Bakının Nizami rayonunda yaşıllıq ərazisi ilə bağlı sakinlərin narazılığı davam edir.

Bizimesr.media-ya daxil olan məlumata görə, Süleyman Rüstəm küçəsində yerləşən ərazidə ağacların ətrafına beton tökülməsi ilə bağlı ciddi narahatlıq yaranıb. Sakinlərin iddiasına əsasən, bu üsulla ağacların kök hissəsinə müdaxilə edilir və onların qurumasına şərait yaradılır.

Məlumata görə, küçədə kifayət qədər böyük ərazi hasarlanaraq tikinti işlərinə cəlb olunub. Ərazidə aparılan işlərin yaşıllıqlara da təsir etdiyi bildirilir.

Sakinlər iddia edirlər ki, tikinti işləri ilə əlaqədar bir sıra ağaclar artıq məhv edilib. Digər ağacların isə diblərinin betonlanması onların gələcəkdə qurumasına səbəb ola bilər. Ərazidə yaşayan vətəndaşlar məsələ ilə bağlı Nizami Rayon İcra Hakimiyyətinə dəfələrlə müraciət etdiklərini, lakin şikayətlərinin nəticəsiz qaldığını bildirirlər.

Bizimesr.media olaraq məsələ ilə bağlı Nizami Rayon İcra Hakimiyyətinin mövqeyini işıqlandırmağa hazırdır.

VİDEO LİNKDƏ: https://bizimesr.media/az/post/agaclarin-dibine-beton-tokulur---nizami-rayonundan-sok-goruntu---video-23130
Bizimesr.media

Azərbaycan Tibb Universiteti bir mənbədən satınalma metodu tətbiq etməklə nəqliyyat vasitələrinə təmir xidmətinin satın alınması üzrə “AUTO BADAMDAR” Məhdud Məsuliyyətli Cəmiyyəti ilə 712.484 manat dəyərində satınalma müqaviləsi bağlayıb. Məlumat satınalmaların portalında 27.08.2026-cı ildə dərc edilib. Portalda müqavilənin başlanma tarixi 27.08.2026-cı il, bitmə tarixi 30.12.2026-cı il göstərilir.

Xatırlatmaq istərdik ki, “Dövlət Satınalmaları Haqqında” Qanunun 49-cu maddəsinə görə bir mənbədən satınalma metodu satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda.

Qeyd edək ki, “AUTO BADAMDAR” MMC nəqliyyat vasitəsinin təmiri xidmətləri və ehtiyyat hissələrinin və sürtgü yağlarının satın alınması üzrə iştisalaşmış bir şirkətdir. Amma bu sözügedən MMC ilə bir mənbədən satınalma metodu ilə müqavilə bağlamağa əsas ola bilərmi?

Satınalmaların portalı üzərindən apardığımız araşdırmalar zamanı məlum oldu ki, “AUTO BADAMDAR” MMC bir çox dövlət qurumları ilə nəqliyyat vasitəsinin təmiri xidmətləri və ehtiyyat hissələrinin və sürtgü yağlarının satın alınması üzrə onlarla kotirovka sorğusu müsabiqilərinin qalibi olub.

Göründüyü kimi Azərbaycan Tibb Universiteti isə “AUTO BADAMDAR” MMC ilə dəyəri 712.484 manat olan müqavilə bağlayıb. “AUTO BADAMDAR” MMC-nin 30.12.2026-cı ilə qədər bu müqavilənin icra etməyə maddi texniki bazası varmı?

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “AUTO BADAMDAR” (VÖEN: 1001470551) Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 16.09.2008-ci il tarixdə dövlət qeydiyyatına alındığı göstərilir. Reyestr məlumatlarında nizamnamə kapitalı 500 manat olan MMC-nin hüquqi ünvanı BAKI ŞƏHƏRİ, BİNƏQƏDİ RAYONU, BİNƏQƏDİ ŞOSSESİ , ev.185, m.128, qanuni təmsilçisinin isə İsmayılov Qüdrət Nizami oğlu olduğu qeyd edilib. MMC Nəsibov Cavanşir Cahangir oğlu tərəfində təsis edilib.

Açıq nənbələrdə “AUTO BADAMDAR” MMC barəsində olan məlumatlar bu qədərdir.

