Goranboy rayon sakini Yadıgar Sərdarlı müraciət edərək Kəpəz Hospital barədə ciddi iddialar səsləndirib. Onun sözlərinə görə, oğlunun əməliyyatı üçün müraciət etdiyi klinikada yaşananlar təkcə maddi zərər deyil, həm də özəl tibb müəssisələrində nəzarət mexanizmlərinin necə işlədiyi ilə bağlı ciddi suallar yaradır.Yadıgar Sərdarlı bildirir ki, oğlunun əməliyyatı ilə bağlı hospitala müraciət etdikdən sonra onu Anar adlı şəxsə yönləndiriblər. Daha sonra həmin şəxslə birlikdə həkimin otağına daxil olub. Vətəndaşın iddiasına görə, Anar əməliyyatın qiymətinin 2500 manat olduğunu bildirib.
Şikayətçinin sözlərinə görə, ilkin olaraq klinikanın kassasına 2200 manat ödəniş edib və bu ödənişi təsdiq edən çek hazırda da əlindədir. O iddia edir ki, söhbət cəmi yarım saat davam edən, xalq arasında "tük batması" kimi tanınan cərrahi müdaxilədən gedirdi. Mediatvaz.com xəbər verir ki, hadisələr bundan sonra daha da müəmmalı xarakter alıb. Yadıgar Sərdarlının iddiasına görə, sonradan Ariz adlı həkim ona bildirib ki, pulu alan şəxs həm bir neçə vətəndaşın, həm də klinikanın pulunu götürərək yoxa çıxıb. Bundan sonra isə müxtəlif mənbələrdən öyrənib ki, həmin əməliyyatın real qiyməti cəmi 300-400 manat civarındadır. Şikayətçi bildirir ki, Ariz və Süleyman adlı həkimlər ona dəfələrlə "şikayət etmə, pulunu qəpiyinə qədər qaytaracağıq" vədi versələr də, uzun müddət keçməsinə baxmayaraq vəsaiti geri ala bilməyib. Əgər vətəndaşın səsləndirdiyi bu iddialar öz təsdiqini taparsa, burada çox ciddi suallar yaranır: Xəstəni niyə hospitalın rəsmi əməkdaşı olduğu aydın olmayan şəxsəistiqamətləndirilib? Əməliyyat qiymətini niyə həkim deyil, başqa bir şəxs müəyyən edib,Xəstədən alınan pullar hospitalın rəsmi kassasına daxil edilibmi,Əməliyyatın real qiyməti 300-400 manat olduğu halda, vətəndaşdan niyə 2500 manat tələb edilib? Bu iddialar təkcə bir vətəndaşın maddi zərəri məsələsi deyil. Söhbət insanların sağlamlığı və etibar etdiyi tibb müəssisələrində şəffaflığın təmin olunmasından gedir. Özəl klinikaların fəaliyyəti yalnız müasir avadanlıq və reklamla deyil, ilk növbədə qanunlara və etik prinsiplərə əməl etməklə qiymətləndirilməlidir.Redaksiya olaraq məsələ ilə bağlı Kəpəz Hospitalın rəhbərliyinin, adı hallandırılan şəxslərin və aidiyyəti dövlət qurumlarının mövqeyini dərc etməyə hazır olduğumuzu bildiririk.

Mediatvaz.com

Azərbaycan Prezidenti İlham Əliyev və Slovakiya Prezidenti Peter Pelleqrini iyulun 14-də Şuşada mətbuata bəyanatlarla çıxış edirlər.

Bu barədə Prezidentin Mətbuat Xidməti məlumat yayıb.

