Qazi Sənan Zeynalov sosial şəbəkə hesabında paylaşdığı video müraciətlə üzləşdiyi problemlə bağlı aidiyyəti qurumlara səslənib. O bildirib ki, 2020-ci ildə Vətən müharibəsinə könüllü olaraq qatılıb. Müharibədən sonra isə işlə təmin olunmaq üçün müxtəlif dövlət qurumlarının qapısını döydüyünü deyən Zeynalovun sözlərinə görə, ötən 5 il ərzində müraciət etdiyi qurumların heç birindən konkret nəticə əldə edə bilməyib. Qazi qeyd edir ki, hər dəfə ona eyni cavab verilib: “Xəbər edəcəyik”. Lakin onun sözlərinə görə, illər keçsə də, həmin “xəbər”dən hələ də əsər-əlamət yoxdur. Sənan Zeynalov müxtəlif tədbirlərdə iştirak etdiyini, fəxri diplomlarla təltif olunduğunu və hazırda İdman Akademiyasında ikinci ali təhsil aldığını da bildirib. Vətən müharibəsi iştirakçısı müraciətində həm ictimaiyyətə, həm də aidiyyatı dövlət qurumlarına səslənərək səsinin eşidilməsini istəyib. O, işlə təmin olunması üçün ona dəstək göstərilməsini və probleminin həllinə köməklik edilməsini xahiş edib.

Kanal13 GLOBAL

"Azpetrol" yanacaq doldurma məntəqəsində (Qala ərazisində yerləşən, aeroport yolundakı) operatorun səhvi nəticəsində maşınıma dizel yanacağı əvəzinə benzin tökukub..." Bu barədə "Müştəriyəm Şikayətim Var" sosial qrupundakı paylaşımında Anar Ağayev adlı istifadəçi gileylənir.


Narazı vətəndaş daha sonra başına gələnləri belə nəql edir: "Mənə xeyli ziyan dəydi. Boşaltdığım yanacağı qablara tökub geri qaytardım... Müdiriyyət qəbul etmədi. Hələ bunlar bir yana, etiraz etdikdə mühafizə işçisi mənə zor tətbiq etdi..."


Dia-az

İş adamı və xeyriyyəçi Mahirə Əsədova Azərbaycan Respublikasının Prezidenti İlham Əliyevə və Birinci vitse-prezident Mehriban Əliyevaya videomüraciət ünvanlayıb.

Mahirə Əsədova müraciətində uzun illər sahibkarlıq fəaliyyəti ilə məşğul olduğunu, 27 il ərzində əldə etdiyi vəsaiti 2019-cu ildə “Sonar Farm” dərman şirkətinin yaradılması və inkişafına yatırdığını bildirib.

Sahibkar qeyd edib ki, dövlət rəhbərliyinin sahibkarlara göstərdiyi dəstək və yaratdığı imkanlardan ilhamlanaraq müxtəlif xeyriyyə layihələrində iştirak edib. Onun sözlərinə görə, 1,8 milyon manat dəyərində dərman vasitələrini dövlətə ianə edib. Bundan başqa, Ağdam rayonunun 5 kəndində artezian quyuları qazdıraraq 1000-ə yaxın evin su ilə təmin olunmasına dəstək göstərib.

M.Əsədova müraciətində “Sonar Farm” şirkəti ətrafında yaranmış vəziyyətlə bağlı ciddi narazılığını ifadə edib. Onun sözlərinə görə, bir müddət əvvəl Robert Əyyubov müxtəlif qanunsuz yollarla şirkəti onun iradəsindən kənar ələ keçirib.

Sahibkar bildirib ki, məsələ ilə bağlı Binəqədi Rayon Polis İdarəsində və Bakı Şəhər Prokurorluğunda araşdırmalar davam etdirilir. O, şirkətlə bağlı yaranmış vəziyyətin tam, obyektiv və qanun çərçivəsində araşdırılmasının vacibliyini vurğulayıb.