Buradan suallar yaranır. Birinci, Azərbaycan Tibb Universitetinin baılansında nə qədər nəqliyyat vasitələri var ki, təmirinə yeddi yüz min manatdan çox vəsait ayırıb? İkincisi, məlum olduğu kimi Azərbaycan Tibb Universitetinin balansında olan nəqliyyat vasitələrinin əksəriyyəti xidməti avtomobillərdir. Bu avtomobillər nə qədər köhnəlib ki, təmirinə bü qədər dövlət vəsaiti xərclənir?

Qeyd edək ki, Azərbaycan Tibb Universiteti balansında olan nəqliyyat vasitələrinin ehtiyat hissələrinin dəyişdirilməsi xidmətinin satın alınması üzrə 09.07.2026-cı ildə “AUTO BADAMDAR” MMC ilə 15.776,6 manat dəyərində bir müqavilə də bağlayıb. Bu katirovka sorğusunda da bir mənbədən satınalma metodu tətbiq edilib.

Göründüyü kimi Azərbaycan Tibb Universiteti iyul ayında nəqliyyat vasitələrinin ehtiyat hissələrinin dəyişdirilməsi xidməti üzrə 15.776,6 manat dəyərində, cəmi bir ay sonra nəqliyyat vasitələrinə təmir xidmətinin satın alınması üzrə 712.484 manat dəyərində müqavilə bağladığını açıqlayıb.

Maraqlıdır, Azərbaycan Tibb Universiteti balansında nə qədər nəqliyyat vasitələri var. Yaxud da 712.484 manata Azərbaycan Tibb Universiteti nə qədər yeni nəqliyyat vasitəsi ala bilər.

Qeyd edək ki, Hesablama Palatasının sədri Vüqar Gülməmmədov “Dövlət satınalmalarının təşkili və bu sahə üzrə əsas audit nəticələri” mövzusunda fevral ayının 27-də keçirilən seminarda deyib ki, “elektron satınalmaların tətbiqi və prosedurların rəqəmsallaşdırılması şəffaflığın artırılmasına xidmət etsə də, bu, səmərəsizlik risklərini tam aradan qaldırmır: “Bəzən problemlər məhz satınalan təşkilatların fəaliyyəti nəticəsində yaranır. Satınalma şərtləri dəyişdirilə, rəqabət formal xarakter daşıya bilər. Auditlər zamanı ehtiyacın düzgün müəyyən edilməməsi, ehtimal olunan qiymətin düzgün hesablanmaması, bir mənbədən satınalma metoduna üstünlük verilməsi və müqavilə şərtlərinin icra dövründə dəyişdirilməsi halları aşkarlanıb”.

Sədr vurğulayıb ki, dövlət satınalmalarının mühüm hissəsinin müsabiqəsiz qaydada həyata keçirilməsi rəqabət mühitinə və büdcə vəsaitlərinin səmərəli istifadəsinə mənfi təsir göstərir: “Şəffaflıq və rəqabət mühitinin gücləndirilməsi bu sahədə əsas prioritet olaraq qalır”.

Hesab edirik ki, Azərbaycan Tibb Universitetində satınalmaların müsabiqəsiz qaydada həyata keçirilməsi Hesablama Palatası sədrinin dediyi kimi rəqabət mühitinə və büdcə vəsaitlərinin səmərəli istifadəsinə mənfi təsir göstərməklə yanaşı, bir çox ciddi şübhələrə də yol açır.

Qeyd edək ki, Azərbaycan Tibb Universitetinin rektoru Gəray Gəraybəylidir. O, sözügedən vəzifəyə 11 aprel 2016-cı il tarixində təyin edilib. Tibb Universitetində dövlət satınnalmalarına nəzarəti isə Gəray Gəraybəylinin ən yaxın adamlarından biri olan İlqar Mehrabov edir. O, rektorun əmri ilə 2024-cü ildə təhsil müəssisəsinin İnzibati – təsərrüfat işləri üzrə prorektoru vəzifəsinə gətirilib. İlqar Mehrabov 2016-cı ildən 2024-cü ilin sentyabr ayına kimi Azərbaycan Tibb Universitetində Baş Mühasib vəzifəsində, 2018-ci ildən isə həm də rektorun müşaviri vəzifəsində çalışıb.

Aktualinfo.net

Jurnalist Goranboy rayonunun Qazanbulaq şəhərtipli qəsəbəsində olub. Ərazidəki mövcud vəziyyəti yerindəcə araşdıran əməkdaşımız sakinlərlə həmsöhbət olaraq onların qarşılaşdığı çətinlikləri və sosial-iqtisadi qayğıları işıqlandırıb.

