“20 ildir eyni müəssisədə işləyirəm, lakin indi əmək müqaviləmə xitam verilir”.
Bizmesr.media bildirir ki, bu şikayətlə Şirvan Peşə Liseyində 20 ildir istehsalat üzrə menecer vəzifəsində çalışan Nuridə Muradova müraciət edib. 42 yaşlı N.Muradova bildirib ki, o, 2006-cı ildən Şirvan Peşə Liseyində çalışır: “Əvvəllər yarımştat laborant kimi fəaliyyət göstərirdim. Daha sonra liseyin həmin dönəmdə çalışan direktoru bu ixtisasın ixtisar ediləcəyini və məni işdən çıxaracağını demişdi. Lakin o vaxt bu qərara Peşə Təhsili üzrə Dövlət Agentliyinin nümayəndəsi etiraz etdiyi üçün işimdə qalmışdım.
Bir müddət sonra mənə istehsalat üzrə menecer vəzifəsi təklif edildi. Bu vəzifənin gələcək karyeram üçün perspektivli olduğunu dedilər. Həmin vaxt mən də daxil olmaqla, çoxsaylı müəllim, usta, texniki və inzibati işçilər işə qəbul edildi, onların bir qismi ilə müddətli əmək müqaviləsi bağlandı. Ancaq əmək müqaviləmin vaxtı bitməmiş Agentlikdən dedilər ki, istehsalat üzrə menecer vəzifəsi peşə liseyinin fəaliyyətinə uyğun deyil və liseydə istehsalat sahəsi yoxdur”.

Vətəndaş deyir ki, bu qərarın verilməsi üçün əsaslı səbəb yoxdur: “Həmin ixtisas necə ləğv edilə bilər? Liseydə istehsalatla bağlı dərslər keçirilir və tələbələr müxtəlif məhsullar, o cümlədən, gil qabları, bayraqlar və xalatlar hazırlayır. Artıq ayın 15-dən xitam ərizəsi göndərilib. Bu problemlərin həll edilməsini istəyirəm və yeganə gəlir mənbəyimin lisey olduğunu vurğulayaraq xahiş edirəm ki, əmək müqaviləmin müddəti uzadılsın”.
N.Muradova, həmçinin bildirir ki, işlədiyi müddətdə tutulmalardan sonra əməkhaqqı 470 manat olduğu halda kartına daha az məbləğ köçürülüb. Mövzu ilə bağlı Peşə Təhsili üzrə Dövlət Agentliyinin cavabı olduqca maraqlı və başdansovdu olub. Agentlikdən şablon cavab, şablon münasibət bildirilib.
Əlbətdə belə də olmalıdır. Çünki, Şirvan Peşə Liseyinin yeni təyin olunan direktoru Vasif Eyvazov Peşə Təhsili üzrə Dövlət Agentliyinin direktoru İlqar Bayramlının bir başa adamıdır və onu bu posta o gətirib.
Bizimesr.media Vasif Eyvazovun fəaliyyətini və Şirvan Peşə Liseyində uzun müddət çalışan işçiləri hansı səbəbdən işdən uzaqlaşdırdığını araşdırmağa başlayıb.
Qeyd edək ki, Vasif Eyvazov hərbçi olub, daha sonra məhz İlqar Bayramlının dəstəyi ilə iki məktəbə direktor vəzifəsinə irəli çəkilib və daha sonra Şirvan Peşə Liseyinə direktor təyin edilib. İmtahan verməyib və müsahibədən keçməyib.

Bizimesr.media

Sumqayıt son illər böyük abadlıq və quruculuq işləri ilə simasını dəyişən şəhərlərdən biridir. Yeni parklar salınıb, müxtəlif infrastruktur layihələri həyata keçirilib, şəhərin ümumi görünüşündə dəyişikliklər baş verib.

Lakin şəhərin müxtəlif ünvanlarından tikinti və şəhərsalma ilə bağlı şikayətlərin olması başqa bir mənzərəni də gündəmə gətirir. Sərvər Bədəlbəyli küçəsi, 289A ünvanında çəkildiyi bildirilən görüntülər də bu baxımdan diqqət çəkməyə bilməz.

