Leysan Məmmədovun adı çəkiləndə təsəvvürdə dövlətə xidmət yox, büdcə vəsaitlərinin “leysan” kimi axıb talanması canlanır. Buna səbəb Hesablama Palatasının rəsmi audit sənədləri, illərlə yığılıb qalmış rəqəmlər və milyonlarla manatlıq “yeyinti” faktlarıdır.

Gənclər və İdman Nazirliyində Tikilməkdə Olan Obyektlərin Müdiriyyətinə rəhbərlik etdiyi 15 il ərzində Leysan Məmmədovun “imza” atmadığı tikinti qalmayıb. Şəmkirdən Astaraya, Sumqayıtdan Qəbələyə qədər ucalan olimpiya komplekslərinin hər kərpici bu maxinasiyalara “şahidlik” edib.

İşğaldan azad edilmiş ərazilərdə Prezidentin xüsusi nümayəndəliklərinin yaradılması sadəcə idarəçilik islahatı deyildi. Bu addım illərdir yerli icra hakimiyyətlərində kök salmış korrupsiya mexanizmlərini, özbaşınalığı və büdcə talanını dayandırmaq, şəffaflığı bərpa etmək məqsədi daşıyırdı. Dövlət başçısının əsas hədəfi şəhid qanı ilə azad olunan torpaqlarda hər qəpiyin yerinə xərclənməsini təmin etmək idi. Lakin Qarabağ İqtisadi Rayonunda Bərpa, Tikinti və İdarəetmə Xidmətinin icraçı direktoru Leysan Məmmədovun fəaliyyəti bu ali məqsədlərə kölgə salan faktlarla gündəmə gəlib.

Leysan Məmmədovun adı bizə və hüquq-mühafizə orqanlarına heç də yad deyil. Gənclər və İdman Nazirliyində 15 il ərzində tikinti sektoruna rəhbərlik edən bu şəxsin fəaliyyəti Hesablama Palatasının audit hesabatlarında “yeyinti” və maxinasiya faktları ilə əks olunub. İddialara görə Olimpiya komplekslərinin inşasında milyonlarla manatın mənimsənilməsinə görə ölkədən çıxışına “stop” qoyulub. Görünən odur ki, Məmmədov öz “zəngin təcrübəsini” indi də Ağdam, Füzuli və Xocavənddə tətbiq etməyə başlayıb. Belə ki, onun rəhbərlik etdiyi qurumun fəaliyyətində aşkar olunan mənimsəmə faktları təmir-bərpa adı altında milyonlarla vəsaitin necə buxarlandığını ortaya qoyur.

Əsas ittihamlar ümumi dəyəri 25 milyon manatı ötən üç iri müqavilənin “Platin” MMC-yə həvalə edilməsi ilə bağlıdır. Ortada 25 milyon manatlıq üç nəhəng müqavilə və bu pulların idarə olunduğu maraqlı şəbəkə var. Tenderin qalibi “Platin” MMC adlı şirkətdir. Maraqlıdır ki, bu şirkətin rəsmi rəhbəri İsfəndiyar Məmmədov olsa da, iplərin qurum rəhbəri Leysan Məmmədovun oğlu Elnur Məmmədovun əlində olduğu deyilir. Yəni hər şey “ailə daxilində” həll edilir.

Sxemin ən heyrətamiz hissəsi isə evlərin kateqoriyalara bölünməsi zamanı üzə çıxır. Yüngül kosmetik təmirə ehtiyacı olan A kateqoriyalı evlərin kvadratmetri üçün ilkin olaraq 150 manat nəzərdə tutulduğu halda, sənədlərdə bu rəqəm 350 manata qaldırılıb. Hər kvadratmetrdə yaranan 200 manatlıq “süni fərq” dövlət büdcəsinə 14 milyon manatdan çox ziyan vurulması deməkdir.

Bundan əlavə, 2025-ci ilin yanvarında Ağdam şəhərində yaşayış massivlərinin tikintisi ilə bağlı keçirilən tenderlərdə daha sərfəli qiymət təklifləri olmasına baxmayaraq, “SMTS” MMC qalib elan edilib. Müqayisələr göstərir ki, digər şirkətlərin təklifləri ilə fərq ümumilikdə 8,5 milyon manatdan çoxdur ki, bu da dövlət büdcəsi üçün əlavə yük hesab olunur.

