Xırdalan şəhərində, Heydər Əliyev prospektində yerləşən “Abşeron City” Yaşayış Kompleksinin zirzəmi divarı gecə saatlarında sökülüb. Bu isə sakinlərin narazılığına səbəb olub.

Sakinlərin Bizim.Media-ya verdiyi məlumata görə, axşam saatlarında əraziyə ağır tonnajlı yük maşınları gətirilib. Kompleksin prospektə açılan hissəsində binanın zirzəmisindəki divarların söküldüyü, eyni zamanda pilləkənlərin də dağıdıldığı bildirilir.

İddialara görə, işlərin aparılmasına etiraz edən sakinlərin narazılığına məhəl qoyulmayıb. Sakinlər söküntü işlərinin əsasən axşam və gecə saatlarında həyata keçirilməsindən də narahatdırlar.

Məlumata görə, binanın zirzəmi hissəsinin satıldığı və burada hansısa ticarət obyektinin fəaliyyət göstərəcəyi ehtimal olunur.

Sakinlər hesab edirlər ki, yaşayış binasının konstruktiv hissələrində belə dəyişikliklərin aparılması müvafiq icazələr və təhlükəsizlik tələbləri baxımından araşdırılmalıdır. İşlərin sürətlə aparılması və sökülən materialların ərazidən daşınması isə sakinlər arasında əlavə suallar yaradıb.

Bundan başqa, ağır yük maşınlarının əraziyə daxil olması binanın qarşısındakı yol örtüyünə də zərər vurub. Sakinlərin sözlərinə görə, yolun vəziyyəti ağır texnikanın hərəkətindən sonra daha da pisləşib.

Hazırda söküntü işlərinin hansı əsasla aparıldığı, zirzəminin kommersiya obyektinə çevrilməsi ilə bağlı müvafiq icazələrin olub-olmaması və binanın təhlükəsizliyinə hər hansı riskin yaranıb-yaranmadığı açıq olaraq qalır.

Məsələ ilə bağlı Abşeron rayon İcra Hakimiyyəti heç bir açıqlama vernəyib.

Bizimesr.media

VİDEO LİNKDƏ: https://bizimesr.media/az/post/abseron-cityde-zirzemi-divarlari-gece-ile-sokuldu---sakinler-narahatdir---video-23019

Keçən günlərdə Kompleks Qazma İşləri Trestinin rəhbərliyinin özbaşınalığı ilə bağlı işçilər adından edilən müraciəti təqdim etmişdik və bildirmişdik ki, sözgüedən qurumun insan resursları departamentinin rəisi Ömər Balacayev də bu gün BALACA PADŞAH hesab etdiyindən əsl oliqarx həyatı yaşçayır və təbii ki, Kompleks Qazma İşləri Trestinin hesabına... burada cərəyan edən qara-qura işlərin sayəsində...
"DİA-AZ"a bu barədə yazan işçilərdən biri iddia edir ki, Ömər Balacey hazırda İtaliyada dincəlir...

Müraciətdə dha asonra bildirilir: "İtaliyada dincəlir Ömər Balacayev, hansı pulların hesabına? Bunu soruşan varmı?
Şəxsən mən özüm 3 uşaq atası olaraq yalnız uşaqlarımın yemək və geyimini təmin etmək üçün çalışıram. Yənialdığım maaş ancaq buna yetir və zar-zorla... Mənim fikirdən ay yarımdan çoxdur ki səhhətimdə problemlər yaranıb bu haramzadələrin əlindən. "Ekonom"-"ekonom" deyə-deyə bağırırlar... Amma onlara aid deyil bu "ekonom" adlı bəhanə... QƏNAƏT REJİMİ...