Bizimesr.media bildirir ki, Sumqayıt Bakıdan sonra Azərbaycanın ən böyük şəhərlərindən biridir. Sovet dövründən sənaye şəhəri kimi formalaşan şəhərə 2015-ci ildən Zakir Fərəcov rəhbərlik edir. Fərəcovdan əvvəl isə Sumqayıtın icra başçısı hazırda Bakı Şəhər İcra Hakimiyyətinin başçısı olan Eldar Əzizov olub.

Abadlıq var, bəs şəhərsalma necə qorunur?

Xüsusilə 2026-cı ilin Azərbaycanda “Şəhərsalma və Memarlıq İli” elan edildiyi bir vaxtda bu sual daha aktualdır. Şəhərin parklarının, küçələrinin və binalarının yenilənməsi ilə yanaşı, mövcud yaşayış məkanlarının qorunması, tikintilərin şəhərsalma sənədlərinə uyğun aparılması şəhər idarəçiliyinin, əsasən Zakir Fərəcovuin əsas işi olmalıdır. Belədirmi?

Sərvər Bədəlbəyli 289A-da nə baş verir?

Sözügedən ünvandan çəkilən görüntülərdə yaşayış binasının birinci mərtəbəsinin qarşısında tikinti işlərinin aparıldığı görünür. Ərazidə işçilər çalışır, beton konstruksiyalar hazırlanır və binanın qarşısında müəyyən tikinti işləri həyata keçirilir.

Təbii ki, görüntülər tikintinin hüquqi statusunu müəyyənləşdirmir, amma suallar yaradan amillər də olmamış deyil - Bu tikinti hansı sənədlər əsasında aparılır?
Qanun nə deyir, Zakir Fərəcov?

Azərbaycan Respublikasının Şəhərsalma və Tikinti Məcəlləsinə əsasən, müəyyən istisnalar nəzərə alınmaqla, tikinti obyektlərinin inşasına icazə tələb olunur. İcazə tələb olunan tikinti isə şəhərsalma və tikintiyə dair normativ sənədlərə uyğun həyata keçirilməlidir.

Məcəllənin 69-cu maddəsində binaların xarici divarlarının önündə ara məsafəsi sahələrinin nəzərdə tutulması və həmin sahələrdə yerüstü tikinti obyektlərinin inşasına yol verilməməsi ilə bağlı müddəalar da yer alır.

Deməli, məsələ yalnız “binanın qarşısında tikinti aparmaq olar, ya olmaz” sualından ibarət deyil. Ərazinin hüquqi statusu, təsdiqlənmiş şəhərsalma sənədləri, layihə, tikintinin növü və icazə sənədləri nəzərə alınmalıdır.

Bu baxımdan Sərvər Bədəlbəyli 289A ünvanında konkret suallar yaranır və aidiyyatı üzrə araşdırılması və cavablandırılması vacibdir.

“Şəhərsalma və Memarlıq İli”ndə bu tikintiyə kim nəzarət edir?

2026-cı ilin “Şəhərsalma və Memarlıq İli” elan edildiyi bir vaxtda şəhərlərin planlaşdırılması və tikinti qaydalarına əməl olunması məsələsi xüsusi əhəmiyyət daşıyır. Sumqayıt kimi inkişaf etmək istəyən və əhalisi çox olan şəhərdə yaşayış binalarının ətrafında aparılan tikinti işlərinin şəhərsalma sənədlərinə və təhlükəsizlik tələblərinə uyğunluğu sakinlər və aidiyyatı qurumlar üçün də vacib məsələ olmalıdır.

Sərvər Bədəlbəyli 289A ünvanında isə hazırda açıq mənbələrdə tikintinin hüquqi əsasını tam şəkildə izah edən rəsmi açıqlama və ya sənəd görünmür.

Bu səbəbdən məsələ ilə bağlı aidiyyəti qurumların mövqeyinin açıqlanması vacibdir.

Sərvər Bədəlbəyli 289A ünvanında nə tikilir?
Tikinti hansı sənədlər əsasında aparılır?
Bu tikintiyə hansı qurum tərəfindən icazə verilib?
Sumqayıt Şəhər İcra Hakimiyyətinin rəhbərliyi, Dövlət Şəhərsalma və Arxitektura Komitəsinin aidiyyəti strukturları və digər əlaqədar qurumlar bu suallara aydınlıq gətirməsini gözləyirik.

