QHT-lərə Dövlət Dəstəyi Agentliyi tərəfindən müxtəlif adlar altında keçirilən forumların heç bir real nəticəsi və cəmiyyət üçün faydası yoxdur

Hər bir dövlət qurumu öz fəaliyyətində ciddilik, yüksək məsuliyyət və şəffaflıq prinsiplərini təməl daşı kimi qəbul etməlidir. İctimaiyyətə verilən hər bir sözün, hər bir bəyanatın arxasında ciddi bir iş planı və real nəticələr dayanmalıdır. Təəssüf ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin (QHT Agentliyi) son dövrlərdəki fəaliyyəti bu dövlətçilik prinsiplərindən nə qədər uzaq olduğunu, hətta bəzi hallarda onlara zidd getdiyini aşkar şəkildə nümayiş etdirir. Qurumun fəaliyyətində “yalan vədlər” vermək, reallıqdan uzaq süni görüntülər yaratmaq və forum xatirinə forumlar təşkil etmək artıq adi bir iş rejiminə çevrilib.

İfşa olunan reallıqlar: Söz və əməl arasındakı uçurum

Apardığımız araşdırmalarla dəfələrlə QHT-lərə Dövlət Dəstəyi Agentliyinin cəmiyyətə bəyan etdiyi, lakin sonradan heç bir məntiqi izahat vermədən unudulan layihələrini ifşa etmişik. Məsələn, qurumun işğaldan azad olunmuş ərazilərdə əhaliyə psixoloji və hüquqi xidmətlərin göstərilməsi ilə bağlı verdiyi gurultulu bəyanatlar hələ də kağız üzərində qalaraq, icra olunmamış layihələr siyahısındadır. Eyni vəziyyət Özbəkistan tərəfi ilə bağlı da müşahidə olunub: 2-3 il ərzində iki dəfə memorandum imzalanmasına baxmayaraq, birgə qrant müsabiqəsinin elan edilməsi tamamilə unudulmuşdu.

Yalnız "Yenixeberorg.com"da bu faktların ictimailəşdirilməsindən və sərt tənqidlərdən sonra Agentlik məcburiyyət qarşısında qalaraq hərəkətə keçib, birgə qrant elan etdi. Bu, onu göstərir ki, qurum üçün sistemli iş planı yox, yalnız ictimai ifşa təzyiqi əsas stimul rolunu oynayır.

Növbəti fiasko: Səhiyyə forumu və bitməyən vədlər silsiləsi

İndi isə daha bir yetərincə ciddi sayılacaq faktla bağlı... 2024-cü ilin noyabr ayının 18-də bütün ölkə mediasında QHT-lərə Dövlət Dəstəyi Agentliyinin səhiyyə profilli QHT-lərin forumunu keçirəcəyi barədə geniş bəyanatlar dərc olunmuşdur. 2025-ci ilin yanvar ayında baş tutmalı olan bu tədbirin təşkili üçün xüsusi işçi qrupları yaradıldı, TƏBİB, Səhiyyə Nazirliyi və digər aidiyyəti qurumlar bu prosesə cəlb edildi, dövlət büdcəsindən isə bu tədbir üçün xeyli vəsait ayrıldı. Aradan xeyli vaxt keçdikdən sonra, heç bir konkret iş görülmədən tədbirin 2025-ci ilin may ayına keçiriləcəyi bəyan edildi. Görünür, yalan vəd vermək artıq bu Agentliyin fəaliyyət nizamnaməsinin əsas maddələrindən birinə çevrilib.

Nəticəsiz forumlar: Dövlət büdcəsi kimə və nəyə xidmət edir?

QHT-lərə Dövlət Dəstəyi Agentliyi tərəfindən müxtəlif adlar altında keçirilən forumların heç bir real nəticəsi və cəmiyyət üçün faydası yoxdur. Bu tədbirlər konkret bir problemin həllinə və ya strateji məqsədə hesablanmayıb. Tədbir iştirakçıları bir araya gələrək sadəcə öz aralarında danışırlar, daha sonra isə heç bir səmərəli nəticə əldə etmədən foto çəkdirib ayrılırlar. Bu proseslər yalnız “görüntü xatirinə” təşkil olunur və dövlət büdcəsi şəkildə havaya sovrulur.

Bizim bu materialımızdan sonra, yəqin ki, Agentlik yenə də özünü sığortalamaq üçün həmin tədbiri məcburən keçirəcək. Lakin biz "Yenixeberorg" olaraq bu məsələnin üzərində dayanacaq və verilən hər bir vədin, xərclənən hər qəpiyin hesabatının ictimailəşməsinə çalışacağıq. Üzərindən illər keçsə belə, verilmiş vədləri xatırladacağıq. Dövlət strukturları PR üçün deyil, xalqa və dövlətə real xidmət üçün mövcuddur və bu cür qeyri-ciddi yanaşma yolverilməzdir!("Yenixeberorg.com)

Qarşı tərəfin cavab haqqını tanıyırıq.

