Hər iki MMC de-fakto Quba rayonunun sabiq icra başçısı, hazırda tanınmış iş adamı Ziyəddin Əliyevə məxsusdur. Qeyd etdiyim nəqliyyat vasitəsi üçoxlu olmaqla, maksimum 6m3 betonla yüklənə bilər. Amma, əldə etdiyim məlumata görə, hadisə zamanı 11.5m3 betonla yüklü olub(?) (Yol vərəqinin surəti var.) Eyni zamanda əyləc sistemindədə ciddi problem olub...

Bu sətirlər “Yenixeberorg.com” saytının rəhbəri İlqar Salmanovun Azərbaycan Respublikasının Prezidenti cənab İlham Əliyevə ünvanladığı və FB səhifəsində ictimailəşdirdiyi müraciətində yer alır:

Çox hörmətli cənab Prezident,

Mən-Salmanov İlqar Mirzəcan oğlu-30 ildən artıqdır ki, mətbuatdayam…Müxtəlif media orqanlarında çalışmış, 2003-cü ildən 2015-ci ilə qədər həftəlik nəşr olunan “Yeni xəbər” qəzetinin təsisçi və baş redaktoru olmuşam. Hazırda “Yenixeberorg.com” saytına və “Xəbərmən TV” YouTube kanalına rəhbərlik edirəm. Bütün fəaliyyətim boyu dövləti və milli maraqlara xidməti prioritet hesab etmişəm…

Möhtərəm Prezident, bu müraciətimlə Sizdən xahiş edirəm ki, qaşılaşdığım ağır avtoqəza ilə bağlı ədalətli hüquqi araşdırmanın aparılmasını təmin edəsiniz. Belə ki, bu ilin 31 martında saat 15:00 radələrində mənə məxsus 01-BR-451 Dövlət Nömrə Qeydiyyatlı “Hundai Tucson” avtomobili ilə Sumqayıt- Bakı istiqamətində hərəkətdə olarkən avtomobildə texniki problem yarandı. (“Riyad Ticarət Mərkəzi”nin qarşısında) Təbii olaraq avtomobilimi üçzolaqlı yolun sağdan birinci zolağında saxlayıb, təhlükə işıqlarını (“Avarenni”) yandırıb, yük yerini (“Baqaj”) açaraq, avtomobilin ön hissəsinə keçib, mühərrikə baxış keçirdim. Tam bu zaman 77-JS-362 Dövlət Nömrə Qeydiyyatlı “HOWO” markalı, ağır tonnajlı Betonqarışdıran Nəqliyyat Vasitəsi dolu, işlək vəziyyətdə avtomobilimi arxadan vurdu...Avtomobilimi 20 metr qabağa, məni isə bir az da artıq məsafə olmaqla paralel yola atdı...Kəllə-beyin travması, burun sınığı və s. olmaqla ağır xəsarətlər aldım... (AZ AĞIR dərəcəli) Cərrahi əməliyyat edildim və hələ də müəyyən müalicə prosedurları keçməkdə davam edirəm.

Məlum oldu ki, mənim avtomobilimi və beləliklə də məni vuran nəqliyyat vasitəsi AAYDA-nin “14№-li Xüsusi Təyinatlı Yol İstismarı” MMC-nin xidmətindədir. Sürücü isə Fətəliyev Elşən Şahin oğludur. Bu nəqliyyat vasitəsi “Mühəndis Yol Təmir-Tikinti” MMC-nə məxsusdur və hansısa “razılaşma” ilə “14№-li Xüsusi Təyinatlı Yol İstismarı” MMC-nin xidmətindədir(?)...

Möhtərəm Prezident, hadisədən bugünədək qeyd etdiyim MMC-lərin heç biri tərəfindən nə hadisə ilə, nə də ağır xəsarət alan tərəf kimi mənimlə maraqlanan olmayıb(?)

Mümükn vasitələrlə əldə etdiyim məlumata görə, hər iki MMC de-fakto Quba rayonunun sabiq icra başçısı, hazırda tanınmış iş adamı Ziyəddin Əliyevə məxsusdur. Qeyd etdiyim nəqliyyat vasitəsi üçoxlu olmaqla, maksimum 6m3 betonla yüklənə bilər. Amma, əldə etdiyim məlumata görə, hadisə zamanı 11.5m3 betonla yüklü olub(?) (Yol vərəqinin surəti var.) Eyni zamanda əyləc sistemindədə ciddi problem olub...