Tarixi zənginlikdən müasir durğunluğa
Qazanbulaq qəsəbəsinin əsası 1946-cı ildə qoyulub. Yaxınlıqdakı neft yataqlarının istismarı ilə əlaqədar ilk dövrlərdə burada əsasən neftçi ailələri məskunlaşıb, sonradan ərazi genişlənərək beynəlmiləl bir yaşayış məntəqəsinə çevrilib.

Sovet dönəmində qəsəbə sənaye və sosial infrastrukturu ilə seçilib. Burada neftçıxarma müəssisəsi, nəhəng çörək zavodu, böyük hamam kompleksi, 2500 kontingenti olan teatr avadanlığı zavodu, geoloji kəşfiyyat idarəsi və iki xəstəxana fəaliyyət gösterib. Həmin obyektlər əhalinin məşğulluğunun təmin olunmasında mühüm rol oynayıb. Lakin hazırda keçmiş infrastrukturdan əsər-əlamət qalmayıb: obyektlər tamamilə uçub-dağılıb, neft quyularının fəaliyyəti isə dayandırılaraq ağzı bağlanıb.

Məşğulluq və torpaq qıtlığı: Sakinlər çörək pulunu kənarda axtarır
Qazanbulaq şəhərtipli qəsəbə statusu daşıdığından sakinlərin pay torpaqları yoxdur. Əhalinin istifadəsinə verilən 6 sotluq həyətyanı sahə isə kənd təsərrüfatı ilə məşğul olmaq üçün yetərsizdir.

Qəsəbədə yeni iş yerlərinin olmaması və əkin-biçin imkanlarının məhdudluğu səbəbindən sakinlərin böyük hissəsi ailəsini dolandırmaq üçün respublikanın digər şəhərlərinə və ya xarici ölkələrə üz tutmağa məcbur olur.

Kommunal qayğılar: Su qıtlığı və odunla qızdırılan uşaq bağçası
Qəsəbə sakinləri uzun müddətdir ki, həm içməli, həm də təsərrüfat suyunun kəskin çatışmazlığından əziyyət çəkirlər.

Bundan əlavə, yaşayış məntəqəsi ümumilikdə qazlaşdırılsa da, qəsəbə uşaq bağçasının müasir qazanxana sistemi yoxdur. Bu səbəbdən bağça qış aylarında hələ də odunla qızdırılır.

Sahibkarlığın qarşısındakı hüquqi və süni maneələr
Qəsəbədə qarşıya çıxan ən ciddi problemlərdən biri də kommunal xətlərin çəkilməsində yaranan maneələrdir. Ididdialara görə, yerli icra hakimiyyətinin müvafiq qurumları müəyyən səbəblərdən qəsəbə ərazisini örüş sahəsi kimi qeydə alıblar. Bu status bəhanə gətirilərək evlərə və potensial obyektlərə kommunal xətlərin çəkilməsi üçün adekvat addımlar atılmır.

Mövcud hüquqi qeyri-müəyyənlik yerli və kənar sahibkarların əraziyə sərmayə qoymaq təşəbbüslərini məhdudlaşdırır. Sakinlər bildirirlər ki, qəsəbədə yeni iş yerlərinin açılması imkanları olsa da, yerli bürokratik maneələr və qeyri-rəsmi tələblər özəl təşəbbüslərin gerçəkləşməsinə imkan vermir.

Qazanbulağın müalicəvi havası və bərpa mərkəzi gözləntisi
Qazanbulaq təbii iqlim şəraitinə görə də unikaldır. Qəsəbənin havası bronxial astma və vərəm xəstəliklərindən əziyyət çəkənlər üçün şəfaverici xüsusiyyətə malikdir.

Sakinlər hesab edirlər ki, Səhiyyə Nazirliyi və rayon rəhbərliyinin dəstəyi ilə burada müasir Müalicəvi-Bərpa Mərkəzi yaradılarsa, bu addım həm minlərlə insana şəfa verər, həm də qəsəbə sakinləri üçün yeni iş yerlərinin açılmasına təkan verər.

Bununla yanaşı, ərazinin keçmiş sənaye ənənələri və rentabelliliyi nəzərə alınaraq yeni istehsal müəssisələrinin qurulması qəsəbənin yenidən dirçəlməsi üçün vacib şərtdir.