Nəticədə ortaya 20 milyon manatdan çox yoxa çıxan vəsait çıxır. Bu qədər pulun necə “əridiyini” görmək üçün uzağa getmək lazım deyil. Evlərin təmirə başlamazdan əvvəlki fotoları ilə indiki sənədləri üz-üzə qoyanda hər şey gün kimi aydın olur. Görəsən, bu qədər aşkar mənimsəməyə imza atanlar hansı məntiqlə hərəkət edirlər? Dövlətin vəsaitini bu qədər rahatlıqla şəxsi maraqlara qurban vermək sadəcə qanun pozuntusu deyil, həm də böyük məsuliyyətsizlikdir.

Görünür, bəziləri üçün Qarabağın bərpası müqəddəs vəzifə olmaqdan çıxaraq növbəti “tender poliqonu” və büdcə talanı fürsətinə çevrilib. İllərlə müxtəlif vəzifələrdə dövlətin milyonlarını mənimsəyələrin hələ də eyni ssenarilərlə hərəkət etməsi, quruculuq işlərinə kölgə salmaqdan başqa bir şey deyil. Amma unutmaq olmaz ki, şəhid qanı ilə alınmış o torpaqlarda qurulan hər bir binaya görə mənimsənilmiş hər qəpiyin hesabı gec-tez sorulacaq./Demokrat.az
Facebook-da paylaş

“Hünər-İnşaat” Firmasının qanuni təmsilçisi Nəbiyev Yunis Nəbi oğlu barəsində inzibati protokol tərtib edilib.

Protokol Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən İnzibati Xətalar Məcəlləsinin 539.3-cü maddəsi (Əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanının fəaliyyətinə maneə olma) üzrə rəsmiləşdirilib. İşə məhkəmədə baxılıb.

Məhkəmənin qərarı ilə Yunis Nəbiyev İnzibati Xətalar Məcəlləsinin 539.3-cü maddəsi ilə nəzərdə tutulmuş inzibati xətanı törətməkdə təqsirli bilinib və bu Məcəllənin 116.1-ci maddəsinə əsasən, şərti olaraq 2.000 manat məbləğində cərimə edilib. Şəxs tərəfindən törədilmiş hüquqpozmanın aradan qaldırılması üçün bir ay müddət müəyyən olunub və nəzərdə tutulan müddətdə hüquqpozma aradan qaldırılarsa, cərimə ödənilməyəcək.

Qeyd edək ki, Yunis Nəbiyev “6-cı mərtəbə” MMC-nin də rəhbəri olub. Şirkətin prezidenti isə Atəş Təhməzovdur. O, Azərbaycan Qida Təhlükəsizliyi Agentliyinin (AQTA) sədri Qoşqar Təhməzlinin qardaşıdır.(Qaynarinfo)

VİDEO LİNKDƏ: https://www.bizimesr.com/az/post/tehmezlinin-qardasinin-sirketi-resmi-yoxlamaya-mane-olublar----huner-insaat--video-21143

Paytaxtı yağış suları ağuşuna aldıqdan sonra yaranan problemlərin həlli istiqamətində Bakı meri Eldar Əzizovun göstərişi ilə tələsik təmizlik, iməclik, sil-süpür işlərinə start verildi. Demək olar ki, bütün rayon icra başçıları sürətli şəkildə sosial şəbəkələrdə və rəsmi saytlarında foto və videolar paylaşdılar. Hətta Eldar Əzizov Bakı küçələrini yudu, digər rayon icra başçıları da tələsik müxtəlif tədbirlər görərək bunu ictimailəşdirdilər.

Amma nədənsə Nərimanov rayon icra başçısı bu təmizliklərdə, abadlıq işlərində gözə dəymir. Bakının mərkəzi rayonlarından biri olan Nərimanovda nə iməclik keçirildi, nə də hər hansı aktivlik müşahidə olundu. Əslində səbəb bəllidir. Nərimanov rayon icra başçısı Elgin Həbibullayev, görünür, Eldar Əzizov Bakı meri olduğu halda belə, heç kimdən çəkinmir və narahatlıq hiss etmir. Üstəlik, Eldar Əzizovun media məsələlərini həll edən şəxsin də Elgün Həbibullayev üçün çalışdığı qeyd olunur.

