonra isə Bakı şəhərində apostil olunmalıdır.
Bu məlumata dövlət xidmətinin əməkdaşları tərəfindən verildiyi üçün güvəndik və həmin qaydada hərəkət etdik. Sənədlərimizi tərcümə etdirib təsdiqlətdik və bunun üçün 275 manat məbləğində xərc çəkdik.
Lakin sənədləri Bakı şəhərində apostil üçün təqdim etdikdə məlum oldu ki, prosedur ardıcıllığı fərqli olmalıdır: əvvəlcə sənədlər apostil olunmalı, daha sonra isə tərcümə və təsdiq prosesi aparılmalıdır.
Nəticədə bizə təqdim edilən məlumat əsasında etdiyimiz prosedur qəbul edilmədi və çəkdiyimiz xərc maddi zərərə çevrildi.
Məsələ ilə bağlı prosesdə iştirak edən şəxslər:
* Əhmədova Yeganə Taleh qızı (Təcrübəçi);
* Şiriyeva Jalə Tahir qızı;
* “Pro Translate” şirkətinin rəhbəri Nigar Bağırovna.
Yaranmış vəziyyətlə bağlı müraciət etdikdə isə məsələ ilə əlaqədar araşdırma aparılması bildirildi. Lakin hesab edirik ki, vətəndaş dövlət xidmətindən istifadə edərkən aldığı rəsmi məlumatın düzgünlüyünə güvənir və həmin məlumat nəticəsində yaranan maddi zərər diqqətlə araşdırılmalıdır.
Suallarımız:
1️⃣ Dövlət xidməti zamanı verilmiş yanlış məlumat nəticəsində vətəndaşın çəkdiyi maddi zərərə kim məsuliyyət daşıyır?
2️⃣ Vətəndaşın düzgün məlumatlandırılması və yaranmış 275 manatlıq maddi zərərin aradan qaldırılması üçün hansı tədbirlər görüləcək?
Biz məsələnin obyektiv araşdırılmasını, prosesdə iştirak edən şəxslərin fəaliyyətinə qiymət verilməsini və dəymiş 275 manat maddi zərərin ödənilməsi məsələsinə baxılmasını tələb edirik.
Ümid edirik ki, Vətəndaşlara Xidmət və Sosial İnnovasiyalar üzrə Dövlət Agentliyi və ASAN xidmət bu müraciətə diqqətlə yanaşacaq və vətəndaşın qarşılaşdığı problemin həlli üçün müvafiq addımlar atacaq..."

Dia-az

Naxçıvan Muxtar Respublikasının turizm potensialının yenidən canlandırılması məqsədilə yeni inkişaf strategiyası hazırlanır.

Bunu Dövlət Turizm Agentliyi yanında Azərbaycan Turizm Bürosunun İdarə Heyətinin sədri Florian Zenqstşmid Bakıda keçirilən "İqtisadi artımı və diversifikasiyanı təmin etmək üçün Azərbaycanın turizm potensialının açılması" adlı tədbirdə bildirib.

Onun sözlərinə görə, Naxçıvan Azərbaycanın mühüm turizm istiqamətlərindən biri olsa da, hazırda bölgənin inkişafı üçün yeni strateji yanaşmaya ehtiyac var: "Naxçıvan strateji baxımdan yenidən diqqət mərkəzinə gətirilməlidir. Xüsusilə hədəf bazarların müəyyənləşdirilməsi və həmin bazarlara uyğun turizm məhsullarının formalaşdırılması vacibdir. Yeni yanaşma Naxçıvanın turizm potensialının daha səmərəli istifadəsinə, bölgəyə turist axınının artırılmasına və onun ölkənin əsas turizm istiqamətlərindən birinə çevrilməsinə xidmət edəcək. Bu istiqamətdə görüləcək işlər Azərbaycanın turizm sektorunun inkişafı üzrə hazırlanan yeni dövlət proqramında da öz əksini tapacaq".