Dubayda avtomobil alqı-satqısı ilə məşğul olduğu bildirilən Murad Həsənov və onun atası Qurban Həsənovla bağlı iranlı iş adamının irəli sürdüyü iddialar ciddi müzakirələrə səbəb olub.


İranlı iş adamının iddiasına görə, avtomobil alqı-satqısı məqsədilə Murad Həsənova etibar etdiyi və nəticədə ümumilikdə 600 min ABŞ dolları və 6 ədəd lüks avtomobilin taleyindən xəbərsiz qaldığı bildirilir.


İş adamının sözlərinə görə, əməkdaşlığın ilk mərhələsində Murad Həsənov müxtəlif avtomobillər alaraq ona göndərib. Bu prosesdən sonra tərəflər arasında etimad yaranıb və daha böyük məbləğlərdə avtomobil alqı-satqısı həyata keçirilməyə başlanılıb.


Pul göndərildi, əlaqə kəsildi


Şikayətçinin bildirdiyinə görə, 5 iyulda növbəti avtomobillərin alınması üçün Murad Həsənova pul göndərilib. Bundan sonra Murad Həsənovun vəsaiti qəbul etmək üçün getdiyini bildirdiyi, daha sonra isə telefonlarının söndürüldüyü və onunla əlaqənin kəsildiyi iddia olunur.


Vəziyyətdən narahat olan iranlı iş adamı Murad Həsənovun atası Qurban Həsənovla əlaqə saxlayıb.


İş adamının iddiasına görə, Qurban Həsənov ona oğlunun Dubay polisi tərəfindən saxlanıldığını deyib. Bundan sonra isə Murad Həsənovun vəkil məsələsinin həlli üçün iş adamından əlavə 11 min ABŞ dolları alındığı bildirilir.


Lakin hadisələrin sonrakı gedişində bu məlumatlarla bağlı yeni suallar ortaya çıxıb.


“Dubayda həbsdədir” deyilən Murad Bakıda olub?


İranlı iş adamının sözlərinə görə, verilən məlumatlardan şübhələndikdən sonra məsələni özü araşdırmağa başlayıb.


Onun iddiasına əsasən, araşdırma zamanı Murad Həsənovun həmin vaxt Dubayda həbsdə olması ilə bağlı məlumatların həqiqətə uyğun olmadığı barədə məlumat əldə edilib. Şikayətçi Murad Həsənovun guya həbsdə olduğu müddətdə Bakıda olduğunu iddia edir.


Bundan başqa, həmin müddətdə onun müxtəlif məclislərdə və əyləncə xarakterli tədbirlərdə iştirak etdiyi barədə də məlumatların əldə edildiyi bildirilir.


Əgər bu məlumatlar təsdiqlənərsə, Murad Həsənovun Dubayda həbsdə olması barədə verilən məlumatla həmin vaxt Bakıda olması arasında ciddi ziddiyyət yaranır.


600 min dollar və 6 avtomobilin taleyi necə olub?


İş adamının iddiasına görə, o, Qurban Həsənovdan Murad Həsənovun qəbul etdiyi vəsait və avtomobillərlə bağlı açıqlama istəyib.


Qurban Həsənovun isə “pulda, mal-mülkdə gözüm yoxdur” məzmununda fikir bildirdiyi iddia olunur.


Lakin əsas sual dəyişmir:


600 min ABŞ dolları haradadır?


6 lüks avtomobilin hazırkı taleyi necədir?


Şikayətçinin təqdim etdiyi məlumatlara əsasən, avtomobillərin bir qisminin Azərbaycana gətirildiyi və müxtəlif şəxslərin adına rəsmiləşdirildiyi iddia olunur.


Məlumatlarda Qasımzadə Vilayət, Məmmədova Rəna və digər şəxslərin adları çəkilir.


Eyni zamanda Murad Həsənovun həmin vəsaitlər hesabına Bakıda villa aldığı və müxtəlif markalı lüks avtomobillərdən ibarət kolleksiya yaratdığı da iddia edilir.


Söhbət Range Rover, BMW, Mercedes, Hyundai, Kia, Toyota və digər markalardan gedir.


Bu iddiaların hüquqi baxımdan araşdırılması zamanı pul köçürmələrinin, avtomobillərin alqı-satqı və rəsmiləşdirmə sənədlərinin, eləcə də əmlakların kimlərin adına keçirilməsinin müəyyənləşdirilməsi mühüm əhəmiyyət daşıyır.


Xarici iş adamının pul iddiası araşdırılmalıdır


Hadisənin diqqət çəkən məqamlarından biri də şikayətçinin İran vətəndaşı olmasıdır.


Xarici iş adamının Azərbaycanda yüz minlərlə dollar və bir neçə lüks avtomobillə bağlı ciddi iddialar səsləndirməsi məsələnin bütün detalları ilə araşdırılmasını zəruri edir.