Jurnalist Arifə Əliyeva “Rosko” kolbasalarını istehsal edən şirkətlə bağlı maraqlı araşdırma aparıb.
Müəllif şirkətin istifadə etdiyi ət və ət məhsullarının keyfiyyətinin nəinki şübhəli olduğunu, habelə onun antisanitar qaydada hazırlandığını qeyd edib.
Bundan başqa, şirkətin “əl dəyişdirməsi”ndən sonra nizamnamə kapitalının müəmmalı şəkildə min dəfələrlə artmasını da diqqət mərkəzinə çəkib.
O qeyd edib ki, bu gün qida bazarında bir çox marka var ki, reklamları, tanıtımları və geniş yayılmış satış şəbəkələri ilə diqqət çəkir. Amma hər hansı məhsulun məşhur simalar vasitəsilə reklam olunması onun avtomatik olaraq yüksək keyfiyyətli və təhlükəsiz olması anlamına gəlmir.
Əsas məsələ həmin məhsulun hansı şəraitdə istehsal olunması, istifadə edilən xammalın keyfiyyəti və istehlakçıya təqdim edilən qidanın təhlükəsizliyidir.
“Rosko” brendi “Harun N” MMC-yə məxsusdur. Açıq reyestr məlumatlarına görə, şirkət 2024-cü ildə qeydiyyata alınıb. Maraqlı məqam ondan ibarətdir ki, şirkətin nizamnamə kapitalında qısa müddət ərzində ciddi dəyişikliklər baş verib.
Şirkətin nizamnamə kapitalı 2025-ci ilin fevral ayınadək 50 manat olub. Daha sonra bu məbləğ 965 050 manata qədər artırılıb. 2025-ci ilin may ayında isə nizamnamə kapitalı 3 776 050 manata çatdırılıb. Bir neçə ay ərzində baş verən bu dəyişikliklər diqqət çəkən məqamlardan biridir.
“Harun N” MMC-nin qanuni təmsilçisi Fərəcullayev Əliheydər Şamil oğludur. O, daha əvvəl “Zəhmət-Ruzi” MMC-yə rəhbərlik edib. Həmin şirkət “Sab” ticarət nişanı ilə ət məhsullarının istehsalı və satışı ilə məşğul olub.
Maraqlı hal isə şirkətin əvvəlki qanuni təmsilçisi ilə bağlıdır. 2025-ci ilin fevral ayınadək “Harun N” MMC-nin qanuni təmsilçisi Axundzadə Rasim Elmar oğlu olub. Rasim Axundzadə ilə bağlı isə Azərbaycan Qida Təhlükəsizliyi Agentliyinin 2021-ci ildə yaydığı məlumat mövcuddur.
AQTA-nın məlumatına görə, Bakı şəhəri, Sabunçu rayonu, Ramana qəsəbəsi, Südçülük Sovxozunda fəaliyyət göstərən, fiziki şəxs Axundzadə Rasim Elmar oğluna məxsus quş əti emalı müəssisəsində aparılan yoxlama zamanı qida təhlükəsizliyi sahəsində bir sıra nöqsanlar aşkarlanıb.
Agentliyin açıqlamasında bildirilirdi ki, müəssisədə mexaniki üsulla hazırlanan toyuq farşının istehsalında “Omega” əmtəə nişanlı E124 qida əlavəsindən istifadə edildiyi müəyyən olunub. Həmçinin məhsulların etiket məlumatlarında, qablaşdırılmasında və markalanmasında nöqsanlar aşkar edilib.
Yoxlama zamanı avadanlıqların yuyulması prosesində də çatışmazlıqlar müəyyən edilib, lazımi yuyucu-dezinfeksiyaedici vasitələrdən istifadə olunmadığı bildirilib. Müəssisədən götürülən nümunələr laborator müayinəyə təqdim olunub, 375 kiloqram toyuq farşı dövriyyədən çıxarılıb və müəssisə rəhbəri inzibati məsuliyyətə cəlb edilib.
Bütün bunlar bir sıra suallar yaradır. Qida istehsalı elə bir sahədir ki, burada şəffaflıq və nəzarət xüsusi əhəmiyyət daşıyır. “Rosko” məhsullarının istehsal prosesi necə təşkil olunub? İstifadə olunan xammalın mənbəyi haradır? Müəssisədə sanitariya və qida təhlükəsizliyi tələblərinə hansı səviyyədə əməl olunur?
Bu sualların cavabı reklam çarxlarında deyil, şəffaf yoxlamalar və rəsmi açıqlamalarla ortaya çıxmalıdır. Çünki söhbət insanların gündəlik istifadə etdiyi qida məhsullarından və birbaşa sağlamlıq məsələsindən gedir.(Tribuna.az)
Qarşı tərəfi də dinləməyə hazırıq.

Qaçqınların və Məcburi Köçkünlərin İşləri üzrə Dövlət Komitəsi (“Qaçqınkom”) növbəti tenderini elan edib.

Komitənin Mənzil İstismar Departamenti işçilər üçün xüsusi geyim formalarının satınalınmasını həyata keçirmək fikrindədir.

