Sumqayıt rayon ərazisində, Novxanı–dənizkənarı yolun yaxınlığında aparılan tikinti işləri ciddi narahatlıq doğurur. Əldə olunan görüntülər və yerli sakinlərin iddialarına görə, obyekt üzərində aparılan inşaat şəhərsalma norma və qaydalarına əməl edilmədən həyata keçirilir.
Sakinlər bildirirlər ki, tikinti prosesi açıq şəkildə təhlükəsizlik qaydalarının pozulması ilə müşahidə olunur. Xüsusilə hündürlükdə işləyən işçilərin qoruyucu vasitələrdən tam istifadə etməməsi, metal konstruksiyaların açıq vəziyyətdə quraşdırılması və yol kənarında nəzarətsiz iş aparılması ciddi risk yaradır.
Məlumata görə, aparılan tikinti işləri zamanı şəhərsalma və tikinti qaydalarının tələb etdiyi təhlükəsizlik standartlarına əməl olunmadığı iddia edilir. Bu isə həm işçilərin həyatı üçün təhlükə yaradır, həm də ətraf ərazi üçün potensial risk formalaşdırır.
Sakinlər və ərazidən keçənlər haqlı olaraq sual edirlər: “Şəhərsalma və Arxitektura Komitəsi hara baxır? Fövqəladə Hallar Nazirliyi bu riskləri niyə görmür?”
Eyni zamanda Sumqayıt Rayon İcra Hakimiyyətinin ərazidə aparılan bu tikinti işlərinə nəzarət edib-etmədiyi də sual doğurur. Sakinlər hesab edirlər ki, belə həssas zonada aparılan tikintilər daha ciddi nəzarət altında olmalı, icazə sənədləri və təhlükəsizlik normaları açıq şəkildə yoxlanmalıdır.
Mütəxəssislərin fikrincə, hündürlükdə aparılan tikinti işləri zamanı FHN-in əmək təhlükəsizliyi qaydaları mütləq şəkildə icra olunmalı, işçilər müvafiq qoruyucu avadanlıqlarla təmin edilməlidir. Əks halda, bu cür hallar ciddi qəza riskini artırır.
Hazırda tikintinin hüquqi əsasları, icazə sənədləri və təhlükəsizlik standartlarına uyğunluğu barədə rəsmi qurumların mövqeyi gözlənilir.

Aknews.az

Respublika Təxirəsalınmaz Təcili Tibbi Yardımım Mərkəzi qarajın iki müdiri var.
Bu yaxınlarda təcili yardımın qarajında baş verən üst üstə olaylar səngimək bilmir. Bir müddət əvvəl
anbar müdiri Soltanın qanunsuz əməlləri haqda ətraflı faktıarla yazımızdan sonra barəsində ciddi tədbir görülmüşdür. Buna baxmayaraq mərkəzi qarajda qanunsuz işlərlə məşğul olanlara ibrət olmayıb. Qaraj müdiri Bəhmən Kərimovun " DABRO" su ilə qarajda at oynadan özünü rəhbər şəxs kimi tanıdan Ramin adlı adi işçinin özbaşınalığı qəbuledilməzdir.
Beləki bir neçə gün əvvəl təcili yardım maşınlarından birinin " İVECO 37 " hansısa texniki səbəbdən qaraja gəlməli olub. Avtomobildə olan tibb bacısı bilməyərəkdən qapını açmaq istəyən zaman qapının tutacaq yerini qırıb. Bunu görən Ramin müəllim dərhal baş həkimə zəng edərək özünü mərkəzi qarajın rəhbərliyindən olduğu kimi təqdim edərək tibb bacısının cəzalandırılmasını tələb edib. Sonradan araşdırılıb ki, adı keçən Ramin müəllim hər yerdə özünü qarajın rəhbər şəxslərindən biri kimi təqdim edirmiş. Təbii ki, bunu özbaşına heç vaxt eləməyə cəsarəti çatmayan Ramin müəllimə qorxma arxanda mən varam deyib ona özgüvən sağlayan Bəhmən Kərimov imiş. Elə bu səbəbdən hamı elə bilir ki, mərkəzi qarajın iki müdiri var.
Mərkəzi qarajda baş verən daha böyük neqativ hallar haqqında növbəti yazımızda...