İşçinin məvacibinə göz dikməyə başlayıblar artıq. Dənizdə və quruda qazılan quyuların hamısında qəzalar olur. Ardıcılıqla neçə-neçə milyonluq firmaların alət və avadanlıqları quyuda qalır. Niyə? Baş mühəndis və müdirin birinci müavini Qabil Razyevin savadsız iş prinsipindən irəli gəlir. Niyə bəs bu vəzifəsində qalır? Rəşad Əsgərov çıxsın önə cavab versin haqqını yediyi işçilərə... Şəxsən biri mən... işçilərə cavab versin. Ancaq fikirləşdiyi qazmanı dağıtmaq və şəxsi MMC yaratmaqdır... Nəticədə Ömərt Balacayev kimi quldur şəriklər faydalanır... əsas işi görən işçilər isə ehtiyac içindəı - işini itirmə qorxusu ilə üz-üzə qalır..."

​"DİA-AZ"

Avqustun 20-də abortdan sonra vəfat edən Tovuz rayon sakini Lalə Quliyevanın ölümü ilə bağlı bəzi təfərrüatlar məlum olub.

Qeyd edək ki, TƏBİB 24 yaşlı qadının Sabunçu Tibb Mərkəzinə artıq ölü vəziyyətdə gətirildiyini açıqlayıb. Rəsmi məlumatda onun hamiləliyini hansı tibb müəssisəsində sonlandırdığı isə qeyd edilməyib.

“Bakupost”un əldə etdiyi məlumata görə, Lalə Quliyeva Sabunçu Tibb Mərkəzinə “Vita Med Hospital”dan göndərilib. Onu həmin klinikada qəbul edən mama-ginekoloq Yadigar Hüseynova olub.

Yadigar Hüseynova ilə əlaqə saxladıq. O, “Bakupost”a bildirdi ki, Lalə Quliyevanı hospitala artıq qanaxma fonunda qəbul edib:

"Onlar mənim kəndçimdirlər. Avqustun 20-si anası mənə zəng etdi ki, Masazırdayıq, qızın halı pisdir, qanaxması var. Dedim, mən orada nə edə bilərəm? İşlədiyim yerə - “Vita Med Hospital”a gəlin.
Qanaxma fonunda gəliblər . Bizim klinikada olanda huşu aydın idi, danışırdı. Qan itirmişdi, təzyiqi düşmüşdü. Biz lazımi tədbirləri gördük, təzyiqi normallaşdırıldı və protokol qaydasında Sabunçu Tibb Mərkəzinə göndərildi.

USM yox idi. Biz həmin anda heç nəyi dəqiq təyin edə bilmirdik. Yalnız ilkin müdaxilə edib təzyiqini normallaşdırdıq və təcili tibbi yardımla göndərdik. Günün ikinci yarısı olduğuna görə qan bankı yox idi, lazımi tədbirləri görə bilməyəcəyimiz üçün onu axşam saat 6-7 radələrində, təxminən 40 dəqiqəyə dövlət klinikasına göndərdik.
"Vita Med”də abort əməliyyatı keçirilməyib”.

Həkimin açıqlamasından məlum olur ki, Lalə Quliyeva “Vita Med Hospital”a Masazırdan gətirilib.

Qadının harada hamiləliyini sonlandırması suallarına hələlik cavab tapılmır.

Məsələ ilə bağlı araşdırmamız davam edir.

“Bakupost”

Penitensiar Xidmətin sabiq rəisi general Ceyhun Həsənovun tapşırığı ilə təsərrüfatlara gedən suyun qabağı kəsilib, fermerlə nöyük miqdarda ziyan dəyib