Mahirə Əsədovanın sözlərinə görə, “Sonar Farm” şirkəti yaradılarkən iş adamı Elnur İsgəndərovla şərikli fəaliyyətə başlayıblar. Həmin vaxt onların birgə qərarı ilə şirkət Elnur İsgəndərovun xalası oğlu Saqil Hacıyevin adına rəsmiləşdirilib.

Sahibkarın iddiasına görə, 2025-ci ildə Elnur İsgəndərovun həbsindən sonra şirkətlə bağlı vəziyyət dəyişib. M.Əsədova bildirib ki, vəkil Əziz Qənbərli rəsmi müdafiəçi olmamasına və məsələyə aidiyyəti olmadığını düşündüyü halda müəyyən əlaqələrindən istifadə edərək cəzaçəkmə müəssisəsində Elnur İsgəndərovla görüşüb.

M.Əsədovanın iddiasına görə, həmin görüş zamanı Elnur İsgəndərova təzyiq göstərilərək şirkətin Robert Əyyubovun adına keçirilməsi tələb olunub.

Sahibkar müraciətində məsələ ilə bağlı belə deyib:

“İlk öncə şirkətə aid olan 1 milyon 200 min manat vəsaitin guya hansısa hüquq-mühafizə orqanında hansısa işin həll edilməsi üçün şirkətin kassasından çıxarıldığını bildirdilər. Bundan sonra Elnura hədə-qorxu gələrək şirkətin Robertin adına keçirilməsini tələb etdilər. Elnur İsgəndərov əvvəlcə bununla razılaşmayıb. Lakin sonradan şantajlar və cəzaçəkmə müəssisəsində bəzi şəxslərin təzyiqi nəticəsində psixoloji təzyiq altında razılaşmağa məcbur olub”.

M.Əsədova bildirib ki, Elnur İsgəndərov Yaşar adlı şəxsin vasitəsilə xalası oğlu Saqil Hacıyevə xəbər göndərərək şirkətin Robert Əyyubovun adına rəsmiləşdirilməsinə sənədlə razılıq verməsini istəyib. Onun sözlərinə görə, nəticədə 300 min manatlıq müqavilə əsasında şirkət bir şəxsin adından digərinin adına keçirilib.

İş adamının iddiasına görə, bazar dəyəri təxminən 20-21 milyon manat olduğu bildirilən şirkətin 300 min manat məbləğində alqı-satqı predmetinə çevrilməsi ciddi suallar doğurur.

M.Əsədova şirkətdəki payının və mülkiyyət hüquqlarının pozulduğunu, prosesdən xəbərsiz saxlanıldığını bildirir.

Qeyd edək ki, “Sonar Farm” ətrafında yaranmış vəziyyətlə bağlı daha əvvəl də müxtəlif media materialları yayımlanıb. Həmin məlumatlarda şirkətin pay sahiblərinin iradəsindən kənar və təzyiq yolu ilə başqa şəxsin adına keçirildiyi barədə iddialar səsləndirilib. İddialarla bağlı hüquq-mühafizə orqanlarına müraciətlərin edildiyi və müxtəlif sənədlərin təqdim olunduğu da bildirilib.

Mahirə Əsədovanın sözlərinə görə, son bir ildən artıq müddətdə məsələ ilə bağlı müxtəlif dövlət qurumlarına və hüquq-mühafizə orqanlarına çoxsaylı müraciətlər ünvanlanıb. Sahibkar bildirib ki, müəyyən araşdırmalar aparılsa da, problemin onun gözləntisinə uyğun şəkildə tam həll olunmadığını düşündüyü üçün məsələni ölkə rəhbərliyinin diqqətinə çatdırmaq qərarına gəlib.

O, aidiyyəti dövlət qurumlarından məsələnin hərtərəfli araşdırılmasını, təqdim etdiyi sənəd və sübutlara hüquqi qiymət verilməsini, qanun pozuntusu müəyyən ediləcəyi təqdirdə isə müvafiq tədbirlərin görülməsini xahiş edib.