BnTv.az

Özünü “Biləcəri Təmir Quraşdırma” QTSC-nin rəhbəri kimi təqdim edən, əslində isə sahibkarlara qarşı açıq quldurluq əməlləri ilə diqqətə gələn Nazim Tahirovla bağlı dünən müəyyən faktları təqdim etdik. Aydın olurdu ki, ədliyyə nazirliyinin məhkəmə qərarlarının keçmiş baş icraçısı Nurəddin Mustafayevə güvənərək onlarla sahibkara qan udduran Nazim Tahirov yenidən İŞ BAŞINDADIR...

"DİA-AZ" vurğulayır ki, özünü hər yerdə "MƏHKƏMƏLƏR KRALI" kimi təqdim edən N.Tahirov dəfələrlə olub ki, hədəfə aldığı iş adamlarına "məhkəmə kimdir... hakim də mənəm, məhkəmə də mənəm, qanun da mənəm" deyərək istədiyi məhkəmə qərarını çıxarda biləcəyini gizlətməyib. Bu vaxta qədər öz maraqları naminə Ali Məhkəmə nədir, hətta Konstitusiya Məhkəməsinin qərarlarını dəyişdirdiyini söyləyən Nazim Tahirov məhz bütün bu quldur əməllərində ortağı olan korrupsioner məmurlara sığındığını az qala fərəhlə söyləyir. Hətta Ali Məhkəmə sədrinin belə onu durdura bilməyəcəyini nümayiş etdirir...

Bəli, əziz oxucular, məhz qanunsuz məhkəmə qərarları hesabına ayrı-ayrı sahibkarların qanuni mal və mülklərini ələ keçirən Nazim Tahirov bu gün də iş başındadır. Hətta gücünün üstünə güc qataraq hədəfə aldığı iş adamlarını açıq ölümlə də təhdid edir.

Onlardan biri də zamanında kifayət qədər imkanları olmuş Alim Lətifov adlı sahibkardır. Nazim Tahirov onu nəinki müflis duruma salıb, hətta bu gün özü ilə bərabər Lətifovun ailə üzvlərini də ÖLÜMLƏ HƏDƏLƏYİR.

Bu barədə "DİA-AZ"a danışan Alim Lətifov bildirir ki, külli miqdarda pulunu ələ keçirən Nazim Tahirov onu zərərsizləşdirmək üçün öldürmək fikrinə düşüb:

"Mən bu barədə hüquq-mühafizə orqanlarına müraciət etmişəm və yenə də mətbuat vasitəsilə ölkə rəhbərliyinə müraciət edərək kömək istəyirəm. Mənim can güvənliyim təhlükədədir.

Görün, hansı zəmanədə yaşayırıq ki, mən küçəyə tək çıxa bilmirəm. Ailə üzvlərim də eləcə... Onların da həyatı təhlükədədir.

Nazim Tahirov mənim milyonlarımı mənimsədi və özünü o qədər arxayın hiss edir ki, ölümlə hədələməkdən belə çəkinmir".

Qeyd edək ki, artıq Daxili İşlər Nazirliyi tərəfindən Nazim Tahirovun müəyyən cinayət əməlləri ilə bağlı hüquqi araşdırmalara da start verilib, hətta konkret cinayət işi açılıb. Bu işdə də zərərçəkənlərdən biri olan Alim Lətifov hüquq-mühafizə orqanlarına müraciət edərək daha operativ addımların atılmasını xahiş edir: " Bu gün Azərbaycan polisi var gücü ilə çalışır və ölkədə tam olaraq əmin-amanlığa nail olub. Amma Nazim Tahirov kimi quldurlar, onu himayə edənlər sanki düşmən kimi davranaraq aranı qarışdırırlar ".

Bildirək ki, Azərbaycanın məhkəmə sistemini özünün oyuncağı hesab edən Nazim Tahirovun yeni quldur əməlləri barədə növbəti faktları da açıqlayacağıq. Hansı məmurların hansı hoqqabazlıqlara getdiyini biləcəksiniz... Bizi izləməyə davam edin...