Salyan rayonunda bir neçə təsərrüfatın su təminatının dayandırılması ilə bağlı ciddi şikayət daxil olub.
Şikayətçinin sözlərinə görə, general Ceyhun Həsənov rayonda balıq, toyuq və mal-qara təsərrüfatı ilə məşğuldur. İddia olunur ki, "Salyan Aqro Park”ın əməkdaşları texnikanın köməyi ilə bir neçə təsərrüfata gedən su kanalını palçıq və torpaqla bağlayaraq təsərrüfatların su təminatını faktiki olaraq məhdudlaşdırıblar.
Bu iddialar təsdiqlənərsə, söhbət sadəcə təsərrüfatlar arasında yaranmış mübahisədən yox, insanların illərlə qurduğu biznesə və onların dolanışıq mənbəyinə ciddi müdaxilədən gedir. Xüsusilə heyvandarlıq, quşçuluq və balıqçılıq təsərrüfatlarında suyun kəsilməsi böyük maddi zərərə və canlıların tələf olmasına səbəb ola bilər. Daha ciddi məqam isə şikayətçinin irəli sürdüyü iddialarda "Salyan Aqro Park”ın bu addımlarının vaxtilə Penitensiar Xidmətin rəisi vəzifəsində çalışmış general Ceyhun Həsənovun tapşırığı ilə həyata keçirildiyinin bildirilməsidir.
Bundan əvvəl də mediada Ceyhun Həsənovun Salyan rayonunda donuz fermasının olduğu barədə müxtəlif iddialar yayılıb. Hazırkı şikayətlə həmin məlumatların arasında hər hansı əlaqənin olub-olmadığı isə ayrıca araşdırma tələb edən məsələdir.
Ən düşündürücü məqamlardan biri isə rayon səviyyəsində aidiyyəti qurumların bu vəziyyətə münasibətinin olub-olmamasıdır. İddialar doğrudursa, Salyan Rayon İcra Hakimiyyətinin başçısı Rüstəm Xəlilov və kənd təsərrüfatı naziri Məcnun Məmmədovun bu məsələ ilə bağlı mövqeyi ictimaiyyət üçün maraqlıdır.
Bir neçə təsərrüfatın su mənbəyinin bağlanması, əgər bunun qanuni əsasları yoxdursa, ciddi sual doğurur: Kim bir sahibkarın və ya təsərrüfat sahibinin fəaliyyətinə belə müdaxilə etmək səlahiyyətini özündə görür?
Dövlət sahibkarlığın inkişafını, kənd təsərrüfatının genişləndirilməsini və regionlarda məşğulluğun artırılmasını prioritet elan etdiyi halda, ayrı-ayrı təsərrüfatların hansısa şəxsin şəxsi maraqları və ya göstərişi əsasında zərər görməsi barədə iddialar xüsusilə ciddi araşdırılmalıdır.
Əgər doğrudan da illərlə qurulan təsərrüfatların fəaliyyəti bir şəxsin maraqları naminə məhdudlaşdırılırsa, bu, təkcə sahibkarların deyil, bütövlükdə dövlət qurumlarına olan etimadın zədələnməsinə səbəb ola bilər. Belə vəziyyətin davam etməsi isə Salyanda sosial gərginliyin artmasına və yeni narazılıqların yaranmasına zəmin yarada bilər.
Yazıda adı çəkilən "Salyan Aqro Park”, general Ceyhun Həsənov, Salyan Rayon İcra Hakimiyyətinin başçısı Rüstəm Xəlilov və kənd təsərrüfatı naziri Məcnun Məmmədovun mövqeyini dərc etməyə hazırıq.
Qeyd edirik ki, yazıda səsləndirilən məlumatlar redaksiyaya daxil olan şikayət və iddialar əsasında hazırlanıb. Faktların hüquqi və rəsmi şəkildə araşdırılması aidiyyəti dövlət qurumlarının və hüquq-mühafizə orqanlarının səlahiyyətindədir.

7NEWS.az

Barəsində rayon prokurorluqlarında cinayət işi üzrə araşdırma aparıldığı bildirilən Seymur Məmmədov hansı klinikalarda qanunsuz estetik əməliyyatlarını davam etdirir?