Məlumatda qeyd edilir ki, bu məqsədlə 60 min manatlıq büdcə müəyyən edilib. Departament tenderin qalibi olacaq şirkətə 370 ədəd qısaqol mayka, 370 ədəd xəbərdaredici jilet, 350 cüt qısa boğaz çəkmə, 200 cüt uzun boğaz çəkmə, 350 ədəd papaq və 350 ədəd qış gödəkçəsi sifariş edəcək.(Tribuna.az)

Səhiyyə Nazirliyi “Caspian International Hospital” Məhdud Məsuliyyətli Cəmiyyətində (MMC) yoxlama aparıb.

Azərbaycan Respublikası Səhiyyə Nazirliyinin Analitik Ekspertiza Mərkəzi tərəfindən “Caspian International Hospital”da aparılan yoxlama zamanı İnzibati Xətalar Məcəlləsinin 215.1-ci, 221.1-ci və 221.10-cu maddələri üzrə protokol tərtib olunaraq iş məhkəməyə göndərilib.

Məhkəmə materiallarından məlum olub ki, Analitik Ekspertiza Mərkəzinin apardığı plandankənar yoxlama zamanı klinikada lisenziyada nəzərdə tutulmayan ginekologiya fəaliyyəti üzrə ekstrakorporal mayalanma (EKM) prosedurlarının həyata keçirildiyi, həmçinin dövlət qeydiyyatından keçməmiş, yararlılıq müddəti bitmiş və saxlanma şəraitinə riayət edilməyən dərman vasitələrinin mövcud olduğu müəyyən edilib.

Yoxlama zamanı, həmçinin tibb avadanlıqları və cihazlarının normativ-texniki tələblərə cavab vermədiyi, müəssisənin lisenziyada göstərilməyən tibbi fəaliyyət növlərini həyata keçirdiyi, dövlət qeydiyyatından keçməmiş, yararlılıq müddəti bitmiş, saxlanma şəraitinə riayət olunmadan və qismən qablaşdırılmamış vəziyyətdə dərman vasitələrinin saxlanıldığı aşkarlanıb. Aşkar edilmiş faktlar fotoşəkillərlə sənədləşdirilərək akta əlavə olunub.

Yoxlama müəssisənin baş direktoru Cəbrayıl Abbasovun iştirakı ilə aparılıb. O, izahatında bildirib ki, xəbərdarlıqdan sonra müəssisədə sonsuzluğun müalicəsi ilə bağlı prosedurlar dayandırılıb. Onun sözlərinə görə, aşkar edilmiş embrionlar əvvəllər müalicə almış pasiyentlərdən qalan embrionlardır.

İş materiallarında yer alan Analitik Ekspertiza Mərkəzinin ekspert rəyində isə qeyd olunub ki, yoxlama zamanı aşkar edilmiş faktlar müəssisədə yardımçı reproduktiv texnologiyalar üzrə fəaliyyətə dair tibbi sənədləşmənin lazımi qaydada təqdim edilmədiyini, fəaliyyətin dayandırılması barədə verilmiş məlumatın laboratoriyada aşkar olunan sənədlər və embrionların mövcudluğu ilə uyğunluq təşkil etmədiyini göstərir.

Məhkəmənin qərarı ilə “Caspian International Hospital” MMC İnzibati Xətalar Məcəlləsinin 215.1-ci, 221.1-ci və 221.10-cu maddələrində nəzərdə tutulan inzibati xətaları törətməkdə təqsirli bilinərək 6 000 manat məbləğində cərimə edilib.(Qaynarinfo)