Əgər ortada sadəcə kommersiya mübahisəsi varsa, bunun hüquqi müstəvidə həlli mümkündür. Yox, əgər araşdırma nəticəsində dələduzluq, mənimsəmə və ya digər qanun pozuntuları müəyyən edilərsə, həmin faktlara hüquqi qiymət verilməlidir.


Hazırda diqqət mərkəzində olan əsas məsələlər isə 600 min dolların və 6 avtomobilin taleyi, 11 min dolların hansı məqsədlə alınması və avtomobillərin kimlərin adına rəsmiləşdirilməsi ilə bağlıdır.


"Bakufakt"

“Əmək pensiyaları haqqında” qanunun 37.3.2-ci maddəsinə görə, əlilliyə görə pensiya təyin edilmiş şəxs işləməkdə davam edərsə, pensiya TƏYİN OLUNDUQDAN, yaxud əmək pensiyası bu maddəyə əsasən yenidən hesablandıqdan işləməyən əmək pensiyaçısı KATEQORİYASINA keçdiyi tarixədək olan dövr üzrə toplanan pensiya kapitalına və həmin KATEQORİYAYA keçdiyi tarixdəki yaşına müvafiq tələb olunan sığorta stajına əsasən, bu Qanunun 13-cü maddəsinə uyğun olaraq əmək pensiyasının sığorta hissəsi avtomatlaşdırılmış qaydada (bu Qanunun 37.3.2-1-ci maddəsində nəzərdə tutulmuş hal istisna olmaqla) yenidən hesablanır. Qanuna 13.05.2022-ci ildə əlavə edilən 37.3.2-1-ci maddəyə görə, bu Qanunun 20-ci maddəsinə uyğun olaraq əmək pensiyasına qulluq stajına görə əlavə təyin edilmiş şəxslərin əmək pensiyasının yenidən hesablanması onların və ya ailə başçısını itirmiş ailə üzvünün MÜRACİƏTİ əsasında həyata keçirilir.

Bu icrası məcburi olan QANUN, bu da qanunu icra etməyə borclu olan ƏƏSMN tabeliyində DSMF-in qanunu cibinə, qərəzinə uyğunlaşdırıb, dövlətin sosial, pensiya siyasətini heçə sayması!(?) Bəli, bəli, DSMF-in Xüsusi Şərtlərlə Təyinat üzrə Mərkəzi Filialı (XŞTMF) işləyən hərbi pensiyaçıların pensiyalarını işlədiklərinə görə yığılan sığorta, pensiya kapitalına uyğun yenidən hesablamaqdan imtina edir. DSMF, XŞTMF-nin əsası absurddur, bu yekəlikdə fondun, filal(lar)ının Konstitusiyaya, qanuna, prezident fərmanına, NK qərarına sayğısızlığının “əsasına” baxın, işləyən pensiyaçının pensiyasını yenidən hesablamaq üçün işi dayandırması tələbi, şərti irəli sürülür! “Əmək pensiyaları haqqında” qanunda pensiya təyin olunduqdan sonra işləməyə davam edənlərin pensiyalarının işləməyə görə toplanan sığorta kapitalına uyğun yenidən hesablanmasının təsbit olunması bir yana, axı “Əmək pensiyalarının təyin edilməsi, hesablanması, yenidən hesablanması, bir növdən başqa növə keçirilməsi və ödənilməsi Qaydası”nın təsdiq edilməsi barədə NK-nın 28.04.2022-ci il tarixli, 175 saylı qərarı var! Və bu 175 saylı qərar DSMF, XŞTMF məmurlarının “stolüstü kitabı” olmalıdır axı! NK-nın 175 saylı qərarının 6.7-ci bəndini ƏƏSMN DSMF-in, XŞTMF-nin qərəz məmurlarının diqqətinə çatdırırıq:

“Qanunun 37.3.2-1-ci maddəsinə əsasən əmək pensiyasının yenidən hesablanması İŞLƏYƏN əmək pensiyaçısının fərdi şəxsi hesabının sığorta hissəsində MÜRACİƏT TARİXİNƏ toplanmış PENSİYA KAPİTALINA əsasən həmin TARİXDƏN, İŞLƏMƏYƏN əmək pensiyaçısına münasibətdə şəxsin İŞLƏMƏYƏN əmək pensiyaçısı KATEQORİYASINA keçdiyi GÜNDƏN, lakin MÜRACİƏT edilən tarixdən əvvəlki ən çoxu üç il üçün ödənilməklə həyata keçirilir”

Bəs niyə həyata keçirilmir, sosial məmurlar NK qərarını ciblərinə, qərəzlərinə uyğunlaşdırırlar? Necə olur, Maliyyə Nazirliyi, Dövlət Maliyyə Nəzarəti Xidməti, ƏƏSMN tabeliyində Dayanıqlı və Operativ Sosial Təminat (DOST) Agentliyi təkrar-təkrar ƏƏSMN-ə, DSMF-ə qanunu, NK qərarını icra etməyə müraciət edir, DSMF XŞTMF isə təkrar-təkrar maliyyə özbaşınalığını sürdürür? Sual doğur, XŞTMF nəyə gərəkdir, onun funksiyalarını DOST-a verməklə özbaşınalığa son qoymağı NK, ƏƏSMN fikirləşə bilməz? Amma çoxdan fikirləşmək gərəkir(di), belə pensiya təminat(sızlığ)I ilə İŞLƏYƏN PENSİYAÇI halal əmək haqqından PENSİYA FONDUNA ödədiyi əmlakından da məhrum olur, halal qanpulundan da.