Bir neçə gün əvvəl Kəpəz Hospitalda Almaniya vətəndaşı, Türkiyə əsilli Tulin Turpun keçirdiyi plastik əməliyyatdan sonra vəfat etməsi barədə məlumat yayılıb. KİV-də yayılan məlumatlara görə, əməliyyatı estetik cərrahiyyə fəaliyyəti üzrə sertifikatının ləğv edildiyi bildirilən həkim Seymur Məmmədov həyata keçirib.Bu məsələ artıq yalnız bir şəxsin peşə fəaliyyəti ilə bağlı deyil. Burada daha ciddi sual yaranır: estetik tibbi fəaliyyət üçün müvafiq sertifikatı olmayan həkim necə əməliyyat həyata keçirə bilib?Mediatvaz.combildirir ki məsələnin daha da ciddiləşməsinin səbəbi isə ötən il yayılan digər rəsmi məlumatlardır.İctimaiyyətə məlum olan məlumatlara əsasən, ötən ilin mart ayında Pərvanə Mirzəyeva, avqust ayında isə Nilufər Abdulla estetik əməliyyatdan sonra vəfat edib. Hər iki əməliyyat Seymur Məmmədov tərəfindən həyata keçirilib. Tulin Turpun ölümü isə, artıq üçüncü ölüm hadisəsi barədə ciddi araşdırma zərurətindən gedə bilər.Burada ən vacib məsələ ittiham irəli sürmək deyil.Əsas məsələ budur: bu ölümlərin hər biri üzrə tibbi ekspertiza hansı nəticəyə gəlib? Redaksiyamıza daxil olan digər məlumata görə, Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin Komisyon Ekspertizalar şöbəsinin rəisi Cavid Cahangirovun da bu məsələlərlə bağlı adı hallanır. İddialara görə, Cavid Cahangirov Seymur Məmmədova yaxın şəxslərdən biri hesab olunur və onun bir sıra işlərinə dəstək verdiyi bildirilir.Cavid Cahangirovun Seymur Məmmədovla hər hansı əlaqəsinin olub-olmaması, ekspertiza proseslərində hansı rolu oynadığı və hər hansı təzyiq və ya müdaxilənin baş verib-vermədiyi müvafiq qurumlar tərəfindən aydınlaşdırılmalıdır. Digər mühüm iddia isə Seymur Məmmədovun sertifikat məsələsinə baxmayaraq estetik əməliyyatları müxtəlif klinikalarda bu gündə davam etdirməsi ilə bağlıdır. Estetik cərrahiyyə fəaliyyəti üçün sertifikatı ləğv edilmiş Seymur Məmmədov,başqa klinikada hansı hüquqi əsasla əməliyyat həyata keçirə bilər? Klinikalar belə bir həkimlə hansı əsasla əməkdaşlıq edir? Onun həmin tibb müəssisələrində əməliyyat aparmasına kim icazə verir? Əməliyyatlar klinikanın rəsmi sənədlərində qeydiyyata alınırmı? Həkimlə tibb müəssisəsi arasında əmək müqaviləsi və ya digər hüquqi əsas mövcuddurmu? İctimaiyyətin cavab gözlədiyi suallar kifayət qədərdir:Cavid Cahangirovun həmin ekspertizalarda rolu nə olub? Ekspertiza nəticələrinə hər hansı müdaxilə və ya təzyiq göstərilməsi barədə araşdırma aparılıbmı?
Sertifikatı ləğv edilmiş həkimin əməliyyat aparmasına şərait yaradan klinikalar hansılardır? Bu sualların cavabı yalnız bir həkimin deyil, səhiyyə sistemində nəzarət mexanizmlərinin işləyib-işləmədiyinin göstəricisi olacaq. Məsələ susmaqla bağlanacaq məsələ deyil. Söhbət insan həyatından, tibbi məsuliyyətdən və ictimai nəzarətdən gedir. Redaksiyamız araşdırmanı davam etdirir.Qanunsuz əməliyyatların hansı klinikalarda aparıldığı barədə məlumatları yaxın günlərdə ictimaiyyətə açıqlayacağıq.Xatırladaq ki, Nilufər Abdullanın ölümü ilə bağlı Yasamal Rayon Prokurorluğunda aparılan istintaq işi hələ tamamlanmayıb. Bu isə həmin ölüm hadisəsinin səbəbləri və tibbi müdaxilənin nəticələri ilə bağlı yekun hüquqi qiymətin hələ verilmədiyini göstərir.Almaniya vətəndaşı, Türkiyə əsilli Tulin Turpun ölümü ilə bağlı isə Nəsimi Rayon Prokurorluğunda cinayət işi başlanıldığı bildirilir.
Qarşı tərəfin cavab haqqını tanıyırıq
Mediatvaz.com

“Neftqaztikinti” trestinin rəhbəri Qağaməli Seyfullayevlə bağlı ilginc iddiaların yer aldığı məlumatlar almışıq. "Dia-az" SOCAR-dakı mənbələrə istinadən xəbər verir ki, hal-hazırda "yuxarıların" qərarı ilə “Neftqaztikinti” trestinin maliyyə fəaliyyəti ciddi şəkildə təftiş olunur.