Möhtərəm Prezident, Sizdən artıq dərəcədə xahiş edirəm ki, qısaca yaza bildiyim bu hadisənin ədalətli araşdırılmasını və məsul şəxslərlə bağlı müvafiq hüquqi ölçü götürülməsini təmin edəsiniz. Eyni zamanda mənə dəyən mənəvi və maddi zərərin qarşılanmasına da dəstək olasınız.

Ümid edirəm ki, sayənizdə haqq-ədalət öz yerini tapacaq.

Əvvəlcədən minnətdarlığımı bildirirəm.

P.S. İlqar Salmanov “Mediatvaz”a açıqlamasında qarşıdakı günlərdə müraciətdə yer alan MMC-lərlə bağlı məhkəməyə müraciət edəcəyini də bildirdi…

Eyni zamanda şirkətin fəaliyyəti, şirkətə məxsus zavodda istehsalat prosesi zamanı insan ölümləri ilə nəticələnən hadisələr və s. məlumatların dolandığını da dedi. Təbii ki, bu məlumatlar məlum səbəblərdən jurnalist araşdırmasının predmeti olmaqla, geniş yazının meydana çıxmasına əsas ola bilər...(Yenixeberorg.com)

Naxçıvanda dövlət tenderləri üzrə iş görən sahibkarlardan pullarını almaq üçün rüşvət tələb olunduğu bildirilir. İddialara görə, bunun üçün Naxçıvan Maliyyə Nazirliyində qanundan kənar əlavə “maneə sistemi” yaradılıb.
Sahibkarlar deyirlər ki, tenderi qazanır, işi görür, təhvil verir, bir sözlə, bütün sənədləri qaydasında olur.
Süni “maneə sistemi” məhz bundan sonra işə düşür. İddiaya görə, həmin sistemdə təsdiq verilmədikcə dövlətin sahibkara ödəməli olduğu vəsait köçürülmür.
Rüşvət tələbi də bu mərhələdə ortaya çıxır. Sahibkarlar iddia edirlər ki, ödənişi ala bilmək üçün ümumi məbləğin 30 faizini nazirliyə rüşvət kimi verməlidirlər.
Şikayətçilər deyirlər ki, nazirlik bu qeyri-rəsmi ödənişi “halallaşmaq” adlandırır.
Adının çəkilməsini istəməyən sahibkarlardan biri deyir ki, tender üzrə işi tam başa çatdırıb təhvil versə də, ödənişini ala bilmir:
“Dövlət idarəsinin tenderini qazanmışıq, işi görmüşük, iş yoxlanılıb, bütün aidiyyəti qurumlar da rəy verib. Buna baxmayaraq, pulumuzu ala bilmirik. Maliyyə Nazirliyində yaradılan əlavə tətbiqdən təsdiq verilməlidir. Təsdiqi saxlayırlar ki, gedib ‘halallaşaq’. Mən niyə gördüyüm işin pulunu almaq üçün kiməsə əlavə pul verməliyəm? İş görülüb, sənədlər təsdiqlənib, dövlət bizə borcludur. Bəs bu pul niyə əlavə sistemdə saxlanılır və son təsdiqi kim verir?”
Digər sahibkar isə deyir ki, problem tək bir şirkətlə məhdudlaşmır:
“Pulu aylarla saxlayırlar. Sonra məcbur olursan aidiyyəti şəxslərə müraciət edib ‘halallaşasan’. Pul verəndə məsələ həll olunur, verməyəndə ödəniş qalır. Bu, Naxçıvanda bir çox sahibkarın problemidir. Bizə də açıqlamırlar ki, bu sistem hansı qanunla yaradılıb, kim yaradıb, hansı vəsaitlə hazırlanıb və dövlət idarələrində hansı hüquqi əsasla tətbiq olunur. Hər hansı nazir özünə ayrıca proqram yaradıb dövlətin sahibkara ödəməli olduğu pulu onun üzərindən saxlaya bilərmi?”
Məsələyə münasibət öyrənmək üçün Naxçıvan Muxtar Respublikası Maliyyə Nazirliyi ilə əlaqə saxlamağa çalışdıq. Nazirliyin mövqeyi təqdim olunarsa, onu da dərc etməyə hazırıq.
"Gündəlik Naxçıvan"