Bu qədər narazılığın fonunda Elgin Həbibullayevin kənarda qalması, görünməz olması da, görünür, başqa bir planın və ya məqsədin tərkib hissəsidir. Elgin Həbibullayevin fəaliyyətinin aktiv olub-olmaması Nərimanov rayon İcra Hakimiyyətinin rəsmi saytından da açıq görünür. Bu sayt vətəndaşlarla görüş günlərini elan etmək, görüşlər barədə məlumat yaymaq və görülmüş işlər haqqında ictimaiyyətə hesabat vermək üçündür. Saytdakı məlumatlardan isə belə qənaətə gəlmək olur ki, Elgin Həbibullayev ya hələ də Novruz tətilindədir, ya da mövcud problemlər onu narahat etmir.

Hər halda, 180 mindən artıq əhalisi olan, şəhərin mərkəzində yerləşən bir rayonun icra başçısı işləməli, rayonun sosial-iqtisadi həyatı ilə yaxından məşğul olmalıdır.

Bizimesr.az

İnşaat sektorda fəaliyyət göstərən"Şinkar Holding" şirkətinin rəhbəri Ələsgər Mehdiyevin külli miqdarda vergi borcu yaranıb.

"Şinkar Holding" Məhdud Məsuliyyətli Cəmiyyətinin (MMC) İqtisadiyyat Nazirliyi yanında Dövlət Vergi Xidmətinin Milli Gəlirlər Baş İdarəsinə 357.629,37 AZN vergi borcu var.

Qeyd edək ki, nizamnamə kapitalı 3.000.000 manat olan şirkətin həm də qanuni təmsilçisi Mehdiyev Ələsgər Fərrux oğludur. /Qaynarinfo/

Bakıda fəaliyyət göstərən bəzi apteklər müştəriyə ƏDV-nin bir hissəsinin geri qaytarılması üçün tələb olunan kassa çekini verməkdən boyun qaçırır. Müştəri çeki tələb etdikdə isə aptekdəki satıcılar müxtəlif səbəblərlə özlərini haqlı çıxarmağa çalışır. Belə bir hal Nərimanov rayonu ərazisində fəaliyyət göstərən “Ozon” aptekdə yaşanıb. Belə ki, vətəndaşların bildirdiyinə görə, aptekdə edilən alışlar zamanı bəzi hallarda ƏDV ilə bağlı qaydalara əməl olunmur.

Bizim.Media-ya müraciət edən müştəri bildirib ki, sözügedən aptekdən təxminən 40 manatlıq dərman vasitəsi alıb. Lakin ödənişdən sonra ona təqdim edilən qəbzdə ƏDV məbləği göstərilməyib. Alıcı bunun səbəbini soruşduqda aptek əməkdaşı dərmanlara endirim tətbiq olunduğunu və bu səbəbdən ƏDV-nin verilmədiyini bildirib.

Müştərinin sözlərinə görə bənzər hal sözügedən aptekdə bir neçə dəfə təkrarlanıb.

Məsələnin problemli tərəfi ondan ibarətdir ki, qüvvədə olan qanunvericiliyə görə, endirim tətbiq edilməsi ƏDV-nin hesablanmaması üçün əsas hesab olunmur. Satış hansı məbləğ üzərindən həyata keçirilirsə, həmin məbləğə uyğun olaraq ƏDV mütləq şəkildə hesablanmalı və fiskal qəbzdə əks etdirilməlidir.

Məsələ ilə bağlı “Ozon Aptek” şəbəkəsi ilə əlaqə saxladıq.

Aptek əməkdaşları bütün müştərilərə ƏDV məbləği göstərilmiş qəbz verdiklərini israrla bildirdilər. Lakin redaksiyamıza təqdim olunan qəbzlərdə ƏDV qeyd olunmayıb. Bu fakt özü-özlüyündə sözügedən aptek şəbəkəsinin qanunvericiliyə əməl etmədiyini göstərir.

Məlumat üçün bildirək ki, Azərbaycanda aptek və digər ticarət obyektlərində alıcıya ƏDV (yəni kassa çeki / fiskal qəbz) təqdim etməmək qanun pozuntusu sayılır və bununla bağlı cərimələr İnzibati Xətalar Məcəlləsi ilə tənzimlənir.