Hələlik,qurumla bağlı araşdırmanın kənardan aparıldığını iddia edən mənbə bunları əlavə edir:

"Yaxın günlərdə Maliyyə Nazirliyi və Hesablama Palatasının ekspertlərinin də iştirakı ilə böyük araşdırmaya qərar verilə bilər. Burada söhbət 44 milyonluq büdcə vəsaitinin taleyindən gedir. Məsələ təkcə “Neftqaztikinti” trestinin hazırki rəhbəri Qağaməli Seyfullayevlə bitmir, ondan əvvəlki dönəmi də əhatə edir. Amma Qağaməli Seyfullayvin dövrü də ciddi təftişə götürülüb.

Ola bilsin ki, bu prosesdə hətta həbslər də olsun. Bunu zamanla görəcəyik..."

Əlavə bilgilərimiz olacaq...

Dia-az

Nizami rayonu, Özbəkistan küçəsində yerləşən böyük yaşıllıq ərazinin məhv edildiyi bildirilir.

Biziməsr.media xəbər verir ki, ərazidən çəkilən videogörüntülərdən ağacların kökündən çıxarıldığı və burada hündürmərtəbəli binaların tikintisi üçün hazırlıq işlərinin aparıldığı görünür.

Maraqlıdır ki, şəhərin və rayonun yaşıllıqlarının qorunmasına cavabdeh qurumlar haradadır?
Ekologiya və Təbii Sərvətlər Nazirliyi və Nizami Rayon İcra Hakimiyyəti öz ərazilərindəki yaşıllıqların məhv edilməsinin qarşısını niyə ala bilmir?
Sağlam ağacların hansı əsasla kökündən çıxarılmasına və həmin ərazidə tikinti aparılmasına kim razılıq verib?

VİDEO LİNKDƏ:
https://bizimesr.media/az/post/nizami-rayonunda-yasilliq-erazisi-mehv-edildi----agaclari-kim-ve-hansi-esasla-kesir---video-23009
Bakıda hər boş və yaşıllıq ərazinin hündürmərtəbəli binaların tikintisinə qurban verilməsi hansı şəhərsalma siyasətinin tərkib hissəsidir?

Digər tərəfdən, sağlam ağacların məhv edilməsi yalnız bir ərazinin problemi deyil. Bu, Bakının onsuz da ciddi ekoloji problemlərlə üzləşdiyi bir vaxtda şəhər sakinlərinin təmiz hava və sağlam mühit hüququna da birbaşa təsir edir.

Özbəkistan küçəsindəki ağacları kim kökündən çıxarır və onların yerində hansı tikintiyə hazırlıq görülür?

Aidiyyəti qurumlara göndərilən sorğuların cavabsız qalması isə narahatlığı daha da artırır. Cavab verilmədikcə ağacların məhv edilməsi və tikinti işlərinin davam etməsi cəmiyyətdə haqlı suallar doğurur.

Bizimesr.media

"Bu fotoları Təbriz küçəsində yerləşən "Rahatmarket"in qastronomiya şöbəsində çəkmişəm..." Bunu yazan narazı vətəndaş aşağıdakı fotoları da təqdim edib...