Türkiyəli iş adamı Ercan Koçak Azərbaycanda dələduzluqla üzləşdiyini iddia edir.
“Qafqazinfo”ya müraciət edən sahibkar bildirib ki, 2020-ci ildə dünyada COVİD -19 pandemiyasının yayıldığı bir vaxtda Azərbaycanda tibbi maska istehsal edilməsi üçün avadanlıqların gətirilməsində, fabrikin qurulmasında və xammalla təchiz olunmasında xidmətləri olub.
O, şərikli iş qurduğu azərbaycanlı iş adamı, “Bakı Tekstil Fabriki”nin rəhbəri Səkinə Babayeva tərəfindən aldadılaraq 715 min dollar vəsaitinin ələ keçirildiyini deyir: “Məni şəriklik, iş ortaqlığı kimi vədlərlə illərlə aldadan Səkinə Babayevə etibarımı qazandıqdan sonra ayrı-ayrı vaxtlarda Türkiyədən Azərbaycana göndərdiyim toplam 715 000 ABŞ dollar dəyərində malın pulunu illərdir ki, bütün xahişlərim və tələblərimə rəğmən ödəmir. Mən Səkinə Babayeva ilə 2014-cü ildə tanış olmuşam, onun dəvəti ilə Azərbaycana gəldikdə, Bakı şəhərində “Baksol” yolu adlanan ərazidə “fabrika” dediyi yerə gedib baxanda, danışdıqlarının əksinə, bu sahədə çox təcrübəsiz olduğunu anladım. Onun sahibi olduğu tekstil fabrikinin tam qurulması üçün əlimdən nə gəlirsə, köməklik etdim və 2020-ci ilədək Səkinə Babayevaya istehsal üçün lazım olan tesktil məhsulları göndərdim. Göndərdiyim məhsulların ödənişləri aramızdakı razılaşmaya görə ABŞ dollar ilə ödənilirdi. 2020-ci ildə yuxarıda da qeyd etdiyim kimi, COVİD-19 pandemiyası zamanı tibbi maska istehsalı üçün avadanlıq və xammal göndərilməsində iştirak etdim. Bir daha qeyd edirəm ki, mən həm avadanlığı, həm də xammalı ozamankı dəyərindən on qatlarla ucuz qiymətə göndərirdim. Ağır günlərdə doğma Azərbaycanımıza kömək üçün artıq qazanc güdmədən gecə-gündüz çalışdıq.

Lakin pandemiyadan sonra yenidən əvvəlki kimi tekstil məhsullarını göndərdiyim zaman artıq Səkinə Babayeva məhsulların pulunu ödəməməyə başladı. Mən aramızda qarşılıqlı güvən olduğunu düşündüyüm üçün məhsul göndərilməsini dayandırmadım. Məhsulların hamısı Türkiyə Respublikasından Azərbaycan Respublikasına “ölkədən çıxma idxal bəyannaməsi” ilə göndərilib”.
Ercan Koçak əlavə edib ki, məsələ ilə bağlı hüquq-mühafizə orqanlarına da müraciət edib.
İttihamlarda adı keçən “Bakı Tekstil Fabriki”nin direktoru Səkinə Babayeva ilə əlaqə saxladıq. O, “Qafqazinfo”ya açıqlamasında iddiaları təkzib etdi. Xanım sahibkar Ercan Koçakın bir neçə ildir onu və övladlarını şantaj etdiyini, müxtəlif yollarla təhdid edərək pul almaq istədiyini iddia edib: “Biz onun atası Elemdar Koçakla 12 il əvvəl birgə iş qurmuşuq və fəaliyyət göstərmişik, həmin dövrdə hər şey qaydasında idi. Alemdar Koçak vəfat etdikdən sonra oğlu Ercan Koçak mənim oğlumla şərikli iş qurub. Mənim onunla heç bir ortaqlığım yoxdur və dediklərinin hamısı şər-böhtan xarakterlidir. Belə ki, oğlum onunla birgə qurduğu işdən çıxmaq üçün Türkiyədəki evini sataraq ödədi, həmçinin Bakıda Ercana 180 min manat ödəniş edilib. Bundan sonra E.Koçak ona hər hansı borcumuzun olmamasına dair sənədi də imzalayıb. Lakin sonradan hansısa şəxslərin yönləndirməsi ilə, hansısa düşüncələrə qapılaraq yenidən hədə-qorxu üsuluna əl atmaqla pul əldə etmək fikrinə düşüb. Həmçinin qeyd etmək istəyirəm ki, sahibkarlar arasındakı biznes narazılıqları və sair iqtisadi məsələlər olduğundan məsələ İqtisadi Məhkəmənin predmetidir. Lakin bu şəxs 2 aydan artıqdır polisə müraciət edib. Əgər mənim əməllərimdə hər hansı qeyri-qanuni tərkib olardısa, barəmdə cinayət işi açılardı. Lakin elə bir hal yoxdur, ola da bilməz. Biz Türkiyədən aldığımız bütün malların gömrük rəsmiləşdirməsini, ödənişləri, vergi bəyannamələri hamısını qanunvericiliyə uyğun şəkildə təmin etmişik. Onların göndərdikləri dəzgahların da hamısı işlənmiş və yararsız olduğuna görə fəaliyyətsiz qalıb. Bütün bunlara dair sənədləri də aidiyyəti qurumlara təqdim etmişik”.
İş adamı əlavə edib ki, pandemiya dövründə gücləndirilmiş rejimdə işləyiblər və 4 milyon manatdan artıq ziyan ediblər.(“Qafqazinfo”)
Aslan Vəliyev