M.Əsədova vurğulayıb ki, müraciətinin əsas məqsədi məsələnin ictimailəşdirilməsi deyil, yaranmış problemin qanuni və obyektiv şəkildə həll edilməsidir.

Sahibkar Prezident İlham Əliyevdən və Birinci vitse-prezident Mehriban Əliyevadan məsələyə diqqət göstərilməsini və aidiyyəti dövlət qurumları tərəfindən araşdırmanın təmin olunmasını xahiş edib.

Qeyd: “Sonar Farm” ətrafında səsləndirilən iddiaların hüquqi baxımdan yekun qiyməti yalnız səlahiyyətli dövlət orqanlarının araşdırması və məhkəmənin qanuni qüvvəyə minmiş qərarı əsasında müəyyən edilə bilər.

Realazerbaycan.az

Azərbaycan-Fransız Universitetinin (UFAZ) 3-cü kurs tələbəsi, 19 yaşlı Fidan Abbaslının ölümü ilə bağlı atası Kamil Abbasov ağır ittihamlarla çıxış edib.
"Bakupost" xəbər verir ki, Kamil Abbasov “Referans” Endokrin və Cərrahi Mərkəzinin həkimləri Amil Əliyev və Vidadi Kəbirlinin fotolarını yayımlayaraq onları qızının ölümündə günahlandırıb.
O, 19 yaşlı Fidanın “həkimlərin səhlənkarlığının qurbanına çevrildiyini” bildirib və məlumatın maksimum şəkildə yayılmasını istəyib.
Məlumata görə, Fidan Abbaslı bir müddət əvvəl rinoplastika əməliyyatı keçirib. İddialara əsasən, əməliyyat zamanı onun vəziyyəti qəfil ağırlaşıb və gənc qız şok vəziyyətinə düşüb. Həmçinin həmin anda klinikada zəruri şokəleyhinə preparatın olmadığı iddia edilir.
Qeyd edək ki, Fidan Abbaslı sentyabrın 21-də vəfat edib. O, UFAZ-ın kompüter elmləri ixtisası üzrə III kurs tələbəsi olub.
Fidan Dəyanət Liseyinin məzunu idi. Atası Kamil Abbasovun da həmin liseydə kimya-biologiya müəllimidir.
Hazırda faktla bağlı araşdırma aparılır.

Prezident Administrasiyasının sabiq rəhbəri Ramiz Mehdiyevin cinayət məsuliyyətinə cəlb olunmasından sonra onun özünə və yaxın ətrafına aid bir sıra əmlaklara həbs qoyulub.

Məlumata görə, istintaq orqanının diqqətindən kənarda qaldığı bildirilən, Ramiz Mehdiyevin kürəkəni İlham Əliyevə məxsus bir sıra digər əmlaklar da mövcuddur.

Belə ki, əldə etdiyimiz məlumata görə, Xaçmaz rayonunun sabiq icra başçısı Şəmsəddin Xanbabayevlə İlham Əliyevin şərik olduğu bildirilən bir sıra obyektlər satışa çıxarılıb.

Diqqətçəkən məqam ondan ibarətdir ki, sosial şəbəkələrdə yayılan əmlak elanlarında Xaçmaz rayonunda yerləşən müxtəlif qeyri-yaşayış obyektləri və torpaq sahələri satışa təklif olunur.

Xaçmaz rayonunda yerləşən bir neçə əmlakın satıldığı bildirilir.

Elana əsasən, təklif olunan əmlaklar arasında aşağıdakılar var:

Xaçmaz şəhərinin mərkəzində: Xalça Muzeyinin yaxınlığında, İcra Hakimiyyətinin qarşısında yerləşən, 300 kvadratmetr sahəsi olan qeyri-yaşayış obyekti.

Mirzəoba kəndində: 10 hektar torpaq sahəsi. Elan müəllifi ərazinin setka hasara alındığını, suvarma üçün artezian sisteminin və transformatorun olduğunu, çıxarışının mövcudluğunu qeyd edib.