Gundemxeber.org redaksiyasının əməkdaşı Qazanbulaqdakı müşahidələrini və mövzu ilə bağlı araşdırmalarını davam etdirəcək.

Gundemxeber.org

Baku olunan fərdi həyət evləridir. Bu tendensiya uzun illər evsizlikdən əziyyəöt çəkən vətəndaşların birtəhər kirayəçilikdən canını qurtarmaq istəkləri ilə əlaqələndirilir. Mərkəzdən aralı yerlərdə fərdi evlərin tikintisi çox müddət çəkmir və diqqətdən uzaq olur. Lakin fərqli olaraq paytaxtın mərkəzi rayonlarında sıxlığın fonunda qanunsuz inşa olunan tikililər bir qayda olaraq qeyri-yaşayış obyektləridir. Kifayət qədər izdihamlı yerlərdə, göz önündə tikilən bu obyektlərin başa çatdırılması uzun vaxt çəkir. Bir sözlə, aidyyati qurumların belə özbaşınalıqları görməməsi qeyri-mümkündür.


Yasamal rayonunun Yeni Yasamal massivi, D.Bünyadzadə küçəsi – 5 ünvanda çoxmərtəbəli binanın qarşısında, binaya bitişik tikili inşa olunmaqdadır. Tikilinin ilk olaraq nəzəri cəlb edən cəhəti binanın həyətinin torpağının qazılaraq dərinləşdirilməsi və gələcək obyektin əhatə edəcəyi sahənin üstünün dəmir çardağla örtülməsi və binanın birinci mərtəbəsinin pəncərələrini gün işığından məhrum etməsidir. Bundan əlavə, tikilməkdə olan qeyri-yaşayış obyektində və binada gələcəkdə yanğın və ya hansısa başqa fövqəladə hadisə baş verərsə, hilasedicilərin hərəkətinə yer qalmayacaq. Təhlükə vəd edən bu naqislik yerində çəkilişı aparmış əməkdaşlarımızın qeydə aldıqları video-materialda da aşkar görünür.


İnşaat normalarına qətiyyən uyğun gəlməyən bu qanunsuz tikili həm də əvvəllər yerində olmuş ağacların məhv edilməsi hesabına başa gəlmişdir. Sakinlər bildirirlər ki, ərazidə 10-dan çox ağac kəsilmişdir. Məsələ ilə əlaqədar aidiyyəti qurumlara və eləcə də Yasamal Rayon İcra Hakimiyyətinə məktublar göndərsək də, adresatların reaksiyası özünü ləngidir. Sözügedən ünvana daha yaxın olan RİH isə ümumiyyətlə özbaşınalığın qarşısını almağa maraqlı görünmür.


Nyus.Az

"31.08.2026 tarixində saat 09:00-dan 11:30-a qədər — tam 2 saat 30 dəqiqə — klinikanızda heç bir əsaslı səbəb olmadan növbədə gözlədilmişəm..."
Bu barədə Sağlam Ailə klinikasının rəhbərliyinə ünvanlanmış müraciətdə giley olunur.

Narazı vətəndaş daha sonra bildirir: "Baş verənləri ardıcıllıqla qeyd edirəm:
1. Əvvəlcə qeydiyyat üçün 4-cü mərtəbəyə yönləndirildim. Orada Visa kartı üzrə check-up-a aid 50% endirimdən istifadə edəcəyimizi açıq şəkildə bildirdik. Qeydiyyat işçisi telefonu alıb endirimə baxdı, lakin bunu sənədə qeyd etmədi.
2. Bundan xəbərsiz olaraq təxminən 1 saat gözlədik. Kassaya düşdükdə kassir sənədin səhv tərtib olunduğunu bildirdi və bizi yenidən girişdəki qeydiyyata göndərdi.
3. Qapıdakı qeydiyyatda isə vəziyyəy daha pisdi xanım işi bilmir qeydiyyat ilə kassa arasında 4 dəfə get-gəl etmək məcburiyyətində qaldım. Hər dəfə yeni bir səhv üzə çıxdı: bir dəfə ümumi qan analizi sənədə salınmamışdı, digər dəfə D vitamini testi yazılmamışdı.
4. Səhv yalnız 2 saat 30 dəqiqədən sonra düzəldildi.
Qeyd etmək istəyirəm ki, analizlərə görə ac-susuz gəlmişdim və iş yerimdən yarım saatlıq icazə götürmüşdüm. İşçilərin səriştəsizliyi və məsuliyyətsizliyi ucbatından həm iş vaxtımı itirdim, həm də ciddi stress və əsəb gərginliyi yaşadım.
Bu, təsadüfi bir nöqsan deyil — qeydiyyat və kassa arasında işin təşkilində sistemli problemin göstəricisidir.
Şikayət etsək də, "menecer" adi ilə uşağı göndəriblər, axırda məlum olur ki, hansısa şöbədə mütəxəssisdir. Çox rəzil bir durum!"("DİA-AZ")