“Tamstore” şəbəkəsinin Binəqədidə açılan mağazasında “1 məhsul al, ikincisi hədiyyə” kampaniyası çərçivəsində son istifadə müddəti bitmiş məhsullar təklif edilir

“Tam istədiyiniz market” şüarı ilə fəaliyyət göstərən Tamstore marketlər şəbəkəsi 100-cü mağazasının açılışını və sürətli inkişafını qeyd edir. Lakin şəbəkənin yubiley uğuru ilə bağlı xəbərlərin yayıldığı günlərdə mağazalarda alıcıların qarşılaşdığı mənzərə narazılıq doğurub.

Alıcılardan biri Bestmedia.az- bildirib ki, "Tamstore”un “bir məhsul alana ikincisi hədiyyə” kampaniyası çərçivəsində təklif etdiyi bəzi məhsulların son istifadə müddəti artıq başa çatıb. Yəni alıcı cəlbedici endirim və hədiyyə vədi ilə məhsul almaq istəsə də, nəticədə vaxtı keçmiş məhsulla qarşılaşır.

Bu isə istehlakçılarda haqlı sual yaradır: 100-cü mağazanın açılışı ilə öyünən şəbəkə məhsullarının son istifadə müddətinə lazımi nəzarət edirmi?

100 mağaza – amma vaxtı keçmiş məhsullar?

“Tamstore” Binəqədi qəsəbəsində 100-cü mağazasını açmaqla şirkətin strateji inkişaf planında nəzərdə tutulan mühüm hədəfə vaxtından əvvəl çatdığını açıqlayıb.

Şəbəkənin məlumatına görə, şirkət üç il ərzində 100 mağazaya çatmağı qarşısına məqsəd qoymuşdu. Bu hədəfin nəzərdə tutulandan daha qısa müddətdə reallaşdırıldığı bildirilir.

Hazırda şəbəkənin Bakıda 56, Abşeronda 8, Sumqayıtda 6, Naxçıvanda 2, digər bölgələrdə isə 28 mağazası fəaliyyət göstərir. “Tamstore” gündəlik təxminən 200 min müştəriyə xidmət göstərdiyini və 4 mindən çox mağaza əməkdaşını işlə təmin etdiyini açıqlayır.

Şəbəkənin baş icraçı direktoru Ceyhun Yusubov 100 mağaza hədəfinə vaxtından əvvəl çatılmasını komandanın birgə əməyinin nəticəsi kimi qiymətləndirib.

Ancaq mağaza sayının sürətlə artması ilə xidmət və məhsul keyfiyyətinə nəzarət arasında tarazlığın qorunub-qorunmadığı məsələsi indi xüsusi diqqət tələb edir. Çünki istehlakçı üçün marketin 100-cü və ya 200-cü mağazasını açmasından daha vacib olan onun aldığı məhsulun təhlükəsiz və istifadəyə yararlı olmasıdır.