Nigar Hüseyn
Bizimesr.media

Prezident yanında Antiinhisar və İstehlak Bazarlarına Nəzarət Dövlət Agentliyi “Panda Baby” MMC barəsində inzibati xəta protokolu tərtib edib.

Buna səbəb “Panda Baby” MMC-nin qeyri-qida məhsulunu üzərində göstərilmiş qiymətdən baha satması olub.
MMC Malın hesabına dair istehlakçıların az miqdarda aldadılması ilə bağlı İnzibati Xətalar Məcəlləsinin 447.0.1. maddəsini pozub.

İnzibati Xətalar Məcəlləsinin 447.0.1. maddəsinə görə, fiziki şəxslər 350 manatdan 500 manatdək, vəzifəli şəxslər 1 500 manatdan 2 000 manatadək, hüquqi şəxslər 4 000 manatdan 6 000 manatadək cərimə edilir.

Bizimesr.media

"Dünən Avropa Mobillik Həftəsi çərcivəsində AYNA təşkil etdiyi Panel Müzakirədə iştirak etdik..." "DİA-AZ" xəbər verir ki, bunu özünün sosial şəbəkə hesabındakı paylaşımında ictimai fəal Haldun Novruzzadə qeyd edib.
O daha sonra bildirir: "Müzakirədə Şəhərsalma və Arxitektura komitəsinin Nəqliyyat İnfastruknun şöbə rəisi Çingiz Rəhimov ancaq 1 ildi qəbul olunan Bakının Baş planından danışdı. Sual verdim ki, nəyə görə 5 ildi Yeni Günəşlidə 7 MTK-nın yeni Göydələnlər tikməyinə icazə vermisiniz? Yol 40 ildi eynidir, amma əhali artır, yol çəkmirsiniz... amma bina tikməyə icazə verirsiniz. Belə bir absurd cavabı oldu ki, "siz şükür edin, dövlətimiz sağ olsun ki, bina tikməyə icazə verir, iqtisadiyyatın artımıdı..." falan, filan, bla bla...
Bu cavabdan sonra mən sizə əminliklə deyə bilərəm ki, Bakıda olan bütün tıxacların SƏBƏBKARI Şəhərsalma və Arxitektura Komitəsdir. AYNA-nı, filanı boş verin, Şəhərsalma və Arxitektura Komitəsi Bakı şəhərini məhv edib..."

Tanınmış şair Səxavət Kəlbəcərli Azərbaycan Respublikasının Prezidenti İlham Əliyevə rəsmi müraciət ünvanlayıb. Şair müraciətində Ramiz Mehdiyevlə bağlı başlayan hüquqi proseslər fonunda yüksək vəzifəli şəxs Cavid Qurbanovun da fəaliyyətinin və xaricdəki böyük sərvətinin təcili araşdırılmasını tələb edib.

Səxavət Kəlbəcərli dövlətimizin 44 günlük Vətən müharibəsində qazandığı tarixi Zəfəri və ərazi bütövlüyünün bərpasını yüksək qiymətləndirərək bildirib ki, bu böyük uğurlara kölgə salan, dövlət vəsaitlərini mənimsəyən hər bir şəxs qanun qarşısında cavab verməlidir.

"Ramiz Mehdiyevə tətbiq olunan hüquqi prinsip Cavid Qurbanova da tətbiq edilməlidir!"

Müraciətdə vurğulanır ki, AMEA-nın keçmiş prezidenti Ramiz Mehdiyev barəsində dövlətə xəyanət və hakimiyyəti zorla ələ keçirmə cəhdi ilə yanaşı, vəzifə səlahiyyətlərindən sui-istifadə və cinayət yolu ilə əldə edilmiş əmlakın leqallaşdırılması ittihamları da var. Şair sual edir: Əgər eyni qanunsuzluqlar başqa məmurlar tərəfindən də törədilibsə, niyə onlar kənarda qalmalıdır?