Mən həkim deyiləm, ailəmdəki həkimlərin də bəhs edəcəyim problemləri yoxdur. Problem bizim gənc həkimlərimizin, səhiyyəmizin sabahı olan idealist, iş həyatının sonuna qədər 11+2 il təhsil almalarına rəğmən durmadan oxuyan, öyrənən gənc təbiblərimizindir.
Bu yazını əslində rəsmi qurumlarımıza – Səhiyyə Nazirliyi, Diasporla İş üzrə Dövlət Komitəsi və Azərbaycan-Türkiyə Parlamentlərarası Dostluq Qrupuna ünvanlayıram. Onların hər birinin funksiyası fərqli olduğu üçün, bu məktubun vahid, lakin hər üç qurumun səlahiyyət və maraq dairəsinə xitab edən rəsmi-analitik formatda yazılmasına çalışdım.
Hörmətli nazir, hörmətli komitə sədri və hörmətli millət vəkilləri!
Bu yazıdakı məqsədim qardaş Türkiyə Respublikasında uzmanlıq (rezidentura) təhsili alan və gələcəkdə ölkəmizin tibb sahəsinə böyük töhfələr verməyə hazırlaşan minlərlə gənc azərbaycanlı “asistan həkimin” qarşılaşdığı ciddi hüquqi və sosial problemə diqqətinizi cəlb etmək, bu məsələnin dövlətlərarası dialoq müstəvisində həllinə dəstək verməyinizi xahiş etməkdir.
Bildiyim qədəri ilə bu qurumlar mövcud problemdən xəbərdardırlar və onlar lazımi dəstəyi göstərmək üçün addımlar da atıblar. Ancaq gəlinən nöqtədə aydın olur ki, problem çözüldə Ankarada çözüləcək. Bu səbəbdən də ümid edirəm ki, rəsmi orqanlarımız birləşib məsələni həll etmək üçün daha ciddi addımlar atacaq, rəsməni Ankaranı ədalətli qərar verməyə nail olacaqlar.
Hazırda Türkiyənin aparıcı tibb universitetlərində və dövlət xəstəxanalarında uzmanlıq təhsili alan əcnəbi həkimlərin böyük əksəriyyətini – təxminən 85-90 faizini Azərbaycan Respublikasının vətəndaşı olan gənclər təşkil edir. Bu gənclər ağır iş şəraitində, gərgin növbə qrafikləri ilə çalışaraq həm böyük təcrübə qazanır, həm də çalışdıqları səhiyyə müəssisələrində insan həyatının xilası naminə fədakarlıq nümayiş etdirirlər. Onların ən böyük hədəfi bu çətin və şərəfli təhsil yolunu uğurla tamamlayaraq Vətənə qayıtmaq və Azərbaycan səhiyyəsinin inkişafında yaxından iştirak etməkdir.
Lakin Türkiyə Böyük Millət Məclisinə (TBMM) 02.07.2026-cı il tarixində təqdim edilən 117 sıra nömrəli “Ali Təhsil Qanunu və bəzi qanunlarda dəyişiklik edilməsinə dair Qanun Təklifi”nin 1-ci maddəsi bu gənclərin gələcəyini və təhsillərini davam etdirmək imkanlarını ciddi təhlükə altına qoyur. Belə ki, qanun layihəsində nəzərdə tutulan yeni tənzimləmə əcnəbi asistan həkimlərin çalışdıqları xəstəxanaların dövriyyə kapitalından (döner sermaye) əlavə ödəniş almasının qarşısını almağı hədəfləyir.
Türkiyədəki mövcud iqtisadi şərait, yüksək kirayə və yaşayış xərcləri fonunda asistan həkimlərin aldığı baza təqaüdünün minimal yaşayış ehtiyaclarını belə qarşılamadığı hər kəsə məlumdur. Dövriyyə kapitalından edilən ödənişlər bu gənclər üçün əlavə gəlir deyil, onların ağır əməyinin qarşılığı və təhsillərini yarımçıq qoymamalarının yeganə maddi dayağıdır. Həmçinin, bu tənzimləmə Türkiyə Konstitusiya Məhkəməsinin 28.06.2022-ci il tarixli (2019/39033 nömrəli) bərabərlik və ayrı-seçkiliyin yolverilməzliyi ilə bağlı qəbul etdiyi rəsmi qərara da tamamilə ziddir.
Hörmətli dövlət rəsmiləri və millət vəkilləri!
Türkiyədə təhsil alan bu gənclər bizim gələcək intellektual və tibbi kapitalımızdır. Qanun layihəsinin bu şəkildə qəbul edilməsi minlərlə azərbaycanlı gəncin maddi imkansızlıq səbəbindən uzmanlıq təhsilini yarımçıq qoymasına, mənəvi sarsıntı keçirməsinə və böyük kadr itkisinə yol aça bilər.
Müvafiq qurumların Türkiyədəki həmkarları ilə mövcud sıx və səmimi münasibətlərini bildiyim üçün sizdən bu məsələyə təcili reaksiya verməyinizi xahiş edirəm.
İnanıram ki, iki qardaş ölkə arasındakı yüksək səviyyəli strateji müttəfiqlik münasibətləri çərçivəsində reallaşdırılacaq rəsmi dialoq və məsləhətləşmələr vasitəsilə sözügedən qanun təklifinin 1-ci maddəsinin layihə mətnindən çıxarılmasına və ya azərbaycanlı həkimlərin hüquqlarının qorunacağı şəkildə yenidən tənzimlənməsinə nail olmaq mümkündür.