Məğrur Bədəlsoy

Gundemxeber.org

"Biz Nərimanov Tibb Mərkəzinin əməkdaşları sizdən xahiş edirik, şikayətimizə biganə qalmayıb bu mövzunu işıqlandırasınız..." "Bu barədə"Dia-az"a ünvanlanmış müraciətdə deyilir.

Müraciətdə daha sonra qeyd olunur: "Belə ki, yayılan məlumatlara görə, təmirdən çıxmış bizim Nərimanov Tibb Mərkəzinin binasını yeni yaradılacaq Pediatriya Mərkəzinə verilməsi nəzərdə tutulur. Bu xəbər kollektivimizdə ciddi narazılıq və məyusluq yaradıb.

Xəstəxanada yayılan söz-söhbətlərə görə, həkimlərin etirazlarının qarşısını almaq üçün onlara qərarın guya “yuxarıdan” verildiyi bildirilir. Lakin bu barədə kollektivə heç bir rəsmi məlumat təqdim olunmayıb.

Kollektiv hesab edir ki, Pediatriya Mərkəzinin yaradılması zəruridirsə, bunun üçün başqa imkanlar, o cümlədən yeni bina tikilməsi də nəzərdən keçirilə bilər. Nərimanov Tibb Mərkəzinin illərdir gözlədiyi təmir olunmuş binasının əlindən alınması isə bizim üçün qəbuledilməzdir.

Biz TƏBİB-dən mətbuata təqdim edilən şablon cavab yox, qəti və rəsmi cavab istəyirik:
Nərimanov Tibb Mərkəzinin gələcəyi necə olacaq?
Təmir olunmuş bina kimə veriləcək?

Məsələ sadəcə bir bina deyil. Məsələ Nərimanov Tibb Mərkəzinin və onun kollektivinin gələcəyidir.."

Dia-az

“Azəraqrar Dövlət İstehsalat və Emal Birliyi” MMC-də konfuz: direktorun verdiyi qərarlar öz işçisi tərəfindən ləğv olunur

AzFakt.com xəbər verir ki, Kənd Təsərrüfatı Nazirliyi yanında fəaliyyət göstərən “Azəraqrar Dövlət İstehsalat və Emal Birliyi” MMC-də həyata keçirilən kadr islahatlarından sonra qurumda problemlər daha da dərinləşib.

Hikmət Hüseynov direktor təyin edildikdən sonra “Azəraqrar Dövlət İstehsalat və Emal Birliyi” MMC-də faktiki "hakimiyyət" onun müavini vəzifəsini icra edən və KTN-də “nazirin komandiri” adlandırılan Fəxrəddin Qəhrəmanovun əlinə keçib.

AzFakt.com-a daxil olan məlumata görə son həftələr Fəxrəddin Qəhrəmanovun bir neçə dəfə Hikmət Hüseynovun verdiyi bəzi qərarları ləvğ edib və bundan sonra direktorla “nazirin komandiri” arasında gərginlik ciddi şəkildə artıb. Mənbə iddia edir ki, faktiki olaraq Hikmət Hüseynovun “Azəraqrar Dövlət İstehsalat və Emal Birliyi” MMC-də direktor kimi səlahiyyətləri Fəxrəddin Qəhrəmanov və komandası tərəfindən bloklanıb. Direktor bütün qərarları ancaq Fəxrəddin Qəhrəmaovun razılığı ilə vermək məcburiyyətindədir.

Məlumata görə Hikmət Hüsyenov nazir Məcnun Məmmədovun “komandiri” Fəxrəddin Qəhrəmanovla bağlı şikayətlər etməyə çəkinir. Çünki Fəxrəddin Qəhrəmanov “Azəraqrar” işçilərini və direktoru inandırıb ki, ayda bir neçə dəfə nazir Məcnun Məmmədovla görüşüb, qurum haqqında məlumatlar verir. Fəxrəddin Qəhrəmanovun nazirlə “yaxın olması”na inanan Hikmət Hüseynov isə tərəddüd içindədir və “nazirin komandiri”nin özbaşınalıqlarının qarşısını necə alacağını bilmir. Bu üzdən də MMC-nin fəaliyyətinin zamanla iflic olması qaçınılmaz görünür.

Qeyd edək ki, Fəxrəddin Qəhrəmanov “Azəraqrar Dövlət İstehsalat və Emal Birliyi” MMC-nin balansındakı texnikalara cavabdeh şəxsdir. Lakin hazırda qurumun texnikalarının 90 faizi nasazdır və işləmir.