Səxavət Kəlbəcərli uzun illər mühüm dövlət postlarında çalışmış Cavid Qurbanovun fəaliyyətinin hərtərəfli təftiş olunmasını istəyir. Müraciətdə xüsusilə aşağıdakı məqamların araşdırılması xahiş olunur:

Dövlət vəsaitlərinin mənimsənilməsi iddiaları: Cavid Qurbanovun rəhbərlik etdiyi qurumlarda büdcə vəsaitlərindən istifadə qaydaları;

Qanunsuz varlanma: Böyük biznes şəbəkəsinin və nəhəng əmlak sərvətinin hansı mənbələr hesabına formalaşması;

Birləşmiş Ərəb Əmirliklərindəki (BƏƏ) mülklər: Xarici ölkələrdə, xüsusən Dubayda olduğu iddia edilən dəbdəbəli əmlakların rəsmi gəlirlərlə uyğunluq təşkil edib-etməməsi.

"Tələbim obyektivlik və şəffaflıqdır"

Şair bildirib ki, heç kimi məhkəmə hökmü olmadan təqsirli elan etmək niyyətində deyil. Lakin qanun qarşısında hamı bərabər olmalıdır:

"Tələbim yalnız budur ki, yüksək vəzifələrdə çalışmış şəxslərin fəaliyyəti və sərvətlərinin mənşəyi qanun qarşısında obyektiv, şəffaf və eyni prinsiplər əsasında araşdırılsın. Cavid Qurbanov barəsində də dövlət vəsaitlərinin mənimsənilməsi və vəzifə səlahiyyətlərindən sui-istifadə faktları təsdiqlənərsə, cinayət işi başlanılmalı və hüquqi qiymət verilməlidir."

Müraciətin rəsmi strukturlar tərəfindən necə cavablandırılacağı və Cavid Qurbanovun fəaliyyəti ilə bağlı yeni hüquqi addımların atılıb-atılmayacağı ölkə ictimaiyyətinin diqqət mərkəzindədir.

Yazıda adıçəkilən şəxslərin də mövqeyini denləməyə hazırıq.

Gundemxeber.org

Müasir dövrdə mobil telefon və aksesuarların kreditlə satışı geniş yayılsa da, bu sahədə istehlakçıların aldadılması, üzərlərinə xəbərsiz öhdəliklərin qoyulması və hüquqlarının kobud şəkildə pozulması halları səngimək bilmir.

Redaksiyamıza müraciət edən Abşeron rayonu, Xırdalan şəhər sakini Bəşirova Aysel Bəybala qızı “Mobifon” MMC tərəfindən üzləşdiyi ciddi haqsızlıqlar və təzyiqlərlə bağlı “Azad İstehlakçılar” İctimai Birliyinə (AİİB) şikayət ərizəsi ünvanlayıb.

İddiaya görə, Aysel Bəşirova 2026-cı ilin aprel ayından etibarən “Mobifon” MMC-nin müştərisidir və əvvəllər aldığı "iPhone 16 Pro Max" model telefonun kredit ödənişlərini vaxtlı-vaxtında həyata keçirib. Problem isə cari ilin sentyabr ayının 16-da, vətəndaşın yaxını ilə birgə şirkətin “28 May” filialına müraciət etməsi ilə başlayıb.

Yaxını üçün ikinci əl "iPhone 14 Pro Max" telefonunu kreditlə rəsmiləşdirən zaman satıcılar vətəndaşa psixoloji təsir göstərərək, sənədləri ətraflı oxumağa imkan vermədən tez bir zamanda imzalatdırıblar. Ən böyük aldatma isə aksesuar təqdimatı zamanı baş verib. Satıcılar vətəndaşın istəmədiyi halda "AirPods 4" qulaqlığını gətirərək bunun telefonun yanında “hədiyyə” olduğunu bildiriblər. Lakin vətəndaş evə qayıtdıqda sənədlərə diqqət yetirib və məlum olub ki, həmin "hədiyyə" qulaqlıq üçün onun adına 675 manat dəyərində ayrıca kredit müqaviləsi və ödəniş qrafiki tərtib edilib.