Həsəngala kəndində: Üç gölün, ümumilikdə 5 hektar və əlavə 2 hektar torpaq sahəsinin satıldığı bildirilir. Elana əsasən, əmlakların çıxarışı var.

Yalama ərazisində: Dörd yolun yaxınlığında, magistral yolun kənarında yerləşən 85 sot torpaq sahəsi satışa çıxarılıb. Elan müəllifi bu əmlakın da çıxarışının olduğunu bildirir.

Əmlakların mümkün müsadirə və ya həbs riskini nəzərə alaraq satışa çıxarıldığı ehtimalı da istisna edilmir.

Gununsesi

"İnternational" bank olmayan kredit təşkilatının rəhbəri vətəndaşa qarşı kobudluq edib.
Bununla bağlı Manset.az-a şikayət daxil olub. Belə ki, "İnternational" BOKT-nın Gənclikdə yerləşən şöbəsinin rəhbəri olduğu bildirilən 90 AS 055 "Mercedes Galenvagen" markalı avtomobilin sürücüsü filialın qarşısında vətəndaşa kobudluq edib. Vətəndaş Ədilə Abdullayeva bank olmayan kredit təşkilatının qarşısında park yeri üçün nəzərdə tutulmayan, piyadaların hərəkətinə mane olan səkinin görüntülərini çəkərkən təşkilatın rəhbəri avtomobilini vətəndaşın üzərinə sürüb. Ədilə Abdullayeva qəzadan son anda xilas olub. Görüntülər çəkilən videoda öz əksini tapıb.
Bunu da bildirək ki, həmin ərazi vətəndaşların intensiv hərəkəti üçün nəzərdə tutulub. Ərazidə parkinq xidməti mövcud deyil.

Bakının Yeni Yasamal qəsəbəsi, Dadaş Bünyadzadə küçəsi 5 ünvanında otel tikintisi aparıdığı iddia olunur. Bizimesr.media bildirir ki, ərazidə yaşayan sakinlər tikinti və ağacların məhv edilməsi ilə bağlı şikayətlərinə cavab verilmədiyini bildirirlər. Sakinlərin sözlərinə görə, sözügedən ünvanda aparılan tikinti ilə bağlı aidiyyəti qurumlara dəfələrlə müraciət edilsə də, indiyədək heç bir nəticə əldə olunmayıb.

VİDEO LİNKDƏ: https://bizimesr.media/az/post/yeni-yasamalda-agaclari-mehv-edib-otel-tikirler---sakinleri-esiden-hec-bir-qurum-yoxdur--video-23469

Ərazidə ağaclar məhv edilir, bununla bağlı cərimələr tətbiq olunsa da, tikinti işləri davam etdirilir. Onların fikrincə, maddi imkanları geniş olan tikinti sahibinin cərimə ödəməsi otel layihəsinin həyata keçirilməsinə mane olmur.

Məsələ ilə bağlı Yasamal Rayon İcra Hakimiyyətinin başçısı Elşad Həsənova, Dövlət Şəhərsalma və Arxitektura Komitəsinin sədri Anar Quliyevə, eləcə də Bakı Şəhər Memarlıq və Şəhərsalma Baş İdarəsinin rəisi Riad Quliyevə ünvanlanan müraciətlərin də cavabsız qaldığı bildirilir.

Beləliklə, sakinlərin şikayətlərinə baxmayaraq, Dadaş Bünyadzadə küçəsi 5 ünvanında ağacların məhv edildiyi və otel tikintisinin davam edir.

Məsələ ilə bağlı aidiyyəti qurumların mövqeyini dərc etməyə hazırdır.

Bizimesr.media

Dövlət Gömrük Komitəsinin Daxili Təhlükəsizlik İdarəsi Aksizli Mallar üzrə Baş Gömrük İdarəsində yoxlama aparıb.

Yoxlama zamanı gömrük orqanına bəyan edilmiş nəqliyyat vasitələrinin gömrük rəsmiləşdirilməsi zamanı mühərriklərin həcminin düzgün hesablanmadığı müəyyənləşib.