“İkinci məhsul hədiyyədir” – bəs məhsulun vaxtı keçibsə?

Ticarət şəbəkələrinin həyata keçirdiyi “bir məhsul al, ikincisini hədiyyə qazan” tipli kampaniyaların əsas məqsədi adətən alıcıları cəlb etmək və satışları artırmaqdır.

Lakin hədiyyə kimi təqdim olunan məhsulun son istifadə müddəti başa çatıbsa, kampaniyanın mahiyyəti tamamilə dəyişir. Belə halda alıcıda haqlı olaraq məhsulun satılması mümkün olmadığından kampaniyaya daxil edilib-edilmədiyi barədə şübhə yaranır.

Xüsusilə də qida məhsullarının son istifadə müddətinin keçməsi sadəcə keyfiyyət məsələsi deyil. Bu, birbaşa istehlakçıların sağlamlığı və təhlükəsizliyi ilə bağlı məsələdir.

Buna görə də böyük market şəbəkələrinin filiallarında məhsulların yararlılıq müddətinə gündəlik və ciddi nəzarət mexanizminin mövcudluğu vacibdir. Kampaniya adı altında vaxtı keçmiş məhsulların alıcıya təklif edilməsi ilə bağlı iddialar təsdiqlənərsə, bu, “Tamstore” üçün ciddi reputasiya probleminə çevrilə bilər.

“Etibarın ünvanı” hədəfi və ortaya çıxan suallar

Şirkət rəhbərliyi 100-cü mağazanın açılışını yeni başlanğıc kimi qiymətləndirir və gələcəkdə regionlardakı mövcudluğunu genişləndirməyi, xidmət keyfiyyətini və rəqəmsal imkanları gücləndirməyi hədəflədiyini bildirir.

“Tamstore”un məqsədlərindən biri brendi Azərbaycanda etibar edilən ünvanlardan birinə çevirməkdir.

Ancaq etibar yalnız yeni mağazaların sayı və gözəl açılış mərasimləri ilə formalaşmır. Etibar ilk növbədə mağaza rəfində başlayır.

100-cü mağazanın açılması şirkət üçün, şübhəsiz, mühüm göstəricidir. Amma alıcı üçün əsas göstərici aldığı məhsulun keyfiyyətidir. Bu səbəbdən də “bir məhsul al, ikincisi hədiyyə” kampaniyası çərçivəsində vaxtı keçmiş məhsulların təklif olunması barədə iddialar ciddi şəkildə araşdırılmalı, şirkət isə məsələyə aydınlıq gətirməlidir.

Bestmedia.az məsələ ilə bağlı “Tamstore”un mövqeyini öyrənməyə hazırdır.

Vüsal Nəsərilinin Azərbaycan Avtomobil Yolları Dövlət Agentliyinə sədr təyinatından sonra qurumun tabeliyində genişmiqyaslı yoxlamalar aparılması, hətta bir çox kadrların vəzifələrini itirməsi ona ümidi artırsa da, görünən odur ki, o, əvvəlki sədr Saleh Məmmədovdan müsbət iş üslubu baxımından fərqlənmir.

Bu barədə mia.az-a verilən məlumata görə, təyinatının ilk vaxtlarında Saleh Məmmədovdan qalan və korrupsiyaya bulaşmaları şübhə doğurmayan yüksək vəzifəli şəxslərinin fəaliyyətini yoxladan yeni sədr sonradan onların çoxu ilə "dil tapıb":

"Elə götürək, iki ay əvvəl Azərbaycan Avtomobil Yolları Dövlət Agentliyinə yeni sədr müavini təyin olunan Kamran Əzizovu.

Bu adam Saleh Məmmədovun korrupsiya mexanizmində əsas adamlardan biri idi. Hətta onlar o qədər yaxın idi ki, Saleh Məmmədov onsuz xarici səfərlərə belə ayaq basmırdı. O vaxtı Avtomobil Yollarının İstismarı və Təmiri Baş İdarəsinin rəisi olan Kamran Əzizov qısa zamanda hansısa yollarla Vüsal Nəsirlinin qəlbinə də yol tapdı və üstəlik, heç kimin gözlənmədiyi halda sədr müavini vəzifəsinə təqdimat ala bildi.