Xəbər verdiyimiz kimi, Azərbaycanda aylıq pensiyaların orta məbləği ötən ilin eyni dövrü ilə müqayisədə 10,5 faiz artaraq 594,4 manata çatıb.

Bəs pensiyalardakı bu artım vətəndaşların sosial rifahına nə dərəcədə təsir edir? Mövcud məbləğlər hazırkı yaşayış xərcləri fonunda kifayət edirmi?

Globalinfo.az-a danışan Azərbaycan Qiymətləndiricilər Cəmiyyətinin sədri, iqtisadçı Vüqar Oruc deyib ki, bu artım müsbət haldır:

“Lakin nəzərə almaq lazımdır ki, orta pensiya bütün pensiyaçıların məhz bu məbləği aldığı anlamına gəlmir. Hazırda minimum pensiya 320 manatdır və pensiyaların əhəmiyyətli hissəsi orta göstəricidən aşağıdır. Eyni zamanda, müxtəlif dövlət vəzifələrində və yüksək əməkhaqqı olan sahələrdə çalışmış vətəndaşlar daha yüksək pensiya alırlar. Nəticədə yüksək və aşağı pensiyaların ümumi riyazi ortalaması 594 manat 40 qəpik təşkil edir. Hazırda orta aylıq əməkhaqqının 1000 manatdan yüksək olduğunu nəzərə alsaq, orta əməkhaqqı ilə orta pensiya arasındakı fərqin azalması məqsədəuyğun olardı. Bu, pensiyaçıların sosial vəziyyətinin yaxşılaşmasına da müsbət təsir göstərə bilər”.

İqtisadçı bildirib ki, pensiyaların artımını qiymətləndirərkən yalnız nominal artıma deyil, ərzaq, dərman, qeyri-ərzaq məhsulları, yanacaq və digər zəruri xərclərin qiymətlərindəki dəyişikliklərə də diqqət yetirmək lazımdır:

“Əgər qiymət artımı pensiyaların artım tempini üstələyirsə, nominal artımı əhalinin real rifahının yüksəlməsi kimi qiymətləndirmək mümkün deyil. Bu baxımdan sosial rifahın yaxşılaşdırılması üçün bir sıra addımların atılmasına ehtiyac var. İlk növbədə minimum əməkhaqqının 400 manatdan 660 manata, yəni orta aylıq əməkhaqqının təxminən 60 faizinə qədər artırılması məqsədəuyğun olardı. Eyni zamanda, pensiya yaşında olan vətəndaşların pensiyalarının minimum əməkhaqqı səviyyəsinə yaxınlaşdırılması vacibdir”.

Ekspertin sözlərinə görə, hazırda aylıq istehlak səbətinin təxminən 300 manat səviyyəsində müəyyənləşdirilməsi real xərcləri tam əks etdirmir:

“Mövcud qiymətləri nəzərə alsaq, bir nəfərin minimum səviyyədə yaşaması üçün zəruri xərclərin təxminən 600 manat civarında qiymətləndirilməsi daha real görünür. Buna görə də həm minimum pensiyanın, həm də minimum əməkhaqqının artırılmasına ehtiyac var. Digər tərəfdən, minimum əməkhaqqı ilə çalışan bəzi vətəndaşlar özəl müəssisələrdə əmək müqaviləsində göstəriləndən əlavə gəlir əldə edir və bu vəsait müəyyən hallarda nağd şəkildə ödənilir. Bu isə vergidən yayınma hallarına səbəb ola bilər.

Bütün hallarda orta pensiya məbləğinin artması müsbət göstərici olsa da, onun vətəndaşların gündəlik həyatına real təsirini qiymətləndirmək üçün qiymət artımının səviyyəsi də nəzərə alınmalıdır. Buna görə də həm minimum pensiyanın artırılması, həm də istehlak səbətinin hesablanması mexanizminə yenidən baxılması vacibdir”.