Türkiyədə fəaliyyət göstərən azərbaycanlı asistan həkimlərin bu məsələ ilə bağlı geniş hüquqi və sosial əsasları ehtiva edən müraciət məktubunun mətnini rəsmi yazıma əlavə olaraq diqqətinizə təqdim edirəm.
Gənc həkimlərimizin səsinə səs verəcəyinizə və mövcud problemin həlli istiqamətində zəruri addımları atacağınıza dərin ümid və hörmətlə,
İbrahim Nəbioğlu
Aşağıda Türkiyədə çalışan azərbaycanlı asistan həkimlərin müraciət məktubunun mətnini paylaşıram. Bu məktubu onlarla gəncəcik övladlarımız imzalayıblar. Ancaq çalışdıqları xəstəxana və klinikalar tərəfində möhtəməl danlaq və ya təqibə məruz qalmasınlar deyə onların adlarını müraciətdən sildim…
Türkiyədə uzmanlıq təhsili alan əcnəbi asistan həkimlərin sosial vəziyyəti ilə bağlı məsələ yenidən gündəmə gəlib. Türkiyə Böyük Millət Məclisinə 02.07.2026-cı il tarixində təqdim edilən 117 sıra nömrəli “Ali Təhsil Qanunu və bəzi qanunlarda dəyişiklik edilməsinə dair Qanun Təklifi”nin 1-ci maddəsi bu gənc həkimlərin gələcəyinə birbaşa təsir edə biləcək məzmuna malikdir.
Bu gün Türkiyənin müxtəlif səhiyyə qurumlarında çox sayda əcnəbi asistan həkim tibb və diş həkimliyi üzrə uzmanlıq təhsili alır. Onlar əməkhaqqı almadan, ağır növbələrdə çalışır, xəstə baxır, tibbi prosesin içində yer alır və çalışdıqları qurumların dövriyyə kapitalına real töhfə verirlər. Buna baxmayaraq, onların əsas gəlir mənbələrindən biri hazırda təxminən 17.900 TL (647 AZN) təşkil edən ödənişdir.
Türkiyə şəraitində kirayə, qida, nəqliyyat və gündəlik yaşayış xərcləri nəzərə alındıqda bu məbləğin yetərli olmadığı aydındır. Məhz buna görə dövriyyə kapitalından edilən əlavə ödənişlər bu gənclər üçün sadəcə “əlavə gəlir” deyil, təhsillərini davam etdirə bilmələrinin əsas dayaqlarından biridir. Çünki bu ödəniş onların gördüyü işin, klinik xidmətə verdiyi əməyin və quruma qazandırdığı real töhfənin qarşılığıdır. Bu məsələ daha əvvəl Türkiyə Konstitusiya Məhkəməsinin də gündəmində olub.
Türkiyə Konstitusiya Məhkəməsinin 2019/39033, 28.06.2022-ci il tarixli qərarında bildirilib ki, Türkiyə vətəndaşı olan uzmanlıq tələbələri ilə əcnəbi vətəndaş olan uzmanlıq tələbələri gördükləri iş baxımından oxşar vəziyyətdədirlər. Hər iki qrup eyni səhiyyə sistemində çalışır, eyni məsuliyyəti daşıyır və dövriyyə kapitalına töhfə verir. Buna görə də onların dövriyyə kapitalından əlavə ödəniş almaq hüququ baxımından fərqli rəftara məruz qalması ayrı-seçkilik kimi qiymətləndirilib. Lakin yeni qanun təklifində yer alan 1-ci maddə faktiki olaraq əcnəbi asistan həkimlərin dövriyyə kapitalından əlavə ödəniş almasının qarşısını ala bilər. Bu isə həm Konstitusiya Məhkəməsinin əvvəlki hüquqi mövqeyi ilə ziddiyyət təşkil edir, həm də illərdir böyük fədakarlıqla çalışan gənc həkimlərin sosial vəziyyətini daha da ağırlaşdırır. Bu tənzimləmənin qəbul olunması bir çox asistan həkimi ciddi maddi çətinliklə üz-üzə qoya bilər.
Yaşayış xərclərini qarşılamaqda çətinlik çəkən bu gənclər üçün belə bir qərar təhsilin keyfiyyətinə mənfi təsir göstərə, hətta bəzi hallarda uzmanlıq təhsilinin yarımçıq qalmasına səbəb ola bilər. Məsələnin Azərbaycan üçün xüsusi önəmi var.
Hazırda Türkiyədə uzmanlıq təhsili alan azərbaycanlı gənclərin böyük bir hissəsi təhsili tamamladıqdan sonra vətənə qayıdaraq Azərbaycan səhiyyəsinə xidmət etməyi qarşısına məqsəd qoyub. Unutmaq olmaz ki, uzmanlıq təhsili yalnız dərs və imtahanlardan ibarət deyil. Bu, gecə növbələri, məsuliyyətli tibbi qərarlar, insan həyatı qarşısında daşıdığı böyük yük və davamlı peşəkar inkişaf deməkdir. Bu qədər ağır bir yolun içində gənc həkimlərin əməyinin qarşılığından məhrum edilməsi nə hüquqi, nə də vicdani baxımdan ədalətli görünür.
Bu səbəbdən 117 sıra nömrəli qanun təklifində yer alan 1-ci maddənin layihə mətnindən çıxarılması vacibdir. Çünki bu məsələ yalnız bir ödəniş məsələsi deyil; bu, fədakarlıqla çalışan, öyrənən və gələcəkdə həm Türkiyə, həm də Azərbaycan səhiyyəsinə töhfə verməyə hazırlaşan gənc həkimlərin əməyinə verilən dəyər məsələsidir.
İbrahim Nebioğlu
TEREF