İndisə o, Nəsirlini ən etibarlı adamı olmaqla yanaşı, həm də köhnə kadrlarla sədrin arasındakı əsas körpü rolunu oynayır. Məhz bu səbəbdən fəaliyyəti yoxlanılan, hətta vergi borcu milyonları aşan idarə rəislərinin çoxu nəinki azad olundular, əksinə, daha da irəli çəkildilər. Sual oluna bilər, necə?! Axı bu adamlar yoxlamadan təmiz çıxıblarsa, niyə təftişin nəticələri elan olunmadı? Bəs Maliyyə Nazirliyinin yoxlaması necə bitdi?!

Əlbəttə, bu və ya digər istiqamətdə veriləcək o qədər suallar var ki..."

Mia.az

Azərbaycanda tanınmış MSDIS HOLDING"in böyük məbləğdə vergi borcu üzə çıxıb.

Bizimesr.media bildirir ki, "MSDIS HOLDING" MMC-nin (VÖEN 1505072121) vergi borcu 21 milyon 937,6 min manatdır.

Böyük vergi borcu olması və ödənişdəki çətinlik səbəbindən "MSDIS HOLDING"-in əmlakları satışa çıxarılıb. Belə ki, Əmlak Məsələləri Dövlət Xidməti tərəfindən hzoldinqə məxsus olan torpaq sahəsi və qeyri-yaşayış obyekti hərraca çıxarılıb.

Buraya İmişli rayonunda, Bəhramtəpə qəsəbəsində yerləşən 1 hektar 16 sot torpaq sahəsi, eləcə də Bakı şəhəri Nərimanov Rayonu, Xətai pr ev.34 ünvanında yerləşən 612 kvadratmetrlik qeyri-yaşayış obyekti aiddir.

Maraqlıdır ki, hər iki obyekt olduqca aşağı ilkin qiymətə – cəmi 58 min manata satışa çıxarılıb. Hərracda iştirak etmək istəyənlər əmlakın dəyərinin 5%-i həcmində – 2900 manat beh yatırmalıdırlar.

Qeyd edək ki, Bakıda, Abşeronda və bir çox başqa rayonlarda fəaliyyət göstərən “MS Oil” yanacaqdoldurma məntəqələri “MSDIS Holding”ə məxsusdur. Holdinqin rəhbəri Mirfəyyaz Nağıyevdir. «MS OIL» şirkətinin hüquqi ünvanı Bakı, Nərimanov rayonu, İsmayıl Hidayətzadə ev 20A m 51-dir. Maraqlıdır ki, yanacaqdoldurma məntəqələri satışa çıxarılmayıb.

Bizimesr.media

Avqustun 26-da Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyeva, qızları Leyla Əliyeva və Arzu Əliyeva K.Y.Fərəcova adına Elmi-Tədqiqat Pediatriya İnstitutunu ziyarət ediblər.

Səhiyyə naziri Teymur Musayev Birinci vitse-prezident Mehriban Əliyevaya İnstitutun fəaliyyəti barədə məlumat verdi.

Qeyd olundu ki, Elmi-Tədqiqat Pediatriya İnstitutu bir əsrdən çoxdur uşaqların sağlamlığının qorunması kimi mühüm və nəcib işə xidmət edir.

Hazırda elmi-metodik mərkəz kimi fəaliyyət göstərən bu tibb müəssisəsi 1925-ci ildə 200 çarpayılıq uşaq xəstəxanasının bazasında təşkil olunub, 1927-ci ildə yenidən qurularaq Ana və Uşaqları Mühafizə İnstitutuna çevrilib. Burada uşaqların müalicə-profilaktikası ilə yanaşı, pediatriya sahəsində peşəkar tibbi kadrların hazırlanması, elmi tədqiqatların aparılması, mövcud tibb təhsilinin təkmilləşdirilməsi həyata keçirilir. İnstitutda 255 çarpayılıq klinik şöbələr, elmi və bir çox paraklinik bölmələr var. Yenidoğulanların 60 çarpayılıq reanimasiyası və intensiv terapiyası şöbəsi respublika üzrə mərkəz funksiyasını yerinə yetirir.

Birinci vitse-prezident və qızları ziyarət zamanı institutda yaradılmış şəraitlə tanış olublar. Həmçinin gələcəkdə fəaliyyətin təkmilləşdirilməsi üçün instituta avadanlıqlar – süni ventilyasiya aparatları hədiyyə edilib.