Nabranda “Palermo” adlı klubda göstərilən xidmət və qiymətlərlə bağlı sosial şəbəkədə narazılıq ifadə olunub.
Bu barədə Nigar Əmirbəyova sosial media hesabında paylaşım edib.
O, paylaşımında obyektin müştərilərə təqdim etdiyi hesabda depozit məbləğinin göstərilməsini və masaya təqdim olunan məhsulların qiymətlərini tənqid edib. Nigar Əmirbəyova xüsusilə qarpızın qiymətinə diqqət çəkərək, onun 35 manata hesablandığını bildirib. Xanım Əmirbəyova təqdim olunan qarpızın vəziyyətinin də qənaətbəxş olmadığını iddia edib.

“Camaatı yoxlamağın məncə son stadiyası...” ifadəsi ilə başlayan paylaşımda hesabın içində depozit məbləğinin göstərilməsi də sual altına alınıb.
Müəllif eyni zamanda Nabranın “Palermo” klubunu və ümumilikdə turizm obyektlərini xidmət səviyyəsinə görə tənqid edərək, restoran, kafe və klublara nəzarət məsələsinin diqqətdə saxlanılmasının vacibliyini vurğulayıb. Paylaşımda, həmçinin, turizmin inkişafından danışıldığı halda bəzi obyektlərdə müştəriyə göstərilən xidmət və qiymət siyasətinin narazılıq doğurduğu qeyd olunub.

Bizimesr.media

Vətəninfo.az-ın redaksiyasına Naxçıvan Muxtar Respublikası Babək rayonunun tanınmış təhsil ocaqlarından olan Sirab kənd tam orta məktəbində son illər baş verən qanunsuzluqlar, özbaşınalıqlar və ciddi hüquqpozmalarla bağlı məlumatlı mənbələrdən şokeedici iddialar daxil olub.
İllərdir yüksək nəticələri və nümunəvi nizam-intizamı ilə seçilən məktəbin bu gün yarıtmaz idarəçilik ucbatından anarxiya və zorakılıq mərkəzinə çevrildiyi bildirilir.
Mənbənin iddiasına görə, məktəb rəhbərliyinin şagirdlərə qarşı tətbiq etdiyi fiziki şiddət artıq idarəolunmaz həddə çatıb və bir çox insidentlər polisin müdaxiləsi ilə nəticələnib.
Daxil olan məlumatda qeyd olunur ki, direktorun təzyiqlərinə dözməyən məktəblilərin etirazları zamanı ciddi vandallıq halları yaşanıb: direktorun döydüyü şagirdlərdən biri qəzəbindən məktəbin həyətindəki şam ağaclarını və elektrik dirəklərini yerindən çıxarıb. Başqa bir halda isə attestat verilməməsi və döyülməsi səbəbindən şagird bir neçə sinif otağının qapısını sındıraraq etirazını bildirib.

Məlumatda həmçinin ötən il dərslər zamanı yuxarı sinif şagirdləri arasında baş verən bıçaqlı dava məsələsinin də ört-basdır edildiyi iddia olunur. İddiaya görə, insidentdə adı keçən şagirdlərdən birinin məhz dərs hissə müdirinin xalası oğlu olması məsələnin tez-tələsik barışıqla bağlanmasına səbəb olub.
Bundan əlavə, məktəbə adı verilən şəhid Nüsrət Məmmədovun xatirəsinə hər il mayın 18-də keçirilən anım tədbirinin son 4 ildə keçirilmədiyi, əvəzində isə anım günündən bir gün sonra direktor və dərs hissə müdirinin özlərinə təntənəli ad günü təşkil etdikləri bildirilir. Müəllimlərdən bu məqsədlə məcburi pul yığıldığı və pulların bölgüsündə narazılıq yarandığı da iddialar arasındadır.
Redaksiyamıza daxil olan son məlumata görə, iyun ayının sonunda direktorun yenə bir şagirdə qarşı tətbiq etdiyi fiziki şiddət böyük insidentlə nəticələnib.
Döyülən şagirdin qəzəbi nəticəsində məktəb daxilində Ulu Öndər Heydər Əliyevin şəklinin olduğu şərəf lövhəsinin dağıdıldığı, sinif qapılarına vurulan şəhid şəkillərinin qoparılaraq yerə atıldığı bildirilir. Hadisə zamanı dərs hissə müdirinin ölkədə olmadığı qeyd olunur.