TEREF poçtuna daxil olan məqaləni təqdim edir. Məqalədə müəllif yazır:
Bir müddət bundan öncə ölkə mediasında Rövşən adlı maklerin Binəqədidə həyata keçirdiyi qanunsuz tikililərdən bəhs olunmuşdur. Bugünlərdə redaksiyamızı məlumatlandıran mənbə sözügedən makler və onun fəaliyyəti ilə bağlı yeni məlumatlar təqdim edib. Məlum olub ki, son vaxtlar fəaliyyətini daha da genişləndirən bu şəxs Zəngəzur restoranının arxasında – Böyükşor gölü ərazisində suyu qurudaraq yeni torpaq sahələri yaradıb. Həmin torpaq sahələri üzərində çoxlu sayda qanunsuz ev inşa edilərək vətəndaşlara təqdim olunmaqdadır."
Müəllif daha sonra yazır: "İşin ən maraqlı tərəfi isə budur ki, Binəqədi Rayon İcra Hakimiyyəti tərəfindən Rövşən adlı maklerə dəfələrlə xəbərdarlıq edilsə də, adıçəkilən şəxs öz biznes maraqları naminə ictimai əmlaka qənim kəsilməkdə, qanunsuz fəaliyyətini davam etdirməkdədir. Görünən odur ki, əlaqədar dövlət qurumları Rövşən adlı maklerin öhdəsindən gələ bilmir. Bu səbəbdən də Binəqədi ərazisində “at oynadan” bu şəxs Böyükşor gölünü qurudaraq hissə-hissə “rasxoda” verməkdə, külli miqdarda vəsait qazanmaqdadır. Ümid edirik ki, əlaqədar qurmlar bu şəxsin bəd əməllərinin qarşısını almaq istiqamətində ciddi addımlar atacaq, sərt ölçü götürəcək."
Mövzunu davam etdirəcəyik.

TEREF

Fövqəladə Hallar Nazirliyi (FHN) Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən Qobustan Milli Tarixi-Bədii Qoruğunun direktoru İsayev Vüqar Ürfət oğluna məxsus obyektin istismarına icazə verib.
Tikinti sahəsi 120,9 kvadratmetr olan və Bakı şəhəri, Binəqədi rayonu, Biləcəri qəsəbəsi, Mehdi Hüseynzadə küçəsi, giriş 37 ünvanında yerləşən obyekt 1 mərtəbəli binadan ibarətdir.
Qeyd edək ki, FHN obyektə 24 iyun 2026-cı il tarixli 13210 nömrəli istismara hazırlıq rəyi verib.
Onu da bildirək ki, obyektin layihəçisi “NKT-Bərpa” MMC (VÖEN – 1303487311) olub. Cəmi 5 manat nizamnamə kapitalı olan “NKT-Bərpa” MMC-nin qanuni təmsilçisi isə Vüqar İsayevin qardaşı İsayev Eldar Ürfət oğludur.
“NKT-Bərpa” MMC uzun illər Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin keçirdiyi çoxsaylı tender müsabiqələrində qalib olub.
Məlumat üçün qeyd edək ki, Vüqar İsayev 2018-ci ildə sabiq mədəniyyət naziri Əbülfəs Qarayevin müvafiq əmri ilə Qobustan Milli Tarixi-Bədii Qoruğuna direktor təyin olunub. Vüqar İsayev bu vəzifədən əvvəl Mədəni İrsin Qorunması, İnkişafı və Bərpası üzrə Dövlət Xidmətinin Mədəni irsin qorunması üzrə nəzarət şöbəsinin Abidələrin qorunması və texniki nəzarət sektorunun müdiri vəzifəsində işləyib.
Vüqar İsayev qoruğa direktor təyin olunduqdan qısa müddət sonra qardaşının rəhbərlik etdiyi “NKT-Bərpa” MMC Dövlət Xidməti ilə çoxsaylı satınalma müqavilələri imzalayıb. Məsələn, 2019-cu ildə Dövlət Xidməti tender müsabiqəsi keçirmədən dövlət mühafizəsinə götürülmüş daşınmaz tarix və mədəniyyət abidələrinin pasportlaşdırılması məqsədilə “NKT-Bərpa” MMC ilə 296 min manat dəyərində müqavilə imzalayıb.
2019-cu ildən sonra Mədəni İrsin Qorunması, İnkişafı və Bərpası üzrə Dövlət Xidməti “NKT-Bərpa” MMC-yə ümumilikdə 1 milyon 600 min manatdan çox vəsait ödəyib.
Xatırladaq ki, Mədəniyyət Nazirliyinin tabeliyində olan Mədəni İrsin Qorunması, İnkişafı və Bərpası üzrə Dövlət Xidmətinin sabiq rəisi Zakir Sultanov 2020-ci ildə Dövlət Təhlükəsizliyi Xidmətinin keçirdiyi əməliyyat zamanı sabiq nazir müavini Rafiq Bayramovla birgə saxlanılıb. Ona Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham verilib. Bakı Ağır Cinayətlər Məhkəməsinin hökmünə əsasən Zakir Sultanov 11 il müddətinə azadlıqdan məhrum edilib. Bakı Apellyasiya Məhkəməsi ziyanın ödənilməsini nəzərə alaraq həbs müddətini 5 il 6 aya endirib. 2024-cü ilin iyun ayında Zakir Sultanov azadlığa buraxılıb.(Yeniavaz.com)