Tanınmış aktrisa Rumiyyə Ağayeva “Kontakt Home” mağazalar şəbəkəsindən şikayətçidir.

O, paylaşdığı videoda mağazadan aldığı robot tozsoranın qısa müddət sonra xarab olduğunu və məhsulu geri qaytarmaq istəyərkən mağaza ilə ciddi problem yaşadığını bildirib.

Onun sözlərinə görə, ötən ilin may ayında “Kontakt Home” mağazalarından birindən “Xiaomi X Pro 20+” robot tozsoranı alıb. O, məhsulu “Qızıl Zəmanət”lə aldığı üçün tozsoranın qiymətindən əlavə 300 manatdan çox pul ödəyib.

Aktrisa bildirib ki, ona 3 il ərzində məhsulda problem yaranacağı halda dəyişdirilmə, pulun geri qaytarılması və digər imkanların təqdim olunacağı deyilib:

“2-3 ay sonra tozsoran xarab oldu. Məhsulu mağazaya apararaq “Qızıl Zəmanət” şərtlərinə uyğun qaytarmaq istədiyimi bildirdim. Məhsul servisə göndərildi. Rasim adlı əməkdaş mənə dedi ki, servis zavod qüsurunu təsdiqləsə, ödənişin 100 faizi kompensasiya ediləcək. Problem müştərinin günahı ucbatından yaranıbsa, 50 faiz kompensasiya veriləcək”.

Rumiyyə Ağayeva iddia edib ki, həmin əməkdaş daha sonra servisin rəyini gözləmədən ona yeni “Xiaomi X Pro 5” robot tozsoranı götürməyi təklif edib:

“Dedi ki, kompensasiya müəyyənləşdikdən sonra yeni məhsulun ödənişini həmin məbləğ hesabına edə bilərəm. Hətta yanımdakı dostum bir neçə dəfə mənə servisin rəyini gözləməyi məsləhət görsə də, mağaza əməkdaşının dediklərinə inanaraq məhsulu götürdüm”.

Aktrisa deyib ki, bir müddət sonra ona məlumat verilməyib və özü servislə əlaqə saxlayıb. Servisdə isə məhsulun təmir edildiyini və zavod qüsurunun olduğunu bildiriblər. Bundan sonra kompensasiya üçün mağazaya müraciət edən aktrisaya köhnə tozsoranın hazır olduğu və onu götürə biləcəyi deyilib.

“Mən məhsulu artıq götürmək istəmədiyimi, Rasim adlı əməkdaşın təklifi ilə yeni tozsoran aldığımı bildirdim. Uğur adlı əməkdaş əvvəlcə belə bir təklifin edilməsinin mümkün olmadığını söylədi. Mən isə zənglərin araşdırılmasını istədim.

Təxminən 2-3 saat sonra mənimlə yenidən əlaqə saxlanıldı. Bildirildi ki, əməkdaşla danışılıb və onun səhv etdiyi məlum olub. Lakin həmin səhvə görə mənə yalnız yeni məhsul alacağım təqdirdə 50 manatlıq kupon verilə biləcəyi, kompensasiyanın isə ödənilməyəcəyi deyildi.
Mən isə yeni məhsulu artıq mağaza əməkdaşının sözlərinə əsasən götürmüşəm. İndi zəng edib Uğur adlı şəxsə deyirəm ki, mağazada araşdırma aparın, işçiniz mənə yalan danışıb. Nəticədə belə çıxır ki, yalançı da, aldadılan və kiminsə səhvinə görə pul verən də mənəm”.

Aktrisa sonda əlavə edib ki, mağazadan yeni götürdüyü “Xiaomi X Pro 5” robot tozsoranda da problem yaranıb.

“Bakupost”

Bakıda Bilgəh incəsənət məktəbinin açılışı olub.

Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva və qızı Arzu Əliyeva açılışda iştirak ediblər.

Mədəniyyət naziri Adil Kərimli incəsənət məktəbində görülən işlər barədə məlumat verib.

Bildirilib ki, Bilgəh incəsənət məktəbi Bilgəh qəsəbə Mədəniyyət Evi, 27 nömrəli uşaq musiqi məktəbi və Sabunçu rayon mərkəzləşdirilmiş kitabxana sisteminin 10 nömrəli kitabxana filialının fəaliyyətlərinin optimallaşdırılması nəticəsində yaradılıb.