Alıcıya kassa çeki (ƏDV qəbzi) verilmədikdə ilk dəfə pozuntuya görə obyekt sahibinə 1,000 manatdan 2,000 manatadək, təkrar pozuntuya görə (1 il ərzində) 2,000 manatdan 4,000 manatadək, daha ciddi və sistemli pozuntu hallarına görə isə 4,000 manatdan 6,000 manatadək cərimə nəzərdə tutulur.(Bizim.Media)

Azərbaycan Respublikası Fövqəladə Hallar Nazirliyinin Dövlət Yanğın Nəzarəti Xidməti tərəfindən ehtimal olunan qiyməti 49.992,67 AZN təşkil edən müxtəlif təyinatlı mebellərin satınalması həyata keçirilir.

Satınalma çərçivəsində erqonomik dizayna və 120–130 kq yükdaşıma qabiliyyətinə malik 40 ədəd müsafir kürsüsü, ümumi ölçüləri 1430×620×2520 mm olan 1 ədəd sütun üzləmə, tənzimlənən hündürlüklü və 360 dərəcə fırlanma funksiyalı 3 ədəd işçi kreslosu, habelə geniş saxlama imkanlı 5920×530×3160 mm ölçülü 1 ədəd böyük dolab sifariş edilir. Siyahıya həmçinin multimedia avadanlıqları üçün 1 ədəd TV stend, daxili asılqan sistemli 5 ədəd paltar dolabı, ofis texnikası üçün 1 ədəd printer altı, 2400×1200×750 mm ölçülərində 1 ədəd toplantı masası və müxtəlif ölçülü saxlanma dolabları, o cümlədən 2 ədəd kupe tipli dolab daxildir. Bundan əlavə, dəst daxilində 40 ədəd stulla təchiz edilmiş, hər biri 4 siyirməli olan 40 ədəd masanın tədarükü nəzərdə tutulur. Bütün məhsullar yüksək keyfiyyətli, aşınmaya və korroziyaya davamlı materiallardan hazırlanmalı, dövlət standartlarına cavab verməli və rəng seçimi sifarişçi ilə razılaşdırılmalıdır.

Qeyd edək ki, Dövlət Yanğın Nəzarəti Xidmətinin rəisi general-mayor Vaqif Tofiq oğlu İbrahimovdur. Tofiq İbrahimov 2004-2010-cu illərdə Qəbələ, 2010-2012-ci illərdə Lənkəran, 2012-2024-cü illərdə Ağdaş rayonlarında icra başçısı kimi çalışıb.(Xalq.online)

Azərbaycan Dövlət Rəssamlıq Akademiyasında 2 aydır tələbələrin təqaüdü ödənilmir.

Xezerxeber.az xəbər verir ki, tələbələr sosial şəbəkələrdə etdikləri paylaşımlarda belə ediblər. Məsələyə aydınlıq gətimək üçün akademiyanın tələbələri ilə görüşdük.

Tələbələr bildirir ki, bununla bağlı rəhbərliyə müraciət etsələr də, məsələyə aydınlıq gətirən olmayıb.

Rəssamlıq Akademiyasından sorğumuza cavab olaraq bildirilib ki, məsələ rəhbərlik tərəfindən ciddi nəzarətə götürülüb. Hazırda müvafiq sənədləşmə işlərinin qısa müddət ərzində tamamlanması və gecikmiş təqaüdlərin tam şəkildə ödənilməsi istiqamətində işlər intensiv şəkildə davam etdirilir. Gecikmənin səbəbləri aradan qaldırılaraq, ödənişlərin yaxın zamanda tam şəkildə həyata keçirilməsi nəzərdə tutulur”, – deyə təhsil müəssisəsindən bildirildi.

Xezerxeber.az mövzu ilə bağlı daha ətraflı videomaterialı təqdim edir.

Binəqədi rayonu ərazisində qanunsuz tikintilərlə bağlı mediada və sosial platformada dəfələrlə vətəndaş şikayətləri yayımlanıb.

Xalq -ın xəbərinə yenidən Binəqədi rayon Biləcəri qəsəbəsində qanunsuz tikinti aparıldığı iddia olunur.

Biləcəri qəsəbəsində fəaliyyət göstərən Rəşid İsmaylov 70 ünvanında yerləşən “Aliço” ailəvi restoranında qanunsuz tikinti aparıldığı bildirilir. Təmir adı altında artırma aparılması bir çox suallar ortaya çıxarır.