Buna baxmayaraq, Fəxrəddin işləməyən texnikaların adına yanacaq, sürtkü yağları və ehtiyat hissələri yazdıraraq dövlət vəsaitlərini mənimsədiyi iddia olunur.

AzFakt.com

"Görüntülərə görə bağışlayın, paylaşmaya bilməzdim, bunu kimsə deməlidir. Bura 6 saylı Uşaq Kliniki Xəstəxanasının sanitar qovşağıdır".

Mia.az xəbər verir ki, sözləri jurnalist Ramilə Qurbanlı feysbuk-akı səhifəsində fotolarla da əlavə etməklə paylaşıb.

O, daha sonra paylaşımına belə davam edib: "Bilmədim məkan səhiyyə ocağı, tibb mərkəzidir, yoxsa antisanitariya qaynağı? Tibb mərkəzinin, TƏBİB-in rəhbərliyi uşağını belə bir yerə müayinəyə, müalicəyə gətirər? Burda sağlam uşaq sağalmaz xəstəliyə yoluxar. Otaqlar, dəhlizlər də oxşar vəziyyətdədir. "Daha heç nə demirəm, nöqtə, nöqtə və nöqtə..."

Peşə Təhsili üzrə Dövlət Agentliyinin tabeliyində fəaliyyət göstərən peşə təhsili müəssisələri ilə bağlı redaksiyamıza maraqlı faktlar daxil olmaqdadır.
Biziməsr.media olaraq belə müraciətləri yalnız məlumat kimi yayımlamaq deyil, mümkün qədər araşdırmaq, faktları tutuşdurmaq və qarşı tərəfin mövqeyini öyrənməklə ictimaiyyətə təqdim etməyə çalışırıq.
Adətən Peşə Təhsili üzrə Dövlət Agentliyinin aidiyyəti struktur bölmələrinə hər hansı məsələ ilə bağlı müraciət etdikdə “Konkret fakt göstərin, araşdıraq” cavabı ilə qarşılaşırıq. Bu dəfə isə redaksiyaya daxil olan məlumat məhz konkret tarix, konkret müəssisə, konkret şəxslər və konkret məbləğlə bağlıdır.
İlk olaraq qeyd edək ki, məsələ ilə bağlı Peşə Təhsili üzrə Dövlət Agentliyinə media sorğusu göndərilib. Agentliyin cavabı daxil olduqdan sonra qurumun mövqeyi oxuculara təqdim ediləcək.
Redaksiyaya daxil olan məlumata görə, 2026-cı ilin fevral ayında Dəniz Nəqliyyatı, Gəmiqayırma və Liman İşləri üzrə Bakı Dövlət Peşə Təhsil Mərkəzində tələbələrin təqaüd kartlarında diqqətçəkən hadisə baş verib. Həmin dövrdə tələbələrə aylıq 66 manat dövlət təqaüdü ödənildiyi halda, bəlli olub ki, (iddia olunur ki, rəhbərliyə və digər şəxslərə yaxınlığı ilə seçilən) təxminən 40 tələbənin təqaüd kartına nəzərdə tutulduğundan artıq pul köçürülüb.
Bu mərhələyə qədər hadisəni texniki və ya mühasibat səhvi kimi qiymətləndirmək olardı, lakin məsələnin məhz bundan sonra başqa istiqamət alması ortaya ciddi suallar çıxarıb.
Məlumatda qeyd olunur ki, tələbələrin kartına əlavə köçürülmüş pullar sonradan məlum şəxslərin, əsasən Mərkəzin baş mühasibi Jalə Rəsulovanın tapşırığı ilə baş ustanın köməyi ilə nəğd şəkildə geri toplanıb və Mərkəzin direktor əvəzi Nail Bayramova verilib.
Lakin baş verənlərin fonunda tələbələrdən birinin hadisə ilə bağlı Peşə Təhsili üzrə Dövlət Agentliyinə şikayət etməsi hər şeyi alt-üst edib. Bundan sonra Agentliyin nümayəndələri, əsasən Peşə təhsilinin keyfiyyətinə nəzarət şöbəsinin əməkdaşları sözügedən Mərkəzdə yoxlama aparmaq məcburiyyətində qalıb.
Və məhz bu yoxlamadan sonra məsələnin miqyası daha aydın görünməyə başlayıb.
Redaksiyaya daxil olan məlumata görə, araşdırma zamanı tələbələrə artıq köçürülmüş vəsaitlərin sonradan geri toplanması ilə bağlı pozuntu müəyyən edilib. Nəticədə ümumi məbləğin 3 942 manat olduğu ortaya çıxıb. Yoxlamanı Peşə təhsilinin keyfiyyətinə nəzarət şöbəsinin əməkdaşı İskəndər Məmmədov və digərləri həyata keçirib. Bu barədə daha ətraflı bir qədər sonra...
Daha diqqətçəkən məqam isə həmin pulun tələbələrdən toplandığının yoxlama zamanı müəyyənləşdirilməsi barədə olan məlumatdır. Burada söhbət sadəcə bank kartlarına artıq pul köçürülməsindən deyil, həmin vəsaitin sonradan tələbələrdən əlbəəl yığılmasından və dövlət vəsaitinin hərəkətindən gedir.
Yoxlamadan sonra nə baş verib?
Məlumata görə, bir neçə günlük yoxlamanın (?) nəticəsində Akt tərtib olunub. Nəticədə Peşə Təhsili Mərkəzinin baş mühasibi Jalə Rəsulovaya şiddətli töhmət verilib. Bundan başqa, baş usta Sürəyya Məmmədova, kadrlar üzrə məsul şəxs Könül Baxışova töhmət, eləcə də 30-a yaxın müəllim və ustaya yazılı xəbərdarlıq tətbiq edilib. Bununla da məsələ bağlanıb və heç bir hüquqi işləm həyata keçirilməyib. Mənimsənilməyə cəhd edilən 3 942 manat vəsait isə iki dəfəyə - ilk mərhələdə 1 800 manat olmaqla, bütün məbləğin Agentliyin hesabına köçürülməsi həyata keçirilib.