Nəticədə, Dövlət Gömrük Komitəsinin (DGK) sədri, gömrük xidməti general-polkovniki Şahin Bağırov baş inspektor, gömrük xidməti kapitanı Elçin Tofiq oğlu Vəlizadəni və ekspert-auditoru Babək İsa oğlu Nəsibovu vəzifəsindən azad edib.

Aksizli Mallar üzrə Baş Gömrük İdarəsinin Rəsmiləşdirmə mərkəzinin baş inspektorları, gömrük xidməti polkovnik-leytenantı Mehdi Qadir oğlu Rüstəmova, gömrük xidməti mayoru Qasım­bala Məmmədəğa oğlu Tağıyevə, böyük inspektor, gömrük xidməti baş leytenantı Cavid Hikmət oğlu İbrahimliyə və inspektor, gömrük xidməti mayoru Füzuli Səroj oğlu İbrahimova xəbərdarlıq edilib.

“Azərterminalkompleks” Birliyi tərəfindən həmin Birliyin Ərazi şöbələrinin fəaliyyətinin əlaqələndirilməsi idarəsinin Bakı şöbəsinin ekspert-auditoru Rəfail Təvəkkül oğlu Ələkbərov intizam məsuliyyətinə cəlb edilib. Qeyd edək ki, Dövlət Gömrük Komitəsinin Aksizli Mallar üzrə Baş Gömrük İdarəsinin rəisi, general-mayor Vəzir Həsənovdur.

Unikal

Şirvan Peşə Liseyində kadr təyinatları, vəzifə bölgüsü və dərs yükünün paylanması ilə bağlı redaksiyamıza bir sıra məlumatlar daxil olub. Redaksiyaya daxil olan məlumatlarda lisey direktoru Vasif Eyvazovun vəzifəyə təyin olunmasından sonra uzun illər həmin təhsil müəssisəsində çalışan bəzi əməkdaşların işdən çıxarıldığı və yeni kadrların vəzifələrə gətirildiyi iddia olunur.

Lakin əsas suallar yeni təyinatlarla bağlıdır. Tədris şöbəsinin müdiri texnoloqdur?

Məlumata görə, liseyin tədris şöbəsinin müdiri Könül Səmədova Gəncə Texnologiya Universitetini bitirib və ixtisasca texnoloqdur. Onun pedaqoji təcrübəsinin olmadığı və müvafiq imtahan mərhələsindən keçmədiyi də iddia edilir. Əgər bu məlumatlar doğrudursa, ortaya kifayət qədər ciddi sual çıxır:
Tədris şöbəsinin müdiri vəzifəsinə təyin olunmaq üçün müəyyən edilən təhsil, ixtisas və iş təcrübəsi tələbləri K.Səmədovaya necə tətbiq edilib? Onun diplomunda göstərilən ixtisas tutduğu vəzifənin tələblərinə uyğundurmu? Vəzifəyə təyin olunarkən müsabiqə, imtahan və ya digər seçim proseduru keçirilibmi? Əgər keçirilibsə, nəticələr niyə ictimaiyyətə açıqlanmasın?

Direktor müavini və həyat yoldaşı eyni liseydə

Redaksiyaya daxil olan digər məlumat direktor müavini Arifə Qasımova ilə bağlıdır. İddiaya görə, A.Qasımovanın həyat yoldaşı da həmin təhsil müəssisəsində müəllim kimi çalışır. Burada da sual yaranır: rəhbər vəzifədə çalışan şəxslə onun həyat yoldaşının eyni təhsil müəssisəsində işləməsi hansı qaydalarla tənzimlənir? Belə əmək münasibətlərinin qarşısını alan və ya onların şəffaflığını təmin edən hər hansı məhdudiyyət varmı?
Bu suala da aidiyyəti qurumların aydın cavab verməsi vacibdir.

Dərs saatları kimə və hansı meyarla verilir?