Bundan başqa, müştərinin iradəsinin əleyhinə olaraq telefon başlığı, qoruyucu şüşə və digər aksesuarlar məcburi şəkildə paketə əlavə edilib, göstərilməyən “proqram təminatı” xidmətinə görə əlavə 30 manat yazılıb və ən əsası, satılan mallara heç bir rəsmi zəmanət talonu verilməyib. Müqavilə bağlandıqdan dərhal sonra satıcılar həmin gün 120 manat ilkin ödəniş edilməsini tələb ediblər. Vətəndaş əvvəlcədən gəlir imkanlarının məhdud olduğunu və həmin gün ödəniş edə bilməyəcəyini vurğulasa da, bu diqqətə alınmayıb. Növbəti günlərdə isə şirkətin məsul şəxsləri tərəfindən vətəndaşa qarşı görünməmiş təzyiq mexanizmi işə salınıb.

120 manatlıq ödənişin gecikməsi bəhanə edilərək müştərinin adına olan, ödənişlərində heç bir problem yaşanmayan əvvəlki "iPhone 16 Pro Max" və yeni alınan telefon məsafədən bloklanıb. Qurğularda "oğurluq siqnalı" aktivləşdirilib və ödəniş edilməyəcəyi təqdirdə telefonlardakı şəxsi məlumatların 1 saat ərzində tamamilə silinəcəyi hədəsi gəlib. Məcburiyyət qarşısında qalan vətəndaş başqa bir yerdən kredit götürərək 129 AZN ödəniş etmək məcburiyyətində qalıb.

Şikayət ərizəsindən aydın olur ki, “Mobifon” MMC “İstehlakçıların hüquqlarının müdafiəsi haqqında” Azərbaycan Respublikasının Qanununun bir neçə maddəsini kobud şəkildə pozub. İlk növbədə istehlakçının məlumat almaq hüququ tapdalanıb; qiymət, əlavə faizlər, rüsumlar və şərtlər barədə əvvəlcədən tam və dürüst məlumat verilməyib. Eyni zamanda, əlavə aksesuarlar və icra olunmayan xidmətlər vətəndaşa məcburi şəkildə qəbul etdirilib. Satış zamanı mövcud qanunvericiliyə zidd olaraq “malı heç bir halda geri qaytara bilməzsiniz” məzmunlu akt imzalatdırılıb və satılan mallara zəmanət talonu təqdim edilməyib. Ən əsası isə bir öhdəliyin gecikməsinə görə tamamilə ayrı müqaviləyə aid olan və vaxtında ödənilən digər əmlakın (telefonun) bloklanması və məlumatların silinməsi ilə hədələnməsi tamamilə hüquqi əsassızlıqdır.

Vətəndaşın tələbi nədir?

Aysel Bəşirova AİİB sədri Eyyub Hüseynovdan və aidiyyəti dövlət qurumlarından məsələyə müdaxilə etmələrini xahiş edir. Vətəndaş "hədiyyə" adı ilə aldadılaraq rəsmiləşdirilən "AirPods 4" qulaqlığının kredit müqaviləsindən çıxarılmasını və geri alınmasını tələb edir. Bundan başqa, qanunsuz tərtib edilmiş “malı geri qaytarmamaq barədə” aktın ləğv olunması, satılmış mallara dair rəsmi zəmanət talonlarının verilməsi və icra olunmayan 30 manatlıq “proqram təminatı” haqqının ləğvi istənilir. Vətəndaş həmçinin, əhalinin oxşar aldatma halları ilə qarşılaşmaması üçün satış şəbəkəsi barədə aidiyyəti dövlət orqanları tərəfindən hüquqi tədbirlərin görülməsini xahiş edir.

Məsələ ilə bağlı qarşı tərəfin də mövqeyini dərc etməyə hazırıq.

Musavat.com

Tibb müəssisəsində qanunvericiliyin tələblərinin pozulması faktları ilə bağlı inzibati tədbirlər görülüb.


Bizimesr.media xəbər verir ki, Baş Prokurorluğun məlumatına görə, “Kristal Estetik” klinikasında həyata keçirilmiş gözüstü dəri artıqlığının götürülməsi prosedurundan sonra şəxsin səhhətinə zərər vurulması barədə daxil olmuş müraciəti əsasında rayon prokurorluğunda araşdırma aparılıb. 


Araşdırma zamanı “Kristal Estetik” MMC tərəfindən vətəndaş Aytəkin Musayevanın əmək müqaviləsi qanunla müəyyən edilmiş qaydada hüquqi qüvvəyə minmədən kosmetoloq vəzifəsi üzrə işlərin yerinə yetirilməsinə cəlb olunması müəyyən olunub. 