Mənbə həmçinin məktəbdə əmək hüquqlarının pozulduğunu, gecə nəzarətçilərinin qanunsuz olaraq saat 18:00-dan axşam saat 02:00-dək işlədildiyini, nəticədə saat 02:00-dən səhərə qədər məktəb binasının nəzarətsiz qaldığını vurğulayır.
Valideynlərin və ictimaiyyətin ciddi narahatlığına səbəb olan bu iddialarla bağlı Naxçıvan Təhsil Nazirliyindən münasibət öyrənməyə çalışacağıq. Mövzu diqqətimizdədir.

Bir neçə gün əvvəl Tribuna.az DİM rəhbərliyinin dəyişdiriləcəyi və Məleykə Abbaszadənin yerinə ADNASU-nun rektoru Rüfət Əzizovun gətiriləcəyi barədə xəbər yaymışdı.

Bildirək ki, həmin xəbərdə Abbaszadəınin yaşının nəzərər alaraq, pensiyaya göndəriləcəyi qeyd edilmişdi. Təyinatın yaxın günlərdə reallaşacağı vurğulanırdı.

Qeyd edək ki, bu məlumat sosial şəbəkələrdə müzakirələrə səbəb olub. Belə ki, sosial şəbəkə fəallarından olan və vaxtıyla Təhsil İnstitunda çalışmış Könül Aydın Rüfət Əzizov haqqında iddialar səsıləndirib.

Onun iddiasına görə, DİM-in rəhbərliyinə gətirilməsi gözlənilən Əzizovun Fətullah Gülənlə əlaqəsi var. “Amandır, etməyin. Bir ölkəyə zərrəcə hörmətiniz varsa, etməyin. Bu gəlsə, ölkəni Fətullah Gülənin şəbəkəsi tamamilə idarə edəcək. Mətaha da döndərməyin, adi bir korrupsionerdir”.

Könül Aydın özünün sosial şəbəkə hesabında yazıb ki, Əzizov Təhsil İnstitutunda direktor olduğu müddətdə MİQ imtahanları tamamilə keçdi kurs idarəçilərinin əlinə. “Rüfət Əzizov Təhsil İnstitutuna direktor təyin ediləndə mən həmin institutda Əlavə təhsilin məzmunu şöbəsinin müdiri idim. MİQ imtahanının aparılmasında iştirak edirdim. Həmin il gördüm ki, çöldə nə qədər tanınmış kurs var, hamısının məsul işçiləri bunkerdədirlər imtahan testlərini hazırlayırlar. İmtahandan sonra Şamaxıya dincəlməyə getdik. Onda elə o kurs adamlarının önündə Rüfət Əzizova dedim ki, bu bazar adamları niyə imtahan suallarını yazırlar. Mən bu instituta gələndə məni inandirmışdılar ki, biz təhsili korrupsiyadan təmizləmək üçün gəlmişik, mən də burada şöbə müdiri olmağa razılıq vermişdim. Fəaliyyətim müddətində köhnə korrupsionerlərə qarşı sərt idim, onlar tələblərimə dözməyib ya işdən gedir, ya da yaramazları özüm işdən çıxarırdım. Belə çıxır ki, mən o köhnə korrupsionerlərin günahına batmışam. Nə fərqi vardı – o korrupsionerlər, yoxsa bu bazar adamları?”

Təhsil İnstitutunun keçmiş əməkdaşı daha sonra bildirib ki, bu çıxışı zamanı Rüfət Əzizov “lal və kar” kimi susub, bir kəlmə də cavab verə bilməyib. “Nəzakət Mehtiyeva oturduğu yerdə ölmüş, Nurlan İsmayılbəyli başı ilə sözlərimi təsdiq edirdi. Bu hadisəni burada çox adam xatırlayar. Böyük kollektiv qarşısında çıxış etmişdim. Nəzakət Mehtiyeva Şamaxıdakı bu toplantıdan öncə – Bakıda öz iş otağında mənə kurs rəhbərlərinin MİQ imtahanında iştiraklarını belə əsaslandırmışdı: “Onlar çöldə qalanda müəllimləri üstümüzə qaldırıb ETN qarsisunda aksiya keçirir, Feysbukda paylaşmalar edərək ajiotaj yaradırlar”. Hətta demişdi ki, iki kurs rəhbərini bu təxribata görə otağına çağırmışdı, onlar da onun gözü önündə bir-birlərini pis söyüşlərlə təhqir edərək, bir-birlərinin üzlərinə tüpürmüşdülər. Ona görə də ikisi də indi bunkerdə idilər”.