"DİA-AZ"

II Qarabağ müharibəsi qazisi dövlət qurumlarına müraciət etdi: Laçındakı qanunsuzluqların araşdırılmasını istəyir

AzTimes.az xəbər verir ki, II Qarabağ müharibəsi qazisi, sentyabr döyüşlərinin və antiterror əməliyyatlarının iştirakçısı Həsənzadə Şamil Əsəd oğlu Azərbaycan Respublikasının Prezidenti İlham Əliyevə, Birinci vitse-prezident Mehriban Əliyevaya, Dövlət Təhlükəsizliyi Xidmətinin rəisi Əli Nağıyevə və Baş prokuror Kamran Əliyevə müraciət ünvanlayıb.

Qazi müraciətində Laçın rayonunda müxtəlif dövlət qurumlarında qanun pozuntularının, qohumbazlığın və korrupsiya hallarının mövcud olduğunu iddia edib. O, xüsusilə Aqil Nəzərli barədə bir sıra ittihamlar səsləndirib və həmin iddiaların hüquq-mühafizə orqanları tərəfindən araşdırılmasını xahiş edib.

Müraciətdə iddia olunur ki, Aqil Nəzərlinin qardaşı Müqabil Nəzərlinin Laçın rayonundakı məktəblərdən birində psixoloq kimi rəsmiləşdirildiyi, lakin faktiki olaraq həmin vəzifəni icra etmədiyi halda əməkhaqqı aldığı bildirilir.

Bundan başqa, qazinin iddiasına görə, Aqil Nəzərlinin qardaşının həyat yoldaşı Pəri xanım Taxtakörpü məktəbində müəllim kimi qeydiyyatda olsa da, uzun illərdir dərs keçmədən əməkhaqqı alır.

Həsənzadə Şamil Əsəd oğlu müraciətində daha bir iddia irəli sürərək bildirib ki, Aqil Nəzərlinin həyat yoldaşı Qələm Nəzərli də xadimə kimi işə rəsmiləşdirilib və işə gəlmədən əməkhaqqı alır.

Qazi qeyd olunan bütün faktların aidiyyəti dövlət qurumları tərəfindən obyektiv araşdırılmasını, qanun pozuntusu aşkarlanacağı təqdirdə hüquqi qiymət verilməsini xahiş edib.

Qeyd: Yazıda yer alan məlumatlar II Qarabağ müharibəsi qazisi Həsənzadə Şamil Əsəd oğlunun dövlət qurumlarına ünvanladığı müraciətdə səsləndirdiyi iddialardır. AzTimes.az qarşı tərəfin mövqeyini dərc etməyə hazırdır.

Sosial şəbəkələrdə "Arzum999" kimi tanınan İlduza Hacıyevanın məhkəmə hökmündən sonra məsələyə münasibət bildirən şəxslər arasında Nigar Fərhad da yer alıb. O, mərhumun ailəsinə müraciət edərək humanist mövqe nümayiş etdirməyə və bağışlanma çağırışı etməyə çalışıb.
Lakin bu paylaşım sosial şəbəkələrdə fərqli müzakirələrə də səbəb olub. Bir sıra istifadəçilər sual edirlər ki, Nigar Fərhadın rəhbərlik etdiyi şirkətlə bağlı daha əvvəl müxtəlif şəxslər tərəfindən səsləndirilən çoxsaylı şikayət və vəsaitlərin mənimsənilməsi barədə iddialar niyə indiyədək ictimaiyyət qarşısında ətraflı cavablandırılmayıb?
Sosial şəbəkələrdə yayılan rəylərdə "başqasına dəstək verməzdən əvvəl öz fəaliyyəti ilə bağlı iddialara aydınlıq gətirməlidir" fikirləri də səsləndirilir.
Bununla yanaşı, qeyd edilməlidir ki, sözügedən iddialarla bağlı məhkəmə tərəfindən qüvvəyə minmiş hər hansı yekun qərar barədə redaksiyamızda rəsmi məlumat yoxdur. Bu səbəbdən həmin iddialar hüquqi baxımdan yalnız iddia xarakteri daşıyır.
Əgər Nigar Fərhad və ya təmsil etdiyi şirkət məsələ ilə bağlı mövqeyini redaksiyamıza təqdim edərsə, qarşı tərəfin cavabı olduğu kimi dərc olunacaq.
İctimaiyyət isə hesab edir ki, cəmiyyət qarşısında mövqe sərgiləyən hər bir tanınmış şəxs eyni zamanda öz fəaliyyəti ilə bağlı səslənən suallara da şəffaf şəkildə cavab verməlidir.(BnTv.az)