Nəsimi Rayon İcra Hakimiyyəti növbəti ümumrayon iməciliyindən fotolar paylaşıb. Məlumatda prospektlərin, səkilərin, işıq dirəklərinin, məhəccərlərin yuyulduğu, yaşıllıqlara qulluq göstərildiyi qeyd olunur.
Amma bu fotolarda diqqəti çəkən tamam başqa bir məqamdır.
Bizimesr.com bildirir ki, küçələri süpürənlərin, məhəccərləri silənlərin, səkiləri yuyanların böyük əksəriyyəti yenə yaşlı qadınlardır. Elə yaşlı ki, onların bir çoxu pensiya yaşını çoxdan keçmiş, nəvə-nəticələri ilə vaxt keçirməli yaşdadır. Amma...

Ən acısı isə budur ki, bu mənzərə yeni deyil. İllərdir Bakı küçələrində eyni səhnəni görürük. Hansı rayona baxırsan bax, əlində süpürgə, belində iş jileti olan yaşlı nənələr və babalar. Qışın şaxtasında da onlar, yayın 40 dərəcə istisində də onlar.
Bəs illərdir alınan milyonlarla manatlıq kommunal texnikalar haradadır?
Bu biabırçılığa nə zaman son qoyulacaq?
Müasir küçə süpürən maşınlar, yuyucu avtomobillər, mexanikləşdirilmiş avadanlıqlar niyə bu insanların əməyini yüngülləşdirmir? Niyə XXI əsrdə hələ də şəhərin mərkəzində səki və məhəccərlər əsasən əl əməyilə təmizlənir? Özü də ahın insanların əməyi ilə...
Ən düşündürücü məqam budur ki, rayon icra hakimiyyəti bu fotoları uğur nümunəsi kimi paylaşır.
Nəsimi rayon İcra Hakimiyyətinin başçısı Tahir Budaqov - bu fotolarla nə göstərmək istəyirsiniz?
Şəhərin təmiz olduğunu, yoxsa şəhərin təmizliyinin hələ də ahıl qadınların fiziki əməyi hesabına təmin edildiyini?
Bu fotolarla iş gördüyünüzü göstərmək istəyirsiz?

Bu yaşda insanların saatlarla küçə süpürməsi, ağır fiziki iş görməsi normal qəbul edilməməlidir. Pensiya yaşı istirahət, sağlamlığın qorunması və həyatın daha rahat mərhələsi olmalıdır. Əgər şəhərin təmizliyi hələ də əsasən ahıl insanların çiyinlərindədirsə, bu, təkcə kommunal xidmətlərin deyil, sosial siyasətin də müzakirə edilməli məsələsidir.
Niyə illər keçir, texnologiyalar dəyişir, kommunal xidmətlərə yeni texnikalar alınır, rəqəmsallaşmadan danışılır, amma küçələrdə dəyişməyən tək mənzərə yenə də əlində süpürgə ilə işləyən ahıl qadınlardır?
Dövlət qurumları bu fotoları fəxrlə paylaşmazdan əvvəl, həmin fotoların cəmiyyətə hansı mesajı verdiyini heç düşünürlərmi?
Bir bir və ya daha çox şəxs, skuter, siqvey və küçə şəkili ola bilər
Bir küçə şəkili ola bilər
Bir bir və ya daha çox şəxs, küçə və yol şəkili ola bilər
Şəkilin açıqlaması yoxdur.(Bizimesr.com)