Məsələnin ən maraqlı tərəfi isə elə bundan sonra başlayır.
Çünki redaksiyaya daxil olan məlumata görə, adıçəkilən əməkdaşlara şiddətli töhmət və ya töhmət verildiyi halda, Mərkəzin rəhbəri vəzifəsini icra edən Nail Bayramova heç bir cəza tətbiq edilməyib. Burada istər-istəməz sual yaranır - əgər müəssisədə baş verən hadisə nəticəsində baş mühasibə şiddətli töhmət verilib, baş usta, kadrlar üzrə məsul şəxs və 30-a yaxın müəllim və ustaya töhmət tətbiq edilibsə, müəssisənin rəhbəri vəzifəsini icra edən Nail Bayramov niyə hansısa məsuliyyətə cəlb olunmayıb?
Burada daha bir maraqlı məqam var.
Redaksiyaya daxil olan məlumatda Nail Bayramovun Peşə Təhsili üzrə Dövlət Agentliyinin Keyfiyyət Təminatı şöbəsinin müdiri Kənan Həsənlidən xüsusi dəstək aldığı iddia olunur. Eyni zamanda direktor əvəzi Nail Bayramovun sözügedən şöbənin baş mütəxəssisi Elsəvər Salayevlə olduqca yaxın dost münasibətlərinin olduğu deyilir.
Bildirilir ki, Elsəvər Salayev Peşə Təhsili üzrə Dövlət Agentliyinin Keyfiyyət Təminatı şöbəsinin müdiri Kənan Həsənlinin ən xas adamlarından biridir və bütün işləri onun vasitəsilə həll edir. Nail Bayramovun hazırkı vəzifəyə gətirilməsində Elsəvər Salayevlə Kənan Həsənlinin böyük rolu olub. Həmçinin bildirilir ki, Kənan Həsənlinin yaxın vaxtlarda Nail Bayramovun sözügedən mərkəzə direktor təyin olunmasını dəstəklədiyi və bunun üçün ona böyük dəstək olduğu barədə məlumatlar var. Məhz bu münasibətlər səbəbindən Nail Bayramovun baş vermiş hadisə ilə bağlı töhmət və ya şiddətli töhmət almasının qarşısının alındığı bildirilir.
Lakin məsələnin özü kifayət qədər ciddi olduğundan, Peşə Təhsili üzrə Dövlət Agentliyinin və adıçəkilən şəxslərin buna münasibət bildirməsi vacibdir. Çünki söhbət artıq təkcə bir peşə mərkəzindəki təqaüd məsələsindən getmir. Əgər doğrudan da müəyyən vəzifəli şəxslərin digər şəxslərin təyinatında təsiri varsa və həmin şəxslər sonradan idarəetmə prosesində qorunursa, burada dövlət idarəçiliyi və kadr siyasəti ilə bağlı daha geniş suallar meydana çıxır.
Kənan Həsənli kimdir?
Redaksiyaya daxil olan məlumatlarda Peşə Təhsili üzrə Dövlət Agentliyinin tabeliyində olan müəssisələrə direktor təyinatlarında Kənan Həsənlinin əsas söz sahiblərindən biri olduğu deyilir. Qeyd olunur ki, onlarla Peşə Mərkəzinin rəhbəri şəxsən onun təklifi ilə təyinat alıb və qorunur.
Qeyd edək ki, Peşə Təhsili üzrə Dövlət Agentliyinin əsas strukturu direktor və 2 müavin postu, eləcə də onların nəzarətində olan şöbə və sektorlarla formalaşdırılıb. Peşə təhsilinin keyfiyyətinə nəzarətin təşkili şöbəsi də Agentliyin direktor müavini Simnar Məmmədovun nəzarəti altındadır.
Ümumiyyətlə, sözügedən Agentlikdə komandalaşmış şəxslərin olduğu bildirilir. İddialara görə, Agentlik daxilində ciddi qruplaşma hökm sürür və bu da idarəetməyə böyük təsir göstərir.
Hazırkı hadisəyə qayıdaq.
Əgər Agentliyin apardığı yoxlama zamanı tələbələrin kartına əlavə vəsait köçürüldüyü, həmin pulların sonradan tələbələrdən toplandığı və ümumilikdə 3 942 manatlıq maliyyə pozuntusunun baş verdiyi müəyyənləşdirilibsə, bu məsələnin yalnız bir neçə əməkdaşa töhmət verilməsi ilə yekunlaşdırılması da suallar doğurur.
Əgər dövlət vəsaiti ilə bağlı ciddi maliyyə pozuntusu müəyyən edilibsə, həmin faktın hüquqi araşdırmaya göndərilib-göndərilmədiyi barədə sual tamamilə legitimdir. Amma belə bir hüquqi araşdırmaya başlanılması barədə məlumat yoxdur. 3 942 manatlıq vəsaitin tələbələrdən toplandığı və mənimsənilməyə cəhd edildiyi halda, Peşə Təhsili üzrə Dövlət Agentliyi nə üçün məsələnin hüquqi qiymətləndirilməsi üçün aidiyyəti qurumlara müraciət etməyib? Yaxud diğərlərinə şiddətli töhmət və ya töhmət verilibsə, direktor əvəzi Nail Bayramov necə bu məsuliyyətdən kəönarda qalıb?
Bizimesr.media