Ötən gün Bakı İnzibati Məhkəməsində plastik cərrah Rəşad Babayevin Azərbaycan Respublikası Səhiyyə Nazirliyinə qarşı "plastik cərrahiyyə fəaliyyəti ilə praktik məşğul olmasına icazə verilən sertifikatının ləğv edilməsi barədə əmrin ona aid hissəsinin ləğv edilməsi" tələbinə dair inzibati iş üzrə növbəti məhkəmə iclası keçirilib.
Bakupost.az-ın əməkdaşı məhkəmə öncəsi iddiaçıdan açıqlama alıb. R. Babayev bildirib ki, obyektiv araşdırma aparılsaydı, iş çoxdan onun xeyrinə həll olunardı:
“Bizim təqdim etdiyimiz əsaslara Səhiyyə Nazirliyi cavab verə bilmir. Mən bunu belə qiymətləndirirəm”.
Məhkəmə baxışı zamanı cavabdeh Səhiyyə Nazirliyinin nümayəndəsinin Elektron Məhkəmə İnformasiya Sistemində yerləşdirdiyi iddia tələbinin dəqiqləşdirilməsinə dair etiraz müzakirə olunub. Sənədin tərəflərə vaxtında təqdim olunmadığını nəzərə alan məhkəmə vəsatət əsasında 15 dəqiqəlik fasilə elan edib.
Fasilədən sonra iclas davam etdirilib. Cavabdeh nümayəndəsi etirazın mahiyyətini qısa şəkildə izah edərək iddianın təmin edilməməsini xahiş edib. Ardınca iddiaçının vəkilləri cavabdeh nümayəndəsinə suallar ünvanlayaraq, eyni hüquqi vəziyyətdə olan şəxslərə münasibətdə fərqli yanaşmanın tətbiq edilməsi və hüquq qarşısında bərabərlik prinsipinin pozulması ilə bağlı mövqelərini əsaslandırmağa çalışıblar.
Məhkəmə tərəflərin izahatlarını dinlədikdən sonra çıxış mərhələsinə keçib. İddiaçı tərəf sübutların ayrıca qiymətləndirilməsini tələb etsə də, məhkəmə bunu zəruri hesab etməyib.
Yekun çıxışlarında iddiaçının vəkilləri iş üzrə bir sıra mühüm hüquqi və faktiki hallara diqqət çəkiblər. Onların sözlərinə görə, məhkəmə araşdırması zamanı sertifikatların qiymətləndirilməsini aparan komissiyanın formalaşdırılması və fəaliyyəti ilə bağlı ciddi hüquqi problemlər mövcuddur. Vəkillər komissiyanın legitimliyi, qərarlarının obyektivliyi və səlahiyyət hədləri ilə bağlı iradlarını səsləndirərək bildiriblər ki, məhz bu komissiyanın qərarları əsasında Rəşad Babayev də daxil olmaqla plastik cərrahiyyə ixtisası üzrə fəaliyyət göstərən bir sıra həkimlərin sertifikatlarının ləğv edilməsi hüquqi əsasdan məhrumdur.
Müzakirə olunan əsas məsələlərdən biri də iddiaçının sertifikatının ləğvinə səbəb kimi göstərilən rezidentura təhsili ilə bağlı olub. İddiaçı tərəf vurğulayıb ki, hazırda qüvvədə olan Azərbaycan Respublikası Nazirlər Kabinetinin müvafiq qərarında plastik cərrahiyyə fəaliyyəti ilə məşğul olmaq üçün rezidentura təhsilinin məcburi şərt kimi nəzərdə tutulmaması iddianın hüquqi əsaslılığını təsdiq edir. Bu səbəbdən iddiaçının nümayəndələri Səhiyyə Nazirliyinin mübahisələndirilən əmrinin Rəşad Babayevə aid hissəsinin ləğv edilməsini xahiş ediblər.
Məhkəmə iclasında çıxış edən iddiaçı Rəşad Babayev uzun illər plastik cərrah kimi fəaliyyət göstərdiyini, müxtəlif dövlət tibb müəssisələrində bu ixtisas üzrə xidmət etdiyini, indiyədək 12-dən artıq rezident hazırladığını və elmi fəaliyyətinin də plastik cərrahiyyə sahəsi ilə bağlı olduğunu diqqətə çatdırıb. O bildirib ki, yekun qərardan asılı olaraq, onun uzun illər ərzində məhkəmələrdə plastik cərrah qismində təqdim etdiyi ekspert rəylərinin hüquqi qüvvəsi, eləcə də elmi-pedaqoji fəaliyyəti çərçivəsində hazırlanmış rezidentlərin hüquqi statusu ilə bağlı gələcəkdə mübahisələrin yaranması ehtimalı mövcuddur. Bu isə təkcə onun fərdi hüquqlarına deyil, həm də bütövlükdə plastik cərrahiyyə sahəsində hüquqi müəyyənlik prinsipinə təsir göstərə biləcək məsələdir.
Məhkəmə baxışını başa çatdıraraq yekun qərarın 6 iyul 2026-cı il saat 17:00-da elan olunacağı bildirilib.
İclasdan sonra jurnalistlərin suallarını cavablandıran iddiaçının vəkilləri yekun məhkəmə qərarı açıqlanana qədər hüquqi mövqe bildirməyəcəklərini qeyd edərək ətraflı danışmaqdan imtina ediblər.
İddiaçı Rəşad Babayev isə Bakupost-un əməkdaşına açıqlama verərək məhkəmə prosesində müzakirə olunan məsələlərə münasibətini bildirib.
“Cavabdeh tərəfin təqdim etdiyi sənədlər sadəcə ədəbiyyatdan götürülmüş materiallardır və heç bir hüquqi əsasa malik deyil. Ona görə də qarşı tərəfin vəkili heç bir əsaslı cavab verə bilmədi. Plastik cərrahlar mənim təqdim etdiyim tədris və sənədlərlə bu ixtisasa yiyələniblər. Sonra isə deyirlər ki, Rəşad Babayev, sən artıq bizə lazım deyilsən, işini bitirdin.
Mən bir dəfəlik iynə deyiləm ki, istifadə edib sonra kənara atsınlar. Belə bir haqq yoxdur. Mən burada ən yüksək pillədə olan şəxslərdən biri olmuşam.
Əgər məhkəmə mənim lehimə qərar verməsə, bunu mübahisələndirəcəyəm və qeyd edəcəyəm ki, bütün tələbələrimin sertifikatını da ləğv edin", - deyə cərrah bildirib.
Qeyd edək ki, iş üzrə yekun qərarın 6 iyul 2026-cı il tarixində elan olunacağı gözlənilir.