Könül Aydın daha sonra yazıb ki, həmin dönəmdən bəri imtahandan sonra səs çıxmır. “Diqqət edin, artıq neçə ildir, görün imtahandan sonra səs çıxırmı?! Demək, elə o vaxtdan MİQ kurslar arasında bölüşdürülüb. Bütün kurslar böyük güclərə məxsusdur. Allah qorusun, onlar mənə bir daha nəsə etmək istəyərlər. Biləsiniz. Baxın da”.

O yekunda Əzizov haqqında başqa məlumatlar da paylaşıb. Könül Aydın yazıb: “AGMA Rüfət Əzizovun idarəçiliyindən niyə alındı? Rüfət Əsədzadə niyə ölkədən qaçdı? Dövlət qurumları araşdırsınlar. Rüfət Əsədzadə bir trol qrupunu da idarə edirdi. Bu axmaqlar məni də oraya daxil edib vəzifə və yüksək məbləğdə xidmət haqqı təklif edirdilər. Görün nə qədər səfeh və beyin yerində hörümçək toru – Fətullah Gülənin şəbəkə siyasəti olan adamdırlar ki, hamını özləri kimi zənn edirlər. Qrupdan çıxıb nümayəndələrinə dedim ki, get, mənim adımdan bunların üzünə tupür.

Bu biabırçılıqlar gözümüzün önündə baş verdi. Ürəyimiz bulanır. Belə təbliğatlar aparmayın, xahiş edirik. Korrupsionerlerin , merkantil şəbəkə, təriqət adamlarının bir qurumu lokal olaraq idarəsinə birtəhər dözürük, övladlarımızın gələcək dünyasını tamamilə verməyin bunların əlinə!

Bununla işləyib tanımışam, əminliklə yazıram”.

Tribuna.az

Yasamal rayonunda yerləşən 98 saylı dövlət uşaq bağçası ilə bağlı son dərəcə ciddi iddia sosial şəbəkədə ictimailəşdirilib. Elnurə Abuşova adlı sosial şəbəkə istifadəçisinin açıq paylaşımında bildirilir ki, ailə övladını təxminən bir həftədir sözügedən dövlət bağçasına göndərir və bundan sonra uşağın davranışında qeyri-adi dəyişikliklər müşahidə olunub.

Paylaşım müəllifinin sözlərinə görə, ailə yaranmış şübhələrdən sonra uşağa analiz verdirib və analiz nəticəsində uşağın qanında psixotrop təsirə malik dərman maddəsinin aşkarlandığı bildirilib.

Məsələ artıq sadəcə şifahi məlumat deyil — azyaşlı ilə bağlı belə ağır iddia sosial şəbəkədə açıq şəkildə ictimailəşdirilib və Elm və Təhsil Nazirliyi ilə Daxili İşlər Nazirliyinin adı çəkilərək məsələyə müdaxilə tələb olunub.

Lakin hazırda əsas məsələ tibbi analiz sənədinin araşdırılmasıdır. Analiz nəticəsinin əsli, hansı maddənin müəyyən edildiyi, onun konsentrasiyası, analizin hansı tibb müəssisəsində və nə zaman aparıldığı hüquq-mühafizə orqanları tərəfindən yoxlanılmalıdır.

Əgər araşdırma nəticəsində azyaşlıya valideyninin xəbəri və həkim göstərişi olmadan hər hansı psixotrop və ya sakitləşdirici preparatın verilməsi təsdiqlənərsə, ortaya olduqca ağır suallar çıxacaq: uşağa dərmanı kim verib, hansı məqsədlə verib, bağça rəhbərliyinin bundan xəbəri olubmu və dövlət bağçasında belə preparat ümumiyyətlə necə peyda olub?

Digər tərəfdən, 98 saylı dövlət uşaq bağçasının üzərinə belə ağır ittiham qoyulduğu üçün müəssisənin mövqeyi də alınmalı, iddianın həqiqətə uyğun olub-olmadığı rəsmi araşdırma ilə müəyyən edilməlidir.

Azyaşlının sağlamlığından söhbət gedirsə, məsələni “araşdırarıq” deyib uzatmaq olmaz. Kamera görüntüləri qorunmalı, uşağın bağçada təmasda olduğu şəxslər müəyyənləşdirilməli, tibbi analiz ekspertizadan keçirilməli və nəticə ictimaiyyətə açıqlanmalıdır.(Bntv.az)