“Aqrarkredit” QSC-nin sabiq sədri, ictimaiyyətdə “Şapka Mamed” kimi tanınan Məmməd Musayevin rəhbərlik etdiyi maliyyə şəbəkəsinin uzun illər davam edən qanunsuz fəaliyyətinin üstü açılıb. Hüquq-mühafizə orqanlarının keçirdiyi genişmiqyaslı əməliyyatlar və redaksiyamıza daxil olan şok faktlar göstərir ki, “Aqrarkredit” ətrafında cərəyan edən maxinasiyalar dövlət büdcəsinə on milyonlarla manat zərər vurulması ilə nəticələnib.
Globalinfo.az bildirir ki, ən sensasiyalı məqamlardan biri Məmməd Musayevin bacısı oğlu Süleyman Bəkirovun iştirakı ilə qurulan mexanizmdir. Mərkəzi Bank və Maliyyə Bazarlarına Nəzarət Palatası tərəfindən lisenziya verilmədiyi halda, Bank Aktivlərinin İdarə Edilməsi Agentliyi (BAİA) adlı MMC təsis edilib. “Amay” ticarət mərkəzi, “Azərinşaat Servis” və “İnter Tabako” kimi iri müəssisələrdən toplanan gündəlik və aylıq minlərlə manat nağd vəsait “Aqrarkredit”in rəsmi hesablarına deyil, birbaşa bu qanunsuz agentlik üzərindən mənimsənilib.
1 milyonluq mənzil
Bununla yanaşı, Azərbaycan Beynəlxalq Bankının Rusiyadakı toksik aktivlərinin və əmlaklarının geri qaytarılması adı altında dövlət büdcəsindən ayrılan yüz milyonlarla manat vəsait Çeçenistandakı şübhəli konsaltinq şirkətlərinə köçürülüb. Faktiki olaraq heç bir əmlak geri qaytarılmayıb, ayrılan vəsaitlərin böyük hissəsi isə “otkat” şəklində geri götürülüb.
Məmməd Musayev öz yaxın qohumlarını — qardaşı oğlu Fəzail Musayevi və digərlərini bu nəhəng sxemlərə cəlb etsə də, onlara yalnız sıravi işçi kimi aylıq məvacib verib. Məsələn, aylıq rəsmi maaşı 2500 manat olan Fəzail Musayevin qısa müddətdə Hüseyn Cavid prospektində 1 milyon manatdan baha apartament alması maliyyə qaynaqlarının mənşəyini aydın göstərir.
Saxlanılanlar var
Artıq Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsi tərəfindən keçirilən əməliyyat zamanı Məmməd Musayevin yaxın çevrəsinə daxil olan bir qrup şəxs saxlanılıb. “Şurabad quşçuluq” MMC-nin direktoru Fuad Süleymanov, “Şurabad broyler”in direktoru Tofiq Musayev (Məmməd Musayevin qardaşı oğlu), “Salyansüd” MMC-nin təmsilçisi Fazil Rüstəmov və digərləri barələrində 4 aylıq həbs qətimkan tədbiri seçilib. Onlar kənd təsərrüfatını maliyyələşdirmək adı ilə “Aqrarkredit” QSC-dən 100 milyon manatdan çox güzəştli kredit götürərək təyinatdan kənar xərcləməkdə və dələduzluqda ittiham olunurlar.
“Şapka Mamed” həbs edilə bilər
2001-ci ildən dövlətə məxsus “Aqrarkredit” QSC-yə rəhbərlik edən və bir müddət əvvəl vəzifəsindən kənarlaşdırılan Məmməd Musayev barəsində də hazırda cinayət təqibi aparılır. Toplanmış təkzibolunmaz sübutlar və saxlanılan şəxslərin ifadələri fonunda, dünyanın müxtəlif ölkələrində milyardlıq əmlaklara sahib olan sabiq sədrin özünün də yaxın günlərdə həbs ediləcəyi gözlənilir.