Bakupost.az

Aparıcı Zaur Kamal avtomobil qəzası keçirib.

Bu haqda aparıcı özü instaqram hesabında məlumat verib.

O, avtomobilinin fotosunu paylaşaraq, “ Bu da belə getdi”, - sözlərini yazıb.

Axşam.az-a açıqlama verən aparıcı bildirib ki, hadisə Gəncəyə gedərkən olub.

“Gəncəyə çataçatda oldu. Salamatçılıqdır”, - deyə əlavə edib.

Bakının mərkəzi küçələrində yeni və müasir avtobusların nümayiş etdirilməsi ilə tez-tez gündəmə gələn Azərbaycan Yerüstü Nəqliyyat Agentliyinin (AYNA) fəaliyyəti paytaxtın kənar qəsəbələrinə çatanda tamamilə fərqli mənzərə ortaya çıxır. Elə təəssürat yaranır ki, AYNA rəhbəri Anar Rzayev üçün Bakı yalnız mərkəzi prospektlərdən ibarətdir, Müşfiqabad kimi minlərlə insanın yaşadığı qəsəbələr isə diqqətdən kənarda qalıb.

Bizimesr.com-a göndərilən foto və videogörüntülər Müşfiqabad qəsəbəsindən "20 Yanvar" metro stansiyası istiqamətində hərəkət edən 114A və 114B marşrutlarında yaranmış vəziyyətin sərnişinlər üçün ciddi problemə çevrildiyini göstərir.

Sakinlərin sözlərinə görə, xəttə buraxılan avtobusların əksəriyyəti köhnə və istismara yararsız vəziyyətdədir. Oturacaqlar sınıq, salonlar natəmiz, texniki vəziyyət isə sərnişinlərin təhlükəsiz və rahat daşınması ilə bağlı ciddi suallar yaradır.