Məlumatlarda liseydə dərs yükünün bölüşdürülməsi ilə bağlı da narazılıqların olduğu bildirilir. İddialara görə, bəzi müəllimlərə əlavə dərs saatlarının verilməsində obyektivlik prinsipi pozulur və müəyyən şəxslərə üstünlük verilir. Daha ciddi iddialardan biri isə K.Səmədovanın adına müəyyən dərs saatlarının yazıldığı, lakin həmin dərslərin faktiki olaraq onun tərəfindən keçirilmədiyi barədədir. Həmçinin bəzi dərslərin magistratura təhsili alan şəxslər tərəfindən aparıldığı iddia olunur. Əgər bu iddialar təsdiqini taparsa, artıq söhbət yalnız dərs bölgüsündən deyil, rəsmi sənədlərdə göstərilən dərs yükü ilə faktiki tədris arasında uyğunluğun olub-olmamasından gedir. Bu məsələnin də müvafiq sənədlər əsasında araşdırılmasına ehtiyac var.

Müsahibə və imtahan sualı

Redaksiyaya daxil olan məlumatlarda Gülçöhrə adlı əməkdaşla bağlı da iddialar səsləndirilir. Məlumata görə, onun müvafiq müsahibə və ya imtahan mərhələsindən keçmədiyi, tələb olunan iş təcrübəsinə malik olmadığı iddia edilir. Buna baxmayaraq, onun liseydə mühasib kimi çalışdığı bildirilir. Burada da suallar açıqdır: İşə qəbul hansı prosedurla həyata keçirilib? Namizədin təhsil və iş təcrübəsi hansı sənədlərlə təsdiqlənib? Müsahibə və ya imtahan tələb olunurdusa, bu mərhələdən keçirilibmi?

Əsas məsələ: kim nəzarət edir?

Şirvan Peşə Liseyində səsləndirilən bu iddialar ayrı-ayrı əməkdaşların fəaliyyətindən daha geniş bir məsələni gündəmə gətirir: Peşə təhsili müəssisələrində kadrlar hansı meyarlarla seçilir, vəzifələrə təyinatlara kim nəzarət edir və dərs yükünün bölüşdürülməsində şəffaflıq necə təmin olunur? Əgər bütün təyinatlar və əmək münasibətləri qanunvericiliyə uyğun həyata keçirilibsə, bunu təsdiqləyən sənədlər və prosedurlar suallara aydınlıq gətirə bilər. Əks halda isə, yeni suallar yaranacaq.

Təhsil müəssisəsində vəzifə və dərs yükünün müəyyənləşdirilməsində peşəkarlıq, təcrübə və şəffaflıq əsas meyarlardırmı?

Redaksiya xüsusi olaraq qeyd edir ki, materialda səsləndirilən məlumatlar iddia xarakterlidir və aidiyyəti qurumların rəsmi mövqeyi ilə dəqiqləşdirilməlidir.

Məsələ ilə bağlı Şirvan Peşə Liseyinin rəhbərliyinin, Peşə Təhsili üzrə Dövlət Agentliyinin və Elm və Təhsil Nazirliyinin mövqeyini dərc etməyə hazırıq.

Təhsilmedia.com

Bakı Şəhəri üzrə Təhsil İdarəsinin müəyyən edilmiş bank hesablarına həbs qoyulub. 1xeber.media-nın əldə etdiyi bank məktubunda bu icra tədbirinin həyata keçirildiyi təsdiqlənir. Digər sənəd isə Təhsil İdarəsi barəsində inzibati xəta işinə məhkəmədə baxılmasının təyin edildiyini göstərir. Bəs hesablar üzrə məhdudiyyət müəllimlərin maaşına təsir edəcəkmi? Araşdırmamızın əsas sualı budur.
Məsələ 2026-cı ilin sentyabrında yazılmış iki sənədlə gündəmə gəlsə də, bankın məktubunda istinad edilən icra vərəqəsinin tarixi daha əvvələ — 28 iyul 2025-ci ilə gedib çıxır.