Bundan əlavə, A.Musayevanın ali tibb təhsilinin olmadığı, habelə vətəndaşa tətbiq edilmiş prosedurla bağlı tibbi sənədləşmənin aparılmadığı müəyyən edilib.


Faktla bağlı Xətai rayon prokurorluğunda “Kristal Estetik” MMC və cəmiyyətin direktoru Roza Əliyeva barəsində İnzibati Xətalar Məcəlləsinin 192.1-ci (əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri işlərin (xidmətlərin) yerinə yetirilməsinə cəlb edilməsi) maddəsi, həmin Məcəllənin 215.4-cü (ali və ya orta ixtisas tibb təhsili olmayan, habelə qanunda nəzərdə tutulmuş sertifikasiya şəhadətnaməsi olmayan və ya qüvvədə olmayan şəxslərin praktik tibb fəaliyyətinə buraxılması) maddəsi ilə inzibati xəta haqqında işlər üzrə icraat başlanaraq baxılması üçün Xətai Rayon Məhkəməsinə göndərilib.


Məhkəmənin qərarları ilə “Kristal Estetik” MMC İXM-nin 192.1-ci maddəsi ilə 20 min manat, 215.4-cü maddəsi ilə 6 min manat, cəmiyyətin direktoru R.Əliyeva isə həmin Məcəllənin 192.1-ci maddəsi ilə 3 min manat məbləğində inzibati qaydada cərimə edilib.


Bizimesr.media

“İyun ayından bəri Masallı rayonu Miyankü kənd Nadir Aslanov adına tam orta məktəbin transformatoru partlayıb, hələ də düzəldilməyib...”.
Bu şikayətlə “Qafqazinfo”ya övladları həmin məktəbin şagirdi olan valideynlər müraciət edib.
Onlar bildirib ki, aylar öncə baş verən problem tədris ili başladıqda da həll olunmayıb: “Məktəbdə nə işıq var, nə də su. Düşündük ki, dərslər başlayanda vəziyyət düzələcək, düzəlməyibmiş. Uşaqlar çox əziyyət çəkir, otaqlar qaranlıqdır”.
Valideynlər həmçinin qeyd edib ki, bu hadisə nəticəsində məktəbdə anti-sanitar vəziyyət yaranıb: “Təssəvvür edin ki, şagirdlər saatlarla məktəbdə olur, ancaq su yoxdur. Çox pis haldır, biz uşaqlarımızın gigiyenasından çox narahatıq. Hazırda məktəbdə su olmadığı üçün anti-sanitar vəziyyət hökm sürür. Dəfələrlə müvafiq qurumlara müraciət etmişik, ancaq nəticə yoxdur. Ən azından bizə desinlər ki, 5 günə, 10 günə, lap 20 günə gəlib düzəldəcəklər. Onu da demirlər, vəziyyət qeyri-müəyyəndir”.
Məsələ ilə bağlı təhsil müəssisəsi ilə əlaqə saxladıq. Miyankü kənd Nadir Aslanov adına tam orta məktəbdən sorğumuza cavab olaraq bildirildi ki, transformatorun sıradan çıxması və elektrik enerjisi ilə təminatda yaranmış problemin həlli istiqamətində digər aidiyyəti qurumlarla birlikdə zəruri tədbirlər görülür.
“Transformatorun təchizatı müəyyən texniki və təşkilati mərhələlərdən keçir. Məsələ diqqətdə saxlanılır və müvafiq proses yekunlaşdıqdan sonra məktəbin elektrik enerjisi ilə təminatı bərpa ediləcək.Təhsil müəssisəsinin suya olan ehtiyacı kənar mənbələr hesabına təmin edilir”, - məlumatda qeyd edilib.

“İdeal Kredit” bank olmayan kredit təşkilatı (BOKT) və onun vəzifəli şəxsi ümumilikdə 56 min manat cərimələnib.

Banker.az Azərbaycan Mərkəzi Bankına istinadən xəbər verir ki, cərimə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində qanunvericiliyin tələblərinin pozulması ilə bağlı tətbiq edilib.