Yerli idarəetmə orqanlarının əsas vəzifəsi vətəndaşın rifahını təmin etmək, rayonda sosial-iqtisadi inkişafa təkan vermək olduğu halda, Qubada tamamilə fərqli və acınacaqlı bir mənzərə hökm sürür

Sosial şəbəkələrdə yayılan məlumatlara əsasən xəbər verir ki, rayon sakinlərinin şikayətləri Quba Rayon İcra Hakimiyyətinin Sosial-iqtisadi inkişaf və proqnozlaşdırılması şöbəsinin müdiri Şahin İsrafilovun öz vəzifə səlahiyyətlərini şəxsi maraqlarına tabe etdirdiyini göstərir. Əslən Xaçmazdan olan bu məmurun Qubada yaratdığı dözülməz bürokratik maneələr və qeyri-qanuni tələblər artıq narazılığı pik həddə çatdırıb.

Qeyd edilir ki, Şahin İsrafilovun rəhbərlik etdiyi şöbə kağız üzərində "inkişaf və proqnozlaşdırma" ilə məşğul olsa da, reallıqda o, rayonun "qara kassası" funksiyasını yerinə yetirir. Tikinti sektorunu tamamilə nəzarətə götürən şöbə müdiri, rəsmi dövlət portallarını və qanunları heçə sayaraq öz şəxsi "tarif və rüsumlarını" tətbiq edir. Məlumatlara görə, rayonda baş qaldıran qanunsuzluqların miqyası belədir:

Fərdi yaşayış evləri: İddia olunur ki, sadə vətəndaşın öz torpağında başını soxmağa bir daxma tikməsi və layihənin təsdiqi üçün 2000 manat "haqq" tələb olunur.

Kommersiya obyektləri: İddiaya görə, sahibkarlığın inkişafına dəstək vermək əvəzinə, hər yeni tikilən obyektdən 10 000 manat rüşvət yığılır.

Rəqəmsal korrupsiya: Hətta dövlətin şəffaflıq üçün yaratdığı Şəhərsalma və Tikinti Portalı sisteminə daxil edilən layihələr belə bu məmurun maliyyə süzgəcindən keçməsə, təsdiqini tapa bilmir.

Bildirilir ki, korrupsiya şəbəkəsi təkcə fərdi tikintilərlə bitmir. Rayonun abadlaşdırılması və sosial layihələr üçün ayrılan dövlət vəsaitləri də bu talançılıqdan payını alır. İddialara görə, Qubada udulan tenderlərin düz 20%-i hələ işə başlanılmamışdan öncə birbaşa Şahin İsrafilova çatmalıdır. Bu isə o deməkdir ki, rayonda görülən işlərin keyfiyyəti kökündən kəsilir, dövlət büdcəsi talan edilir.

Maraqlıdır ki, İcra Hakimiyyətinin memarı Murad Qədirov bu iyerarxiyada sadəcə bir "imza funksiyası" yerinə yetirir. Şahin İsrafilovun "yaşıl işıq" yandırmadığı, "haqqı" ödənilməyən heç bir memarlıq layihəsi Murad Qədirov tərəfindən təsdiq edilə bilməz. Baş memar öz peşə prinsiplərini və qanunun tələblərini deyil, şöbə müdirinin korrupsioner tapşırıqlarını icra etməklə məşğuldur.