Narazı vətəndaş daha sonra bildirir: "Ortalıqda tarakan gəzirdi. Hadisə 10 avqustda baş verib. İlk öncə nəzarətçiyə bildirdim, tövsiyə etdim ki, dezinfeksiya edilsin.
Ancaq 24 saat ərzində hər şey olduğu kimi qalırdı. Həmin anda Azərbaycan Qida Təhlükəsizliyi Agentliyi ilə əlaqə saxladım. Şikayəti qeydə aldılar. 10 gün keçsə də, bir xəbər yoxdur.
Onlar ölçü götürmürsə, ən azı bu yazını oxuyan nəzərə alsın və oradan qida almasın..."

Dia-az

Bu günlərdə mediada Azərbaycanın təhsil sistemində STEAM layihəsi üzrə ən böyük büdcə ayırmaları, STEAM avadanlıqlarının satınalınması prosesində büdcə vəsaitlərinin mənimsənilməsinə söykənən, ciddi suallar yaradan çoxqatlı mexanizmin formalaşması barədə geniş məlumat yayılmışdı. Məlumatda bildirilir ki, ETN-də mənimsəmə və korrupsiya zənciri olduğu ciddi şübhələr yaradan prosesin mərkəzində dayanan şəxs “İSTEAM” MMC-nin rəhbəri Nihad Hənifəyevdir. N.Hənifəyev isə Elm və Təhsil naziri Emin Əmrullayevin qaynıdır.
Apardığımız araşdırma zamanı məlum oldu ki, “İSTEAM” MMC-nin rəhbəri qrup daxilində satınalma və inzibati zəncirin digər idarəedici halqasının mərkəzində dayanan şəxs Zamiq Əlövsət oğlu Məmmədov nazir Emin Əmrullayevin sinif yoldaşıdır.
Nazirin başqa bir sinif yoldaşı Valeh Mirzəliyev isə – Sifarişçi qurum olan Elm və Təhsil Nazirliyinin Ərazi Tikinti Təchizat İdarəsinin rəisi vəzifəsində çalışır.
Qeyd edək ki, Elm və Təhsil Nazirliyi tərəfindən STEAM layihəsinə atrılan pullar respublika üzrə təhsil müəssisələrində təmir və kommunal-kommunikasiya işlərinin satınalınmasına ayrılan pulların yanında çox cüzi görünür.
Aktualinfo bununla bağlı silsilə araşdırma yazılar dərc edib. Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsinin respublika üzrə bir sıra təhsil müəssisələrinin əsaslı təmir işlərinin və digər işlərin satınalınması üzrə yalnız “Mühəndislik Tikinti Təchizat” Məhdud Məsuliyyətli Cəmiyyəti ilə bağladığı müqavilələrin dəyəri yüz milyonları ötüb.
Satınalmaların portalına yerləşdirilmiş məlumata görə Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi 20.08.2026-cı ildə respublika üzrə təhsil müəssisələrində təmir və kommunal-kommunikasiya işlərinin satınalınması ilə əlaqədar “Mühəndislik Tikinti Təchizat” QSC VÖEN-i: 2005667751) qalib elan olunmuş və həmin təchizatçı ilə 9.084.195,52 manat məbləğində satınalma müqaviləsinin bağlanması nəzərdə tutulub.
Qeyd edək ki, Elm və Təhsil Nazirliyinin Tikinti Və Təchizat İdarəsi ilə “MÜHƏNDİSLİK TİKİNTİ TƏCHİZAT” QSC arasında satınalmaların portalına yerləşdirlimiş məlumatlara görə 2021-ci ilin sentyabrından bu yana ümumi dəyəri yüz milyonlarla olan 30-a yaxın satınalma müqaviləsi bağlanılıb. Hamısı da bir sıra təhsil müəssisələrində istilik sistemləri və elektrik təchizat işləri, dam örtüklərinin əsaslı təmiri işləri, orta məktəbinin cari, əsaslı təmiri işləri üzrə.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “MÜHƏNDİSLİK TİKİNTİ TƏCHİZAT” (VÖEN: 2005667751) Qapalı Səhmdar Cəmiyyətinin 04.06.2019-cu il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2010.00 manat olan QSC-nin hüquqi ünvanının, BAKI ŞƏHƏRİ XƏTAİ RAYONU,RAMİZ QULİYEV, ev.15A, qanuni təmsilçisi kimi isə Mahmudlu Eltun Ənvər oğlu qeyd olunub.
Vergi öhdəlikləri üzrə 2020- 2023-cü illərdə Vergi Məcəlləsinə uyğun olaraq vergi hesabatını və ya onu əvəz edən arayışı vaxtında təqdim etməməyə görə dəfələrlə maliyyə sanksiyası tətbiq edilmişdir.
Reyestrə edilmiş dəyişikliklərdə Məhdud Məsuliyyətli Cəmiyyət kimi dövlət qeydiyyatına alınıb. 24.02.2022-ci ildə təşkilatı hüquqi formasını dəyişərək Qapalı Səhmdar Cəmiyyətinə çevrilib. Təsisçisi və ilk qanuni təmsilçisi Aqayev Fərhad Surəddin oğlu olub.
Bəs Aqayev Fərhad Surəddin oğlu kimdir?
Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsinin yanğın mühafizə sistemlərinin alınıb-quraşdırılması işlərinin satınalınması üzrə milyonlarla manat dəyərində müqavilə bağladığı “ELEMENT YT” QSC -nin də təsisçisi və ilk qanuni təmsilçisi.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “ELEMENT YT” (VÖEN: 2005410371) Qapalı Səhmdar Cəmiyyətinin 16.01.2019-cu il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2010.00 manat olan QSC-nin hüquqi ünvanının, BAKI ŞƏHƏRİ XƏTAİ RAYONU, 8 NOYABR, ev.15, qanuni təmsilçisi kimi isə Paşayev Mətləb Allahverdi oğlu qeyd olunub.
Reyestrə edilmiş dəyişikliklərdə Məhdud Məsuliyyətli Cəmiyyət kimi dövlət qeydiyyatına alınıb. 25.01.2022-ci ildə təşkilatı hüquqi formasını dəyişərək Qapalı Səhmdar Cəmiyyətinə çevrilib. Təsisçisi və ilk qanuni təmsilçisi Aqayev Fərhad Surəddin oğlu olub.
Tikinti Və Təchizat İdarəsinin “ELEMENT YT” QSC ilə işbirliyi də çoxdan başlayıb.Satınalmaların portalına yerləşdirilmiş məlumatlara görə “Element YT” QSC son dörd il ərzində Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi ilə yanğın mühafizə sistemlərinin alınıb-quraşdırılması işləri üzrə ümumi dəyəri 75 milyon manatdan çox dəyəri olan müqavilələr bağlayıb.
Göründüyü kimi Elm və Təhsil Nazirliyinin Əsasli Tikinti Və Təchizat İdarəsi bir nəfərə bağlı olan “ELEMENT YT” QSC və “MÜHƏNDİSLİK TİKİNTİ TƏCHİZAT” QSC -lərlə daim işbirliyindədir.
Qeyd edək ki, Azərbaycan Respublikası Nazirlər Kabinetinin “Kommersiya təşkilatlarının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi və dərc edilməsi Qaydaları”nın təsdiq edilməsi haqqında 2010-cu il 27 may tarixli, 97 nömrəli qərarı var. Həmin qərarın 5-ci ( İllik maliyyə hesabatlarının və birləşdirilmiş (konsolidə edilmiş) maliyyə hesabatlarının dərc edilməsi) bəndində göstərilir ki,
5.1. “Dövlət sirri haqqında” və “Kommersiya sirri haqqında” Azərbaycan Respublikası qanunlarının tələbləri nəzərə alınmaqla, ictimai əhəmiyyətli qurumlardan və birləşdirilmiş (konsolidə edilmiş) maliyyə hesabatlarını hazırlayan kommersiya təşkilatlarından (mikro və kiçik sahibkarlıq subyektləri istisna olmaqla), habelə dövlət zəmanəti ilə kredit alan və ya dövlət borcunun xərclənməsi ilə bağlı layihələrdə iştirak edən, həmçinin büdcədən subsidiya, subvensiya, qrant və ya müəyyən səlahiyyətlərin yerinə yetirilməsi ilə bağlı büdcə vəsaiti ayrılan kommersiya təşkilatlarından həmçinin aşağıdakılar tələb olunur:
5.1.1. qurumun internet səhifəsi olduqda, həmin məlumatlardan sərbəst istifadə edilməsini təmin etmək şərtilə, illik maliyyə hesabatının və birləşdirilmiş (konsolidə edilmiş) maliyyə hesabatlarının qanunla müəyyən edilmiş hallarda auditor rəyi ilə birlikdə həmin internet səhifəsində və ya mətbu orqanda dərc olunması;
Amma internet axtarış sistemləri üzərindən apardığımız araşdırmada “MÜHƏNDİSLİK TİKİNTİ TƏCHİZAT” və “ELEMENT YT” QSC-lərin son illər büdcədən müəyyən səlahiyyətlərin yerinə yetirməsinə baxmayaraq illik maliyyə hesabatları barədə heç bir məlumat aşkar edə bilmədik.
Bu şirkətlərin dövlət qeydiyyatına alındıqları tarixlərin, təşkilatı hüquqi formasını dəyişərək Qapalı Səhmdar Cəmiyyətinə çevrildikləri tarixlərin və hüquqi ünvanlarının yaxınlığı deməyə əsas verir ki, bir nəfər tərəfindən idarə edilir. Açıq mənbələrdə barəsində məlumat olmayan Fərhad Aqayevdən başqa bu şirkətlərin arxasında daha güclü bir nəfərin də olduğu istisna deyil. Valeh Mirzaliyev də məhz o bir nəfərin sifarişlərini həyata keçirir.
Göründüyü kimi, Elm və Təhsil Nazirliyi hər il respublika üzrə təhsil müəssisələrinin əsaslı təmiri və digər işlərin həyata keçirilməsinə yüz milyonlarla manat vəsait ayırır. Nazir Emin Əmrullayev ayrılan bu milyonlara nəzarəti sinif yoldaşı Valeh Mirzaliyevə tapşırıb. Nazirliyin Təsərrüfat Hesabli Əsasli Tikinti Və Təchizat İdarəsinin rəisi olaraq Valeh Mirzaliyev də yaxın çevrəsinə məxsus formal şirkətlərlə işbirliyi qurub təhsil sisteminin inkişafına yönələn büdcə vəsaitlərini talan edir. Burada Valeh Mirzaliyevin qazancı yalnız nazirin sinif yoldaşı olması deyil, həm də əlavə dividentlərdir ki, hesablanması mümkün deyil.