Demək olar ki, hər gün marşrut üzrə hərəkət edən bir və ya bir neçə avtobus yolda nasazlıq səbəbindən dayanır. Nəticədə sərnişinlər avtobuslardan düşürülür və yolun ortasında qalırlar. İnsanlar işə, məktəbə və ya digər ünvanlara vaxtında çatmaq əvəzinə növbəti avtobusu gözləməyə məcbur olurlar.

Problemlər bununla da bitmir. Sərnişinlərin bildirdiyinə görə, marşrut üzrə avtobusların intervalı olduqca uzundur. Bu səbəbdən insanlar bəzən dayanacaqlarda uzun müddət gözləyirlər. Yayın qızmar istisində kondisionersiz avtobuslar isə vəziyyəti daha da ağırlaşdırır. Sıxlıq, havasız salon və texniki problemlər hər gün yüzlərlə sərnişinin üzləşdiyi reallıqdır.

Ən diqqətçəkən məqamlardan biri isə sakinlərin iddiasına görə, bu problemlə bağlı illərdir AYNA rəhbərliyinə dəfələrlə müraciət edilməsinə baxmayaraq, vəziyyətin dəyişməməsidir. Onların sözlərinə görə, müraciətlər ya cavabsız qalır, ya da real nəticə vermir.

Bu vəziyyət ciddi suallar doğurur. Əgər paytaxtın mərkəzində müasir avtobus parkı yaratmaq mümkündürsə, niyə Müşfiqabad sakinləri köhnə, tez-tez xarab olan və elementar rahatlıq standartlarına cavab verməyən avtobuslardan istifadə etməyə məcbur qalırlar? Dövlət büdcəsindən nəqliyyat infrastrukturunun yaxşılaşdırılmasına milyonlarla manat vəsait ayrıldığı halda, Bakıətrafı qəsəbələrin sakinləri niyə ikinci dərəcəli xidmətlə kifayətlənməlidirlər?

İctimai nəqliyyat hər bir vətəndaş üçün əlçatan, təhlükəsiz və rahat olmalıdır. Bu xidmət yalnız şəhərin mərkəzi ilə məhdudlaşmamalı, paytaxtın bütün yaşayış məntəqələrini əhatə etməlidir. Əks halda, mərkəzdə yaradılan müasir görüntü fonunda qəsəbələrdəki acınacaqlı vəziyyət nəqliyyat sahəsində aparılan islahatların hamıya eyni dərəcədə çatmadığını göstərir.(Bizimesr.com)

VİDEO LİNKDƏ: https://www.bizimesr.com/az/post/anar-rzayev114a-ve-114b-marsrutlarindaki-biabirci-veziyyeti-niye-gormur-22444

Azərbaycan Prezidenti İlham Əliyev Amerika Birləşmiş Ştatlarının Prezidenti Donald Trampı təbrik edib.

Məktubda deyilir:

"Hörmətli cənab Prezident,

Əlamətdar tarix – Amerika Birləşmiş Ştatlarının müstəqilliyinin 250-ci ildönümü münasibətilə Sizi və Sizin simanızda dost Amerika xalqını öz adımdan və Azərbaycan xalqı adından səmimi-qəlbdən təbrik etməkdən və ən xoş arzularımı çatdırmaqdan məmnunluq duyuram.

Azadlıq uğrunda mübarizənin, yenilməz iradənin və demokratiyanın rəmzinə çevrilmiş İstiqlaliyyət Bəyannaməsinin iki yüz əlli il əvvəl 4 iyul tarixində imzalanması ilə müstəqilliyini elan etmiş Amerika Birləşmiş Ştatları təkcə yerləşdiyi qitədə deyil, bütövlükdə dünyada yeni nizamın qurulmasına təkan verdi. Ötən dövr ərzində şanlı inkişaf yolu keçmiş Birləşmiş Ştatlar bu gün qlobal arenada hər bir cəhətdən güclü və qüdrətli dövlətdir. Hazırda Sizin əzmlə və qətiyyətlə həyata keçirdiyiniz siyasət sayəsində ölkənizin əldə etdiyi möhtəşəm nailiyyətlərin sayı artır, beynəlxalq aləmdə liderliyi, etibarı və yüksək nüfuzu daha da möhkəmlənir.