“Kapital Bank” məktubu 18 sentyabr 2026-cı ildə Nəsimi Rayon İcra Şöbəsinə göndərilib. Bank bildirir ki, Nəsimi Rayon Məhkəməsinin 28 iyul 2025-ci il tarixli icra vərəqəsi əsasında Bakı Şəhəri üzrə Təhsil İdarəsinin bankda müəyyən edilmiş hesablaşma hesablarına həbs qoyulması təmin edilib.
Bu, hesablarla bağlı icra tədbirinin tətbiq olunduğunu göstərir. Ancaq məktubun özündə mühüm detallar açıqlanmır: söhbətin neçə hesabdan getdiyi, həmin hesablarda nə qədər vəsait olduğu, həbsin hansı məbləğ həddində tətbiq edildiyi və hesabların hansı ödənişlər üçün istifadə olunduğu göstərilmir. İcra vərəqəsinin əsaslandığı mübahisənin mahiyyəti də bank məktubundan bilinmir.
Əlimizdə olan ikinci sənəd Nəsimi Rayon Məhkəməsinin 14 sentyabr 2026-cı il tarixli bildirişidir. Bildirişdə Bakı Şəhəri üzrə Təhsil İdarəsi barəsində İnzibati Xətalar Məcəlləsinin 528.1-ci maddəsi üzrə işə baxılmasının 23 sentyabr, saat 15:15-ə təyin edildiyi qeyd olunur. Bu maddə icra sənədindəki tələbin yerinə yetirilməsi ilə əlaqədardır.
Burada mühüm fərq var: məhkəmənin göndərdiyi sənəd iclas bildirişidir, qərar deyil. Yəni həmin sənəd əsasında Təhsil İdarəsinin inzibati xətaya görə təqsirli bilindiyini və ya cərimələndiyini söyləmək olmaz. İclasın keçirilib-keçirilmədiyi və hansı nəticə ilə yekunlaşdığı barədə bizə təqdim olunan materiallarda məlumat yoxdur.
Bankın məktubu ilə məhkəmənin bildirişi eyni qurumla bağlı icra prosesini gündəmə gətirir. Bununla belə, sənədlər təkbaşına bütün halları izah etmir. İcra sənədində Təhsil İdarəsindən konkret nə tələb olunur? Həmin tələb hansı məbləğlə bağlıdır? Hesablara həbs qoyulması ilə inzibati xəta işinin bütün prosessual əlaqələri nədən ibarətdir? Bu suallara dəqiq cavab vermək üçün icra vərəqəsi və iş üzrə digər sənədlər, həmçinin aidiyyəti qurumların izahı lazımdır.
Məsələnin müəllimlər üçün ən həssas tərəfi isə əməkhaqqı ödənişləridir. Təhsil İdarəsinin hesablarına həbs qoyulması xəbəri maaşların ödənilib-ödənilməyəcəyi barədə sual yaradır. Lakin əldə etdiyimiz bank məktubunda müəllimlərin maaşının dayandırıldığı və ya gecikəcəyi barədə heç nə yazılmayıb.
Bu səbəbdən “müəllimlər maaş almayacaq” demək üçün əsas yoxdur. Eyni zamanda maaş ödənişlərinə heç bir təsir olmayacağını da yalnız bu sənədlərə baxaraq təsdiqləmək mümkün deyil. Bunun üçün əməkhaqqı vəsaitinin hansı hesablar vasitəsilə köçürüldüyü və həmin hesabların tətbiq olunan məhdudiyyətə daxil olub-olmadığı açıqlanmalıdır.
1xeber.media-nın aidiyyəti qurumlara sualları bunlardır: Həbs qoyulan hesabların təyinatı nədir? Məhdudiyyət hansı məbləği əhatə edir? Bu tədbir müəllimlərin və digər təhsil işçilərinin əməkhaqqı ödənişlərinə təsir göstərirmi? Əgər təsir göstərirsə, ödənişlərin vaxtında həyata keçirilməsi üçün hansı tədbirlər görüləcək? Sentyabrın 23-nə təyin edilmiş inzibati iş üzrə məhkəmə hansı qərarı qəbul edib?(1xeber.media)