Belə bir məlumat sosial platformada yayılıb. Bildirilir ki, “Aliço” ailəvi restoranında otaqlar sökülüb və genişləndirilir.

Aparılan tikinti ilə bağlı “Aliço” restoranı ilə əlaqə yaratdıq. Restorandan İlham Babayev əməkdaşımıza bildirib ki, bir neçə gün öncə yağan güclü yağışlarda restoranın ərazisində olan otaqları dam örtüyü zədələnib və aparılan iş dam örtüyünün dəyişilməsi ilə bağlıdır.

Lakin müşahidələrimiz onu deməyə əsas verir ki, yağış tək dam örtüyünün dəyəşdirilməsinə səbəb göstrilsədə ərazidə olan otaqlar divarlarıda sökülərək genişləndirilməsi üçün daşlar və digər tikinti materialları gətirilib.

Yağan yağış restoranın ərazisində yerləşən bütün otaqlarının dam örtüyünü sıradan çıxarıb? Bu suala isə cavablandırılmadı. Belə hallar ilk deyil bu sxem üzrə qanunsuz tikinti və artırma işləri aparılması mütəmadi müşahidə olunur. Tətil günləri və yaxud hər hansı bir hadisədən sui-istifadə edən qanunsuz tikinti aparılması üçün məmurlarda hansısa şərtlər göz yumurlar.

Qeyd edək ki, “Aliço” ailəvi restoranında dam örtüyünün dəyişilməsi adı altında obyektin həyətində ciddi şəkildə tikinti aparılır və bunu aidiyyatı qurumlardan gizlədir.

Məsələ ilə bağlı Binəqədi rayon icra hakimiyyətində münasibət öyrənmək mümkün olmadı.(Xalq.online)

İsrailin Livana zərbələri davam etdirməsi Vaşinqton və Tehran arasında İslamabadda planlaşdırılan danışıqları mənasız edəcək.

Bu barədə İran Prezidenti Məsud Pezeşkian “X” hesabında yazıb.

Onun sözlərinə görə, İsrailin Livana qarşı təkrar təcavüzü atəşkəs haqqında ilkin sazişin açıq-aşkar pozulması deməkdir.

“Bu, aldatma və mümkün razılaşmalara riayət olunmaması barədə təhlükəli siqnaldır. Bu cür hərəkətlərin davam etdirilməsi danışıqları mənasız edəcək”, - paylaşımda deyilir.

Pezeşkian həmçinin İran hərbçilərinin əllərini daim “tətikdə” saxladığını bildirib.

“İran heç vaxt livanlı qardaş və bacılarını tərk etməyəcək”, - o əlavə edib.A

Fövqəladə Hallar Nazirliyində (FHN) Ərizələrin və şikayətlərin qəbulu şöbəsinin müdiri polkovnik-leytenant Anar Pirməmmədov vəzifəsinə qaytarılıb.

Qaynarinfo-nun əldə etdiyi məlumata görə, model və bloger Çelsi Baxşıyevanın yaydığı videolarla gündəmə gələn Anar Pirməmmədovun sözügedən hadisəyə görə fövqəladə hallar naziri general-polkovnik Kəmaləddin Heydərov tərəfindən vəzifəsindən uzaqlaşdırıldığı deyilirdi.

Etibarlı mənbədən əldə etdiyimiz məlumata görə, artıq hadisə ilə bağlı araşdırma başa çatdığından Anar Pirməmmədov vəzifəsinə bərpa olunub.

Qeyd edək ki, Çelsi Baxşıyeva Anar Pirməmmədova qarşı ciddi ittihamlar səsləndirib. O iddia edib ki, aralarında sevgi münasibəti olub. Daha sonra Pirməmmədovun evli və iki övladı olduğunu öyrənib, şəxsi xarakterli video və yazışmaları sosial şəbəkələrdə yayıb.

Onu da bildirək ki, Anar Pirməmmədov Təhsil Nazirliyinin sabiq Aparat rəhbəri İlham Pirməmmədovun qardaşı oğludur. Sabiq aparat rəhbəri qardaşı oğlu ilə bağlı açıqlama verərək onun çətin vəziyyətdə və ölkədə biabır olduğunu demişdi.(Qaynarinfo)