Son dövrdə Azərbaycan-Birləşmiş Ştatları münasibətlərinin yüksələn xətlə və uğurla inkişaf etməsi məmnunluq doğurur. Biz iki ölkə arasında təşəkkül tapmış strateji tərəfdaşlıq münasibətlərini yüksək qiymətləndirir, dövlətlərarası əlaqələrimizin güclənməsinə daim verdiyiniz böyük önəmə və dəstəyə görə Sizə minnətdarlığımızı bildiririk. Fevral ayında imzalanan və münasibətlərimizi keyfiyyətcə yeni mərhələyə qaldıran Strateji Tərəfdaşlıq Xartiyasının iqtisadiyyat, enerji, bağlantılar, təhlükəsizlik kimi ənənəvi sahələrlə yanaşı, rəqəmsal transformasiya, süni intellekt və digər mühüm istiqamətlər üzrə tərəfdaşlığın inkişaf etdirilməsinə təkan verəcəyinə əminliyimi ifadə edirəm.

Biz Sizin Cənubi Qafqazda sülh gündəliyinin təşviqi və dayanıqlı inkişafın təmin edilməsi istiqamətində qətiyyətli səylərinizi də son dərəcə yüksək qiymətləndiririk. Keçən ilin avqustun 8-də Ağ Evdə Sizin təşəbbüsünüzlə baş tutmuş tarixi üçtərəfli görüşün nəticələri regionumuzda tamamilə yeni müsbət ab-hava və vəziyyət yaratdı. Artıq Azərbaycan ilə Ermənistan sülh şəraitində yaşayır və ticarət münasibətləri qururlar. Eyni zamanda regionda sabitliyə və rifaha xidmət edən infrastruktur layihələrinin, xüsusilə də Asiya ilə Avropa arasında alternativ, etibarlı və təhlükəsiz bağlantını təmin edəcək "Trampın Beynəlxalq Sülh və Rifah Marşrutu"nun reallaşmasına ölkənizin göstərdiyi davamlı dəstəyini xüsusi qeyd etmək istərdim.

Hörmətli cənab Prezident,

Biz Azərbaycan ilə Birləşmiş Ştatlar arasında böyük potensiala malik qarşılıqlı faydalı əməkdaşlığın inkişaf etdirilməsinə xüsusi əhəmiyyət veririk. Əminəm ki, bu potensialdan və mövcud imkanlardan tam bəhrələnərək birgə səylərimizlə dövlətlərarası münasibətlərimizin möhkəmlənməsinə, strateji tərəfdaşlığımızın daha da dərinləşməsinə nail olacağıq.

Bu şanlı yubiley günündə bir daha Sizə ən səmimi təbriklərimi çatdırır, möhkəm cansağlığı, xoşbəxtlik, ali dövləti fəaliyyətinizdə müvəffəqiyyətlər və yeni-yeni nailiyyətlər, Amerika Birləşmiş Ştatlarının dost xalqına daim əmin-amanlıq, firavanlıq və rifah arzulayıram".

Hacıqabul rayonunda yerləşən "Qədir-Xum" Ailəvi İstirahət Mərkəzi eyni hüquq pozuntusuna görə yenidən cərimələnib.

Qaynarinfo-nun məlumatına görə, Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti tərəfindən sözügedən restoranda yaranan maye tullantılarının ətraf mühitə axıdıldığı müəyyən edilib.

Restoranın rəsmi müqavilə əsasında fəaliyyət göstərən icarədarı, 1984-cü il təvəllüdlü R.H. barəsində İnzibati Xətalar Məcəlləsinin 262.2.3-cü maddəsi ilə protokol tərtib olunub və iş məhkəməyə göndərilib. Məhkəmənin qərarı ilə restoranın icarədarı 800 manat məbləğində cərimə edilib.

Qeyd edək ki, Hacıqabul rayonu ərazisində, Bakı–Şirvan avtomobil yolunun sağ tərəfində yerləşən, ümumi sahəsi 2000 kvadratmetr olan ictimai iaşə obyekti Gülnarə İsmayıl qızı Rüstəmova tərəfindən icarəyə verilib. "Qədir-Xum" Ailəvi İstirahət Mərkəzi ötən il də eyni maddə ilə cərimələnmişdi. Həmin vaxt aşkar olunmuş nöqsanların aradan qaldırılması üçün obyektə müddət verilmişdi.