Məlumatda qeyd edilir ki, Şahin İsrafilovun bu qədər rahat və cəzasız hərəkət etməsinin arxasında rayon rəhbərliyinin ona olan sonsuz etibarı dayanır. Lakin gələn xəbərlər göstərir ki, İsrafilov bu güvəndən sui-istifadə edərək təkcə xalqı yox, öz rəhbərliyini də aldatmağı bacarır. Özünə yaxın və güvəndiyi şəxslər vasitəsilə topladığı külli miqdarda qeyri-qanuni vəsaitləri gizlətməklə, o, əslində rəhbərlikdən də oğurluq edir, özünə gizli maliyyə imperiyası qurur. /Poliqon/

Azərbaycan Dəmir Yollarının (ADY) rəqəmsallaşma istiqamətində atdığı addımlar təqdirəlayiq olsa da, tətbiq edilən xidmətlərin etibarlı və stabil işləməsi təmin edilmədən istifadəyə verilməsi sərnişinlər üçün ciddi narahatlıq yaradır.

Xüsusilə turniketlərdə NFC vasitəsilə ödəniş zamanı tez-tez problemlər yaşanır. Bir çox hallarda sistem kartları oxumur, bəzi beynəlxalq ödəniş sistemlərini, o cümlədən Mastercard kartlarını qəbul etmir. Nəticədə turniketlər qarşısında uzun növbələr yaranır, sərnişinlər vaxt itirir və narazılıq artır.

Şikayətçi sərnişin bildirir ki, - "bu gün səhər isə turniketlər Visa kartına qoşulmuş NFC ödənişini də qəbul etmədi. Problemi həll etmək üçün məcbur qalıb ayrıca fiziki gediş kartı almaq lazım gəldi. Halbuki NFC ödəniş sisteminin əsas məqsədi sərnişinlərin rahat, sürətli və əlavə vaxt itirmədən keçid etməsini təmin etməkdir. Mövcud vəziyyətdə isə insanlar həm gecikir, həm də arxada gözləyən sərnişinlər qarşısında narahat vəziyyətə düşürlər".

Diqqət çəkən digər məqam odur ki, bu problem yeni deyil. Uzun müddətdir davam etməsinə baxmayaraq, onun aradan qaldırılması istiqamətində effektiv tədbirlərin görüldüyü müşahidə olunmur.

Dövlət qurumları ölkədə rəqəmsallaşmanın genişləndirilməsinə xüsusi önəm verdiyi bir vaxtda, belə elementar xidmətlərin etibarlı işləməməsi suallar doğurur. Üstəlik, NFC ödəniş xidməti digər dövlət qurumlarının nəqliyyat sistemlərində uğurla və sürətli şəkildə işlədiyi halda, ADY-də eyni rahatlığın təmin olunmaması sərnişinlərin haqlı narazılığına səbəb olur.

ADY son dövrlər sima ilə tanınma və digər innovativ xidmətləri təqdim edir. Lakin mövcud NFC ödəniş sistemindəki problemlər aradan qaldırılmadan yeni texnologiyaların tətbiqi onların praktik effektivliyi ilə bağlı da suallar yaradır.

Bizimesr.com

Bakıda fəaliyyət göstərən "The Mood Bistro & Grill" restoranında biznes lanç zamanı təqdim olunan yeməklərin keyfiyyəti və xidmət səviyyəsi ilə bağlı narazılıq səsləndirilib.

Şikayətçi əvvəlcə sifariş edilən ispanaqlı şorbanın içərisində iri doğranmış və qızardılmamış soğanlar olduğunu deyib: "Bu səbəbdən şorbanı yeyə bilmədik. Müraciətdən sonra restoran əməkdaşları şorbanı mərci şorbası ilə əvəz etsələr də, əsas narazılıq daha sonra təqdim olunan əsas yeməklə bağlı yarandı".

Qeyd olunur ki, əsas yemək kimi təqdim edilən toyuq qanadlı kababın iç hissəsi çiy olub. Üç nəfərin sifariş etdiyi yeməklərdən ikisinin eyni vəziyyətdə olduğu iddia edilir. Müştərilər bu barədə ofisianta məlumat versələr də, boşqablar sadəcə götürülərək aparılıb. Onların sözlərinə görə, nə üzr istənilib, nə də yemək əvəz olunub və ya hər hansı kompensasiya təklif edilib. Nəticədə müştərilər yeməksiz qaldıqlarını bildirirlər.

Narazılıq doğuran digər məqam isə biznes lanç menyusunda "limitsiz çay" qeyd edilməsinə baxmayaraq, saat 15:00-da çay sifariş etmək istədikdə xidmətin artıq başa çatdığı bildirilməsi olub. Müştərilər hesab edirlər ki, əgər bu xidmət müəyyən saatadək qüvvədədirsə, həmin məhdudiyyət menyuda açıq şəkildə göstərilməlidir.

Bizimesr.com