Son illər Azərbaycanda avtomobili girov qoyaraq lombardlardan və müxtəlif təşkilatlardan kredit adı altında pul götürənlərin sayı xeyli artıb.

Sosial şəbəkələr vasitəsilə aldadıcı reklamlar yayan belə qurumların əsas hissəsi vətəndaşlara vəsaiti ağır şərtlərlə və yüksək faizlərlə təklif edir.
Yenicag.az-a daxil olan məlumata görə, həmin təşkilatlardan biri də “S Lombard”dır.
Qızıl, avtomobil və mənzil girov götürməklə fəaliyyət göstərən bu qurumda faiz dərəcələri maksimum həddə çatıb. Reklam çarxlarında avtomobilin sürücünün özündə qalacağını və asan şərtlərlə kredit verildiyini elan edən “S Lombard” reallıqda vətəndaşları çətin vəziyyətə salır. Bildirilir ki, dəyəri 25 min manat olan avtomobili cəmi 15 min manat qiymətləndirərək girov götürən qurumun kredit faizləri faktiki olaraq 48 faizə qədər yüksəlir.

Qanunvericiliyə görə, lombard kreditlərinin rəsmiləşdirilməsi “girov bileti” vasitəsilə həyata keçirilir. Həmin sənədin forması Maliyyə Nazirliyinin 4 aprel 2016-cı il tarixli qərarı ilə təsdiq edilmiş qaydalarla tənzimlənir və girov qoyulan əşyalar bilet üzərində ətraflı təsvir olunmalıdır. Qanunvericilik qəti şəkildə nəzərdə tutur ki, lombardlarda qoyulan girov heç bir halda birtərəfli qaydada mənimsənilə bilməz. Girov yalnız açıq hərrac vasitəsilə satılmalıdır və bu prosedurlar Mülki Məcəllənin tələblərinə uyğun icra olunmalıdır.

Mülki Məcəllənin 302.7-ci maddəsinə əsasən, lombard girov predmeti olan əşyanı yalnız açıq hərracda sata bilər. Bu isə o deməkdir ki, borclu şəxsin özü də həmin hərracda iştirak edərək əşyasını geri əldə etmək imkanına malikdir.
Lakin “S Lombard”ın vətəndaşların hüquqlarını kobud şəkildə pozduğu iddia olunur. Məlumata görə, borcalanın cəmi 1 günlük ödəniş gecikməsinə yol verməsi belə qurum tərəfindən avtomobili idarə etmək üçün verilmiş etibarnamənin dərhal ləvğ edilməsi və nəqliyyat vasitəsinin vətəndaşın əlindən alınması ilə nəticələnir.

Araşdırmalar zamanı o da məlum olub ki, “S Lombard”ın sahiblərindən biri Sərval adlı şəxsdir. İddialara görə, bu şəxs tanınmış məmurlardan birinin kürəkənidir və rəhbərlik etdiyi təşkilat vasitəsilə həmin məmurun və onun ətrafının maliyyə vəsaitlərinin dövriyyəsini təmin edir.
Məsələ ilə bağlı araşdırmalarımız davam edir.(Yenicag.az)

Qarşı tərəfin də mövqeyini dərc etməyə hazırıq.

İsmayıllı rayon İcra Hakimiyyətinin keçirmək istədiyi tenderin nəticəsi ləğv olunub.
Tribuna.az xəbər verir ki, qurum Zəfər günü, 12 dekabr-Ümummilli lider Heydər Əliyevin anım günü və dünya Azərbaycanlılarının Həmrəyliy günü ilə əlaqədar olaraq tədbirlərin təşkil edilməsi xidmətlərinin satın alınmasını reallaşdıra bilməyib.
Belə ki, İcra Hakimiyyəti bu tərbilərin keçirilməsi üçün tender elan edərək, 52 min 885 manat vəsait ayırıb. Lakin quruma nəzrət orqanının qərarı ilə nəticə ləğv edilib. AİİBNDA konkret olaraq başqa səbəb göstərməyib.
Bəzi məlumatlara görə, İsmayıllının icra başçısı Nahid Bağırov dövlət rəhbərliyinin etimadını qazana bilməyib. Son zamanlar onun verilən tapşırıqları vaxtında yerinə yetirə bilməməsinin buna səbəb olduğu deyilir.
Hətta rayonda dolaşan söhbətlərə görə, Nahid Bağırov ilin sonuna qədər vəzifəsindən gedəcək.