Qeyd edək ki, Bilgəh qəsəbə Mədəniyyət Evinin inzibati binası 1987-ci ildə inşa olunduğundan ötən müddət ərzində köhnələrək istifadəyə yararsız vəziyyətə düşmüşdü. Bu səbəbdən Heydər Əliyev Fondu tərəfindən 220 yerlik yeni məktəb binası inşa olunub.

Zəruri mebel və avadanlıqlarla, əyani vəsaitlərlə təchiz edilən təhsil müəssisəsinin binasında musiqi, nəzəriyyə, xor, fotoqrafiya, rəssamlıq, heykəltaraşlıq, dizayn otaqları, xoreoqrafiya və akt zalları, qarderob, kitabxana və yeməkxana var.

Məktəbin həyətyanı ərazisində abadlıq və yaşıllaşdırma işləri də görülüb.

Masallının Boradigah qəsəbə sakinləri poçt şöbəsinin sentyabr ayından ləğv ediləcəyi barədə məlumatdan narahatlıqlarını bildirərək Prezident İlham Əliyevə, Rəqəmsal İnkişaf və Nəqliyyat naziri Rəşad Nəbiyevə və AZCON Holdinqin sədri Manaf Babayevə müraciət ediblər.

Sakinlər müraciətdə Boradigah poçt şöbəsinin fəaliyyətinin davam etdirilməsini xahiş ediblər.

Onların sözlərinə görə, qəsəbədə poçt-teleqraf xidmətinin əsası 1929-cu ildə qoyulub. Boradigah həmin dövrdə Lənkəran qəzasında müasir poçt-teleqraf xidmətinin göstərildiyi yaşayış məntəqələrindən biri olub.

Sakinlər qeyd ediblər ki, Boradigah tarixən bölgənin mədəni-maarif mərkəzlərindən biri olmaqla yanaşı, hazırda da ətraf yaşayış məntəqələri üçün mühüm mərkəz rolunu oynayır. Qəsəbədə 14 kəndə xidmət göstərən polis bölməsi və xəstəxana fəaliyyət göstərir.

Müraciətdə bildirilib ki, qonşu kəndlərin sakinləri də gündəlik ehtiyaclarını qarşılamaq, o cümlədən poçt xidmətlərindən istifadə etmək üçün Boradigaha gəlirlər.

Sakinlər texnologiyanın inkişafı nəticəsində poçt xidmətlərinə tələbatın müəyyən qədər azaldığını qəbul etsələr də, əhalinin, xüsusilə orta və yaşlı nəslin poçt şöbəsinin xidmətlərindən istifadə etməkdə davam etdiyini vurğulayıblar.

Onların sözlərinə görə, sakinlər kommunal ödənişlər də daxil olmaqla bir sıra xidmətlərdən poçt şöbəsi vasitəsilə yararlanırlar. Bəzən işıq və qaz kartlarına ödəniş zamanı yaranan bloklanmaların aradan qaldırılması üçün də poçt şöbəsinə müraciət edilir.

“Qəsəbəmizin on üç minə yaxın əhalisi var. Masallı şəhəri və Ərkivan qəsəbəsindən sonra rayonun üçüncü ən böyük yaşayış məntəqəsidir. Ətraf kəndlərin mərkəzində yerləşir”, – deyə müraciətdə qeyd olunub.

Sakinlər Boradigahın coğrafi və strateji mövqeyinin də nəzərə alınmasını istəyirlər. Bildirilib ki, qonşu kəndlərin sakinləri rayon mərkəzinə gedərkən Boradigahdan keçirlər.

Müraciət müəllifləri poçt şöbəsinin bağlanacağı təqdirdə onun əvəzinə Lənkəran istiqamətində yerləşən başqa bir kənddə poçt şöbəsinin yaradılmasının həm Boradigah sakinləri, həm də ətraf kəndlərin əhalisi üçün əlavə çətinlik yaradacağını bildiriblər.

“Sizdən Boradigah qəsəbə poçt şöbəsinin saxlanmasına köməklik göstərməyinizi xahiş edirik. İnanırıq ki, qəsəbə əhalisinin bu istəyini yerinə yetirəcəksiniz”, – müraciətdə vurğulanıb.

AzPost.az