Bakı şəhəri Nərimanov Rayon Məhkəməsinin qərarı ilə İnzibati Xətalar Məcəlləsinin 598.1.1-ci və 598.1.2-ci maddələrinə əsasən “İdeal Kredit” BOKT 50 min manat, onun vəzifəli şəxsi isə 6 min manat məbləğində cərimə edilib.

Sözügedən maddələr maliyyə institutlarında müştəri uyğunluğu tədbirlərinə, məlumat və sənədlərin saxlanılmasına, eləcə də daxili nəzarət proqramının tətbiqinə dair tələblərin pozulmasını əhatə edir.

Qeyd edək ki, bu, “İdeal Kredit”lə bağlı ilk belə hal deyil. 2025-ci ilin sentyabrında BOKT-un vəzifəli şəxsi həmin Məcəllənin 598.1.1-ci və 598.1.2-ci maddələri üzrə 2 500 manat cərimə edilmişdi.

“İdeal Kredit” 2003-cü ildən fəaliyyət göstərir. BOKT-un nizamnamə kapitalı 646,7 min manatdır. 2025-ci ildə şirkətin təsisçi strukturunda dəyişiklikdən sonra Qubad Qubadov və Eldar Hüseynovun hər biri BOKT-da 50% paya sahib olub.

BOKT 2025-ci ili 3 milyon manat xalis mənfəətlə başa vurub. İlin sonunda aktivləri 24,2 milyon manat, kredit portfeli 22 milyon manat, öhdəlikləri 13,8 milyon manat, balans kapitalı isə 10,4 milyon manat təşkil edib.

Anası infarkt keçirən şəxs Mərkəzi Klinikada üzləşdiyi xoşagəlməz durumdan danışıb.

Təbriz Məmmədov klinikadan şikayətlənib, həkim Firdovsi İbrahimov tərəfindən təhqirlərə məruz qaldığını iddia edib.
"Anam infarkt keçirdi. Gecə saat 2-də öz maşınımla xəstəxanaya apardım. Daha sonra təcili şəkildə Mərkəzi Klinikaya göndərildi. Səhər saatlarında isə məndən əlavə ödəniş tələb olundu. Əvvəlcə məndən 2500 AZN tələb edildi. Etiraz etdikdən sonra məbləğ 1900 AZN-ə endirildi, daha sonra isə 1600 AZN-də dayandı. Mən pul ödəməkdən imtina etmədim. Sadəcə soruşdum ki, bu 1600 manat hansı tibbi xidmətin qarşılığıdır? Əgər sığorta qarşılamırsa, mənə bunu yazılı şəkildə göstərin.
Lakin bu sadə sualın cavabını yazılı şəkildə vermək əvəzinə, Mərkəzi Klinikada həkim Firdovsi İbrahimov tərəfindən mənə qarşı təhqiramiz ifadələr işlədildi.
Mənə deyilən sözləri olduğu kimi yazıram: “Sən bazar adamısan”, “sən alçaqsan”, “şərəfsizsən” və digər təhqiramiz ifadələr.
Mən həkimə qarşı bir dəfə də olsun təhqir işlətmədim. Sadəcə anamın müalicəsi üçün tələb olunan ödənişin rəsmi əsasını soruşdum".
Təbriz Məmmədov iddia edib ki, məsələnin ən ağır tərəfi bundan sonra baş verib:
"Anam infarkt keçirmişdi, ürəyinə müdaxilə olunmuş və stent qoyulmuşdu. Belə ağır vəziyyətdə olan xəstənin yanında mənimlə bağlı “oğlun pulu ödəmir”, “oğlun səni istəmir” məzmununda danışılması mənim üçün qəbuledilməzdir. Mərkəzi Klinikaya insan ən ağır günündə, yaxınını xilas etmək üçün gedir. O anda ailəyə əlavə stress və təhqir yaşatmaq yox, dəstək göstərilməlidir. Mən heç kimdən xüsusi münasibət istəmirəm. Pulsuz xidmət də tələb etmirəm. Pul tələb olunursa — hansı xidmətə görə olduğunu və rəsmi əsasını göstər".
Vətəndaş hadisə ilə bağlı aidiyyəti qurumlara rəsmi müraciət etdiyini bildirib.
Qeyd edək ki, Firdovsi İbrahimov Mərkəzi Klinikanın Kardiologiya şöbəsinin müdiridir.(Xitab24.az)