Aktualinfo.net

“Azərbaycan Dəmir Yolları”nın xidmətindən narazıyam. Bu gün bizi Gəncəyə 2 saat gecikmə ilə çatdırdılar.
Tribuna.az xəbər verir ki, bunu şikayətçi Leyla Turan sosial şəbəkə hesabında yazıb. O, bu vəziyyətdən narazılığını bildirib:
“Sərnişin üçün fərq etmir — insan yolunu planlaşdırır və vaxtında çatacağına güvənir.
11.55-də olmalıydıq Gəncədə. Gəlib çatmışıq 13.45-də. Olmaz axı belə. Hər kəs narazılığını bildirdi.
İnsanlar saatlarla yolda qalacaqsa, bu, heç də yaxşı təəssürat yaratmır”.
Digər şikayətçi Azər Qurbanov da bildirib ki, Tiflisə gedən qatar da gecikir:
“Qiymətlər qalxdıqca xidmət keyfiyyəti düşür aşağı. Bu yaxınlarda Bakı-Tiflis-Bakı qatarında da 2 saat gecikmə ilə qarşılaşdıq. Bütün sivil dövlətlərdə qatar gecikdikdə sərnişinlərdən üzür istənilir, günahkarlar cəzalanır. Bizdə isə belə hadisə təbii qarşılanır. Narazılıq edənə isə “demaqoq” damğası vurmağa çalışırlar. Çox təəssüf”.
Sərnişinlərin çoxu bildirir ki, ADY qatarlarında gecikmə adi hal alıb.